#السجين_777
#الحلقة_18
دارين ثالث يوم ناضت شافت فونها مافيش مكالمات ..وينك نوح وينك 😭 ..افتحت على الرسائل لاقاته مستلمهم بس ماردش عليها 😳
افرحت عشان فتح الفون ...واتصلت بيه بسرعة ..يضرب وقلبها يبي يوقف ...انفتح الخط
دارين : الو ...نوح 🥺
ردت بنت تضحك : ههههه ..ايوا ...من امعايا
دارين : 😰 من أنتي ؟!!
البنت : خطيبة نوح ..من امعايا 😂
دارين : خطيبة نوح 😰
نهى تنغز في نسمة : بطلي ..وربي نوح ينصب مشنقتك كان يسمعك 😡
نسمة تضحك : اسمعي ..اسمعي ..أنبصر عليك ..أني نسمة أخت نوح 😂
دارين رجعلها النفس ..وتنهدت : ااءء ..اهلين 😅
نهى : تي هيا ...وحق ربي لو شدك أني مش شوري راه
نسمة : غير اصبري ياخرا ...قاعدة نتكلم ..ايوا ..أنتي دارين ؟
دارين انحرجت ..يعني نوح حكى لاهله عليا 🙈
نسمة : الو ...دارين وينك ؟
دارين : ايوا امعاك ...شن اخباركم ؟؟
نسمة : بخير الحمدالله ..كيف حالك أنتي ؟؟
دارين : تمام ..شن اخبار نوح 🥺
نسمة : قاعد مازال راقد ...خنبت منه التليفون 😂 ..حي عليا وكان ينوض 😁
نهى ترعش تسمع في صوت نوح : حي عليك ..حي عليك ...نوح ناض ..وربي مالياش دخل بيك ..منك أنتي
وهربت جوا ..خبطت في نوح طالع : خيرك تجري النم .. شوفي قدامك 😡
نهى خشت بسرعة ..ونسمة قعدت ترجف ..وتلخبطت 😣
دارين : الو ...نسمة ..الو
نسمة مبتسمة وترعش خايفة من نوح ..يمشي شورها ..مدتله الفون ..ونوح مفنص فيها
نوح : هاتي البلاي اهني ..من قالك خوديه ؟؟😡
دارين سمعت صوته 😣
نسمة مدت الفون : قاعد يشرين من بكري ..وأنت ماتبيش اترد
نوح خذا الفون منها معصب : بطلي حركات نسمة ..أمتى بتكبري وتعقلي 😤
نسمة : مانبيش نكبر .......وخشت بسرعة وخلاته 😁
نوح هز رأسه ..وشاف لفونه ..رفعه وحطه على وذنه : الو 😑
دارين : صباح الخير 🥺
نوح : صباح النور ..شن اخبارك ؟؟
دارين : هكي نوح تصكر فونك يومين ..لاتسأل عليا ولا اتكلمني ..كيف هنت عليك بس 😥
نوح تنهد وساكت
دارين : تكلم نوح ليش ساكت ؟؟ كيف قدرت تصبر من دوني ..مش كنت اتقول مانقدرش نقعد من غيرك ..مانتحملش بعدك عني 😭
نوح حط يده في شعره : اصبري اشويا انخش داخل بس
ومشى لعند خش داره وصكرها ..وقمعز على سريره : الو
دارين : نعم 🥺
نوح : دارين أنتي متخيلة أني قاعد اموري تمام والحياة ماشية ومش معبر شي ؟؟ متخيلة أني ناكل ونشرب ونرقد عادي ومش ناقصني شي ..بربك مقتنعة بالكلام هادا ؟؟
دارين : باهي ليش ادير فيك وفيا هكي ؟؟
نوح : لان هادا نوح وهادا تفكيره ..وهادا دماغه لمصكر ..دارين أني من لاول قايلك طبعي معفن وصعب تتعودي عليا ..مانحبش حد يهددني او يساومني او يفرض عليا اي شي ..أنتي أتحبي نوح هكي اما لا ؟؟
دارين سكتت 😥
نوح : تكلمي ..قولي ..أتحبيني زي ما أني والا لا؟؟
دارين : اي أنحبك وراضية بيك زي ما أنت ...بس نوح احني مازلنا في البداية ومازلنا نتعرفوا على بعض ..عطيني شوي وقت لعند نتعود عليك ونفهمك بس
نوح تنهد : دارين ..ورب الكعبة أني ابروحي تاعب من الطبع الزفت هادا ..بس شن بندير ..مانتحملش انشوفك مع غيري ..نهبل ودمي يغلي ..من وين طلعلي سي أوس هادا ..أنتي ليا أني وبس مانحبش حد غيري يكلمك او يتحكم فيك او يقرب منك
دارين : باهي فهمت عليك نوح ..بس زي ماقتلك من قبل أوس زي خويا احني تربينا مع بعض ونعرفه من زمان ..ومافيش داعي اتخاف من ناحيته
نوح : تمام حصل خير ..خلاص فوتيها السيرة هادي ..شن قاعدة اديري توا ؟؟
دارين : شي ..توا كيف نضت ..اتصلت بيك طول
نوح : وحتى أني كيف نضت ..معناها شوفي ..بنطلع نغسل وانفطر ..وبنعاود نتصل بيك
دارين : تمام ..حتى أنا بنصبي توا ...نستنى فيك
نوح : هيا سلام توا
دارين : سلام
صكر نوح ..وصبا طلع ..غسل وصلى ..وخش على أمه المطبخ : صباح الخير يأم
هنية : نضت اوليدي ..ياصباح الخيرات
نوح ابتسم ويشوف على الغاز : شني مافيش قهوة ؟؟
