#السجين_777
#الحلقة_11
مر الوقت بسرعة ..بعد كم ساعة ...دارين طلعت من العيادة ورقت فوق خشت للمكتبة لاقت العم يونس ..وفرحت عشان تبي تساله عن نوح ليش مختفي اليوم مع انه وعدها ايجي
قربت منه وسلمت عليه وقمعزت اتهدرز امعاه ..وقبل تساله انفتح الباب وخش هيبة بسرعة ..وجه اسود ونفسه مقطوع وقرب منهم
العم يونس صبا : خير إن شالله ..شن فيه ؟؟
هيبة داهش من الجري : نوح ..نوح قتل جبر ..قتل جبر
دارين صبت : 😰😰😰😰
*******************
رغد رقت بسرعة ضربت الجرس كم مرة لعند فكرت ان الشقة فاضية ...قبل ماتسمع صوت حركة جوا ...بعد اشويا الباب انفتح وكان أوس ..بس حالته امبهدلة ..وجهه تاعب وشكله مريض
رغد بصدمة : خيرك ..شن فيك 😰
أوس متكي على الباب بالغصب ...غمض اعيونه وقبل طاح ..لولا رغد خشت بسرعة وشداته مسك فيها ونزل لوطى على الارض
رغد نزلت وقربت منه اتشوف لوجهه : أوس خيرك شن صاير امعاك ..أنت مريض ؟؟
فتح اعيونه : جيبي تليفوني ..تلقيه على الشحن
صبت وخشت بسرعة ...ادور في الفون ..ولاحظت الشقة كيف مبهدلة ..وحايسة ..شافت الفون على الطاولة ..خذاته وردت على أوس
رغد : فونك مقفل أوس
أوس دوبه مفتح اعيونه : حطيته على الشحن من امس ..ومعاش شفته
رغد : أوس هيا امعايا للمستشفى ..وضعك ايخوف ..شن صاير أمعاك ..ليش ماكلمت حد ايجي ايشوفك 🥺
أوس ماردش عليها ..فتح فونه واتصل بنزار : الو
أوس : نزار وينك أنتا ؟؟
نزار : في المكتب سيدي ..أنتا اللي وينك اليوم
أوس : تعلالي بسرعة نزار ..نستنى فيك في الشقة
نزار : مسافة الطريق وانكون عندك
صكر أوس ونزل الفون بتعب وتنهد ...رغد اتشوفله وخايفة عليه وضعه غريب
رغد : أوس الله يخليك ..خليني نأخذك للمستشفى
أوس : حنمشي بس مانقدرش ننزل لسيارة ابروحي ..خلي ايجي نزار ايساعدني
رغد صبت : بنجيب تيشرت غير هادا ..عشان اتغير ..مش عارفة شن صاير امعاك ..وليش قاعد ساكت ع حالك
وخشت جوا جابت تيشرت نظيف ..عطاته لاوس غير تيشرته ..وساعدته لعند صبا وقمعز على كرسي ..وكمل لابس
رغد : كلهم يسألوا عليك
أوس رفع وجهه : من قالك أنتي ؟؟
رغد : كلمتني دارين ..قالت انك ماجيتش للعمل والضابط يسأل عليك
أوس حط يده على وجهه يمسح فيه ..ويحاول يصحصح بس حاله مايطمنش 💔
اشويا وجاء نزار ..خش ولاقى الباب مفتوح ..خش بسرعة ولما شاف رغد انحرج : ااءء السلام عليكم
رغد : وعليكم السلام
أوس : تعالى نزار ..ساعدني عشان ننزل ..مش قادر نوقف على رجليا
نزار ايشوف لاوس ومستغرب ..قرب منه وصباه ..وجت رغد من الجيهة الثانية ...اتساعد فيه ..وطلعوا من الشقة وصكروها ...وركبوا أوس في سيارة نزار ..ورغد ركبت سيارتها وطلعت وراهم
وصلوا للمستشفى ..خذوا أوس للاسعاف ..وخشت امعاه رغد ونزار ...الدكتور يكشف عليه وهما واقفين برا عند الباب
*************(( الكاتبة أم ناصر ))
دارين صبت مصدومة : نوح قتل ..شن تحكي هيبة 😰
هيبة : تعال حاج يونس بسرعة
عمي يونس صبا وجهه تغير : ربي يستر ..ربي يستر ..من قالك أنتا ؟؟
هيبة : السجن كله مقلوب بالقصة ..الحرس فتحوا الباب عليهم ولقوا جبر مذبوح وغارق في دمه
دارين من الصدمة لعند قمعزت 😰..وعمي يونس ارتعد وهو يحاول يمشي مع هيبة ..طلعوا بسرعة من المكتبة . ودارين اتحاول تعرف شن صار وكيف صار ..لكنهم طلعوا قبل ماتفهم اي شي 😥
نوح ايديه ودبشه كله دم ..مكلبش وشادينه اثنين من الحرس وخشوا بيه للحبس لانفرادي ..خشوه وصكروا الباب عليه
كريم واقف في مكتب قاسم ..والاخير معصب ويهزب : معاش عرفت نحنا في مؤسسة حكومية وسجن والا قاعدين في الشارع ..من يومين واحد من السجناء لاقوه مشنوق ..واغلب الظن انه مقتول ..واليوم سجين يذبح سجين اخر ..صدقوني الحوادث هادي مش حتمر مرور الكرام ..ويبقى فيها سين وجيم ..وأنتوا الخاسر الاكبر 😤
كريم : بالنسبة للسجين الاول أني متاكد منه منتحر ..غير الافندي أوس ايحب ايضخم الامور ..وقصة اليوم مش عارف نوح من وين جاب السكين سيدي
قاسم ايخبط بيديه على مكتبه : املا من يبي يعرف ياأفندي من كان أنتا مش عارف ..ليش اتجوا هنا وتشتغلوا اذا كانت لامية تمشي من تحت رجليكم وماتندروا عنها 😤
