#السجين_777
#الحلقة_19
قبل تقري حلفتك بأغلى ماعندك ديري لايك ..نبي نعرف كم وحدة تقرأ فيها ...وعلى فكرة لو حلقة اليوم جابت لايكات لعند 1500 بنت ..وعد مني بكرا حلقة استثنائية
❤❤❤❤❤
دارين مقمعزة تحت الدش ..تبكي ولامية المصقعة تنزل عليها ..لعند حست برجفة وجسمها صقع ..ضمت روحها ولفت ايديها على بعض وتبكي 💔
رغد كانت تحكي مع صباح وتحاول اطمنها ...وبعدين خذتها عشان اتقمعز ...ومشت تبي ترقى فوق تلحق دارين ..لاقت أوس مقمعز على اول درجات ويتصل بفونه
رغد شافتله وهوا صبا اول ماعينه جت عليها
أوس : رغد ...شن اخبارك ؟؟
رغد توترت : ااء تمام ..تمام
أوس : قاعدة فوق شوفيها وخليك امعاها ..لعند نعرفوا الزفت هادا وين أختفي ؟؟
رغد شافلته ورقت من الدروج : علاش ادور فيه ..خليه ينتلف ..مش بالغصب ..كانهو يبيها مامشى وسيبها 😑
أوس : ممكن صارله ظرف ..وماقدرش ايجي
رغد وقفت : مافيش ظرف ايخليك تبعد عن الانسان اللي اتحبه ويحبك مهما كان
أوس رقى كم درجة وراءها قرب من رغد واعيونه في اعيونها : بالك لانه غبي ومش عارف أن روحه فيها ومايقدرش ايعيش من غيرها..بالك راهو نادم لانه باعد وخلاها وماقالش اللي في قلبه
رغد معاش فهمت يحكي على نوح والا على روحه ..قلبها ايدق بسرعة ..وخافت.. برمت وكملت ترقى : معناها لازم يدفع ثمن غباءه ..ويرضى باللي صار ..ومايلومش حد الا نفسه 😣
أوس اعيونه عليها وهيا تبعد عنه ..غمض اعيونه وتنهد بحزن : وربي أنحبك ..وربي رغد 💔
****************(( الكاتبة أم ناصر ))
رغد وصلت لعند باب دار دارين ..غمضت اعيونها وخذت نفس لان كلام أوس ونظرته لاخبطوها وشتتوا تفكيرها ....حاولت تفتح الباب لاقاته مصكر حطت يدها ادق على الباب : دودوي أفتحي ...دارين بالله عليك تفتحي عشان خاطري ...خالتي صباح لوطى بالها مشغول عليك وفي حالة ..تربحي أفتحي الباب
دارين على نفس الحال خاشة في بعضها وضامه رجليها تحت الدش وأتهز في جسمها وتبكي وتشهق من غير صوت 💔😭
رغد : دودي ...دارين حبيبتي الله يخليك أفتحي الباب ..بربك أفتحي عشان خاطري دارين والله قلبي قريب يوقف من الخوف عليك 🥺
دارين : 😭😭
الضيوف لاول لاول بدوا يطلعوا ..ومعاش في الا اهل دارين وعائلة نوح وأم رغد ...والدنيا خشت بعضها في الصالة ...صباح تبكي على كسرة بنتها وفرحتها اللي ماكملت ...وعزيزة اتحاول اتهديها ...هنية أم نوح قمعزت من الصدمة من اول ماسمعت بالخبر وتبكي وتقول نبي ولدي ..جيبولي ولدي 😭 ...وبناتها محوطاتها وخايفات عليها ويتباكن 😭
نجيب حس بنفسه ضاق ..طلع مع أوس برا ..وقاعدين انسابت نوح امعاهم ..وكم واحد من اقارب نجيب
وأوس اتصالات ايحاول يعرف اي شي ..رسالة نوح له مش واضحة وماعرفش شن يقصد بكلامه ...الرسالة 👇
(( نكتب في الكلام هادا ومش مصدق أني نكتب فيه ..بس ماعنديش خيار غيره ...أهلي وزوجتي أمانة في رقبتك ..رد بالك منهم ...عارفك ولد أصل وتخاف ربي ...أنسى كل شي صار بيناتنا وخلي بالك منهم حتى كضابط وشرطي ..مش عشان شي تاني ...ماتحاولش ادورني ..ولا تشك في حد ...لاني باعدت برغبتي...نوح ))
🤷🏻♀️🤷🏻♀️🤷🏻♀️🤷🏻♀️🤷🏻♀️
دارين صبت بالغصب ...لفت منشفة على جسمها ومشت فتحت الباب ...ورغد اول ماشافت منظرها ..قلبها وجعها 😰💔
خشت بسرعة وصكرت الباب ..وضمتها ...ودارين من لما قرت رسالة نوح كانت هادي اول مرة يطلع صوتها ...انفجرت بالبكى وتشهق 😭
ورغد اتضم فيها وتبكي معاها : عدا وسيبني يارغد ..خلاني وعدا ..كيف دار فيا هكي كيف😭 ..كيف هنت عليه يارغد كيف..أني اللي حبيته من اول مرة شفته فيها ...أني اللي وقفت امعاه وقت الناس كلها باعته ..أني اللي وقفت في وجه الكل عشان خاطره ...كيف ايخليني في يوم زي هادا ..كييييف 😭
