"مُــوو انه الانذل بالعشك ، انا المهيل
لو غبت ماتكمل التعلولة
خاب انا من انغث چنت بالفاتحة يغنوله ."
الكاتـِبه : أيــلان
حساب الانستا للتواصل : l.1ll8
مُلاذ :-
مُلاذ : انا قتلت شخص
ظل يدحك بـ وجهي موسع عيونه
بـ لحظتها حسيت الدموع تتجمع بـ عيني
و لـ اول مره بعد فترة طويلة
بلعت ريگي و انا ادحك بـ وجهه
أيهم : منو قتلتي و ليش؟
درت وجهي عنه رفعت نظري لـ فوك
مسحت عيوني قبل لا ادمع
فركت صدري ، گلبي ينبض حيل
هوسه بـ عقلي ، خنكه ، غصه
بس هاي الغصة مستحيل رح تطلع اعرف
رح تظل متحجره بـ بلعومي
كل هاي السنين اتحجرت بـ بلعومي
التفتت على صوته وراي همَس
أيهم : لَـذه
المكتب اظلم ضوه يمر من الشباك
يضوي داخل المكتب ، دحگت لـ أيهم
أيهم : احجيلي
مُلاذ : شنو الاحجي؟
أيهم : منو قتلتي و ليش؟
مُلاذ : لمن خطفوني
اخذوني لـ شخص حاول يعتدي عليه
طعنته بـ رگبته ، مات
ظل موسع عيونه يدحك بـ وجهي
دار عيونه بين عيوني
أيهم : دافعتي عن نفسج
مُلاذ : بـ النهاية قتلت
أيهم : دفاع عن النفس
نزلت عيني دحگتله صام ايده حيل
يحاول يتمالك اعصابة
مُلاذ : ليـ....
بعدني اريد احجي ، طك خشمه دم
فتحت عيوني بـ وسع
مُلاذ : أيهممم!!!
ركضت فتحت الضوه
اخذت كلنسه بسرعة من الطاولة
خليتها على خشمه ، لزم الكلنس بـ ايده
اتقدم كعد على القنفه ظل لازم بـ الكلنس
اركض وراه خفت ، طك فجأه و هواي
مُلاذ : أيهم شبيك؟؟ دايخ بيك شي؟
شسوي ها؟ ترفع رجليك تنزلهن؟
أيهم : اكعدي لا تخافين
عدل نفسه نظراته ذبلانه
راد يكوم وكفته : اكعد گلي شسوي لا تگوم
أيهم : لا تخافين لَـذه ما بيه شي
مُلاذ : و خشمك؟؟
أيهم : ارتفع ضغطي
مُلاذ : عزززه من وراي
دكتور انا ارفع ضغطك ؟؟
أيهم : انطيني مي
ركضت لـ الثلاجة يلي بـ الغرفة
فتحتها دحگت بيها حلويات و مي و عصاير
اخذت بطل مي ، رحت اله
مُلاذ : دكتور بس هذا بارد
هسه تتجمد مثل توم وين اوديك ؟
اخذ البطل من ايدي خلاه على خشمه
ظل كاعد على القنفه و انا ادحگله
أيهم : اخاف اگلج وين توديني و ما ترضين
مُلاذ : وين اوديك
اشمرك بـ مكان حار لحد ما تذوب
أيهم : لمن اعاين لـ وجهج اذوب تلقائياً .
وسعت عيوني ، حكيت كصتي
مُلاذ : دكتور لا تتغزل عيب انت متزوج
أيهم : عمي ساعة الگشره العرفتي بيها
مُلاذ : اهووو دكتور غير متزوج
أيهم : عمي متزوج لو مصلخ شبييج
كل ما حجيت حجايه گلتي متزوج
شني تعيريني لو تضوجيني ؟
مُلاذ : لا دكتور بس اذكرك بـ حالتك العاطفية
أيهم : لا تذكريني ما ناسي انه
مُلاذ : اي دكتور احسن
أيهم : تعلين گلبي من تسوي هيج بيه
مُلاذ : دكتور و الله انت تتبلى عليه
أيهم : زين
مُلاذ : دكتور لازم ارجع
أيهم : ارجعي
رحت ع الباب فتحته ما انفتح ، مقفول
انداريت و انا اگول : دكتور البـ...
دحگتله واكف وراي ، يفصل بيننا مسافة
لا كلش قريب و لا كلش بعيد
شوكت يلحك يجي يوكف وراي ما اعرف
بلعت ريگي ظهري على الباب و هو كدامي
يدحگلي و يرجع نظره لـ شفتي
خزرته و گلت
مُلاذ : عيونك العسلية افكسها
أيهم : عيونج السود ابوسها
وجهي احس نار صارت بي
ما اعرف عصبية لو خجل
بس انا ما اخجل من الغزل
لذالك اكتفيت خازرته
مُلاذ : موو صوجك
صوجي اجي وياك لـ المكتب
ذب نفس عالي و ظل يدحگلي
و هو يدحگلي ، فتح قفل الباب
قبل لا افتحها و اطلع ظل طابكها بـ ايده
أيهم : لا تخافين لَـذه ايدج ما المسها بـ الحرام
عدا لمن نكون مجبورين و مضطرين
مثل لمن انجويتي لو لمن تتمرضين
غيرها ما المسج لمسة وحده و الطخج بـ الحرام
و اذا ما صرتي من حلالي لا سامح الله
اكضي عمري كله بعيد عنج بس حتى ما اجيسج
ابتعد عني ، أشر لـ الباب
فتحت الباب ردت اطلع ، اتذكرت خشمه
مُلاذ : دكتور خشمك خـا...