هنية : في قهيوة وفي كل شي .توا بنديرلك سفرة فطور ..أكيد جيعان ..شفتك ماتعشيتش اكويس امبارح
نوح : كيف عاد ماهو تعشيت امع نسباتي
هنية : اي شفتك لقمتين وخلاص ...عدي سلم ولدي قمعز واني اشويا وبنجيبلك فطورك
نوح : وينهم الفرخات نسمة ونهى ..خيرهم مايساعدوك ؟؟😑
هنية : قاعدات ايظموا في الحوش ..ويجهزوا في شناطيهم وحاجاتهم
نوح : توا خطر عليهم ..من أمس وهما ينقرزو ...والصبح عند رأسي ماخلونيش نرقد 😑
هنية تضحك : خواتك مستاحشينك نوح ..ليهم فترة طويلة عليك ..ماصدقوا شافوك
نوح ابتسم وقرب من أمه بأس رأسها : وحتى أني اساحشتكم هلبا يأم ..ربي يخليكم ليا
هنية : ويخليك لينا ومايحرمنا منك
نوح : إن شالله ...وطلع من المطبخ .. ينادي على نهى
جاته بسرعة : نعم
نوح : شوفي أمك ..ماتخلوهاش اتحوس في المطبخ وحدها ..ماتقعديش اتبعي في المهبولة نسمة وهيا غير تضحك وخلاص 😑
نهى : حاضر ...انديرلك فطور
نوح : قاعدة أمي اتجهز فيه ..ساعديها
ومشى قمعز في دار المعيشة ..ورن على دارين
دارين كانت مقمعزة وتفطر جنب أمها ..انسحبت بالشويا وخشت لدارها : الو
نوح : فطرتي ؟؟
دارين : أي الحمدالله ..وأنتا ؟
نوح : قاعد نستنى فيه ..شن بنقولك ؟
دارين : نعم
نوح : اليوم بعد الغدي ..طالعين أني والعيئلة امروحين
دارين : والله 😍
نوح : اي ..بس أنتي عارفة الطريق طويلة ..وفي امعانا بضاعتهم وشناطيهم ..وحاجات تانية ..يعني أمأجر سيارة تشيلهم ..أكيد بنعطلوا ونوصلوا الليل متأخر ..مرات مانحصلش حتى نتصل بيك
دارين : مش مشكلة ..المهم توصلوا بالسلامة
نوح : يسلمك ..اييه ..شن قالتك الفرخة نسمة لما ردت عليك ؟؟ ..عارفها اللسانها طويل
دارين : ماقالت شي ..عادي ..بس حسيتها دمها خفيف وجوها حلو ☺️
نوح : ماتبيش تكبر وتعقل ..قلت بعد سنتين أكيد بنلقاها تغيرت ودارت عقل .. شي ..زايدة في لاهبال
دارين : حرام عليك ..خليها ..توا تهدأ مازلت صغيرة
نهى خشت بسفرة الفطور : بتفطر اهني
نوح : احمم ...اي تعالي حطيها
نهى نزلت سفرة الفطور .وطلعت
دارين تسمع فيهم : من هادي نسمة ؟؟
نوح : لا هادي نهى ..عكس نسمة تماما
دارين : ربي يخليهم ليك ...انخليك تفطر ؟؟
نوح : لا نبي ندوي امعاك ماتصكريش
دارين : باهي
نوح : دارين أني كلمت أمي عليك ..وحكيتلها كل شي
دارين : صاح 😣 وشن قالت ؟؟
نوح : شن تبي اتقول ؟؟ مش عاطيه فرحتها لاحد أكيد ..وين تبي تلقى كيفك غزالتي ؟
دارين انحرجت : حتي أني بنحاول انكلم أمي عليك اليوم وإن شالله تقتنع
نوح : ماتخافيش أنتي ليا ..وأني بندير كل شي عشان أتكوني مرتي في اقرب وقت
دارين : يارب 🥺
***************(( الكاتبة أم ناصر ))
دارين العصر طيبت قهوة وجابت نوع حلو ..وقمعزت جنب أمها اتفرج على التلفزيون ..عطاتها قهوة
صباح خذت منها : سلم بنتي
دارين : سلمك
وقعدت دارين تفتح كل مرة في سيرة خدمتها في عيادة السجن ..لعند وصلت لقصة نوح ...وقعدت تحكي لامها عليه ..وكيف انحبس ظلم سنتين وهكي ..لعند قالتلها كل شي
صباح : ربي مايسيب حق حد ...مسكينة اميمته أكيد كانت مشغولة عليه
دارين : ايه ..لانها ماتعرفش حتى وين كان
صباح : الستر يابتي ..ياخذوه من غير حتى ما اهله يندروا عنه ..الناس اختشت والا كيف ؟؟
دارين : اي ...المهم هوا طلع براءة ..ورجع لاهله وحوشه وحياته
صباح : باهي اللي ربي طمن قلب أمه عليه المسكينة
دارين من بدري وهيا تهرب من اللحظة هذه ..بس خلاص لازم تحكي 😣
دارين : أمي أني حكيتلك قصة نوح ..لاني نعرفه ويعرفني
صباح : ماهو قلتي كنتي تعالجي فيه في العيادة ..أكيد تعرفيه ويعرفك
دارين : ماااءء ..مش قصدي هكي ..قصدي ..توا ..بعد طلع من السجن ..مازلت انشوف فيه 😣
صباح نزلت فنجان القهوة : كيف كيف ...من هوا اللي اتشوفي فيه ؟؟
دارين : نوح يا أمي 🥺
صباح : واتشوفي فيه على اي أساس ؟؟!!
