#السجين_777
#الحلقة_5
نوح امصبي وراءيا ويستنى فيا ..لكن أنا لابرة ماتبيش تفتح وايديا يرجفن ..وأنا عصبت اكثر لانه ايراقب فيا ..طاحت مني لابرة ..ورفعتها ..نبي نفتحها ونرعش
نوح زاد قرب مني...ولف ايديه على خصري ..وحط راسه على كتفي : خيرك ترعشي أهدي
دارين ماسكة لابرة وترعش : نوح باعد من عليا 😣
نوح مسك ايديها لاثنين وهي تحاول تفتح لابرة ومعصبة : وقفي خلاص ...دارين بطلي قتلك ...شن صارلك ..ليش معصبة
دارين : 😣😣😣😰
نوح ماسك ايديها ويهز فيهم : نزلي اللي في يدك ..خلاص دارين فوتيها لابرة
دارين تنهدت ونزلت لابرة ...ونوح برمها شوره : شن صار ..خيرك تعفلقتي وبديتي اتخبطي ..شوفيلي دارين ...شن في اتكلمي
دارين رفعت وجهها وشافت لعيونه : مافي شي .معصبة اشويا
نوح : معصبة من شنو ؟؟
دارين تحاول تألف كذبة : ااءء موضوع خاص ..مش شورك
نوح : خاص بمنو ؟! ..موضوع شني دارين ؟؟
دارين : موضوع خاص مع أوس..مالكش علاقة ..شنو بتحقق امعايا أنت 😒
نوح عصب لما سمع اسم أوس ..بس سكت : اي صاح مالياش علاقة بمواضيعك الخاصة ..عندي ابرة تعالي اعطيهالي ..عطلت على مروة 😏
دارين تنرفزت : ماحد طلب منك تلحقني لهني ..الابرة قاعدة انجهز فيها ..ارجع لمروة عيب ماتخليهاش ابروحها ..وانا توا انجيك غادي 😑
نوح ايبحت في اعيونها زين ..حاس أنها تكذب ..بس مايبيش ايزود امعاها في الدوة ...تباعد عنها ومشى ناحية الباب ..حط يده على المنيلا بيفتح الباب
دارين تكلمت بسرعة : من هيا مروة
نوح عض على فمه وطبس ضحك ..من غير ما ايشوفها
التفت عليها : موضوع خاص مش شورك 😏
دارين ابرمت وجهها ..وبدأت اتجهز في الابرة ..بس تبي اتموت ..من هذه ومن وين تعرف ..نوح 😤
نوح فتح الباب وطلع ..بعد ما تأكد أنها تضايقت من مروة ...والغيرة تأكل في قلبها 😏🔥
نوح رجع لسريره ..ودارين خذت لابرة وتبي تطلع ..مع خشت رحاب مستغربة : شفتي البنت اللي مع نوح
دارين : ايه شفتها 😒
رحاب : دكتورة من هذه ..وكيف خشت هنا
دارين : مش عارفة ..ومانبيش نعرف ..عندي شغل رحاب 😑
رحاب : هاتيها لابرة نضربها أنا لو عندك شغل غيرها
دارين اتشوف في لابرة : لا أنا نبي نضربهاله 😏
طلعت دارين وخشت على نوح ومروة مقمعزين ايهدرزوا على السرير : عندك ابرة 😒
نوح صبا : تعالي قاعد نستنى فيك 😏
دارين بحتت في مروة : ممكن اشويا لو سمحتي
مروة صبت : اها تمام.اا
نوح : خليك مروة عادي 😏
دارين : لا مش عادي ..زوجتك هيا ؟؟
نوح : لا مش زوجتي ..بس ممكن اتكون ليش لا 😏
مروة ابتسمت ..ودارين دمها يغلي 😤🔥 : لما تتزوجوا هاداك الوقت عادي ...اما توا ممكن تسمحي اشويا
مروة هزت راسها وطلعت عند باب الدار ..ودارين قربت من نوح هو نزل حزام السروال اشويا عشان اتبزه ..وهي ضربت لابرة بقوة لعند نوح توجع 😣
دارين اتبحت في اعيونه : بالشفاء 😏
