#السجين_777
#الحلقة_16
وصلن للفندق ..نزلت دارين وخشت تسأل على نوح ..بس الريسبشن قالولها مش قاعد ..ولما سألت امتى ممكن ايجي ..ردو عليها أن نوح طلع من الفندق أمس وخذا حاجاته كلها ولغى الحجز ..😰😰😰
دارين انصدمت بس ماحبتش اتوضح قدام رغد
رغد : كيف صار ..مش قاليك وين ماشي ؟؟
دارين : اااءء أمس قالي عندي شغل ضروري
رغد : باهي وتليفونه خيره مصكر ...دارين أنتوا في شي صاير بينكم ؟؟
دارين : شن بيصير رغد ؟؟
رغد : مش عارفة .تعاركتوا ..او زعل منك في حاجة ؟؟
دارين تمسح في وجهها : لا بالعكس الجو أمس كان خيال والجو تمام
طلعن من الفندق وركبن سيارة رغد ..رغد : شن تبي اديري توا ؟؟
دارين حاطة يدها على رأسها وعقلها ايجيب ويودي في الافكار : نزليني على الشقة خلاص
رغد ولعت السيارة وطلعت : وأنتي سيارتك وين ؟؟
دارين ارتبكت : اااها ...ااءا ..سيارتي في الورشة 😣
رغد : خير بلاها المعطوبة ..كل يوم والتاني عاطلة عليك ؟؟
دارين : مانعرفش ..بالك انبيعها ونشري غيرها ونرتاح
رغد : اي حتى هوا رائي
دارين التفتت لطريق وهيا اتفكر ..غير نعرف وينها هيا ونوح قبل ..ياربي ماتكسر بخاطري 🥺
نزلتها رغد على شقتها ..وعدت ...ورن عليها نزار
رغد شافت رقمه تنهدت وردت : نعم
نزار : ايوا ..وينك أنتي خيرك ماترديش عليا من أمس ؟؟
رغد : بالشويا ..خيرك تهزب ؟؟
نزار : رغد من أمس وأني نتصل بيك وأنتي شي مافيش رد ولا معبرتني 😡
رغد : اي نزار مارديتش لاني تاعبة وجوي مش هوا ..مانحبش ندوي مع حد لما نتعكر 😒
نزار : باهي اوكي خلاص ...نبي انشوفك رغد
رغد : علاش ؟؟؟
نزار : شني علاش ...رغد خيرك تغيرتي مرة وحدة ..في شي صاير امعاك ؟؟
رغد حست بتأنيب الضمير لان نزار مش ذنبه شي 😥 : أسفة نزار مش قصدي ..بس شفت لاني معصبة ماحبيتش نهدرز امعاك عشان ماتجيش عصبيتي عليك
نزار : مش مشكلة حصل خير ...حتى كان ماتبيش نتلاقوا ..خليها مرة تانية
رغد : لا لا ..تمام ..وين نتلاقوا ؟؟
نزار تذكر لما شافها أمس مع أوس : نتلاقوا في كافي الساحل ..تمام ؟؟
رغد : اي تمام ...خمس دقائق وانكون غادي
نزار : تمام تلاقيني قدامك ...باي
رغد : باي
صكرت رغد وهيا اتفكر في موقف أمس مع أوس ...حي زعما أوس حاس عليا 😣 أي اي أكيد ..املا شن معنى كلامه ..والله غبارة يارغد ..كنتي مفضوحة للراجل هكي 😣 ..باهي لو حاس بيا وقاعد يماطل في موضوع نزار ..شن معناها ...زعما حتى هوا ايحبني ومايبيش ايقول ..ياريت 🥺 ..بس ليش ساكت كان هادا ...لا لا رغد ماتفكريش فيه ..مستحيل أوس ايحبك ..أنتي تعرفي من زمان أنه ايحب دارين 💔
اي بس دارين تحب نوح وأوس يعرف بالشي هادا ..بس مش ساكت رغد ..شفتي أمس كيف كان معصب ويبي يعرف كل شي صار بينهم ...معناها مازال ايحبها 😥
املا ليش بأسني أمس ...وعضت فمها لما تذكرت بوسة أوس ...واااااك عليا وخلاص ..وربي بطلعني من عقلي أوس ..لا لا رغد ردي بالك ..أنتي تعرفي أوس ..أكيد كان يغيض فيك بس.. ومادام فاهم اني انحبه ..يافضيحتي السودة 😣 أكيد مايبيش شي ايصير بيني وبين نزار ...اي اي هادا هوا الكلام الاكيد ..أوس يبي يخرب عليا مع نزار عشان يرضي غروره بس ...لكن أني مش حنعطيه فرصة ...لازم نبعد عنه ..ونحاول نقرب من نزار على قد ما نقدر ...يارب ساعدني 🥺
*************(( الكاتبة أم ناصر ))
أوس ناض الصبح لاقى روحه مازال رقد على الكنبة بعد الليل ..تكسل في مكانه وانقلب على ظهره ...فرك وجهه عشان ايصحصح ..وقمعز ..نزل رجليه على الارض ولبس شبشبه ..شد فونه وشافه ..لاقى مكالمات ..ومن ضمنهم نزار ..اووووفه شن يبي هادا الزح ....خطر عليه اللي صار بينه وبين رغد أمس ..ابتسم لما تذكر عصبيتها ..كيف تدوي وتفترش في الكلام ..كيف لسانها طويل وماتسكتش ولازم اترد على كل كلمة 😂
وتفكر كيف بأسها ..وكيف سلمت بين ايديه ..اي معناها حق اتحبني ..غير اتكابر عليا ...اي وأني شني ؟؟ أنحبها والا كيف؟؟ ...مش عارف الحق ..بس أمس لما قربت منها ولما بستها الموضوع عجبني وماكنش خاطري نبعد عنها ...اوووفه أوس . باهي ودارين ..ماحتى هيا اتحبها .. انحبها ؟؟!! ..اااه .بس هيا اتحب نوح 😡 ..وأني كنت زي السطل مش فاهم شي 😤
هز رأسه وصبا خش لحمام ..غسل وجه ..وبحت في المراية ..شني أوس بتوقف تتفرج عليها لعند نوح ياخذها منك ..لازم نتصرف ونبعد نوح عنها
اي اي لازم ...ورغد شن نبي ادير في موضوعها ؟؟ تبي اتخليها لنزار ..ليش مش قادر نتخيلها مع اي حد تاني ..ليش ؟؟
