|غموض جارُنا|
الكاتبةسناريآ
قناةالتلي https://t.me/nurse2_4
(
ملاحظة: زهراء نفسها أرينا)
سمر: باوع بصدمة وكانة ما مصدگ السمعة اتقرب علي ورجع كرر سؤالة
حارث بصدمة: شنو عيدي شگلتي
سمر: مثل ما سمعت حزيران تحبك ونصيحة حاول لا تخسرها وهي ما شاءلله خوش بنية والكل يتمنى تصير من نصيبة طبق مقولة اخذ اليحبك ولا تاخذ التحبة
حارث بتنهيدة: ما ادري شاگول سمر حيرتيني
سمر: انت هسة حاول ترتب افكارك واخذلك وقت ريح بالك وبعدها فكر بهذا الموضوع
حارث: هو انشاء لله هيج راح اسوي
بقيت احجي وياه بمواضيع مختلفة ما ردت اخلي يبقى يفكر بموضوع طلاقة
شفت الساعة صارت 1 بالليل گتلة تصبح على خير وطلعت من غرفتة متوجهة لغرفتي دخلت للغرفة وصحن الفواكه بعدة بي بس ما احس بقتلي نفس اكل رحت حطيتة عالميز وتوجهت لجربايتي نمت
ثاني يوم حارث حجى لاهلي على موضوع طلاقة وهم تعصبوا لان ليش يطلق بدون سبب وليش ما انطاهم خبر بس هو ما گاللهم على المشكلة بس گال ما تفاهمنا والله ما راد تصير هالقسمة
بابا وماما زعلو منة وبقوا اسبوع ما يحجون ويا بس ورا اسبوع هو صالحهم وگال اذا انتوا تتمنون سعادتي فسعادتي ما راح تكون موجودة ويا رؤى
مرت الايام وعلاقتي ويا أمجد كل يوم تقوى اكثر بس بهاي الفترة ابتعدت عن أمجد وگتلة اريد اكون ويا حارث واساعدة يطلع من جو الحزن البي وهو كلش تفهني وگالي حبيبتي سوي اليعجبج وشوكت ما تريديني اني راح اكون موجود يمج
وصدگ بقيت كل هالفترة ويا حارث وحاولت اوازن بين دراستي وبين حارث وصدگ خلصت المرحلة الرابعة بمعدل جيد جدا وحارث اتحسنت حالتة
بيوم جنت گاعدة وجي حارث وگال گولي لامي اريد تخطبلي حزيران وصدگ امي كيفت وورا يومين راحت خطبتلة بس من رجعت اتفاجئنة بماما من گالت اكو ناس هم جايين يخطبونها وما ادري راح توافق او لا
ورا اسبوع جانة الخبر اليصدم وهو حزيران ما وافقت على حارث وحتى على عالرجال الاخر ما موافقة ومن رحت زرتها حسيتها تعبانة وضايجة
بديت احجي وياها بمواضيع مختلفة ومن وصلنا لموضوع خطوبتها
_حزيران اريد اسألج عالسبب الي خلاج ما توافقين على حارث يعني سبب عدم موافقتج انو انتي تفكرين بالطالب الي اعترفلج
_اول شي اني هسة تعبانة واحس ما مستعدة اتزوج والزواج مسؤولية وحياة مختلفة وجديدة واني بالوقت الحالي ما مستعدة ادخل بيها وبالنسبة للطالب اني من اعترفلي رأسا رفضتة
_لعد ليش ما وافقتي على حارث وانتي تحبي
_احبة!!!! شتقصدين؟
_ترا من زمان اعرف ولاحظت هالشي عليج ليش تضمين علي
_رجاء سمر سدي الموضوغ
_بس جاوبيني ليش ما وافقتي على حارث
_حارث بعدة توا طالع من علاقة فاشلة ويريد احد يطيب يجروحة وشي اكيد بعدة ما ناسي خطيبتة واني ما مستعدة اخاطر بحياتي وادخل بعلاقة ما معروفة تنجح لو تفشل والشخص الي ما يگدر يغير من تفكيرة ونفسة علمود نفسة مستحيل يغيرة علمود غيرة