رغد : أهدي حبيبتي ..أهدي لعند نعرفوا ..شن صار وكيف
دارين ارفعت وجهها وادموعها ينزلوا بغزارة : ياربي ..يارب والله مانقدر ..والله مانقدر انعيش من غيره ..نوح روحي والنفس اللي عايشة بيه ..ليش سيبني لييييش 😭
رغد لفت يدها على خصر دارين : تعالي ..تعالي قمعزي اهني والبسي حوايجك .. نوح أكيد في سبب خلاه ايدير هكي ..مش معقول يختفي فجاءة ومن غير سبب
دارين قمعزت على السرير : أكيد بيرجع صاح ؟؟ نوح مستحيل ايخليني ..اي ..اي ..مستحيل ..هوا وعدني وحلف ..حلف مستحيل يبعد عني لو مهما صار ..قالي أنتي ليا ..ومانقدرش نقعد من غيرك ..قالي أنتي مرتي وحلالي وماحد يقدر يبعدني عنك ..ااااااه 😭
رغد تمسح في وجهها دارين : أكيد بيرجع ..أنتي مراته كيف بيخليك بس ...أسكتي وأهدي ..أوس قاعد ايدور عليه ويسأل ..الا مايعرف عنه شي
دارين تهز في رأسها : ايه ..ايه ..لازم يرجع لازم ..نوح ايحبني ومستحيل ايخليني 🥺
رغد : تمام .تمام ..خليني انطلعلك لابسة عشان ننزلوا تحت ..خالتي منهارة وتبكي ...وحتى أم نوح المسكينة قريب تهبل على ولدها ..وكلهم بالهم مشغول عليك
دارين تمسح في وجهها : تمام ..باهي
رغد صبت وطلعت لابسة لدارين من شنطتها اللي كانت ناوية تاخذها امعاها لفندق 💔
لابست ونزلت هيا ورغد لوطى ..والكل اعيونهم عليها ..وأم نوح اول ماشافتها قعدت تبكي بصوت ..ودارين جتها وضمتها وقعدوا يبكوا
وصباح مش عاجبها اللي صار ..وحامقة بس ماتبيش اتزيدها على دارين 😑
العائلة كلها امقمعزة وتستنى في خبر على نوح ...اما دارين في عالم ثاني ابروحها ...شريط الذكريات قاعد ايمر عليها ..من اول يوم ..من اول للحظة ..كل كلام نوح ..نظرة اعيونه ..صوته ..ولامست ايديه ..غيرته ..وعصبيته ..كل شي ..كل شي ..لعند اخر مرة تلاقوا فيها ...وشن صار بينهم ...غمضت اعيونها وادموعها نزلوا 😭
رغد فونها يشرين لاقاته نزار ..صبت وخشت وحدة من الديار : الو
نزار : ايوا ..شن لاخبار ؟؟
رغد : اسكت الدنيا خشت بعضها أهني ..ومعاش عرفنا شن صار
نزار : اي امبكري اشويا كيف جيت ..الرجالة يتحاوسوا برا ..ومافهمتش شي ..وينه نوح ..وشن صار في دارين ؟؟
رغد : ماحد يعرف مكانه ..دز رسائل ..وأختفى ..وخلانا كيف المهايبل مش عرفين شي
نزار : إن شالله خير ...أنتي مازال مش مروحة توا ؟
رغد : لا كيف انخلي دارين بالحالة هادي ..مانقدرش
نزار تنهد : باهي تعالي نبيك برا ..نبي أنشوفك رغد
رغد : مش وقتها نزار ..خليها مرة تانية ..الناس خالطة عليهم نوح من هنا ودارين تبكي من هنا والجو متوتر
نزار : رغد اطلعي خمس دقائق بس ..كلمتين ومروح
رغد : اووووفه ..باهي لحظة بس نلبس عباتي وانجيك
نزار : تمام
لابست رغد عبايتها ..وطلعت لاقات نزار واقف عند الباب الخارجي ...سلمت عليه ..وهو قرب منها : شن اخباركم..شن دايرة دارين توا ؟؟
رغد : شن تبي ادير مسكينة ..على البكي وخلاص ..لعند ايفرج عليها ربي
نزار : غريبة كيف اختفى مرة وحدة ..يعني ماقالش شي او وضح وينه او ليش مشى ؟؟
رغد : والله هادا اللي صار ..ماحد يعرف عنه شي ..حتى أمه واخواته ياناري صار فيهم نهار ..مابطلوش بكى من بكري
أوس كان واقف برا في الجنان مع نجيب وباقي الرجالة ..جاء يبي ايخش لاقى نزار واقف مع رغد ...رد وقعد ايشوفلهم ويسمع 🔥
نزار : الا مايلقوه وماعنده وين يختفي ...المهم كلمي أمك وهيا عشان انوديك للحوش
رغد : وين اتوديني ..قتلك مانقدرش انخلي دارين ونمشي
نزار قرب منها : رغد كيف تبي تقعدي عند ناس برانية ..روحي توا والصبح انجيبك بنفسي لاهني
رغد : شن قاعد تحكي نزار ..مستحيل انخلي دارين ونمشي ..وبعدين أنتا عارف علاقتي بعيئلة دارين وماهماش برانية ..وطول عمري انجيها ونبات عندها
