|غموض جارُنا|
الكاتبةسناريآ
قناةالتلي https://t.me/nurse2_4
أرينا: فتحتلي اسراء الباب وگالت بابتسامة
_تفضلي
دخلت بيتها انصدمت بجمالة عبالك فيلا ما شايفة هيج بيوت بس بالمسلسلات
دخلتني للصالة وهي راحت تجيب مي بقيت فاكة حلگي على جمالها تجنن تصميمها ملكي وفخم
دخلت اسراء وبيدها كاسات المي گالت بوجه بشوش
_نورتي بيتي زوزو
_بوجودج حبيبتي
گعدت شوية وحجينا سوالف عادية عالجامعة والبيت ورا شوية گامت تجيب ضيافة واني هنا استغليت الفرصة وطلعت حلقتي من اصبعي ولزمتها گلت لازم احط الجهاز الاول هنا عاد بس هي دخلت وگعتها
سألتني باستغراب
_شنو هذا الوگع
_اووف حلقتي صايرة جبيرة على اصبعي ودائما توگع كلش امبهذلتني
عاد هي خطية عافت البيدها واجت ادور عليها گمت اني هم ساعدتها وحولنا القنفات من مكانهن واني هنا استغليت الفرصة وحطيت اول جهاز بزاوية القنفة من جوة علمود لا تشوفة
گلبنا القنفات يالا اسراء لگتها جانت رايحة بنهاية الغرفة ولان الغرفة كلش جبيرة ولون سيراميكها مثل لون الحلقة فبصعوبة لگيناها
بقينا گاعدات لساعة 12 واسراء بس تشوفني صورها مالت السفر والاماكن الماخذة بيها لان هي هواي تسافر جانت الاماكن الرايحة الها كلش حلوة واكثرها جانت مثل القرى
اذن ظهر گمنا اني واسراء صلينا من كملنا اسراء رادت تصب غدة وحدها ردت اساعدها بس ما قبلت عاد سويت نفسي زعلانة وگتلها مو علساس احنا اخوات والاخوات ماكو بينهم هالتصرف عاد هي قبلت اساعدها وتغدينا سوية بالمطبخ
من كملنا اني استلمت غسيل المواعين وهي التنظيف جنت افكر شلون احط الجهاز الثاني بالمطبخ باثناء تفكيري انتبهت عالسنك عاد صفنت وگلت ليش ما احطة ورا السنك ومحد يگدر يشوفة
قاطع افكاري صوت اسراء وهي تگول
_اگلج سمعتي بالسالفة الصايرة ويا دكتور احمد
_سالفة!!! لا يا سالفة تقصدين
_يا عزا انتي نايمة ورجليج بالشمس لج ما عرفتي دكتور احمد طلع مزوج سها هاي اليگولون تسوي سحورة وهو متزوج من قبل وعندة خمس اطفال
_عزاااا صدگ هالحجي
_اي والله وطلعو مزوجين من حوالي اربع اشهر واكو دكتور شاك بي مزوج عاد هو خايف على سمعتة لا تتشوهه فرايح مطلگ سها ومن طلگها ذيج متخلبة رايحة هادة علي وگايلة لمرتة الاولى وصايرة عركة بين عائلة سها واستاذ احمد وبين اهل زوجتة الاولى
_يا طاحظهم اثنينهم شلون يسون هيج يعني دكتور احمد علساس مثقف وواعي و الحمدلله عندة عائلة واطفال صاير يراهق بهذا عمرة وهاي سها الحية شلون تخرب بيت عائلة علساس ما تعرف بي متزوج شكد خبيثين اثنينهم
_اي والله اني ماكسر گلبي غير زوجتة الاولى
_اي والله اني هم
باثناء ما جانت اسراء ملتهية بالحجي حطيت الجهاز الثاني ورا السنك وخلصت
من كملنا اسراء سحبتني لغرفتها علمود تشوفني فساتينها الطالبتهن من تركيا