اتفهمت كل الگالتة وعذرتها لان كل الگالتة صدگ بس حسيت حارث بدة يميل لحزيران وگال راح ارجع اخطبها
حزيران: باخر فترة حسيت نفسي صرت كلش كئيبة ودائما ضايجة اشعر بخيبة حتى مرات اكون گاعدة بغرفتي دموعي تنزل بدون سبب، صرت اكره كلش وما اطيق التجمعات واكثر وقتي اگضي لو نايمة لو ابجي،اهملت نفسي ما صار الي نفس باي شي حتى دراستي تراجعت بيها اهلي لاحظو هالشي ومن جانو يسئلوني جنت امثل زينة واگوللهم كلشي ما بية بس ارهاق من الدراسة
صديقاتي لاحظن هالشي وصارن يحجن وياي ويگولن وينها حزيران القوية الي جانت تمشي بكل ثقة وما تحب تبين حزنها وضعفها لاي احد بس جان الكلام ما يأثر بية احس نفسي شمعة وانطفت صارن يحاولن يساعدني ويضحكني يودني عالمولات والمطاعم علمود اطلع من جو الكآبة بس كلشي ما فاد وحتى السبب اني جاهلتة شنو
وهذا الطالب الوياي من اخر مرة اعترفلي بيها صار وين ما يشوفني يسلم ويبتسم بوجهي وهالشي ضوجني ما اريد انطي امل لاي احد وخاصة بالوضع الاني بي هسة
حجيت ويا زهراء علمود موضوع الطالب الوياي وهي شجعتني وگالت شكو بيها اذا خوش ولد خل يجي يخطبج بس اتخرجي بالاول
صرت باخر فترة اتردد لبيت زهراء اريد احجي ويا واحد يفهمني وجانت بس زهراء الشخص المناسب حتى صديقاتي جنت ما احب اشكيلهن
لاحظت شكلي المبين علي التعب
_حزيران شبيج انتي هالفترة كلش متغيرة والتعب امبين عليج وهاي عيونج دائما حمر صايرة وياج مشكلة احجي ولاتكتمين خليني اساعدج
حضنتها وصرت ابجي هي اكثر وحدة تحس بية سولفتلها على حالتي، طمنتني وهدتني وگالت
_هاي فترة ماكو واحد ما يمر بيها وانتي دائما اتجنبي العزلة واقري قرأن واگعدي ويا اهلي حتى لو ما تشاركينهم بالحجي بس اهم شي لا تنعزلين
_زهراء ما اگدر والله ما اگدر بس اگعد يم احد راسا اتعصب وصايرة ما احب الصوت العالي كلش
_حاولي علمودي
_راح احاول ان شاء الله
_اي هي هاي حزيران الاعرفها الي ما تسمح للظروف تسيطر عليها
وصارت دائما اذا تطلع او تروح للحدائق تاخذني وياها بس اني ما اقبل لان زوجها وياها ما احب ازعجهم وهم عائلة بس زوجها جان كلش حباب وجانو هو وزهراء يلحون ويودني وياهم ويحاولون يغيرون من نفسيتي
مرت الايام ونفسيتي ابد ما تحسنت آسر لاحظ هالشي وصار دائما يقرالي قرآن لو يعزفلي عالبيانو او مرات يصيحني يمة ويقرا كتاب ويخليني استمع الة وهذا الشي جان يفيد بس بالوقت الاكون ويا يعني ما يستمر ومن ارجع لغرفتي ترجعلي الكآبة والحزن نفسة
اليوم اخر يوم الي بالامتحانات گعدت من الصبح لبست ملابس حلوة وانيقة واخذت وياي فلوس زيادة لان صديقاتي گالن اليوم نتنونس ونوينة نروح لمطعم بصف الجامعة كملت تبديل وتجهيز نفسي رمشتلي سمر بمعنى يعني اطلع لان اني وياها بنفس السيارة نروح
