غموض جارنا
الكاتبة يمامة
أرينا
بقيت فاكة حلگي واباوعلها بصدمة احاول استوعب الگالتة
قاطع صفنتي صوت اندي وهي تگول شگلتي عيني عيدي عيدي
جاوبت بتكبر مثل ما سمعتي اني زوجتة السابقة وام ابنة
اندي بقت تباوعلي بصدمة واني الطم بداخلي عزا العزاني محد من اهلي يعرف آدم مزوج وحسوني ابنة انلاصت
گالت وهي تحرك عيونها بيني وبين اندي اي عيوني شنو ما راح تگولين تفضلي
جاوبت اندي بسرعة وشمدرينا انتي زوجتة يمكن وحدة من تريد تسويلنة شي موزين نريد اثبات
ردت گالت ما حاجة اثبات آدم يعرفني واذا تريدون سألو
رادت اندي تحجي بس اني قاطعتها وگلت للبنية اعتذر بس هسة آدم ما موجود عندة شغل عود تعاي غير يوم
اشو هاي عبالك ما سمعت شحجيت دفعتني ودخلت للبيت وصوت كعبها واصل لسابع جار بقيت فاگة حلگي على جرأتها شنو قلة الادب هاي
اندي سدت الباب وتقربت مني سحبتني من ايدي گالت بعدين نحجي واعرف شنو القصة بس امشي نروح شنو تريد طليقة زوجج المصون مشينا للداخل
واندي گالت ادخلي للصالة واني هسة اجي
دخلت وهي راحت للمطبخ لگيت هاي المرة حاطة رجل على رجل وتباوع بارجاء الاستقبال
رحت اتمشى على كيفي گعدت عالقنفة مقابيلها بقيت ساكتة ما اعرف شحجي وهي ما اعرف شوكت تحجي وتفضها
قاطع هالصمت دخول اندي وهي شايلة بيدها صينية بيدها گلاصين مي انطت مي الي والها وحطت الصينية عالميز
اتعجبت من جانت اكو بالصينة سجينة گمت الطم عزا بعينها شتريد تسوي هاي الخبلة
مشت بطريقة مستفزة وراحت گعدت حطت رجل على رجل ورجعت خصل من شعرها بغرور
طليقة آدم بقت تباوع عالسجين باستغراب رفعت عيونها باتجاه اندي وكانها تگول شنو هاي شسوين بيها
گالت اندي ببرود اعرف تسألين شنو هالسجين بس الواحد لازم ياخذ احتياطاتة شمدرينا ما جاية علمود تأذينة
باوعت بعصبية وكانها تريد تگوم تكتل اندي بس سيطرت على نفسها وگالت ببرود: اني اليوم جيت علمود التقي بآدم لان اريد اخذ ابني
باوعتلها بصدمة شتحجي هاي شنو ابنها شنو تريد تاخذة وهي عافتة من جان عمرة شهور هسة اتذكرت عدها ابن هسة تذكرتة هاي يمكن شاربة نفط وجايتنة
جاوبتها بهدوء واني بالگوة لازمة نفسي ما اگوم اموتها: عفوا يمكن ما سمعت زين او كلامج بي غلط يا ابن تقصدين وانتي تركتي من جان بعدة عمرة يمكن شهرين وحتى ما سألتي علي بحجة زوجج الجديد ما يقبل يربي جهال غيرة شنو تغير هسة يعيوني
گالت ببرود: اني اطلگت منة لان طلع عقيم وهسة حسيت نفسي محتاجة ابني ومشتاقتلة اريد يبقى يمي وهو كذلك شي اكيد يريدني
جاوبتها بعصبية: ما علينا بيج وبزوجج وحسوني اصلا ما يعرفج لو جنت من صدگ تحسين بالامومة جان ما تركتي من جان طفل ومحد جبرج تتركينة
ردت گالت: اني بذيج الفترة جنت صغيرة وطايشة ما احس بالمسؤولية بس هسة الوضع تغير