نزار عصب : اي من قبل نخطبك ..بس ماتنسيش أنك خطيبتي توا وأني مانبيش انخليك اتباتي اهني 😡
رغد : اسمعني نزار ..أنتا مازلت ماقريت فاتحتك ..ومالكش حكم عليا لعند انصير مرتك ..ومن الوقت هادا بنقولك دارين صحبتي بيها من واحني صغار ..وعمره مافرقنا شي ..ومستحيل ايفرقنا شي ..ولو تبي اللي بينا يكمل لازم تعرف أن دارين أهم شخص في حياتي وأنت لازم تتعود على الشي هادا 😤
نزار تنهد بعصبية وشد ذراعها : يعني أهم مني ومن حياتنا ومستقبلنا مع بعض 😡
أوس عصب لما شافه شدها ويهزب ..يبي يطلع لكن رغد فكت روحها منه بقوة : رد بالك اتمد يدك عليا مرة تانية ..ولو مش عاجبك كلامي مازلنا على البر ..تقدر تنسحب بدري 😡
برمت وتبي اتخش ..ونزار شدها وقربها منه : تعالي وين ماشية ...مش قصدي ..والله العظيم ماقصدي
رغد تنهدت وطبست : صار خير
نزار رفع وجهها وقرب منها : أسف ماكنتش نبي انزعلك مني ..بس أني أنحبك وخايف عليك ...ونغار عليك من كل شي ..وماعرفتش نتحكم في نفسي
رغد : عادي كلنا متوترين ..وأني اعصابي تالفة من الخوف على دارين ..مش مشكلة
نزار : يعني مش زعلانة مني ؟؟
رغد ابتسمت وهزت رأسها : لا لا
أوس عض على فمه ..وايديه يرجفوا من العصبية ...مشى وسيبهم مش قادر يتحمل ايشوفه قريب منها ويتفرج عليهم 😤😡
نزار : رغد أني انحبك ونبيك ..وهادا كله من خوفي عليك ..مانبيش نضغط عليك الليلة ...بس في حاجات لازم نتفقوا عليها ..عشان نقدروا انكملوا مع بعض
رغد : خلي الازمة هادي اتعدي وبعدها ساهل
نزار : تمام ..شنو حتى الوالدة قاعدة ماتبيش اتروح ؟؟
رغد : لا ماما أكيد تبي تمشي ..خليني انخش انشوفها بالك اتروح امعاك
نزار : اي شوفيها وأني واقف في الجنان نستنى فيها
رغد : تمام
خشت رغد وحكت مع أمها ..وفعلا كانت تبي اتروح ...لابست عباتها وطلعت ..مشت مع نزار ..وكل هادا تحت اعيون أوس ..وهوا زامط ومش قادر يدوي اي كلمة 😤
**************(( الكاتبة أم ناصر ))
أنسابات نوح ايدزوا على نساوينهم وباقي العئيلة ..لكن هنية تبكي وماتبيش تمشي ..خايفة نوح ايجي وهيا مش قاعدة ..مابتش تطلع ...والبنات معاش عرفوا شن ايديروا ..وفي الاخير دارين طلبت ايخلوها امعاها ومايخافوش عليها ..لانها بدير بالها منها
اقتعنوا ايخلوها لانها كانت منهارة ...مش منها مازل مافرحت برجعته ..رد اختفى من جديد وفي لليلة عرسه اللي من زمان تحلم بيها 😭
طلعوا خوات نوح ..بس نسمة قعدت مع أمها ..مايبوش ايخلوها ابروحها لانها مريضة
طول الليل ودارين تبكي ..وتتصل بنوح ..بس فونه مقفل ...كلمت أوس وطلبت ايدور عليه ..خافت ايكون مخطوف او صاير معاه شي غصبا عنه ...لانها مقتنعة أن نوح مستحيل ايخليها باردأته ومن غير سبب 😭
مرت الليلة صعبة على الجميع ..وكل واحد ايخمم في حاله ..حتى نزار ..كان باله مشغول ونار في صدره ..لان رغد و أوس قاعدين في مكان واحد ..وممكن ايشوفها او يهدرز امعاها 🔥
أما أوس كان حتى هوا في حالة ..كل مرة ايشوف في رغد اتضيع من بين ايديه ..وهوا واقف ايتفرج 💔
ومافيش حد ماعفي من هم الليلة الثقيلة هادي... البنات مع رغد لمن الحوسة واللي قدرن ايظمنها ظمنها .....اما نجيب خش سريره وهو ايفكر ومهموم ...هل غلط لما وافق يعطي بنته لواحد زي نوح ...والا ايلوم بنته على اختيارها ..ويعاتبها عشان صكرت رأسها عليه..أوس ماقدرش ايروح للشقة ..طول وهوا ساهر ..وبعدين رقد في المربوعة
ماطلع الصبح الا بطلوع الروح عليهم كلهم ...رغد ونيروز ناضوا ايجهزوا في الفطور ...ونسمة كانت مع أمها في الحمام اتوضى عشان اتصلي