طلعت من البيت لگيت سمر واگفة بالباب استغربت السايق جان ما موجود تقربت منها
حزيران: صباح الخير
سمر بابتسامة: صباح النور
حزيران: اگلج شو السايق بعدة ما جاي
سمر: السايق اليوم عندة ظرف وحارث هو الي راح يوصلنا
هزيت راسي بتفهم ورا حوالي خمس دقايق طلعت سيارة حارث من البيت اشرلنا علمود نركب صعدت سمر ليگدام واتي ليورا سيارتة جانت كلش حلوة من الداخل وباردة وريحتها تجنن تنطيك جو مريح وتحس نفسك بس تريد تنام بيها
طول الطريق بقيت بس اباوع عالشوارع بس احس حارث يباوعلي مدري اني اتخيل المهم وصلنا وهو راح لشغلة
دخلت الجامعة وكل وحدة راحت لمكان امتحانها كملت الامتحان وجانت اجوبتي زينة نوعا ما طلعت من القاعة ولگيت صديقاتي واگفات ينتظرني لمياء وهاجر بس وصلت يمهن سحبني من ايدي وابد ما سئلنا عالامتحان رحنا عالمطعم ومن كملنا فرينا الجامعة كلها وبقينا ناخذ صور بحكم اخر يوم
اتصلت سمر علي ساعة 2 وگالت يالا كملتي گتلها من زمان ودعت صديقاتي ورحت للمكان الي انتظر بي سمر دائما
وصلت ولگيت سمر الابتسامة شاگة حلگها سألتها شنو سر هاي الابتسامة گالت لان ما مصدگة خلصت امتحانات دعيت بگلبي ربي يديملها هالسعادة لان سمر خوش بنية وحبابة وتتمنى الخير للكل
بقينا حوالي ربع ساعة وجي علينا حارث وصلنا للبيت واني نزلت بس سمر لا لان سيارتهم يدخلونها ببيتهم من نزلت سمر ودعتني باوعت عليها ورديتلها السلام بس لفت نظري من حارث ابتسملي
دخلت بيتنا واني بعدني افكر بابتسامة حارث هاي يمكن اول مرة يبتسم بوجهي اتعجبت من تصرفة حتى ما سمعت امي شگالت من دخلت بس بعدها بعدت هالافكار من راسي ما ردت انطي لنفسي امل كاذب
بدت العطلة الصيفية واني حالتي النفسية كل مالها تسوء اكثر والي ما جنت متوقعتة من خطبني اخو صديقة اندي وحارث تقريبا بنفس الوقت صح حارث احبة كلش بس احسة اجة بوقت ابد مو مناسب وهو ما صار هواي من طالع من علاقة فاشلة ما حبيت اخاطر وادخل بعلاقة ما اعرف شنو نهايتها وشي اكيد بعد موجود بگلبة حب لخطيبتة السابقة
فرفضتهم اثنينهم وامي رادت تقنعني وتحاول اوافق على واحد منهم بس جان رفضي نهائي وامي ما وگفت الا من حجت وياها زهراء وگالتها الزواج مو اجباري وعوفيها بعدها صغيرة وكل شي يصير بالوقت المناسب والكاتبة الله
بيوم جنت گاعدة بغرفتي حسيت نفسي محتاج احجي ويا احد ابجي بحضنة نزلت جوة اخواني جانو طالعين وامي رايحة يم زهراء واندي گاعدة بالصالة سئلتها بابا موجود گالت بغرفتة رحت لغرفتة فتحت الباب ودخلت لگيت بابا يقرا قرآن بقيت واگفة بالباب انتظرتة لما يكمل قرايتة ورا شوية سد القرآن
صاحني اگعد يمة عالجرباية اتقدمت بسرعة ورحت گعدت يمة حطيت راسي بحضنة ودموعي لا ارادي نزلن وصوت شهگاتي يعلى ورا فترة وگفت بجي وحسيت نفسي صرت احسن، مسح على شعري وگال بحنية