أيهم : لا انكطع الدم لا تخافين
يلا روحي و انه رح الحگج
مُلاذ : ليش؟
أيهم : اخاف عليج
حكيت شعري طلعت و تركته
ظليت امشي و ادحك لـ وراي
الگاه يمشي بس بعيد
استمريت امشي درت وجهي دحگت
لگيت ممرضة تحاجي و هو يهز راسه
عگدت حواجبي و انا ادحگلها تضحك ويا
التفت الي دحگلي خزرته ، بقى يدحگلي
و انا على نفس الخزره ، نظري يتجول عليهم
ابتسم تك خد دار وجهه ، دحك للممرضة بـ اهتمام
درت وجهي عنهم ، امشي و اهمس وي روحي
مُلاذ : امشي منا مُلاذ
لا اركع راسج بـ هذا الحايط شعليج انتِ
انجبي و اتادبي متزوج طالعه عينج
من شوكت عينج هيج صلفة
هااااا من شوكت؟
امشي و احجي وي روحي
ارزل بـ نفسي ، درت وجهي دحگت
ما لگيته وراي
مُلاذ : طبعاً بعده يحاجيها
خاين ابو النسوان يخون مرته
ام سوادي ، الدكتور واسطه
امشي و ادردم لحد ما وصلت لـ الغرفة
جريت نفس ، فتحت الباب ، دخلت دحگت لـ عمتي
منارس : وين صرتي عمه ؟
مُلاذ : مو ضيعت الدكتور
طلع و هم يخلولي دم و ...
كامت وكفت كدامي ، ابتسمت
منارس : ترا اعرف
مُلاذ : شنيييي؟
منارس : سولفتلي غاده
مُلاذ : شسولفتلج؟
منارس : لمن خطفوج راحو لـ بيت هاي البنية السورية
لان يريدون يعرفون منها شصاير و منو الخطفج
متعارك هو و اخوه بـ الشارع و گايل هو يحبج
جمدت بـ مكاني ادحگلها
شنو ما ادري بـ هالسالفة ؟؟
مُلاذ : عمه غلطانه
منارس : يمه غاده سولفتلي
مُلاذ : متزوج ترا غاده سامعه غلط
منارس : يااااااا
مُلاذ : امم
منارس : شكد عيب ظلمنا الرجال
مُلاذ : عادي ، ما تدرين
هزت راسها و لزمت ايدي
كعدتني ع السديه ، اتمددت
ظليت طول الفجر هيج اتگلب
و رگبتي اثر الحرك الي بيها ما راح
امي لمن شافته اتخبلت
لو تدري بـ الجويات الي بـ بطني شيصير بيها
ابد ما سمحت الها تشوف جسمي
اعرفها ما تتحمل منظر الجويات و التعذيب
طلعوني من المستشفى ثاني يوم
أيهم ما موجود لو موجود ما يخليني اطلع
اكرهه المستشفى ريحة الديتول تجيبلي غثيان
اول ما رجعوني ما اخلي امي تساعدني
گوه أقاوم وجعي و البس
جسمي كلش تعبان بحيث امشي و اوكع
ما اكدر اوكف على رجلية
حسيت مقاومتي بـ ذيج الايام كلها
و تعذيبي قبل ، هسه طلع بيه
جسمي صار ما يتحمل اي ألم بعد
گمت من الغرفة دايخه ، راسي مسطور
الدنيا سوده كدامي لزمت بـ راسي و امشي
سندت روحي ع الحايط ،
شعري نازل على وجهي ، عيوني توجعني
ظليت سانده نفسي ع الحايط و امشي
لـ باب الغرفة ما كدرت اكمل
وكعت وكعه قوية انضرب راسي بـ حافة الباب
من كد تعبي حتى ما صرخت ، لزمت بـ راسي
كشولت ملامحي متوجعه
دحگت لـ امي اجت الي تركض
عيونها تريد تطلع من محجرها
لمن شافتني على الگاع
فيروز : يممممه سوده بـ وجهي
شلووون طحتي ؟؟ يمه بنيتي دحگيلي
خلت راسي بـ حضنها
هزيت راسي بـ رفض نطقت بـ همس
مُلاذ : لا تخافين ما بيه
طاحت دموعها على خدي ، سكتت
صاحت على ملاك اجت تركض
جانت تشر هدوم برا ، رفعوني من الگاع
سندوني عليهم
فيروز : وين جنتي رايده ترحين؟
مُلاذ : لـ الحمام
اخذتني لـ الحمام رادت تدخل وياي ما خليتها
دخلت لـ وحدي ، وكفت احاول اسبح
ملزمه بـ الحايط ، گوه اسبح
طلعت من الحمام لزمت بـ امي المنتظرتني
اخذتني لـ الغرفة نشفت شعري ، كامت تمشطلي
اسمعها تبجي ، جسمها يهتز و هي تمشط شعري
شالت شعري بـ ايديها باسته حيل
ابتسمت ، ظليت ساكته ، ملاك كاعده يمي
اندك الباب ركضت ملاك فتحت الباب
تخاف تروح و احتاج شي و ما تلحك عليه
كل ما تسوي شغله تسويها ركض ركض
حتى تلحك عليه و تساعدني
دخلوا جسار و سلطان و نور و عمه منارس
ابتسمت ادحگلهم
غابت ابتسامتي لمن شفت اسكندر وياهم
جسار و سلطان يتأففون ، اتقدموا سلمو عليه
اتقدم من وراهم اسكندر هم سلم عليه رديتله السلام
سندوني نور و امي اخذوني لـ الصالة
حجينا بـ موضوع الخطف اكدت الهم
كل الي خطفوني هاهيه بعد ما يكدرون يطلعون
لَكن الچتال بعده حُر طليق ...