كريم : أني توا كيف بديت اهني ..ومازلت حتى مش عارف شي عن السجناء ..بس وين الافندي أوس ..علاش مش باين اليوم ..وينه من المصائب اللي قاعدة اتصير
قاسم قمعز : أوس له فترة اموره ملخبطة ..واليوم راح بكل ..أفندي كريم لموا الفضحية هذه بسرعة ..جريمتين قتل في اقل من شهر كفيلة انها اطير واحد منكم من مكانه أنا مش مسؤل عن اي قرر بيجيكم من الوزارة بعد اليوم 😑
كريم : اللي اسمه نوح هوا سبب المشاكل كلها ..أني نعرف شغلي امعاه
قاسم : قضية نوح خذت اكثر من وقتها ..ومازال مافيش شي مثبت عليه
كريم : المرة هادي القضية لابسته لابس ماعنداش من وين يهرب منها ..بيتختخ في الحبوس ..هادا كان ماخذاش أعدام
قاسم : بس حتى أنتا غلطت ولازم تتحاسب على غلطك ..من يحط اثنين بينهم عداوة مع بعض ..وكل يوم شادين في خناق بعض ..القضية مش حتمشي بالساهل
كريم : مستعد نتحمل كامل المسؤلية ..واي اثار تترتب عليها
قاسم : تقدر اتشوف شغلك ..ونبي تقرير كامل خلال اربعة وعشرين ساعة ايكون على مكتبي
كريم ضرب التحية : حاضر سيدي
طلع وخش مكتبه ..استدعى واحد من الحرس ..الحارس خش للمكتب
كريم : عندي اشويا اتصالات ..وبعدين نبي انجي للغرفة التحقيق ..تاخذ اللي اسمه نوح الحاج ...للغرفة ..لعند انجي
الحارس : حاضر سيدي
طلع الحارس ..ومشى خذا نوح من الحبس الانفرادي ..وطلع بيه على غرفة التحقيق
*************************
دارين نزلت من فوق ..خشت للعيادة ...وهيا مازلت تحت تأثير الصدمة ...معقولة اول حب في حياتها يطلع مجرم وقاتل ...مش قادرة اتصدق ..نوح بالنسبة ليها شخص غامض ..بس هيا برغم هكي حباته ..تعودت عليه ..وماتبيش اتصدق انه ممكن يأذي حد 💔
الباب انفتح وخشوا الحرس بجثة جبر ...الدم امغطي صدره و وجهه 😰 حطوه على سرير ..ودارين قعدت اتشوفله وخايفة ..تذكرت يوم اللي اللي جابوا جبر يده مفتوحة وقالوا نوح هوا اللي ضربه بشوكة ..يعني هادي مش اول مرة ..يعني أكيد نوح اللي قتله 😰💔
دارين معاش قدرت تقعد اكثر في العيادة ..خذت شنطتها وطلعت ..تتصل بأوس ورغد بس مافي حد منهم رد عليها
وصلت للشقة مع المغرب وجهها اصفر وترعش ..خشت لاقت أمها مقمعزة في الصالة
صباح صبت منفجعة : كنك شن في ..خالتك نعيمة صارت امعاها حاجة ؟؟ 😰
دارين : خالتي نعيمة ؟؟ كنها شن فيها ؟؟!!
صباح : أنتي كنك ..شن صاير امعاك ؟؟
دارين نزلت شنطتها وتحول في جاكتها : مافي شي ..بس مرهقة اشويا في سجين مات اليوم في السجن
صباح : والله شغلك في المكان هاذا مش عاجبني ..ياريت ترجعي للعيادتك القديمة
دارين شالت شنطتها وتبي اتخش لدارها : خلاص أمي بالله عليك تكلمنا هلبا في الموضوع هادا ..فوتيه
صباح : ايييه ..ربي يهديك ..ماعندي مانقول
دارين قبل اتخش الدار التفتت على أمها : خيرها خالتي نعيمة ؟!!
صباح : خالتك مريضة من كم يوم ..وامبدري اتصلوا بيا قالوا رقدت في المستشفى نحساب حد كلمك لما شفت وجههك اصفر
دارين : بعيد الشر عليها ...لا والله ماكلمني حد ..خيرها ناضوا عليها اجنابها من جديد
صباح لبست نظرتها اتشوف لفونها : اي تبهدلت المسكينة ..بالك غدوة الصبح بنسافر انشوفها ..صارلي وقت مامشيت لخوالك
دارين : والله صاح ..يعني تبي تسافري غدوة ؟؟
صباح : بنسافروا مع بعض ..يومين ونرجعوا مش مطولين
دارين : لا والله فكيني يا أمي ..وربي ماعندي اخلوق للسفر ..تربحي امشيلهم ابروحك ..أني تاعبة وعندي عمل مانقدر انخليه
صباح تمشي وراءها : كيف بنخليك ابروحك ..يومين بس ونرجعوا ..سلم بنتي
دارين تحول في دبشها : ورأس أميمتي مانبي نمشي ..بالله ماتضغطيش عليا ..ابروحي كارها الطريق والتشحوير
صباح : وكيف انخليك ابروحك دارين ؟؟
دارين قربت من أمها : مش ابروحي ..خالتي فتحية قاعدة في شقتها فوق ..لو احتجت شي انكلمها ..ولو خفت نقدر نتصل بأوس او بوي ..يعني ماتخافيش عليا ..سافري وانتي مرتاحة ☺️
صباح : اييه براحتك .عارفة كان صكرتي رأسك على شي معادش نقدر انغير رائك ..وأني اصلا مش معطلة يومين وراجعة
دارين طلعت منشفة : تمشي وترجعي بالسلامة يارب
صباح طلعت وبعدين رجعت شافت لدارين : انوتي للعشي والا تبي تدوشي ؟؟
دارين : لا بندوش قبل ..خمس دقائق بس مش مطولة
صباح : اي خلاص معناها نمشي انجهز ع بال ماكملتي