_شبيها بنتي منو مزعلها حبيبة ابوها ليش كل هالحزن بوجهج شلون بنتي تبجي وابوها بعدة عايش
_بابا محد مزعلني بس اني ما اعرف شبية دائما احس بالكآبة والتعب ما الي نفس باي شي ودائما ابجي بدون سبب ما اعرف شنو السبب وشنو الاريدة احس حياتي طافية وما الها اي معنى
_سلامتج من التعب والحزن بوية بية ولا بيج
بدة يقرا قرآن على راسي واني صافنة عالحايط حسيت شوية صرت احسن من حجيت ويا بابا وسمعت قرآن
قاطع صفنتي صوت بابا وهو يگول
_شنو رايج نروح للعمرة
گمزت من حضنة واني احس الدهشة والاستغراب
_صدگ بابا
جاوب بابتسامة كلها حنية وگال
_شعندي غير بنيتي ان شاء الله أمجد بس يجي احجي ويا علمود يمشي بالاجراءات ويجهزلنا للسفر ان شاء الله كم يوم ونسافر
حضنتة قوي وگتلة
_احبك يا احلى اب
گال بضحكة
_اذا تحبيني گومي سويلي جاي
_مو تدلل دقايق ويجيك احلى جاي لاحلى اب
رحت للمطبخ سويت جاي لبابا ووديتلة رجعت للمطبخ واني احس بحماس وفرحة
قررت اسوي اسوي كيك طلعت المواد وبديت اجهزها كملت وحطيتها بالفرن اتذكرت أمجد ما يحب الكيك يحب الدونات عجنت عجينة الدوناتس وغطيتها علمود تختمر شفت الكيكة لگيتها مستوية حطيتها فوگ الكاونتر علمود تبرد
طلعت دولمة من المجمدة جنت لافتهة كامل ومجهزتها بس حطيتها عالنار وحطيت دجاج بالفرن علمود ينشوي رحت لبابا وگتلة اريد اعزم زهراء ورجلها عالعشا گالي اي شكو بيها بنيتي واني هم اعزميهم صار شكد ما شايفة اختج اتصلت على أمجد وگتلة يعزمهم
ورا حوالي ساعة اختمرت العجينة وشكلتها وخليتها تختمر مرة ثانية حوالي ساعة وطلعتها وبديت اگليها
رحت صحت اندي وگتلها تعاي سوي زلاطة ولبن بالبداية ما قبلت بس من عرفت مسوية دولمة اجت تركض بسرعة سوتهن
صارت ساعة 6 دخل آسر وامبين التعب علي گتلة
_آسوري حبيبي روح بسرعة جيب ببسي لان عزمت زهراء وزوجها وماكو غيرك يجيب
هو حسبتة فرح وطلع راح يجيبهن
زهراء وزوجها اجو ساعة 7 ومن كملوا صلاة بدينا نصب عشاء وكلنا التمينة سوية عالسفرة جانت الاجواء كلش حلوة
ورا ما كملنا قدمت الكيك والدونات وآسر هم جان جايب كرزات جانت سهرة ماكو مثلها كلنا گعدنا بالاستقبال زوج زهراء اندمج ويا اخواني وبابا يلعبون دومنة وامي التهت بحسوني تلعبة واندي گاعدة يمها تضوج بحسوني لان تغار منة واني وزهراء گعدنا على صفحة وگتلها على موضوع العمرة وهي كلش فرحت وگالت هذا احسن شي لان الواحد اذا جان يمر بفترة نفسية لازم يحاول يغير مكانة او ينتقل منة حتى لو فترة قليلة
زهراء وزوجها ما راحو الا ساعة 11 واني استلمت البيت تنظيف وما كملتة الا ساعة 12 من كملت صعدت لغرفتي واتجهت للكنتور طلعتلي ملابس ودخلت اسبح حسيت بانتعاش لبست تراك خفيف يناسب الجو الحار اتجهت لجربايتي وذبيت نفسي ونمت ولاول مرة انام واني مرتاحة من بعد مرور اشهر