گامت امي تصب جاي
ملاك راحت وراها ، كام اسكندر كعد يمي
بـ مكان امي ، اتحمحمت و دنيت نفسي عنه
مخليه بـ حضني المندر و ادحك لـ گدامي
حسيت ايده صارت على شعري
غمضت عيوني بـ نفاذ صبر متنرفزه
ردت اعيط بي ، فتحت عيوني
دحگت لـ جسار واكف كدامي
جسار : شو زيحي
تدنيت كعد بـ نصنا انا و اسكندر
اندار لـ اسكندر اخذ ايده من على التچوه
و صافح ايده ، ظل يگولب بيها
جسار : ايدك انثويه شتستخدم الها؟
ظليت ادحك كدامي
اضم بـ شفتي حاصرتني الضحكه
اسكندر : شنو انثويه ؟
جسار : ما ادري رقيقة و ناعمه
نور تنطينه من الكريمات مالتج مو؟
نور ابتسامتها بسرعة تفلت
اتحمحمت و هزت راسها بـ رفض
اسكندر صافن علينا و عاكد حواجبه
دخلت ملاك قدمت الجاي
سلطان : حتى شعرك شنو صابغه؟
اسكندر : لا
سلطان : شو صاير حلو شنو عفت شغلك؟
اسكندر : ها؟
جسار : سمعنا انت مجمد
ظل يدحك بـ وجوههم وسعنا عيوننا ما ندري
مدري منين دروا جسار و سلطان
و انا اگول ليش يتحارشون بي
اجت ملاك كعدت يمي بقوا شويه بعدين راحوا
بقت عمتي منارس و نور يمنا
ظليت على هالوضع كم يوم
بعدين بلغني ضرغام لسا ما لاگين الخطفني
وسعت عيوني بـ صدمة
مُلاذ : شلون يعني؟؟
ضرغام : اساساً لمن اجيتي أيهم شايلج
لزمنا بس التابعين لـ الخطفج
بس الشخص الاساسي لا ما گدرنا نلگاه
حكيت كصتي ، اتذكرت أيهم
مُلاذ : ضرغام دقايق و اخابرك
ضرغام : تمام
سديت الاتصال
دورت على رقم أيهم و اعض بـ اصبعي
اول ما لگيت رقمه اتصلت بي
ظل يرن يرن هواي ، فقدت الامل يرد عليه
نزلت تلفوني اريد اسد الاتصال
وكفت لمن انفتح الخط
خليت التلفون على اذاني بسرعه اريد احجي
حجا قبلي بـ صوت نعسان
أيهم : أيمن رح انعل الخلفوك
حبيبتك انه هسه تدك عليه امشي ولي عني
سياره جديده طركاعه بـ عينك جديده ماكو
حصرت ضحكتي عليه
يسولف نعسان و متضجور
مُلاذ : أيهم
أيهم : انجب لا تقلد صوت مُلاذ
مو ابتليت على روحي جفصت كدامك
ما اتحملت كاتمه صوتي
و جسمي يهتز اضحك عليه
مُلاذ : أيهم انا مُلاذ
سكت ثواني ، رجع حجا
أيهم : اخ يابه عيوني
أيمن انجب ما اكدر اقرا الاسم
عيوني توجعني و مسطور امشي ولي
مُلاذ : أييييييهم
سكت ثواني صارت حركه يمه
أيهم : مُلااااذ؟
مُلاذ : اي مُلاذ
أيهم : شنو منو صاير شي؟
منو اتعرضلج؟ احجي ولج!!
مُلاذ الـ...
مُلاذ : شبيييييك محد اتعرضلي
صدك دتحجي شجاك!
أيهم : اكيد محد اتعرضلج؟
اخير مره اتصلتي بيه سمعت صراخج
مُلاذ : هي بس ذيج المره الوحيده اتصلت بيك
أيهم : لا تجذبين اتصلتي بيه
لمن اندعمت حزن هم
مُلاذ : حافظهن
أيهم : بشريني شصاير من مصيبه؟
انتِ ما تدگين عليه بس بالمصايب
مُلاذ : المصيبه مصيبتك
أيهم : اي انتِ مصيبتي
مُلاذ : انت بعدك نايم؟
أيهم : مادري جاي احس بـ اعراض الحلم
لان انتِ جاي تحاجيني و هاي مو من عوايدج
مُلاذ : تصحى لو شلون؟
أيهم : ما اصحى
مُلاذ : لا تخليني اصحيك بـ طريقتي
أيهم : اويلي يابه صار بيها طرق
شو اشرحيلي طريقتج بس بـ التفصيل الممل
مُلاذ : اسكندر اتقدملي و قبلت بي
اذاني انرجت رج من عيطته
أيهم : شنووووو؟
وخرت التلفون عن اذاني
كشولت ملامحي ، رجعت التلفون
مُلاذ : صحيت؟
أيهم : شنووو قبلتي بـ اسكندر
هاي جايكم و ابو فاضل الا اخطبج هسه
مُلاذ : يمعود
أيهم : اوكفيلي خل البس
مُلاذ : جذب ما قبلت ولك اوكف
أيهم : مُلااااااااذ شنووو قبلتي بـ نعل
مُلاااااااذ ولج مُلاااااااذ لا تطلعيني عن طوري
مُلاذ : شبيييك انزرفت اذني صدك تحجي!!