بس أنتا لازم اتحدد شن تبي أوس ..لو تحب دارين معناها ماتخليش نوح ياخدها منك ..بس في نفس الوقت لازم تبعد عن رغد واتخليها في حالها
توضى وطلع صلى ..طيب قهوة ..ورد قمعز ...ايفكر ..وبعدين اتصل بشاب يشتغل امعاه
وليد : نعم يا أفندي
أوس : صباح الخير
وليد : صباح النور
أوس : وليد نبيك اتخلي اي شي في يدك ..واتركز امعايا شن نبي منك
وليد : أمعاك ..شن تبي ؟؟
أوس : نبيك تعرف كل شي عن نوح الحاج ..كل شي ..حتى لو اضطر الامر اتسافر لمكان اهله ..واتجيب كل المعلومات عن حياته بالكامل
وليد : حاضر ..بس مش قضيته اتصكرت نوح ؟؟
أوس : اي نعرف ..بس الموضوع هادا شخصي وليد
وليد : تمام يافندي ..عطيني كم يوم وانجيبلك زبدته كلها
أوس : صحيت ..ماتعطلش عليا بس
وليد : تم
***************
دارين بعد نزلتها رغد رقت للشقة ..غيرت دبشها وقمعزت تتصل بنوح ..لكن فونه مازال مصكر 😭 ..ياربي الراجل هادا وين اختفى ..وينك نوح ..وينك 😥
باقي اليوم ودارين في سريرها غارقة في الافكار ..وكل بعد شويا اترن عليه ..لعند أمها لاحظت عليها انها مهمومة ..ولما سألتها شن فيك ..طبعأ دارين جوابها المعتاد ..تاعبة من العمل والعيادة
بس هيا صاح تاعبة ..لكن مش من الشغل ...من التفكير في نوح ..هوا ايغيب عليها اشويا تتعب ..فكيف لما يختفي عليها بكل وفجاءة وماتعرفش عنه شي
قمعزت في سريرها ..زعما وين مشيت نوح ..وليش ماكلمتني وقتلي وين ماشي ؟؟
وليش خذا سيارتي ؟؟ معقولة خنبها وهرب ...هزت رأسها ...لا لا مستحيل نوح ايديرها ...بس بالك متحاج فلوس ...اي هوا كان محبوس وأكيدة ماعنداش فلوس ...غبية دارين مافكرتيش ان منحرج يطلب منك فلوس ..ونزلتيه في فندق ..أكيد طلع منه لان ماعنداش كيف يخلص 🥺
بس للحظة لحظة ...نوح أمس كان لابس طرحة جديدة ..اقل شي حقها فوق 300 او 400 دينار ..من غير انه شراء حاجات واحني طالعين ...من وين جاب لفلوس ؟؟ اووووفه تعبت من التفكير 😭
رغد وقفت سيارتها وخشت للكافي .. لاقت نزار يستنى فيها ..مشت وقربت منه : سلام
نزار صبا وسلم عليها : اهلين ..شن اخبارك ؟؟
رغد قمعزت : تمام ..اخباري كساد
نزار : مانحبش انشوفك زعلانة ...مع أنك جميلة في كل حالاتك
رغد انحرجت وطبست : تسلم يارب
نزار حط ايديه على الطاولة وقرب منها : خيرك رغد ..شن مزعلك ..ليش متضايقة ؟؟ أني غلطت معاك بشي ؟؟
رغد : لاءء مافيشي ...اشويا مشاكل خاصة ...الموضوع ماليشي علاقة بيك نزار
نزار : اممم ..معناها الموضوع من دارين
رغد : لا ..شن دخل دارين ؟
نزار : لانك من أمس وبعد شفتي دارين وأنتي حالك تبدل
رغد : أمس ..وين شفتها دارين ؟؟
نزار : مش أمس اتصلت بيك وطلبت اتشوفك ضروري ..والا لا 😏
رغد تذكرت كذبتها : اااءء ..اي اي ..تلاقيت أمعاها ..وكانت متضايقة وزعلانة ..وتكلمنا اشويا ..ليش تسأل ؟😣
نزار : عادي ..غير حبيت نطمن عليك
وشاور نزار بيده لشاب اللي يشتغل في الكافي ..وطلب قهوة ..وبعدين رد وشاف لرغد : و أوس ؟؟
رغد انصدمت وشافتله زين : أوس 😰 خيره ؟؟
نزار : قصدي شفتيه أمس والا لا ؟؟
رغد : اي ..شفته ..تلاقينا اهني ..وتكلمنا على موضوع خاص بدارين ..وطلعنا ..ليش ؟؟
نزار : لاني من أمس نتصل بيه ومايردش عليا ..قلت ممكن اتكوني شفتيه
رغد : اااها ..اي شفته ..اتلاقيه مش فاضي والا فونه مش معاه
نزار : ممكن
وقعد ايشوفلها ...وعلى قد ماحس براحة أن رغد ماكذبتش عليه لما سألها عن أوس ...بس حس ان في شي مش طبيعي قاعد ايصير بينهم
مماطلة أوس وعصبيته من نزار الفترة اللي فاتت ..وأمس لما شافهم طالعين مع بعض من الكافي ..وكيف رغد وجهها مايتفسرش ..وأوس امعصب ..وعدوا من غير مايحكوا مع بعض ..مالهش الا تفسير واحد عند نزار ...أن أوس معجب بي رغد ..او يحبها ...ومايبيش شي يصير بينهم 😑
اي يا نزار ..وشن وضع رغد معاه ...أكيد رغد ماتحباش ..والا ليش وافقت عليا ..وقاعدة تتلاقى امعايا ..يبقى لازم نبعد رغد عن أوس بسرعة ...توا بعد حبيتها أني حليت في عينه 😡
أم ناصر : الحاصل كل واحد قرر يبعد اللي ايحبه عن خصمه ...بس كل شي نصيب ..والنصيب مازال مش معروف شن مخبي لكل واحد منهم 🤷🏻♀️
********************** (( الكاتبة أم ناصر ))
الصبح طلع ودارين نومها متقطع من التفكير ..ناضت ادوشت وصلت ..وطلعت شربت قهوة مع صباح ..وماكانش في خاطرها تفطر او تذوق اي شي ...غيرت دبشها ..