اندي: جنت گاعدة بالاستقبال منبطحة على بطني اباوع على فلم سكوبي دو ويمي صحن بطيخ بارد ويذوب بسرعة وكل قطعة اكلها هرمون السعادة يزيد عندي
قاطع الاجواء الحلوة صوت بابا وهو يگول
الاب: ي قررت اروح عمرة وان شاءلله بعد كم يوم لان ما شاءلله ما ناقصني لا فلوس ولا شي وانتو كبار وصحتي زينة فگلت ليش ما ازور بيت الله صار كم سنة ما رايح
أمجد: خير ان شاء الله على بركة الله بس منو يروح وياك
الاب: اني وام امجد و آسر وحزيران وانت واندلس تبقون بالبيت وردت احجي وياك علمود تبدي اجراءات السفر والحجز
اني باوعت بصدمة شنو يروحون شنو اني ابقى وفوگاها يبقوني ويا أمجد الي شي اكيد بس يروحون راح يخليني انظف واطبخ واغسل مواعين واني كلشي ما اعرف ومليون بالمية راح يحبسني وما يخليني اطلع
گمت منتفضة واني افور من العصبية
اندلس: بابا اني هم اريد اروح شنو ابقى وحدي ويا امجد
أمجد: وشبي امجد خاتون تالي وكت الزعاطيط صايرين يحجون ما يعجبهم العجب ولا صيام رجب
اندلس: اي ما اريد ابقى وياك اريد اروح وياهم
لعب بحنجة وگال بابتسامة مستفزة
أمجد: تعاي اخذيلج راجدي
ما رديت علي ورحت حضنت بابا وصرت ابجي واگول اريد اروح بس هو گال ان شاءلله غير مرة بنيتي بس اني وياج نروح
شكد حجيت وشكد بجيت بس ما فاد ومحد سمعني اضطريت اتقبل الواقع
أمجد بدة يمشي بالاجراءات وصدگ ورا حوالي عشر ايام سافرو وقبل ما يسافرون اتطيتهم قائمة علمود يجبولي اياها گلت ليش ما ودوني خل يتحملون طلباتي
ثاني يوم من سفرهم گعدت من النوم نزلت جوة جان البيت هدوء كلش وامجد ما موجود رحت للمطبخ لگيت اكو قصاصة معلگة بالباب جان امجد كاتبها موصيني اكل ريوگي وما اشغل الاضوية وانظف البيت وما افتح الباب لاي احد واخر شي كاتب لا تنسين عود اطبخي تنهدت بقوة وگلت حياتي صارت مثل سندريلا
تريگت وبديت انظف البيت وغسلت الملابس ما كملت الا ساعة 11 لاني كلش بطيئة حرت شاسوي غدة شفت گدامي بتيتة وقررت اسوي تگلاة گشرتها وقطعتها حطيت زيت بالطاوة عالنار وخليتة يحمة حطيت البتية بالطاوة ورحت للصالة اباوع على مسلسل لما تستوي اندمجت بالمسلسل ونسيت البتية ما اتذكرتها الا من اشتميت ريحة حرگ طلعت اركض عالمطبخ شفت الطاوة مگلوبة عالطباخ والدهن مكبوب عالنار
اتخبلت من شفت المنظر طلعت برة وبسرعة فتحت الباب اريد الگى احد يساعدني بنفس الوقت الطلعت بي شفت زوج زهراء وصديقة نزلو من السيارة رحت ركض علي واني ابجي وبالگوة احجي
_حرگ.... حرگگگگ بالمطبخ راح يحترگ البيت
بسرعة دخلو للبيت دخلت وراهم وزوج زهراء ما خلاني ادخل صاح على صديقة وگال جيب بطانية اي شي هو بسرعة راح للصالة ورجع شفتة جايب الشرشف الي حاطينة عالطاولة البصالة زوج زهراء اخذها بسرعة وبدة يطفي النار طفاها كامل وطفى الغاز هم فتح كل الشبابيك وطفو الكهرباء