سمعت شي يمه انكسر
لا هذا خبل مو صاحي
مُلاذ : ما قبلت بي يابه ما قبلت
جذب حتى تصحى گلت قبلت بي
أيهم : شنو؟
مُلاذ : جذب ما قبلت بـ اسكندر
عاط بـ اذاني بـ صوت عالي
أيهم : ولج مُلاااااااذ ولج الطركاعه السوده
مُلاذ : كافي اذاني شبيك؟
أيهم : احجي مُلاذ شنو قبلتي بي
و الله العظيم هاي رح اطلع من البيت
اجي اكض اسكندر اسحله على طول الشارع
مُلاذ : و العباس و داعة ابوي جذب
سكت ثواني ، رجع گال معصب
أيهم : انه اعلمج تجذبين عليه انتظري جايج
مُلاذ : ولك وين يمعووود؟
سد الاتصال مني ، احلف عليه خبل مو صاحي
رجعت ادك عليه ما يجاوب ، خبلني
ظليت ادك هواي و هو ماكو ما يجاوب
قرابة النص ساعه
انا ادك و هو يرفض
مُلاذ : عمي خبل و الله ام سوادي
درت وجهي لـ التلفون لمن اجاني اتصال
اخذته بسرعة فتحت الاتصال
أيهم : انه بـ الفرع اليم البيت الي بـ صفكم
تعالي بسرعه منتظرج
صوته عصبي مال واحد الدنيا محترگه يمه
يحجي بـ جديه و منزعج
مُلاذ : ما اجي
أيهم : خوش انه اجي
مُلاذ : ما اكدر أيهم
رجلية ما اكدر اوكف عليهم حتى
أيهم : شنو شبيج؟ ليش ما خابرتيني !
مُلاذ : مابيه انا جسمي تعبان
مو انتوا گلتولي جسمج ما يتحمل اذيه بعد
أيهم : جايج مُلاذ ما اكدر اظل هنا
مُلاذ : اوكف خل اگل لـ امي
انت اجيت
أيهم : و انتِ منين تدرين انه اجيت
ما رح تسألج امج هالسؤال؟
مُلاذ : خابرتك أسأل عن وضعي
لان انت دكتوري و تعرف حالتي
و بلغتك وضعي مو زين
و اجيت تشوفني شنو وضعي
حتى على اساسه تنطيني علاجات و تساعدني
أيهم : يلا مُلاذ حاجيها
كدام بابكم انه ، لا تسدين الاتصال
حاجيها و انتِ على المكالمه
مُلاذ : ليش؟
أيهم : حتى اول ما تخلصين ادك الباب
مُلاذ : لو ساكته احسن الي
أيهم : يلا عيوني حاجيها لـ امج
نزلت التلفون من اذاني
صحت لـ امي و انا كاعده بـ الفراش
اجتني تركض دخلت لـ الغرفة
فيروز : ها يمه بيج شي ؟؟
مُلاذ : لا فوفو بس الدكتور رح يجي
فيروز : يا دكتور
مُلاذ : أيهم
فيروز : يا هذا الدكتور الحليو
لطمت على كصتي بـ ايدي
المكالمة مفتوحه و هو يسمع
بـ لحظتها اندك الباب
فيروز : يا هاي يمكن اجه
بس ليش اجه؟
مُلاذ : خابرته اسأله عن علاجات تفيدني
و هو اجا حتى يشوف حالتي
و على اساسها ينطيني علاجات
فيروز : يلا خطيه الولد ينتظر
طلعت و عافتني
خليت التلفون على اذاني
مُلاذ : اجتك
أيهم : انه دكتور حليو؟
حتى امج تگول عني حليو
شنو الما يرضيج بيه ست مُلاذ
مُلاذ : متزوج و خاين
أيهم : انه اعلمج بعدين على كلمة خاين
سد الاتصال مني لحظات مرت
سمعت صوت امي ترحب بي
فيروز : و الله هستونه ذكرناك
گالت مُلاذ الدكتور اجه يشوفني
بعدنا نحجي و انت دكيت الباب
أيهم : ابن حلال خاله
فيروز : ههههه صدك ابن حلال
اتفضل يمه اتفضل اكعد
خل اجيب مُلاذ و اجي خطيه ما تكدر تمشي
أيهم : اساعدج؟
فيروز : لا يمه تسلم اكعد استراح
أيهم : خل اساعدج
فيروز : لا لا عيني اكعد
اختفى صوته
اجتني رساله على تلفوني
أيهم : بيه و لا بيج لَـذه
مُلاذ : اسم الله
رفعت عيني دحگت لـ امي
لمن دخلت الغرفة ، اجت تساعدني اكوم
لزمت بيها و گمت ، كلياتي توجعني
مُلاذ : ماما خل ابدل اول
ملابسي ما مناسبه
فيروز : تعالي يلا
كعدتني ع الجرباية راحت تطلعلي ملابس
اخذتهن من عدها رادت هي تلبسني ما قبلت
طلعت وكفت يم الباب و سدتها
لبست گوه و الكانولا مشدوده بـ ايدي
صحت لـ امي لمن خلصت ، اجتني بسرعه
تلفوني تجيه اشعارات متتالية
خليت عطر ، مشطت شعري شلون ما جان
لزمت بـ امي طلعنا انا وياها لـ الصاله
اول ما دخلت دحگت لـ أيهم فزز عيونه عليه
مُلاذ : شلونك دكتور ؟
أيهم : زين بـ شوفتج
خزرته و امي دحگتله صافنه
ضحكت اغلس ع الوضع ، گام أيهم اتقدم علينا
أيهم : خل اساعدج خاله
فيروز : لا يمه هياتني وصلتها
أيهم : عوفيها خاله ما تكدرين
اخذ ايدي خلاها على رگبته
امي عافتني بس تمشي وراي تخاف اطيح
سندني عليه حجيت بـ صوت ناصي
مُلاذ : و الحرام؟
أيهم : حاله طارئه لازم اساعدج بيها
مُلاذ : زين
كعدت ع القنفه ، كعد هو كدامي
وكفت امي تسأل أيهم
فيروز : يمه شتشرب جاي عصير؟
أيهم : تسلمين خاله ما اريد شي و الله
لا تخبصين روحج تعالي اكعدي لا تتعبين نفسج
فيروز : لا لا يمه يا تعب ؟
راحت امي تسوي جاي و تصيح لـ ملاك
ظل هو كاعد بـ مكانه
قدم ظهره گال بـ صوت ناصي
أيهم : ليش ما كلتيلي هيج تعبانه؟
ليش ما تخابريني و تگولين تردين تموتيني انتِ؟
مُلاذ : كم يوم و اتحسن
أيهم : ماكو هيج حجي
تتاذين يصير شي تخابريني لا تخبليني عليج!