ودارين مقمعزة جنب أمها ..والدمعة مانشفت على خدها ..وعزيزة خشت تحكي مع نجيب ..عشان يعرفوا شن يبوا ايديروا
نسمة قمعزت أمها ..وفونها يرن ..لاقاتها نهى : الو
نهى : اي ..شن اخباركم ..مافيش جديد ؟؟
نسمة : لا مافيش ..على نفس الوضع
نهى : باهي شن اخبار ماما ..ردي بالك من ضغطها راهو يرتفع
نسمة اتشوف لامها : والله خايفة عليها ..وضعها اليوم مش عاجبني 🥺
نهى بخوف : خيرها ..شن فيها 😰
نسمة : ايديها يرجفوا ..وجهها اصفر ..ومابطلتش ابكي من امبارح 😥
نهى : تعرفي عيب قعدتها عند الناس ..ماعندها علاش قاعدة ..نوح كانهو روح توا نسمعوا ..خلي انكلم واحد من رجالة اخواتك يرفعني انجيبكم للحوش
نسمة : اي حتى أني انفكر فيها من بكري ..خلي انفطرها نعطيها دواءها ..على بال ماجيتوا
نهى : تمام ..بااي
صكرت نسمة الخط ..وطلعت اتجيب في كباية حليب لامها عشان تاخذ دواءها
دارين مارقدتش بكل ..صبت غسلت وجهها وتوضت وصلت ..وقمعزت تدعي ربي يطمن قلبها على نوح وترجع اتشوفه من جديد 😭
رغد جت وقمعزت جنبها : دودي أني نبي نمشي للحوش انشوف ماما ..وانغير حوايجي وتوا انجيك تاني ..باهي
دارين هزت راسها من غير ماتحكي ..لانها مخنوقة
رغد بأستها على خدها ..وصبت لابست عباتها ..وطلعت مشت للحوش
نسمة خشت على نيروز وعزيزة المطبخ صبحت عليهن ..وطلبت حليب عشان أمها ..خذته ومشت خشت على أمها لاقاتها دايخة وطايحة على جنبها ..انفجعت وقعدت تعيط 😰
دارين وباقي اهل الحوش سمعوها وبسرعة جاوا يجروا ..دارين باعدت نسمة من عليها ..وقعدت اتشوفلها ..وكان شكل الضغط هبط مرة وحدة ..حاولت تسعفها باللي تقدر عليه في الحوش لعند فاقت اشويا ...لابسوها ونسمة لابست حتى هيا عباتها ..ودرين غيرت وركبوا هنية مع نسمة في سيارة دارين ...وصباح مشت مع بنتها ..وشالوا أم نوح للمستشفى 💔
دخلوها لاسعاف ...ودارين بحكم انها دكتورة ويعرفوها ..خشت امعاها ...فعلا كان ضغطها نازل بكل ..نهى جت مع راجل أختها واختها ..وطبعا عزيزة بلاغتها بحالة أمها ...وعلى طول مشوا للمستشفى
وماهيا الا ساعات ..والكل كان في المستشفى ..خوات نوح كلهن ..وراجلتهن ..ودارين وأمها ..وحتى عزيزة جت مع نجيب عشان تطمن عليها ...ورغد كذلك ..سمعت من دارين ولاحقتها للمستشفى
اليوم طويل على دارين ..وهيا مش عارفة كيف تتصرف وشن ادير ..عروس بدال ماهيا في شهر عسلها مع زوجها ..قاعدة ذابلة ومن شي لاشي 😥
روحوا كلهم ماعادا نسمة ونهى قعدوا مع هنية ...وامعاهم دارين ..وصباح ..اما الباقي روحوا للحوشينهم ..وخوات نوح قعدوا في حوش أمهم
******************
في مكان ثاني وبعيد عن كل هالحزن والدموع ..في حي بسيط بجميع ملامحه .من شوارعه الضيقة ..للحياشه الصغيرة واللي لاصقة في بعضها ...كانت ياسمين اتحوس في شقتها الصبح ...خشت على نور بنتها مازلت راقدة ..بأستها وتبيها اتنوض ..لكن نور مازال خاطرها في النوم انقلبت للجيهة الثانية ومش معروف في شنو تمتم 😁
ياسمين ابتسمت وقررت اتخليها ترقد اشويا ..طلعت للمطبخ حطت براد الشاهي على النار ..سمعت الباب ايخبط ..لابست ملاية الصلاة وقربت من الباب : من ؟؟
هيبة : أفتحي حبيبي
ياسمين 😍 ماصدقتش ذانها ..فتحت الباب بسرعة ..وشافت هيبة قدامها ..شايل صاكوه الصغير . ومبتسم بوجهه اللي كله حب وطيبة
على طول خش وضمها بسرعة ..وهيا ادموعها نزلوا من الفرحة : 😭😭
هيبة صكر الباب برجله ..وهيا بين ايديه وتبكي..طبس عليها ايبوس فيها في كل مكان من وجهها : اشششش ليش تبكي بس ؟؟
ياسمين رفعت وجهها اتشوفله ..وحطت ايديها على وجهه : مش مصدقة اعيوني ..امتى طلعت وكيف ؟
هيبة : اليوم الصبح بدري
ياسمين : غريبة المحامي لعند أمس كلمته ..ماقالش شي 🥺