ونزلت خذت تاكسي ومشت للعيادة ..خشت تلاقت مع الممرضة : صباح الخير
الممرضة : صباح النور ...ااءء دكتورة نبي انقولك شي
دارين خشت لمكتبها واتلفتت عليها : نعم ..شن في ؟؟
الممرضة قربت منها : في شاب جاء من الصبح بدري ..سأل عليك ..ولما عرف أنك مازال ماجيتي خش قعد في مكتبك حاجة العشر دقائق وبعدين طلع
دارين حطت شنطتها على الطاولة : شاب منو ..حالة عندي قصدك ..ماقالش أسمه ؟؟
الممرضة : لا لا ..هادا اول مرة نشبحه .. وماقالش أسمه
دارين قمعزت وتنهدت : وكيف اتخلي حد يخش للمكتبي وأني مش قاعدة
الممرضة : خش من غير مانقوله ..وبعدين حسيت بيه قريبك او حد يعرفك ..لانه واخد راحته ع لاخر
دارين : خلاص كان يعرفني أكيد توا يتصل بيا ..جيبيلي قهوة لو طيبتي
ممرضة : اي طيبت ..للحظة بس
طلعت الممرضة ..ودارين اتشوف في الارواق قدامها ..ومش قادرة اتركز ..نزلتهم ونفخت ..حطت رأسها بين ايديها ..واتفكر في نوح
بعدين رفعت رأسها ..وتبي تسحب ملف الكشوفات امتاع المرضى ..شافت شي منحوت على طاولة المكتب ..قربت منه اتشوف فيه ...كان رسمة قلب منحوتة على لوح المكتب ..مكتوب في وسطه 👇
((دارين ..غزالتي استاحشتك هلبا ❤ ))
دارين تلمس في الرسمة بأطراف اصابعها ..واعيونها دمعوا ...وهمست : نوووح 🥺
على طول طلعت فونها ورنت عليه ...والصدمة قاعد يضرب 😍😭
نوح : الو
دارين صبت : وينك ..وينك .نوح ؟؟ 😭
نوح عض على فمه وتنهد : اششش دارين ..ماتبكيش . علاش البكي بس ..أسكتي
دارين : تسأل فيا ليش نبكي ..وأني قلبي قريب يوقف من الخوف عليك ..حرام عليك نوح ..وربي حرام 😭
نوح : كان لازم نمشي لمكان مهم دارين ..وماكانش قصدي نبعد عنك
دارين : باهي وينك توا ..أنتا اللي كنت في مكتبي ؟؟
نوح : ترا افتحي الروشن وشوفي للشارع
دارين : قصدك أنت برا
و برمت بسرعة وفتحت الروشن وطلت على الشارع ...نوح متكي على سيارتها ..وايشوف لفوق ..والضحكة على فمه اتجنن 🥺
دارين : نوح استاحشتك هلبا
نوح : وأني بنهبل عليك ..جايك غزالتي
وصكر نوح وخش لمبنى العيادة ..بسرعة ..رقى الدروج ودارين متوترة فتحت شنطتها بسرعة شافت وجهها ..ومسحت دموعها ..وايديها وجسمها كله يرجفوا
نوح مادورش حد ...فتح الباب ...وخش بسرعة وصكره وراءه ..واقف ايشوف لدارين ونفسه منقطع من الجري
دارين اول ماشفاته ..مشت تجري ..ونوح خذاها في حضنه ..وهيا تبكي وتضم فيه بقوة ..وهوا حضنها زين وحط وجهه بين كتفها ورقبتها ..ويشم في ريحتها اللي كانت امعششة ومش قادر ايشيلها من باله طول الفترة اللي غاب فيها ❤
دارين وخرت عنه واتشوف لعيونه : مش قتلي مستحيل انخليك ..وين مشيت نوح ..ليش سيبتني من غير مانعرف عنك أي شي 😭
نوح حط يده على خدها يمسح في ادموعها : ومن قال أني خليتك ومشيت دارين ...أني بس كان عندي أمر ضروري ننهيه ..ورجعتلك تاني
دارين : باهي ليش ماتكلمت امعايا قبل تمشي ..علاش ماتصلتش بيا وطمنتي عنك 🥺
نوح : طلعت بالليل متأخر وماحبيتش نشغلك عليا ...ولما وصلت للمكان ..للاسف التغطية كانت منقطعة من يومين وماعرفتش نتصل بيك
دارين تنهدت : مش مشكلة المهم أنك بخير ..واطمنت عليك ☺️
نوح عض على فمه وابتسم وقرب منها : بجديات خفتي عليا ؟ ..والا قلتي هادا خنب السيارة وهرب 😂
دارين طرمت فمها : شنو الكلام هادا ...وربي الا خفت عليك نوح 😒