حجت اندي بنبرة مستفزة: اي عيني هسة الوضع تغير لان بقيتي بدون رجال فگلتي ليش ما ارجع لآدم هم حلو وهم عندة فلوس شكد حية انتي لهدرجة ما تگدرين تبقين بدون رجال
عيونها رادن يطلعن من مكانهن گالت: بعصبية انتي شكد ما تستحين وما عندج احترام ما تعرفين من الكبار يحجون لازم الصغار يلصمون
ردت اندي وگالت بضحكة: بقيت الاحترام الج واسفة حجية عالمقاطعة
يالله اخر كلمة گالتها اندي ذيج گامت من مكانها ورادت تهجم على اندي بس بنفس اللحظة دخل آدم وهو شايل بيدة علاليك
لحظات من الصمت مرت محد نطق بحرف آدم بقى واگف مصدوم يمكن ما متوقع راح ترجع او يشوفها وهي تباوعلي بنظرات عبالك تريد ناكلة شكد ما تستحي فورت دمي شلون هيج تباوعلة وهو طليقها
قاطع هالصمت دخول حسوني يركض جان شايل بيدة علاگة تقرب مني يركض وهو يصيح ماما ماما
وصل يمي وبدة يطلع الغراض من العلاگة نزلت لمستواه جان يگول ماما شوفي حذاء جديد بقى يشوفني وهو فرحان
باوعت لطليقة آدم لگيتها كلش معصبة وهي تباوع علينا شلت حسوني وحضنتة بخوف
توجه آدم وگعد عالقنفة براحة كان ماكو شي حجى من بعد سكوت طويل وگال: اهلا ميسم شلونج شذكرج بينة هسة
گالت بهدوء عكس شكلها: اهلا بيك عيوني وما طول جيت انت خل ادخل بالمفيد بدون لف ودوران الصراحة اني جاية اخذ ابني اني اريد اربي ويبقى يمي
حگ حاجبة وگال بهدوء: جيد رايدة شي بعد
جااوبت بارتباك وكانة ما سمعت شگال: اي عيوني اني امة ولازم يتربى يمي وبعد ما اريد اي شي سلامتك
گال بهدوء: مثل ما اتذكر انتي تركتي من جان عمرة اربع شهور وگلتي ما اتحمل مسؤوليتة فباي حق تجين هسة واطالبين يتربى يمج المهم عزيزتي اني ما عندي وقت واذا رايدة شي روحي للمحاكم وهناك نتفاهم وان شاءلله يكون كلامي واضح افتهمتي
گامت بعصبية شالت جنطتها وگالت: نشوف عيوني المحاكم بيناتنا ونشوف يم منو راح يبقى بس صدگني حسين راح اخذة يمي وشكد ما تحاول تبعدة راح يكون مردة الي
طلعت وهي اطگ بكعبها عبالك تريد تكسر الگاع گامت اندي وراها وبقينا بس احنا
حطيت حسوني عالقنفة وتقدمت يم آدم ردت احجي بس حط ايدة على شفايفي وگال بتعب: بس خل اسبح ووراها عود نحجي وبلا زحمة ممكن تسويلي جاي لان احس راسي راح ينفجر
هزيتلة راسي بدون كلام وتقربت من حسوني وديتة للصالة وطلعتة افلام كرتون علمود يلتهي بي
اتجهت للمطبخ اسوي الجاي ورا دقايق دخلت اندي وجبرتني احجيلها كلشي فحجيتلها بس على زواجة وحلفتها ما تگول لاي احد وهي شجعتني بحماس وگالت ديري بالج على رجلج لا تاخذة لان امبينة كوبرا موتيها ودافعي على حبج الوحيد
عافتني وراحت واني بقيت اضحك على حجيها شكد خبلة
جنت احضر الكلاصات وبنفس الوقت دخل آدم جان شايل بيدة الخاولي وينشف بشعرة ولابس تراكسود رصاصي طالع يجنن فديتة على گولت اندي يشبه اليونانين
