#السجين_777
#الحلقة_13
#ملاحظة حلقة اليوم حيكون فيها اكثر من فلاش باك ..على احداث ومشاهد الحلقة اللي قبلها وكانت ناقصة 👇
طلع نوح من المكتبة ...ودارين طولت وهيا مصدومة ...وبعدين نزلت للعيادة ..خشت مكتبها وقمعزت وراسها مشوش ومش قادرة اتفكر
الباب انفتح وخش أوس : خير 😑
دارين رفعت وجهها : اهلين أوس
أوس قرب منها : شن في بينك وبين نوح الحاج 😑
دارين : 😰😰😰😰
أوس : نكلم فيك ...شن في بينكم ؟؟
دارين : مافي شي ..علاش تسأل ؟؟!!
أوس : نسأل لاني من كم يوم وأني انفكر ...شن خلا نوح لما يهرب اول حد يخطر على باله ايساعده هوا أنتي ؟؟ يعني معقولة نوح ماعنداش حد يعرفه خارج السجن ؟؟
دارين : وأني شن عرفني أوس ..ليش اتحاسب فيا ..عندك نوح ..ليش ماسألته ؟؟
أوس : لان نوح لو تقطعي رقبته لو في شي مايبيش حد يعرفه مش حيتكلم عليه ..أنتي تكلمتي امعاه اكثر من مرة ..شن كان يحكيلك ..شن كان ايقول بالضبط ؟؟😡
دارين اعصابها اصلا تاعبة من نوح وزادها أوس عصبها ..صبت معصبة : نقدر نفهم شن خطر عليك توا ..على شنو قاعد ادور ..لاني بجد تعبانة ومش فاضية للكلام😡
على اساس أوس هوا اللي هادي ..هوا معصب أكثر من دارين من بعد كلامه مع رغد 😤 والاثنين حطوا اعصابهم في بعض 🤷🏻♀️
أوس : في شي مش مفهوم دارين ...في معلومات غائبة 😡
دارين : شن قصدك ؟؟
أوس : قصدي واضح ..يا اما نوح كاشفك ويكدب عليك ..او أنتي تعرفي شي واتخبي عليا دارين 😡
دارين قربت منه : قصدك أني نكدب عليك ...ولما أنتا ماعندكش فيا ثقة ..علاش حاطني اهني ...علااااش 😡
أوس : أني ماقلتش هكي ..ولا عمري فكرت انشك فيك ..بس رأسي قريب يوقف ...في كل مرة نوصل لطريق مسدود ...وانرد لنفس السؤال ..ليش نوح اختارك أنتي ..ليش اتصل بيك ..ليش مش خايف منك تغدري بيه ؟؟
دارين رأسها صدع ..واصلا نفسيتها صفر بعد نقأشها مع نوح ..برمت خذت شنطتها وتبي تطلع : ماعنديش اجابات على تسأولاتك أوس ..عندك نوح امشي اسأله واعرف منه ..أني بنروح مش قادرة خلاص
أوس تنهد ومسك ايديها : دارين خيرك ..شن صاير امعاك ..اول مرة انشوفك معصبة هكي ؟؟
دارين طبست : بالله عليك أوس خليني انروح ..والله العظيم مش قادرة نتكلم ..رأسي بينفجر 😥
أوس طبس عليها : أسف دارين مش قصدي ...بس حتى أني اعصابي مشدودة ..ومش عارف شن صارلي ؟؟
دارين هزت رأسها : ولا يهمك ..الباين أحني الزوز اعصابنا تالفة ..وعلقنا في بعض ..نتلاقوا غدوة ونتكلموا
أوس : أنتي بخير ؟؟ لو حابة انوصلك للشقة ماعندكش مشكلة
دارين : لا لا مافيش داعي ..أني بخير ..خليك في شغلك
أوس هز راسه ..ودارين خذت بعضها وطلعت ..ركبت سيارتها ومشت للشقة ...بس طول الطريق وهيا تبكي ..اول مرة اتحس بنفسها ضعيفة ومش قادرة اتحدد شن تبي ..نوح قلب حياتها قلب ..وحتى تفكيرها مش واضح ..عقلها ايقول شي وقلبها شي تاني 😭
أوس قمعز على كرسي دارين عزق راسه لاوراء ..وعقله خذاه لرغد ...قعد يتفكر شن صار بينهم 👇
أوس عض على فمه وطبس يلعب بفونه على الطاولة : لا خير ..ماتخافيش ...أني بصراحة جايك من طرف نزار...تعرفيه أنتي ؟؟
رغد مستغربة : اي نعرفه ..خيره نزار شن فيه ؟؟
أوس تنهد : من كم يوم كلمني عليك ...قالي أنك عاجبتيه وايفكر فيك من زمان ...وطلب مني نسألك ..لو مافيش حد في حياتك ..حاب ايجيب اهله ويتقدملك رسمي
رغد : وأنت شن قتله ؟؟
أوس : وأني شن دخلني ؟؟ هادا موضوع خاص بيك ..ترفضي او تقبلي شي يرجعلك وحدك
رغد تنهدت واتشوف لعيونه : باهي وأنتا شن رائك فيه نزار ؟؟
أوس يهرب من اعيونها : ما نعرفش ..هوا شاب محترم وطيب ..ملتزم في عمله ..ولو عندي أخت كنت نعطيه من غير تردد ...بس أنتي اااا....