نوح شد ذراعها بقوة وطبس عليها : ورب الكعبة بنردهالك واني نوح 😡
دارين فكت يدها منه وفنصت فيه وطلعت من الدار 😏..ومروة رجعت تحكي مع نوح
*************((الكاتبة أم ناصر ))
كريم : أنا كريم سعد..ضابط تحقيق ..وشريكك الجديد
أوس : شريكي في شنو ؟؟
كريم : في كم قضية ...وبالاخص قضية السجين 777
اوس : شن تخرط أنت ...من قاله الكلام اهوا ؟؟
كريم لابس طاقيته : جاني أمر بالانتقال للمكتب هنا ..وكنت عند الافندي قاسم من اشويا هوا اللي بلغني بالقرار هذا
أوس فنص في كريم ..وطلع من مكتبه من غير اي كلمة ..ومشى لمكتب قاسم دق على الباب ..وخش رمى التحية : صباح الخير سيدي
قاسم شال النظرات الطبية من على اعيونه : صباح النور ...تعالى أوس قمعز
أوس قرب من مكتب قاسم وقمعز : شن قصة الضابط الجديد ..ومن أمتى أنا امعايا شريك في القضايا اللي عندي
قاسم : بالك هك أحسن تنحل القضية بسرعة وترتاح
أوس : بس أنا ماطلبتش مساعدة من حد ..نقدر نحلها ابروحي 😑
قاسم : لنا سنتين من غير اي نتجية ..مافيش تهمة قدرنا نثبتوها او ننفوها عليه ..مافيش مانع لو جاء حد تاني وحاول يساعدنا
أوس معصب : بس أنت عارف يا أفندي أني انحب نشتغل بروحي ..واللي اسمه كريم الباين مش حنقدر نتفق أمعاه 😡
قاسم قدامه ورقة رفعها وعطاها لاوس : هذا قرار جاي من فوق ..يعني سوء أنا والا أنت مانقدروش نرفضوا ..أنا عارف أنك طول عمرك مخلص واتحب شغلك وتعطي فيه كل وقتك ..بس الامر المرة هاذي خارج سيطرتي أوس
أوس حط الورقة على المكتب وصبا معصب : ايصير خير ..بس ياريت اتوفروله مكتب ..مانحبش حد ينكش في اوراقي وشغلي
قاسم : قاعدين الشباب ايجهزوا فيه ...أوس مانبيش اي شي ياثر عليك .خليك زي ماعرفتك
أوس تنهد وضرب التحية وطلع ...مشى لعند العيادة وفتح الباب ..خش وطول عينه جت على مروة مقمعزة واتهدرز مع نوح
خش بسرعة معصب : هاذا شنو ..من أنتي وشن اديري هنا 😡
مروة صبت : جيت زيارة لنوح
أوس ماردش عليها وقرب من نوح : من هادي ..شن ادير هنا
نوح ايبحت في يده المكسورة ويحرك في اصابعه : شني املا وكالة من غير بواب مافيش حد يعرف مني ومن وين جت البنت !! 😏
اوس شده من تيشرته : شكله جلدك يحك فيك على طريحة تاني ..بتتكلم والا بنكسر يدك التانية 😤
دارين سمعت اصواتهم طلعت وخشت عليهم
نوح فك ايدين اوس ودفه : أني مريض وملوح هنا مانندري عليكم من يخش ويطلع ..تقدر تسأل اللي جابوها 😑
دارين قربت من أوس : شن في اوس .أهد
أوس شافلها : من البنت هذي دارين ..من خششها هني
دارين تبحت في مروة : مانعرفش ..ليش أنت ماتعرفش ؟؟!!
مروة طلعت ورقة من شنطتها : أنا صديقة نوح ..ماكنتش نعرف انه محبوس ..اول ماسمعت جيت وهذا تصريح زيارة من النيابة
أوس شد الورقة يقرأ فيها ..ونوح ايشوفله وفي اعيونه ضحكة 😏
أوس رجعلها الورقة : من اعطاك الاذن بالزيارة هنا
مروة : الضا....