مُلاذ : أيهم انا خابرتك على شي ثاني
أيهم : هاااا ذكرت شني تگليلي قبلتي بـ صخام
و تجذبين عليه خليتيني ما اندل دربي منين
لا تاذيني مُلاذ هاي السالفه ديربالج تعيديها!
مُلاذ : جنت اتشاقه وياك حتى تكعد
أيهم : لا تتشاقين وياي هيج
ما تتوقعين شصار بيه ،
لسا ايديه يرجفن من العصبيه
خط احمر عندي ذني السوالف
مُلاذ : شلون اعنس مثلاً ؟؟
فرك وجهه صار احمر و متنرفز
مدنك راسه لـ الگاع يدحك و يهز بـ رجله
اتذكرت لمن طك خشمه دم ، گلت فوراً
مُلاذ : اتشاقه وياك
أيهم : لا تتشاقين هيج
مُلاذ : اگلك عوووف هالسالفة
انا اجيت احاجيك على سالفة ثانيه
أيهم : شنيه؟
مُلاذ : الخطفني وين وديييته؟
ما مسلمة لـ الشرطه و مضيعه عنهم
أيهم : اي؟
مُلاذ : شنو اي ؟ وينه؟؟
ليش ما سلمته لـ الشرطة
أيهم : جاي اتونس بي
مُلاذ : أيهم !
أيهم : شيريدون شيسوون بي؟
مُلاذ : يسجنونه أيهم شيسوون؟
أيهم : لا يتعذب اول مثل ما عذبج
مُلاذ : أيهم لا تخبلني دكتور انت
شجابك على هاي السوالف مال اجرام!
أيهم : انه كل شي صرت علمودج
مجرم ما اصير؟
مُلاذ : مالهاا علاقة ،
أيهم باجر تسلمه للـ الشرطه
أيهم : لا
مُلاذ : أيهم ! لا تخبلني
أيهم : اذاج باعي حالج شصاير بي من ورا
لو اجلده سبعين الف جلده و اخنكه ما ارتاح
مُلاذ : أيهم انا ما اريد تعذبه انت
اريد بـ القانون ينال عقابه !
أيهم : القانون يمشي المثل هذا و يطلعونه
مُلاذ : لا ما يطلعونه أيهم حباب
و الله تعبانه مالي خلك اظل الح لـ خاطري
أيهم : تمام
مُلاذ : و الله؟
أيهم : و الله لـ خاطرج
دخلت امي جايبه جاي و كعك
و يمهن عصيرين دخلت وراها ملاك
قدمت لـ أيهم كيكه
أيهم : خاله شني القضية
ليش تعبتي روحج ماكو داعي والله
فيروز : لا يمه اكل ازعل عليك
انطوني كلاص عصير
شربت و انا مبتسمه ادحگله
دحگلي ابتسم هو هَم
رجعت الكلاص لـ ملاك
ملاك : اشربي ششربتي؟؟
مُلاذ : ما اريد ما اشتهي
فيروز : ولج اشربي
دكتور احجيلك كلمه
خزرني
أيهم : اشررربي مُلاذ
مو زين تظلين بلا اكل و شرب
يلا اشربي بسرعة
مُلاذ : ما اشتهي
أيهم : و لا حس اشربي
مُلاذ : ما اريد
أيهم : لعد يختل اتفاقنا و يخرب بكيفج
دحگتله و هو اشرلي على العصير خزرته
يقصد ما يودي الخطفني للـ الشرطه
فيروز : يا اتفاق؟
مُلاذ : اتفقت وي الدكتور
علمود اخوه باهر و غاده نسويلهم مفاجئه
خطيه لان ما جنت انا حاضره بـ عرسهم
و هو ما قصر قبَل
فيروزه : ها ايي يمه احسن
خطيه غاده ضاجت من ما لگتج بـ عرسها
مُلاذ : اي
أيهم : اشربي لو يخرب الاتفاق
اخذت الكلاص من ايد ملاك
شربته مره وحده و انا ادحك لـ ايهم و خازرته
هو مبتسم يدحگلي ، انطيت الكلاص لـ ملاك
و انا ادحگله بـ نفس النظرات
أيهم : عفيه
ضحكت امي و ملاك و انا اخوزر بي
رح يجلطني يلا يودي الخطفني
گلي اوكف و احاول امشي
و وكف هو كدامي ، مشيت خطوتين
رجليه ظلن يوجعني و جسمي نحلان
اشرلي اكعد كعدت ،
طلب من اهلي علاگة العلاجات مالتي
جابتهن ملاك و اجت انطتهن اله
كنبص كدامي ضربني ابره بالكانولا
و علگلي مغذي
أيهم : لازم نخليلج بطالة دم
هسه بالتحليلات طلعت نسبة دمج منخفضة
و رح تظلين مستمره ع المغذيات لـ فترة
مُلاذ : يمه ما شني بطالة دم ما اخذ لو اموت
أيهم : اي مو انتِ رح تشربيهن !
