"وگتلي تاني و جرحك الماذيك يصحه
وقشمرت روحي من اتاني و ما اجيت"
الكاتـِبه : أيــلان
حساب الانستا للتواصل : l.1ll8
مُلاذ :-
الناس التموا علينا ، حزن بـ حضني
شلت حزن للـ السيارة ، اركض ، صعدت
انداريت ادحگلها كل جسمي يرجف
ادور بـ السويج اريد السيارة تشتغل ،
ايدي ترجف اول ما اشتغلت حركت
طلعت على الطريق
دحگت للجهال بـ المراية يركضون ورانا
كملت طريقي بـ اتجاهه المستشفى
عين على حزن و عين على الشارع ،
كل شوية التفت اصحيها بس ماكو فاقدة
اجيس نبضها عايشة
جريت تلفوني من الجنطة
ايدية ترجف و كلها دم ، دورت على رقم أيهم
اتصلت عليه خليت التلفون على اذاني
صوتي يرجف ، دموعي ما تنزل اختنكت
أيهم : مُلاذ ؟ هاي رقمج لو غلطان انه؟
گلت بـ صوت يرجف يتوضح بي خوفي
مبحوح و اشبهه بـ صوت البجي
بس دموعي ماكو ما تنزل
مُلاذ : أيهم أيهم ساعدني الله يخليك أيهم
أيهم : ولج مُلاااااذ احجي شكو لا تخبليني
شصاير شكو؟؟ تاذيتي ؟ احد سوالج شي؟
شكو شصاير ؟ احجي ، انطقي !!
مُلاذ : حزن
أيهم : شبيها حزن؟؟
بلعت ريگي
نَفسي احس كله انهدر من التعب
مُلاذ : حزن أيهم حزن اندعمممت
دام الصمت من عنده لـ ثواني
گلبي يدك حيل ، جسمي يرجف
أيهم : شلون اندعمت
وين انتِ هسه ؟؟
مُلاذ : جايه جايه للمستشفى
أيهم حباب اطلعلي اتلاحگها
أيهم : بس اهدئي ، انه مو بـ المستشفى خرب
هاي رح ارجع لـ المستشفى بس اهدئي
مُلاذ : أيهم شوفها شوووفها حباب
رح اوصل انا قربت
أيهم : اجيت اجيت
ظلي وياي على الاتصال لا ترحين
مُلاذ : خاف تموت ؟؟
خاف تموت أيهم حزن بنتي
حزن قطعة من روحي
أيهم : لا ما تموت ما تموت
لا تفاولين عليها بس اهدي
جري نفس مُلاذ ، جستي نبضهاا؟
مُلاذ : اي جست نبضها عايشة
أيهم وصلت للمستشفى استعجللل
حباب استعجل
أيهم : هاي رح اوصل
وكفت السيارة ، سديت الاتصال
نزلت بسرعة انداريت لـ حزن
فتحت باب الكشن الورا شلتها
دخلت اركض بيها للـ المستشفى
اجا ناحيتي دكتور
على اذانه تلفون و يحجي
الدكتور : تمام دكتور اي شفتهم
هذولة كدامي ، تمام
جابولها سدية اخذها الدكتور من عندي
روحي فرفحت ، الدكتور يسألني و اجاوبة
مُلاذ : دكتور عايشه؟؟
الدكتور : انتِ شتصيرين منها؟
مُلاذ : اعرفها انا
اندعمت من اجتني تركض...
جريت نفس و حجيت اله
شلون اندعمت و انضربت بـ الگاع
و هم يمشون سريع يفحصونها
شاف مكان الدم الي ينزل من راسها
رجع على ايديها و رجليها المتضرره
راحوا يركضون بيها
ظليت بـ مكاني متجمدة ، ادحك وراهم
فزيت على صوت أيهم من وراي
أيهم : مُلاذ
انداريت اله بسرعة
مُلاذ : أيهم الحگها حباب أيهم
خطيييه رح تموت خطيه أيهم
حزن بنتي و الله اتخبل بدونها
أيهم : اهدئي انه هسه رايح الها
بس انتِ رح تهدأين هسه ، زين؟
هزيت راسي بـ قبول
ما ادري شنو يحجي ، عقلي يم حزن
أيهم : اكعدي هنا
هزيت راسي بـ رفض
أيهم : اكعدي خل الحگهااا
كعدت بسرعة على الكرسي
اتقدم يلبس اللابكوت ، يمشي سريع
اندار الي ، اشرلي اظل بـ مكاني
نزلت نظري لـ ايديه يلي بيهن دمها
بلعت ريگي و ايديه ترجف ، رفعت راسي
ظليت صافنه ادحك لـ الاضوية
غمضت عيوني ، عصرتهن بـ ألم
مر وقت طويل گمت اروح و ارجع بـ مكاني
امسح ايد بـ ايد ، خنگه متوسطه صدري
خوف و قلق يسري بـ كل گلبي
هكذا مر الوقت بـ هذي اللوعة يلي اتلوى بيها
حوالي الساعتين الا ربع مرت و انا هيج
رحت ادور على أيهم بـ المستشفى
ما اعرف منين راحوا اصلاً ، وگفت ممرضة
مُلاذ : وين الدكتور أيهم ؟
-بـ غرفة العمليات
مُلاذ : وين صايرة الغرفة؟
-ما تگدرين تدخلين الها
مُلاذ : اعرف بس فدوة گليلي وين؟
اشرتلي و وصفت الي وين
هزيت راسي ، تشكرتها
ركضت نحو المكان يلي گالت عنه
وصلت دحگت كدامي باب
كعدت ع الكراسي القريبة منه
ظليت منتظرة و ادحك لـ الباب
حطيت ايدي على بطني يلي بدت تلويني
بلعت ريگي و بقيت هادئه ، ساكنه بـ مكاني
درت وجهي و انا صافنه ، ركزت على واحد
واكف بـ نهاية الممر ، ساند روحه ع الحايط
عگدت حواجبي ادحگله و هو يدحگلي
انرسمت ابتسامة على ثغرة
طلع تلفونه اتقدم يمشي دار وجهه
راح و هو يحجي بـ تلفونه اتصال
فزيت على صوت أيهم
الي فوك راسي و ايديه بـ جيبة و يخوزر
أيهم : انتِ شتسوين هنا؟
كمت بسرعة من مكاني
مُلاذ : حزن ، حزن شلونها؟
أيهم : مو گلتلج ابقي هناك؟
مُلاذ : گلولي انت هنا
أيهم : اي انه هنا
طلعت من العمليات ادور عليج
اتخبلت عبالي طحتي صار بيج شي!!
