#السجين_777
#الحلقة_15
دارين : زي أنك اتحب رغد وماتبيش تعترف 😏
أوس بصدمة : شن تحكي دارين ...حب شني وكلام فاضي شني ..وقتها توا الدوة اهيا ؟؟😡
دارين ابرمت واتشوف لعيونه : اي عادي ..الحب ماليهش وقت محدد ..ايجي في اي وقت ولاي حد ...شوفني أني مثلا ..كيف حبيت نوح الحاج وهوا سجين 😏
أوس بحت فيها ومنصدم : شني ..أتحبي نوح ؟؟!!! 😰
****************(( الكاتبة أم ناصر ))
قبل محكمة نوح بكم يوم 👇
حرس كريم خشوا لشقة أوس ..خذوا الملفات وطلعوا ..أوس في سيارته ..اتصل بيه نزار
أوس : نعم
نزار : الجماعة بدوا يتحركوا
أوس : خليهم ايكملوا ..وخليك وراءهم
نزار : الوحدات جاهزة يافندي
أوس : تمام ..بلغني اول باول
نزار : تم
سيارة الحرس كان في وراءها سيارة اتبع فيهم ...مشوا لمكان بعيد ومنعزل ..نزلوا وخشوا في زي النهقر او مخازن ...وكان كريم وامعاه كم نفر في انتظارهم
كريم خذاء الملفات ..حطهم على طاولة ..وبدأ ايشوف فيهم هوا واللي امعاه ...وفجاءة المكان كله محاصر من عناصر الشرطة ...وقفت سيارة ونزل منها أوس ..ولاقى نزار قدامه
أوس : شن لاخبار ؟؟
نزار : الهدف والجماعة كلهم جوا
أوس هز رأسه..وبحت في العناصر وشاورلهم بيده عشان يبدوا ايتحركوا ..وبسرعة وخفة كل العناصر تحركوا وراء بعض ...وداهموا المكان
كريم واللي امعاه انصدموا ..حاولوا يهربوا لكن المكان كان محاصر ..وقبضوا عليهم كلهم
على طول انتقلوا بيهم لتحقيق ..أوس مقمعز في غرفة التحقيق ..والحرس خشوا شادين كريم
كريم مكلبش ويبي ايموت 😡😡😤
أوس رفع وجه ومبتسم : خلوه واطلعوا 😏
كريم : أنت فاهم الموضوع غلط 😡
أوس : اممم ...تقدر اتفهمني أنت الصاح ؟؟
كريم : أني معاك ومش ضدك ..نوح مجرم ولازم يتعاقب ..الاوراق أني خذيتهم لاني متاكد في شي غلط في الملفات
أوس صبا وقدم ناحية كريم وربع ايديه : اول مرة نعرف أن الشرطة اتخش لحياش الناس بالدرقة وتنخب عشان تكشف الحقائق 😏
كريم : أني طلبت منك انشوف الملفات وأنت رفضت 😡
أوس : اي رفضت ..لاني عارف نيتك من الاول ..وعارف الغرض من طلبك
كريم : أني ضابط تحقيق زيني زيك ..وعندي حق نعرف شن ايصير في القضية 😡
أوس قرب وجه منه معصب : وضابط التحقيق يا أفندي يقتل الناس ويحاول ايدبس ناس تانية في جريمة قتلهم ..والا يتعامل مع ناس مشبوهة وتجار مخدرات واسلاح ..وقضايا لها اول مالهاش اخر 😡
كريم : شن تحكي أنتا ..اما قتل واما بلاي احرف..أني صاح خنبت الملفات من شقتك بس ماليش دخل بكل الكلام اللي قاعد اتقول فيه
أوس طلع فونه وحط على فيديو كريم وجبر يوم مقتل حسام : وهادا شنو ؟؟
كريم ايشوف وانصدم 😰 : اي وشن فيها ..كان موضوع
تحقيق عادي ..والولد هادا مالياش علاقة بيه ..ممكن في شي بينه وبين جبر
أوس دس فوه في جيبه : جبر كان واحد من صبيانك ..وبعدين تحسابني شادك بس عشان قصة خنبة الملفات والا تسجيل الفيديو هادا ..من أمس وكل الحرس المشاركين امعاك في كل مصائبك شاديناهم واعترفوا بكل شي
كريم وجهه تغير : اي حرس ..أنتا تبي تتخلص مني وبس ..تجبد في تهم من عندك وخلاص .... لكن كله كدب.. كدب
أوس رد وقمعز على مكتبه ..وفتح ملف قدامه : كل هالشهادات ضدك كدب ..والفيديو وخنبة الملفات حتى هما كدب ...ياريت تعترف بنفسك افضل ماتماطل وتاخذ وقت على الفاضي ..أنت المفروض ضابط وعارف الشي هادا اكويس ..كل ما ساعدتنا في التحقيق ..ينحسب لصالحك ..اما النكران ومحاولة التملص يعتبر تعطيل وتاخير في مجر التحقيق ..والشي هادا بيجي ضدك بعدين
كريم يرجف : كله كلام فاضي وتهم كيدية منك تبي تبعدني من طريقك ومافيش دليل ملموس ضدي 😡
أوس تنهد واتكى على كرسيه وشد القلم يبرم فيه بين اصابعه : بجديات أنت متصور أني نقبض عليك من غير مانكون متأكد وضامن شن عندي ضدك ..اللي اتشوف فيه هادا كله كوم ..والدليل اللي تحت ايديا كوم تاني 😏
كريم : دليل شنو ؟؟!