دخلنا لغرفتها جانت تجنن يمكن بس غرفتها بگد بيتنا بقيت فاكة حلكي ومبهورة بقيت واگفة بمكاني
وهي توجهت للكنتور ورادت تفتحة بعدها ما لازمة الباب جان سمعنا صوت الجرس يرن باوعتلي بتوتر واستغراب گالت
_انتظريني هنا هسة ارجعلج
گعدت عالقنفة بس رجلي يرجفن اخاف تسويلي شي صح هي صديقتي وتحبني بس الواحد ما لازم يثق بالشخص ثقة عمياء
مديت ايدي لاذني اتحسس مكان السماعة علمود احس بالامان واتذكر آدم وياي
باوعت باتجاه ميز المراية وگمت امشي بسرعة رحت حطيت الجهاز الثالث جوة ميز المراية ورجعت گعدت بمكاني
واني احس گلبي راح يوگع اتصل آدم علي وگالي يالا اطلعي بسرعة ردت اجاوبة حتى ما انطاني مجال احجي وما سأل اذا كملت او لا بهالاثناء دخلت اسراء وگالت
_هذا اخوية رجع من السفر ما جنت متوقعة يرجع هسة
_زوجي اتصل علي وگال عندة شغل ضروري فلازم ارجع للبيت والفساتين ان شاءلله غير مرة اشوفهن سامحيني اسوو
_يااا شلون حظ يالا ان شاءلله غير مرة من اعزمج ولازم تجيبين حسوني هم
جاوبتها بتوتر واني احاول ارسم ابتسامة
_ان شاءلله
نزلنا سوية لگيت ولد جان گاعد بالصالة يطلع بعمر آدم سلم علي ورديت السلام بتوتر احس نظراتة مو راحة
ودعت اسراء وطلعت لگيت آدم منتظرني بالباب صعدت السيارة بس شفت آدم معصب مادري ليش
بقيت طول الوقت ساكتة وما حجيت شي خفت يگب بوجهي هو صح ما مصيح علي بس هاي اول مرة اشوفة هيج معصب
وصلنا البيت نزلت من السيارة هو قفلها ودخل وراي سألتة ليش معصب جاوب بهدوء عكس شكلة وگال
_ماكو شي بس شوية مشاكل بالشغل
مرت الايام وحبي يومية يزيد لآدم وهو ابد ما يحس صرت اذا اشوف ابتسامتة احس نفسي طايرة من الفرح اذا ابتسملي او يجيبلي كاكاو صرت ما اگدر ابتعد عنة يوم واحد
والاشياء الغريبة مثل قبل وما نقصت بس حاولت اتأقلم ويا الوضع بس مرات احس نفسي ما اتحمل يعني مثلا اكون گاعدة واحس انفاس شخص يمي او من اطبخ احس اكو واحد يمشي وراي گمت اخاف على حسوني بحيث صرت اكثر الوقت اودي يم ماما واذا اسبح اوديه يمها واذا نصلي اني وآدم لازم واحد يصلي وواحد يبقى يم حسوني حاولنا بكل ما نگدر ما نخلي يتأثر ولا يحس اكو شي لان الاطفال بهيج عمر اي شي يصير وياهم سواء سلبي او ايجابي يأثر عليهم بالمستقبل
خلصت المرحلة الاولى وجت العطلة وبديت التدريب الصيفي وجان يومين بالاسبوع
آدم حسيتة فرحان وصار دائما يكرر ويگول وصلت بس باقي الگة شخص وهذا الشخص الي راح يكون منقذ بالنسبة لقضيتي وراح اگدر اخذ حگ عائلتي لان
جنت متعجبة تعلق آدم بهذا الشخص وليش كل هالاهتمام بي ومن سألتة
جاوبني وگال
_هو الشخص الي شاف ابوي واخوية من انقتلو وهو باقي بامل يلگة ميت لو عايش ادعيلي أري الگيه ادعيلي
_ان شاءالله تلگيه باسرع وقت وتاخذ حگ اخوك وابوك