مُلاذ : شنو ؟ الممرضة گالت بـ غرفة العمليات
أيهم : خلصت صارلي ربع ساعه
و اجيت اصيحج الگاج ماكو
انتِ شنو من طراكيع عندج ما تگليلي؟
مُلاذ : هسه أيهم جاوبني حزن شلونها ؟
أيهم : البنية خطية متضرره
بس الحمدلله هسه وضعها مستقر
و نجحت عمليتها
انرسمت على شفتي ابتسامة ظاهره اسناني
خليت ايدي على حلگي بـ فرح
مُلاذ : صدك؟؟؟؟
ابتسم ابتسامة جانبية
هز راسه بـ قبول : و الله
مُلاذ : شوكت تصحى؟
أيهم : بعد ما نكدر نحدد ،
حالياً مخليها تحت المراقبة
گلتلج راسها متضرر و متأذيه
يمكن تطلع فاقدة الذاكرة لا سامح الله
او اكو فد خلل او تطلع سالمة متعافية
مُلاذ : أيهم حباب ، خو ما تصير عدها مضاعفات و يصير بيها شي اسم الله لا تكذب عليه!
أيهم : لا تخافين و الله تصير زينه
ما يصيرلها مضاعفات ان شاء الله
گلتلج وضعها حالياً مستقر ، اخذج الها؟
هزيت راسي بـ قبول بسرعة
راح يمشي و انا وراه ، اندار دحگلي
رفعت عيني انا هم دحگتله
مُلاذ : شكو؟
أيهم : لَـذه امشي يمي لو گدامي
مُلاذ : ليش ؟
أيهم : احسن
اتقدمت لـ كدامه، كملت مشي
هو وراي ، لحد ما وصل يمي
بقينا نمشي هواي لحد ما وگفنا كدام غرفة
رفعت عيني دحگت لـ حزن يلي نايمه
مشكلين الها اجهزه و اوكسجين
بهت وجهي النفس ضاك بـ صدري
مُلاذ : أيهم حزن شتسوي هنا؟
أيهم : رح نخليها هنا لـ فترة
لحد ما تصحى
مُلاذ : مو گلتلي هي زينه؟
شوف حالها ؟
أيهم : زينه تشوفيها ؟ المهم عايشة هسه
و ان شاء الله رح تكون قوية و تفتح عيونها
مُلاذ : و امها ! أيهم و امها يلي لسا ما تدري! اذا ما صحت شلون اخاف عليها
اغلى من روحي هيَ
أيهم : مُلاذ انتِ هسه خبلتيني
حمره صرتي و ما تسمعين صوتج شلون
اهدي و جري نفس رح تموتيني
دنكت خليت ايديه على وجهي
مسحت وجهي و عيوني الي يوجعني
وخرت ايديه ، رفعت راسي لـ فوك
مُلاذ : شكد رح تظل؟
أيهم : ما اعرف بس ان شاء الله مو هواي
مُلاذ روحي كعدي رح توكعين
هزيت راسي بـ رفض ما قابلة
ساندة روحي ع الحايط
و اضرب ظهري بي بـ خفة
ظل واكف يمي و ساكت
أيهم : شلون صار هيج؟
حجيت اله الموقف ، الرجفه بـ صوتي
هز راسه بـ قبول يسمعني
ظلينا كاعدين هيج ، اتصلت عليه امي
سولفت الها يلي صار ، انقهرت
فيروز : خطية الله يشافيها و يعافيها
تگوم بـ السلامة سوده عليه ، لا تتاخرين يمه
ديربالج على نفسج و انتبهي من المستشفى
لا تلمسين اي شي
مُلاذ : ان شاءالله
سديت الاتصال منها
درت وجهي لـ أيهم يلي اتقدم و بـ ايدة لفتين
مدلي وحدة هزيت راسي بـ رفض
أيهم : اخذي
مُلاذ : ما اريد
أيهم : اخذي
مُلاذ : ما اريد
أيهم : مُلاذ ! جسمج يرجف
وجهج تعبان اخذي جاي اگلج
مُلاذ : ما اريد أيهم !