أوس صبا وطلع فونه من جيبه وفتح على تسجيلات صوتية بين كريم وعدد من صبيانه وناس ثانية ..ومع كل تسجيل كريم وجه ينسود أكثر ويعرف أنه طاح بالرسمي ومعاش عنده كيف يتصرف 😰
كريم يهز في رأسه معصب واعيونه دمعوا : كدب كله كدب ..من وين جبتهم ..من وين 😡
أوس : في الوقت اللي كنت منشغل فيه بنصب مكائد وخطط للناس ..كانوا صبيانك يتعاملوا امعاك بنفس الاسلوب ..لان ماعندهمش فيك ثقة ..وعارفين انك ممكن ادوس عليهم كلهم عشان مصالحك وتضحي بيهم ...ولهادا كانوا يسجلوا في كل اتصالاتك وكلامك ..عشان لو صار وطاحوا ..وأنت رخيت بيهم ..بيجروك امعاهم وعليا وعلى أعدائي 😏
كريم قمعز مذهول من الصدمة ..ومش امصدق كل شي صار امعاه 😰
*****************
انردوا لمحكمة 👇
أوس ايشوف لدارين ومش مستوعب شن سمع : شن تحكي دارين ..أنتي صاحية لنفسك والا انهبلتي ؟؟
دارين : نحكي في الحق ..أنت مش من فترة سألتني لو في شي بيني وبين نوح ..وأني اليوم جاوبتك ..اي فيه
أوس : ككيف ..دارين أنتي عارفة روحك شن قاعدة تتكلمي ..مش وقت بصارة راه
دارين : ومن قال أني انصبر ..أوس أنا بجديات حبيت نوح ..صاح كنت خايفة في الاول وقاومت الشي هادا ..بس بعدين خلاص الموضوع طلع من يدي ..وخاصة لما تأكدت انه برءي
أوس : يعني طول الفترة اللي فاتت كنتِ تكدبي عليا وتجري بيا أنتي ونوح 😡
دارين : أني لا كدبت عليك ولا جريت بيك أوس ..كنت امعاك زي ما اتفقنا ..وأنا اليوم قررت نحكيلك عشان ماخاطريش انخبي عليك أكتر من هكي
أوس : ونوح شن وضعه ..عنده علم بالشي هادا ؟؟
دارين انحرجت وطبست : اي أكيد ..نوح ايحبني زيني
أوس عض على فمه وقعد ايشوف لنوح من بعيد ..ولدارين ..ومش مصدق ..الصدمة كانت اكبر من انه يستوعبها ..وخاصة أن دارين هيا اللي اعترفت بالشي هادا بنفسها
بدأت الجلسة وأوس معاش قدر يتكلم ..برم وجه وهو شاد اعصابه بالغصب ..ودارين برغم انها حاولت اتبان قوية في مواجهة أوس بالحقيقة ..بس جسمها كله كان يرعش ..ونفسها هارب 😣
رغد قمعزت جنب نزار واعيونها مرة مرة يسرقوا في النظر لدارين وأوس ..وخاطرها تعرف شن يحكوا ..وبالذات لما أوس ملامح وجهه تغيرت مرة وحدة 😡
نزار قرب ومال ناحيتها : كيف الجاية هادي ..مفاجاة بصراحة
رغد ابتسمت : جيت مع دارين ...هيا طلبت مني
نزار : شن علاقة دارين بنوح الحاج ؟؟
رغد : مافيش علاقة ..بس نوح كان في يوم مريض عندها في العيادة ودارين عالجته ..والباين نوح كان يحكيله عن قضيته وهكي ..ودارين حبت اليوم توقف امعاه
نزار : اي صاح ...باهي لاقى حد يوقف امعاه في يوم نفس هادا ...لان نوح من يوم عرفته وهو مايعرفش حد ومافيش حد يسأل عليه
رغد : ايه ربي كريم لطف بحاله
نزار زاد قرب منها : أكيد ..ولطف حتى بحالي أنا وخلني انشوفك اليوم
رغد زمطت وارتبكت شافت لعيون نزار وطبست
نزار ايشوفلها كيف منحرجة ..ابتسم ورد ايشوف للقاضي
*************(( أم ناصر ))
دارين طول الجلسة وهيا تاكل في بعضها ..وتقريبا الوقت يمشي ببطى بكل ..وهي قلبها خلاص نار ...بس نوح كل اشويا ايشوفلها ويبتسم ..يحاول ايطمنها ❤
خبط القاضي على الطاولة قدامه عشان ينطق بالحكم ..الجميع صبوا ..والقاضي نطق بالحكم ..واللي نوح ودارين كانوا يستنوا فيه بفارغ الصبر . حكم ببراءة نوح 😍 ..وأخيراً ربي استجاب لدعاءهم ..ونوح بيطلع من السجن ..بيطلع لحريته اللي مستنيها من زمان ..بيطلع ويعيش ايامه كيف الشباب
نوح كان كيف الصقر المجروح ..مش قادر يفرد جنحانه ويطير لبعيد ..السجن اخر مكان ممكن يقدر ايعيش فيه نوح الحاج
دارين تمت تبكي من الفرحة ..واتشوف لنوح ..وهوا كأنه المكان مافيش حد غير دارين ..شافلها بضحكة وكان خاطره يطلع بسرعة وياخذها في حضنه
أوس صبا وكاتم غيضه ..ايشوف لنوح ودارين ..واتلفت شاف رغد اتهدرز مع نزار ..طلع بسرعة من المكان 😤
دارين طلعت من مكانها ومشت قربت من نوح ..والمكان كان زحمة ..