غير تخليهن بـ الكانولا
مُلاذ : ما شنو دم شخص ثاني يمشي بـ دمي
أيهم : خاله شلون متحملتها؟
فيروز : تعلعل بـ گلبي تعلعل
أيهم : زوجيها
فيروز : هههههه لا ما ازوجها
وسع عيونه مصدوم
حصرتني الضحكه على نبرة صوته
أيهم : خاله دخيل بختج
فيروز : ههههه ماكو احد يحبها و يتحملها مثلي
فلذة كبدي هي و ملاك
أيهم : لا خاله اكو واحد يحبها مثلج
دحگتله امي بـ استغراب
عدل كلمته فوراً و گال
أيهم : يمكن اكو ههههه
فيروز : وين ي يمه حشاك زلم هالوكت
لا يعرفون يحبون لا يعرفون يحتوون
أيهم : مو كلهم خاله
فيروز : طبعاً مو كلهم بس الاكثرية
أيهم : اي صحيح ،
هي مُلاذ تسوي للواحد گلب جديد
فيروز : هههههههه عاد وياك انا
مُلاذ : شو كارضين ملحتي فرد نوب
و تتناقشون بـ زواجي جنكم ما عاجبكم
ضحكت امي ، تدنت باست راسي
فيروز : وين اكو مثلج يمه
من و انتِ طفله شايله مسؤوليتنا
و ما قصرتي بـ يوم و اتحملتي اشكال و الوان
لا بـ يوم شكيتي و لا بـ يوم حجيتي
لو ينطوني الدنيا و ما بيها ما انطيج لـ احد
ابتسمت و هي تحجي من كل گلبها
أيهم متجي ايده ع القنفه مخليها جوه خده
مبتسم و يدحگلي ، اتحمحمت و گلت
مُلاذ : دكتور اخذ كيكه لـ مرتك و ابنك
فيروز : اي صدك اوكف يمه اخليلك
اتغيرت تعابير وجهه أيهم
كام گال و هو يعدل ملابسه
أيهم : لا خاله تسلمين انه خل اروح
فيروز : انتظر انتظر خل اخليلهم كيكه
أيهم : لا هم مو بالبيت يم اهلها
فيروز : ها يا حرامات
زين حتى لو اخذ وياك خاف تريد كيك فد شي
أيهم : لا عيني خاله تسلمين
يلا انه اروح
فتح الباب طلعت وراه امي
صحت لـ ملاك لزمت بيه
طلعت وراهم دحگتله يمشي بـ الشارع
مُلاذ : ملاك تعالي اخذيني وراه
فيروز : يا وين تروحين ؟؟
مُلاذ : اريد اسئله عن العلاج
فيروز : انتظري انا اسئله
مُلاذ : لا ماما هواي اسئله
اكو ادويه معينه متعرفين اسمائها
فيروز : زين خل اخذج انا
مُلاذ : لا فوفو خل تاخذني ملاك
هو هياته هنا بس اسئله و اجي رح يروح
فيروز : يلا زين انا واكفه هنا انتظرجن
مُلاذ : تمام
طلعنا انا و ملاك لابسين جاكيتات فوك ملابسنا
غطيت راسي بـ الكلاو مال جاكيت
حاولت اسرع خطواتي حتى نلحگه
فتحت تلفوني اتصلت بي ، رد ع الاتصال
مُلاذ : انتظر لا تروح
أيهم : ليش صار شي ؟
مُلاذ : اوكف جايتك
نزلت التلفون سديت الاتصال
ملاك تدحگلي مستغربه ما فاهمه
وصلنا لـ كدام الفرع الدخل بي
دحگت واكف يم سيارته ، يدخن
التفت الي وصلت لـ يمه
أيهم : شبيج صار شي ؟؟
دحك لـ ملاك رجع دحگلي
سندت ظهري ع السيارة
اندار هو صار كدامي
مُلاذ : ملاك انتظريني شوي
هزت راسها بـ بقبول
افتهمت قصدي راحت وكفت بعيد عننا بـ مسافة
رفعت راسي دحگت لـ أيهم
أيهم : رح توكعين ترا
شتسوين هنا ما گلتيلي اجيج ؟
مُلاذ : ضجت مني ؟
أيهم : شنو؟
مُلاذ : لان ذكرت مرتك ، لا تجذب عليه
أيهم : اجيتي حتى تسأليني هالسؤال؟
و انتِ مريضة و تعبانه امشي ارجعج
مُلاذ : أيهم جاوبني ضجت؟
لا تغير الموضوع و لا تجذب عليه
خلا ايديه بـ جيبه
رفع راسه دحك لـ المنطقه
رجع نزل راسه دحگلي
أيهم : عدتي هواي و لحيتي بي
كل ما تحاجيني تگليلي متزوج
رغم وضحت الج السبب و گلتلج ليش اتزوجت
گلتلج ما احبها بس بعدج مصره
ما اعرف ليش جاي تعاقبيني هالشكل
على شي مو بـ ايدي كل تصرفاتي وياج
و خوفي عليج و ضعفي يمج مو بـ ايدي
افتهمت ما تريديني
بس جاي تلحين بـ موضوع الزواج
تمام تريدين ابتعد عنج؟ هاهيه ابتعد عنج
علاقتي بيج تقتصر على دكتور و مريضته
لا تذكريني كل لحظة بـ زواجي و مرتي
الي هي بـ عمرها ما صارت مرتي
ما تدرين بيها شسوت بيه و لا تدرين بـ مصايبها
هزيت راسي بـ قبول
مُلاذ : تمام ، اسفه ما رح اعيد هالشي
ما جنت ادري بيك هيج تضوج
و ما تحب هالموضوع ، ما ينعاد بعد
أيهم : عادي
مُلاذ : هسه جاي تطبق عليه البرود؟
أيهم : ما اطبق شي عليج
انه استثنيج عن الكل و بـ كل شي
اكبر دليل كم مره عدتي هالسالفه
و كم مره حاولتي تطرديني من يمج
بعدني باقي وياج بـ نفس المكان
على الرغم انه كرامتي عندي فوك كل شي
و اكرهه اظل ورا شخص معين
و انه اشوف منه معامله ما استحقها
اتركه من اول غلط بس انتِ ما تركتج
مُلاذ : أيهم ما اعرف اشرحلك
بس انا معاملتي هاي وي الكل
اكو ناس ما ارتاح وياهم بـ الكلام
و اكو ناس احاول اخلي حدود بيني و بينهم
ما قصدي اذكرك بـ زواجك
بس جاي احس بـ الذنب رغم احنا ما مسوين شي
انا وياك ما عدنا شي ، بس انا ما اعرف ...