وباخر فترة صار يتردد علي هواي صديقة محمد وحسب ما گال جان يشتغل بالاستخبارات بس منعني اگول لاحد شغلة الحقيقي ولان الاستخبارات حتى عائلاتهم لازم ما تعرف بشغلهم و لان هو هم جان يريد يقبض على حماد وجماعتة وجان يساعدهم صديقهم آميد بس آميد جان يجينا مرات قليلة كلش ومن يجي بس يجيب جنطة بيدة ويروح
بنهاية العطلة راحو ماما وبابا وحزيران وآسر للعمرة لان صحة حزيران النفسية كلش ادمرت وبابا راد يروح علمود نفسية حزيران تتحسن
بيوم جنت گاعدة اسوي كيكة وقت المغرب اجت اندي علي وگالت اريد اخذي حسوني علمود يجي يتعشى يمنة
رحت سألت آدم وهو وافق بدون اعتراض
راحت اندي وحسوني وبقيت اني ازين الكيكة من كملت رحت بدلت وطلعنا اني وآدم تعشينا برة وداني للكورنيش واشترالي موطة ردتة ياكل بس گال ما احبها حسيت بالانتعاش والنشاط كلش احب الطلعات بالليل
رجعنا للبيت ساعة عشرة وحسوني بعدة يم اندي رحت بدلت ولبست تراك خفيف
توجهت لميز المراية وبديت امشط شعري حسيت شخص واگف يمي گمت اقرا اية الكرسي والمعوذات واحاول ابين اني ما خايفة
كملت بسرعة وطلعت متوجهة للصالة شافني آدم متوترة سألني وگتلة كلشي ماكو بس يمكن تعبانة
سحبني وگعدني يمية عالقنفة واني بس ساكتة ما حجيت ولا كلمة بقيت بس فاكة حلكي واباوعلة
قاطع شرودي صوت آدم وهو يگول
_أري تعرفين العطلة راح تخلص واني وعدتج من قبل مجهزلج هدية فاني گلت شنو رايج نروح سفرة سياحية لمدة اسبوع ونبتعد شوية من المشاكل
_صدگ گول والله
_والله العظيم ها هسة صدگتي لازم واحد شوية يغير من روتينة
حضنتة بشكل لا ارادي بقوة وگتلة
_ورب الكون احبك
حسيت نفسي جفصت بقيت حاضنتة وما اعرف شاسوي من ثولي هو گال بضحكة
_واني هم احبج
وخرت من حضنة واتجهت للمطبخ احس راح يغمى علي من الخجل غسلت وجهي بمي بارد احاول اهدي نفسي
بقت كلمتة شاغلي بالي هو گالها بغير تفسير بس اني افتهمت بغير تفسير
اندي: واگفة بباب المطبخ انتظر أمجد شوكت يرجع علمود يسويلي عشا باوعت للساعة لگيتها ستة ونص احس راح اموت من الجوع الخبيث گال ارجع خمسة ونص وهو لهسة ما راجع
تعصبت كلش رحت لبست نعالي وردت اطلع اشوفة ما رجع وصلت للباب وبعدني توا جاي افتحة دخل امجد هو واناقتة اليگول رايح لعرس ولا عبالك طلع ويا اصدقائة
باوعلي بأستغراب وگال
_ ها ولج اشو لابسة نعالج وين تريدين ترحين بس لا تريدين تطلعين
كتفت ايدي لصدري وگتلة بعصبية
_عيني ردت اطلع اشوفك ما رجعت ما تگول عندي اخت وحدها بالبيت صارلها شي ما تگول هسة جاعت خطية ارجع اسويلها اكل
جاوب باستفزاز وگال
_ تعالي اخذيلج راشدي وشدعواج عيني ترا ساعة بعدها بالستة
دخل يمشي بشكل مستفز وبطيء احسة متقصد علمود يعصبني دخلت وراه للمطبخ
رحت گعدت عالكرسي وهو توجه للثلاجة طلعلة بطل مي وشربة دفعة وحدة وذباه بالزبل