دارين : الف مبروك 🥺
نوح : ايبارك فيك
دارين تسأل في محامي نوح : أمتى يطلع بالضبط
المحامي : اليوم إن شالله ..بس طبعا في أجرأءت ننهوهن قبل وبعدين يطلع ...يعني حولي كم ساعة
نوح خدوه الحرس واعيونه معلقت بدارين ..وهيا تبكي وتمشي وراءه : بنستنأك نوح ..اول ماتطلع كلمني 😭
ردوا بنوح للسجن ..وطبعا من اول ماخش وعمي يونس وهيبة عرفوا من وجهه انه طلع براءة
هيبة ضمه يبكي : وأخيرا ياصاحبي 😭
نوح ضمه وهو مشاعره ملخبطة مابين الفرح والحزن ..الفرح بطلعوه بس كان حزين انه بيفارقهم وهوا خلاص تعود عليهم 💔
نوح قرب من عمي يونس وضمه ..وعمي يونس يبكي ..وهنا خلاص نوح ماقدرش ايشد روحه ..وقعد يبكي
عمي يونس : ياريت حتى حسام كان حي وفرحنا بيكم الزوز
نوح يمسح في وجه : ياريت ..بس كل شي نصيب ..وأني مافيش شي مبرد ناري ..غير ان اللي قتلوه كل واحد خذا عقابه اللي يستاهل
عمي يونس قمعز : اي سمعنا انهم قبضوا على كريم وجماعته
نوح : ايه وقفوه عن العمل ..وسحبوا منه رتبته ..ومازال التحقيق في القضية ..لانها متشعبة وكبيرة ..وقضايا قديمة وجديدة
هيبة : الله أكبر ..دم حسام مارحش بلاش
نوح : ربك فوق كل ظالم ..جبر ومات مقتول بنفس طريقته لما غدر بحسام ..غدر بيه كريم ..وكريم وجماعته بيتختخوا في السجن لعند يعفنوا ...واياماتهم سود زي عملهم
عمي يونس : وأنت شن بدير توا ؟؟
نوح قمعز جنبه : كم ساعة ونطلع من اهني ..بنحاول نستقر في مكان لعند انظم اموري ..وانشوف شن بيصير
هيبة : الف مبروك ..تستاهل كل خير ..وأني مجرد مانطلع من اهني بنتواصل معاك طول
نوح : اي ياريت والله ...كلمني على نفس الرقم
وتلفت على عمي يونس : وأنت مش نأسيك ...نستقر بس والامور تهدأ ..وبنشوف موضوعك
عمي يونس : والله يا ولدي ..خليني اهن.. ..
نوح : اشششش ..شن انخليك اهني ..بتطلع خلاص سادك حبس ..وأني مش مخليك وحتى هيبة ..بنتلاقوا مع بعض زي ماكنا اهني واكثر
عمي يونس هز رأسه بحزن وسكت ..وهيبة ايشوف لنوح وأبتسم ..لان الفرحة في اعيون نوح كانت واضحة
*******************(( الكاتبة أم ناصر ))
دارين طلعت من المحكمة هيا ورغد .. يمشوا جنب بعض
رغد : مبروك دودي ..والله طلع معاك حق ..ونوح طلع برءي
دارين : وربي كنت حاسة انه مظلوم ..سمعتي القصص والقضايا اللي حكوا عليهم في الجلسة ..شكله كان طايح في عصابة كبيرة وخطيرة
رغد : اي والله ..بس شن جابه ليهم ؟؟
دارين : على حسب مافهمت نوح كان بينتقم لاموت خوه علي ..لانه اكتشفه انه مات مقتول مش منتحر ..مش بس أخ نوح وفي ناس تانية امعاه ..قضية كبيرة ومازلت تحت التحقيق
رغد : سبحان الله ..من وين ايجيبوا في الشر هادا كله
دارين : الطمع والفساد مالي قلوبهم ..وعامي بصيرتهم ..مستعدين ايديروا كل شي عشان لفلوس والمناصب ..نأسين ان كل شي زائل ومايبقى الا وجهه سبحانه وتعالى
رغد : ربي يهلكهم بشر اعمالهم ...بس أنتي شن تبي اديري توا ..كيف بيصير مع نوح ؟؟
دارين : بنكمل امعاه ..وانشوف شن بيدير ..هو كان ايقولي اصبري عليا لعند نطلع من السجن بس ..اهو بيطلع اليوم نصبر وانشوف
رغد : إن شالله خير ..بس ماتخليش القصة اطول اكتر دراين
دارين : اي فاهمة عليك ..بس ماتنسيش ان نوح توا كيف بيطلع من السجن ..ومازال مايعرفش شي عن اهله ..ولازم ياخد وقت لعند يستقر ..ويرجع لحياته الطبيعية بالشويا
رغد : معاك حق صدقتي فيها هادي
دارين وقفت وشافت لرغد : على فكرة ..أني قلت لاوس كل شي بخصوص نوح 🥺
رغد : طاح سعد العار 😳 شن لبزتي ياهمي ؟؟
دارين : كان لازم يعرف رغد ..لما حسيت ان نوح بيطلع خلاص ..قلت ضروري أوس يعرف ..لان هكي او هكي مصيره بيعرف ..يسمع مني احسن مايسمعها من غيري
رغد : وهادا علاش وجهه انقلب وطلع من القاعة معصب
دارين : يعصب اشويا وبعدين يهدأ ..أوس امفكر أني خدعته وكنت وافقة مع نوح طول الوقت ضده..وأني العكس رغد ..كنت نكدب على نوح وناخد منه في معلومات ..ونحكي لأوس في كل شي .صاح مش بالتفصيل بس المعلومات المهمة كلها يعرفها
رغد تبحت فيها بشك : رد بالك اتكوني درتي هكي عشاني دارين ؟؟
دارين : لا والله مش هكي لحكاية ..لما سمعت منك على أوس كان لازم انقوله كل شي ..عشان لو كلامك صاح أوس ضروري يعرف أني انحب شخص تاني وعايشة حياتي ..وهوا يلتفت لحياته ومايستناش مني شي ..لان بنوح او من غير نوح أني مستحيل انفكر في أوس الا كيف خويا وبس