دارين : نوح ااءء ..طلبني من بوي ..ويبي يتزوجني
صباح : شنو ؟!! يتزوج من عمى في عينه 😡
دارين : بعيد الشر عليه ..ليش اتقولي هكي يأم ..شن فيها ؟؟
صباح : فيها ويما فيها ..مازال والله ..أني نعطي بنتي لخريج حبوس 😤
دارين : وشن فيها ..وبعدين نوح طلع براءة وماعليه شي
صباح : مانعرفش أني ..مستحيل الكلام هادا ...وبوك شن قال ها ؟؟ ...ريته أني جاء أهني يومتها ..حتى أني استغربت جيته
دارين : بوي قال نفس كلامك ...بس أني نبيه نوح ..وموافقة عليه
صباح : تبيه عنيك ..شن ناقصك أنتي عشان تاخذيه ..مئة واحد يتمنأك
دارين : بس أني مانبيش حد غير نوح ...توا مش حكيتلك قصته وكيف صار امعاه ..مش وجعك كيف ظلموه ..علاش حتى أنتم تبوا تظلموه 😥
صباح : مانبي نظلم حد ..لكن الدوة هادي شيليها من بالك نهائي ..لاني مستحيل انوافق عليه 😑
دارين صبت : أني طول عمري نسمع في كلامكم وعمري ماكسرتلكم كلمة ...عمري ماغلطت ولا درت شي من غير شوركم ..ديما كنت لاهية في دراستي ..وتوا في خدمتي ...بس أني نبي نوح ومستحيل انفكر في غيره ..ومستحيل نتزوج راجل تاني 😭
وخشت دارين لدارها وصكرت الباب ..وطاحت على سريرها تبكي 😭 مشكلة كيف تبي اتحلها ..أمها من جيهة وبوها من الجيهة الثانية
**********************
نوح واهله وصلوا الساعة 11 ونص ..فتح الحوش ..وبدوا اينزلوا في دبشهم هوا وصاحب السيارة الكبيرة ...كملوا ..خلص الراجل أجار السيارة ..وخش صكر الباب
لاقى أمه والبنات يتفرجوا على الحوش ..وهوا كان شاري كم قطعة أثاث ..يعني فرش وفرشات وهكي
نوح : شنو يأم ..تمام ؟؟
هنية : اي ماشالله ..مليح الله يربحك
نوح شاف لخواته : الليلة ليل ..ماتقربوش شيى. ..فرشوا وحدة من الديار اترقدو فيها ..وغدوة الصبح اتكملوا الباقي
نسمة : اي ..إحسن ماعنديش نية اندير شي 😁
نوح شافلها وهز رأسه : أمتى كانت عندك نية اديري شي ..طول عمرك خميرة نوم 😑
نسمة : مافيش خير من النوم 😁
نوح قلب اعيونه وتلفت لامه : يأم أني قاعد برا ..نظموا أموركم ..وشوفوا شن ناقصكم غدوة انجيبهولكم
هنية : ماتمشيش بعيد ليل ..خليك قريب سلم ولدي
نوح : قاعد في السيارة ..ماعنديش وين نمشي
طلع نوح وركب سيارته ...اتصل بدارين ..رنة وحدة بس خاف اتكون راقدة ...بس هيا كانت قاعدة في سريرها ضامه تيشرت نوح وتبكي ..حتى العشاء ماتعشت 💔
دارين ردت اتصلت بيه رد عليها : الو
دارين : ايوا 🥺
نوح : درت رنة بس ..خفت اتكوني راقدة مانبيش انوضك
دارين مخنوقة : لا مش راقدة ..مازلت نايضة 😥 وصلتوا ؟؟
نوح : توا كيف وصلنا ..يادوب نزلنا ابضاعتنا وخليتهم ايشوفوا الحوش ..وقلت نتصل بيك
دارين : الحمدالله على السلامة
نوح : الله يسلمك ..خيرك غزالتي فيك شي ..صوتك ماعجبنيش
دارين غصت : مافيا شي ..متضايقة اشويا بس 😥
نوح : شنو مضايقك ..قولي ماتخليش بالي مشغول عليك
دارين : قتلك مافي شي نوح 🥺
نوح غمض اعيونه وتنهد : اتكلمتي مع أمك صاح والا لا ؟؟
دارين سكتت وادموعها نزلوا 😭
نوح : بالله عليك ماتبكيش ..وغلاوتي عندك ماتبكي ..اسكتي دارين
دارين : 😭😭
نوح : ورب الكعبة لو كانك ماتسكتي ماندرس سيارتي الا قدام شقتكم
دارين تمسح في ادموعها : خلاص والله خلاص سكتت🥺
نوح : علاش تبكي نبي نفهم ..شن قتلك أني ..أنتي ليا ومستحيل اتكوني لغيري ..وديني ومانعبد ماهوا زافك راجل غيري لو كان هادا أخر شي بنديره في حياتي
دارين : ليش اتقول هكي ..بعيد الشر عليك
نوح : ورأس أمك ماعاد اتفكري في الموضوع هادا ولا تخممي فيه ..خليها عليا ..نعرف كيف انخليهم ايوافقوا
دارين : شن تبي ادير ؟؟
نوح : مش شورك أنتي ...فوتي....المهم ..وربي استاحشتك يابت ..ليا كم يوم ماشفتك ..غدوة ضروري نتلاقوا
دارين : اي أكيد ..حتى أني نبي انشوفك ❤
******************(( الكاتبة أم ناصر ))
قبل ثلاث ايام 👇
رغد حايسة في دارها وتتصل بي دارين : وينك أنتي 😡
دارين : هيا قريب نوصل في الطريق
رغد : بسرعة ياهمي ..الناس قريب ايجوا
دارين : هيا والله قريب نوصل
دارين وقفت سيارتها قدام حوش هل رغد ونزلت هيا وأمها ..خشن وصباح قعدت مع أم رغد ...ودارين خشت على رغد لاقتها امطلع نص دبشها على السرير وقاعدة حايسة في وسطه
دارين منصدمة : هادا شنو ؟ 😳
رغد : علاش اتفنصي تعالي ساعديني ..قريب ننجلط
دارين نزلت شنطتها وقربت منها : ليش الحوسة هادي كلها ..البسي القفطان اللي وريتيهولي أمس
رغد : قصدك بجد حلو ..يعني مانشوفش غيره ؟؟ 😣
دارين : اي حلو ..وبعدين القالب غالب اي شي تلبسيه بيجي عليك حلو ☺️
رغد تعزق في الدبش وراءها ادور في كندرتها : غير تعالي شوفي الخرا وين راحت بلا دوة زايدة
دارين : ياباردة ياتافهة اخسارة فيك أصلا 😒
رغد : دودي بطني اتوجع فيا وخايفة ..زعما عادي ..والا نزار دايرلي بسبوسة 🥺
دارين قمعزت جنبها تضحك : عطك الخير 😂😂 أهدي حبيبتي هادا كله من التوتر ..عادي حاجة طبيعية
رغد تهندت : اي صاح لازم نهدأ 😣
دارين مسكت يدها : رغد أنتي متأكدة انك موافقة على نزار ..مش ردة فعل على موقف أوس ؟؟
رغد اعيونها دمعوا : والله مش عارفة ...بس كل مانفكر هادا الحل الوحيد ..نبي انعيش حياتي ونبعد عن أوس ..لعند أمتى وأنا نستنى فيه وهوا مش حاس بيا بكل ..ونزار شاب اكويس ويحبني ..شن نبي أكتر من هكي 🥺
دارين : أنتي ادرى بمصلحتك ..بس أني خايفة منك اتكوني منفعلة توا ..وبعدين تندمي
رغد : ياخية فوتي ..شن يبي ايصير يعني ..هيا ساعديني عشان نلبس ونجهز نفسي
وصبت اتغير في حوايجها ..ودارين اتلم في باقي الحوسة
رغد واقفة على المراية ..وتشوف لنفسها : وأنتي شن صار امعاك ..مازال امصكر فونه وطافش سي نوح ؟؟
دارين اطبق في الدبش : اششش ماتخطريش عليا ..يقهر ياغودي ...راسه امصكر وقاسي ..وكان قلب وجهه شن ايرضيه بس🥺
رغد اتحط في مكياج : لانه تي🤬 نبي نفهم علاش لما انحبوهم ونكبدوا عليهم ينكلبوا ومعادش ايشوفوا قدامهم ...فوتيه توا ايطب لطريق 😤
دارين : ياريت نقدر ...خايفة ياخد وجهه ومعاش انشوفه 🥺
رغد : اوووفه يابنتي أنتي حالتك ميؤس منها ...دلعي فيه وزيدي تلصقي عليه وهادا وجهي كانهو رضى عليك 😒
دارين تنهدت : يستر الله ...المهم خلينا فيك توا ..شن تبي اتقدمي للناس
رغد : جبت كم نوع ..وماما دارت ااا....