قاطع تأمل آدم وهو يضحك ويگول يمعودة أري وين رحتي ترا الجاي راح يحترك
بسرعة طفيت الجاي واني احس نار بوجهي من الخجل شلون موقف يفشل
جر كرسي وگعد واني وديت الجاي حطيتة عالميز وگعدت
هو جر كلاصة وصار يشربة بدون اي كلام بقيت افرك ايدي من التوتر اخر شي هديت نفسي وگلت
_آدم صدگ طليقتك راح تاخذ حسوني
_لا خل تولي ما تگدر شنو قابل بكيفها شوكت ما تريد تعوفة وشوكت ما تريد ترجعة خليها تبقى تهوبز
_بس هي شي اكيد راح تروح للمحكمة واطالب بي والقاضي راح يحكم لصالحها
_لا ما يصير لان هي من هو وصغير عافتة فما الها اي حق تريد ترجعة هسة
_بس اني سامعة مرات الام القاضى يحكملها تاخذة يومين بالاسبوع اذا جانت الحالة مثل هذي
_لا ما راح اخليها ما اريد حسوني يروح يمها لان شي اكيد الها غير غاية مو حبا بحسوني اني اعرفها كلش زين
هزيتلة راسي وگمت شلت الكلاصات توجهت للسنك اغسلهن ودموعي گامت تنزل بدون سابق انذار كلش اخاف تاخذ حسوني يمها واني ما اگدر اتحمل اتركة حسوني اعتبرة مثل ابني احبة اكثر من نفسي صح هي امة والها الحق اكثر بس اني هم امة واخاف عليه اكثر من نفسي
بديت شهگاتي تعلى بزيادة بدون ما احس
فجأة انسحبت وانضربت بشي فتحت عيوني لگيت آدم حاضني حضنتة قوي وصرت ابجي بقوة
گام يمسح على شعري ويگول اشش لا تبجين يا روحي شو باعليلي ليش كل هالبجي يا عيوني
گتلة من بين شهگاتي اخاف... اخاف تاخذ حسوني آدم والله ما اتحمل يمكن راح تگول انانية بس اني احبة ورب الكون احبة اكثر من نفسي
گال وهو يمسح دموعي لا تخافين ما اخليها تاخذة هذا روحي شلون اگدر اعوفة هديت شوية من گال هالشي
گرص خشمي وگال تعرفين عيونج يصيرن احلى من تبجين اللمعة الي بعيونج تبين بوضوح
نزلت راسي بخجل وگتلة صدگ
رد بضحكة والله
صرت اضحك لان دائما اذا ما اصدگ شي لا ارادي اگول للشخص گول والله فهو تعلم صار دائما يگولها
گتلة: لعد بعد دائما راح ابجي علمود تگولي حلوة
رجع خصلة من شعري وگال وهو يباوع لعيوني: انتي بكل حالاتج حلوة
باوعتلة بخجل واني الابتسامة شاگة حلگي
___________________________
حزيران
طلعت من المغاسل امشي بسرعة اريد اوصل لصديقاتي بسرعة علمود نروح نتغدة خطية گالن لا تتاخرين واني صار نص بس احاول امسح تنورتي من التراب
جنت احجي بالموبايل وما انتبهت من اصدمت بشخص قفلت الاتصال بسرعة ونزلت الملم الملازم واعتذر بس الولد صار يلمهن بدالي ويگول عادي ما صار شي حسيت نفسي سامعة هالصوت رفعت راسي و انصدمت من لگيتة احمد الولد الي اعترفلي من قبل شكد مزعج هالشخص
ابتعدت بسرعة وهو گال بإبتسامة: السلام عليكم
_وعليكم السلام
_شلونج حزيران ان شاءلله بخير
_الحمدلله زينة انت شلونك
_الحمدلله..... هممم شنو رايج اعزمج عالغدة