كريم خش : أنا عطيتها 😏
أوس التفت عليه : 😒😒
كريم : تقريبا الزيارة مش ممنوعة على السجين وهيا امعاها تصريح من النيابة ..وبما أنه موجود في العيادة فعادي خليتها تدخل 😏
أوس فنص في كريم ...وطلع : دارين تعالي 😑
طلعت دارين وراء اوس وخشوا للمكتبها وصكروا الباب
كريم قرب من سرير نوح : أنا الضابط كريم سعد ..من اليوم بنستلم قضيتك مع أوس ...حنبدأ امعاك اول ما ترجع للسجن
نوح ايشوفله من غير ما يتكلم ...وكريم غمزله 😉 وطلع
مروة ردت وقمعزت بجنب نوح ومسكت يده بين ايديها : خلاص أنا اطمنت عليك ولازم نمشي ..بس أكيد حنرجع أنشوفك ..ماصدقت عرفت مكانك نوح
نوح هز رأسه ...مروة صبت وحطت شنطتها على كتفها : رد بالك على روحك نوح..وبلاها العنجهية الزايدة امتاعك ..ماتعطيهمش فرصة عشانك يضربوك تاني
نوح : إن شالله
مروة طبست عليه وبأسته على للحيته : حنجيك تاني مش حنخليك ...أنحبك
نوح شافلها وأبتسم ...وهيا طلعت ومشت
********************((الكاتبة أم ناصر ))
دارين : رحاب لو سمحتي ممكن اثنين قهوة
رحاب : على عيني دكتورة ..حاضر
طلعت رحاب ..وأوس مقمعز فوق مكتب دارين ويهز في رجله
دارين اتبحت فيه : أهدا اوس ليش معصب
أوس : مخنوق دارين ..حاس الامور بدأت تطلع من تحت يدي ..خاصة بعد الزفت كريم ..مش سادني أني 😤
دارين : أهدا ..أنت قدها ..ماتخليش شي ايأثر عليك
أوس : من وين بيجي الهدوء الفرخ اللي اسمه نوح الحاج ..كل يوم قضيته اتزيد تتعقد ..وزادها اليوم حطوا ضابط امعايا في القضية ...مانحبش الطريقة هادي دارين ..بدوا يخنوقوا فيا
دارين : شن قضيته هوا
أوس صبا : قضايا مش قضية ..ماخاطريش ندوي عليهم دارين ..بنطلع عندي شغل
دارين : وقهوتك؟؟
أوس : خلي رحاب اتجيبها لمكتبي من فضلك
دارين : تمام
طلع أوس وعدا للمكتبه ...وأنا بديت في العمل نفس كل يوم ...بس معاش مشيت لنوح ..خفت منه يشدني بروحي ..وعدا باقي اليوم من غير احداث
اليوم الثاني ..جيت ونوح مازال يعامل فيا بنفس البرود ..مافيش اي اهتمام ..واصلا انا ماحكيت امعاه ...بعد كملت شغلي الظهر ...طلعت فوق للمكتبة ..كنت نبي نهرب من شوفت نوح ..لاني كل مرة انكون جنبه انحس بنفسي بديت نتعود عليه او نتعلق بيه ..وهدا كان مستحيل 😣
فتحلي الحارس الباب ..خشيت لاقيت الدكتورة فوزية .مقمعزة وقدامها عرم كتابات وقاعدة تكتب ..سلمت عليها ..هدرزت امعاها اشويا ..ومشيت اول ماشفت عمي يونس : اهلين ☺️
عمي يونس : اهلين بيك ..كيف حالك
دارين : بخير ..كيف حالك أنت وشن اخبار صحتك
عمي يونس : من ربي بخير
طلعت لكتاب من شنطتي : هذا الكتاب اللي حكيتلك عليه
عمي يونس اعيونه لمعوا : سلمك بنتي ..من زمان خاطري نقرأه..صحيتي
دارين : العفو ☺️
مشيت مع يونس لعند طاولة قمعزت امعاه ..وبدأ يفتح في صفحات لكتاب ..ويشوف فيه
دارين : احمم ..عمي يونس ممكن نسألك
يونس اعيونه في الكتاب : ااها تفضلي
دارين زمطت : كم سنة لك محبوس ..وليش محبوس أنتا 😣
رفع اعيونه فيا طول ..وكأنه انصدم من سؤالي ومش متوقعه ..ورد يقلب في صفحات لكتاب : قصة طويلة