قاطعني قبل لا اكمل
أيهم : ارجعي هسه للـ البيت
رح ادك عليج جاوبيني حتى اسولفلج كل شي
هزيت راسي بـ قبول
اشر لـ ملاك اجتني بسرعه
خطيه جمدت من البرد
أيهم : انه وراجن اوصلن للبيت و اروح
مُلاذ : تمام
اخذتني ملاك و رحنا لـ البيت
رزلتنا امي لان تاخرنا ، اخذوني لـ غرفتي اتمددت
طلعن امي و ملاك من يمي بعد ما اتطمنن عليه
اتصل بيه أيهم جاوبته
أيهم : ها
مُلاذ : ها
أيهم : وين انتِ ؟
مُلاذ : بـ الغرفة
أيهم : احجيلج كل شي؟
مُلاذ : احجي
أيهم : تمام انتظري اصعد سيارتي
ظليت ساكته انتظره
لحد ما سمعت صوت تشغيل السيارة
مُلاذ : صعدت ؟
أيهم : اي
مُلاذ : سولف
أيهم : انه ما جاي اخونها اولاً و گلتلج
انه جنت قبل لا اتزوجها
عيني بـ كل مكان تدور عليج
لو لمحتج تتكحل بـ شوفتج
و هذا الشي قبلها و بعدها راح يظل
ثانياً على الرغم من مشاكلنا انه وياها
بس لمن شفتج ماكو و ظليت اشهر انه بـ بابكم
تالي صحيت على نفسي
ذكرت نفسي مثل ما تذكريني هسه انه متزوج
رحت و حاولت اتمم كل شي بس ماكدرت
بس اجت كعدت يمي لمست ايدي ما كدرت
رجعت و حاولت و جبرت روحي و ما كدرت
حاولت اعدل علاقتي بيها و اشتريلها و اجيب الها
و اكعد احاول اسولف وياها
تكوم تسوي حركات تلعب نفسي
فهمتها انه ما رح تحصل مني شي
و بقيت اسولف وياها و احاول ما اقصر
بـ كل مره تستغل هالشي وما تحترم رغبتي
بعدين خلت كل شي اجباري يصير
و حجيت الج و احلف بـ كل المقدسات
انه ايدها ما لامسها هي سوت شي
و اعرف كلش زين بس ما لازم عليها دليل
لان انه ما بـ يوم رديتلها سكران
و گلتلج بس مرتين بـ حياتي
مخلي هالسم بـ حلگي
و بالمرتين جانت ما موجودة
غيرها و هي موجوده ما شربت
جابت أبيل و تركته و انه اعتني بـ أبيل
انه و امي ربيناه هي ما اتدخلت ابد
تعرف أبيل خط احمر يمي و تاذي
كل يوم تجوي لو تضربه
خل اگلج من الاخير الي تسوي بـ أبيل اسوي بيها تضربه اضربها ، تجوي اجويها
لان انه محذرها و هي ما سمعت لـ تحذيري
الف مره اجيت وياها بـ العيني و اغاتي
و ما فاد رجعت اذته و ضربته
وصلت بيها تخنكه اشكال و الوان سوت بي
شهكت و كممت حلگي
شلون تكدر تسوي بي هيج !
وين اكو ام هيج تسوي بـ ابنها ، كمل كلامه
أيهم : و الله العظيم بـ ليله فزيت
على صوت ابيل يصرخ رحت اركض اشوفه شبي لگيتها حابسته بـ الكنتور ، قافله باب الكنتور عليه اتسودنت طلعته من الكنتور وجهه ازرك
ما يجر النفس من عدها صارت بي خوفه
مُلاذ : عززززه
أيهم : و انه من وكتها نعلت والديها
حبستها ب قفص دجاج
لا اجمل روحي كدامج ولا غير شي
اگللجياها مثل ماهي ، دمرت أبيل دمار
اكضها اكتلها و اوديها لـ اهلها
بس اريد ابعدها عنه اتدمر دمار من وراها
ما اگدر اروح لـ بيتي و اخذه
اخواني و اهلي هناك شلون اعوفهم؟
ابقي يمها ما تفك ياخه منه تريد توجع گلبي بي
گلتلها نتطلك و شتريد اسوي الها
ما تقبل و تگلي اخذ أبيل و امي ما تقبل اطلكها
و اهلها يعرفونا و هي مجلبه ما تقبل
حتى خيانه خانتني و انه عفت دربي و ملجئي
علمود لا اقصر وياها بـ يوم
ولج وي حارس بيتنا تتخيلين انتِ؟
وي الحارس الي مأمن البيت يمه
و غيرها من سوالف سوت سوايات
بس الله يعلم بيها هسه لا تگليلي مرتك
و لا تگليلي متزوج بـ اقرب فرصة اطلگها
ظليت مصدومة و صافنه
مُلاذ : ما جنت ادري هيج
أيهم : شفتي الفرق ؟
شفتي ليش انه يمج ؟ ما لگيت مُلاذ
ما لگيت بنيه تشبهج و تردع الولد مثلج
ايام الكُليه اشوفج بـ طرف عينج ما تعاينين
اشوفج شلون تركضين علمود اهلج
اشوفج شلون تواسين الجهال الي بـ الشارع
لحد ذاك اليوم من اخذتيني وياج لـ الجهال
مُلاذ تعبت كافي فهميني كافي تاذيني هيج