وكملت رغد ودارين هدرزة ولابست رغد وجهزت نفسها ..وجاء نزار جايب هله ..نزلهم وعدا
بس في اعيون حزينة كانت اتراقب من بعيد ...أوس في سيارته ..واقف بعيد في الشارع ...لعند شاف نزار نزل هله ...وبعدين ولع سيارته وطلع 💔
مشى وقعد يبرم في الشوارع ...حايس ومش عارف شن ايدير ...بس هوا معاش في يديه شي ..فرصته ضاعت من زمان ..لما كان امفكر أن رغد تبي تستناه طول عمرها 😥
أوس وقف سيارته في شارع بعيد وفاضي ...حط ايديه على الدومان ونزل رأسه بينهم ..ايفكر ....ارفضي رغد ..ارفضي ..خليك عشاني ..أني نبيك وأنحبك ..ارفضي وأني مستعد انصلح غلطتي وأنجي نعترفلك بحبي ..بربك ماتسيبينيش ...والله ماعندي حد غيرك ...توا كيف عرفت قيمتك في حياتي ..رغد أنا انحبك ...بالله عليك ماتخليني وتمشي 💔
رفع رأسه وتنهد ..طلع فون من درج السيارة ..برقم جديد ..واتصل برغد ..بعد تردد كبير
رغد تبي تطلع على أم نزار وخالته ...رن فونها ..لاقاته رقم غريب ...بس ردت : الو
أوس يسمع وساكت
رغد : ايوا من امعايا ؟؟
أوس ......
رغد : الو ...الو ..اووووفه 😤
أوس ساكت 💔
رغد : قلة أداب ..علاش اترنوا على الناس مادام ماتبوش تتكلموا ضربة في ايديكم 😒
صكرت الخط و أوس ابتسم بحزن : اللسانها طويل ...من يبي يتحملها غيري 💔😥
وطلعت رغد وسلمت عليهن ...وتمت قعدة تعارف زيها زي اي قعدة تعارف ...ومشى الجو تمام ...وأم نزار عجبتها رغد ..وكل شي كان ماشالله ..وتمت الطلبة ..وطبعا أم رغد طلبت وقت لعند تخبر زوجها ..وأخ رغد رضا ..وبعدين ايردوا عليهم
*****************
انردوا للوقت الحالي 👇
نوح الصبح كلم دارين قبل تمشي للعيادة ...وبعدين ركب سيارته ...ومشى لشركة أب دارين وقف سيارته وخش عليه : صباح الخير
نجيب رفع رأسه مستغرب جراءة نوح : صباح النور ..من سمحلك تدخل 😑
نوح قرب وقمعز حط رجل على رجل : سألت برا قالوا ماعندك حد ...وبعدين أكيد مافيش أهم من زوج بنتك عشان تستقبله 😏
نجيب : نبي نعرف من وين اتجيب في الثقة بنفسك وأنتا خريج حب....
نوح قص عليه : الثقة من ربي ..والحمدالله عارف نفسي مافياش عيب عشان نتحشم او انوطي راسي منه ..بالنسبة للسجن هادوم ناس مايخافوش من ربهم ظلموني وظلموا ناس هلبا ..وأني بصراحة مانبيش نظلم نفسي بزيادة ونقعد نتحسر على الماضي ..اللي فات مات واحني اولاد اليوم
نجيب : ليش جاي اهني ...أني المرة لاولى قتلك ماعنديش بنات لزواج 😒
نوح نزل رجله وقرب منه : ليش رافض ..بنتك موافقة ومقتنعة ..علاش اتعامل فيها كأنها بنت صغيرة ومش عارفة مصلحتها وين ..ليش ماتحاول تكسب ودها وتوقف امعاها ولو لمرة وحدة في حياتك ..حاول تقعد امعاها وتفهم شن تبي وشن رائها ..من غير ما تتحكم في حياتها وتقيد حريتها
نجيب وقف : أني بوها ونعرف مصلحتها اكويس ..وأنتا لو داخل لحياتها لانك طامع في فلوسها ورثتها ...فانا مستعد نعطيك اللي تبيه وتطلع من حياتها
نوح : رشوة تاني 😏...ههه تعرف لو تسمع دارين بالكلام هادا ..أني متأكد بتكرهك كره أعمى ..وعمرها ماعاد ترجع تحكي امعاك تاني ..مش ساد اللي صار ايام الجامعة ..مش كل شي ينحل بالفلوس راهو 😤
نجيب قمعز من الصدمة : أنت شن قاعد تحكي ؟😰 اي رشوة واي جامعة 😰
نوح صبا : أنتا عارف وفاهم على شنو ندوي ..دارين نست او اتحاول تنسى اللي صار زمان ..واتحاول ترجع اتحبك من جديد لانك بوها ..واني فهمتها لو مهما صار الظفر عمره مايطلع من اللحم ..وأنتا بوها وأكيد اتحبها غير مش عارف كيف اتعبر عن الشي هادا ...بس نبيك تعرف شي واحد لو بتعطيني كنوز الدنيا كلها مانيش امخلي دارين ..لاني نبيها وشاريها ..وأنتا ياريت اتخلي في حياة بنتك موقف واحد اتقول بوي دار عشاني
وبرم وطلع ...وخلا نجيب حاير في كلامه ...يعني دارين علاقتها قوية بنوح لدرجة هذه مادام قدر ايخليها تفتح قلبها وتحكيله حتى على علاقتها مع بوها والمشاكل اللي بينهم
نوح طلع ومشى للسجن ...كان عنده موعد مع عمي يونس زيارة ...قمعز يستنى فيه ..لعند طلعوا السجناء وكان بينهم عمي يونس
نوح صبا وقرب منه وضمه زين ...وعمي يونس قعد يبكي 💔😭
نوح شده من ايديه وقمعزوا : ليش تبكي ..هادا بدال ماتفرح بشوفتي
عمي يونس : هادوا دموع الفرح ..قبل قلت معاش بنشوفك تاني😥
نوح : عيب وربي مانقدر ..أنتا في مكانة بوي الله يرحمه ..وأني مازلت عندي وعدي لك ..بنطلعك من اهني غير اصبر عليا اشويا بس
عمي يونس : حتى جيتك ليا اهني سادة ..سلم ولدي خلي بالك من روحك وعيش حياتك ..أني مضى فيا اللي مضى ماعندي علاش طالع
نوح : أنتا الخير والبركة ...واني مش حيهنالي بال طول مانتا محبوس ..بنطلعك يعني بنطلعك
عمي يونس : راسك يابس وعنيد ...غير في من نقنع بس
نوح ضحك : تعرفني مانحبش انخلي وعد قطعت على نفسي ..يابال وعد قطعته لك يابوي