_ترا مو زين تشرب المي دفعة وحدة لازم تشربة ثلاث دفعات علمود لا يتلف الكبد
_شكرا عالنصيحة بس بقي نصايحج الج
_هو مو صوجك صوج الينصحك
_هسة عوفينا من هالحجي شتردين عشة تاكلين جبن وجاي اسويلج؟
_لاء اكلتة الصبح
_لعد اسويلج مخلمة
_لاء اكلتها الظهر
_لعد شنو رايج اسويلج معكرونة ويا الدجاج
_هم لاء
_وجعاا لعد شتردين
_امجد حباب سويلي بيتزا الله عليك والله مشتهيتها ومحد يگدر يسويها غيرك وشوف بعد اي اكلة تسويها اكلها بدون اعتراض بس سويلي بيتزا هالمرة
هز راسو باستسلام وتوجه للكونتر طلع مواد العجين وبدة يعجنها عجنها بطريقة كلش حلوة ومن كمل غطاها علمود تختمر
طلع صدر دجاج وقطعة قطع صغيرة علمود يستوي بسرعة وسوا صلصة البيتزا لان جانت خلصانة وما باقي عدنا
جهز الزيتون والبصل والفلفل والجبنة وراح طلع العجينة جانت مختمرة كلش زين وملمسها طري
شكلها قطعتين وحطة المواد على وجهة من كملها حطاها بالفرن نص ساعة عاد هو گعد يگلب بالموبايل وخلاني اني اغسل المواعين جنت متوقعتة راح يكمل خيرة ويغسل المواعين بس نسيت هذا أمجد الخبيث ما يسويها
ورا نص ساعة طلعها وحطاها عالميز بقى يباوعلها بفخر عبالك مسوي انجاز
رحت وگفت يمة وگتلة ببرأة وعبالك اريد ابجي
_امجد حباب روح جيب ببسي البيتزا ما تنكال بدون ببسي
_لا الببسي مو زين بس سكريات هواي ويسوي سمنة وهشاشة بالعظم
_امانة أمجد بس هالمرة عوفنا من الاكل الصحي وهو مرة وحدة ما راح يأثر يعني مو يومية شاربين الله عليك حباب حباب حباب
_لا تلحين ما احب هالشي
_امانة أمجد حباب حباب حباب
_يالا امري لله شتردين
_ها ببسي وموطة لان الجو حار وجبس علمود الفلم وبقلاوة هم
_هوب هوب توا جان بس ببسي
_ديالا حباب كلهن احتاجهن
گام جر محفظتة من فوگ الكونتر تقرب مني وگال بتحذير راح اروح اجيبهن بس اياني واياج تطلعين اموتج افتهمتي
_اي افتهمت بس خليني اروح اجيب حسوني لان هو هم يحب البيتزا
_تمام ولي وارجعي بسرعة
هزيتلة راسي وهو طلع واني طلعت وراه قفلت باب البيت الخارجي للامان وحطيت المفتاح برگبتي
توجهت لبيت زهراء دگيت الباب وفتحلي زوجها
گال بابتسامة
_هلا ببنيتنا اندي اتفضلي
_شلونج نسيبي
_الحمدلله انتي شلونج
_الحمدلله، ادخلي أري تلگينها بالمطبخ
دخلت واني احس راح يغمى علي من الخجل ما متعودة عالكلام الحلو
رحت للمطبخ لگيت زهراء تسوي كيك سلمت عليها وتوجهت للكيك اخذت قطعة واكلتها شكد ما عندي ذوق اني غير المفروض لازم استأذن شكد عيب بس يالا العيب بالجيب
شفت حسوني گاعد بالگاع ويمة اوراق واصباغ امبين جاي يرسم
صحت علي وگتلة حسوني تگوم تروح وياي تتعشا يمنة مسوين بيتزا
عاف البيدة واجة يركض هز راسة بمعنى اي كلش يحب البيتزا ويعرف من يروح وياي راح العب ويا بلستيشن ونشوف افلام سوا امداني عمري 16 والعب ويا جاهل عمرة 3 سنين بس يالا خطية يضوج من يبقى وحدة كلش يفرح اذا لعبت وياه لان ماكو طفل بعمرة يلعب وياه