طلعت صباح ودارين خشت ادوشت ..وصورة جثة جبر في بالها 😣..كلام هيبة ..نوح قتل جبر ..في اوذنها😰 ..بكت وهي تدوش ..ليش كل مرة ايصير شي يعقد الامور اكثر ..والا هادي رسالة من ربي عشان تبعد عن نوح ..بس فعلا مش قادرة تبعد ...لكن لو صح الخبر ونوح طلع قاتل ..أكيد راح تبعد عنه ..مستحيل تقدر اتكمل امعاه ..هادا خلاص مجرم خطير ..شن تبي اتراجي منه 💔
************((الكاتبة أم ناصر ))
رغد واقفة مع نزار ..والدكتور طلع من عند أوس ..وهما جاوا يجروا ...رغد : ها دكتور شن صار ..خيره أوس 🥺
د : أنتي قريبة المريض ؟؟
رغد : ااءء ..اي .اي أني قريبته ..شن عنده دكتور ؟؟
د : بصراحة هوا المريض اصلا عنده برد قوي ..وحلقه ملتهب ومحتقن ..بس المريض عنده اعراض تسمم اخرى
رغد : كيف تسمم ؟!! شن تقصد دكتور ؟؟
د : مازال مش معروف مصدر التسمم ممكن ايكون بسبب غذائي او غيره ..المهم المريض درناله غسيل معدة ..وحاله توا احسن ..صرفتله علاج ..يكمل المصل اللي في يده ويقدر يطلع
رغد : شكرا دكتور ..نقدرو انشوفوه
د : طبعا ..أكيد تفضلوا
عدا الدكتور ..وخشت رغد ونزار على أوس ..رغد مصبية ..ونزار قرب شافه رقد ..بحت في رغد
نزار : وجه افضل ..الباين التعب كان من التسمم
رغد : مانندري عنه شن متسمسم 😒 وقاعد راقد على روحه
نزار ابتسم ويشوف لرغد زين ..وبعدين قرب منها : اني قاعد برا ..عندي اتصالات ..لو احتجتي اي شي كلميني
رغد هزت رأسها لنزار ..وهوا طلع
قربت من أوس قمعزت جنبه على السرير ..حطت يدها على شعره : بعيد الشر عليك ..ربي يخليك ❤
أوس راقد ...ورغد قعدت جنبه اتشوفله وتملا في عينها منه لانها من فترة ماشافته ..وبعد كمل أوس التغذية ..فاق وقمعز ..وكان واضح انه وضعه بعد الغسيل صار احسن
أوس مقمعز وينزل في كم التيشرت : تسمم ؟!!..من شنو صار ؟؟
رغد : مانعرفش ..الدكتور قال ممكن السبب شي انت كليته
أوس ايحاول يتذكر ..مع خشت الدكتور : الحمدالله على السلامة
أوس : الله يسلمك
د : ماشالله ..وضعك افضل من وقت جيت
أوس : الشكر ليكم دكتور
د : ممكن نسألك كم سؤال لو سمحت ؟؟
أوس : اي ممكن
د : أنتا متذكر شن اخر شي كليته قبل تمرض ؟
أوس : ااااا ..مش عارف بالضبط ..بس علاش تسأل ؟؟
د : بصراحة كان عندك تسمم ...واحتمال كبير بسبب شي كليته من مطعم او شي خارج البيت
أوس : ممكن ...هوا اني اغلب اكلي برا من البيت بحكم اني شاب عزابي ..قصدك اني كان عندي تسمم ؟
د : اي ..تسمم الى جانب اعراض برد واحتقان
أوس هز رأسه ومتكلمش ...وفي اللحظة هادي خش نزار وكأنه كان بيقول شي بس لما شاف الدكتور سكت
د : طيب استاذ أوس ...ممكن نعرف منك اخر مكان كليت او شربت منه شي قبل تمرض ..لان طبعا زي ما أنتا عارف لو التسمم صارلك في مكان عام ..هذا يهدد الصحة العامة ..وأنت بكونك شرطي فاهم قصدي أكيد
أوس رفع اعيونه يحاول يتذكر بس ماصارشي : وربي مش متذكر شنو اخر شي كليته اوشربته قبل نمرض ..راسي مشوش اشويا ...بس نوعدك لو تذكرت اي شي أكيد راح انبلاغكم دكتور
د : اسف على الازعاج ..والحمدالله ع سلامتك مرة ثانية..بس لازمك راحة يومين على الاقل مع العلاج
أوس ابتسم لدكتور ..والدكتور طلع
نزار قرب : الحمدالله على السلامة يا افندي
أوس خذا جاكته يلبس فيها : تسلم نزار ..شن لاخبار؟؟
نزار طبس وجه تغير : ااءء ..شن بنقولك السجن في حالة طوارئ
أوس صبا وعقد حواجبه : طوارئ ؟! علاش ؟؟
نزار بيرد وفونه رن ..استأذن وطلع برا يرد عليه
أوس : زعما شن صاير ؟؟
رغد : الله اعلم ...بس لازم ترتاح أوس سمعت الدكتور شن قالك
أوس اعيونه على نزار واقف برا يحكي بفونه : اي ..ايصير خير
نزار كمل وخش : كملت خلاص ..نطلعوا ؟؟
أوس : شن في نزار ..خير شن صاير في السجن ؟
نزار : للاسف جبر لاقوه مقتول
أوس اعيونه طلعوا : جبر ..وحشي ..خيره من قتله ؟؟
نزار : نوح الحاج سيدي ..والدنيا غادي مقلوبة .والافندي قاسم معصب ويتصل من بدري ويسأل عليك
أوس عض على فمه معصب ع لاخر : نوح ...نوح ...ايمتى بنرتاح من هالقصة الزح ...كل يوم مشكلة شكل 😤
رغد ركزت في الاسم ..إن شالله هادا مش نفس الشخص ياربي ..عليك حظ عندك يا دارين
أوس شاف لرغد : روحي أنتي ..وأني بنمشي مع نزار للعمل
رغد : بس الدكتو....