غمض عيونه بـ نفاذ صبر
أيهم : بس لگمه وحده يلا بـ داعة حزن
خزرته و اخذت اللفه من ايده
مُلاذ : تلح وياي هواي
أيهم : عادي
التفتت دحگتله و اكلت لگمه
لمن شافني اكلت بدا ياكل
اخذ كصبات ، خلالي الكصبه بـ اللبن
مدلياه اخذته و شربت شوية
اخذت تلفوني على اثر صوت اتصال
دحگت لـ الاسم "ضرغام" فتحت الاتصال
مُلاذ : الو
ضرغام : شلونج مُلاذ خو ما كعدتج؟
مُلاذ : الحمدلله ، لا ما كعدتني گول؟
ضرغام : شوفي هسه خابروني
لاگين السيارة يلي ندور عليها
مُلاذ : صدددك؟
ضرغام : و الله و لاگين موقعها وين
و صاحبها همين شتگولين نروحلهم باجر؟
مُلاذ : طبعاً طبعاً نروح الهم
باجر من اخلص شغلي اتصل عليك
ضرغام : تمام ، اعتذر منج ع الازعاج
مُلاذ : لا عادي
ضرغام : يلا تصبحين على خير
مُلاذ : تلاگي الخير
نزلت التلفون و سديت الاتصال
درت وجهي لـ أيهم
أيهم : منو؟
مُلاذ : ضرغام
أيهم : الضابط؟
مُلاذ : اي؟
أيهم : شنو شبي؟
مُلاذ : انت تعرف اركان
هز راسه بـ قبول
أيهم : اعرفه
مُلاذ : لگينا شي ينقذه من السجن يمكن
أيهم : ما لگيتو ابوه العار أيمن سولفلي
مُلاذ : لگينا يمكن
أيهم : همزين لگيتو ابو ****
مُلاذ : عاش لسانك
أيهم : اهلاً و سهلاً
ابتسمت و خزرته
مسحت على وجهي
مُلاذ : أيهم
أيهم : جَرحه
نزلت عيني دحگتله
و هو يدحگلي و يجاوب بـ جديه
مُلاذ : لا اله الا الله
أيهم : شنو؟
مُلاذ : شنو جرحه شبيك؟؟
أيهم : گلت جرحه انه؟
مُلاذ : اي
أيهم : ما گلت
مُلاذ : و الله گلت
أيهم : و الله گلت ها
مُلاذ : لا گلت جرحه
أيهم : ما ادري بالغلط عادة لسان
ظليت ساكته و ما حجيت
أيهم : شنو ردتي تگولين؟
مُلاذ : انسى
أيهم : لَـذه احجي
مُلاذ : انت منين تعرف اركان؟
شلون تعرفه و منين ؟ ليش بـ كل مكان
انت موجود و دائماً تطلعلي من كل مكان
دحگتله لمن نزل راسه ساكت
ظل صافن ع الگاع نظراته تايهه
بلع ريگه رفع عينه دحگلي
أيهم : صدفة
مُلاذ : اخو باهر صدفة تعرف اركان صدفة
جنت تراقبني و من ايام الجامعة صدفة
و اخو أيمن يلي اله علاقة بـ قصة اركان صدفة
سويت عمليتي صدفة ،
بـ كل مكان الگاك كدامي صدفة
الصدف هاي ما جمعتني وي غيرك؟
أيهم : و هسه بـ شنو تشكين؟
مُلاذ : بـ شنو اشك؟ بـ كل شي ما اشك
لان عقلي اصلاً فصل بعد ما يفكر بـ شي
او لان احتار بـ شنو يفكر و بـ شنو ينصدم!
نزل راسه يفرك بـ كصته
اجا اله اتصال رفع تلفونه و دحك
دحگت وياه لـ الاسم "لينا"
مُلاذ : مرتك؟
سكت ثواني هز راسه بـ قبول
دار التلفون و سد الاتصال
مُلاذ : ليش ما تجاوبها ؟
أيهم : بعدين اتصل عليها
مُلاذ : سوء معاملتك الها
لا تتوقع يخليها تستقبلك بـ زينيه
أيهم : شنو شايفة من معاملتي وياها ؟
انتِ تعرفين انه شلون اتعامل وياها ؟؟
لو ما مجزعتني و ما مطلعتها من ماعونها
كان هسه انه وياها كلمن بـ دربه
بس لازمتني من ايدي التوجعني
ما تقبل تتنازل عن أبيل اذا اتطلكنا
و انه عندي استعداد اعوف الدنيا و ما اعوف أبيل
مُلاذ : ما يخصني هي علاقتكم
بس اتمنى تتعدل لان ابنكم خطية
و اعيد مرة ثانية ما اريد اتدخل بينكم اصلاً
مجرد نصيحة مني الك تعدل علاقتك بيها
أيهم : اليوم تزوجتي .. لا مو انتِ تزوجتي
خل نگول عندج اخو و هذا الاخو الحيوان اتزوج
مرته مثل لينا ما تكعد بـ گاعها وصلت بيها
حتى على امج تغلط و تلعب لعب بـ الدنيا
رح يعجبج هيج مرة اخو؟
مُلاذ : ليش لينا تغلط على امك؟
أيهم : مُلاذ هي مرتي انه جاي اتخبل من روحي
لان احجي هيج عنها بس هاي الحقيقة
و محد جاي يفهمها و انتِ بالأخص ما تفهميني
انه لو لينا خوش ادميه و الله ما عليه بيها
و انه اعرف كلش زين سواياتها
ولو ما تواسيل امي و محاولتها ارجع لينا
و الله ما ارجعها انه مو غافل و اعرف كل شي
مُلاذ : شتعرف؟
فرك وجهه و مسح على لحيته
هز راسه بـ رفض دحگلي : انسي
سكتت عنه اساساً ما عليه بـ علاقتهم
و لا اريد اتدخل بيناتهم ، اكرهه هالفكرة
ظليت لـ ثاني يوم الصبح
غمضت عيني ثواني ، فزيت على أيهم
يغطيني بـ غطى ، مسحت عيوني
مُلاذ : شنو هاي ؟
أيهم : ارجعي نامي بعد وكت
بس غطيتج تگومين تنامين ع القنفه الي بـ مكتبي؟
مُلاذ : لا ، شكراً
أيهم : كومي نامي و اكعدج انه
اذا صار اي شي
مُلاذ : لا ما اكدر اعوف حزن
أيهم : قابل انتِ شنو تسوين الها؟
و اذا صار شي وعد انه اجي اكعدج
لا تخافين هسه هي وضعها مستقر
مُلاذ : لا خليني هنا
أيهم : رگبتج تنكسر
و باجر گلتي عندج شغل لازم ترحين
لمن ترحين لازم تكونين مصحصحه
روحي نامي بـ المكتب كم ساعه
هزيت راسي رافضه ، بعد محاولات گمت وياه
رحنا لـ المكتب مالته شمرت روحي ع القنفه
جريت الغطى و تغطيت و نمت
فزيت على صوت اتصال ، فتحت عيوني
دحگت لـ المكان فارغ و انا نايمة على بطني
گمت كعدت على حيلي وخرت شعري عن وجهي
صفنت ع المكتب اريد استوعب شجابني هنا
لحد ما تذكرت البارحة اجيت بـ رجلية و نمت
مسحت وجهي كمت من مكاني
اريد اروح لـ حزن
انداريت لـ تلفوني لمن اجاني اتصال مره ثانية
اخذت التلفون رجعت كعدت ، جاوبت على امي
فيروز : يمه وينج هاي المره الـ ١٤ ادك!