هيبة ضحك : ماهو أنا نبهت عليه مايجيبش سيرة لاحد وخاصة أنتي ..عشان مش عارف اي وقت بيطلعوني ومانبيش تتعبي واتجي وتقعدي في وسط الزحمة
ياسمين رفعت اطراف رجليها اتبوس في وجهه هيبة : استاحستك حبيبي ..استاحشتك هلبا هلبا 😭
هيبة شد وجهها بين ايديه ..ونزل ايبوس في فمها ..بوسة طويلة ومليانة شغف وشوق ..وياسمين لفت ايديها على رقبته ❤
هيبة وقف وحط وجهه على وجهها واعيونه مغمضات ..ونفسه مرتفع : ماتعرفيش قد ايش كنت مستاحشك ونستنى في اللحظة هادي على نار ...أنحبك ياسمين ..أنحبك
ياسمين : الحمدالله على سلامتك ..وربي مازلت مش مصدقة انك رجعتلنا حبيبي
هيبة رفع وجهه ويشوفلها : رجعت ومعاش بنخليكم تاني ..خذيت عهد على نفسي انعوضكم كل يوم بعشرة ..كل دمعة ضحكة ..وكل تعب براحة ...مشتاقلكم ومش ناوي نبعد عنكم تاني
ياسمين ابتسمت وسط ادموعها : ربي يخليك لينا 🥺
هيبة وخر عنها ويشوف للشقة : وين نور ...وين نور قلبي ؟؟
ياسمين خذاته من يده ..وخشت بيه على نور راقدة ..هيبة بكى على طول اول ماشافها كيف راقدة زي الملاك ...قرب منها بالشويا ونزل بأسها على خدها الناعم
ياسمين : من بكري نبيها اتنوض ماتبيش ☺️
هيبة صبا بالشويا : لا خليها اطيب نومها ...حرام شكلها مازلت ناعسة
شافوها لاثنين ..وطلعوا من الدار مع بعض ... لكن هيبة جبدها من خصرها .ولاصقها فيه وحول ملاية الصلاة ..ويبوس في رقبتها ..وياسمين ذابت بين ايديه ...بس صوت الشاهي ايفور على الغاز ..خلاها ادفه وهيا تضحك : اصبر اشويا خيرك ؟؟
هيبة يمشي وراءها : توا بالله عليك هادا سؤال ؟؟
ياسمين قربت من الغاز وطفت على الشاهي ..وهيبة شدها ليه ..وحط خشمه على خدها : مستاحش ريحتك وكل شي فيك ❤
ياسمين : حتى أني ..بس قبل كل شي ..خش ادوش على بال ما وتيتلك فطور ..أكيد جيعان
هيبة ايديه على خصرها رفع وجهه عنها : مش غير ..جيعان وعطشان وكل شي
ياسمين فكت روحها من بين ايديه : معناها خش ادوش بسرعة هيا 😁
هيبة ابتسم وطلع من المطبخ ...خش للدار ..خذا منشف ..وخش الحمام ..ادوش وهو قلبه بيطير من الفرحة ...ريحة الشقة ..مرته وبنته وكل شي سيبه زمان ..رجعلهم تاني من بعد أكثر من سنة ..شاف فيهم الويل في السجن
طلع من الحمام ...لابس سروال بس ...ومشى للمطبخ .....ياسمين وتت سفرة الفطور وقاعدة امصبية ..خش عليها هيبة ضمها من الخلف ..وحط وجهه في رقبتها وشعرها : أنحبك ..أنحبك ❤
ياسمين قلبها ايدق بسرعة ..وكأنها اول مرة تقرب منه هكي ..شعور حلو وغريب ..بعد كل هالشهور : هيبة 😣
هيبة لما حس بيها ترجف قامها بين ايديه ومشى بيها جوا ..نزلها وجاء فوفها
ياسمين ترجف : استنى تفطر قبل
هيبة نزل ايبوس في رقبتها ..و وجهها ..لعند وصل فمها ..وهمس : لاحق على كل شي ..نبيك ومعاش عندي صبر أكتر من هكي
و ....❤🤫🤫🤫
بعد للحظات الحب والعشق ..هيبة راقد على ظهره ..وياسمين في حضنه : هيا نور قريب اتنوض صبي
هيبة بأس جبينها : هيا حبيبي
ياسمين خشت الحمام ادوشت ..وطلعت اتسخن في الشاهي اللي برد 😁 ..وهيبة خش ادوش مرة تانية ..وطلع ..ياسمين حطت سفرة الفطور ..وهوا خش على نور ..اينوض فيها
رقى معها على السرير ايبوس فيها ..ويحط في وجهه على بطنها ..ونور ناضت مستغربة ..بس اول ماشافت وجهه بوها ..قعدت تضحك ومنصدمة ..وهيبة رقد على ظهره ورفعها فوق يلعب امعاها ..ونور تضحك وشعرها اللي زي الحرير ..نازل على وجهه بوها ..وياسمين واقفة اتشوفلهم ..وتنهدت براحة ❤
*******************
#تسريع_للاحداث
بعد يومين هنية طلعت من المستشفى ..وروحت حوشها ...دارين وصباح روحوا للشقة ...رغد ماسيبتش دارين ولا يوم ...كل يوم تمشي وتقعد امعاها ...مع ان الجو مش عاجب نزار
