غموض جارنا

بارت 8

|غموض جارُنا|

الكاتبةسناريآ

قناةالتلي  https://t.me/nurse2_4

أرينا: شفت المي الي اسبح بي عبارة عن دم من الصدمة رجلي ما حسيت بيهن ووگعت

غمضت عيوني صرت افرك بيهن رجعت فتحتهن مرة ثانية جان لون المي عادي لون الشامبو اتخبلت صرت احاول اهدي نفسي واگول اني بس جاي اتخيل بسرعة غسلت جسمي ولبست ملابسي وطلعت

لگيت آدم وحسوني بعدهم نايمين اتجهت للمراية حسيت نفس راح اوگع بسرعة لزمت الميز وسندت نفسي باوعت للمراية شفت وجهي لونة صاير اصفر كلش من الخوف حسيت حلگي صار مر ومثل الكهرباء الخفيفة تمشي بجسمي

صرت اتخيل راح يگولون علي مخبلة ويودوني لمستشفى المجانين ومحد راح يصدگني مجرد التفكير بهذا الشي خلاني اتخبل ياربي شنو الجاي يصير وياي

بسرعة مشطت نفسي وحاولت اكون طبيعية رحت باتجاه آدم ندست بخفة على كتفة علمود يگعد بس ما يحس رجعت ندستة مرة ثانية

زهراء: آدم اگعد اگعد 

آدم: همم همم..... هسة

زهراء: آدم شبيك اگعد راح تتاخر

آدم: فد خمس دقايق

مليت وگلت هسة راح يتاخر لزمت ايدة وصرت اهزها علمود يگعد وبالگوة يالا فتح عيونة

آدم بابتسامة: صباح الخير

زهراء: صباح النور اگعد راح تتاخر على دوامك

آدم وهو يغمض عيونة: تمام

تمشيت اريد اطلع من الغرفة وقبل ما اطلع التفتت عليه

زهراء: ترا راح اروح اسوي ريوگ وما اگعدك اذا رجعت نمت فگوم اگعد وگعد حسوني وياك

طلعت ورحت للمطبخ اسوي الريوگ غسلت القوري وحطيت الجاي عالنار واني كل شوية اتخيل احد وراي گلت راح اسوي مخلمة علمود اگضي الوقت وما افكر هواي بين ما يطلع آدم

سويتها وجهزت الگلاصات طلعت خيار وجبن وياها كملت كلشي باوعت للميز برضى سمعت صوت وراي التفتت لگيت آدم وحسوني وراي وامبين آدم مسبح حسوني هم

آدم باوعلي بابتسامة واني رديتلة الابتسامة احس فراشات بمعدتي بمجرد ما يبتسملي

اجة حسوني يركض باتجاهي تقرب مني ورفع ايديه بمعنى اشيلة ابتسمتلة وشلتة بقيت ابوس بي وهو بس يضحك گعدنا ناكل واني فكري مشتت مو مثل يومية اضحك واتشاقة وحتى آدم لاحظ هالشي وسألني گتلة ماكو شي بس لان عندي امتحان ومادة الامتحان صعبة

هزلي راسة بتفهم وما حجى بعد بس حسيتة ما صدگ

كملنا ريوگ واني بسرعة نظفت المطبخ وآدم غسل المواعين والبيت هو نظيف لان من الليل نظفتة وماكو احد يوصخة واصلا هو صغير بسرعة يتنظف

رحت بدلت ملابسي بسرعة وگلت لأدم راح اودي حسوني لامي بين ما تكمل تبديل شلت حسوني وطلعت رحت لبيت اهلي دگيت الباب طلع آسر بوجهي صبح علي وگتلة هاك حسوني انطي لامي هو اخذة من ايدي وگالة بضحكة هلا بحبيب خالة شلونك جاوبة حسوني بضحكة ثين واي فديتة بعدة ما يحجي زين

سمعت صوت السيارة باوعت لگيت آدم طلع السيارة سلم على آسر واني رحت قفلت الباب ودعت آسر وصعدت السيارة بقيت الطريق كلة هادئة وافكر باليصير وياي وآدم مشغل قرآن جان الصوت كلش مريح