مُلاذ : ها يمه جنت غافية
ما اسمع التلفون
فيروز : البارحه ما رجعتي لـ البيت؟؟
مُلاذ : بقيت بالمستشفى يم حزن
فيروز : رح ترجعين اليوم؟
ما كعدت البنية ؟
مُلاذ : ما ادري هسه اشوفها
اتاخر اليوم يمكن هم
فيروز : هسه على الاقل تعالي خل اشوفج
عدله صاحيه بيج ما بيج ؟
مُلاذ : ان شاء الله هو اكيد اجي للبيت
بس هم ارجع اطلع
فيروز : تمام انتبهي لـ روحج
مُلاذ : تمام
نزلت تلفوني و سديت الاتصال
دحگت لـ مكالمة من صافيناز
اتصلت عليها ، جاوبتني بسرعة
صافيناز : لك قلبي طلع من محلو
انتِ وينك ؟
فركت كصتي بـ تعب
مُلاذ : هسه شويه و رح اجي
صافيناز : اليوم عندك موعد
مع البنت يلي كانت بدها تتطلق و بدها بنتها
مُلاذ : مهره؟
صافيناز : اي هي
مُلاذ : اليوم اجي و اشوفها
بس اخري المواعيد اتاخر يمكن
صافيناز : بس في ٣ جايين
مُلاذ : دبريهم صافي
صافيناز : تمام ، بس شو في؟
حسيتك كتير تعبانه صاير شي؟
مُلاذ : اجي و اسولفلج
صافيناز : طيب
سديت الاتصال منها و گمت
رحت اشوف حزن دورت على أيهم
اجاني و گال بعد ما صاحية و هم وضعها مستقر
رفعت تلفوني دحگت لـ الساعة
مُلاذ : أيهم انا رح اروح بس ارجع
اي شي يصير گلي عندي شغل اكمله و اجي
أيهم : لا تخلين بالج
هزيت راسي بـ قبول عبرته و رحت
عقلي الهوسه الي بي لا تطاق
ما اعرف شلون ارتب يومي و شنو اسوي
رحت لـ البيت اول ما دخلت اجتني امي
اتطمنت عليه ، رجعت تسألني على حزن
سولفت الها كل الي صار ،
موسعه عيونها مصدومة
كل كلمة و الثانية تدك رجلها
و تعض شفتها بـ اسف
گمت سبحت ، طلعت نشفت شعري
بدلت ملابسي ، رشيت عطري و طلعت
رحت على ام حزن بالبداية
دگيت بابها بعدني اول دكه طلعت الي تركض
دحگتلي تحولت نظراتها لـ اليأس
هي اساساً تعرفني و كل فترة اجيب الهم مسواك
رغم هذا الشي ما كافي لـ عيشتهم و حزن طفله
تحتاج لـ العناية و تحتاج لـ ملابس و هواي اشياء
اتوسلت اذا اعرف شي عن حزن اسولف الها
دخلت و حجيت الها عن حزن
و هي اساساً توها مسوية العملية
خفت يصيرلها شي و هي اتخبلت على حزن
مُلاذ : اهدئي رجاءاً خليني اكمل الج كلامي
دكت على رجليها
گال بـ روح مفرفحة
-يمه بنتي وين بنتيييي؟
مُلاذ : بس اهدئي الدكتور نفسه
يلي سوه عمليتج سوه عمليتها
هسه انه رح اخذج الها بس مطلبي منج
تهدأين و تطولين بالج و تدعين الها
كامت تركض لبست عبايتها
تبجي و تدعي رب العالمين تكون بنتها بـ خير
طلعت وديتها لـ المستشفى انهارت لمن شافت حزن
بالگوه هديناها و خليناها تكعد ظلت يمها
أيهم : وين رايحة هسه؟
مُلاذ : ما ادري الشغل لـ فوك راسي
أيهم : لا تخبصين روحج
انه هنا يم حزن ما عايفها تمام؟
مُلاذ : اي شي يصير اتصل عليه
انجبرت اگول لـ امها لازم تدري
أيهم : زين سويتي ، هيج افضل
هزيت راسي بـ قبول
وصيته للمرة الالف اذا صار شي يخابرني
تركته و طلعت متوجهه للـ المكتب
اتصلت على صافي گلتلها جايه لـ المكتب
صافيناز : تمام حُبي رح ارتب مواعيدهم
مُلاذ : تمام صافي
قبل لا اروح لـ المكتب
نزلت اشتريت مسواك و وديته لـ بيتنا
رجعت صعدت بـ السيارة ، رحت لـ المكتب
دخلت سديت الباب ، دحگت لـ صافيناز
يلي طلعت تاشرلي
على اساس اكو واحد من الموكلين
هزيت راسي بـ معنى "تمام"
اتقدمت و دخلت سلمت على موكلتي
مُلاذ : اعذريني تاخرت عليج
-لا اصلاً ما صار هواي من اجيت
هزيت راسي بـ قبول
بدت تحجيلي عن اخير الاحداث
يلي بدرت من زوجها الرافض يرجع بنتها الها
و هكذا مر الوقت لحد ما خلصت شغلي
اتصلت بـ ضرغام
گلتله نروح نشوف سالفة السيارة
طلعت من المكتب قفلناه انا و صافيناز
مُلاذ : اوصلج انا؟
صافيناز : لا الشوفير رح يجي ياخذني
مُلاذ : تمام انتظر على ما تروحين
صافيناز : اتصلت فيو من زمان
ما رح يتأخر تلاقي وصل
بعدها تحجي و اجاها اتصال
رفعت التلفون راوتني رقم السايق
هزيت واسي بـ قبول ، ودعتها
اتقدمت صعدت بـ سيارتي
انتظرت تروح لمن رحت انا
وصلت لـ المكان يلي بي ضرغام
اشرلي على سيارة و بدء يسولفلي عنها