عمي يونس الكلمة خنقاته ودموعه نزلوا 😭
نوح يبي ايغير الموضوع ..قعد يحكيله ..شن صار امعاه من اول ماطلع لعند اليوم ..وطبعا محور الحديث كان كله على دارين ❤
*****************(( الكاتبة أم ناصر ))
#تسريع_للاحداث
فاتوا كم يوم ودارين وأمها على نفس الوضع دارين زعلانه لا تاكل اكويس ولا تشرب اكويس ..وكان صار ناقش بينهم ايكون على نوح ..وتحاول دارين تقنع امها بالموافقة ..وفي لاخير يتعاركوا ..وترجع دارين تركن لدارها ولسريرها وتبكي 😭
أما نوح خلا أمه وخواته يستقروا قبل في الحوش ...وحتى اخواته المتزوجات جاوا زيارة لامهم في حوشها الجديد ..وبعدين كلمها مرة ثانية على دارين ..وهيا قالتله اتفق امعاها على موعد وأني نمشي نطلبها
دارين في العيادة رن عليها نوح : الو
نوح : كملتي خدمتك
دارين : اي ..كملت
نوح : انزلي تعالي نبيك لوطى
دارين : تحكي جد ؟؟
نوح : اي ..هيا تعالي بسرعة
دارين : دقيقة بس
حولت بالطوها لابيض ..شافت وجهها على المراية ..بخت عطر ونزلت
نوح في سيارته وامعاه نهى ونسمة : نسمة انزلي اركبي لتالي
نسمة نزلت اتخبط 😤
نوح عيط عليها : بالشويا راني انرجعك للحوش 😡
نسمة : لا لا خلاص ..وربي ماقصدي 😨
نوح : تعرفي وكان ماتبطلي حركات المعيلة امتاعك..بنرجع انربيك من جديد 😤
نسمة : لا ورأس خيي ..والله ماعاد انعاودها 🥺
نوح تنهد وشاف لنهى في المراية : اضبطي أختك مانبيش فضايح مع البنت 😑
نهى : ماعليك منها ..شوري 😏
نسمة : نننننن 😒
نوح ايشوف في دارين نازلة : ضمي فمك ..احسن لك 😡
نسمة سكتت 😑😑
دارين قربت من السيارة واتشوف في خوات نوح ..ومعاش فهمت شي 😣
نوح نزل من السيارة ..ومشى سلم عليها : شن لاخبار
دارين : تمام ..شن اخباركم
نوح قرب منها : بخير ..مستاحشك هلبا غزالتي
دارين طبست منحرجة
نسمة قربت من الروشن اتشوف لدارين : اااالله محلاها ..اتهبل
نهى اتشوف : اي .احليوة ماشالله عليها
نسمة : بس نوح أحلى منها ...صقوعي الفرخ مع انه واعر 😒
نهى : باهي صكري فمك احسن يسمعك ويقطع اللسانك
نسمة : امتى نتزوج ونفتك منكم ومن نوح 😑
نهى : ياحيوانة ..خوكي ماصدقنا امتى رجع وسطنا ..تذكري بكى ماما عليه طول سنتين ..والا حياتنا كيف تغيرت من يوم اختفى ..ماعاد عندنا حد غير نوح ..وأنتي تعرفي شن دار عشانا
نسمة : خيرك رقيت ازرق ..راني غير انبصر بس ...أما نوح أنتي تعرفي كيف انحبه وانخاف عليه 😒
نهى : باهي خلاص اسكتي البنت جت
نوح ودارين قربوا من السيارة ..نوح فتح الباب من لاوراء : انزلوا سلموا عليها
نهى ونسمة نزلوا وسلموا على دارين ..وهيا ترجف ومنحرجة 😂
نوح : هيا اركبوا ..تاخرنا
دارين اتشوف لنوح ..وهوا شاورلها برأسه عشان تركب قدام ...مشت ركبت
نوح ولع السيارة وطلع : البنات يبوا السوق ومايعرفوش شي ..قلت تمشي امعانا ..ومنها تطلعي اشويا من جو العيادة والمرضى
دارين هزت راسها وابتسمت ...ونوح عرفها منحرجة ..ابتسم
وصلوا لسوق .وكل مرة ينزلوا على محل ...ودارين في البداية كانت متوترة ومرتبكة اشويا ...بس بعدين مع ضحك البنات وجو نسمة انطلقت امعاهن ....ونوح كل مرة ينزل فيهن على مكان ..ويقعد في السيارة ...او ينزل امعاهن
لعند خشن محل كبير ملابس ...البنات نزلن ونوح شد يد دارين ...البنات خشن ودارين وقفت : نعم
نوح حط يده في جيبه وطلع مبلغ : خودي خليه امعاك ..مرات ايجي في خاطرك شي
دارين وخرت ودفت يده ردتها : لا عندي والله ..وربي مانبي
نوح طبس عليها : خوديهم من غير كلام ..ومعاش تردي يدي لما انمدها لك مرة تانية 😑
دارين عرفاته زعل خذتهم : باهي خلاص ...ماتزعلش مش قصدي
نوح : مش زعلان ..بس أني خذيتك من العيادة ومرات مامعاكش فلوس في شنطتك
دارين : لا امعايا ..وعندي بطاقة مصرفية ..نقدر نشري بيها
نوح : صار خلاص ..خليهم امعاك ..هيا تعالي
خشوا للمحل ..ونوح كان طول الوقت جنب دارين ..وكل اشويا ايشوف فيها لو عجبها شي وتبي تشري 🤷🏻♀️ ..وطبعا احساس دارين كان ايجنن ..حست كأن نوح خطيبها فعلا او زوجها ...وطالعة هيا وصبياتها امعاه
بعد فترة نوح مقمعز على حافة طاولة وجنبه شنطة دارين ..وقاعد يستنى فيهن في حجرة القياس
نوح خذا شنطة دارين وطلع للسيارة ..ركب واتصل بنهى : الو
نوح : نهى أني طلعت مشوار قريب من اهني ...ماطتلعوش لعند انجي
نهى : باهي تمام
نوح : اسمعي ..قولي لدارين شنطتها امعايا في السيارة
نهى : تمام
طلع نوح بالسيارة ...مشى مشوار لعند شارع ثاني ...فتح شنطة دارين خذا منها شي ..ونزل ...غاب فترة ..وبعدين رجع للسيارة ..ورد للمحل ...وخش لاقهن مكملات ويرجن فيه
طلعوا مع بعض ...ركبوا السيارة ..ونوح مشى لعند محل ثاني ..قرب من دارين : انزلي تعالي نبيك
التفت على خواته : خليكم اهني ..مش مطولين
نزل هوا ودارين خشوا لمحل ..ذهب ..