ضحك وقرص اخدودها بيديه الزوز : انبصر عليك مهبولتي
دارين ابتسمت ..ونوح برم وطق المفتاح قفل الباب
دارين : شن ادير نوح ..افتح الباب ..تخيل ايجي حد ويلقاه مقفول 😨
نوح ماردش عليها ومشى قمعز على طاولة المكتب ..ودارين قربت منه : أنت اللي كنت الصبح اهني ؟؟
نوح جبدها من يدها وقربها لعند خشت بين رجليه وهو مقمعز : اي كنت اهني ..وخليتلك رسالة ..والباين أنك شفتيها
دارين مطبسة ومنحرجة : اي شفتها ...ومصدقتش اعيوني لما شفتها
نوح رفع وجهها بين ايديه : استاحشتك دارين ..مانعرفش كيف فاتوا اليومين من غير ما نشوفك ؟؟
دارين اتبحت في اعيونه : وحتى أني ...معادش تعاودها نوح ..وربي انموت لما تبعد عني 🥺
نوح ساكت ويملا في اعيونه من ملامح وجهها ..وهيا انحرجت وخدودها حمر ..وتبي تهرب من بين ايديه ..بس نوح شدها وزاد قربها منه : خليك بنشبع منك دكتورتي
ورفع ايديه ايفك في وشاحها ...فكه وشاله من على شعرها ..واعيونه يلمعوا ويشوفلها بشوق ...وبعدين سحب شعرها فكه ...وخشش ايديه يفرد في شعرها على ظهرها واكتافها ❤
دارين ترجف : نوح خلاص توا ايجي اي حد ..عندي مرضى يستنوا فيا 😣
نوح نزل وصبا حط يده تحت شعرها وجبدها ليه من رقبتها ..طبس ايحرك في خشمه على رقبتها وخدها : حتى أني مريض ..ومن حقي انشوف دكتورتي والا لا
دارين زمطت وساكتة
ونوح برم بيها رفعها من خصرها وقمعزها على الطاولة ..وشد يدها وحطها على قلبه : شوفي هادا خيره ..كل ما نبعد عنك يوجعني ..ودقاته ايزيدو ..ومعاش نتحكم فيه ...ليها علاج الحالة هادي والا شنو الراي دكتورة
دارين : لو كان في علاج كنت عالجت قلبي نوح ..هادا مرض ماليش علاج
نوح خدا وجهها بين ايديه ولاصق فيها ونفسه منقطع : نبيك دارين .نبيك ..بنهبل عليك ..أمتى اتكوني ليا وحلالي ..نبيك النم ومعادش قادر نصبر 🔥
دارين غمضت اعيونها وماتكلمتش ...ونوح سحب روحه من عليها بالسيف ..برم وحط ايديه في شعره ..مشى كم خطوة بعيد عنها ..نفخ وحرك رأسه ويده على رقبته ...خذا نفس ورجع شافلها ..وقرب كم خطوة
نوح : بنمشي دارين توا ..أكيد عندك شغل ومانبيش انعطلك ..بس خلي في بالك لعشية ضروري انشوفك ..عندي كلام هلبا بنقوله لك
دارين نزلت من على الطاولة وتلبس في وشاحها وتسأل بخوف : وين بتمشي 🥺
نوح هز راسه وقرب منها شد اكتافها : قاعد ماتخافيش ..عندي كم حاجة بنديرها ..وبعدين نتغداء ونريح اشويا ...بس لعشية بنتصل بيك ..لاني نبي انشوفك ..تمام ؟؟
دارين : اي ..تمام ..بس ماقتليش وين كنت نوح ؟؟
نوح : بتعرفي كل شي بعدين ..باهي ؟؟
دارين : حاضر
نوح حط يده في جيبه : اي قبل نسيت ..هادا مفتاح سيارتك ..صحيتي دارلتي حل الحق
دارين خذت المفتاح : العفو ...خليها لو مازلت محتاجها
نوح : لا خلاص درت حل ..ماتبيش شي قبل نطلع
دارين : لا شكرا ..خلي بالك من روحك بس
نوح : روحي عندك غزالتي ❤
دارين ابتسمت ..وبتردد : نوح ماتبي شي ..ناقصك شي ..لو تبي فلو. ..
نوح قص عليها : تؤ تؤ تؤ ..رد بالك دارين ماتكمليش ...أني بالسيف خذيت منك السيارة ..على خاطر مانبيش انزعلك مني ...بس بجديات لو تفتحي الموضوع هادا مرة تانية ..بنزعل منك وبنزعلك مني ..فهمتي عليا ؟؟😑
دارين : لا لا خلاص ..مش قصدي والله ..أني كنت نب...