_لا شكرا تسلم بس عندي موعد ويا صديقاتي
_لعد من تكملين اگدر احجي وياج
_هاا.. لا ما عندي وقت ومجال اليوم
_لعد شنو رايج باجر تقبلين العزيمة ونحجي سوة
يا الله هذا كلش نرفزني اروح منا يجيني منا شكد اكره الناس الي تلح ماعرف شنو المناسبة علمود اقبل عزيمتة وناكل سوة محسسني عايشين باوربا
فجأة شفت صديقتي دخلت للقسم واني استغليتها فرصة بسرعة رفعت ايدي واشرتلها هي تقربت بسرعة منا تفاجأت من شافت احمد واگف وياي سلمت علي
واني بسرعة همست باذنها وگتلها طلعيني منا هي افتهمت شقصد وگالت لاحمد استأذن خوية بس احنا عدنا موعد وراح نتاخر ان شاءلله مضطرين نروح غير مرة نلتقي
رد عليها بابتسامة خبيثة وگال: لاعادي اخذو راحتكم انساتي
سحبت ايدي وطلعنا برة القسم حسيت نفسي تحررت يا الله كلش خنگني ما شايفة هيج شخص يلح مثلة
كملت المحاضرات ورجعت للبيت تعبانة كلش احس حيلي راح شكد صديقاتي ما فررني الجامعة واخذنا صور شكد يحبن الصور لازم باليوم ياخذن اقل شي عشرين صورة
دخلت للبيت وبوجهي صعدت لغرفتي بس دخلت رحت سبحت بسرعة ونمت علمود يتجدد نشاطي لان باجر عندي امتحان كلش صعب
فتحت عيوني بتعب بقيت اباوع للسگف ما بية حيل اگوم سحبت الموبايل من الميز انصدمت من شفتها ساعة بالاربعة
بسرعة طفرت من مكاني عزا العزاني ما بقى وقت اقرا
رحت طلعت فراش وشلت ملازمي واقلامي وصعدت فوگ السطح اقرا لان الجو كلش حلو وهدوء يخليني اركز
فتحت باب السطح وطلعت فرشت الفراش والملازم ذبيتهن بالگاع ونزلت جبتلي جاي علمود اركز تعبني لما صعدت الدرج لان خفت لا ينكب
تربعت وطشرت ملازمي بالگاع وبديت اقراهن بالترتيب قريت اول ملزمة بسرعة لان جانت بس شرح والثانية والثالثة صح جان بيهن مسائل بس مسائلهن سهلات يعني بس مجرد تطبيق قوانين
وصلت للماضرة الرابعة وهاي الجوكر بيهن تطبگ كل المحاضرات على صفحة
بديت احل المسائل بس المشكلة يطلع الناتج غلط بالنهاية عالرغم احل عالقانون بس مادري وين المشكلة
جنت احجي بصوت عالي واگول ليش هيج هاي تصير ومو لازم هاي نجيبها هنا ونختصر تعصبت وضربت الملزمة بالگاع
قززني صوت وهو يگول ليش كل هالعصبية
التغتت لمصدر الصوت شفتة حارث صاعد علي سطحهم وواگف يم الحايط
جاوبتة وانت شعليك لا تدخل درت وجهي منة ورجعت اقرا علساس
_عندج موضوع صعب اذا تواجهين مشكلة تعاي اشرحلج
_وانت شعرفك علساس تعرف المادة علمود تحجي
_هسة انتي ما عليج شدارس وتعاي اشرحلج
_لا حرام ما يصير وكافي تحجي وياي
_وهو شنو الحرام اعتبريني دكتورج بالجامعة وبس اكمل روحي وما راح نحجي بغير مواضيع غير الدراسة
ما جاوبتة ورجعت اباوع للملزمة بفيت افكر واگول شلون راح ادبرها احس نفسي مثل الاطرش بالزفة اخر شي شلت ملزمتي والدفتر ورحت لحارث جان بعدة واگف بمكانة