رغد بسرعة قاطعاته : أني موافقة 😑
أوس رفع اعيونه فيها بصدم : شنو ؟!!! 🔥
رغد : زي ماسمعت ..مادامه شاب اكويس وأنتا شايفه يصلح بيا ..ليش لا
اوس زمط وتوتر : اي ..اي هوا اكويس وأني نعرفه من زمان ..بس أنتي متأكدة انك موافقة عليه؟؟
رغد : والله مبديأ اموافقة ..نتعرف عليه ..وانشوف ..لو حسيت نفسي ارتحت امعاه ..ليش لا ..أني ماعنديش حد في حياتي ولا نستنى في حد ..علاش بنرفض ؟
أوس عض على فمه وبرم وجهه ..وكان واضح ان تضايق ..نفخ ورد شافلها : براحتك ..يعني انقوله انك موافقة ؟؟
رغد صبت : اي قوله اموافقة ماعنديش مانع
وبرمت تبي تمشي ..وبعدين التفتت عليه : تعرف ..عطيه رقمي لو سمحت ..عشان نتواصل امعاه قبل مايصير اي شي رسمي
وعدت رغد بسرعة قبل ما أوس ايرد عليها ...صبا وهو متنرفز : اخر الزمان بنشتغل خطابه بينكم 😑
****************(( الكاتبة أم ناصر ))
قاسم في مكتبه ..كان يتكلم بالتليفون مع حد من المسؤلين لاكبار ..صكر المكالمة وهو يفكر في كلام أوس ..يوم اللي قبض على نوح 👇
بعد ساعة خش أوس ..وامعاه نزار ..نزار رقى فوق ...واوس خش على مكتب قاسم ..وفي ضحكة نصر على فمه 😏
أوس ضرب التحية : سيدي
قاسم : اهلين أوس ...تفضل
أوس قمعز : في موضوع مهم سيدي بيقلب كل الموازين
قاسم شال النظارة الطبية وشبك ايديه في بعض وحطهم على المكتب : اييه نسمعوا منك ...إن شالله خير
أوس : كل خير سيدي
قاسم : باهي ..شن صاير ؟؟
أوس : اول شي أنتا تعرف أني قبضت على نوح الحاج اليوم ؟؟
قاسم : اي ..وهادا شي كويس ..خاصة ان موضوع الهروب صار امس ..يعني بسرعة ماجبته من جديد
أوس : الموضوع مش زي ما حضرتك فاهم سيدي ...نوح الحاج في الحقيقة هوا اللي سلم نفسه
قاسم : شني ؟؟ ..غريب ..وعلاش هرب مادام يبي ايسلم نفسه تاني يوم ؟!!
أوس : وهادا علاش جيت بنتكلم امعاك توا ..ونحكيلك كيف صار من الاول
وقعد أوس يحكي لقاسم شن صار ...طبعا أوس وهوا في طريقه للسجن اتصلت بيه دارين ..وطلبت اتشوفه في مكان معين ضروري ..و اوس على طول رجع بالسيارة ومشى للمكان
نوح قبلها كان طالع من الشقة بس قبل يطلع اتصل بالشخص المجهول اللي كلنا خاطرنا نعرفوا من هوا ..بس هوا في الحقيقة شخصية مش معروفة بالنسبة لاحداث الرواية السابقة...ومافيش حد يعرفه الا نوح ..كان امعاه في نفس العصابة
نوح امصبي في نفس المكان اللي قبض عليه فيه أوس ..وقفت سيارة ونزل منها شاب في نهاية الثلاثين ..قرب من نوح وضمه ...كان له فترة طويلة مش شايفه
منصف : كيف حالك نوح ؟
نوح : بخير لعند توا ...بس مش عارف لامتى ؟؟
منصف : إن شالله ديما بخير ..ماينخافش عليك ..وخاصة بعد الكلام اللي سمعته 😂
نوح ابتسم : حتى أنتم سمعتوا عليا ؟😏
منصف : اخبارك اول باول عندنا
نوح : خيرك عطلت عليا ..واخبارك انقطعوا عني ؟؟
منصف : تعرف التهم السياسية اللي لافقوها ليا ..خلتني نهرب من البلاد ...واول ماعرفت بالعفو العام اللي صار ..رجعت طول والباقي أنتا تعرفه
نوح : شن اخبار الوثائق والملفات اللي عندك ..في شي جديد ..والا نفس القديم ؟
منصف قرب من نوح : تي المرة هادي كبوات كبار في البلاد بيطيحوا ..واسماء فوق ..فوق ..ماتتصورش كيف
نوح : جبت الامانة اللي قتلك عليها ؟؟
منصف اتلفت يمين ويسار وطلع ظرف كبير من تحت جاكته ..وعطاه لنوح : هذا شي بسيط خلينا انشوفوا شن بيصير قبل ..لو صاحبك نجح فيهم ..نكشفوا لاوراق المهمة ..وحدة وحدة