و عن صاحبها و المعلومات يلي حصلها
مُلاذ : تمام هسه نروح نشوفه لو شنو؟
ضرغام : طبعاً
مُلاذ : و اذا ما حجا؟
ضرغام : بـ رأيج سايق تكسي
رح يريد يورط نفسه وي ضباط و محاميين ؟
و علمود شخص ما يعرفه ؟ طبعاً لا
مُلاذ : صحيح
اتقدمنا انا وياه على الرجال
يلي طلع حتى يصعد سيارته
و قبل لا يصعد استوقفناه ،
طبك باب السيارة و دحگلنا
مُلاذ : السلام عليكم
-اهلاً اتفضلوا منو رايدين؟
ضرغام انطاه تاريخ و يوم
و بدء يحاجي عن اليوم
يلي طلع بي ابو اركان من المستشفى
طلع تلفونه ، راواه فيديو الكاميرات
يلي نقله ضرغام من جهاز أيمن لـ جهازه
ظل ابو التكسي يدحك و عاكد حواجبة
رفع راسه دحگلنا
-بس انا ما عليه بي و الله العظيم
هو بس وكفني حتى يروح لـ مكان و انا اخذته
ضرغام : اعرف خويه انا ما جاي اتهمك
انا جاي اسألك و اريد اسمع الموضوع منك
و شصار بـ هذاك اليوم
دحگلنا الولد مرتبك
هز راسه بـ قبول اشرلنا على البيت
-اتفضلوا
هزينا راسنا بـ قبول
اتقدم هو فتح باب الشارع و احنا دخلنا
دخل لـ البيت ثواني
فتح الباب الخارجي مال غرفة الاستقبال
-اتفضلوا حياكم الله
ضرغام : تسلم
-الله يسلمك
دخلنا و كعدنا انا و ضرغام
ندحك بـ البيت و صافنين ،
طلع الرجال دقايق و رجع
اجانا قدم النا مي اتشكرناه و اخذنا نشرب
نفسيته كلش طيبه و رغم ما يعرف بـ الوضع
لَكن قبل لا نحاجي حتى ظل يقدم النا مي و جاي بعدين اتقدم و كعد كدامنا
مُلاذ : بـ اليوم يلي راوينا الك الفيديو
تتذكر الشخص يلي صعد وياك و شنو سوا؟
هز راسه بـ قبول
-لمن اخذته من باب المستشفى
كان شكله و هيئته غريبة وصلته لـ الـ####
مُلاذ : منطقة اهل اركان
هز راسه ضرغام بـ قبول
و انا كملت كتابة كلام السايق
-گلي انتظره نزل من السيارة
و انا ظليت انتظر راح دخل لـ البيت
طلع بعد كم دقيقة ويا بنات و مره
و المره تصرخ بـ اسم واحد و تبجي
مُلاذ : اركان ؟
-اي اي اركان
مُلاذ : كمل
- وصلته لـ منطقة الـ ####
انداريت لگيت المره نايمه و البنات هادئات
استغربت و ما افتهمت شكو بس هو استعجلني
و گال انزلهم ويا لان هم تعبانين
بـ صراحه ما ردت اساعدة بس هو اتوسل
و گال مرتي مريضة و بناته هادئات
و هو رجال جبير ما يكدر يشيلهم لـ وحده
نزلتهم وياه و ساعدته وصلتهم لـ باب البيت
هو شال بنيه و انا سندت المره الجبيرة
و البنية الثانيه هو شالها دخلتهم لـ الصالة
طلعت و عفتهم رغم هذا الشي
ظليت مستغرب منه و ما مرتاح اله
بس ما اتدخلت لان مبينين اهله
ضرغام : من شفت هيج
ليش ما بلغت الشرطه؟
-انا رجال على كد حالي يا خويه
الله وكيلك هاي اطلع من الصبح لـ الليل
احصل الي فلس فلسين و عندي ولد و بنيه صغار
و مرتي وراي اروح و ابلغ الشرطه تاليها اتورط
و بـ شي لا الي و لا عليه بي منو الهم غيري؟
هزينا راسنا متفهمينه
مُلاذ : تكدر تاخذنا لـ المكان الاخذته اله
دحگلنا متوتر هز راسه بـ قبول
بعد اقناعة ما راح يكون اله علاقة بـ اي شي
و لا رح ندخلة بـ الموضوع
و ما رح يطيح بـ اي مشاكل
صعدنا بـ سياراتنا و مشينا ورا سيارته
اتصل عليه ضرغام و گلي رح يبلغ الدوريات
يطلعون ورانا في حال حاول ابو اركان يهرب
او يتصرف تصرف غلط
مُلاذ : تمام
ظلينا على هالمنوال نفتر ورا ابو التكسي
ابتعدنا عن المكان يلي هو كاعد بي كلش
دخلنا لـ مناطق اول مره اشوفها
كلها زبل و بيوتها قديمة و متآكله
وصلنا كدام بيت ، صف سايق التكسي سيارته
صفيت سيارتي ورا سيارة ضرغام ، نزلنا
ضرغام يحجي وي شخص يعرفة على التلفون
حتى يقطعون صوت الانذار قبل لا يوصلون
بقينا ننتظرهم لـ فترة لحد ما اجو
لمن نزلوا بدء ضرغام يسولف و يتفاهم وياهم
و يوجههم شنو يسوون و وين يوكفون
فعلاً بدوا يمشون حسب توجيهات ضرغام الهم
حاوطوا البيت و واحد منهم طفر فتحلنا الباب
دخلنا بـ هدوء ، اندار الي ضرغام
ضرغام : لو تبقين برا احسن
مُلاذ : ما اكدر ابقى برا
اعرف نفسي راح ادخل وراكم بعدين
ضرغام : مُلاذ ممكن ياذيج ابو اركان!