هو طيب بس مايحبش طريقة رغد كيف عايشة بحرية ..تتطلع وقت ماتبي ..وتمشي وين ماتبي ..صاح عارفها ماديرش في شي غلط ..بس عقليته هكي ..نفس عقلية اغلب الشباب ...وهادا من غيريتهم على بناتهم ❤
وطبعا قصة السفر ..كل فترة ..مش خارطة مشطه من الاول ...بس ايفكر ..كل مرة ايناقشها على شي ..بس هااااهاااا يا نزار ...هادي رغد ..مش اي حد يقدر عليها 🔥
بالنسبة لدارين الحياة بعد نوح وقفت عندها ...طلبت إجازة من العيادة ...وخشت في حالة شبه إكتيئاب ...و أوس وعدها ايدور عليه ..ويعرف اي معلومة عنه ...وهيا يوميا تتصل بيه وتسأل ....نجيب نفس الشي ...كلف كم واحد ايدور عليه ....صباح طبعا مش عاجبها وضع بنتها ...كانت تبي تحكي مع هنية نسيبتها ..لكن بعد مرضت ..ولما شافت حالتها بعد اختفى ولدها ...قررت تسكت لعند يعرفوا اي شي على نوح
مر شهر كامل من اختفى نوح ...وفي صبح ناضت دارين على صوت بكى أمها😭 ...طارت مفجوعة .😰.ومشت تجري خشت عليها : خير شن في ...خيرك يأم خيرك 😰
صباح تبكي : راجل خالتك نعيمة توفى ...وااااك عليك ياخيتي وعلي بيصير فيك ..من بعده ..😭😭
دارين قربت من امها وضمتها تبكي امعاها ..هيا غير على سبلة ..ادموعها واقفات على جفونها 😭
دارين بلغت أوس على حالة الوفاة ..وحتى رغد ...لمت الشقة وصكرتها ...خذت دبشها هيا وأمها ..وسافروا لحوش خالتها
طبعا جوا عزاء بعيد عنكن وعنا ....ودارين مسحت كبدها ..تقريبا بكت أكثر من بنات المرحوم ...فشت غلها وعبرتها ..وقهرها من نوح طول ايام العزاء
قعدت مع أمها شهر وخلال الشهر هادا صباح مرضت مرضة قوية ...حست نفس اعراض الجلطة الخفيفة ...مش منها مسكينة .. زوج بنتها اللي اختفى فجاءة وخلاها معلقة ..وكسر خطرها .... وموت راجل أختها المريضة أصلا ...وحال بنات اختها من بعد موت بوهن .. جتها مع بعضها ....والدكتور حذر دارين من اي زعل مرة اخرى او صدمة
وبعدها كان لازم تروح عشان إجازتها كملت ...بس أمها ماتبيش اتسيب نعيمة ابروحها في العدة وهيا مريضة ...قالت لدارين روحي وأنا كم يوم وانجيك
دارين ثاني يوم الصبح وتت روحها وركبت سيارتها ورجعت للشقة ...كانت تاعبة ..خشت ادوشت ..وطاحت رقدت ...ولما ناضت كملت باقي اليوم وهيا اتحوس في الشقة وتنظف فيها
ثاني يوم الصبح لابست وصبت على المراية تلبس في وشاحها ..تذكرت نوح وكيف خلاها تلبسه ...دمعوا اعيونها ..وعزقاته معصبة 😤 ...وبعدين غمضت اعيونها وتنهدت ..ومشت رفعت الوشاح تلبس فيه ...صاح هيا لابساته عشان نوح ...بس مع الايام تعودت عليه وحست ان هوا الصاح ...ومش لعبة عشان مرة تلبسه ومرة تعزقه ..حتى لو اختفى نوح من حياتها ❤😥
مشت للعيادة ..كملت خدمتها من غير نفس....وطلعت مشت للحوش هل نوح ..تبي انشوف هنية وتطمن عليها ..وخاصة لها فترة ماشافتها لانها في العزاء
اطمنت على هنية ..مع ان وجهها كان حزين وذابل مش بعيد من وجه دارين ..بس أم نوح مريضة ومش حمل الصدمة ...والشي هادا خلا دارين تبكي طول الطريق للشقة 😭
روحت للشقة خشت ..وحاولت تأكل اي شي ...وطاحت رقدت ...ناضت على رنة جرس الباب ...صبت افتحت لاقاته أوس ..سلم عليها وعزأها ..وخش قمعز في الصالون
دارين امصبية : تشرب قهوة ؟؟
أوس ايشوفلها كيف ذابلة وجهها حزين ..وقاعد ايفكر كيف يبي ايقوللها على الخبر 💔
أوس : تعالي دارين قمعزي مانبيش شي
دارين عرفت عنده دوة ..قربت منه بخوف وقمعزت جنبه : شن في إن شالله خير 😣
أوس تنهد وطلع نقاله من جيبه وحط على صورة وعطاه لدارين
دارين اتشوف للصورة ..واعيونها اطلعوا من الصدمة : نوووح 😰
أوس : ليا فترة اندور عليه ..بس للاسف مافيش عليه اي معلومة