أوس : لا دكتور ولا شي ..لازم نمشي للعمل رغد
رغد : باهي 🥺
أوس شاف لنزار : نمشوا ؟؟
نزار : نمشوا ..هيا
رغد طلعت وراءهم : أوس ..أوس ...ممكن مفتاح شقتك قبل تمشي
أوس قرب منها : علاش ؟؟
رغد قربت منه تحكي بصوت واطي : الشقة خاشة في بعضها وحايسة بكل ...بنعدي نظمها مادام أنت طالع توا
أوس ماعنداش وقت يناقش معاها عطها المفتاح : خليه امعاك كله ..أني بنمشي في سيارة نزار ..لما تكملي خليه عند واحد من الجيران
رغد خذت المفتاح ..وأوس مشى على طول ..بس نزار شاف لرغد وابتسم قبل يطلع وراء أوس
******************
دارين بعد العشاء ..خشت جهزت مع امها شنطتها ..خلاتها اتصلي وتقرأ في قران كيف عادتها كل لليلة ❤
مشت لدارها طاحت على سريرها بتعب ..وعقلها على طول خذاها لنوح ...زعما شن قاعد ايدير توا ..أكيد يضربوا فيه 😣 ..والا الكلام طلع كدب ...تذكرت أوس ..زعما عنده علم باللي صار ؟؟ ..وبعدين تذكرت أن أوس من الصبح مش باين ..وحتى لما اتصلت برغد مافيش رد ..انقلبت رغد وخذت فونها من على الطاولة واتصلت برغد
رغد : الو
دارين : وأخيرا رديتي ..وينك نتصل بيك من بدري
رغد تفتح في شقة أوس : توا غير فضيت ..كنت في المستشفى
دارين قمعزت بخوف : علاش ..شن صاير ..من المريض ؟؟
رغد : أوس يا ستي ..لما جيت الصبح كانت حالته مبهدلة ومريض هلبا ..وبعدين جاء واحد من جماعته في العمل ..خديناه للمستشفى
دارين : باهي شن اخباره توا ...وينه ؟؟
رغد : داروله غسيل معدة وصرفوله دواء ..وطلع
دارين : غسيل معدة ؟؟!! ليش شن عنده ؟؟
رغد خشت واتشوف للشقة : مانندري عنه ..تسمم والا ابصر شنو ..وهوا غير اللي يلقاها يسمسمها وخلاص 😒
دارين : صاح ...باهي وين أنتي وياه توا ؟؟
رغد : أني رديت للشقته عشان انضمها ..قاعدة حال عدوك اتقول لاعبين فيها صغار جيرانا ..اما أوس طلع مع نزار
دارين : وين مشى وهوا مريض ؟؟
رغد : مش عارفة جاءهم بلاغ عن جريمة قتل ماقتل صايرة بالسجن ..والزوز طلعوا بسرعة
دارين قلبها وجعها لما تذكرت : اي صاح في جريمة صارت اليوم 🥺
رغد : الا حقا سمعت اسم نوح ...مايكونش هوا نوحك ؟
دارين غمضت اعيونها : اي هوا نفسه 😔
رغد : مش قتلك ابعدي عنه ..اهوا كلامي طلع حق ..مجرم وقاتل ومازال مش معروف شن داير اخرى
دارين : ااءء ..اي إن شالله خير ...باهي اطمنت عليك ..بنكلم أوس نطمن عليه
رغد : ااااها تذكرت أوس فونه قاعد في الشقة ..نساه لما طلعنا للمستشفى
دارين : صاح ؟؟ باهي مش مشكلة ..نتصل بيه بعدين ...بالسلامة
رغد : باي ......ورفعت اكمامها وهي اتفكر تبدأ من وين ...اوووف أوس شن هالحوسة 😤
دارين صكرت وزادت اتفكر ..قبل تبي تتصل بأوس تتاكد منه شن صاير ..بس للاسف ماصارش 💔
دارين ردت رقدت على ظهرها ..وفونها رن ..شافت رقم غريب ...ماردتش عليه ...بس فكرت ممكن أوس ايكلم من فون تاني ..ردت بسرعة : الو
نوح : غزالتي
دارين قمعزت وشافت للفون 😳 ..وبعدين ردت حطاته على وذنها تاني : نوووح
نوح : اعيون وقلب نوح أنتي
دارين : 😰😰😰😰
****************(( الكاتبة أم ناصر ))
أوس نزل هوا ونزار للسجن ..نزار خش ابروحه للمكتب أوس ..والاخير عدا ودق على باب مكتب قاسم ..وفتح وخش
قاسم اليوم بطوله وهوا معصب : اهلين ..الحمدالله على السلامة يافندي ..بالك مازال بدري 😡
أوس : متأسف سيدي على التاخير ..بس كنت مريض وفي المستشفى ..واول ماسمعت جيت على طول
قاسم صبا : فضيحة ..فضيحة يأوس ..ثاني جريمة في السجن في اقل من شهر ...الوزارة من الصبح اتصالات وقصص ..وأنا مش عارف شن انقول ..وكيف انرد عليهم
أوس : عندك حق سيدي ...بس أني مش عارف شن جاب نوح لجبر ..كيف حطوهم مع بعض في نفس الزنزانة ؟؟
قاسم ايديه وراء ظهره : الافندي كريم قال الصبح تعاركوا مع بعض ..وحطيتهم انحقق معاهم ..ومش خاطر عليه نوح يقتل جبر
أوس غمض اعيونه وتنهد : اااااه كريم ..هه .. كنت عارف بتجينا من وراءه مصيبة ..توا بالعقل في حد ايحط اتنين زي نوح وجبر مع بعض ..بجديات مش عارف لشنو بيوصل بس ؟؟ 😒
قاسم قرب وحط يده على كتف أوس : أفندي أوس ... أنا نعرفك من زمان ونعرف حرصك على اداء عملك بكل مهنية وأحتراف ...وعندي فيك ثقة ...بس ياريت تنسى مشاكلك مع كريم ..وتحاولوا مع بعض اتحلوا هالقضايا ..لان الوضع مهزوز والكلام علينا اصبح واضح ..وأنا حاس في ناس بطير من اهني بسبة هالجرائم اللي قاعدة اتصير ..وأني خايف عليك
أوس شاف لعيون قاسم بثقة : ماتخافش عليا ..وثقتك إن شالله في مكانها ...وحاضر حنفوت كل شي ..عشان شغلي يمشي ..لاني بجد حتى اني تعبت