گلت لزهراء اريد اخذة وياي هي گالت بس خل اسأل آدم راحت سألت زوجها
رجعت ورا شوية و گالت
_يگول عادي خل يروح بس ديري بالج عليه
هزيتلها راسي شلت حسوني وطلعنا
طلعت من بيتهم لگيت محمد صديق نسيبي واگف بالباب يدخن
ما اعرف ليش ابد ما اطيقة عالرغم ما مسوبلي بس مزاجي ماعرف شبيه
حسوني بس شافة مد ايديه باتجاهة وگام يگمز يريد يشيلة هو تقدم باتجاهي واخذ حسوني مني واني بس واگفة اراقبهم
حسوني گام يبوس ويحضن بي عبالك صار سنين ما شايفة شفتة يهمس باذن حسوني وحسوني بس يهز براسة باثناء حجيهم سمعت اسمي تعصبت هسة شي اكيد شوف شيحجي علي
اخذت حسوني منة وگتلة بعصبية
_ادري انت ذابين صرتك هنا 24 ساعة موجود ما عندك بيت ما عندك اهل يسألون عليك
شفتة عصب وعيونة يريدن يطلعن من مكانهن
عزا بعيني هسة اني شدخلني بي لو لازم اجفص هسة يضربني راجدي الا يلزگني بالباب
راد يحجي بس بنفس اللحظة وگفت سيارة أمجد بالباب بسرعة فتحت الباب ودخلت اني وحسوني وأمجد عافنا وبقى يحجي وياه
بقيت وراه الباب اسمع حجيهم جان امجد يسلم علي ويتشكرة لان ساعدني من احترگ المطبخ سمعت صوت امجد وهو يودعة
بسرعة دخلت للمطبخ ورا شوية دخل امجد وبيدة العلاگة انطاني اياها جانت متروسة طلعتهن وفرغتهن وأمجد قطع البيتزا
گعدنا كلنا نتعشا أمجد جان يشاقي ويضحك ويا حسوني بس حسوني جان ملتهي بالبيتزا بحيث شايل قطعتين بنفس الوقت يخاف لا تخلص
كملنا عشا أمجد عافنا وراح للصالة باوعت للميز لگيت البيتزتين كلهن خلصانات كلهن اني وحسوني اكلناهن أمجد يمكن اكل بس قطعتين
غسلنا المواعين ونظفنا المطبخ اني وحسوني ورا ما كملنا طلعنا الجبس والبقلاوة وديناهن عالصالة وطلعنا فلم السنافر
ما خلص الا ساعة 11 باوعت لحسوني لگيتة بالگوة يفتح عيونة
گلت لامجد علمود يگوم يوديه
گام وداه واني نظفت الصالة وغسلت المواعين الباقية
كملت ورحت لغرفني جبت بطانية ومخدة وديتهن للصالة وذبيتهن عالگاع تمددت وطلعت فلم رعب والاجواء جانت كلش هادئة وتخوف البيت كلة اظلم وهدوء ما باقي بس ضوة الحوش مشتغل ويدخل ضوة كلش خفيف عالصالة
اندمجت ويا الفلم وما حسيت من صارت الساعة 12 ونص طفيت الموبايل من حسيت صوت خطوات بطيئة عالدرج
بسرعة غطيت وجهي وجسمي احسة صار ثلج يمة بس لا بيتنا مسكون گلت هسة يجي يكتلني ويموتني تشاهدت وغمضت عيوني بس احس گلبي وگع بين رجلي
فجأة توخرت البطانية من وجهي بسرعة فتحت عيوني ولگيت شخص ابيض واگف گدامي
صرت اصرخ باعلى صوت
_ولججججججج يمةةةةةة الحگيني راح اموتتتتتتتت
_شبيجججججج
_يمةةةةةةة وفوگاها جنيييي يحجييي الحگونيييي لا تتقرب لا تتقرببببب اعوذذذ بكلمات الله التامات ياربي ساعدنيييي