دارين : نسمعها عادي
يونس ابتسم : لحوحة أنتي
دارين : اي عارفة 😅
يونس تنهد : ااايه ..ليا أكثر من خمسة وعشرين سنة محبوس ..جريمة قتل
دارين انصدمت : مستحيل 😰 ..ككيف ..مش مصدقة بجد مستحيل
يونس : مافيش شي مستحيل ..الانسان كائن مستعد يعمل كل شي ..لما يتوفروا الظروف اللي اتخليه ينسى كل شي حتى أنسانيته
دارين : وشن اللي خلاك تقتل ..ومن قتلت ؟؟
يونس وجه تجهم كأنه يتذكر في شي معين ...وطبس : زوجتي ..وووو
دارين : زوجتك ومن 😰
يونس : زوجتي واللي خانتني امعاه
دارين : 😰💔💔
يونس : ايه ماتستغربيش ..أنا قتلت شخصين
دارين : أسفة ..لو فكرتك بيهم 🥺
يونس : ومن قالك أني ناسي ..أنا كل يوم انعيش في نفس اليوم هذاك ..وفي كل لليلة نحلم بنفس الكابوس
دارين : 😥باهي أنت كنت ادافع عن شرفك ليش محبوس كل هالمدة
يونس : كل يوم نسأل في نفسي نفس السؤال ..بس من غير أجابة ...أنا قتلت زوجتي وعشيقها في وسط حوشي ..ومع أني كنت شاك فيها ..بس لما شفتهم انصدمت كان عندي امل أني ممكن غلطان ....خفت وهربت ..لما شدوني الشرطة ..القيت نفسي أنا المذنب وهما الضحايا
تنهد وعاود يحكي : تعرفي جاني وقت أنا نفسي شكيت في روحي ..قلت ممكن ظلمتها
دارين : كيف ظلمتها وأنت القيتهم مع بعض في حوشك 🥺
يونس : أنا كنت متاكد مليون في المئة انها اتخون فيا امعاه ..بس كل اللي صار بعد دخلت السجن كان العكس ...ممكن لاني ماالقيتهمش في وضع مشبوه ....كأنه وجود راجل في حوشي وأنا مش قاعد امر عادي ومش ساد عشان انشك فيهم ونقتلهم ...يعني لازم نمسكهم متلبسين عشان نقدر اندافع عن عرضي وشرفي 💔
دارين : شن صار بعد قتلتهم 🥺
يونس : الكل انقلب عليا ...اهل الشاب كان عندهم واسطة قوية ...واهل زوجتي صبوا في صف بنتهم طبعا ..وقالوا أن الشاب كان جاي يسأل عليا وفي عنده شغل امعايا لفقوا قصة ..وطلعوني أنا المجرم وأنا الخاين ..وبدال ماكنت الضحية ..قعدت الجلاد ...وحكموني بالامؤبد للقتل العمد
دارين : 🥺💔💔
يونس : في اول خمس اسنين ..كنت نبي نطلع باي طريقة ..كنت كل يوم انفكر ننتقم من الكل عشان ظلموني ...بس بعد اول عشر سنوات بديت انتعود على المكان ..ومع كل سنة انعيش هنا ..كان تفكيري وكل شي يتغير في حياتي ...لدرجة وصلت لقناعة أني فعلا كنت غلطان ونستاهل الحبس
دارين مستغربة : ليش بالعكس..هما الللي غلطوا
يونس : مش غلطان في حقهم هما .. انا غلطت في حق نفسي ..غلطت لما ضيعت سنين عمري على أنسانة ماتستحقش مني شي ..غلطت لما فكرت أن القتل يبي ايرد حقي وكرامتي ..في مجتمع الضعيف مالهش اي حق مع الناس اللي اقوى منه ..غلطت لما صدقت أني كنت على حق
عمي يونس اعيونه دمعوا : تعرفي اول ماخشيت السجن كنت كل يوم نقنع في نفسي أنه لو رد الوقت للخلف والقيت نفسي في نفس الموقف بنعاود نقتلهم ...بس بعد كل هالسنوات ..اكتشفت أني غلطان ...لو يرجع بيا الوقت كنت نستخسر فيها حتى الدفلة على وجهها حشأك ..وانخليها في الوسخ اللي هيا فيه ..ونغسل ايديا منها ..وأنعيش حياتي عادي جدا