قاسم : كريم طلع مني من اشويا ...قال بيحقق مع نوح فوق ...ياريت حتى أنت اتشوف نوح ..وتفهم شن صاير
أوس هز رأسه : حاضر سيدي
وطلع أوس ..خذا امعاه نزار ورقى فوق ...سأل عن كريم ..قالوله في مكتب الارشيف ... خش عليه
كريم رفع رأسه من الملف اللي بيده : اهلاً 😏
أوس ايشوف للملفات اللي امطلعهم كريم فوق المكتب : نقدر نفهم ..على شنو ادور بالضبط ؟؟
كريم : شكلك مازلت ماسمعت شن صار ؟؟
أوس : اذا كان قصدك على جبر ..فاطمن عندي العلم ..بس ماجاوبتنيش ع شنو ادور اهني ؟؟
كريم : وحضرتك وين كنت من الصبح ؟؟
أوس : ايييح عاد بترد على كل سؤال بسؤال والا كيف ...وبعدين نقدر نعرف كيف اتحط نوح وجبر مع بعض ..والا أنتا تبيهم ايخلصوا على بعض 😤
كريم صكر الملف : ماعتقدش أنت مكلف بالتحقيق امعايا ...ومانتساش أني شريكك في القضية ..ومن حقي نعرف كل شي عنها ..بس الملفات اهني مافيش اي شي خاص بنوح
أوس : ملفات نوح مش اهني ..وبعدين شن تبي تعرف ..أني حسيتك تعرف نوح أكثر مني في الاجتماع اللي فات
كريم وجه تغير : اي ..اي ..قول أنك مازلت معصب مني لاني تفوقت عليك في الاجتماع ..وماتبيش نعرف اي شي عن نوح الحاج
أوس : الكلام امعاك زي قلته ...وين نوح ؟؟
كريم : طلبت منهم ايخلوه في غرفة التحقيق ..لعند انكمل ..بنطلع انشوفه توا
أوس : بنجي امعاك ..حتى اني نبي نسمع شن بيقول 😑
كريم حط ايديه في جيوبه وطلع ..واوس طلع وراءه ..مجرد ماطلعوا في الممر ..والدنيا انقلبت ..الحرس يجروا في كل مكان ..وجرس الانذار انطلق 🔊🚨
السجن كله تما على رجل وحدة ..وكريم وأوس طلعوا يجروا ..هما يعرفوا الصوت هادا لما يسمعوه ...معناها في سجين هرب 😏
خشوا الغرفة ونوح مش قاعد ..وطبعا لاثنين عصبوا ..وبدوا تحقيق مع الحرس وكل واحد ايقول ماشفت شي ..ومش معروف نوح من وين طلع او حتى كيف قدر يهرب ...على طول بدأن اجراءت السجن ...تطويق المكان من جميع الاتجهات ...الحرس ومعاهم كلاب الشرطة ..يدوروا في طوق السجن من برا وجوا ..وغطوا اكبر قدر من مساحة ارض السجن في محاولة القبض عليه
مش معروف وين اختفى فجاءة ..هل موجود في مبنى السجن او قدر يهرب فعلا ..من امتى هوا مختفي ..اخر مرة شافوه الحرس كان من أكثر من ساعة ..لما حطوه في الغرفة التحقيق ..الشي الاكيد أن في حد ساعده عشان يهرب ..بس مش واضح من ؟؟ 🤷🏻♀️
وطبعا مافيش داعي نحكي على ردة فعل الافندي قاسم لما سمع بالخبر ..لان بجد ثلاث ضربات على الراس يوجعن 😣💔
*****************
دارين مش مصدقة : نوح ..من وين اتكلم فيا ...وشنو الكلام اللي سمعته عليك ؟؟
نوح : وربي كله كدب دارين ..ماتصدقيش كلامهم ...يبوا ايدبسوني في قضية جديدة
دارين : اني مش عارفة شي نوح ..ومش عارفة شن انصدق ..باهي من قتله الراجل نوح ؟؟
نوح : مش اني ..ومانعرفش من قتله ..بس ورب الكعبة هادي مؤامرة عليا دكتورتي ..يبوا يتخلصوا مني
دارين قلبها يبي ايصدق بس خايفة : باهي أنتا من وين اتكلم فيا نوح ..وكيف خلوك اتكلم ؟؟
نوح : أني قاعد برا ..تحت شقتك ..افتحي الروشن اتشوفيني
دارين : شنو 😰😰😰
صبت دارين بسرعة وطلعت للصالة فتحت الروشن وشافت لوطى ...وفعلا كان نوح واقف تحت 😰
دارين : كككيف ..كيف طلعت نوح ؟؟ كيف ؟؟
نوح : هربت من السجن ...كان لازم نهرب دارين عشان نقدر نثبت براءتي
دارين اتشوفله : كيف تثبت وانتا هارب ..أنت هكي عقدت الامور ..أكيد الشرطة ادور عنك في كل مكان توا ...وبيمسكوك نوح 😥
نوح : وهادا علاش جيتك دارين ...نبي مساعدتك ..نبيك توقفي امعايا عشان نقدر نثبتلهم أني برءي
دارين : كيف بنساعدك ...كيف ..قولي نوح
نوح : بنطلع فوق عندك ..الكلام على الفون ماينفعش
دارين : تطلع وين ..أمي قاعدة ..نوح لا ...الو ..الو . نوح 😰
نوح كان مصكر ..ورقى خش للمبنى ...وقف قدام الباب ...ودارين جوا حايسة ...قلبها ايدق بسرعة ..وايديها يرجفوا ..ياربي شن اندير ...شن اندير ...خايفة بس مش من نوح ..خايفة من المجهول ...مشت بسرعة فتحت باب الدار على أمها وكانت راقدة من بدري
ردت صكرت الباب بالشويا ..وطلعت على اطراف صوابعها ..وصلت لعند باب الشقة ..غمضت اعيونها خذت نفس ..وفتحت الباب
نوح واقف ومتكي على الحيط ..لابس كت اسود وسروال ابيض واسع ..ويده مربوطة بوشاح دارين ❤
دارين : نوح 🥺
نوح قرب منها وحط يده جوا شعرها جبدها ليه : وربي ماقتلت حد ولا نقدر نقتل اصلا ..ماتصدقيش كلامهم عليا دارين ..أني برءي من دم جبر