نوح : فاهم وعارف ...خلاص صكري علي الموضوع ..نتصل بيك بعد العصر ؟؟
دارين : تمام
نوح قرب منها باسها على خدها : انخليك توا..بالسلامة
دارين : بالسلامة
فتح نوح الباب وطلع ..والممرضة واقفة على الباب لاخر ..نوح شافلها ونزل ...طلع وقف تاكسي ..وقبل يركب رفع رأسه وشاف دارين واقفة على الروشن ..ابتسم وركب ..والتاكسي طلع
ودارين رجعت لشغلها ..ومودها انقلب 180 درجة ..الابتسامة مافارقتش وجهها بكل ☺️❤
**************
رغد واقفة في المطبخ بعد العصر واطيب في قهوة ..واتهدرز مع دارين ..والاخيرة قاعدة تحكيلها على جيت نوح ..وأن عندها معاه موعد بعد اشويا ..هدرزن اشويا وصكرت رغد المكالمة
خذت البكرج اتصب في القهوة ..وفونها رن ..شافته وهزت رأسها مش عاجبها ردت : نعم 😑
رضا : هاي ماي سستر بيوتفل 😁
رغد : هايات ...شن تبي رضا ؟؟ 😑
رضا : خيرك شايطة الزح ...خاطري مرة نتصل بيك تتكلمي زي الناس 😒
رغد : لاني نعرف ماتتصلش بيا الا اذا كان عندك مصلحة تبيها مني ..لذلك لاخص وجيب من لاخر شن تبي 😑
رضا : مرض يرفعك ..وأنتي اللسانك زي السم ..وينها أمي .نتصل بيها خارج التغطية من بكري
رغد : عمك المهدي عنده عزومة رجالة في المزرعة ..وأمك لاهية في العشي غادي
رضا : وأنتي خيرك مش معاها ؟؟
رغد : شن نبي امعاها ..ع اساس بنطيب والا بنساعدها ..امعاها البنات يساعدوا فيها ..وبعدين أني مليت من عزائم المهدي ..وضنا توضي بيهم 😤
رضا يضحك : 😂😂😂
رغد : والنبي علاش تضحك بس 😒 ..شن تبي رضا بنصكر راه ؟؟
رضا : بنسألك امتى بتجي لتونس ..ماعندكش رحلة اليومين هادو ؟؟
رغد : علاش ..شن تبي ؟؟
رضا : نبي اشوية مقيريضات ..على شوية عبمبر ..على شوية عصيبنات ..من ديات أمي 😋
رغد : هادا شنو 😒 قاعد تتوحم حضرتك ؟؟
رضا : وربي مستاحش ماكلة أمي معدتي وجعتني من المطاعم ..خاطري فيها الزح ..خيرك أنتي ؟؟
رغد : وليش ماتنزل لليبيا ..من شادك ..تعالى كم يوم منها اتشوف أمك ومنها تسمسم من ماكلتها
رضا : مانقدرش ...زحمة الشغل الفترة هادي ..المهم أنتي بتجي والا لا ؟؟
رغد : عندي رحلة نهاية لاسبوع 😑
رضا : ياعيني عليك ..والنبي ماتنسينيش رغودة ...قاعد نستنى فيك
رغد : ايصير خير ..هيا اقلب وجهك ..قهوتي صقعت وأنت ترغي 😒
رضا : قاعدة تتجكتري ياعنزة ..غير انشوفك بس ..بنوريك 😑
رغد : اوووفه 😤 وصكرت
**********************
دارين نزلت بعد ماقالت لامها تبي تمشي اتشوف بوها واخواتها ...ركبت سيارتها واتصلت بنوح
نوح : نعم
دارين : أني كيف نزلت ..وينك أنتا ؟؟
نوح : قاعد في نهاية شارعكم .من فوق
دارين : تمام ..اشويا وبنجيك
صكرت ..ولعت سيارتها ..ومشت لعند نهاية الشارع ..ادور في نوح بس مش باين ...لعند سمعت صوت كلاكس ..التفتت شافت نوح في سيارة جنبها
دارين اتشوفله ومستغربة ..ونوح ابتسم وقرب السيارة ..ونزل جاءها من الروشن : سلاام
دارين : اهلين ...شني اجرت سيارة ؟؟
نوح : لا شريتها ...شن رائك فيها ؟؟
دارين : حلوة ماشالله عليها ...مبروك
نوح : يبارك فيك ...شنو تبي تمشي لحوش بوك قبل ؟؟
دارين : اي ..تعرف قلت لامي بنخطم عليهم . وحتى ليا فترة ماشفتهم ☺️
نوح : تمام ...أني وراءك ..بنوصلك ونستنأك تتطلعي
دارين : باهي ..تمام
رد نوح وركب سيارته ...وطلعت دارين ..ونوح في جرتها ...كل مرة في الطريق يخطموا على بعض ..ونوح يعاكس فيها ..وهيا تضحك ...وبعدين ..قعدوا يتسابقوا ..مرة هيا تسبقه ومرة هوا ...لعند وقفوا على إشارة مرور ..دارين قدام ونوح ورءاها ..وفي سيارة فيها شابين جنب سيارة دارين ...مولعين مسجل ...فتحوا الروشن ويشوفوا لدارين ..وكله تحت اعيون نوح 😡😤
دارين اتشوف في نوح في مراية السيارة وهو يفنص فيهم 😡 ..وتدعي امتى تفتح الإشارة بسرعة 😣
قبل ماتفتح بشويا ...واحد من الشباب عزق رقمه في سيارة دارين ...فتحت الإشارة ...والسيارت طلعوا ...ودارين تمشي واتشوف لسيارة نوح