طلعو اثنينهم وزوج زهراء گال بطمأنينة
_لا تخافين ماكو شي بعد كلشي طفى ديربالج على نفسج
_صدگ شكرا شكرا كلش هواي الكم شكرا
_ هههه اذا تريدين تشكرينا بعد لا تطبخين
هزيت راسي بفشلة على حجية هم طلعو وعافوني سديت الباب وراهم ودخلت انظف الفوضى
صارت ساعة 1 ورجع أمجد انصدم من الشافة
أمجد: شصاير هنا
حجيتلة كل الصار وهو هز راسة باسف وگانة يگول غاسل ايدي منج تبقين ثولة صعد لغرفتة واني صعدت ورا اعتذر واگولة امجد سامحني والله بعد راح انتبه واكون حذرة هو دخل لغرفتة وقفل الباب بقيت واگفة انتظرة ورا حوالي نص ساعة طلع امبدل صرت امشي ورا واعتذر
أمجد: ما صار شي اهم شي سلامتج
رحت حضنتة وصرت ابجي صار يمسح على راسي ويگول
عليش البجي يا بوية
بعدت منة مسحت دموعي
أمجد: هسة يعني ماكو غدة
باوعت لوجهة وسويت نفسي بريئة باثناء ما جاي نحجي اندگ الباب طلع امجد يفتحة شفت زهراء جاية وبيدها جدر صغير انطت الجدر لامجد جت علي حضنتني وصارت تبوس بية
زهراء: شلونج خوما بيج شي سامحيني يا روحي ما گدرت اجي عليج لان جنت بالمستشفى علمود التدريب
_عادي ما صار شي وآدم وصديقة هم ساعدوني
بقيت گاعدة شوية وبعدين راحت امجد فتح الجدر طلع تبسي رحت جبت خبز وبدينا ناكل
مرت الايام وامجد صار هو الي يطبخ وما يخليني اتقرب من الطباخ وهيج استمرت الايام
أرينا: صار شهر لرجوعنا من السفر وتعودت على آدم وحسوني حياتنا خارجيا امبينة هادئة ما بيها اي شي مجرد مهندس يروح ويرجع لدوامة وزوجتة طالبة بعدها تدرس وعدهم ابن عمرة حوالي 3 سنين بس بالحقيقة حياتنا تختلف جذريا محد يدري بشغل آدم بالجاسوسية وحتى الي يريدون منة شغلة ما يعرفون منو هو دائما يكون كلش حذر من يطلع واذا عندة مهمة لازم يطلع متنكر ويلبس ماسك علمود لحد يشك بي وهاي الفترة صار كلش يطلع هواي ومن اسئلة يگول ما بقى شي واوصل للاريدة ما يگول غير هالحجي وحتى صار ما يخليني اطلع هواي لان يگول كل ما اقتربت من حماد ابو اسراء يزيد الخطر المحاوطني
من بديت اداوم شفت اسراء وسويت نفسي زعلانة منها لان ما حضرت خطوبتي وعرسي حسب ما گالت عدها ظروف بس هي جانت تحاول تراضيني وصدگ تراضينا وگتلها راح اعزمج ببتي لان ما حضرتي زواجي بالبداية ما قبلت بس بقيت اقنع بيها واگوللها تعاي نتونس سوية واطبخلج بيدي لان تعلمت اطبخ وتشوفين ابني حسوني
وهي تشاقيني و تگول خبلة مسوية نفسج امة واني اگوللها اي امة وبالاخير يالا قبلت بس شرطت هي هم تعزمني على بيتها وهذا شرطها سهل هواي امور وانتهى الجزء الاول من الخطة
فتحت عيوني بالگوة بقيت اباوع عالسگف واني اسئل الدنيا صبح لو عصر بقيت شوية وتذكرت كلشي هذا الشعور دائما يجيني من اگعد من النوم احس عقلي ما بي اي شي وابقى اباوع بالفراغ هالحالة تستمر عندي لما اصحصح كامل