دارين...كنت انشوف لعيونه ...مستحيل ايكون يعرف يكدب بالشكل هادا ...حسيت كلامه طالع من قلبه وبصدق ..كان يحكي بصوت واثق واعيونه في اعيوني ومش خايف
نوح زاد قربها منه و وجه في وجهها : غزالتي لو مش مصدقتني قولي وأني نمشي من اهني ومعاش بتشوفي وجهي مرة تانية
دارين اعيونها دمعوا ضماته بسرعة ..وخشت في حضنه : مصدقتك نوح ..مش عارفة كيف او علاش بس مصدقتك 😭
نوح تنهد وحضنها بقوة : كنت متاكد مافيش حد حيوقف امعايا الا أنتي دارين ..زي ماقلبي دلني عليك وجيتك..حتى أنتي قلبك امخليك اتصدقيني
دارين وخرت عنه وتمسح في ادموعها ..وشدت يده : تعالى خش ..خش قبل مايشوفك حد من الجيران
نوح خش امعاها ..وقعد ايشوف للشقة ..كيف صغيرة وهادية ..وريحتها حلوة ..وكان واضح كيف مليانة حب وحنان في كل لامسة من أثاثها
دارين تحكي بصوت واطي : تعالى بالشوايا ..أمي راقدة ..تعالى من اهني
فتحت دارين باب البدروم ولعت الضي ونزلت مع نوح لوطى بالشويا ..لعند وصلت تحت ...فضت كنبة قديمة عليها دبش وحاجات ..نفضتها من الغبرة
دارين : قمعز اهني ..نمشي انشوف أمي ونعاود عليك ..تمام 🥺
نوح قمعز وايشوف للمكان ..وهز راسه : تمام
طلعت دارين ومشت تأكدت من أمها راقدة ..وبعدين نزلت لنوح تاني ..قربت منه وقمعزت جنبه ..ونوح ايشوفلها زين لعند انحرجت
دارين : خيرك اتشوفلي هكي
نوح ابتسم : اول مرة انشوفك على طبيعتك وفي وسط حوشكم
دارين شافت لنفسها ..لابسه توتة قطنية ..موف في وردي ..وشعرها نازل على اكتافها ..بس فوضوي وحفيانة ..وأكيد مافيش ولا نقطة مكياج على وجهها 🙈
نوح شد ايديها من على وجهها ونزلهم عشان ايشوفها : بربك في حد عنده الوجه الحلو هادا ويغطيه
دارين طبست وجهها احمر ..نوح مد يده ورفع وجهها : دارين أني من اول يوم تعلقت بيك مش عشان شكلك أني عجبتني روحك قبل كل شي
دارين : كيف 🥺
نوح : اول مرة تلاقينا في العيادة ..فتحت اعيوني على صوتك وأنتي ادافعي عليا ...من اول يوم وأنتي في صفي مع انك ماتعرفينيش ..بس قلبك خلك تعرفي أني مظلوم ..او ممكن الموقف كان بالنسبة ليك أنساني
دارين : نوح شن صار امعاك ..ليش متهمينك بقتل جبر ؟؟
نوح برم وجهه ويتذكر في كل شي صار امعاه 👇
نوح مقمعز وحس رأسه ثقيل ..ودمه يغلي ..حس ان هادي فرصته عشان ياخذ كلام من جبر ...صبا واعيونه يغبشوا ...قرب من جبر بسرعة ...وطلع السكين اللي داسها تحت حزامه ..وحطها على رقبة جبر : بتحكي من قتل حسام والا بنقطع راسك 😡
جبر زمط ويرتعد 😰
نوح زاد ضغط السكين على رقبة جبر : وربي مانخسر عليك شي غير نغزة ننهي بيها حياتك ..وأني محبوس محبوس مش خاسر شي ...يبقى أحكي خير ماتخسر حياتك عشان ناس تانية 😡
جبر : خخخلينا انتفاهموا قبل نوح ...مايجيش الكلام هذا
نوح نغزه بحد السكين لعند جرحه في رقبته : شكلك ماتفهمش من اول كلمة ..بتحكي والا انكمل عليك 😤
جبر زمط ورقبته وجعاته حط يده ولما شاف الدم خاف 😰 : خلاص بنحكي والله بنحكي نوح
نوح : تكلم نسمع فيك ..ورد بالك تكدب عليا ..لاني ساعتها والله ماني راحمك
جبر : حول السكين وأني توا نتكلم 😣
نوح : لا ياشاطر بتتكلم زي ما انت ..بسرعة هيا 😤
جبر : تتتمام ..تمام ...اللافي والا هو حسام مش عارف اسمه ..سمعنا ونحنا نتفقوا عليك
نوح : أنتا ومن ؟؟
جبر : أنا وو والافندي كريم
نوح : كريم ؟؟!! وشن علاقتك بكريم ..وحسام شن سمع تكلم 😤
جبر : جايك بالكلام ...أني من الاصل خشيت هنا بتفاق مع كريم ..والهدف كان استفزازك أنتا وجماعتك وخلق مشاكل امعاك بقد ما نقدر
نوح رأسه زاد ثقل واعيونه يغبشوا : وشن مصلحته كريم من الشي هادا
جبر : مانعرفش ..أني كان عندي قضية وكريم كان مستلمها ..وهو اللي جابني اهني وقالي بنطلع مجرد مانكمل مهمتي
نوح : وحسام علاش قتلتوه ..علاش 😡
جبر : مش مني كريم هوا اللي قال ...حسام لما سمعنا وحاول يهرب ..بس نحنا شفناه ..وبعدين انا شديته في نفس اليوم وهددته لو تكلم او قال شي راح نقتلوه
بس كريم في الليل غير رائه ..قالي هادا مستحيل يسكت واكيد يفضحنا لازم نتخلصوا منه ...وفعلا ثاني يوم الصبح لما طلع حسام من الحمام كنت أنا وامعايا حرس تبع كريم في انتظاره ..خذيناه لزنزانة وصار اللي صار
نوح غمض اعيونه مقهور ...وفي نفس الوقت كان يقاوم بالغصب ..كان حاسس انه بيطيح جسمه تخدر وبدأ يثقل
نوح : شن اللي سمعه حسام بالضبط وخلاه يخسر حياته ؟؟😡
جبر : الافندي كريم يبي يلفقك قضية قتل