نوح طلع يجري قدامها ...ودارين تلحق فيه ..وهو في جرت سيارة الشباب ...قص عليهم الطريق ونزل عليهم ...دارين وقفت سيارتها ..واتبحت في نوح يتناقش مع الشاب اللي يسوق ..ويهزب 😡😤
ونزلوا الشباب ..ونوح يتعارك امعاهم ..مسك واحد وضربه ..ولاخر هاجم عليه ...وقفن سيارت تانية ونزلوا ايفكوا بينهم ..لعند ركبوا كل واحد في سيارته ...ونوح معصب ...خطم على سيارة دارين شاورلها عشان تلحقه وطلع ...ودارين ترعش ومشت وراءه 😨
اتصل بيها معصب وقاللها بسرعة على حوش بوك ..وهوا يمشي وراءها ...وصلت دارين ونوح وقف سيارته بعيد ..وقمعز يستنى فيها
دارين خشت عند بوها ..لكن عقلها عند نوح ...سلمت عليهم ..وقمعزت اتهدرز امعاهم ...بوها مش قاعد ...قمعزت قريب ساعة الا ..وبعدين طلعت ...ولاقت نوح مازال واقف برا بسيارته
طلعت بسيارتها ..ونوح طلع بعدها ...لعند وصلوا لكافي صغير ..نزلت دارين ونوح نزل وجاء يمشي جنبها ..خشت قدامه وهوا وراءها ...وبعدين حست بيد نوح على رقبتها من لاوراء ...حط شعرها اللي طالع ودارين مش منتبها في دبشها
وقرب منها معصب : اخر مرة انشوفه برا النم هادا فاهمة ...والا المرة الجاية بنلبسك خمار راه 😤
دارين اتسقم في وشاحها وسكتت خايفة منه 😣
خشوا قمعزوا ..مقابل بعض ..ونوح طلع فونه ومفتاح السيارة حطهم قدامه ..وقالب وجهه معصب 😑
دارين : خلاص نوح ..وربي مش قصدي ..طلع ابروحه 🥺
نوح قرب منها من عند الطاولة : ظفريه وضميه في لبسك مرة تانية ..مانبيش حد ايشوفه 😡
دارين : باهي خلاص ..أخرة مرة
نوح : والفرخ هادا متاع البي أم ..شن كان ايقولك 😡
دارين : مانعرفش نوح ..ماسمعتاش
نوح : صكريه المرش لاخر مرة تانية ..علاش فاتحتيه 😤
دارين طبست شوره وتحكي بصوت واطي : باهي خلاص يسمعوا فيك الناس نوح
نوح عض على فمه وصبا ..سحب كرسيه ولاصق في كرسي دارين وقمعز جنبها : خليهم يسمعوا ..شن دخلهم ..قاعد نتعارك مع مرتي
دارين : امممم ..بس مازالت مش مرتك 😏
نوح : بتولي مرتي قريب ..وبنصكر عليك ومعاش بنخلي حد غيري ايشوفك 😑
دارين ضحكت : جديات بتصكر عليا 😂
نوح قرب منها ويشوف لعيونها : مش لدرجة هادي عاد ..بس لو عليا مانبيش اي ذكر ايشوفك ..يركبوني لجنون لما انشوف واحد يشبحلك او يحاول يقرب منك
دارين : اي ..بس يا نوح حاول تهدأ اشويا ..مش معقولة اي حد بيضايقني بتنزل تضربه
نوح : وبنكسر رأسه ورجليه ...املا بنوقف نتفرج عليه 😤
دارين تبي تتكلم ..لكن جاءهم شاب ايشوف شن يشربوا سكتت ...طلبوا عصير ..وكريب
دارين بعد عدا الشاب بحتت في نوح : نوح أني انخاف عليك ..حاول تبعد عن المشاكل 🥺
نوح : ماتخافيش عليا ...عارف روحي شن اندير
دارين : بس مش كل شي ينحل بالعنف
نوح قرب وجهه منها : قصدك أني عنيف ؟؟
دارين انحرجت منه : مش عارفة ..هكي حسيت
نوح عض على فمه وابتسم ..شد يدها من تحت الطاولة ..وقرب أكثر : اي صاح أني عنيف وأنحب اندير كل شي بعنف ...مش بس المشاكل 😉
دارين سحبت يدها منه 😳😳😳 وجهها سخن وتما الوان ..نوح ضحك ورد قمعز كويس ..وهيا طبست ترجف ومعاش قدرت اتبحت فيه 😣 ..وهو مرة مرة ايشوفلها ويبتسم ..عجباته كيف فهمت عليه وتحشمت منه 🔥
*************** (( الكاتبة أم ناصر ))
أوس العشية قاعد في صالة الجيم ..ويتمرن على كيس
الملاكمة ..مع خشت وليد ونزار للصالة ...وليد سلم على أوس وحكى امعاه اشويا ومشى ايدرب
أما نزار سلم عليه من بعيد ..وقعد يتمرن ..بس فكره مع أوس ..نزار حاس أن أوس ايحاول ياخذ منه رغد ..وقرر ايحارب عليها 🔥
أوس يضرب في الكيس ..وجسمه وجهه كله عرق ..ونزار جاء وقف قدامه : مازلت مطول ؟؟
أوس يضرب في الكيس وماردش عليه 😑
نزار لابس قفازاته ..وقرب شد الكيس باعده عن أوس 😏
أوس وقف ونفسه مقطوع : شن قاعد ادير نزار ؟؟
نزار : نبيه ..من وقت وهوا معاك ..حتى أني عندي فيه حق
أوس يمسح في وجهه بظهر ذراعه : على شنو تحكي أنت ؟؟