دارين حطت يدها على يده اللي ترجف : ماتندمش على الدنيا ...ربي فوق وعارف كل شي ...وأكيد بيجي اليوم اللي تطلع
يونس بحت فيا : كانت عندي الفرصة نطلع من زمان ..بس أنا اللي مانبيش نطلع ..خلاص تعودت على الحياة هنا..مانقدرش انعيش امعاكم برا الحبس ...العالم برا ايخوف أكثر من السجن نفسه ..عندي أحساس لو طلعت من هنا حنموت لاني مانقدرش نتنفس الا هنا
دارين : 🥺💔💔
وصبا عمي يونس وطلع وأنا قمعزت انفكر في كل كلمة قالها ..وبعدين مشيت خذيت نفس لكتاب اللي كل مرة انجي للمكتبة نقرأه
بعد فترة رد عمي يونس للمكتبة بس ماكانش ابروحه ..كان امعاه نفس الشاب اللي ايجي اينظف في المكتبة ..طبعا الشاب هذا هو هيبة
كنت مقمعزة نقرأ ..بس لاحظت اعيون الشاب كيف اتراقب فيا ..وحسيت بيه يحاول يتكلم امعايا ...وفعلا بعد اشويا قرب مني وهو ينظف في الارض وحط ورقة صغيرة في وسط لكتاب اللي نقرا فيه 😳
هيبة : عطيها لنوح
وعدا بسرعة من غير مانقدر نحكي امعاه ...بحتت في عمي يونس القيته شايف كل شي ...وهز رأسه بمعنى تمام ماتخافيش
خذيت الورقة بسرعة وحطيتها امعايا ..ومعاش قدرت نقرا ..طلعت ونزلت تحت خشيت لمكتبي وصكرت الباب كان وقت غداء وشكلها رحاب عند عمي سعيد ..فتحت الورقة وأنا نرجف ..مكتوب فيها 👇
((ليس في استطاعة الجميع القيام باعمال عظيمة ..ولكن يمكن لكل منا القيام بفعال صغيرة بحب صادق وعظيم ))
دارين قرات ومافهمت شي ...شن هذا ..شن اندير ياربي نعطيه الورقة وخلاص ..والا كيف ...بس أوس قالي عطيني معلومة عن كل خطوة مع نوح ..صبيت نبي نمشي لمكتب أوس ورن فوني
دارين : ايوا
رغد فمها معبى : خير ياحبي ..شن اخبارك
دارين : تمام ..شن قاعدة تأكلي ..عطك سم شوقتيني 🤤
رغد : قاعدة نتغداء ..شن اديري
دارين : صحة على قلبك ...شي طالعة نبي انشوف أوس
رغد : ااااخ ياريتني مكانك ...رايفت عليه الواطي
دارين تضحك : اول مرة انشوف حد ايحب شخص بطريقتك 😂
رغد : اخسارة فيها اصلا انا ..لكن ساهلة يا دنيا على الذل 😒
دارين : 😂 شن تبي رغد ليش متصلة
رغد : نبي نطلب منك طلب بس ورأسي عندك ماترديني 🥺
دارين : خير إن شالله ..شن تبي ؟؟
رغد : خير خير والله ..نبي مفتاح شقة أوستي 🙂
دارين : نعم 😳 ..شن تبي فيه ؟!!
رغد : غير اصبري انفهمك ..نبيه عشان ...
*************((الكاتبة أم ناصر ))
أوس مقمعز على مكتبه خشت عليه دارين : فاضي ؟ ☺️
أوس رفع وجهه فيها : حتى كان مش فاضي نفضالك
دارين خشت وصكرت الباب وجت قمعزت وحطت الورقة على مكتب أوس
أوس خذاها وفتحها وقرأها : شني هذي ؟!!
دارين : كنت فوق في المكتبة ...واحد من المساجين عطاها ليا وقالي عطيها لنوح
أوس صبا وبدأ يقرأ في الكلام بأهتمام ...وبعدين جاء قمعز مقابل دارين : اي سجين ..وين شفتيه؟؟
دارين : مانعرفاش .هذا اللي ينظف في المكتبة
أوس صبا ويهز في رأسه : أكيد هيبة ...صاحب نوح
دارين : قبل مانبيش ناخذها ..بس بعد تذكرت كلامك خذيتها