دارين : شن تبي نوح ؟؟
نوح : اششش اسكتي
نوح : ماعليش ممكن انشوف الدبل لو سمحت
صاحب المحل : رجالي او نسائي
نوح : الزوز
صاحب : حاضر
دارين قربت منه : نوح شن ادير ؟!!
نوح قرب منها وشاف لفمها زين : بتسكتي والا انسكتك بطريقتي 😏
دارين وجهها سخن وتما احمر 😣 ..طبست وسكتت
نوح عض على فمه وابتسم ..تقتل الفرخة لما تنحرج 😋
صاحب المحل جاب لنوح نوعين ...وهو قعد يختار ..وفعلا اختار دبلة بسيطة بس راقية ..لابسها لدارين ويدها ترجف وكانت على مقاسها ❤
وطلب من دارين تختار دبلة فضة عشانه ...واختارت وحدة اتهبل
شراهن نوح وطلعوا من المحل ..ركبوا السيارة ..وكملوا دورتهم في السوق ...وبعدين مشى نزل البنات خواته على الحوش ..ومشى بدارين لعند العيادة عشان سيارتها ..وقف السيارة ..وتلفت عليها
نوح شد يدها ولابسها الدبلة وبأسها : هادي بتكون في يدك رسمي قبل مايتم الشهر هادا ..وقولي قال نوح
دارين اعيونها يلمعوا : إن شالله 🥺
نوح عطاها الدبلة امتاعه : ماتبيش اتلبسيني حتى أنتي ؟؟
دارين خذت الدبلة ولابسته له ..وابتسمت
نوح : هادي بنخليها في صبعي من اليوم لعند العرس ..وأنتي كم يوم وإن شالله تلبسيها
دارين : إن شالله
نوح فونه يرن شافه لاقاه منصف : أني لازم نمشي ..بس لازم نطمن عليك قبل نمشي
دارين : تمام ...رد بالك من نفسك
نوح : الراعي ربي
دارين : ونعمة بالله ...بالسلامة
نزلت ..ومشت ركبت سيارتها ...وطلعت ونوح وراءها لعند وصلها للشقة ..وبعدين اتصل بمنصف ومشى
***************
ثاني يوم نجيب اتصل بي بنته وطلب منها اتجي للحوش عشان يتكلم امعاها
دارين سلمت عليهم وخشت مع بوها لدار ..قمعزت وهيا ترعش مش عارفة ليش دز عليها
نجيب : أنتي عارفة علاش كلمتك اليوم ؟؟
دارين : لا ...علاش كلمتني 😣
نجيب : عشان موضوعك أنتي ونوح
دارين قلبها طاح : عارفتك مش موافق وأنا ااا
نجيب : خليني انكمل كلامي قبل ..من قال أني مش موافق ؟؟😑
دارين بدأ الامل ايخش قلبها : قصدك أنتا موافق ؟؟
نجيب : أني لا أني موافق ولا أني رافض ....الموضوع هادا خاص بيك تبي اتوافقي وافقي وتبي ترفضي ارفضي ...أني مسؤليتي كأب ..نسأل ونعرف كل شي على الشاب اللي تبي ترتبطي بيه ...وأني بغض النظر عن قصة السجن ..كلفت واحد من جماعتي يمشي ويسأل ويعرف كل شي عن نوح ...والحق حياته عادية مافيش عليها كلام ..زيه زي اي شاب تاني
دارين ابتسمت براحة 😍
نجيب : بالعكس الناس اللي تعرفه والجيران يشكروا فيه وفي عائلته ..ماعادا الفترة اللي غاب فيه وكان محبوس هادي ماحد يعرف شن صار فيها ..ولدلك كان لازم نسأل عنه اوس
دارين ترجف : وشن قالك 😣
نجيب : أوس الحق لا ذمه ولاشكره ..قال شاب عادي ..مثقف وذكي مافيش عليه اي علامات استفهام لما كان مسجون ..بالعكس كان محبوب بين المساجين ...بس قال كان مشاغب اشويا
دارين ابتسمت وطبست 😁
نجيب : الخلاصة ..أني كأب درت اللي عليا ..نصحتك وأنتي مصكرة رأسك ..سألت عليه وطلع شاب اكويس ..وعشان مانبيش نظلمك او نظلمه ..الامر في يدك توا ..بنخليك تختاري اللي تبيه ..اذا اموافقة أنا معاك ومستعد نقنع أمك ..ولو رافضة أنا برضوا معاك ..وماحد يقدر يفرض عليك شي
دارين اعيونها امتلين ادموعوا اول مرة اتحس بوها واقف امعاها وحاط فيها الثقة ..صبت بسرعة وضماته وتمت تبكي ..وطبعا صدمة نجيب كانت كبيرة ..وحتى هوا ادموعه غلبوه بس حاول ايشد روحه 😥
من النقطة هادي بدأ اقناع صباح اسهل ..مادام الكل اموافق أكيد بتلين و توافق في الاخير ..