رغد : إن شالله تمر على خير ..وأوس مايديرش مشاكل معاك او مع نوح
دارين تنهدت : إن شالله ..اي وأنتي شن صار امعاك مع نزار ؟؟
رغد : نفس الوضع ..الولد ماشالله عليه ..وأني يعطيني داي مانعرفش كيف انشيل البلاي اللي اسمه أوس من بالي 😒
دارين ضحكت : بعيد الشر عنك 😂...كل شي له حل ..بس يبي وقت ..وأنتي اصبري اشويا على نزار ..مازلتوا تتعرفوا على بعض
رغد : 🥺🥺
كملوا كلامهم وكل وحدة ركبت سيارتها وروحت للحوشها
*******************
أوس من طلعته من قاعة المحكمة وهو يجري بسيارته لعند وقفها في طريق بعيد ومعزول ..طفى المحرك ...وخبط بيده على الدومان معصب 😤😤 ...وبعدين حط ايديه لاثنين على الدومان ونزل رأسه بين ايديه ..ويفكر
طول وهوا على نفس الحال ..وبعدين رفع رأسه وخر كرسي السيارة ونزله ..ورقد عليه ويفكر بصوت عالي
أوس : كله منك أوس كله منك..علاش معصب ترا قولي علاش معصب ..أنت اللي جبتها بيدك وحطيتها بين ايدين غريمك ....كيف فاتت عليك أن نوح ممكن يستغل دارين ويضمها لصفه ...زعما شن كان ايصير بينهم 😡
اوووووفه ..وربي أنك حمار أوس ..كيف تخيلت أن دارين البنت الطيبة ممكن تضحك على نوح وتاخد منه معلومات ..ليش مافكرت أن نوح اذكى من انه ينخدع بي بنت ويعطيها سره ...ليش مافكرت أنه شاب ذكي واكيد بيستغل كل فرصة عشان يطلع من السجن
اي هوا صاح طلع برءي في النهاية ..بس حياته مازلت غامضة ومش معروف كيف كان عايش ..ولشنو بيوصل من علاقته بدارين ...أكيد في مصلحة ...والا معقولة نوح ايحبها صاح ؟؟ 😤 لاااا أنت أكيد بتنهبل أوس ..قاعد اهني وتحكي مع نفسك ..ومش قادر حتى تعرف أنت شن تبي ..عقلك مرة مع دارين ومرة مع رغد ...ايييه رغد التانية شن تبي في الزفت نزار 😡
أوس بربك أرسى على بر ..أنت في شنو اتفكر بالضبط ..دارين ممكن أنت اتحبها واتفكر فيها من زمان ..وخايف عليها من اللي اسمه نوح
باهي ورغد ليش واقف في طريقها ..ليش ؟؟ ..نزار شاب ممتاز ومحترم ..ليش حاس بغضب من علاقته وقربه من رغد ..معقولة هادي كلها أنانية بس 😤😡
ياربي أرحمني ..والله قريب نطلع من حوايجي وننجن من كثر التفكير 😥
***************(( الكاتبة أم ناصر ))
دارين روحت للشقة ..غيرت وغسلت ..وقمعزت اتهدرز مع أمها في المطبخ ..صباح اطيب في الغدي ..ودارين اتساعد فيها واتجهز في السلاطة
الساعة 12 ونص رن فون دارين لاقاته نوح 😍 طلعت من المطبخ بسرعة وردت عليه : الو
نوح : ايوا ..شن اخبارك ؟
دارين : بخير ..شن صار طلعت والا مازال ؟؟
نوح : الطلعة على الساعة 2 إن شالله
دارين : والله ؟؟ باهي تمام ..أني بعد الغدي حنجي نستناك برا
نوح : مافيش داعي تتعبي غزالتي
دارين : مافيش تعب ..نبي انشوفك ونطمن عليك نوح 🥺
نوح : تمام ...نتلاقوا بعدين ..أنتي وين توا ؟؟
دارين : قاعدة مع أمي
نوح : اي ..سلمي عليها 😉
دارين ضحكت : إن شالله 😂
نوح : هيا بالسلامة توا ..بنعدي انسلم على الجماعة اللي اهني قبل نطلع
دارين : تمام ..سلم على هيبة وعمي يونس ..استاحشته والله 🥺
نوح : امممم 😒باه خلاص بنصكر 😑
دارين ابتسمت بالشويا : بالسلامة..باي 😁
صكر نوح ...ودارين خشت على أمها المطبخ وهيا اتفكر ..اتجنن غيرته الولد هادا 😚
الساعة واحد ونص كانت دارين لابسة وجاهزة ..قالت لامها بنعدي انمر على العيادة القديمة ..لانها بتعاود تشتغل فيها من جديد ..وطلعت ركبت سيارتها ومشت وقفت برا قدام السجن من وين يطلعوا السجناء
جت الساعة 2 ونوح ماهناش ..ومش باين حد والباب امصكر ..ودارين قلبها يغلي ..لعند الساعة ثلاثة الا ربع ودارين قبل انجنت لعند شافت باب السجن انفتح وطلع نوح وشاب ثاني مع بعض ...ونوح في يده شنطة صغيرة زي الصاكو ..فيها دبشه وحاجاته ..جت عينه على سيارة دارين ..ابتسم وجاء شورها ..وهيا نزلت تستنى فيه ❤
نوح قرب منها سلم عليها وقعد شاد يدها زين : أسف عطلت عليك ؟؟
دارين : ولا يهمك... المهم أنك بخير وطلعت
نوح شدها من يدها ليه قربها منه : مانكونش بخير الا بجنبك دارين
دارين اخدودها حمر : نوح قاعدين في الشارع
نوح تنهد : اي نعرف ...نمشوا ؟؟
دارين سحبت يدها منه وفتحت باب السيارة : اي نمشوا ..بس على وين ؟؟
نوح فتح باب سيارتها من لاوراء وحط الشطنة وفتح الباب من قدام وركب : اركبي وأني توا انقولك