أوس : احسن مادرتي ..خليهم ايحسوا أنك امعاهم
دارين : بس الورقة مافهمت منها شي ..كلام غامض
اوس : أكيد شفرة بينهم ...أنا بنطلع اشويا توا انرد عليك
دارين : باهي
طلع اوس بسرعة وعدا لمكتب قاسم ...ودارين تلعب بقلم على مكتب أوس بملل ..وبعدين شافت مفتاحه على المكتب .. على طول بحتت في الباب وبعدين خذت المفتاح بسرعة ..وقعدت ادور على مفتاح الشقة فكاته ودساته في جيبها بسرعة 😣
أوس بعد وقت بسيط رد وخش عليها وعطاها الورقة : اعطيه الورقة دارين
دارين صبت مستغربة : صاح 😳
أوس : أكيد
دارين : شن فهمت منها
اوس : لتوا مافهمت شي ..بس نسخت الكلام عندي في ورقة ..حنحاول نعرف شن فيها
خذيت الورقة وطلعت ...مشيت خشيت على نوح كان متكي ومغمض اعيونه ..نحسابه راقد ..نبي انرد لمكتبي وقفني صوته
نوح امفتح عين وحدة : شن تبي ليش غيرتي رائك ورديتي
تلفتت عليه : كنت نحسابك راقد وانسيت أنك كيف الجن ماترقدش 😒
نوح قمعز ويضحك حط يده وراء رأسه : خيرك شن تبي منه الجن ..والا تبيه يلبسك 😏
دارين ماردتش عليه وقربت منه عطاته الورقة
نوح خذا الورقة مستغرب وويفتح فيها واعيونه على دارين ...وبعدين بدأ يقرأ فيها ..ومع كل كلمة كان يبتسم ..وعض على فمه وطبس
دارين : ليش تضحك
نوح : وين شفتيه هيبة ؟؟
دارين : وشن عرفك أنها من هيبة 😳
نوح : بطلي أسئلة غبية وجاوبيني ..وين شفتيه هيبة ؟؟
دارين : فوق في المكتبة 😑
نوح مبتسم : رايفت عليهم لكلاب
دارين بتردد : مما تبيش اترد عليه
نوح : تؤ ..لا
دارين : على كيفك 😒
وطلعت وعديت لمكتبي ...وجت رحاب ..وانا مشيت لعمي سعيد خذيت سندوتيش انتغداء ..وكنت انفكر في نوح واللي قاعد ايصير من اول ما جيت ...جاني اشعار من الوتس فتحته القيتها رسالة من خالد خويا ...دز المسائل اللي يبوا حل 🤦♀️
بعد تغديت كلمت أمي نفس كل مرة عشان تطمن عليا ..لما جيت كان في سجين جديد ..مجروح القيت رحاب اتعالج فيه
خشيت مكتبي قمعزت انقلب في الارواق قدامي ..لعند اطلعت رحاب ..والسجين خذوه للسجن تاني
نوح.. كنت مقمعز وانفكر في كلام هيبة اللي كاتبه ..وأنا عارف شن قصده ..بحتت في الورقة ..وبعدين شميتها ..ااممم الله ريحتها ..ريحة دارين ...بس كان في ريحة رجالية 🔥 ..ايه أكيد هو 😏
كنت نبي انلوح الورقة ..بس فيها ريحة دارين ..خليها نوح ..كل ماينقطع عليك النفس ..ارجع شمها ❤ حطيتها في جيبي
دارين صبيت وخشيت على نوح ..كان مقمعز وهادي : نبي نطلب منك طلب 😒
نوح ايشوف لعيوني : تفضلي اعيوني ..شن تبي
دارين انحرجت : اءاء...شن نبي انقول ...عندي خويا في الشهادة الثانوية ..وعنده مسائل في الرياضيات مش عارف ايحلهم ..نبيك ااا
نوح قاطعني : هاتيهم ..وينهم ؟؟
دارين : صاح !!😳
نوح : هيا دارين ..وينهم
قربت منه وفتحت فوني ..ومديت التليفون عشان ايشوف ..لكن نوح شد يدي بالفون بكل ..وقربه من وجهه ايشوف فيه 😣
نوح ايشوف للفون وبعدها بحت فيا : عطيني ورقة وقلم
دارين : تمام
ونبي نمشي لكن نوح شاد يدي زين ومايبيش يطلقها
دارين : نوح !!