من شافني ابتسم بانتصار كانة يعرف راح اجي يمة علمود يشرحلي اخذ الملازم من ايدي وحطاهن عالحايط جان الحايط مالتنة متلازك ويا حايطهم فما جانت اكو مشكلة
بدة يشرحلي وصدگ حجية طلع كلش يعرف يشرح زين وسهل القوانين علي جان ابد ما يرفع راسة بس منزل عيونة ويشرح ويسئلني اذا افتهمت او لا واذا ما افتهمت خطية يعيدلي شرح السؤال من البداية
كلش اندمجت ويا وما حسيت بالوقت الا من كمل كل الملزمة واخر شي انطاني سؤال وگال هذا مثل الامتحان الج جمعت بي كل الافكار الصعبة اذا كدرتي تحلينة اضمنلج راح تاخذين درجة كاملة بهالمحاضرة
هزيتلة راسي واخذت منة الورقة وبديت احل جان السؤال كلش طويل وبين ما جنت احل احسة يراقبني فجنت كلش متوترة وخفت ارفع راسي لا يزيد توتري
كملت الجواب وانطيتة يشوف الحل گال كلش زين جاوبتي كلة صح
باوعت الة والابتسامة شاگلة حلگي گتلة شكرا كلش هواي مادري شلون جان دبرتها لو ما شرحك
گال بابتسامة: تدللين انتي شوكت ما تحتاجين شي راح اكون موجود يمج
نزلت راسي بخجل وگلبي يرگص من الفرح على كلامة
جانت السما بيها غيوم ولون الغروب كلش حلو بقيت صافنة اباوع علي جان كلش حلو بشكل لا يوصف
فززني صوت حارث وهو يگول حلو مو؟
سألتة باستغراب شنو هو ؟
گال بهدوء: الغروب
گتلة اي كلش حلو
گال وهو يباوع بوجهي بس مو بحلات عيونج
عزا بعينة راح اسيح من الخجل شلون يحجي هيج واني اموت عالكلام الحلو بقيت واگفة ساكتة احس نفسي انثولت
ورا شوية تنهد وگال بهدوء وتعب: حزيران شگلتي على كلامي القديم شنو قرارج
توترت وصرت افرك بيدي جاوبتة بالگوة: يا قرار تقصد
رد گال: حزيران لا تشلعين گلبي تعرفين كلش زين شقصد
بقيت ساكتة شوية ماعرف شحجي وشاگول هديت نفسي وجمعت قوتي وگتلة بهدوء : مادري انطيني وقت افكر
بسرعة اخذت ملازمي وشلت الباقيات من الگاع ونزلت سمعت صوتة وهو يگول الج كل الوقت
نزلت الدرج فرحانة احس نفسي راح اوگع من الفرح صادفت اندي بالطريق وگفتني وغمزت بعيونها بس شلون غمزة تجعص بعيونها
گتلة اندي رحمة للكائنات لا تغمزين
گالت اوعع شكد متنمرة وشبيها غمزتي
جاوبتها تفشل والله
گالت المهم عوفينة من الغمزة شنو جنتي تحجين ويا الاشقر المغرور
سديت حلگها بسرعة وگتلها اسكتي فضحتينة ترا بس جان يشرحلي
ردت گالت اي افتهمت واني ما گلت اي شي يعيوني
گتلها علمود تروح تنزل الفراش من السطح واني نزلت للمطبخ اسوي العشا
_________________________
اندي
يمشي بسرعة واني ورا احجي بس ما يسمعني نزل الدرج احسة ينزل بايتين سوة يمة تعبني لما نزلت
_أمجد الله عليك خليني اروح
_ولي من وجهي وروحة ماكو لا تخليني اعيد حجي
_ليش ما توافق والله اروح ويا حزيران واصير عاقلة
_اجذبي بعد اجذبي تريدين تسوينها مثل اخر مرة