قاطع سلسلة افكاري صوت آدم وهو يگول

_شبيج أري انتي زينة بيج شي احس اكو شي غريب بيج اليوم

_هاا لا زينة كلشي مابية بس مو گتلك علمود الامتحان

_هاي السالفة ما دخلت بالي بس ما اريد اضغط عليج هواي شوكت ما تردين تحجين اني موجود وان شاءلله ماكو شي

سكتت وهو هم بعد ما حجة شي لما وصلنا قبل ما انزل من السيارة انطاني مصرف وگالي اكلي زين وديري بالج على نفسج واذا احتاجيتي شي اتصلي علي

هزيتلي راسي وعلى وجهي ابتسامة
گال عفية بالشاطرة وعافني وراح

دخلت الجامعة واخذت المحاضرات ومن بداية الدوام اني اريد احجي لاسراء بس اتراجع و اگول خاف ما تصدگني عاد هي من كملنا اخر محاضرة ودتني بمكان هادئ ومعزول وگالت يالا احجيلي اعرفج من بداية الدوام تريدين تحجين بس مترددة

تنهدت وحجيتلها كل شي صار وياي من دخلت بيت آدم ولهذا اليوم الي شفت الدم

فتحت عيونهة بصدمة وبدون وعي لطمت على خدها وگالت

_عزا بعينج بس لا مسويلج سحر

_منو آدم

_يا آدم شبيج يمكن واحد تعرفينة

_ما اعرف ورب الكون بس هالاشياء مسببتلي رعب ما اگدر ابقى وحدي بالغرفة وحتى من اسبح اطلع بسرعة واذا مثل ما تگولين سحر فمنو اليستفاد وليش يسويلي سحر

_والله ما ادري اصبريلي اليوم من ارجع اكو مرة تعرف بهيج شغلات راح اسئلها واردلج خبر وان شاءلله خير

_اي عفية اسو لا تبقيني هيج احس نفسي راح اتخبل

_لا تخافين اني وياج وما اعوفج وصدگ ردت اگولج يوم الجمعة معزومة يمي عالغدة راح تجين مو

_ان شاءلله هو اني عندي غيرج

اسراء سايقها جي عليها واني رحت للكفتريا انتظر آدم

اتصل آدم علي وگالي اني عندي شغل وراح اتأخر اذا تگدرين ارجعي ويا حزيران

گتلة تمام اشوفها واردلك خبر

اتصلت على حزيران وگتلها راح ارجع وياج سئلتها وين مكانها گالتلي الموقع ورجعت اتصلت على آدم وگتلة راح ارجع وياهن

صدگ رجعت وياهن وصلنا وكل وحدة راحت لبيتها رحت للبيت طلعت المفتاح وفتحت الباب دخلت جان البيت كلش هادء وموحش ترددت ادخل بس اخر شي قريت المعوذات وتوكلت على الله ودخلت

اول شي رحت بدلت وسبحت باوعت عالساعة لگيتها 2 ما جان اكو وقت اطبخ هسة فطلعت كبة من المجمدة وگليتها وطول ما اني اشتغل احس شخص وياي سويت نفسي ما مهتمة كملت الكبة وگلت راح اسوي زلاطة وياها رحت للثلاجة فتحتها ردت اطلع خيار

بعدني توا فتحت الباب حسيت شي لزمني مو حسيت بس من صدگ شي لزمني من كتفي جانت ايد خشنة وحارة مو آدم لان ايد آدم مو هيج وحتى ما سمعت صوت الباب من نفتح وآدم دائما من يدخل اول شي يسوي يسلم

من صدمتي بقيت متجمدة بمكاني احس الدم وگف بعروقي بقيت واگفة هيج والايد بعدها لازمتني اريد اصيح اريد احجي ما اگدر احس لساني نعگد صارت بس دموعي تنزل وما بيدي اي شي

ورا دقائق حسيت الايد وخرت من گتفي تشجعت والتفت ليورة شفت خيال اسود بسرعة مشى من يم الباب ورب الكون شفتة جان ضخم وجسمة اسود كامل وايدة كلش كبار وضخمة ورجليه مثل ايديه، صرخت باعلى صوتي وبعد ما حسيت باي شي