دارين قربت منه باللهفة : من وين جبت الصورة ..وين لاقيته ..نوح وين . وين شن صاير فيه ؟؟ 😭
أوس شد ايديها : أهدي دارين ..أهدي ...نوح اكويس مافيه شي ..زي مانك شايفة في الصورة صحته تمام ووضعه كويس
دارين : باهي وينه ..وين المكان هادا ...شكله مش في ليبيا
طبعا الصورة نوح مصبي مع كم واحد ويهدرز ...وفي وراؤه كم بنت ..من شكل المكان باين انه بار ..ومن شكل البنات ولابسهم كان واضح انه مش في ليبيا ومش في اي دولة عربية
أوس : شوفي أنا من مدة اندور عليه ..وكنت مكلف شاب من التحريات يجمع عليه معلومات . بس نوح اختفى فجاءة ومعاش عرفنا عليه شي .. لعند اتصل بيا وليد ..وقالي شفت نوح وصور الصورة هادي ودزها ليا
دارين : باهي وينه أوس جاوبني ..علاش اتلف وادور ؟؟
أوس متردد : ااءء ..نوح في ايطاليا ..من يوم العرس طلع برا ليبيا ..وبحسب المعروف ..أكيد بقارب هجرة ...لاني سألت عليه وعممت اسمه على جميع المنافد ..ومافيش حد شافه او جاب سيرته
دارين : ايطاليا ؟!!! شن يبي فيها ..وعلاش طلع من ليبيا 😰
أوس : مش عارف ...الصورة ليها فترة من حوالي اسبوع ....وليد قالي سألت عليه ..وقالوا يخدم وعايش حياته عادي
دارين قلبها غص وخنقتها العبرة .. قلبها وجعها ..بس المرة هادي كانت اقوى صفعة من نوح .. منظره في الصورة ..وسط البنات ..مع انه مش واقف امعاهن ..بس كيف عايش حياته عادي ..وحتى ماكلفش نفسه يسأل عليها او حتى على أمه طول شهرين ويطمنهم عليه ...جرحها جرح كبير ..ماعتقدتش انه ممكن ايجيه يوم ويبرأ 💔
الباب دق وأوس صبا ومشى فتح الباب وخلا دارين غارقة وسط دموعها وأهاااتها 😭
رغد خشت : خيرك شن في .. من لما اتصلت بيا وقلبي نار ..دارين فيها شي ؟؟
أوس قرب منها : مافيش ...عرفت معلومات عن نوح وجيت انبلغ فيها ...ولاني عارف انها وحدها ..كلمتك عشان اتكوني جنبها
رغد تبي اتخش : وينها ...شن قلتلها ؟؟
أوس شدها من ذراعها : تعالي ..خليها ابروحها اشويا ..بنقولك شي
رغد بين ايديه : شن قللتلها أوس ...نوح خيره ..وين أراضيه ؟؟
أوس : نوح في ايطاليا ..وقاعد مافيه شي
رغد مستغربة : ايطاليا ؟!!! شن شاله لاهاديك البلاد ؟؟
أوس : مش عارف ..بس اقرب توقع ..أنه هارب
رغد : هارب من شنو ؟؟
أوس : برضوا مش عارف ...لكن أكيد ايبان مع الوقت
رغد تنهدت وطبست : مسكينة هالدارين ..من يوم عرفاته وهيا دمعتها على خدها 😥
أوس قرب منها ورفع وجهها : وأنتي شن أخبارك ..مرتاحة مع نزار ؟؟
رغد انحرجت وجهها أحمر . وتبي تهرب منه لكن أوس شادها بقوة وماخلاهاش تمشي : وين بتهربي رغد ...تكلمي ..قوليلي ..عاجبك الوضع امعاه ..شن اتحسي ناحيته .. لما ايشد يدك ..ترعشي نفس توا ..لما يقرب منك وجههك يولي أحمر ..ونفسك ينقطع ..نفس ماهو صاير امعاك لما قربت منك توا؟؟
رغد ادف فيه : باعد من عليا أوس ..شن تبي فيا ..خليني في حالي 😣
أوس جبدها من خصرها لاصقها في الحيط وزاد قرب منها ..ورغد ترجف وغمضت اعيونها ..طبق عليها بجسمه عشان ماتهربش وشد وجهها بين ايديه ..ونزل بوجهه قرب منها : ارفعي اعيونك ..واشبحيلي رغد ...حطي عينك في عيني وقولي
رغد اتشوف لعيونه وذابت : شنو انقول ؟؟ 🥺
أوس : قولي أنك اتحبي نزار وتبيه ..قولي أن قلبك مافيش حد غيره
رغد زمطت ونزلت اعيونها : أوس بالله عليك خليني انخش ..حول من قدامي 😥
أوس حرك يده على وجهها ..ومرر صبعه على فمها : علاش ترعشي ..علاش خايفة اتشوفي لعيوني ..ليش ماتبيش تعترفي رغد ...ليش ماتعطيني أمل بسيط بس
رغد ادموعها نزلوا وضعفت ...أوس صحى كل الحب اللي مدفون في قلبها وتحاول تدفنه حي 😭
لما شأفها تبكي ...زاد ولع بيها ..فمه رجف ..وقرب من فمها ..نفسه الساخن يلفح في وجهها : رغد أني ...أني أنحب....