ركبت ولعت السيارة وطلعت بيها ...مشت مسافة ..ونوح سارح في شوارع المدينة ودارين اتشوفله وبعدين سألته : وين مشيت نوح ؟؟
نوح انتبه وشافلها : ااء ..الدنيا هادي غريبة ..الوقت على قد ماكنت انحس بيه يمشي بي ببطى وأني مسجون ..بس توا لما نتفكر اول مرة شدوني فيها ..انحس كأنها امبارح . والوقت مشى بسرعة
دارين : نادم على الوقت اللي ضاع من عمرك في السجن 🥺
نوح : لو ماكنتي طلعتي في حياتي كنت أكيد ندمت ..بس زي مايقولوا كل تأخيرة فيها خيره ..وهادا اللي صار امعايا ..كأني كنت محبوس الفترة هادي كلها عشان بس اتجي للسجن ونتلاقى امعاك واتخشي لحياتي ..وأني بعد تعرفت عليك مش نادم على شي ..الا على الوقت اللي ضاع من عمري من غير مانعرفك
دارين انحرجت وطبست ..ونوح ابتسم ومد يده رفع وجهها : مش متخيل حياتي من غيرك ..أنتي كل شي بالنسبة ليا توا
دارين : وحتى أني معادش نقدر انعيش من غيرك نوح ..خليك جنبي ع طول
نوح شد يدها بأسها : ومن قال بنخليك ..اعطيني فرصة لعند تستقر الاوضاع في حياتي ..وبتشوفي كيف بنعيشوا مع بعض يوم بيوم ..ولعند اخر للحظة
دارين ابتسمت : باهي على وين توا ..وين بتمشي ؟؟
نوح : شوفي اقرب فندق قريب من شقتكم ..نقعد فيه يومين لعند نعرف شن بندير
دارين : تمام ..نعرف فندق نظيف وسعره معقول ..وقريب منا ..نمشوا وأنت اتشوفه
نوح : تمام
وصلوا لعند مكان الفندق ..نزلوا لاثنين ..سأل نوح على غرفة ..وحجز عندهم ..وتم اموره ..وبعدين اتلفت على دارين : شن عندك توا ؟؟
دارين : بنمشي انشوف مدير عيادتي القديمة ..بنرجع نشتغل فيها ..وبعدين بنروح للشقة
نوح : تمام ..أني بندوش ونريح اشويا ..وعندي اشويا شغل ..بس غدوة لازم انشوفك
دارين : اي تمام ..نتلاقوا ..كلمني ☺️
نوح : بينا تليفون
دارين : بالسلامة
نوح شد يدها وطلع معاها لعند السيارة ..ركبت وهوا واقف ايشوفلها لعند مشت ..وبعدين خش خذا مفتاح الغرفة ورقى فوق ..ادوش وطاح رقد تاعب من الصبح وهوا من مكان لمكان واعصابه كانت مشدودة ...اخيراً حس براحة وخاطره يغمض اعيونه ويرقد في مكان نظيف ومريح
****************
رغد العشية تحكي مع نزار ..وخش عليها أوس إنتظار ..غمت عليه وماردتش ..بس رد ايرن عليها
نزار : شني الصوت هادا ..عندك مكالمة انتظار ؟؟
رغد : ااء ..اي اي ..فوتها عادي
نزار : من ساكن ويرن عليك ؟؟
رغد : ااءء ..هادي دارين ..أكيد بتسألني على شي مهم 😅
نزار : باهي شوفيها شن تبي قبل...واحني انكملوا كلامنا بعدها
رغد : عادي يعني ؟ 🥺
نزار : اي عادي ..مش مشكلة ..مرات تبي شي ضروري منك
رغد : تمام ..بنشوفها وانعاود عليك ..اوكي
نزار : اوكي
رغد : بالسلامة
نزار : بالسلامة
صكرت رغد ..وأوس مازال ايرن عليها : نعم 😡
أوس : ساعة عشان اتردي ..مع من كنتي تتكلمي 😤
رغد : نتكلم مع الجن لازرق ..وأنت مالك 😒
أوس : اي مش غريب عليك .بنت زيك أكيد تتعامل مع الجنون 😑
رغد : جن يركبك إن شالله . شن تبي أوس بسرعة 😡
أوس : بالشويا خيرك مستعجلة ؟؟
رغد : خطيبي قاعد يستنى فيا ..قطعت علينا الكلام 😏
أوس : خطيبك هه ..مش لما يخطبك قبل 😑
رغد : وأنتا خليتني في حالي عشان ننخطب ...ساكنلي كل مرة طالعلي من مكان 😒
أوس : اصلا هوا مش مدورك هلبا ..لو أني في مكانه ماكنتش استنيت من حد يحكي مع البنت اللي نبيها ..وكنت جيت لعندها بنفسي وتكلمت امعاها 😏
رغد : اي بس أنتا مش في مكانه ..وعمرك ماراح اتكون ..وبعدين نزار شاب محترم ويفهم في الاصول وعشان الصحبة اللي بينكم اتكلم امعاك قبل ..بس هات من يفهم 😒
أوس عصب : قصدك أني مانفهمش في الاصول 😡
رغد : أوس نفختني ..شن تبي بسرعة ..نزار يستنى فيا 😏
أوس : خليه يستنى ..اطلعي نبي انشوفك توا ضروري 😑
رغد : نعم ؟؟! ..هه ..ومن تحساب نفسك عشان انفوت نزار ونطلع انشوفك ؟؟😒
أوس : يعني ماتبيش تطلعي رغد ؟؟
رغد : لا ..مانبيش 😑
أوس : اايه تمام ..أنتي ماتبيش تطلعي ..أنا انجيك ماعندكش مشكلة
رغد : 😳😳 وين أتجي يانهاري لاحرف ..أوس عمي المهدي قاعد وعنده رجالة ..وماما اطيب في قهوة ..ماعنديش وين انشوفك
أوس : يبقى أطلعي أنتي وتعالي للكافي ..لان مافيش حل يا أما اتجيني او انجيك
رغد : شن تبي قول على التليفون ..مش ضروري نتلاقوا برا
أوس : ماينفعش ..ضروري انشوفك رغد 😑