وفعلا اتصلت دارين بأوس وبوها عشان ايجوا يحكوا معها ويقنعوها اتوافق ..على الاقل مبدأيا لعند تستقبل أهل نوح وتتعرف عليهم ..واتشوف نوح وتحكي امعاه
وهادا اللي صار بعد كم يوم ...نوح خذا أمه واخواته المتزوجات ..وخذا طبق حلويات وبوكس شكلاطة ..وعصير وباقة ورد ..ومش للشقة دارين ..نزلهم وعدا
دارين جهزت نفسها ولابست وكانت امعاها رغد ..استقبلوا اهل نوح ..والحق صباح في البداية كانت مش متريحة للموضوع ..لكن لما شافت أم نوح وتعرفت عليها ..تريحت أكثر
وخاصة لما أم نوح طلعت من نفس المدينة اللي منها دارين ..وكانت اتعيش هنا قبل تزوج أب نوح ..وعرفت نأس هلبا تعرفهم صباح
ولان نصيب نوح في دارين كان قوي ..كل شي تم بسرعة ...واتفقوا العيلتين على كل شي
بالنسبة لنوح زمان كان استاذ في الجامعة ..بس بعد طلع من السجن حب ايغير خدمته ..وخش على تجارة السيارات ..مشروع صغير يعني
بس كان همه كله في مكان السكن ..وقعد ايدور على شقة او حوش صغير على قد افلوسه ..بس ماحصلش كل شي شطت فيه النار
دارين مقمعزة مع نوح في السيارة ..ونوح ايهز في رجله معصب 😤
دارين : خيرك نوح ...أهدا اشويا ..مش نهاية الدنيا ..عادي نسكنوا في اي مكان لعند تفرج
نوح : كيف تفرج بالله عليك ..لفيت كل مكان مافيش بكل 😑
دارين : باهي خلينا توا على إيجار لعند تفرج
نوح : من الاول قتلك الايجار لا ..مافيش استقرار ..حتى اهلي صاحب الحوش قال نبيه ..يعني ممكن بعد العرس طول يرجعوا للحوشنا القديم ..أني انقول اناجلوا العرس سنة او أكتر لعند نلقى حل
دارين : كيف اتأجل العرس وأنت لك اكثر من شهر فوق رأسي تبيني اندير كل شي بسرعة ..وتوا لما العرس قعد عليه اسبوعين اتقولي انأجلو
نوح : ماهو مافيش حل تاني 😤
دارين : أني عندي حل ..شن رائك أاا
نوح : رد بالك اتقولي نعطيك فلوس دارين ..ماتخلينيش نهبل عليك 😡
دارين : لا مش هكي ..غير اسمعني قبل ...أني بنقول يا اما نسكنوا مع أهلك او مع أمي في الشقة لعند نلقوا مسكن نشروه
نوح : شن تحكي أنتي ..مستحيل مع أهلي او أهلك ..حوش اهلي دوبهم ..والبنات ديما ايجوا وزحمة ..وأني نبي راحتي وراحتك ..وشقة أمك مستحيل طبعا 😑
دارين : بس هيا شقتي أني مش شقة أمي
نوح : ولو برضو..مايصيرش منها
دارين تنهدت وسكتت 🥺
نوح ايفكر وبعدين رفع وجهه : أني عندي حل وسط ممكن يرضيني ..بس مش عارف لو اتوافقي عليه ؟
دارين : حل شنو ؟؟
نوح : الحل هوا ....
*************(( الكاتبة أم ناصر ))
كل شي تمام ..قبل العرس باسبوع نوح قراءة فاتحته على دارين وتمت حلاله ومرته رسمي 😍
وماعاش عندهم غير التجهيز للحفلة عرسهم ..رغد كانت خطوة بخطوة مع دارين في كل شي ...دارين عشان خاطر بوها وقف امعاها ..حبت تشكره واختارت ادير الحلفة عنده في الفيلا
نوح طول اسبوع العرس وهو حايس وعنده مئة شغله ..لدرجة حتى دارين مش لاقي وقت عشان ايشوفها او يهدرز امعاها
قبل العرس بكم يوم ..أوس في مكتبه خش عليه نزار ..يسلم فيه اوراق : سلام
أوس : اهلين
نزار حط لاوراق على المكتب : هادو التقارير اللي طلبتهم ..ومازال ملف تاني انوتي فيه
أوس : رفع لاوراق شافهم وحطهم في الدرج : قمعز نزار
نزار : مرة تانية يافندي ..عندي شغل
أوس : تمام
نزار يبي يطلع واوس ناداه : نزار
نزار وقف : نعم
أوس بتردد : شن صار في موضوعك ؟؟
نزار فهم عليه وهوا اصلا كان يتهرب منه : تمام ..نستنوا في عرس دارين لعند ايتم وبعدين نبي نقرأ الفاتحة
أوس حس بنغزة في قلبه : كل شي على البركة ..الف مبروك
نزار : الله يبارك فيك ..هيا بالسلامة
طلع نزار ..و اوس نفخ معصب ..كان عنده أمل رغد ترفض ..بس شكلها موافقة ..صبا وطلع معصب 💔
**************(( الكاتبة أم ناصر ))
#يوم_العرس
دارين تلبس في الدور الثاني وامعاه مزينة ..ورغد ونيروز اختها ..والدور الاول في عائلتها والضيوف ..رن فونها لاقاته نوح
دارين : اهلين
نوح : غزالتي ودكتورتي قلبي
دارين : ياحليلي منك 🙈
نوح : دارين نبي انشوفك ضروري
دارين : كيف يعني ..قصدك توا ؟؟
نوح : اي توا توا ..لازم انشوفك
دارين : نوح كيف ايصير هكي ..قاعدة نلبس ..واليوم عرسنا ..اصبر اشويا لعند الحفلة تبدأ توا اتشوفني
نوح : قتلك بنشوفك توا ..ضروري مانبيش نصبر لعند الحفلة
دارين : نوح في شي خوفتني ؟؟ 😨
نوح : مافي شي ..غير نبي انقولك شي ..قبل مايجوا الناس بعدين ..دبري راسك دارين نبي انشوفك
دارين : باهي ..لحظة بس توا انكلمك
نوح : هيا نستنى فيك بسرعة