طفرت من مكاني اصيح واعيط بس هدأت ووكف عياط من حسيتة لزمني وگال
_وجعاا شبيج
توجه للضوة وشغلة طلع أمجد شايل بيدة بطانية
وخرت البطانية وگلت بعصبية
_انت شبيك تريد تموتني ما جان تسوي صوت تحجي من نزلت
_وجع وسممم مو حجيت
_شمدرينيييي انت عبالي جني يحجي
شبيج تخبلتي وين اكو جن يحجي بس مو صوجج صوج اليخاف عليج وگال خطية هسة يمكن بردانة وتعاي اگلج انت خبلة يعني الشياطين ما عدهم شغل وعمل يگعدون يخوفونج ويالا بسرعة نامي شعندج ليهسة گاعدة
ذب البطانية على وجهي وراح صعد لغرفتة
رجعت لفراشي بس احس النوم طار من عيوني صار عندي ارق بقيت گاعدة يمكن اكثر من ساعة سحبت الموبايل لگيت الساعة 1 ونص گمت اتخيل الباب ينفتح لو اسمع صوت من برا حسيت راح اموت من الخوف ما گدرت ارجع اكمل نومتي اخر شي شجعت نفسي وصعدت اركض لغرفة امجد لگيت الباب ما مقفول
فتحت الباب ودخلت رحت وگفت يم رأسة وبديت أگعدة
_أمجد أمجد اگعد حباب گوم
ما جان يجاوب غرگان بسابع نومة رديت گتلة
أمجد اگعد انزل نايم وياي بالصالة اخاف انام وحدي
ما گعد الا ورا حوالي ربع ساعة بس جان كلش متعصب شال بطانييتة ومخدتة ونزل جوة بدون اي كلام
نزلت وراه وما حجيت اي كلمة گلت اخاف هسة يموتني
راح نام عالقنفة وگال بعصبية
_اريد انجب لان باجر عندي دوام بس تگعديني مرة ثانية اشيلج واذبج من السطح
هزيت راسي بخوف ورحت اركض لفراشي ونمت بالگاع بس جانت نومة حلوة
گاعدة متربعة بالصالة وجيس الجبس بحضني شعري عبالك صار شهر ما امشطتة وشكلي اليشوفني يگول زومبي
مطلعة اغنية عالخيانة وابجي وياها
صار اسبوع من راحو اهلي للعمرة
اشتاقيت لبابا من جان يحجيلي على بطولاتة من جان شاب جان بس يحجيهن الي
اشتاقيت لطبخ ماما وسوالفي وياها من جنت اكل من الاكل وهو عالنار وهي تتعصب علي لان ما تحب هالتصرف
اشتاقيت لآسر من جان يطلعني يومية وما يحبسني بالبيت مثل أمجد الخبيث
اشتاقيت لحزيران من جنت اضحك عليها واخليها تغسل المواعين بدالي شكد خبيثة اني
قاطع افكاري صوت الباب يندگ گمت اجر نفسي بالگوة علمود اروح افتح الباب
باوعت من العين السحرية طلعت زهراء فتحت الباب سلمت عليها ودخلت قبلها رجعت لنفسي گعدتي اتعارك ويا ذبان وجهي
دخلت زهراء وراي گعدت عالقنفة وگالت
_ثول ادري شببج عبالك عجوز ماكلين عشاها عالاقل گولي اگوم اجيب مي لاختي
_ذاك المطبخ وروحي شربي وشبسرعة عطشتي هو ايانة بيتكم
_ما ادري شوكت تغيرين اسلوبج الزفت هذا المهم عوفينا من هالحجي جبتلج شلون مفاجأة بس باعي القرار الاول والاخير بيد أمجد فمادري راح يوافق والا لا
سألتها بحماس من عرفت مفاجأة
_تمام هسه گولي شنو هو
_باعي آدم قرر يسويلي مفاجأة سفرة سياحية لمدة اسبوع فاني گلت ليش ما يجون امجد واندي ويانا ليش باقين وحدهم ومن گلت لآدم وافق وگال اذا يجون تذاكر السفر هدية مني الهم