رغد فونها يشرين ..نزار يتصل بيها : باهي ..باهي ..توا انكلمك لما نطلع
أوس : من يتصل بيك ؟ 😒
رغد : اله في حالك مالكش دعوة
أوس : أكيد حبيب القلب ..ردي عليه وقوليله بتطلعي اتشوفيني 😏
رغد : اي أكيد بنقوله .. شن بنكدب عليه 😒
أوس : ماتعطليش نستنى فيك ..بسرعة 😑
رغد : على مهلي ...استنى شن وراك 😏
وصكرت رغد في وجهه قبل ايرد عليها .. وافتحت الخط على نزار : الو
نزار : اهلين ...طولتي قلت انشوفها شورها نسيتني بكل
رغد : لا والله غير دارين كانت تبيني في موضوع مهم وكنت نتفق امعاها
نزار : على شنو ؟؟
رغد : عندها مشكلة ..وطلبت اتشوفني توا 😣
نزار : مش الصبح كنتوا مع بعض ..خيرها شن صار امعاها ؟؟
رغد : موضوع خاص بيها نزار ..شن اتحاسب فيا والا كيف ؟؟
نزار : لا مانحاسبش فيك ولا شي ..غير استغربت بس
رغد : باهي خلاص عطلت عليها البنت تستنى فيا
نزار : تمام ....انخليك توا ..بس أكيد نتصل بيك في الليل
رغد : اي .اي.إن شالله ..باااي توا
نزار : باااي 😑
صكرت رغد ..غيرت دبشها ..وطلعت بعد ماقالت لامها ..وقبل توصل للكافي رنت على أوس
أوس : نعم
رغد : قريب نوصل وينك أنت 😒
أوس نزل من سيارته : كيف اوصلت ..تلقيني قدامك
رغد : هيا
وصلت رغد للكافي ..نزلت ..وخشت ..شافت أوس واقف في مكان على الكرنيش ..مشت شوره ..وصلت لعنده وقفت جنبه
رغد : نعم ..شن تبي فيا امطلعني توا 😒
أوس كان سارح تلفت على صوتها : وعليكم السلام ورحمة الله 😑
رغد : السلام عليكم ..ها شن تبي ؟؟
أوس : خيرك اتعيط ..بالشويا توا تعرفي شن نبي 😡
رغد : 😒😒
أوس : انقعمزوا والا نمشوا ؟؟
رغد : لا خلينا نمشوا ..مالة من التقعميز
أوس : تمام ...تعالي انزلي من اهني
نزلت رغد من دروج الكافي ..وقعدوا يمشوا على الكورنيش على طول الساحل
أوس : أكيد دارين حكتلك كل شي
رغد : ااءء ..شن حكت ؟؟ ..شن قصدك ؟؟ 😣
أوس : رغد بلا استعباط ..أني نعرف دارين مادسش عليك في شي ..وأكيد حكتلك علي اسمه نوح 😑
رغد : اي حكت ..وأنت شن هامك وعلاش تسأل ؟؟
أوس : كيف شن هامني ..ناسيه أني أنا ودارين كبرنا مع بعض ..ونعرفوا بعض من زمان ..وأكيد اتهمني مصلحتها
رغد : وشن دخل الكلام هادا في علاقتها بنوح ؟؟
أوس : دخله ونص ..دارين من وين تعرف نوح ..تعرفت عليه في السجن ..يعني كان مجرد مجرم في وقتها ..باهي علاش حباته ..شن في بينهم بالضبط ..نوح بشنو وعدها ؟؟
رغد : وليش تسأل فيا أني ..أني شن دخلني ..عدي أسأل دارين كل هالاسئلة وهيا أكيد عندها اجابة ليك 😒
أوس شدها من ذراعها : لانها صاحبتك وتحكيلك في كل شي ..ودارين ممكن اتخاف مني او تتحشم ومش حتحكي كل شي
رغد : وأنت ليش تبي تعرف شن في بينهم ..هادي حياتها وهيا حرة فيها
أوس عصب وشدها ليه أكثر : لا مش حرة فيها ...لان دارين اتكون ..اتكون ...
رغد زمطت واعيونها دمعوا : اتكون شنو ؟؟!🥺
أوس ايشوف لعيون رغد زين وبعدين سيبها وبرم : مش مهم ..المهم نبي نعرف شن في بينهم بالضبط ؟؟
رغد : مانعرفش ..وحتى لو نعرف مش حنقول ..لان هادي حاجة خاصة بدارين ..نبي نمشي وياريت معاش تتصل بيا او تتطلب اتشوفني تاني
برمت رغد وتبي تمشي لكن أوس جبدها من ذراعها : تعالي ..تعالي ..وين ماشية ..ككيف كيف قلتيلي معاش نتصل بيك او نشوفك ..هادا كلامك او اوامر حبيب القلب ؟؟
رغد اتفك في روحها من يده بس أوس شدها بقوة : كلامي أني ..شن دخل نزار توا ..هوا مايعرفش حتى اني بنلاقيك ؟؟
أوس : قصدك طلعتي من غير ماتقوليله انك طالعة ؟؟
رغد : لا أكيد قتله أني طالعة ...اطلقني أوس ..خيرك ؟؟
أوس زاد قربها منه : يعني كدبتي عليه ..ااااها أكيد طالعة ع اساس بتشوفي دارين والا لا ؟؟😏
رغد ارتبكت : اااء ..شن دخلك أنتا شن قتله 😰
أوس كان ماسكها من ذراع وحدة ..زاد مسك ذرعها لاخر ..وقربها منه بكل : ليش ماقلتي لنزار أنك طالعة بتشوفيني ..هوا يعرف أنك اتشوفي فيا عادي من قبل..والا خفتي يفهم عليك ويعرف اللي في قلبك 😏
رغد قلبها طاح منها : شن تحكي أوس 😰😰
أوس ايشوف لفمها اللي يرجف ..حط يده على خدها ..ونزل وجه قرب من وجهها ورغد ترجف ..غمضت اعيونها وسلمت بين ايديه
أوس يحكي وفمه قريب من فمها : أنتي تعرفي على شنو نحكي ..علاش تكدبي على روحك وعلى الولد ..رغد أني حاس بيك ونعرف اللي في قلبك ونعرف أنك ماتحبيش نزار او غيره ..ومستحيل اتحبيهم ..تعرفي ليش ؟؟