فتحت عيوني بانزعاج احس شي يوگع على وجهي فتحتهن كامل لگيت آدم بوجهي وساند ظهري على ايدة وبالايد الثانية يرش مي على وجهي

تذكرت الصار وياي والايد اللزمتني طگيتهة ببجية حضنت لآدم وصوت شهگاتي يعلى

سألني بقلق وتوتر

_شبيج أري لا تخوفيني شصاير

اني بس دموعي مستمرة وصوت شهگاتي ما وگف

_احجي شصارلج لا تقلقيني راح اتخبل

زهراء: ايد.... ايد لزمتني ورب الكون ما اتخيل حتى... حتى شفت خيال اسود واگف يم الباب

حضني قوي وگال

_هشش كافي عيوني على كيفج بس اهدي مصدگج بس كافي تبجين

مسح دموعي وگومني غسل وجهي واني بعدني حاضنة ايدة

كمل غسيل وجهي وطلع كلينس مسح وجهي

باوعتلة بخوف وسألتة بتردد

_آدم انت مصدگني

_مصدگج راح احجيلج كلشي واگولج سبب الصير

جرني وگعدني عالكرسي واني جسمي بعدة يرجف من الخوف

راح جاب الكبة وحطاها عالميز وقطع خيار وطماطة وجاب الخبز

گعد يمي وبدة يوكلني واني بالگوة ابلع اللگمة

سألني شنو الصار بديت احجيلة من اول موقف صار وياي لهذا الموقف الصار

آدم:  اعرف كلشي يصير وياج وهسة احجيلج ورا ما تكملين غداج

زهراء: تعرف وانتي منين تعرف

آدم: لان هالشي بسببي

زهراء: بسببك وانت شدخلك

آدم: من تكملين احجيلج

زهراء: انت شوكت جيت

آدم: قبل شوية واول ما دخلت سمعت صوت صرختج وجيت اركض وشفتج مغمى عليج

كملت غدة وهو ما تغدة بقى بس يوكلني شال المواعين وغسلهن واني بس گاعدة اراقبة كملهن وراح للثلاجة طلع عصير وانطاني اياه شربتة كلة

تقرب مني وگال عفية بالشاطرة ويالا گومي وياي علمود احجيلج كل شي تريدين تعرفينة لزم ايدي وجرني وراه وداني للصالة سألتة ما تروح تجيب حسوني گال فد شوية ورا ما احجيلج

گعد عالقنفة واني بقيت واگفة هو باوعلي باستغراب وگال

_ليش بعدج واگفة

جاوبتة بخجل

_اريد انام واحط راسي على رجلك تقبل

جاوب بضحكة

_اي ليش لا

مشيت بتوتر تمددت عالجرباية وتغطيت وهو حط راسي على رجلة بدة يمسح ويلعب بشعري جان شعور مريح وحلو ذكرني بايام زمان من جنت صغيرة ارجع من المدرسة ماما جانت تنومني على رجلها وتمسح على شعري تلقائيا يروح التعب

بقيت هيج فترة محد يحجي قاطع الهدوء صوت آدم وهو
تنهد وگال

_السالفة بدت قبل 9 سنين وراح احجيلج اياها كلها علمود تتوضح كل الامور

قبل 9 سنين

اتمشى بالكلية واني حاير هالاسبوع وين راح ابقى اذا اروح لآميد عيب من اهلة كل فترة رايحلهم ومحمد بيتة اصلا بغير محافظة هاي شلون حالة حتى الله ما يقبلها ما عندي مكان انام بي صاير مثل البزازين يومية بمكان اني وجنطتي والمشكلة حتى فلوسي راح يخلصن ما يكفن أأجر شقة

قاطع افكاري ضربة على كتفي التفتت لگيتة زميلي ساهر گالي بضحكة

ساهر: شلونك يالضلع

آدم بابتسامة: الحمدلله انت شلونك

ساهر باسف: شلوني واني مزفتها بالامتحان لو ادري الهندسة هيج صعبة جان ما دخلتها

آدم: يالا ما بقى شي هانت ان شاءلله هاي السنة راح تخلص وما باقي بس الاخيرة

ساهر بضحكة: طبعا انت ما تهتم انت سجاج الدفعة

آدم: اي طبعا مو مثلك ضارب الدراسة عرض الحايط ويوميا بالكافتريا حتى محاضرات بالگوة تدخل