مُلاذ : ما يسويلي شي
تنهد ضرغام و دخل كدامي
دفروا باب البيت و طبوا يدورون
البيت صغير و ريحته قذرة ما تنطاق
ما اتحملت ، بسرعة طلعت من البيت
صار عندي غثيان من الريحة الي بي
اسمع صوت صياح ضرغام
الضباط الثانين من جوا ، مرت دقايق
غطيت خشمي و دخلت لـ البيت مرة ثانية
دحگت لـ ابو اركان الي مجتفينه و مخلينه بالگاع
وجهه شراني ذاك وينه نزلوا من فوك
-فارغ المكان سيدي
صاح ضرغام بـ ابو اركان
ضرغام : المره و البنااااات ويييييين؟
ضحك ابو اركان بـ صوت عالي
ظلينا صافنين و ندحك اله بـ استغراب
و هذا يضحك بـ شر مثل المخبل
كفخه ضرغام راشدي فوخ گلبي بي
كنبصت كدامه هسهست من بين اسناني
مُلاذ : مرتك و بناتك ويييين!
رفع عينه دحگلي و رجع يضحك
اعصابي انشدت شد لمن شفت يضحك بـ راحة
مُلاذ : حيوووووان انت؟؟؟ شسويت بـ بناتك
شسويت بـ مرتك احجي احجيي
جرني ضرغام من فوكاه و هو يهدي بيه
طلعنا لـ برا و اعصابي مشتعله نار
جرو ابو اركان صعدوه بـ سيارة الشرطة
ضرغام : اهدئي مُلاذ ارجوج
مُلاذ : شلون شلون اذا مسويلهم شي
خليت ايدي على صدري
عصرت گلادتي بـ ايدي خايفة عليهم
خاف مسويلهم شي يمكن مسوي شي لـ بناته!
اتدمرت اعصابي و رجعت ادور بالبيت
كل شي ما لگيت لـ اهله و لا اثر
وين ممكن يوديهم و ياخذهم ؟ هم مو هنا نزلهم!؟
ضرغام : رح الحگه لـ المركز
افتهم الموضوع و اجيج بعدين
رغم اليإس الي بـ گلبي
هزيت راسي بـ قبول
تركني و راح لـ سيارته انا هم صعدت سيارتي
و رجعت لـ المستشفى بعد فترة اتصل بيه ضرغام
بدء يسولفلي يلي حصلوه من التحقيق
ابو اركان ماخذ مرته و بناته لـ غير مكان
و هالشي قبل اكثر من اسبوع
لان هنا من صوت بناته
بادين الجيران يدكون بابهم و يشكون
يسألون على هذا الصوت
و مرتبكين من تصرفات ابو اركان
طبعاً هذا الشي عرفناه من الجيران
مو من ابو اركان
لان ضرغام حتى الجيران اخذهم لـ التحقيق
مرت يومين و صحت حزن
فرحت فرحة بس الله يعلم بيها
و نقلوها لـ غرفة عادي كيفت بيها
ظليت اروح و ارجع عليها
امها تحمد الله و تشكره
امي لمن عرفت گلتلي اخذها يمهم
و فعلاً اخذتها هي و ملاك لـ يمهم
سلطان هم اخذته وياهم حتى يظل يمهم
لزمت بـ خدود حزن كرصتهن و هي تضحك
بس تعبانه تضحك بـ تعب ضحكت على ضحكتها
مُلاذ : اكرص خدود ملاك؟
حزن : اييي
انداريت لـ ملاك و فتحت اصابيعي
بـ معنى "اكرص خدودها"
كمزت من يمي ، گامت تركض تشرد مني
ما تقبل اكرص خدودها و انا وراها اركض
ختلت بـ ظهر سلطان طلعت الي نص عيونها
سلطان : ولج ملكة الجنانوه هدي البت
مُلاذ : وخر عن اختي وِلك
ابو لحية مكناسه
سلطان : تلفزيون قديييم
ملاك : هههههههه
عبرت سلطان و جريتها كرصت خدودها
سلطان يضحك يريد يفكها مني ما اقبل
خدودها صارن حمر و هي تضحك
عيونها الا شويه تدمع من الضحك
و من خدودها الحمر
انداريت لـ امي يلي تضحك بـ صوت عالي
و وياها يضحكن حزن و امها ضحكت وياهن
مُلاذ : يولي شهالخديدات
سلطان : دعوفييييهن رح انعل خيرج
ملصتيهن ملص باع المسكينه
ولج شجاج انتِ فهيتي ادفريها ما اكدرلها
ملاك : ههههههههه
وكف سلطان جسمه يهتز يضحك و يدحگلها
سلطان : باع الفهاوه هههههه
مُلاذ : دمشي لك اختي ما اسمحلك
سلطان : اختج ملونه
و أنتِ ع الاسود و الابيض
مُلاذ : سلطان سؤال اتحداك تجاوب
سلطان : اي ست مُلاذ التلفزيون
گلت و انا حاصرة ضحكتي
مُلاذ : امك هم تشتري مكناسة
لو ما تحتاج لحيتك موجوده ؟
گلتها و انفجرت بالضحك على تعابيرة
و همَ كلهم يضحكون ، سلطان يخوزر
اخير شي ما اتحمل و گام يضحك
درت وجهي عنهم و انا اضحك
دحگت لـ أيهم المتجتف ساند نفسه ع الباب
على ثغرة ابتسامة و عيونه تدحگلي
خَفت ضحكتي لحد ما راحت اتحمحمت
حكيت ارنبة خشمي ساكته ، اتحمحم هو هم
اتقدم و دخل و بدء يسولف وي ام حزن
لـ الليل اخذت اهلي و رجعتهم لـ البيت
و رجعت انا يم حزن ما اكدر اعوفها لـ وحدها
امها غافية و انا مجافيني النوم ، ادحك لـ حزن
انفتحت باب الغرفة بعد ما انطرقت بـ هدوء
دخل أيهم دحك لـ حزن و امها نايمات
اتقدم بـ اتجاهي انا كاعده ع الكرسي
وكف صار كدامي رفعت عيني دحگتله
أيهم : شتسوين هنا؟
مُلاذ : ما اكدر اعوف حزن
أيهم : امها يمها
مُلاذ : حتى لو امها هم تعبانه
أيهم : عيونج تعبانات ليش ما تنامين؟
مُلاذ : مرات النوم يجافيني عادي
أيهم : لازم تنامين
مُلاذ : اذا نعست انام
أيهم : تمام
هزيت راسي بـ قبول
دحك لـ حزن و رجع عينه عليه
أيهم : ليتني حزن
مُلاذ : دكتور ؟
أيهم : حضرة المحامية؟
مُلاذ : لا تنسى انت متزوج
أيهم : ساعة السوده
زين لو ما متزوج هم هيج تعلعلين گلبي؟
مُلاذ : اي متزوج ما متزوج بالحالتين
ما انطيك مجال اذا ظليت تسوي هيج
أيهم : اعرف
مُلاذ : اي صحيح ٤ مدري ٥ سنين تراقبني
شلون ما تعرف اصلاً حافظ كم مره اكل بـ اليوم
أيهم : اذا نفسيتج حلوه و ما ضايجة
تاكلين ٣ مرات شتشوفين تاكلين
اذا ضايجة ما تاكلين غير وجبه وحده
انتِ من احد يقدم اكل الج ترفضينه
مو لان تستحين
بس ما تحبين تاخذين اكل من احد
اضافة الى تخافين الاكل يكون مو طيب
و يصير عندج غثيان لان معدتج ما تتحمل
اي اكل و اساساً عندج جرثومه
ظليت موسعة عيوني عليه
هو سفطني تسفيط يحجي أدق تفصيله
مُلاذ : يبو صخام الصخمني
ولك انت كاعد وياي بالبيت شني السالفة
أيهم : لا يابه بس ...