گمزت من مكاني ورحت گعدت يم رجليها حجيت وحلكي يريد ينشگ من الابتسامة
_جذذذب گولي والله يعني راح نسافرررررر
_ورب الكون شبيج اني يا يوم مجذبة بس ها بعد القرار الاخير بايد أمجد
تقربت منها حضنتها وصرت ابوس بيها
_والله فديتج انتي ونسيبي اليوناني
دفعتني بانزعاج وگالت
_شكد مصلحجية وها مثل ما گلت القرار بيد امجد ويالا اني اگوم اروح اجهز ملابسي وعود انتي گولي لأمجد
_انتظري بعد وكت اگعدي اسويلج جاي
_لا خلفة عليج عندي شغل هواي ومستعجلة
واگفة گدام المراية اعدل بقميصي باوعت لملابسي كلشي تمام لبست قميص رصاصي وبنطرون اسود وحذاء ابيض سحبت المشط بسرعة وبديت امشط شعري تذكرت من گلت لامجد خبر سفرة زهراء بالبداية ما وافق نروح بس بقيت الليل كلة گاعدة واقنع بي يالا وافق بعدها اتصل على بابا واخذ الاذن منة وبابا وافق بدون اعتراض
قاطع افكاري صوت أمجد يصيحني سحبت جنطتي الصغيرة ونزلت لگيت أمجد لابس ملابس سود رسمية وجنطتة يمة انتبه علي صاحني وگفت يمة بدة ينصحني ويگولي اگعدي راحة من نسافر ولا تسويلي مصايب وهواي حجي بس اني ما جنت مركزة ويا جنت صافنة على طولة واقارن بين طولي وطولة اني 150 وهو 190 طالعين رقم عشرة فزيت من صاح باعلى صوت
_مفهومممممم
_ها اي مفهوم مفهوم
سحب الجنط طلعهن برة طفى كل الاضوية وقفل الشبابيك بقيت واگفة انتظرة كمل وطلع قفل باب المطبخ تقرب وگال هم ناسية شي جاوبتة لا كلشي كامل
طلعنا برا وهو قفل الباب الخارجي رحنا على بيت زهراء لگيناها مكملة كامل هي وزوجها وحسوني واگف يمها يگمز من الفرح رحت وشلتة وصرت ابوس واگلة حسوني ما مصدگة راح نسافر سوية يمة فديتك حبيب خالتك
طلع زوجها سيارتة وقفل الباب ركبنا كلنا بسيارتة هو وأمجد ليگدام واني وزهراء وحسوني ورا
بقيت الطريق كلة اگرص نفسي ما مصدگة راح اسافر هاي اول مرة شعور جان خوف على توتر على فرح وحماس صاير مكس
وصلنا المطار وجان ينتظرنا شاب يطلع بعمر أمجد ونسيبي سلم على أمجد ونسيبي
جان يحجي ويا نسيبي بشقة امبين صديقة المقرب اخذ المفاتيح منة علمود يرجع السيارة وأمجد ونسيبي طلعو الجنط
دخلنا المطار وأمجد بس لازم ايدي ما عافها يخاف لا اضيع او اسوي مشكلة
گاعدة بمكاني وأمجد يحاول يربط الحزام من بعد محاولات هواي گدر يربطة ما اعرف ليش دائما اسوي مشاكل لأمجد
باوعت من الشباك الطيارة بعدها ما قالعة ورا شوية صدع صوت الطيار وهو ينطي التعليمات ويعلن عالاقلاع
قلعت الطيارة واني غمضت عيوني بقوة جان صوت وشعور كلش يخوف بس من استقرت بالجو هدا الصوت وراح الخوف والتوتر مني
باوعت بارجاء الطيارة جانت بس كراسي ومسافرين بس ما اعرف احس نفسي مبهورة بيها اول مرة اشوف طيارة بالواقع باوعت للكراسي البصفنا شفت شي صدمني وما جنت متوقعة راح اشوفة
يتبع.....