ساهر: هسة عوفنة من هذا ما سمعت بمحمد اليوم مسوي سهرة بشقة الولد غير ما ناوي تجي گال الكل معزوم

آدم بعدم فهم: لا ما سامع هسة جاي اسمعها منك واصلا ما راح اروح ماحب هاي السوالف التعبانة واصلا حرام

ساهر بتبرير: ولك لا مو مثل البالك مثل ما گتلك غير شكل وانت اصلا جاي ادور مكان تنام بي فتعال الليلة عالاقل تحصل مكان تنام بي

فكرت صدگ احتاج مكان انام بي بس اني شمدريني شراح يسوون ما ادري اوگع بمصيبة واني بغنى عن المشاكل

آدم: لا ما راح اجي وشمدريني انتو شراح تسوون يمكن مسوينة مكان تتعاطون بي واني ما اريد اكون قرب المشاكل

ساهر يضحكة: الله عليك شنو من تفكير هذا شكد تفكيرك اكشن بس لا وين مو هيج هي بس سهرة ولعب ما بيها اشياء مثل البالك وعالعموم هذا العنوان اذا ردت تجي راح يكون مرحب بيك

راح وعافني افكر بحجية

خلص الدوام وطلعت من الجامعة اتمشى ما عندي مكان اروحلة شفت عربانة صغيرة تبيع لفات اخذت لفة وبطل مي گعدت اكلهن بحديقة بس جانت مثل المهجورة ما بيها ناس هواي بقيت گاعد بيها لما غابت الشمي

بقيت افكر انام بالحديقة اليوم لو اروح لشقة الولد زين اذا نمت بالحديقة يمكن احد يتهجم علي واني نايم واذا رحت لشقة الولد هسة ما اعرف شنو نوع سهرتهم اخر شي حسمت قراري وگلت راح اروح لشقة الولد واليصير خل يصير

رحت اتمشى للعنوان الانطاني اياه ساهر لان حتى فلوس راح يخلصن وما اريد اخلصهن عالتكاسي والباصات وصلت بعد مشي ساعة كاملة وگفت گدام العنوان المطلوب جانت عمارة شكلها قديم متكونة من اربع طوابق صعدت للطابق الثالث ودگيت باب الشقة فتحلي ساهر ودخلني گال تفضل بعدنا ما بادين ويمكن انت اخر واحد

باوعت بارجاء الشقة جانت شقة شكلها عادي والولد البيها حوالي عددهم بالعشرين وكل واحد ماخذلة مكان گاعد وحدة لو هو وجماعتة

دخلت ورحت گعدت وحدي بزاوية من الزوايا بس مادري شعور غريب محاوطني من دخلت للشقة من الخنگة والوحشة

جابو عشا وتعشينا وكلة على حساب محمد واني مستغرب سر هذا الكرم

صارت ساعة 11 ونص واني عيوني اريد اغمضهن من التعب بس بالگوة لازم نفسي ما اريد اتام مهما يكون ما اگدر تثق بيهم

اجة ساهر وتقرب مني وگال

_خاف نمت ترا السهرة بعدها ما بادية

بعدها گال يالا يا ولد اتجمعو

اتجمعوا كل الولد وگعدو بحركة دائرية واني مستغرب تصرفهم صاحني ولد وسوالي مجال اگعد يمة رحت گعدت واني شعور الخوف بدة يراودني

طلع ساهر وورا شوية رجع بيدة دجاجة وورا دخل محمد وشايل بيدة كتاب گعد محمد ببداية المجموعة وبعدها بدة يحجي كلام غريب ما مفهوم وراها بشوية دخل ساهر الدائرة وبيدة الدجاجة وذبحها گدامنا بكل وحشية اني تخبلت ذولة مخابيل شيسوون ردت اگوم اشرد بس خفت لا يلزموني ويذبحوني مثل الدجاجة

سكتت وما حجيت شي ومحمد بعدة مستمر ما ادري شيحجي من كمل گال اذا واحد بيكم يريد شي خل يجي يكتبة گامو واحد ورا الثاني ياخذون من دم الدجاجة ويكتبون بورقة موجودة يم محمد بقينا بس اني وكم ولد ما گمنا