باوعت بالجهة الثانية من الجرباية شفت حسوني نايم يمي وآدم من يم حسوني هيج نومتة من بداية زواجنا كلنا انام على نفس الجرباية
جان شعور النوم كلش حلو احس الفراش يجذبني الة مثل المغناطيس ما اريد اتركة باوعت بوجه آدم وبقيت صافنة بي واحس نفسي مغيبة عالواقع وما صحيت منة الا من شفت آدم بدة يفتح بعيونة
آدم بتثأوب: صباح الخير
زهراء بابتسامة: صباح النور
_شوكت گعدتي
_قبل شوية
_تريدين تدخلين الحمام هسة لو اني بالبداية
_لا عادي ادخل انت بالاول
گام من الجرباية واتجه للكنتور طلعلة ملابس ودخل للحمام بقيت بمكاني انتظر آدم لما يطلع واني ادخل وراه باوعت لحسوني گمت بي وهو احسة انزعج من تصرفي عفتة گلت خاف خطية يگعد من النوم
بقيت اباوع باتجاه الحايط بس حسيت شي مثل الاسود عبر من يم المراية باوعت مفزوعة باتجاه المراية ما شفت اي شي بس والله احس نفسي لمحتة بعيني من مر من المراية
رجلية گامن يرجفن حاولت اهدي نفسي واگول يمكن لاني توا گاعدة من النوم واتهيىء اشياء او متوهمة بس احس جاي اضحك على نفسي بهذا الحجي لان متأكدة اني ما متوهمة وهذا الشي بدة من اول اسبوع اجيت لهذا البيت مرات من اكون بالمطبخ اسمع همهمة من الصالة واتوقع آدم يصلي ومن اروح اشوف ما الگة احد ومن اسئل آدم واگولة انت هم جنت توا بالصالة يگولي جنت بالغرفة لو توا راجع من شغلة ومن بديت اسئل هواي حسيت آدم بدة يخاف ويقلق علي ويگول ماكو شي لو متوهمة
قاطع افكار صوت باب الحمام ينفتح باوعت باتجاهة لگيت ادم طلع من الحمام والخاولي على شعرة ينشف بي ولابس تراك رصاصي طالع كلش حلو عزا بعيني طالعة عيني صايرة وحدة بس تتغزل
اتجه للميز وبدة يمشط شعر
گمت من الفراش ورحت اخذتلي ملابس ودخلت للحمام حاولت اشغل فكري وما راح اگول لآدم يمكن صدگ هاي تخيلات من عندي كملت بسرعة لبست ملابسي باستعجال صايرة كلش اخاف من ابقى بالحمام هواي طلعت ما لگيت لا آدم ولا حسوني شي اكيد طالعين قبلي
طلعت من الغرفة ورحت باتجاه المطبخ شفت آدم واگف يسوي ريوگ وحسوني گاعد عالكرسي وامبين بعدة ما مصحصح تقربت من آدم وگفت اباوعلة شلون سوى البيض شفتة حاط دهن هواي والبيض من جوة محترگ بس يالا عادي ناكلها المشكلة لا اني ولا هو نعرف نطبخ اني بديت شوية اتعلم من اليوتيوب ومرات اسئل ماما اذا ما عرفت شغلة
باوع آدم باتجاهي وگال بابتسامة وهو ينزل راسة
آدم: نگدر ناكلها مو؟
زهراء بابتسامة: اي وترا كل شي ما بيها هي بس شوية محروگة ودهنهة هواي بس ما بيها شي
عضيت شفتي من عرفت جفصت ما اعرف احجي كلمتين زينات لازم اجفص
وداها عالميز شلت القوري والگلاصات وديتهن عالميز ورحت طلعت قشطة وخبز من الثلاجة
بدينا ناكل وآدم يريد يوكل حسوني وحسوني ما يقبل يگول لا اليد ماما اني اضحك علي وابقى ابوس بي واگلة ابني الحلو