نوح خذا الظرف شاف لاوراق من فوق وفتح جاكة التوتة حطهم جوا وصكر : لازم انجرب ومش خاسر شي ..السجن والهروب عندي واحد توا ..يا اما نعيش حياتي كيف الناس ..يا اما نقعد في السجن ..خير من نبقى انلود من مكان لمكان والخوف امسيطر على حياتي في كل وقت
منصف : خيرك نوح ..كلامك متغير ...في شي صاير امعاك وأني ماعنديش العلم ؟؟
نوح ايشوف لقدام : تقدر تمشي توا ...وحنكون على اتصال بيك ..بنفس الرقم ..بس أني اللي نتصل مش أنتا 😑
منصف ضحك وهز رأسه : اللي يقدر عليك ايجي يحاسبني... نوح الحاج 😂
نوح ابتسم وطبس ...ومنصف رفع ياقة جاكتة وحط ايديه في جيوبه : بنمشي وانخليك ...بس نتمنى المرة الجاية انشوفك وأنتا حر طليق نوح
نوح : ربي كريم ..بس أنتا رد بالك من نفسك ..رقاب ناس هلبا بين ايديك
منصف : ماتشيلش هم ...نتلاقوا يا صاحبي
نوح : سلم على باقي الجماعة
عدا منصف ...ونوح مازال واقف في مكانه ....لعند بعد فترة ..وقفت سيارة أوس ونزل منها وكان باين عليه ايدور على حد ...قرب من السياج امتاع الطريق ..وطلع فونه عشان يتصل لكن نوح قرب منه : ادور على حد يا أفندي 😏
أوس شافله بصدمة ..وحط الفون في جيبه : نوح الحاج ...عاش من شافك
نوح : ماتستناش على الفاضي الدكتورة مش حتجي اهني
أوس قرب منه : نقدر نعرف شن قاعد ايصير اهني ..من وين عرفت دارين مكانك ..وأنتا علاش جاي برجليك لعندي ؟؟
نوح : جيت لاني مش خايف من شي عشان نهرب ..جيتك وعندي عرض يما تقبله واتكون قد المسؤلية ..او ترفضه وكل حد منه يرجع لمكانه لاول
أوس : عرض شنو ...أنتا ناسي انك هارب من السجن وأني توا نقدر انرجعك ليه من غير تفاوض
نوح شال نظارته : وأنتا ماتنساش اني جيتك برجليا ..ومش انت عرفت مكاني بذكاءك 😏
أوس قرب منه معصب : شن تبي نوح ..على شنو تبي تساوم المرة هادي ؟؟
نوح : بنساوم على حريتي ..بس حتى أنت لو قدرت تثبت براءتي ..بتكسب من ورايا
أوس : شن بكسب من ورأك ؟ 😑
نوح : مجرد أنك تنهي قضيتي واتحلها هادا في حد ذاته نجاح ليك ...وانت عارف أن القضية ليها اكتر من سنتين اتراوح مكانها 😏
أوس : كيف بتحلها وأنت من يومين في رقبتك دم سجين مازال مش معروف علاش قتلته 😡
نوح : جبر مش أني اللي قتلته ..قتلوه كريم وجماعته
أوس : كريم ؟!! شن تخرف أنتا ..شكله عقلك جاب اخره
نوح طلع التحليل من جيبه : هادا تحليل دم درته أمس ..يثبت وجود مادة مخدرة في دمي ..واللي المفروض تعرفه أن طول فترة حبسي مع جبر كنت فاقد للوعي تماما
أوس خذا التحليل شافه بشك : وشن يثبت صحة التحليل ..ممكن ايكون مزور عادي
نوح : تقدر تتأكد من الدكتورة دارين هيا اللي سحبت الدم ورفعاته لمختبر بنفسها
أوس : وأنتا وين شفت دارين ..وكيف وصلت فيها 😡
نوح : مش هادا موضوعنا افندي ..ولو مش مصدقني ..مستعد نمشي امعاك لاي مختبر ويسحبوا مني دم تاني ..وأني متأكد ان مازال في نسبة مخدر مازال قاعدة لتوا
أوس ايشوف للتحليل ويفكر : وشن مصلحة كريم في قتل جبر ..من وين يعرفك كريم ؟؟
نوح : والله علمي علمك ..اول مرة نشبحه فيها كانت في السجن ..بس نقدر نتوقع من دازه وعلاش حاب يتخلص مني
أوس : ماتنساش أن كريم ضابط ..وماعتقدش بيضحي بعمله وسمعته عشان ايورطك باي شي
نوح : ضابط هه 😏 املا كان اتشوف الاسماء اللي متورطه في الموضوع هادا شن اتقول ..أوس القصة أكبر من اي شي ممكن تتصوره
أوس : عندك دليل على كلامك او مجرد دوة فاضية وخلاص
نوح طلع الظرف ومده لأوس : الفرق بيني وبينكم أني نتعامل مع كل شي بالدليل والاثبات ..اما انتم مجرد فروض وتوقعات ومافيش اي دليل يثبت كلامكم 😏
أوس طلع الاورق ويقرأ فيهم وفتح فمه : من وين جبت الاوراق هادي ؟!!