مُلاذ : تمام ما عليه بعد بـ سالفة زواجك
أيهم : مهمد صلوات على گولة أيمن
مُلاذ : هههههههههه
أيهم : ما تنباع بالصيدليات؟
مُلاذ : شنيه ؟
أيهم : ضحكتج او مثلاً ريحة شعرج
مُلاذ : شيسوون بيها بالصيدليات
أيهم : تعافي الواحد
مُلاذ : هذا الواحد بس انت
أيهم : طبعاً بس انه شحدها تعافي غيري
مُلاذ : ههههههه
أيهم : لَـذه
مُلاذ : ها يـ ام سوادي المعلعله افادي
ضحك بـ صوت عالي
أيهم : حبيتها
مُلاذ : اوباااااا
أيهم : شو عيديها
مُلاذ : ما
أيهم : بـ داعة الصاكين
مُلاذ : اوباااا
أيهم : هههههه ، انعل ابو الفواصه
مُلاذ : انت افوص
أيهم : افوص و فوصته
مُلاذ : لاااا افوص و فوصه
أيهم : لا فوصته
مُلاذ : ليش ليش؟
أيهم : لان هي فوصته بس اله
الفوصه لـ الكل بس فوصته لا
مُلاذ : و الافوص هم لـ الكل
أيهم : خلي بس الها
مُلاذ : لا ما ترهم
أيهم : ها لان متزوج ؟
مُلاذ : لا
أيهم : لعد ؟
مُلاذ : فوصته ما متعوده على هالسوالف
تخاف منها و تستصعبها يمكن رح تحتاج وقت
سكت لـ ثواني انا هم سكتت
گال بـ صوت هادء
أيهم : شنو افتهمها انه هسه هاي ؟
مُلاذ : مثل ما تريد افهمها
أيهم : الي كامل الحريه بـ الخيال مو؟
مُلاذ : اي هههههه
أيهم : اگلج
مُلاذ : ها
أيهم : گولي اوبا
مُلاذ : لا تلح
أيهم : بس هالمره
مُلاذ : اوبا
أيهم : لا عدل
مُلاذ : اهوووو أيهم
أيهم : يلا لذته يلا
مُلاذ : اوباااا
كل ما احجيها يضحك
و انا اضحك وياه ع الواهس
مُلاذ : يلا انا اروح
أيهم : تمام
مُلاذ : باي
أيهم : بيباي لَـذه
سديت الاتصال منه ، بقيت اتگلب بـ فراشي
لحد ما نمت مر من بعد هذا اليوم اسابيع
كل يوم يتصل عليه أيهم يتطمن
صرت زينه ع العلاجات رجع وضعي زين احسن
نگضيها انا و أيهم نضحك و نسولف
لـ اول مره بطلت اتقيد بـ الكلام وي شخص
مُلاذ : أيهم
أيهم : جَرحه
مُلاذ : انت شني؟
أيهم : شني ؟
مُلاذ : بصراوي بغدادي؟
شو كله تگول انه و كضيت لهجتك بصراويه
أيهم : اي انه بصراوي
مُلاذ : جا شجابك بـ بغداد
أيهم : من عمري ٣ سنوات انه بـ بغداد
بس لهجة اهلي بصراوية تعلمت منهم
مُلاذ : فهمت
أيهم : و انتِ؟ كله تگولين دحگت
مُلاذ : بابا من الانبار و امي من ديالى
ملتقين بـ بغداد صايرتلك مشكل يا لوز
بابا كله جان يحجي انباري
ما يگول اباوع يگول ادحك لو دحگي
ما يگول اتدنى يگول اكحز
ما يگول مصيبه يگول عثره لو نكبه
هواي كلماته انباريه تعلمت نص من امي
النص الثاني من بابا و ظليت احجي مثلهم
أيهم : اويلي يابه اصلج انباري طلع
مُلاذ : البصراوي
أيهم : الانباريه
مُلاذ : يا البصره لو مايج حلو
جا جيتت بـ هدومي
أيهم : سدي اثمج يا مهبوله
ي عثره ي نكبة گلبي
مُلاذ : ولك طلع عدك رس انباري
أيهم : هيفتيني يا مصكوعه
مُلاذ : ههههههه ديلا كافي لا تلح
أيهم : سدي اثمج
خليت ايدي على وجهي و ضحكت
سوالفه تضحكني غصب
مرت الايام بـ يوم نزلت من السيارة
دخلت البيت خليت السويج على الكاونتر
طلعت امي تركض عليه
صارت تخاف من الهوه لو خنكنا
اتبعتها ملاك سلمت عليهم
دك تلفوني دحگت "ام سوادي"
گمت لـ الغرفة دخلت ، سديت الباب
رديت على الاتصال ، بعدني ما حاجيه گال
أيهم : مُلاذ اتحضري
مُلاذ : لـ شنو؟
أيهم : تكونين محاميتي
مُلاذ : ليش اكون محاميتك شكو؟
أيهم : طلگت لينا و راح تحاول تاخذ أبيل
و تخلي المحكمه ينطونه الها لان عدها تصوير
الي و انه اضربها .
يتبع ...
لا تنسى التصويت بـ نجمة +
التعليق بين الفقرات 🩶
**************
🫢🫢🫢!
يا حلوات تابعن قناة التلي
ينزل بيها اشياء تخص الابطال و القصة
اسمها "أيـلانو✨"
اول ما تبحثون راح يطلعلكم اسمها
لا تنسون تتابعون حساب الانستا هم
و صوتوا لـ القصة حبايب🩶.