نزار برم وجاء قدام الكيس : ندوي على الكيس ..ليش في شي تاني حاصل بينا 😏
أوس بدأ يفهم عليه ..أبتسم وقرب خطوة : خيرك نزار ..من يومين وكلامك غريب ؟؟
نزار : ممكن لاني نتصل بيك وماتردش عليا ؟؟
أوس : مرة وحدة مارديتش عليك ..كنت مش فاضي 😑
نزار : مش فاضي لانك تهدرز مع رغد 😡
أوس : اي ..هدرزت امعاها ..ليش عندك مانع ؟؟
نزار : لا ماعنديش مانع توا ..ولو عندي مانع في المستقبل حنطلب من رغد ماتشوفكش عادي
أوس : وزعما رغد بتوافق ؟؟😏
نزار تحرك بوضعية هجوم وبدأ يقرب من أوس : توافق ليش لا ..مش بنكون خطيبها ...تعالا أوس وريني شن تعلمت عن جديد
أوس وخر لاوراء : مش خاطري نضرب حد اليوم ..خليها مرة تانية نزار
نزار قرب وضرب بيده جنب وجهه أوس : بس أني خاطري نضرب ..والا ماتبيش اتواجهني يا فندي
أوس بلد الضربة بسرعة ..وبدأ يتحرك ومستعد لهجوم نزار : ايه ..نواجهك ..انحب انشوف تدريبي امعاك لعند وين وصل
نزار شد الكيس : هادا ليا اني معاش نبيك تقرب منه
أوس بشك : قصدك الكيس ..والا تقصد شي تاني ؟؟
نزار تحرك بسرعة وهجم واوس يتجنب في ضربه : اي الكيس ..لان أي شي تاني ايخصني ماتقدرتش اتقرب منه 😡
أوس : اي لما ايكون ايخصك ...بس أني سبقتك عليه 😏
نزار : صاح ..بس أنت ماكنتش تعرف قيمته ..الا بعد قربت اني منه 😡
أوس ابتسم : مازلنا نحكوا على الكيس والا لا ؟؟
نزار يقرب ويضرب : اي الكيس ..ليش انتا قصدك شي تاني 😏
أوس ايتحرك في مكانه مستعد لاي ضربه من نزار : لا قصدي على الكيس ..لان اي شي تاني في حياتي ..بيكون ملكي ومانحبش حد يقرب منه حتى بالكلام 😏
نزار : ملكك من وين ...مافيش شي ملكك..راك واهم ..وأني بنأخذه منك وأنت بترضى غصبا عنك 😡
أوس تحرك بسرعة وبلد البوكس من نزار ..ورد بسرعة ضربه على وجهه لعند طاح على ظهره 😤
أوس مشى كم خطوة ...ورد قرب من نزار مد يده : ماحد يقدر ياخذ مني شي غصبا عني ...وخاصةً لو شي ليا أنا بالاساس ومن حقي أني بس 😏
نزار مد يده وشد معصم أوس : تؤ ..ماعادش من حقك ..حقك فات من زمان 😏
وسحبه نزار طاح عليه ..ولاثنين قعدوا يتعاركوا ويتضاربوا 🤦♀️ 🔥🔥
**********************
نوح شد يد دارين وطلعوا من الكافي ...ركبوا في سيارة نوح وطلعوا مع بعض ...مشوا لعند مكان بعيد شويا ...نزلوا عند حوش ..نوح فتح باب الحوش وخشوا مع بعض ...الحوش فاضي مافيش اي أثاث ..الا حاجات قديمة
دارين اتفرج على المكان : لوين جبتني نوح ...لمن الحوش هادا ؟؟
نوح : هادا حوش أجرته لفترة شهر او شهرين ...عشان أميمتي وأخواتي بيجوا يقعدوا فيه
دارين : ليش أنتا شفتهم ؟؟ 😰
نوح قرب منها : دارين أني نبي نحكيلك كل شي عن حياتي ..ونبيك تعرفي وين مشيت وشن درت
دارين : نسمع فيك تكلم
نوح خذها من يدها ...وقمعزوا على شلاتيت على الارض ..وقرب منها : دارين أني من بعد الله معادش عندي حد الا أنتي وأهلي ...ولما طلعت من السجن ..كان لازم انشوفهم ..وهادا علاش اختفيت يومين
تنهد ورد يحكي : مشيت وأني خايف ومش عارف شن مستنيني ..أني عندي معلومات انهم بخير كلهم ..والبنات في منهم اللي تزوجت ..ومازال اثنين مع أمي ...بس أني انشوف أمي بعد المدة هادي كلها وهيا ماتعرفش عني شي ..كان أمر صعب دارين
دارين تسمع واتبحت في اعيونه .🥺
نوح تنهد بقوة وقعد يحكي لدارين شن صار أمعاه 👇
نوح وصل للحوش اهله الصبح بدري ...كان معاه نسخة من المفتاح ..بس مش عارف اذا كانت مازلت تنفع بعد سنتين ...بس الغريب كانت تشتغل ...فتح الباب وخش ...الحوش هادي ...بس ريحة الفطور والخبزة ..خلت نوح يعرف أن أمه نايضة ...قرب لعند المطبخ مافيش حد ...قرب من دار المعيشة ..وشاف أمه مقمعزة وادير في سندويتشات
صبا على الباب ايشوفلها ...وعمتكن هنية مازال ماتشوفش فيه ..لعند حست بحد واقف ..رفعت وجهها ..وأنصدمت 😰😰
نوح عض على فمه ..وأعيونه معبيات ادموع ...وأمه من الصدمة تبي اتصبي بس رجليها انشلوا ...وحتى صوتها راح 💔😭