نوح : مش من جدك السؤال هادا ...والا أنتا ماكنتش تعرف نوح طول السنتين اللي فاتوا ؟؟😏
أوس : نوح مش وقت الغاز ..الاسماء الموجودة في الاوراق هادي اسماء كبيرة ومعروفة ..لو الاوراق هادي مزورة بنطيحوا أني وياك في مشاكل ماليهاش حل
نوح : لو الاوراق هادي مزروة ..هل كانوا حالوا يدبسوني في جريمة قتل ويتخلصوا مني ..لو الاوراق هادي ماتهمهمش هل أني اصلا مازلت عايش لتوا ؟؟
أوس : كلامك متناقض ..ليش امخلينك عايش لتوا ..لو كلامك صاح ؟؟
نوح : لانهم عارفين اني مش بروحي وفي ورايا ناس تانية ..ولو اي شي مسني ..الدنيا بتنقلب عليهم
أوس : وعلاش الاوراق طلعوا في الوقت هادا بالذات
نوح : كل شي ليه وقت ..الموضوع مش ساهل ..وكل اسم بيطيح بيجيب اسماء تانية وراءه ..وكان لازم انكونوا جاهزين لاي جديد ويكون عندنا اكبر عدد من الدلائل
أوس رجع يقرأ في الاورق : الكلام هادا خطير ..مش بس عليك ..حتى عليا وعلى كل المؤسسة
نوح : وهادا علاش قتلك لو تقدر او لا ...عشان مازال في شي أكبر من هكي ...والامر يبي نفس طويل وقوة صبر ..وتحمل لجميع النتائج
أوس : كنت متأكد ان كريم وراه شي ..بس متوقعتش ايكون شرطي فاسد ..لدرجة هادي
نوح : لدرجة هادي وأكتر ..كريم عينة من ناس قذرة اكبر منه ..ومازال الصدمة الكبيرة لقدام
أوس : يعني جبر وكريم كانوا مع بعض ..باهي كريم ليش باع جبر وتخلص منه
نوح : لانه غبي ومافهمش اللعبة من الاول ..هو كان طعم وفي جميع الاحوال كانوا حيتخلصوا منه ..بس بعد الشي اللي سمعه اللافي وللاسف دفع حياته ثمن ليه ...كان لازم ينهوا حياة جبر
أوس : قصدك حسام قتله جبر وكريم ؟؟
نوح تنهد : اي ...حسام يوم التقييم ..سمعهم يتكلموا ...وخافوا يحكي شي او ايكون شاهد ضدهم..فقرروا يتخلصوا منه ...وفي طريقهم تخلصوا من جبر ..عشان يضربوا عصفورين بحجر واحد ..ومنها يدبسوني بجريمة قتل
أوس : وشن حيستفيدوا من تلفيق جريمة قتل ليك ..أنتا محبوس بجميع الاحوال ؟؟
نوح : اي اني محبوس ..بس جريمة عن جريمة تفرق ..وكل محاولتهم مضايقتي بالسجن ..من مشاكل وقتل لاصحابي ..واخر شي جريمة القتل ..كانت عشان يلقوا شي ايقايضوني بيه ..حريتي مقابل..الاوراق والمستندات اللي عندي
أوس : عندك اوراق تاني غير هادي ؟؟
نوح : هادا شي خاص بيا ...أكيد مانبيش انسلم رقبتي ليك مرة وحدة ..الاوراق هادي مستندات توثق كل شي من ..تهرب ضريبي ..ورشوة ..وفساد في المال العام وغيره ...لو اتحب اتصدقني واتكمل امعايا ..باهي ..ولو خفت على نفسك وعلى شغلك ايطير منك ..تقدر تقبض عليا وتنسى كل شي ...وأني نعرف كيف انجيب حقي بطريقتي
أوس تنهد وايفكر ...وبعدين قرب من نوح : وشن معنى أني ..ليش فكرت تحكيلي ..شن امخليك تتأكد اني حنساعدك وانصدقك ؟؟
نوح : زي مافي شرطي فاسد ...أكيد في شرطي شريف ..وأني نعرفك من زمان ..ونعرف قد ايش اتحب شغلك ومخلص ليه ..وطبعا كنت متأكد مش حتصدقني الا بالدليل ..وهادا علاش هربت من الاول
أوس : كيف قدرت تهرب ...من ساعدك ؟؟
نوح ابتسم : ماتخلينيش انشك في ذكاءك ...ولو يا أفندي 😏
أوس عض على فمه ..وبحت بعيد ..كأنه كان يحسب في حساب كل شي ..قبل مايقرر شن بيدير ..وبعدين قرب من نوح : حنمشي امعاك في اللعبة هادي ...بس لو يطلع كلامك كدب يا نوح ..عليا وعلى أعداي ..وربي مانرحمك ..واتشوف وجه جديد عمرك ماشفته 😡
نوح : شوف شغلك ..وأني عند كلامي ..بس اول شي ضروري اللي اسمه كريم ايطيح هوا واللي يساعد فيه في السجن
أوس هز رأسه : لو كلامك صاح أكيد بيطيح ...بس لازم مافيش حد يعرف شي ...ولازم الامر يبان كاني قبضت عليك ومش أنتا سلمت نفسك
نوح : ايه ...عادي ..حتى وهيا بتنحسب نقطة عليا ..بس مافيش مشكلة ..تحملت اكتر من هكي ومستعد نتحمل تاني ...بس اهم شي نطلع في اقرب وقت لاني خلاص فديت من الحبس
أوس طلع فونه واتصل بنزار ..وعلى اساس جاءتها معلومة بمكان نوح ...وطلب منه يطلع بدورية ويتلاقوا في مكان ثاني
أوس صكر والتفت على نوح : بنمشي وبنرد عليك ...بس شن يضمن انك ماتهربش تاني
نوح : لو نبي نهرب ماكنتش امصبي قدامك توا ...وأنتا تعرف أني نقدر نهرب حتى برا ليبيا وماحد يقدر يشدني ..بس أني مانبيش نهرب ..مانبيش نطلع من اهني ...نبي انعيش حياتي بشكل طبيعي بس
أوس مافيش قدامه الا انه يصدق نوح ..خذا لاوراق ..وقبل يركب سيارته شاف لنوح : على فكرة مش عارف اتحب تعرف او لا ...بس حسام طلعت نتيجة التقييم امتاعه ..واسمه جاي من ضمن السجناء الناجحين في الامتحان
نوح قلبه نغزه وحس الدم يغلي في عروقه ..والشي هادا بان في قبضة يده اللي صكرها بغضب 😤 : أني ساهل تقدر اتبلغني وعينك في عيني ..بس بنسألك سؤال ..تقدر اتبلغ أمه وبوه بالخبر هادا وانت اتشوف لعيونهم عادي ؟؟
أوس طبس ويده على رقبته : كنت عارف انه مات مقتول ..بس مافيش دليل ..حتى تقرير الطبيب الشرعي ..قال ممكن منتحر وممكن مقتول ..يعني مافيش شي أكيد