اووف أمجد لهسة ما ناسي اخر مصيبة سويتها من سافرنا وطلعت من الفندق وحدي واصلا سالفة اني مسممة ما دخلت ابالة وجبرني احجيلة كلشي عاد حجيتلة اني شلون ضعت ومحمد شافني بس ما حجيتلها على موضوع الولد لان لو يعرف الا يعلگني بالبنكة وگالي ما عاقبتج گدامهم لان ما احب هالشي بس عقابج بعدين وصدگ من رجعنا خلاني انظف البيت كلة ثلاث مرات الا تكسر ظهري ماعرف شنو سالفة أمجد ويا التنظيف كل ما مسوية مشكلة يخليني انظف
دخلت للاستقبال وجانت كل العائلة الكريمة مجتمعة راح گعد عالقنفة واني بقبت واگفة
كلش تعصبت لان ما اهتم لحجيي ضربت رجلي بالگاع وبديت اطلع دموعي
_گلت والله اروح يعني اروح ما علي
انتبهو علي وگالت ماما شبيج بنيتي تخبلتي ليش تصيحين
جاوبتها واني مسوية روحي ابجي
_أمجد ما يخليني اروح للجامعة ما اعرف ليش وهو بس يوم
بابا اشرلي ورحت گعدت يمة مسح على شعري وگال شتريد بنيتي منو مزعلها
_بابا أمجد مزعلني گولة ما يقبل اروح للجامعة
_ها أمجد ليش مزعل بنيتي
_يابة تخبلت تريد تولي للجامعة مدري شعدها تريد تروح علمود تسويلها مصيبة
_لا والله بابا ما راح اسوي اي شي وابقى ويا حزيران
_اي أمجد خليها تروح خطية هي بس مرة عالاقل شوية يصير عدها حماس للدراسة
_اي عفية آسوري ابوس عقلك اليفتهم امانة امجد ديلا وافق بليز بليز امانة
هز راسة وبقى دقايق يفكر كلش وترني احس نفسي انتظر نتيجة الامتحان
حجى ورا ربع ساعة وگال اووف منج يالا روحي بس بشرط تبقين ويا حزيران واذا سويتي مشكلة انتي وحزيران تتعاقبن
_شنو واني شكو اتعاقب وياها اني بالنسبة الي ما علي بيها
_امانة حزيران وافقي والله ما راح اسوي اي شي وابقى عاقلة
ثاني يوم گعدت من النوم بحماس اتجهت لكنتوري طلعت تنورة سودة قصيرة وقميص ابيض وسترة سودة رحت للحمام بسرعة سبحت وطلعت نشفت شعري ورحت لبست ملابسي الجدد كملت واتجهت للمراية واني مغمضة عيوني وصلت يمها وبقيت واگفة كم دقيقة وراها فتحت عيوني شفت شكلي بالمراية جنت كاني شخص ثاني عبالك سيدة اعمال اني وملابسي الرسمية الي اول مرة البس هيج وشعري القصير بقيت ادور گدام المراية ما مصدگة هاي اني صرت ابوس المراية احس نفسي تخبلت
رحت جبت حذائي الابيض لبستة وكمل اللوك سحبت جنطتي ونزلت جوة
طلعت للحديقة جانت حزيران جاهزة كامل وشايل بيدها ملزمة تقرا
انتبهت علي وتقربت مني لزمت ياختي تعدلها وهي تگول مثل ما وصيتج ابقي عاقلة وخبالاتج لا اطلعبنهة بالجامعة جنت واگفة استعملها وبس اهز براسي
انتبهت لحذائي وگالت هاي شلون دبرتيها اول مرة اشوف واحد لابس حذاء رياضي ويا ملابس رسمية
ما گدرت اجاوبها لان بنفس اللحظة اتصلت سمر عاد حزيران شالت جنطتها وطلعت واني امشي وراها
صعدنا السيارة سلمنا عليهم وگعدت بمكاني ساكتة