نوح بدأ يربط في الاحداث مع بعض لعند اللحظة اللي هما فيها ...احساسه بالخدر ..وجسمه الثقيل اللي كل شويا يفقد السيطرة عليه ..خلاه يتاكد من خطة كريم
نوح طاح على الارض وطاحت منه السكين ..الدنيا بدأت تظلم ومعاش قدر ايشوف كويس
جبر استغرب وصبا بسرعة ..خذا السكين وقعد مرة يقرب ومرة يبعد عن نوح ...وبعدين جاء قرب من نوح وطبس عليه : نوح ..نوح شن فيك ..نوح
نوح شد جبر من دبشه وقربه منه ويتكلم بصعوبة : انفذ بجلدك جبر لانهم ناوين يتخلصوا منك ...اهرب قبل مايقتلوك
نوح رفع وجه وشاف لدارين : وهادا كان اخر شي نتذكره ..لاني بعدها فقت لاقيت نفسي طايح على وجهي وجبر جنبي غارق في دمه ..وأني ايديا وحوايجي كلهم دم ...والسكين في يدي
دارين : وكريم شن يبي منك ..شن مصلحته عشان يلبسك في جريمة قتل 🥺
نوح : قصة طويلة دارين مافيش وقت نحكيهالك ..لازم نطلع توا ..لازم انجيب دليل براءتي
دارين : وين بتمشي ..وشن هوا دليلك نوح ؟؟
نوح خذا يد دارين وحطها على ذراعه : دليلي قاعد جوا يجري في اعروقي ..دليلي في دمي دارين ...وهادا ليش هربت اليوم ..لازم انحلل دمي توا ..أني متاكد من وجود مادة مخدرة في جسمي ..لاني طول ساعات اللي قعدتهم مع جبر كنت مخدر وغائب عن الوعي
دارين : هادا شي ساهل ونقدورا نتأكدوا منه توا
نوح : وهادا علاش جيتك ..دارين فرصتي اليوم عشان نقدر نثبت اني تعرضت للمؤامرة وحاولوا يدبسوني في قضية قتل
دارين صبت : مافيش داعي تطلع ..خليك قاعد اهني ..أني بنسحب منك دم ..ونعرف مختبر يفتح طول اليوم ..واللي يشتغلوا فيه كلهم نعرفهم
نوح عض على فمه وهز راسه موافق
دارين تبي تمشي ..ونوح شد يدها : شكرا ليك لانك صدقتيني وتبي توقفي امعايا
دارين ابتسمت وسحبت يدها منه ..ومشت رقت فوق .. غيرت دبشها بسرعة وجابت شنطة فيها ابر وحاجات سحب الدم ...سحبت من نوح ..وخلاته لوطى وصكرت الباب ..وطلعت بالشويا ..ركبت سيارتها ..ومشت للمختبر ..عطت شاب الدم ..وطلبت منه ايشوفه ..وخذت رقمه عشان لما يكمل تتصل بيه وتسأله ..في الطريق شافت محل ملابس رجال مزال مفتوح ..خطمت عليه ..خذت توتة لنوح وملابس داخلية ...وردت للشقة ..خشت دارها غيرت دبشها وبحتت لامها
وبعدين نزلت لوطى ..نوح اول ماشافها صبا : ها شن صار ؟؟
دارين : مازال ياخذ وقت ..وأني ماحبيتش نقعد برا الشقة لان امي مرات اتنوض في اي وقت
نوح : باهي تمام
دارين مدتله الكيس : هادوا دبش شريتهم عشان تغسل واتغير
نوح خذا الكيس واعيونه عليها ..فتح الكيس وشاف شن فيه وابتسم : بس أني نبي ندوش ريحة الدم عالقة فيا
دارين : اي مش مشكلة ...تعالى ورايا بس من غير صوت
نوح : امشي واني وراءك
دارين طلعت ..ونوح يمشي وراءها لعند وصلت باب الحمام ..فتحاته : اهو اتفضل ..بس حاول ماطلعش صوت
نوح خش وحط الكيس ..وتلفت عليها : حاضر 😏
دارين ابتسمت وانحرجت من نظرته اللي ردت نفس زمان ..اوووفه منه الصايع 🙈
نوح صكر الباب ..ودرين مشت للمطبخ ..طلعت توست ..دارت كم نوع وسخنتهم ..وطيبت شاهي ..وفي عز شغلها التفتت لاقت نوح واقف على باب المطبخ ..انفجعت وحطت يدها على قلبها : ايييبهي 😨 اوووفه نوح منك اوووفه ..وربي قبل جلطتني
نوح ابتسم وقرب منها ..وقعد ايشوف شنو ادير : اممم تعرفي بنموت من الجوع
دارين اتشوفله ونحرجت لان نوح لابس السروال والكنتيرا بس ..وشعره لاسود نازل على وجهه ومبلول 🔥
نوح حس عليها ..وقرب منها : شنو ..خيرك اتشوفيلي هكي 😏
دارين زمطت وبرمت اتحط في التوست في طبق ..وايديها يرجفوا : ننوح انزل لوطى قبل اتشوفك أمي ..واني توا انجيب سفرة ونلحقك 😣
نوح قرب لعند لاصق فيها ..حط وجه على كتفها ويديه لاثنين على رخام المطبخ ..حاصرها ..وقعد ايشوف شن ادير
دارين معاش قدرت تتحرك ..برمت واجهاته ..وياريتها مابرمت 😣 : نووح ..أمي توا اتشوفك الله يخليك باعد
نوح قرب منها لعند حط وجه على وجهها ودارين غمضت اعيونها ..مد يده من وراها خذا توست ..وقبل ايوخر عنها همس تحت وذنها : جيعان نستنى فيك 😏
وخر عنها وشاف كيف وجهها احمر وترجف ..حطت التوست في فمه ..وابتسم ..وطلع من المطبخ ...خذا الكيس من الحمام ..ونزل لبدروم
دارين تنهدت براحة ..ينعنشكلك يا نوح الحاج 🔥
وتت سفرة فيها توست وكباية حليب ساخنة ...ونزلت وهيا خايفة من شوفته 😣 ...بس لما نزلت نوح كان يتكلم في فونه ..ولما دارين خشت نهى المكالمة طول
دارين حطت السفرة ..وقمعزت على كرتونة امقابل نوح : أكيد جيعان