مُلاذ : مركبلي كاميرات مراقبه؟
أيهم : لا ....
مُلاذ : تسأل المطعم الاكلت بي
بعد ما خلصت اكل؟
أيهم : لاا...
مُلاذ : تراقب تقلبات معدتي و مزاجي؟
أيهم : ولج فوصه خليني امخرط
مُلاذ : لعد شلووون تعرف؟
أيهم : عمي اذا انه ما اعرفج منو يعرفج
مُلاذ : دوخر دكتور وخر
اعصابي حرگتوها شعوطت
منتبهين لـ اشياء انا ما انتبهه الها
أيهم : مني منتبهه ولج؟
بس انه ترا منتبهه
مُلاذ : و استاذ اسكندر؟
أيهم : خيولي هالسلبوح سيان
اكضه افصم ظهره شحده ينتبه
مُلاذ : دكتور !
أيهم : صخام الصخم الدكتور
حرام يحجي حجايه
مُلاذ : هذا كله و ما حجيت حجايه؟
أيهم : مكرود بختي مصخم
مُلاذ : سوده عليه فقيرون
أيهم : كلش
مُلاذ : انت بـ نفسك ما مقتنع بـ كلامك
ضحك و گلي هسه يجي
عافني و طلع و انا ظليت صافنه
بعد فترة دخل لـ الغرفة گال و هو مبتسم
أيهم : عايني شجبت ؟
دحگت لـ العلاليك الي بـ ايده ما فاهمه
اتقدم جر كرسي كعد كدامي
مُلاذ : شنو هاي ؟
طلعلي كراسه جبيره مال تلوين
وياها الوان تلقائياً لمن شفتها
ابتسمت ابتسامة واسعة
مُلاذ : الله ، منين تعرف انا احب التلوين؟
اره العفو نسيت انت مراقبني بالاربع سنين
أيهم : من جنتي تكعدين بـ مكان وحدج
و تطلعين دفاتر التلوين اذا عصبيه اذا فرحانه اذا ملانه اذا تريدين تلهين روحج او تنتنظرين شي اذا متحمسه تظلين تلونين تفرغين طاقتج بـ التلوين
ظليت صافنه و ادحگله
قاطع صفنتي لمن مدلي الكراسة و الالوان
ضحكت و بعدتهم بـ ايدي : لا ماريد
أيهم : ههههه ، ولج لا تتفوصين عليه
تعالي نلون سويه من تكعد حزن نراويها
ابتسمت وجريت من عنده الكراسة
مُلاذ : بس شلون نلون؟
أيهم : كومي لـ مكتبي نلون
مُلاذ : عمي وخر عني ههههههه
دكتور و محامية و بالك عنه يلونون
حجيتها و ضحكت
أيهم : دتعاي شمدريهم كومي
ولج لَـذه لا تشلعين گلبي حرام اكضج و اجرج
مُلاذ : هسه بس نطلع تكعد حزن
أيهم : لا ما تكعد عوفي البت تعبانه
مُلاذ : بس ما نطول بسرعة نرجع
هز راسه بـ قبول ، طلعنا رحنا لـ المكتب مالته
دخلنا و كعدنا جر الكرسي مال قنفه
انا كعدت على كرسي حطينا كراسات التلوين
نلون و نضحك على رواحنا
بدء يسولفلي عن نفسه من هو صغير ، مندمج
أيهم : هاي من جنت صغير
انه بـ طبعي مكروهه
اموت من واحد يستخدم غراضي
ف عدنا ولد بالصف اسم خاتم
لا هو حاتم لا هو محبس
گال هيج و انا فحطت من الضحك
ضحك على صوت ضحكتي
و رجعت اكمل تلوين و هو يكمل يسولف
أيهم : ف لزك يريد الالوان مالتي
هسه انطيهيا يضيعيهن ما انطيهيا
يروح لـ المعلم و يسويلي سالفة
فـ تعاركنا انه ويا گلتله ما انطيك اقلامي
و هو يتجارر وياي بـ ايدي القلم
شخطت خده بـ الغلط و هو گلبهه عزه الجلب
سواني ضاربه رصاصة مو شخاط خده
فوك شخطة خده حطيته و كتلته
على اقلامي الاتطشرت و ضاعت
ضربت على رجليه و انا اضحك
على طريقة كلامه و شلون متنرفز منه
مُلاذ : لعد انا من جنت صغيرة
جانت اكو وحدة ويانا اسمها سُرى
أيهم : بس لا كاضة البت كاتلتها
مُلاذ : ههههههه لك شابعه كتل مني
كل اسبوع تاخذ المقسوم
أيهم : و علي من صغرج فوصه
مُلاذ : انت افوص
أيهم : ههههه كملي
مُلاذ : ف هاي سُرى من الابتدائية
لحد الاعداديه انا وياها هيج
حطيت اصبع بـ اصبع
بـ معنى "نتعارك"
مُلاذ : فـ بـ مره كعدت بـ رحلتي
واعدة ابوي ما اكتلها لان كل اسبوع
يدزون على اهلي و صابرين عليه
مدرسة الاعدادية و الابتدائية
و المتوسط علمود اهلي
فـ المهم جنت صغيرة كلش ، دخلت الصف
لكيت ست سُرى كاعده بـ رحلتي
گلتلها تكوم ما كامت
صفنت انا واعده ابوي
ما اكتل احد و لا اتعارك
بس غير اموت اذا ظليت ساكته عنها هيج
انجلط بـ مكاني و علي