كملنا و شلت المواعين وديتهن عالسنگ شلت حسوني رحت سبحتة بسرعة ووديتة عالصالة گتلة ابقى باوع عالتلفزيون هزلي راسة عفتة وطلعت رحت للمطبخ شفت آدم يغسل المواعين يمكن بس يعرف يغسل المواعين واني ذابتهن علي واگولة اني اسوي الشغل كلة وانت بس غسل المواعين وصدگ هو استلم مهمة المواعين
رحت باتجاه الكاونتر وبديت امسح وارتب بي هو انتبهلي باوع باتجاهي واني وگفت امسح البوب انتبهت يباوعلي وگفت من المسح بقيت اباوع باتجاهة
بقينا هيج واحد يباوع عالثاني بس هو صار يمشي باتجاهي شوية شوية واني واگفة جامدة وصل يمي تقرب لزم خصلة من شعري ورجها ورا اذني بقى يباوع بوجهي واثنينا ساكتين بس اني احس گلبي يريد يطلع من مكانة اول مرة يصير بهالقرب مني
فزينا اثنينا من سمعنا صوت حسوني انتبهت علي لگيتة واكف بالباب بسرعة فزينا هو رجع ليورا وتدارك الموقف وگال اليوم لازم انتمم كلشي عالكامل هزيتلة راسي هو مسح ايدة وراح لحسوني شالة وانطاه مي بعدها طلعو وبقوني وحدي
لزمت وجهي احس حرارة تطلع منة رحت بسرعة للحمام صرت اغسل وجهي بماي بارد واحس الحرارة البداخلي ما طافية طلعت من الحمام ورجعت اكمل تنظيف البيت وحطيت الطبخ عالنار سويت دجاج شوي ومرگة لحم وريزو وطبعا جبت حزيران بقبلها بيوم علمود تساعدني وتعلمني شلون اسويه
صار ساعة 12 ووصلت اسراء استقبلتها احسن استقبال وگلت لازم اخلي هاي المهمة تنجح دخلتها الصالة آدم بس سلم عليها وراح گعد بالاستقبال صبيت غدة واكلنا اني وياها وكضينة الاكل بس ضحك وسوالف رادت من حسوني علمود ياكل بس هو ما قبل گال اني رجل واتل ويا بابا عاد اكل ويا بالاستقبال
اسراء بقت يمي لساعة اربعة وبعدها راحت توسلت تبقى بس گالت عدها شغل عاد ودعتها وگالت ترا من اعزمج عود تجين مو گتلها ادللي
راحت واني دخلت الملم الصالة انفتح باب الاستقبال شفت آدم طلع منها اجة باتجاهي وتقرب حضني وگال
_نجح الجزء الثاني وما باقي بس الثالث واقترب من الاريدة بفضلج أري ما اعرف شلون اشكرج
اني ما سمعت كلشي جنت بس مركزة هو حضني احس مغيبة اول مرة يكون بهالقرب مني دگات گلبي احس حتى هو يسمعهن واصابعي يرجفن من تلامسن ويا ظهرة، هدني وگال
_شوفي اري مجهزلج مفاجأة بس خل نخلص الجزء الاخير واگولج شنو هي
هزيتلة راسي واني مبتسمة وهيج خلص هذا اليوم والي جان من اجمل الايام العشتها ويا آدم
مرت اسبوعين وبيوم جنت گاعدة توا من النوم جان عندي دوام بهذا اليوم وآدم هم گمت من فراشي واخذت ملابس دخلت اسبح ما گعدت آدم وحسوني گلت من اطلع اگعدهم
دخلت للحمام بدلت ملابس ودخلت جوة الدوش اسبح حطيت شامبو لشعري بس نزل على عيوني حسيت عيوني يحرگني بسرعة غسلتهن بالمي وبقيت شوية يالا فتحتهن ومن فتحتهن انصدمت من الشفتة لا ارادي رجلي ما حسيت بيهن ووگعت
يتبع.....