نوح حط الفون جنبه وبدأ ياكل من غير مايتكلم
دارين اتشوف للفونه وخاطرها تسأله ..ونوح فهم عليها : هادا جاب ليا واحد بعد هربت
دارين : اااها ..اصلا استغربت من وين جبته 😅
نوح : من اول ماهربت كلمت حد نعرفه من تليفون عمومي ..وهوا جابه ليا
دارين اتشوفله وهو ياكل بشهية وكان واضح جيعان ..وبعدين سألته : ورقمي من وين جبته ..بصراحة من بدري خاطري نسألك
نوح شافلها وابتسم : غزالتي مايفوت عليها شي 😏
دارين : ههه نبي نعرف ..فضول بيقتلني
نوح : بعيد الشر عن قلبك ...من ياسمين مرت هيبة
دارين : وانتا وين شفتها ياسمين ؟؟😳
نوح : لا وين نبي انشوفها ...خليت هيبة ياخذ منها في اخر زيارة 😏
دارين : اممم 😒 ذكاءك ايخوف فيا بصراحة 🥺
نوح : اي لازم اتخافي ..من خاف سلم
دارين : نوح ماتخوفنيش منك ..نص كلامك الالغاز وحياتك غامضة بالنسبة ليا ..مانعرفش عنك شي الا اسمك
نوح : ومع هادا ..مصدقتني و واثق فيا ..والا لا ؟؟
دارين : غصبا عني نوح ..قلبي يبي ايصدقك ..عشان خاطري رد بالك تصدمني فيك والا تقهرني 🥺
نوح صبا وشدها من يدها لعند صبت ..وجبدها ليه في حضنه : وربي مايمسك مني سوء طول حياتي ..مستعد نحميك بروحي ..ومانخلي حد يمس شعرة من رأسك
دارين في حضنه حست بشعور غريب وحلو ...بس في نفس الوقت كانت خايفة ..وخرت عنه اتشوف لعيونه : نوح نبي نمشي نرقد ..وأنتا خليك اهني ماتطلعش بكل ..وخاصة عند الفجر لان امي اتنوض اتصلي ..وأني بعد انصلي بنجي نطمن عليك ..بس ياريت اتكون هادي طول الوقت
نوح حط يده على خدها : ادعيلي في صلاتك ..ربي ايكون في عوني ونقدر نطلع من السجن
دارين تأثرت بكلامه واعيونها دمعوا : حاضر ..وأنتا مظلوم زي ماقلت ..أكيد ربي بيكون امعاك ..وحتى أني امعاك ومش مخليتك نوح 🥺
نوح مسك وجهها بين ايديه وبأسها على جبينها : تصبحي على خير يا اغلى غزالة على قلبي
دارين : وأنتا بخير ...وانسحبت من بين ايديه ...وخلاته وصكرت الباب ❤🔥
دارين خشت سريرها ..بس طبعا ماقدرتش ترقد ..هيا ونوح في نفس المكان ..يبعد عنها كم خطوة بس ...واااو كيف بيجيها النوم بس
****************((الكاتبة أم ناصر ))
أوس روح للشقته تاعب بعد يوم طويل مابش يكمل ...هروب نوح خششهم في الساس ..كيف هرب ومن ساعده ..مش معروف ..وين مشى وشن في عقله برضوا مافيش امل يعرفوا ...بس الشي الاكيد أن نوح مادام هرب مستحيل يقدروا ايشدوه تاني ..الذكاء اللي خلاه يطلع من السجن من غير مايحس عليه حد ..يقدر ايخليه يهرب طول العمر وماحد يشده
يبي يفتح الباب وبعدين خطر عليه ..المفتاح مع رغد ..هل عطاته لحد من الجيران ..بس لليل توا ..وين يبي يسال ...رن جرس الباب بالحظ وخلاص
رغد افتحت باب الشقة وعلى وجهها ابتسامة اتجنن : اهلين ☺️
أوس برغم تعب اليوم ..بس اول مرة حد يستقبله وهوا مروح رفع حاجبه : هلا
خش واول حاجة لافتت نظرة الشقة كيف نظيفة وريحتها اتهبل ...ودافية ..حول جاكته ..ورغد خذتها منه وعلقتها
أوس : مازلتي اهني ؟؟
رغد : بالي مشغول عليك ومعرفتش نمشي قبل نطمن عليك 🥺
أوس حط يده على خدها وابتسم ...بس كان مازال مريض ..خلاها وخش قمعز على الكنبة .. وتنهد
رغد قمعزت جنبه : شكلك مازلت مريض ؟؟ 🥺
أوس : اللي قاعد ايصير امعايا ..ايهد جبال ..مش عارف كيف قادر نصبر عليه
رغد : لانك أوس ...أوس اللي مايعرفش المستحيل ..وقايم شغله على اكتافه ومن غير تعب
أوس شافلها ورقد على الكنبة بتعب ..رغد قربت منه وحطت يدها على جبينه : راسك ساخن اشويا 🥺
أوس رفع يده لجبينه وجت على يد رغد ..واعيونهم تلاقوا..شاف لوجها واول مرة ايشوفلها بالطريقة هادي ...شن قاعد ايصير امعاه ❤
رغد رعشت يدها وسحبتها بسرعة وارتبكت ..وصبت : ااء ..طيبت اشوية شوربة عشانك ..نمشي انجيبلك تاكل اشويا 😣
رغد هربت و أوس عرفها انحرجت ..ومش عارف ليش اللقطة عجباته ..وضحك عليها
دارين نضات مخلوعة على صوت امها اتصلي ...خشت الحمام توضت وصلت ..وخشت لدارها ...لعند تاكدت ان أمها ردت رقدت ...وبعدين مشت نزلت بالشويا ..فتحت باب البدروم ونزلت ..وانصدمت لما شافت نوح مقمعز ويصلي 🥺❤
شافته اشويا ..وبعدين رقت وخلاته يصلي ...ومشت خشت مرقدها
بعد اكثر من ساعة دارين انقلبت على الجيهة التانية وحست بحد جنبها ..فتحت اعيونها ولاقت نوح مقمعز على طرف السرير ويشوفلها 😰🔥
*******نهاية الحلقة #11
شن بيصير مع نوح ودارين ..وهل نوح كان صادق امعاها او لا ...ورغد وأوس شن اللي قاعد ايصير امعاهم ..كله حنعرفوا الحلقات الجاية