رغد مغمضة اعيونها وترجف : ليش ؟؟
أوس بدأ ايبوس فيها وسمع حد نزل من الدروج ..وخر عنها بسرعة ..ورغد فطنت لروحها برمت وجهها وجسمها كله يرعش ..شافت اثنين نازلين من الكافي ..فنصت في أوس ومشت بسرعة ..وأوس لاحقها ..رقت مع الدروج وهوا في جرتها ..طلعوا من الكافي يمشوا جنب بعض ..هيا ركبت سيارتها وطلعت بسرعة
وأوس ايشوفلها ..وبعدين ركب سيارته وطلع وراءها ..ولا واحد منهم انتبه على سيارة نزار ..اللي وقفت وكان نزار مقمعز فيها وكيف وصل مع شاب صاحبه.. وشافهم وهما طالعين من الكافي مع بعض 😳🔥
*************(( الكاتبة أم ناصر ))
دارين في الليل اتصل بيها نوح وهدرزوا مع بعض ..وكان نوح وضعه احسن من قبل واخذ راحته في الدوة مع دارين ..وكانت مكالمة حلوة ..اتفقوا يتلاقوا الصبح
الصبح دارين لابست وطلعت ..مشت لعند الفندق واتصلت بنوح عشان ينزل ..طلع نوح من الفندق ..ودارين انصدمت بشكله ...نوح محلق ولابس دبش جديد ..شكله متغير بكل ...هو دارين المسكينة ميتة فيه وهو كان مش حيلته الا كم تيشرت وسروال عاديات في السجن ..املا شن يبي ايصير فيها توا ..ونوح لابس طرحة صقع ..ومحلق ..والعطر ..اللي يربخ ..والنظارات والحركات ..ياحرام هالدارين حالها ايسخف 😁
نوح وقف وسلم عليها : شن اخبارك ؟؟
دارين امتنح فيه : ااءء ..تمام ..تمام
نوح قرب منها مستغرب : خيرك ..شن صارلك؟؟
دارين هزت رأسها وضحكت : لا مافيش ..غير استغربت شكلك 😂
نوح : اول مرة اتشوفيني شاب محترم 😏
دارين : لااا مش قصدي ..أني ااا..
نوح قرب منها : عادي حتى أني استغربت شكلي لما لابست 😂
وخطف مفتاح السيارة من يدها ..وبرم ركب في مكانها : هيا تعالي
دارين اتشوفله مستغربة ..وبعدين ابتسمت وركبت جنبه : وين ماشيين ؟؟
نوح : مستعدة تتعرفي على نوح من جديد ؟؟
دارين : ككيف ..مافهمتش ؟؟
نوح مال شورها : تتعرفي على نوح اللي عنده حرية ويقدر ايدير كل شي ...مش نوح اللي محبوس بين اربع حيطان وايديه مكتفات ..نوح المجنون واللي يبي ايجننك امعاه
دارين هزت اكتافها : اي عادي ...انحب نتعرف عليك من جديد
نوح ولع السيارة وعض على فمه وشافلها زين : ايييه معناها وتي روحك ..لاني بنخليك تهبلي وترجعي مراهقة من جديد 😉
دارين اتبحت فيه ..وكأنها اول مرة اتشوفه ..ونوح شيط السيارة وطلع بيها جري ...دارين 😨
نوح يجري ويجتاز في السيارات ودارين قلبها قريب يوقف من الخوف : نوح بالشويا خيرك تجري 😨
نوح ايعدل في مراية السيارة : اششش اسكتي وماتخافيش
وزاد السرعة ..ودارين خلاص معاش قدرت تبي اتموت من الخوف ..غمضت اعيونها ومسكت في ذراعه بالقوة ..وهيا ترعش 😣
نوح يسوق وطلع من زحمة المدينة ..ولع المسجل وعلى الصوت ..ومرة مرة ايشوف لدارين كيف خايفة وشادة فيه ..يبتسم على منظرها
نوح طلع من طريق الساحل وقف السيارة قدام محل ..خش غاب خمس دقائق وطلع في يده كيسين ..ركب السيارة وطلع بيها نزل على البحر ...خش مسافة لعند تباعد عن كل شي ..وقف السيارة
دارين اتشوف للمكان : ليش جبتنا اهني ؟؟
نوح شد وجهها بين ايديه وقرب منها : نبيك ابروحك دارين مانبيش حد يشاركني فيك ..نبي انكون امعاك ..وعيني ماتشبحش غيرك اليوم
دارين ساكتة وهايمة في ملامح وجهه اللي ايهبلوا ..ونوح نزل بأسها على خدها وبعدين تباعد عنها وفتح الباب : تعالي انزلي
نزل نوح ..ودارين نزلت وراءه ..حول كندرته ورفع السروال الجينز فوق ..وعدا خش البحر وقعد يمشي على الشط
دارين مصبية واتشوف فيه ..كيف مستمع بكل شي في حياته من جديد ❤
نوح برم وبحت فيها : تعالي غزالتي ..خيرك واقفة بعيد ؟؟
دارين حولت كندرتها ورفعت سروالها اشويا ..ولاحقاته ..شد يدها وقعدوا يمشوا على الشط ايهدرزوا ..ويلعبوا على المية برجليهم
نوح شد ايدها الثانية وقابلها : تعرفي استحاشت كل شي ..وخاطري انعيش من جديد كل اللي كنت محروم منه ...بس دارين نبيك اتكوني جنبي وفي حياتي الجديدة ...أني عارف أن كل شي بيكون مختلف وأنتي امعايا ..كل شي ليه طعم تاني وريحة تانية ..غير اللي كنت نعرفها من قبل ..بس نبيك توعديني مهما صار ما تتخليش عني ..خليك في حياتي على طول دارين
دارين : أني ليك نوح..واصلاً مانعرفش انعيش من غيرك من بعد اليوم ..أنتا رد بالك اتخليني وتبعد عني 🥺
نوح سحبها من ايديها وبأس جبينها : انخلي روحي كيف بس ..وكيف بنعيش من دونها 🔥