دارين صكرت واتفكر..وبعدين تذكرت عند بوها دار خارجية تفتح في الجنان من لاوراء ...اتصلت بنوح وقالتله ايجي من باب الفيلا الخلفي ..وهيا فهمت رغد اتغطي عليها لعند تنزل اتشوف نوح شن يبي منها
نزلت دارين وهيا لابسه ديشمبر ستان ..لعند الركبة ..كان مكياجها والتسريحة تمام ..بس مازال ما لابست الفيلو ...خشت الدار وقفلتها ..وتصلت بنوح قاللها عند الباب ...افتحت الباب اللي يفتح على الجنان ..ونوح خش وصكر الباب ...🔥
في الليل بعد العشاء ...دارين تضحك ولابست الفيلو ....وكل شي جاهز والمعازيم وصلوا ودارين كانت مجهزة الصالة ومزينتها عشان العرس
اهل نوح كانوا قاعدين والناس كلها ضحك ولعب ..والعرس كان بسيط بس الحفلة حلوة ❤
معاش في شي ..الا ايخش نوح عشان ايصور امعاها ..وياخذها ويطير بيها على الفندق اللي حجز فيه ..ويعيشوا احلى لليلة كعرسان ايحبوا بعضهم ...دارين تستنى ساعة . اتنين ..ثلاثة ..الوقت تأخر ..ونوح فص ملح وذاب ...تتصل بيه فونه مقفل 😣
المعازيم وأم دارين وعزيزة ..وحتى هنية وخوات نوح ..حسوا في شي مش طبيعي ..الوقت تاخر بكل والمعازيم بدوا يتناغزوا ويهمسوا عليها
دارين توترت وبدأت ترعش ..ايديها يرجفوا ..وتتصل بنوح فونه مقفل ...اتصلت بأوس ..قاللها ..ماجاش بكل للمكان ..حتى انسابته وضيوفه يسألوا عليه 😥
دارين رقت فوق ومعاش تحملت نظرات الناس لها ..تتصل بنوح مافيش فائدة ..عقلها جابلها شي واحد ..أن نوح صارله شي ..وخافت عليه 😰😭
لعند طنت رسالة على فونها ...فتحتها لاقاتها من نوح 👇
(( غزالة قلبي وروحي ...أسف لاني ماجيتش ومانقدرش أنجي ..مانبيكش تزعلي مني ..ماتحاوليش تسألي عليا او ادوريني ..بس نبيك تعرفي شي واحد نوح الحاج أيحبك ومستحيل ينسأك ....غزالتي ...سامحيني 💔 ))
دارين انصدمت واعيونها دمعوا وقعدت تبكي ..تتصل برقمه مقفل ..نزلت بسرعة من فوق ..كانت مصدومة ومش عارفة شن ادير
لما وصلت لوطى كان عندهم العلم لان نوح دز رسالة لاخته ..ورسالة لأوس
دارين قمعزت على الكرسي وقلبها مكسور ..طبست والعيون كلها عليها ....رفعت رأسي واعيوني معبية دموع ...انشوف في نظرات الشفقة في اعيونهم عليا 💔
أمي وبويا وحتى مرات بوي كانت شافقة على حالتي ..كيف قدرت اتسيبني في يوم زي هذا ...كيف هنت عليك ..وين كلامك ليا ..وين ووعودك ...أنك مستحيل اتخليني 😭
شفت ليديا ..الورد ذابل ونص اوراقه طاحوا ...ذبلوا وطاحوا بسرعة نفس ماقدرت اتخلي قلبي اللي كان مليان بشغف حب مختلف ..حب تحدى كل شي ..حب كان خارج عن السيطرة ...يذبل ويموت بنفس السرعة ...فتحت يدي وطاح الورد منها على الارض
رفعت جسمي وصبيت من على الكرسي ..الانظار كلها عليا ...مشيت كم خطوة ..بس خطوات ثقيلة ...بثقل الحزن اللي سكن فيا
حاولت أمي تمسك ايديا وتمشي امعايا ...لكن أنا ..رفعت يدي ..وطلبت منها اتخليني ....تباعدت عنهم كلهم ..وعن نظراتهم ...طلعت من الصالة ...اللي كلها مزينة بالورد ...ورد اخترته أنا في يوم نفس هذا 💔
قبل نرقى من الدورج للدور الثاني ...تلاقيت مع أوس ...كانت نظرته مختلفة ..نظرة مخلطة ..شفقة على حزن ...بس أكثر شي كان واضح فيها ..نظرة للوم ..وعتاب ..كأنه كان ايقولي ...من الاول قتلك خطأ اللي اديري فيه ...ماتصدقيش كلامه ...خدع غيرك ..ويقدر يخدعك ويسيبك ..راه مايفكر في شي الا مصلحته ...بس أنا ماكنتش قادرة انصدق ...لاني شفت كيف ايحبني ..شفت في اعيونه ..اللي ماقدرش راجل غيره ..ايخليني انشوفه ...مستحيل كنت انصدق أنه يكذب عليا ...والمشكلة بعد كل شي صار اليوم ..مازلت مش مصدقة 💔
رقيت بخطوات اثقل من قبل ...نظرة اوس خلتني انرد للواقع ..ونعرف أني عايشة اسوء يوم في حياتي ...فتحت باب داري اللي من زمان سيبتها ...وحتى لما انجي هنا ..ماعش انحس أنها ليا ...قفلت الباب ...مديت يدي لعند كتفي ...سحبت طرف الفستان ..لعند انفتح كله من لاوراء ...ونزل من على جسمي وطاح على الارض ...طلعت منه ..ومشيت فتحت الدش في الحمام ...وخشيت تحت لامية لامصقعة ...كنت نبي حاجة اتبرد النار اللي في قلبي ...بس مافيش فائدة ...لامية تنزل على رأسي و وجهي ...مسحت ايديا على وجهي وبحتت فيهم ...الكحل عبى الدنيا ...قعدت نفرك في ايديا على وجهي واعيوني نبي نمسح اي أثر لليوم هذا
بس كل مانمسح ..ايديا ايتعبوا أكثر ..من الكحل والمسكرة ..قعدت نبكي ..نبكي ..نزلت على ارض الدش ...ولامية اتصب عليا ..وأنا انهارت بالبكى ..على كل للحظة ..على كل كلمة ..على كل ..شي مختلف كان يجمعني بيه 😭💔
******* نهاية الحلقة #18