نوح : وأنتا شن خلاك تتأكد انه مات مقتول ؟؟
أوس : ماتنساش أني ضابط تحقيق ..وعندي خبرة اتخليني انفرق بين القتل والانتحار ...بس في شغلنا مافيش حاجة اسمها عرفت او تأكدت ..لازم من دليل ..وأني نعرف من وين انجيب الدليل المرة هادي
نوح سكت وماردش عليه ... وأوس ركب سيارته ومشى استنى نزار والدورية في مكان اخر ..وباقي القصة أنتن عارفاتها
قاسم بعد سمع القصة من أوس ..وشاف لاوراق ..كانت صدمة بالنسبة ليه ..التحدي المرة هذه كبير ...الموضوع اكبر منهم ...كان لازم يحددوا موقفهم ..لو قرورا يفتحوا الملف ..لازم يتحملوا كل النتائج ..ومنها انهم مرات رقابيهم اطير لو ثبت عكس كلامهم ...وهنا ايبان معدن الانسان لو هوا شريف ويحب بلده او مجرد انسان اناني ايفكر في نفسه وبس
الافندي قاسم بعد الاجتماع مع أوس ..خذا لاوراق ومشى لاول شخص عنده فيه ثقة انه يساعدهم ..وكان مكتب وزير الداخلية ..هادا الشخص الوحيد اللي ممكن يوقف امعاهم لو انفتح الملف
****************
أوس بعد طلعت دارين صبا وطلع ومشى قمعز في مكتبه ..وجاء نزار خش عليه : سلام
أوس : اهلين 😑
نزار قمعز : خيرك اليوم قالب وجهك ؟؟
أوس : بالك منك ومن سكنتك على رأسي 😑
نزار : افندي اسف لو كثرت عليك ..بس أني من زمان نستنى في الموضوع هادا ..ونبي نعرف شن قالت عشان نرتاح
أوس : اي ..بس أنتا عارف الشغل اللي فوق رأسي ..مش فاضي لقصص الحب والكلام هذا 😒
نزار : يعني شن صار ..ماتكلمتش امعاها
أوس : توا كيف روحت من عندها 😑
نزار : باهي ..وشن قالت ..شن صار ؟؟
أوس : اهدأ علاش مستعجل ..ماقالت شي البنت 😑
نزار : كيف ماقالت شي ؟؟ يعني ماتبيش والا كيف ...تعرف شنو ..عطيني رقمها بعد أذنك وأني توا انكلمها بروحي
أوس : مافيش داعي البنت قالت انفكر وانرد عليه ..اصبر يومين بس 😒
نزار : يعني موافقة والا لا ...شن حسيت أنتا ؟؟
أوس : واني شن عرفني ؟ ..خلاص البنت قالت عطيني يومين انفكر ..ليش طاير ومستعجل ..اصبر اشويا بس 😑
نزار مقمعز ويتململ في مكانه ..تنهد ورضى بالامر : اااااوفه باهي مش مشكلة نستنى يومين ..صابر من زمان نقدر نصبر يومين تانيات
أوس : 😒😒
*************(( الكاتبة أم ناصر ))
رغد روحت للحوش ودمعتها على خدها ...مايعرفش أوس كيف قهرها لما جاء عشان يحكي امعاها على موضوع نزار ...لان هادا بالنسبة ليها انه مش مفكر فيها ...وعنده عادي كان تتزوج غيره ..وهذا قطع اخر أمل عند رغد من ناحية أوس ..في الوقت اللي حست بيه بدأ يهتم بيها ويشوفلها بنظرة تانية ...بس هوا هدم احلامها فوق رأسها ..والشي هادا خلاها اتفكر بجد ترتبط بنزار ..مش عشان تقهر أوس لا ..بس عشان فعلا هيا ملت وتعبت من انتظار حب أوس اللي مازال مش عارف في شنو ايفكر 🤷🏻♀️
أما دارين الليل كان طويل عليها ..وهيا اتفكر في كلام نوح ..وكيف تغير بعد رجع تاني للسجن ..هيا خايفة منه ..مع انها بدأت اتصدق انه بري من كل التهم الموجهة ليه ...وخاصة بعد سلم نفسه لأوس بالاتفاق امعها ...بس نوح في حد ذاته غامض ودارين حاولت تعرف كيف ايفكر وشن يبي منها بالذات ...بس نوح في كل مرة يعرف يهرب منها ..ويتملص من اي جواب
دارين اتبان ضعيفة ديما قدام نوح ..وهادا مش من طبعها عادةً ..بس هيا اتحب نوح بشكل غريب ..لانه اول حب في حياتها ..زايد ان نوح يعرف كيف ايخلي الواحد ايحبه ويتعلق بيه ..وحتى مايعرفش عنه اي شي ...بس شخصية نوح تنحب ..اولا شاب وسيم ..وملامح الرجولة طاغية عليه وعلى تصرفاته + ان نوح الغموض اللي يلف حياته ايخلي عندك فضول تتعرف عليه وتحاول اتقرب منه ..مهما كنت خايف او شاك فيه 🔥
دارين اتفكر ..وخطر عليها زيارة مروة ...زعما نوح طلع وشافها او لا ...بس هيا متأكدة منه طلع ..لان نوح ديما عند كلمته ..ومادام قال بيطلع بيشوفها ..معناها اكيد شافها ..والشي هذا زاد النار في قلب دارين 🔥
زعما شن صار بين مروة ونوح 🤔 ...تعالوا نعرفوا 👇
نوح على موعد الزيارة ..جاءه الحارس وطلعه ...طلع نوح وهادي كانت اول مرة يطلع زيارة ...بس الزيارة كانت في مكتب المحقق ..لان اليوم اصلا مافيش زيارة ...بس مروة في كل مرة امعاها امر من النيابة
نوح خش للمكتب كريم ..لاقى مروة مقمعزة ..وكريم على كرسيه يتكلم امعاها ...لما نوح خش ..كريم صبا ..وصكر جاكته : وهادا نوح جاء ...أني طالع عشان تاخذوا راحتكم 😉
غمز لنوح وطلع ..😏 ومروة صبت بسرعة وضمت نوح ..بس نوح امصبي من غير اي حركة لان ايديه مكلابشات
مروة وخرت عنه وحطت ايديها على للحيته : شن اخبارك نوح ..شن الكلام اللي سمعته ..صاح 🥺
نوح شافلها من فوق لتحت ..ومشى قمعز 😑
مروة قمعزت جنبه ..ويدها في شعر نوح تلعب على خصلاته : خيرك نوح ..كل مرة اتورط في نفسك أكتر ..وأني نستنى فيك امتي تطلع من اهني 🥺
نوح شافلها زين : وليش تستني فيا 😑
مروة قربت منه وبدلع : ليش أنتا انسيت اللي بينا نوح ..انسيت كيف كنت انحبك ☺️
نوح رفع حاجبه : كنتي ؟؟!!