تقربب ساهر يمي وگال

_شنو ما عندك شي تريد يتحقق

لا ما عندي وترا هذا الشي حرام شنو هذا الجاي تسوونة

_ههههه والله ضحكتني شكو بيها واحنا ما مسوين اي شي ومحد راح يجبرك اذا ما سويت مثلنا

كملو طقوسهم ولملمو المكان وكل واحد اخذلة مكان ونام بي ولا عبالك صاير شي رحت گعدت عالقنفة واني افكر بكل الصار واگول يا ريتني نايم بالحديقة ولا جاي هنا بقيت الليل كلة ما نايم افكر بالصار وما راح من بالي اعرف ذولة شسوو مو غشيم بس حاير ذولة سحارين لو عبدة شياطين شكلهم وحجيهم مثل السحارين بس السووه اني الاعرفة بس عبدة الشياطين هيج يسوون ويمكن هم السحارين هم هيج يسوون والله مادري بس همزين قربانهم طلع دجاجة ومو طفل الله ستر، اني شجابني لهنا وعلى ذولة

صار الصبح واني گبل طلعت وما رجعت للشقة رحت لجامعتي واني الوم بنفسي لان رحت لهيج مكان

ساهر من شافني بالجامعة سألني ليش طالع من وگت گتلة طلعت اتمشى علمود اصل من وكت تعرفني اجي مشي

استمرت الايام وآميد لگالي شغل بمحل عمة وجان اكو بالمحل مخزن عمة وافق انام بي وصدگ صرت اشتغل ويا عم آميد وانام بمخزنة وما صرت اروح انام يم الولد

بس باخر فترة وبوقت الامتحانات النهائية بديت اشوف اشياء غريبة واسمع اصوات مثل الهمهمة ومرات احس واحد گاعد يمي عالرغم بس اني جنت وحدي بالمخزن بالبداية گلت اتخيل وما اهتميت بس الاشياء الغريبة گامت تصير اكثر من قبل واني متعجب هاي شنو هاي

لكن كلشي توضح من اجة طالب علي وراد يحاجيني بموضوع وهذا الطالب هم جان موجود وياي من رحت لشقة محمد گتلة انتظرني يم المكتبة وعود نحجي

وصدگ بس خلصت امتحان رحت علي وگعدنا بمكان هادئ بالبداية جان متردد بس اني گتلة احجي شكو عندك وان شاءلله اگدر اساعدك

صار يحجي عن امور تصير ويا باخر فترة والصدمة نفس الجانت تصير وياي عاد اني هم حجيتلة كلشي صار وياي

گال

_هذا الشي كلش مخوفني واريد اخلص منة لان احس نفسي راح اتخبل وجيت اسئلك لان انت الي جنت وياي من قسمي بذاك اليوم من رحنا للشقة

ما حجيت اي شي بس بقيت افكر هاي الامور صارت وياي من رحت لشقة محمد وشي اكيد هو يعرف السبب جاوبتة من بعد تفكير طويل

_اني اشك ان محمد هو السبب بالي يصير ويانا وهو راح ينطينا اجوبة على اسئلتنا لازم نروح نسئلة

_للاسف طلع بس كمل امتحانة

_لعد ساهر هم يمكن يعرف

_اتاخرنا لان هو وساهر طلعو سوية

بقيت افكر المشكلة موبايل ما عندي والنوكيا غالي ما عندي فلوس اشتري

آدم: انت ما عندك رقمهم عنوان بيتهم

الولد: لا ما عندي ارقامهم بس اعرف شخص يعرف مكان بيت محمد

آدم: لعد گوم اخذني الة

رحنا ندور الولد وبعد ما سئلنا گالو بعدة يمتحن بقينا منتظرينة ساعة كاملة لما خلص وقت الامتحان يالا طلع

سألنا على عنوان بيت محمد بالبداية ما حجى وگال ما اعرف

بس گلنالة محمد يطلبني فلوس واريد انطيهن الة وهو طالع من الجامعة وهذا اخر امتحان ويمكن يصيرلي شي لا سامح الله ويبقى الدين برگبيتي