جانت السيارة هدوء تام قاطع هالهدوء صوت حارث وهو يگول ها اندلس متحمسة لاول يوم بالجامعة
جاوبتة بحماس كلش كلش من الحماس ما نمت البارحة
بعدج ما شفتي شي انتي بس رايحة مجرد زيارة بس من تصيرين طالبة جامعة راح تتمنين ترجع ايام الدراسة
جاوبتة بفرحة لا اني كلش احب الدراسة وان شاءلله ما اواجه مشكلة عزا بعيني شكد جذابة اني هي امي تجرني جر من فىاشي علمود اروح للمدرسة
وصلنا للجامعة وحزيران اخذتني لقسمها جان اي واحد يشوفني يسأل حزيران هاي مني لان امبينة مو طالبة جامعة
جنت امشي واباوع مبهورة كلشي جان حلو والطلاب اشكال والوان واكو ولد وبنات يمشون سوية تعجبت من شفت هيج ما توقعت موجود بالحقيقة هيج عبالي بس بالمسلسلات اكو ومن اسئل حزيران تگول لا تدخلين
حزيران عرفتني على صديقاتها وجانن عبارة عن كتلة من اللطافة بلگوة شلعت نفسي من حضنهن
دخلت محاضرة وياهن لان حزيران گالت بس هالمحاضرة ووراه اتصلي على صديقتج وروحي وياها
حزيران گالت اگعدي بالاخير ولا تسوين صوت ولا تلعبين بالموبايل
رحت گعدت بالاخير واني امشي بالگوة من التوتر بدو الطلاب يدخلون شوية شوية تقريبا ربع ساعة ودخل الدكتور گال السلام وبقى شوية ينصح الطلاب يالا بدة المحاضرة
جنت حاطة ايدي على خدي و صافنة عالحايط ما منتبهة لاي شي لان المحاضرة كلش مملة فزيت على صوت الدكتور يگول الي لابسة سترة سودة مو جاي حجي وياج
گمت وگفت بارتباك وگتلة استاذ اني
رد گال اي بنتي انتي راح اعيد السؤال وركزي زين شكد النسبة الي ادل على ان المريض نسبة دمة مرتفعة وشنو الاثار الجانبية الي يسويها
گلت عزا بعيني واني شمدريني خوش راح اتفشل گلت بتوتر هاا... نسبة... النسبة 25 يمكن
اشو اني بس گلت هيج الدكتور فتح عيونة بصدمة والقاعة امتلت صوت ضحك
عزا اني شگلت ردت ابجي من الفشلة فجأة حزيران وگفت وگالت دكتور هاي اختي جاية ضيفة
الدكتور هز راسة بتفهم وگال تعجبت من گالت 25 ماكو مريض هيج نسبتة هذا الشخص يكون ميت بهيج نسبة
گعدت بمكاني وبقبت افرك ايدي بتوتر لما خلصت المحاضرة وبسرعة طلعت وگلت لحزيران رايحة لغزل
اتصلت عليها وهي جت اخذتني لجامعتها جانت تجنن واكبر من الجامعة الي تدرس بيها حزيران شوفتني قسمها هواي اقسام لان گالت وليد هسة عندة محاضرة من يكمل يجي علينا
اخذتني للكافتريا لان گالت وليد گال انتظروني هنا بقينا هواي ننتظر حوالي ساعة
جنت گاعدة وحاطة ايدي على خدي واباوع للباب انتظر وليد شوكت يدخل فزيت من صفنتي من شفتة دخل احس گلبي يريد يطلع من مكانة من شفتة اتفدم باتجاهنا جان لابس بنطرون اسود وجاكيت اسود وقميص ابيض عبالك اثنينا متفقين على هذا الشي
وصل يمنا واني احس راح يغمى علي شعور احسة يخوف
وگف يمنا وگال
السلام عليكم
يتبع.......
بقلمي يمامة