مروة : قصدي من زمان وحتى توا ...مستحيل نقدر ننساك نوح ...اصلا أنت مافيش حد يقدر ينسأك ..يابال أني كم سنة امعاك في الجامعة 🥺
نوح تنهد : شن تبي مروة ..علاش جاية اهني ؟؟
مروة عضت على فمها ..ولاصقت فيه ...و اتحرك في اصابع يدها على فخد نوح : شني رايفت عليك ..والا أنت مش مرايف عليا 🥺
نوح ايشوف ليد مروة على فخده ..وقرب وجهه منها : ليا أكتر من سنتين محبوس ...وقبلها كنت برا ...وحضرتك عمرك مافكرتي اتشوفيني ...شن جابك ليا في الوقت هادا بالذات ؟؟
مروة توترت وحطت يدها على خد نوح ..ومررت صبعها على فمه : نوح ليش الاسئلة هادي كلها ..ماكنتش نعرف أنك محبوس ..وسألت عليك كم مرة ..ومن زمان ..لعند قدرت نوصلك
نوح ايشوف لفم مروة ..وهيا قربت منه ...بس نوح صبا بسرعة : من وين جاية مروة ..منو باعتك ليا ..شن تبي مني بالضبط ؟؟
مروة صبت وقربت منه مسكت ايديه للمكلابشات واتشوف لعيونه : جيتك بروحي نوح ...مافي حد بعثني ليك ..جابني شوقي ليك بس 🥺
وقبل ايرد عليها نوح او يتكلم ..خشت مروة بين ايديه وشدت وجهه بيديها وبأسته على فمه ...نوح انصدم ومقدرش ايتحرك ..بس بعدها رفع ايديه ودفها بعيد عنه وقرب معصب منها : تبي تتكلمي شن تبي والا لا 😡
مروة : نبيك نوح ..نبي مصلحتك ..نبي انطلعك من اهني 🥺
نوح : هه 😏 اطلعيني من اهني؟؟!! ..كيف ..ومني قالك نبي نطلع ؟؟
مروة تبي اتقرب منه ونوح وخر عنها : خليك في مكانك 😑
مروة تنهد بحزن : تمام ...وأني اسفة لاني فرضت عليك شي ..عارفة ماتحبش حد يفرض عليك شي بالسيف ..بس كنت مرايفة عليك وماعرفتش كيف نتصرف 🥺
نوح : مروة ماتخشيش الدوة في بعض ..سألتك سؤال ردي عليا ..أنتي من باعتك ليا ؟؟😑
مروة : ليش ماتبيش اتصدق اني جيتك من نفسي 🥺
نوح هز رأسه : الكلام امعاك خراف زايد ...معادش نبي انشوف رقعة وجهك الا لما تقرري تتكلمي زي البنت الكويسة ..واتقولي شن تبي ...غيرها ماتتعبيش واتجي 😒
ومشى نوح لباب ..ومروة جت بسرعة وراءه : نوح وين ماشي ..الزيارة مازال ماتمتش 🥺
نوح شافلها من فوق لتحت : بس أني وقتي امعاك تم ..من زمان 😑
فتح الباب وجاء الحارس خذاه ..وكريم كان واقف يحكي مع ضابط برا ..ولما شاف نوح طالع ..رد وخش لمكتبه
**********************
دارين بعد تفكير طويل ..قررت تمشي نفس قبل للعمل من غير حجاب ..وخاصة كل ماتذكر ان نوح اكيد شاف مروة 🔥
وفعلا ثاني يوم مشت ..بس مارقتش للمكتبة كانت خايفة اتشوف نوح ...بس نوح اصلا ماجاءش للمكتبة ..وكم يوم ودارين اتجي للعمل ..بس بعد يومين رقت للمكتبة وكانت خايفة ..بس نوح مش باين ...عمي يونس بس قاعد ..ودارين قمعزت وتكلمت معاه كم مرة ..بس ماحاولتش تسأله على نوح
اما أوس مازال ايماطل في نزار ...وهوا مش عارف ليش ايدير في الشي هادا ...بس كان متوتر ...بالذات كيف قاعد ايخطط ويفكر ..كيف يبي ايطيح كريم واللي معاه في كمين ..وخاصة ان نوح عنده محاكمة قريب ..ولازم ايلم الموضوع بالدلائل ..وايكون يوم المحكمة مستعد
دارين لها اسبوع ماشافت نوح ..والشي هادا خلاها عصبية ..ولخبطها بكل ...والشوق ليه دار فيها شوراع 🔥
أما نوح كان في عالم ثاني ...كان عنده اتصالات بناس يعرفهم من زمان ..ويحاول يجمع اكبر عدد من المستندات اللي تثبت براءته ..ومع انه عقل كان مشغول بدارين ...بس امخلي كل شي لعند يطلع من السجن ..عشان يعرف يتفاهم امعاها بطريقته ..لان في السجن حركته مقيدة ..بس هوا صايع وحتى هو محبوس بس يعرف كيف يتعامل امعاها 😏
دارين في الليل معاش قدرت تتحمل تبي تسمع حتى صوته ..بس ماتبيش تتصل بيه برقمها ..طلعت وخذت فون امها ..واتصلت بيه 😁
نوح راقد في سريره ..وكان يهدرز مع عمي يونس حتى هوا في سريره ..اما هيبة كان راقد
حس بفونه ايهز ..نزل من على السرير ..شاف برا الزنزانة من شبك الباب ...مافيش حد ..طلع الفون ..ورد رقد على سريره