نوح قرب بسرعة ..ونزل عند رجليها ..وضمها بقوة ...وهيا ضماته وتبكي ...والاثنين يبكوا ...وهنية مش مصدقة ..ولدها اللي اختفى من سنتين رجع ..وقاعد في حضنها 😭
هنية اتبوس فيه في وجه وايديه ..وتضم فيه وتبكي ..ونوح نزل ايبوس في ايديها : سامحيني يأم ..بالله عليك سامحيني ياغالية 😭
هنية يدها في شعر نوح ..ونزلت اتبوس في رأسه : وينك يا أمي يا حبيبي ..قطعت قلبي عليك وركبني المرض وأني انخمم فيك ..وينك يانوح ..ليه خليتنا بالله عليك ياوليدي ليه ؟؟😭😭
نوح رفع وجهه وادموعه ينزلوا : غصبا عني يأم ..والله العظيم ..ماكان عندي نية نبعد عنكم حتى يوم ..وربي كنت أنموت الف مرة في اليوم على شوفتك يأم 💔
نسمة ناضت على صوت نوح وأمها ...صبت من سريرها وخشت بالشويا ..ولما شافت نوح مع أمها عيطت بقوة واعيونها دمعوا 😰
نوح اتلفت على صوت أخته ..صبا ..ونسمة جت تجري وضماته وهيا تبكي 😭😭
سلمت عليه وهيا منصدمة ومش مصدقة ..ومشت تجري اتنوض في خواتها ....والحوش كله ناض ..وماشالله خوات نوح خمسة ..وفي منهم ثلاثة متجوزات أثنين من قبل ..وحدة في غيبة نوح ..وعندهم صغار ...وكلهم جاوءا ايسلموا عليه ويضموا فيه ..والدنيا كلها تبكي ..وزغاريت ..وضحك مخلط بالبكي 😭😂
ونوح كان ايشوف لامه وخواته ..وكان في حتى وجوه جديدة نوح اول مرة ايشوفها 👼👼
وبعد هالاستقبال ..قمعز نوح في وسطهم ..يحكيلهم وين كان وشن صار امعاه من الاول
دارين تسمع فيه وهوا يحكي ..واعيونه فيهم لمعة من دمعة ماتبيش تنزل ...وبعدين قربت منه وضماته ..ونوح مسح وجهه وخرها عنه : عرفتي ليش غبت عنك توا
دارين هزت رأسها
نوح : الحوش هادا نبيه عشان بيجوا كم يوم اهني ..لاني ماقدرتش نقعد بحداهم وانخليك ...نبي نمشي انجيبهم يستقروا فترة اهني ..لعند انحل اموري كلها
دارين : اي هكي افضل ..اتكون جنبي ..وفي نفس الوقت جنب أهلك
نوح : اي الفترة هادي بس ..لانك بعدها بتمشي امعايا وبتكوني وين ما أنا انكون
دارين : وأني مانبيش شي غير انكون جنبك بس
نوح ضمها من اكتافها : قريب إن شالله ...عطيني اشويا وقت ..لعند نستقر ويستقروا أهلي ..وبعدين كل شي زي ماتبي
دارين : على مهلك مش مستعجلة ☺️
نوح : بس أني مستعجل 😉
دارين ضحكت وصبت : اي إن شالله عتبة خير عليكم ...أمتى بيجوا أمك واخواتك
نوح : يومين او ثلاثة وبنمشي انجيبهم
دارين : بس الحوش يبي تنظيف كله غبرة
نوح : اي نعرف ...بنجيب شركة تنظيف ..قبل مانمشي
دارين قربت منه : نوح ممكن نسألك سؤال 🥺
نوح حط يده على خدها : نعم غزالتي أسألي اللي تبيه
دارين : من وين لفلوس اللي تصرف بيهم ...أني مانعرفش عنك الا اللي أنتا اتقول فيه
نوح : أني فاهم أنه من حقك تعرفي كل شي عني ...بس أطمني كل يوم تتعرفي عليا وبأذن الله بتعرفي كل شي ..لكن خليني انعرفك عليا وحدة وحدة ..باهي ؟؟
دارين : باهي ...أني لاني خايفة عليك بس . ..مش لشي تاني 🥺
نوح خذاها بين ايديه : عارف دكتورة قلبي ..وأطمني مافيش خوف تاني ..بنعيش حياتي أمعاك وليك بس ❤
دارين : ☺️☺️
نوح تنهد : نمشوا ؟؟
دارين : اي تاخرت على أمي
نوح : هيا ..املا ..بنزلك على سيارتك وعندي كم شغلة
دارين : تمام
طلعوا ونوح صكر الحوش ..ركبوا السيارة ...مشوا لعند الكافي نزلت دارين ركبت سيارتها ..ونوح وراءها بسيارته لعند وصلها للشقة ..وبعدها مشى
دارين روحت للحوش غسلت وصلت المغرب ..وقمعزت اتهدرز مع أمها في المطبخ اطيب في عشي
ثاني يوم دارين ناضت وفطرت ..كانت عطلتها ..ضمت الشقة ..وقمعزت اتشوف لفونها ..دق باب الشقة ..صبت تفتح وهيا مستغربة من جايهم على وقت الغداء
فتحت الباب لاقاته بوها 😳 : اهلين ..شن اخبارك
نجيب خش وماردتش عليها ..واضح أنه معصب 😡😤
دارين صكرت الباب وخشت ورءاه : غريب شن جابك الوقت هادا ؟؟
نجيب التفت على بنته : تعرفي حد أسمه نوح الحاج 😡
دارين : 😰😰
*******نهاية الحلقة #16