تليفون رغد يشرين 🤦♀️🤷🏻♀️🤷🏻♀️
أوس تنهد ..ورغد فاقت لروحها : باعد أوس ..باعد
أوس يبي يتكلم والفون رجع يشرين تاني..رغد دفاته وطلعت فونها لاقاته نزار ...وأوس شاف اسمه ...برم معصب ونفخ ورد ايشوفلها : ماترديش رغد ..خليني نكمل كلامي
رغد اتشوفله واتشوف لفونها ايرن ...نزار 😰
أوس ايديه في نصه ويشوفلها شن تبي تختار ..تكمل كلام امعاه والا اترد على نزار
رغد حايرة ..وبعدين ابرمت وردت على نزار : نعم 😥
أوس هز رأسه وعض على فمه ...وخر كم خطوة بعيد عنها ..تنهد بحزن وعصبية ..وفتح الباب وطلع وخبطه وراءه😤😤
رغد لعند اهتزت من قوة خبطة الباب ..كملت مكالمة مع نزار وخشت على دارين 😭😭
**************(( الكاتبة أم ناصر ))
أوس من طلعته وهوا يجري بالسيارة ...مادام رغد قدرت انقاوم ضعفها وهيا جنبه ...ولما خيارها بينه وبين نزار ..اختارت نزار ...أوس خلاص قطع الامل أنها ترجعله تحت اي ظرف
كان عارف نزار يستنى في مشكلة دارين تنحل ونوح يبين حي والا ميت ...ومادام دارين عرفت مكان نوح ..أكيد بدير حل امعاه
معناها نزار مش مطول عشان يقرأ فاتحة رغد ويخطبها رسمي ..مجرد التفكير في الشي هادا ..خلاه يعرف أنه مستحيل يقدر يتحمل ...فكر يطلب إجازة من قاسم ..ويسافر برا كم يوم ..لعند يستقر الوضع 💔
أوس طلع فونه ورن على وليد : الو
أوس : الو ..وليد .. نبي منك خدمة
وليد : اعيوني لك ياغالي
أوس : تسلم ...نبيك تخدم جواز سفري ...نبيه يجدد في اقرب وقت
وليد : حاضر ...بس ليش في شي لو ممكن نسأل ؟؟
أوس : مافي شي ..غير اااا
وليد سمع خبطة قوية ..وصوت أوس اختفى 😰
سيارة أوس تبرم من قوة الخبطة ..و اوس يحاول يتحكم فيها ...لكن مافيش فائدة .. تبرم منه لعند طلعت من الطريق ...وانقلبت مرتين قبل تستقر على ظهرها مقلوبة 💔😰😭
رغد قعدت مع دارين لعند المغرب ...وبعدين دارين قالتلها نبي نرقد صدعت ...مش منها من كثر مابكت لعند رأسها تما ثقيل
رغد روحت للحوش ...ودارين خشت ادوشت ..ولابست شرت قصير فوق الركبة ...وكت خفيف ..الدنيا صيف وحموا ...وخشت اسطحت على سريرها
رقدت كأنها مغمى عليها ...ناضت بتعب ...حست روحها عطشانه ..وحامية ...قمعزت وشافت الساعة ..لاقاتها تسعة ...لمت شعرها لاوراء ..وصبت
غسلت وجهها وطلعت خشت المطبخ ...شعرها مموج ومبعثر على ظهرها واكتافها ...حفيانة ..وشكلها ايجنن 🔥
صبت على الحوض عبت البكرج امية وحطاته على النار ...والتفتت تبي تاخذ القهوة ...حست بحد واقف على باب المطبخ ...التفتت عليه بخوف 😰😰
🔥🔥🔥🔥🔥🔥🔥
*******نهاية الحلقة #19
وتبي تولع من جديد ...جهزوا انفسكم للحرب الشرسة 🔥❤