نوح : حتى أني نبي نطلب منك طلب 😏
دارين بخوف : شنو هوا 😰
*********************
أوس بعد المغرب كمل شغله وطلع من السجن ...بس طبعا قبل يمشي حكى مع دارين قبل ..وعرف منها شن صار لما عطاته الورقة
أوس طالع من طريق السجن تلاقى مع كريم في سيارته ...وكريم بدأ يضايق فيه بالسيارة على الطريق ..اوس تعصب منه ..وقعد يجري بسرعة لعند قص الطريق على كريم وقف السيارة بسرعة قدام سيارته ..ونزل 😤
كريم وقف السيارة بس مانزلش 😏
أوس قرب من سيارة كريم وشد ادبشه من الروشن : شن تبي مني ...مانبيش نبتلي بيك 😤
كريم فك ايدين أوس ونزل من سيارته واتكى عليها وهو يسقم في بدالته : شكلي أنا اللي ابتليت بيك 😏
أوس قرب وجه من وجه كريم : ساهل تقدر تطلب تنسحب من القضية ..مازال بدري 😡
كريم : تؤ ..مش أنا اللي ننسحب من قضية ..حتى ولو كانت خاسرة ...الانسحاب امخليه للفاشلين اللي زيك 😏
أوس ضربه برأسه على وجه لعند طاح ..وبعدين شده من دبشه وصباه وبدوا ايتعاركوا ..لكن حتى كريم كان قوي ..وتضاربوا لاثنين ..لعند وقفت عليهم سيارة فيها شباب فكوا بينهم ..وكل واحد منهم عدا في حاله
رغد طلعت من محل في المغرب ..وايديها امعبية اكياس ..ركبت سيارتها ..واتصلت بدارين
دارين تركب في سيارتها : نعم
رغد : ها شن صار أمعاك ..وينك ؟؟
دارين : طالعة توا ..مع انه مازال وقت الخروج ..بس عشان خاطرك بس
رغد : خلاص عارفتك سيبتي حبيب القلب على خاطري ..تبي اتذليني بيها توا
دارين : اي حبيب قلب 😳
رغد : دارين وينك ..معاش في وقت ..هيا
دارين : طلعت توا ..قاعدة في الطريق
رغد : خلاص نتلاقوا عند الإشارة اللي قبل شقة اوس ..باي
صكرت دارين وهي تضحك على كلام رغد ...بس شن تقصد رغد بكلمة حبيب القلب ..قصده على العيادة وشغلي ..والا قصدها نوح 😰😣
تلاقنا لاثنين عند الإشارة ..نزلت رغد خذت مفتاح أوس من دارين وركبت سيارتها ومشت
*********((الكاتبة أم ناصر ))
أوس وقف سيارته تحت شقته الساعة 8 ونزل ...رقى الدروج ..لاقى باب الشقة الرئسي مفتوح ..طلع سلاحه ..وقعد يمشي بالراحة ..لعند وصل لعند باب الصالة كان كله قزاز ..قرب وشاف رغد اتنظم في طاولة الاكل ...صبا ايتفرج عليها ..وبعدين قرب من باب القزاز وحط رأسه عليه ورغد سمعت صوته التفتت شافته 😍
أوس حاط رأسه على القزاز ويشوفلها ..كيف لابس وطالعة اتجنن ..ومزينا المكان بالشموع والورد على الطاولة ..وفي عشاء وتورتة
ابتسم ورغد قربت من الباب واعيونها في اعيون أوس ..فتحت الباب وخش أوس ..قعد ايشوف للطاولة وابتسم
رغد : كل عام وأنت بخير ..ربي يطول بعمرك ويسعدك أوس ☺️
أوس قرب منها : كل سنة أنتي الوحيدة تتذكري فيه
رغد انحرجت منه ..بس لما قرب منه اوس شافت وجهه وكان في ضربة فوق عينه وعلى خده
رغد بخوف : شن هادا أوس ..من ضربك 😰
أوس تنهد وعدا قمعز على الكنبة : عادي ..مادققيشي
رغد قمعزت جنبه ولامست خده : شن فيك أوس ..أنت شارب ؟!!
أوس ايبحت في الطاولة : هاذا كله أنتي دريته
رغد ابتسمت : بصراحة لا 😅 ..شريته من مطعم اصلا مافيش وقت نطبخ ..بس أكله خيال بكل
أوس ابتسم : مافيش وقت والا ماتعرفيش تتطبخي 😏
رغد وجهها أحمر : ليش تحرج فيا عارفني مانعرفش نطبخ 🙈
أوس هز رأسه ..وحس بصداع ..عزق رأسه على مسند الكنبة وغمض اعيونه
رغد : خيرك أوس ...خوفتني عليك ..جاي مضروب ..وشكلك حتى شارب ..مع من تعاركت 🥺
أوس يحكي ومغمض اعيونه : ااااه رغد ..تاعب ..تاعب ..ومافيش حد حاس بيا ..وكل يوم مشكلة جديدة ...نبي نرتاح ..نبي انعيش يوم واحد من غير مانفكر في شي