نوح ايشوف لرقم الغريب ..ويفكر ...بس هوا متاكد مافيش حد يعرف رقمه غير دارين ومنصف
نوح فتح الفون وساكت 😑
دارين نفسها انقطع ..وهيا تستنى فيه يتكلم 😣 بس نوح قاعد ساكت 😑
دارين ساكتة ونوح صكر المكالمة ...بس دارين ردت اتصلت بيه من جديد
نوح فتح وساكت ..بس قدر يسمع صوت انفاسها لانها خايفة 😏
نوح : بتحكي والا بتقعدي ساكتة ..غزالتي 😏
دارين : 😳😳😣
نوح معصب : دارين نعرف أنكي أنتي ...تكلمي 😑
دارين ساكتة وتسمع في صوته 🥺❤
نوح : ماتبيش تتكلمي يعني؟؟ ...علاش حركات المراهقة هادي ..ليش ماتتصلي بيا برقمك ..وتحكي شن في عندك ..والا عاجبك حالنا هكي ؟؟ 😑
دارين صكرت ودموعها نزلوا 😭
نوح هز راسه وعصب 😒
عمي يونس : بالشويا على البنت ...خيرك امعاها ؟؟
نوح : هيا خيرها امعايا ماتبيش تفهم عليا ...بتجلطني بعنادها 😤
عمي يونس : حتى أنتا مش مقصر امعاها ..خف عليها نوح....البنت شكلها اتعزك وانت بهدلتها امعاك
نوح : مازال ماشافت مني شي 😑
عمي يونس : نوووح ...حرام....ماتنساش انها حباتك وأنت سجين وماتعرفش عنك شي ..سلم ولدي ..حنن قلبك عليها
نوح نزل رأسه وشاف لعمي يونس من فوق : أنتا تعرف أني انخاف عليها ..وهادا كله من خوفي عليها ...بس أني هادا طبعي ومانعرفش انغيره ..لازم تتعود عليا زي ما أني ...بتحب نوح الحاج زي ماهوا 😑
عمي يونس تنهد : ربي يهديك ياولدي
نوح رد رقد : يهدينا جميع ...بعدين تحمد ربها أني محبوس ..مازال نطلع اتشوف شن مستنيها 😒
عمي يونس : شن مازال بتشوف ...ساد اللي شافته منك
نوح ساكت وماردش عليه ...بس في باله بتشوف كيف انحبها ...بتشوف كيف هوا الحب اللي عمرها مايعرف واحد غيري ايوريهولها ...حب نوح الحاج مايشبهش اي حب تاني 🔥❤
نوح غمض اعيونه وفونه رن ..بس المرة هادا دارين متصلة برقمها 😏
*******************
أوس متكي على الكنبة في شقته ورن فونه لاقها رغد
أوس : نعم 😑
رغد : ايوا ...شن اخبارك
أوس : بخير الحمدالله ..شن أخبارك انتي
رغد : تمام ..تسلم ...وينك أنتا ؟؟
أوس قمعز وابتسم : قاعد ..بس ملتهي في العمل ...علاش تبي اتشوفيني ؟ 😏
رغد : وليش بنشوفك ..شن نبي في وجهك ؟ 😒
أوس : بتحكي اكويس والا كيف ؟ 😤
رغد : تي ارخي روحك يابيبي 😒
أوس : بيبي في عينك ...شن تبي رغد ...علاش متصلة توا 😤
رغد : ممكن نعرف ليش نزار لتوا مازال ماتصلش بيا ..مع اني من اسبوع قتلك خليه يتصل 😒
أوس : وأنتي على شنو مستعجلة ...اول مرة انشوف بنت تبي الولد ايكلمها بسرعة 😡
رغد : مستعجلة نبي نتزوج ...في شن خير مني بنات خالاتي ..اندادي وبصغارهم وكل يوم في مكان 😒
نزار عض على فمه : وأنتي تحسابي الزواج اصغار ونشان من لمكان لامكان ..راه مسؤلية وأنتي ياودي مانظني تقدري عليه الزواج 😑
رغد : أوس بلا دوة زايدة ..أني بنتزوج شن دخلك بيا ..المسؤلية بيشيلها نزار ..شن واجعك أنتا 😒
أوس صبا ومعصب : اتزوجيه من شادك ...وأني طلعوني منه الموضوع هادا 😤
رغد : اي حتى أني انقول التعطيل كله منك ..وجهك نحس عليا ..الا مانلقى طريقة نتصل بيه نزاري ...باااااي 😒
صكرت رغد الفون في وجهه أوس ..وهوا قريب يطربق ..عزق فونه في الساس جابه كل طرف في مكان ..ويلعن ويسب في عمتكن رغد 😤 😁
*******************(( الكاتبة أم ناصر ))
نوح ايشوف لرقمها ورد : الو
دارين : ايوا 🥺
نوح : ماكان من الاول 😑
دارين : نوح 🥺
نوح : نعم
دارين : نبي انشوفك نوح ..استاحشتك هلبا 🥺
عض على فمه ..وفمه رجف ..حمد ربه انها ماتشوفش فيه 🔥
نوح : وأني نبي نشوفك غزالتي ..بس أنتي ماتبيش
دارين : نبي نوح ..والله العظيم نبي ..أنت مش عارف شن قاعد ايصير فيا
نوح : شن قاعد ايصير ؟؟
دارين : نوح أني مش قادرة انعيش من غيرك ..أني مريضة بيك 😥
نوح قمعز وحط يده في شعره : كملي دارين قولي
دارين : أنت زي المرض ماليهش علاج ..كل يوم ينتشر في كل خلايا جسمي ..انوض ونرقد على صورتك ..في كل دقيقة انفكر فيك ..حتى النوم انسيته لانك بعيد عني ..