عاد صدگ هو بس سمع هالحجي انطانا العنوان اخذنا بسرعة وطلعنة متوجهين لبيت محمد لزمنا تكسي علمود نوصل بسرعة

جان بيت كلش بعيد ساعة كاملة يالا وصلنا نزلنا بمنطقتة وجانت امبينة منطقة شعبية الجهال يلعبون بالشوارع والنسوان الكبار مسوياتلهن مجموعة وملتمات والشباب اكو بيهم گاعدين عالشارع ومسوينلهم جمعة واكو بيهم يغسلون سياراتهم

سئلنا اهل المنطقة عالبيت وصدگ انطونا عنوان البيت ومكانة بس كل واحد نسألة يباوعلنا بطريقة غريبة واكو بعضهم بس سمعو اسم محمد گبل عافونا وما حجو اي شي

وصلنا للبيت وجان امبين قديم بس مو كلش بس الما جنت متوقعة البيت جان مقفول بمفتاح جبير يعني امبين شايلين منة لگينا نسوان اثنين گاعدات يم بيت بصفة رحنا اتقربنا منهن

آدم: السلام عليكم

الحجيات: وعليكم السلام

آدم: ممكن اذا ما تصير زحمة اخذ من وقتجن شوية واسئلة كم سؤال

جاوبت وحدة منهن: اي اتفضل ابني اسئل العندك وان شاءلله تلگة الجواب

آدم: عفوا حجية بس ردت اسئل عالجانو ساكنين بهذا البيت وليش بابهم مقفول

لاحظت ملامحهة تغيرت وبين عليهن الاستنكار

الحجية: ليش شتريد منهم

آدم: ابنهم الاسمة محمد يطلبني دين وجيت اردة الة

الحجية: يعني ما جاي علمود ذيج الشغلة

جاوبتها بعدم فهم: يا شغلة ما افتهمتج حجية وهسة ما ناوية تگولين وين راحو

باوعت للحجية البصفها وبقن ساكتات لفترة بعد مدة من سكوتهن الطويل الحجية الاخرى هزت راسها للحجية الجنت احجي وياها وعبالك انطتها الموافقة

الحجية: شوف ابني راح احجيلك قصة هاي العايلة علمود لا تتقرب منهم ولا تتعامل وياهم هاي العايلة جانت انگس عايلة بمنطقتنة والكل يكرهم وما يطيقم ومن شالو منة جان يوم عيد بالنسبة النا وسبب هذا الشي لان جانو يمارسون السحر كل واحد بهالعايلة جان يعرف معلم السحر والي ورثو بسبب جدهم وبسبب سحرهم جان عدهم معاميل هواي وهالشي جاب المشاكل لمنطقتنا بحيث لازم يومية صايرة مشكلة ياما بسبب احد مكتشف سحرهم وجاي هاد لو واحد متاذي بسحرهم وهواي مشاكل بس باخر فترة جاهم معميل وجان امبين عندة فلوس هواي وطلب يسولة سحر بس هم خطئو بسحرهم وهذا الشي ما جان رايدة هالمعميل وصار يهددهم بالقتل وقبل شهر گعدنا من نومنا ولگيناهم شايلين ويمة انطيك نصيحة لا تتقرب من ابنهم الاسمة محمد ماكو من وراهم بس المشاكل

كملت الحجية كلامها واني مصدوم من السمعتة يعني محمد يمكن سوالنة سحر ويمكن شي اخطر والله اعلم والجاي يصير وياي بسبب فعلتة

تشكرت من الحجية وطلعنا من منطقتهم واني والولد افترقنا وكل واحد راح لمكان

استمرت هالاشياء تصيرلي وشبه تعودت عليها لان جنت اروح لشيوخ وكلهم يگولون كل شي ما بية انتظرت الدوام لما يبدي والتقي بمحمد يمكن يعرف اليصير وياي

بس ما داوم لا هو ولا ساهر وما شفتهم هذيج السنة ابد واصلا ايست منهم

مرت الايام والشهور وورا سنتين جنت گاعد بكوفي ويا صديقي محمد وحجيتلة كل السالفة وهو دلاني على شيخ يعرف بهالسوالف وگالي روحلة وصدگ رحتلة وگل هاي اليصير وياك بسبب استدعاء جن حجيتلة كل الصار بشقة محمد وهو گال راح اقرا عليك بس هالرقية يمكن اطول