رغد وجعها قلبها عليه ..اول مرة اتشوف أوس هكي ..حطت يدها في شعره وقربت منه : كيف مافيش حد حاس بيك ..وأنا 🥺
أوس رفع رأسه وبحت فيها وهي انحرجت : ققصدي أنا ودارين 😣
أوس قرب منها وحط يده على خدها : أنتي عارف أنك ديما جنبي ..بس وين دارين ماتندريش عني بكل ..ولاتعرف شن في قلبي ليها
رغد ارفعت وجهها واعيونها تعبوا ادمعوا 😰💔
لكن أوس كان قريب منها ..ومش منتبه حتى للكلام اللي قاله ..لما شاف ادموعها زاد قرب منها : خيرك
رغد هزت راسها من غير ماتتكلم ..ماكنتش قادرة تتكلم أصلا 😭💔
أوس ايشوف لفمها زين ..وقرب وجهه من وجهها ..وكان خلاص قريب ايبوسها ...لكن رغد كلام أوس قاعد ايدور في عقلها ...هيا كانت حاسة بحب أوس لدارين ..بس اول مرة تسمع منه بنفسها 💔
تباعدت عن أوس ..وصبت خذت شنطتها ..وجاكتها وطلعت وعدت بسرعة ..وهي قلبها مكسور 💔😭
((عندما تصل مراعاة مشاعر الاخرين الى إيذاء نفسك ..توقف فوراً ))
أوس غمض اعيونه ورد عزق رأسه على الكنبة ..مش عارف شن صار
أم ناصر ..ملاحظة يابنات اي أقتباس او شعر او كلام بين الاقواس ..هو لكتاب وشعراء ..وعلماء ورجال دين وغيرهم ..مش مجرد كلام
**********************
الصبح أوس فتح اعيونه راقد على الكنبة ..بحت في المكان واستغرب ..في البداية ..بس اشويا اشويا قعد يتذكر ..في لليلة امبارح ...بس مش متذكر شن حكى مع رغد ..لكن حس أنها طلعت زعلانة ..لان كل شي نفس ماهو ..العشاء ..والتورتة
صبا يتكأسل ..وقرب من الطاولة ...وشاف هدية مغلفة ..وفي عليها كرت معايدة من رغد ...ابتسم وحطها على الطاولة ..وعدا خش الحمام
نضت الصبح انفكر في كلام نوح أمس لابست وفطرت ..وطلعت ركبت سيارتي ..طلب مني نمشي لمكان ...كنت خايفة ..ونرتعد ..وسرحت مع افكاري ..لعند عمي فرج ..دق على قزاز سيارتي ..وأنا انفجعت ..بس بعد شفته ابتسمت ..وصبحت عليه ...وهو ضحك وصبح عليا ...وبدأ في شغله ايلم في الشكاير...وأنا ولعت سيارتي ..وطلعت
ليش خايفة دارين ..ماهو أوس قالي عدي بعد ماحكيتله أمس على طلب نوح ...مادام أوس مش خايف ..معناها مكان مايخوفش
وصلت للمكان حي صغير ...الحواشين الاغلب نفس بعض ...في اولاد ماشيين للمدرسة ...اتصلت برغد قبل ننزل ..نبي نسالها شن صار امعاها لانها من امبارح وفونها مقفل ..لكن ما صار شي ..مازال مقفل 💔
نزلت من السيارة وقعدت نمشي ..لان شوارع الحي ضيقة وسيارتي ما اتخشش فيها ..مشيت شارعين ..والقيت مراة وافقة اتهدرز مع جارتها عند الباب ..سألتهم على العنوان ..وكانن ايشوفلي بستغراب ..مش بس هما ..كل اللي شافني وأنا خاشة للحي استغربني
وصفنلي العنوان ..وماكنش بعيد ...وصلت لمبنى قديم ..وحالته حالة ...كان على دورين ...خشيت الدور الاول وأنا نرجف ... رقيت مع الدروج مع نزلت اولاد اصغار نازلين يجروا ويضحكوا ..خبطوا فيا قبل طحت ...رقيت لعند وصلت للشقة في الدور الثاني ..خذيت نفس كم مرة ورنيت الجرس 😣😣
بعد اشويا سمعت وحدة تسأل من جوا من ؟؟ قلتلها أفتحي ...و انفتح الباب
دارين : السلام عليكم
شابة ممكن عمرها في العشرينات ..حاطة وشاح على رأسها ..وفي بنت صغيرة ممكن عمرها سنتين او أكبر ..شاده في قفطانها ومنطمرة وراها اتشوفلي بخوف
الشابة : وعليكم السلام ...تفضلي أختي.. من أنتي ؟؟!
دارين زمطت : أني جايتك من طرف نوح الحاج
الشابة انصدمت اعيونها دمعوا وضحكت ...؟؟؟!!!
*******نهاية الحلقة #5
اكتبوا توقعاتكم ...وشن رائكم في شخصية الشباب ..هيبة و اللافي ...وشكرا للكل بنت امس دزت صورة .. البوست أمس تعبى حلويات 😂 بس أنا نبي كم صورة لنفس الشخص ..ويكون صغير في العمر 😘