نوح غمض اعيونه ونفسه منقطع : بالله عليك أسكتي أسكتي ..دارين ..أسكتي خلاص 🔥
دارين تبكي : أنحبك نوح ..أنحبك ..أنحبك 😭
نوح جسمه يرجف ..حط يده في فمه وعض صبعه ..تنهد ورد رقد على ظهره : من وين طلعتيلي أنتي من وين ..ليش جيتي في طريقي دارين ..ليش ..طيرت عقلي وحتى الكلام ضاع مني
دارين ساكتة 🥺🥺
نوح : ردي خيرك سكتي ..والا اللي عليك درتيه ..جننتي أمي في الليلة الحرفة اهيا ..شن بيصربني لصبح .شني 😡😤
دارين ابتسمت : يعني بنشوفك غدوة الصبح
نوح تنهد : الصبح وقبل كل شي بنلقاك مزروعة في المكتبة ..فاهمة عليا والا لا ؟😡
دارين : حاضر
نوح : دارين ..غزالتي ..نبيك اتفرحي قلبي غدوة ..مانبيش نزعل منك.. بربك
دارين : ايصير خير
نوح : إن شالله
دارين : باهي خلاص بنصكر ونرقد مادام سمعت صوتك ☺️
نوح ضحك وهز رأسه : بترقدي ..ايييه ..نوم العوافي ..طيرتي النوم من عيني ..وبترقدي ..ساهل يا دارين لما انشوفك الصبح بس ..نعرف كيف نخلص منك 😏
دارين ضحكت وصكرت الخط 🙈🙈
نوح صكر ..ويسمع في عمي يونس يضحك 😂..😤
عمي يونس : شن صارلك نوح ؟؟
نوح حط يده على وجه : حلفتك بالله حاج يونس ماتزيدش عليا ..ابروحي مش عارف الليلة النم هادي كيف بتعدي 😤
عمي : 😂😂😂
********************* (( الكاتبة أم ناصر ))
أوس في مكتبه خش عليه نزار : صباح الخير 😑
أوس : خيرك قالب وجهك على الصبح 😡
نزار قمعز : اوووفه ..شن صار خلاص راني مليت ..بنعدي انشوفها في حوش اهلها وخلاص 😤
أوس : بتشوف من ..تي غير قمعز بلا دوة فاضية 😑
نزار : باهي ترا كلمها توا ممكن منحرجة اتكلمك هيا ؟؟
أوس ضحك بهزوا ويتمتم بصوت واطي : ههه قال منحرجة قال ...املا ماتعرفهاش 😒
نزار : شن قاعد اتقول ؟؟
أوس : ماقلت شي ..فوني تكسر أمس
نزار : عليك قصة ...باهي نمشي انجيب فوني من المكتب وانتا كلمها ..تمام ؟؟
أوس : تمام 😑
طلع نزار مشى جاب فونه ..وهوا راد تلاقى مع دارين ..شافلها زين ..وهيا قربت منه : صباح الخير نزار ☺️
نزار : صباح النور
دارين : كنت اندور فيك ..تعرف رغد صاحبتي والا لا ؟؟
نزار ضحك : اي ..اي نعرفها
دارين : تمام ...هيا قاعدة تستنى فيك في نهاية الطريق ..قالتك تعال نبيك
نزار ضحك مش مصدق : احلفي ...تتتتمام تمام ..بنمشي توا
دارين ابتسمت وعلى طول رقت للمكتبة ❤
نزار يبي يطلع ..وبعدين رد وخش على أوس : اوكي يافندي ..خلاص انحلت القصة
أوس مستغرب : شن هيا اللي انحلت ؟؟
نزار : مافيش وقت نشرحلك ..بس رغد تستنى فيا على الطريق ..نتلاقوا بعدين
طلع نزار بسرعة ...وأوس غمض اعيونه وعصب ...ومش عارف شن ايدير ...طلع ملف قدامه ..وحاول ايركز ..بس مش قادر ...صكر الملف ..خذا مفتاح سيارته وطلع من مكتبه 🔥🔥
نوح من الصبح حايس ...وماصدق امتى عمي يونس فتح المكتبة ...رقى بسرعة ..فتحوا الحرس الباب خش ...قمعز على الطاولة ..واعيونه على الباب 🔥
دارين الحارس فتحلها الباب ..وخشت وعلى طول اعيونها في اعيون نوح ...وهو صبا 🔥❤
*******نهاية الحلقة 13
اكتبوا رائكم وتوقعاتكم ...ومن الحلقة الجاية الاحداث بتقلب كل شي