استمريت ويا لمدة شهر وتقريبا هالاشياء بدت تروح بس لان جنت توا بعدني بادي شغلي فجنت مضطر اسافر وتركت روحتي للشيخ بس رجعت الاشياء مثل قبل فعاد تعودت عليها كل هالسنين وهاي كل السالفة

عدلت گعدت واني مصدومة من السمعتة گتلة بخوف

_يعني هالحجي صدگ وهاي الشغلات التخوف راح ابقى اشوفها

لزم ايدي وگال بابتسامة

_اسمعيني زين أري الشياطين والجن شكد ما تخوف بس تبقى ضعيفة و ما تگدر تأذينا واحنا دائما بحفظ الرحمن ودائما اقري اية الكرسي والمعوذات وان شاءلله ماكو شي

_بس اخاف بيوم يطلعولي

_لا تخلينهم يحسون بخوفج وياخذونها نقطة ضعف عليج هم اضعف الخلق

_وشوكت تروح تبقى هيج للابد ويانا واخاف يتقربون لحسوني

_حسوني اني دائما عيني عليه وانتي هم لا تنسينة وبالنسبة لشوكت فما اعرف والله بس گلت من اكمل شغلي اروح لشيخ واخليه يرقيني مرة ثانية واذا ما راحو هاي هي شاسوي 

هزيتلة راسي بمعنى اي وهو لزم راسي وحطاه على رجلة وبقى يلعب بشعري حتى ما حسيت من نمت

گعدت على لمسات خفيفة فتحت عيوني ولگيت حسوني واگف گدامي يلعب بوجهي عدلت گعدتي واني بعدني مو بوعي لگيت نفسي بعدني نايمة عالقنفة والدنيا مغرب
سحبت حسوني شلتة وحطيتة بحضني صرت ابوس بي وهو يحجيلي شسوه يم بابا وماما

دخل آدم للاستقبال باوعلي بابتسامة وگال صح النوم يالا گومي بدلي علمود نطلع نتعشى برا وصدگ انطيتة حسوني ورحت اركض سبحت وبدلت وخسوني اصلا جان امبدل وسبحان شي اكيد هو سبحة

طلعنا تعشينا وشوية تغيرت نفسيتي وما بقيت سالفة الظهر ابالي رجعنا ساعة 9 علمود اقرا لامتحاني بقيت گاعدة اقرا لساعة 12 وحسوني نام بس رجعنا لكن آدم بقى گاعد وبس يشتغل بلابتوبة كملت وشلت كتبي رحت نمت بس آدم بقى گاعد

گاعدة بالسيارة واباوع عالناس والشوارع وبصفي آدم يسوق ومشغل قرآن شكد صوت مريح ابد ماشايفتة يشغل اغاني بس قرآن

قاطع هالصمت صوت آدم وهو يگول

_راح نوصل ومثل ما گتلج نفذي حاولي تحطيهن كلهن واحد بغرفة النوم وواحد بالصالة وواحد بالمطبخ وان شاءلله تنجح الخطة واني راح ابقى انتظرج بالسيارة قريب من بيتها أري معتمد عليج حاولي بگد ما تگدرين

_لا تخاف ما راح اخذلك

_واثق بيج اني بس ديري بالج على نفسج بس تحسين نفسج راح تنكشفين رأسا عوفي المهمة سلامتج اهم تمام أري

هزيت راسي بايجاب، قرب ايدة من اذني وتحسس السماعة

آدم: ديري بالج لا توگعيها وانتبهي زين واي شي يصير وياج گوليلي

زهراء: تمام بس ماكو داعي لكل هالخوف ترا هي صديقتي وتحبني

آدم: ميخالف الحذر واجب

وصلنا البيت نزلت من السيارة وسديت الباب باوعلي بابتسامة وگال

_ادري بيج شاطرة وراح تنفذيها انتي گدها

ساق سيارتة وراح واني اتجهت للبيت جان شكلة امبين كلش جبير دگيت الجرس ورا شوية فتحت اسراء الباب وگالت بابتسامة

_تفضلي

يتبع.....