دارين ابتسمت وطبست ..ونوح خذاها من يدها : تعالي نفطور ..جعت أني
مشوا للسيارة نوح فتحها وخذا لاكياس وحطهم على خشم السيارة وقمعز فوق : تعالي دارين
دارين قربت وتبحت فيه ..كيف هوا انسان عفوي واي شي يخطر على باله ايدير من غير خوف او تفكير ..وجت تبي تقمعز امعاه بس السيارة مرتفعة ودارين ماعرفتش كيف اتقمعز
نوح نقز وجاءها ..حط ايديه على خصرها ورفعها لعند قمعزت ..ورد قمعز في مكانه ..فتح لاكياس ..فيهم عصير وبريوش وانواع شكلاطة ومناديل
بدوا ياكلوا بس دارين طول الوقت وهيا اتشوفله..اصلا من وقت طلع نوح من الفندق ..وهيا مارفعتش عينها من عليه ..كانت مذهولة من كل شي فيه شكله الجديد ..ملامحه ..وتصرفاته ..البنت كبدت فيه خلاص ❤
نوح فتح برويش وعطاها : دارين ليش ما تأكلي ..والا منحرجة مني ؟
دارين : لا لا ..توا نأكل ☺️
خذت منه وتأكل ..ونوح مقمعز ويبحت فيها ...حطت البريوش في فمها ..ونوح قرب منها وخذا فم من البريوش وفمه لمس فمها ..وهيا انصدمت وخرت 😣
نوح رد لمكانه : شن اندير جاء في خاطري وحبيت انذوقه 😋
دارين : شن هوا ؟ 😨
نوح : البريوش 😉😏
دارين برمت وجهها ونزلت من السيارة : نبي نمشي نوح مازال ورايا عيادة
نوح نزل ويلم في لاكياس : نمشوا اي ..حتى أني عندي ماندير
دارين نزلت سروالها ولابست كندرتها ..ونوح لما الحوسة وركب جنبها ولع السيارة وطلع بيها ..وصلها لعند العيادة عشان يعرف مكانها ..ونزلوا
نوح مد المفتاح لدارين : بنمشي أني ..خلي بالك من روحك ..ولما اتكملي شغلي رني عليا
دارين : خليه امعاك المفتاح ..ممكن تحتاج لسيارة
نوح : لا لا ..اصلاً ..توا بنمشي انشوف سيارة اجأر.. عندي شغل ..و انمشي بيها لعند اندير حل
دارين : والله نحكي جديات ..خليها امعاك أني عندي عيادة توا وماعندي ماندير بيها ..وغدوة عطلة مافيش عمل الصبح
نوح : لا لا ..خليها أني ...
دارين ردت المفتاح في يده : عشان خاطري نوح ..بالله عليك خليها امعاك ..وغدوة ناخذها منك مش مشكلة شوف شغلك بيها اليوم ..وجيبها ليا غدوة
نوح برم وجه : تؤ تؤ ..دارين ..مانبيش انقو..
دارين : ماتقولش شي ..حلفتك بالله ماتردها نوح ..خلاص قتلك عشان خاطري 🥺
نوح : المرة هادي بس ..عشان خاطرك 😑
دارين : باهي
نوح : وأنتي كيف بتروحي توا ؟؟
دارين : مش مشكلة ..انروح حتى في تاكسي
نوح : لا شني تاكسي ..لما اتكملي شغلك ..رني عليا انجي نرفعك للشقة ..والا خودي مفتاحك من توا
دارين : باهي تمام ..خليها امعاك وأني انرن عليك اول مانكمل ☺️
نوح : اوكي ..خشي هيا ..قبل نمشي
دارين : حاضر
خشت دارين ونوح واقف لعند خشت ...ركب السيارة ..طلع بيها وفي الطريق اتصل بواحد ومشى عشان يتلاقى بيه
دارين كملت شغلها على الساعة 2 رنت على نوح
نوح : الو
دارين : ايوا ...تعالى خلاص كملت
نوح : قاعد برا نستنى فيك من بكري
دارين : صاح ...هيا جيتك ☺️
طلعت دارين وفعلا كان نوح برا ..ركبت امعاه ومشى بيها للشقة .. نزلت وهوا عدا ... ركبت للشقة تغدت مع أمها ..وطاحت رقدت ...ناضت على صوت فونها لاقاته نوح ..هدرزت امعاه ...وبعدين ناضت غسلت وصلت ومشت طيبت قهوة ..مع صباح وقمعزت اتهدرز امعاها وجوها رايق على الاخر
في الليل نوح كلمها قبل ترقد ..وقعدوا يهدرزوا مع بعض ..وكل دقيقة دارين اتزيد تتعلق بيه واتحبه أكثر ...ورقدت وهيا اتفكر فيه
ثاني يوم الصبح ناضت دارين على صوت المنبه ..اتصلت بنوح بس فونه خارج التغطية ...ناضت لابست وفطرت ...وكل ماتتصل بيه يعطي خارج التغطية ...لعند الساعة 11 وبعدين قعد يعطي مقفل 💔
دارين معاش دورته على وقت الغداء ...بعد الغدي ..وبعد لمت دارين حوستها ..ردت تتصل بيه بس مازال مقفل خافت عليه وينه وليش مختفي من الصبح ...وكل مايمشي الوقت دارين اتزيد اتخاف عليه ..لعند العصر ..وبعدين قررت تمشي اتشوفه ..خافت ايكون مريض او صايرة امعاه حاجة ...لابست ورنت على رغد جت خذتها في سيارتها ...طبعا دارين ماحكتش لرغد اي شي في الطريق ..غير انها خايفة على نوح وكل ماتتصل بيه تلقاه مقفل
وصلن للفندق ..نزلت دارين وخشت تسأل على نوح ..بس الريسبشن قالولها مش قاعد ..ولما سألت امتى ممكن ايجي ..ردو عليها أن نوح طلع من الفندق أمس وخذا حاجاته كلها ولغى الحجز ..😰😰😰
*******نهاية الحلقة #15