ضحك أيهم و انا كملت
مُلاذ : عدنا درس قراءة و كتابة واجب
سرى كسولي ما تكتب بـ السنه حسنه
ف انا شسويت ؟ فنك شسويت
اخذت دفترها و رحت شككت اوراقها
وكفتها المدرسة قصاص و انا اعيب عليها
اطلعلها لساني و اسويلها هيج
سويتله الحركه الاقصدها
و هو جسمه يهتز يضحك
حط ايديه على عيونه و يضحك عليه
ضحكت انا هم و ظلينا نلون
أيهم : هتان من جانت صغيرة
تجيني هي و كرونها جنهم نخلات
يروحن منا و يجن منا و ما تصيحلي أيهم
لا تصيحلي "يَم" و انه اصيحلها هتانيزو
فـ تجيني تحط راسها بـ حضنها
و تشخبط بالكراسه ترفعلي راسها
تراويني الكراسة عود هذا انت
مُلاذ : تخبل هتان لمن شفتها
شگلها فد لطيف و بي قبول
مو مثل بعض الناس
دحگلي بـ طرف عيني
أيهم : سهمج وصل و دك بالعظم
مُلاذ : هههههه بس لا و الله شكلها طفولي
مثل شكل باهر يتشابهون عكس انت و أيمن
أيهم : باهر اي ملامحه طفولية
بحيث من وديته اقدم اله يدخل كليه
فحطوني يلا صدكوا باهر عمره ١٨
و نوب هو اكصر مني و مدمحدح جان
مُلاذ : هههههههه كون يسمعك
أيهم : و علي جانت شواربه بعدهن ما طالعات
هسه كبر الادبسز و شوارب و هيبه و المحامي باهر
مُلاذ : هتان مهندسه مو؟
أيهم : اي
مُلاذ : أيمن شنو يشتغل ؟
رفع عينه دحگلي
رجع نزل عينه مسح على گصته
أيهم : طيار درس بالخارج
مُلاذ : الله يساعد اولاد خالتك
اتخيل كله امهم تمشي
و تصيح صيروا مثل ولد خالتكم
أيهم : الف الحمدلله و الشكر
لا خالات و لا خوال
مُلاذ : بعد احسن
ابتسم بعدين گمنا رجعنا يم حزن
عدت الايام على هالمنوال
ما سمعنا خبر عن اهل اركان بعد
و لا ابوه الراضي يعترف
و لا راضي يسحب الشكوى عن اركان
نور طبعاً كانت كل يوم تخابرني
و تسأل عنه و احاول قدر الامكان اطمنها
نور : اريد اشوفه و الله نار تاكل بـ گلبي
مُلاذ : ما باقي شي على موعد الجلسة
و ان شاء الله يطلع لا تخافين
نور : شلون ، شلون اذا ما طلع؟
مُلاذ : يطلع وداعتج انا محضره دفاعي اولاً
ثانياً هواي ادله على ابوه بحيث رح يتركون اركان
و يسجنون ابوه لـ هذا هسه انت طولي بالج
و انتظري ، عمه منارس شلونها؟
نور : النهار و الليل عرايك هي و امي
و ابوي هم يتعارك وي امي
اسكندر يطب يطلع سكران محد يحاجي
و انا و عزيز نشوف هالمهزله شوكت تخلص
مُلاذ : معليج بيهم خل يولون
عَليج بـ نفسج ما تجين يمنا انتِ و عمه كم يوم؟
نور : صارلي هواي ما جايتكم
مُلاذ : اي دتعاليلنا ولج ؟
نور : اشوف ان شاء الله اجي
مُلاذ : مو تغلسين
نور : ان شاء الله يلا انا اروح
اعتقد تسمعين العياط
مُلاذ : اسمع اسمع و ادعي بـ النصر
لـ عمه منارس ان شاء الله
ضحكت نور و سدينا الاتصال
ثاني يوم كعدت الصبح غسلت تريكت
بدلت ملابسي دحگت لـ الشباك
قطرات الندى تنزل ع الكاع
جو لطيف و بي برودة
طلعت من البيت صعدت سيارتي
اتوجهت نحو محل الورد الاشتغل بي
لان اريد اخذ ورد لـ حزن
اجت الي مساعدة وياي
قدمت الي ورقة و بوكية ورد
مُلاذ : شنو هاي ؟
رفعت اكتافها بـ عدم معرفة
قوست شفتها لَكن بسرعة ابتسمت و گالت
-ما اعرف ما قريت
بس يمكن اكو عريس ع الابواب
اجا واحد نقى الورد منا و گلي اسلمه الج
ضحكت و هزيت راسي بـ قبول
راحت و تركتني فتحت الورقة دحگتلها
تعابيري كانت طبيعيه لحد ما قريت المكتوب
"كان ثمن الحادث طفلة صغيرة
تبيع الورد و تنادي (ماما مُلاذ )
شنو رأيج ماما مُلاذ نبدي بيهم واحد واحد
لو تسلمينا البنية يلي اخذتيها من عدنا؟"
عكدت حواجبي مستغربة
بـ نفس اللحظة يلي قريت بيها الكلام
اجاني اتصال رفعت تلفوني
دحگت رقم مجهول ، جاوبت
خليت التلفون على اذني
اتصادر لـ مسامعي
صوت الضحكات العالية
-حضرة المحامية مُلاذ
هاي المره الطفلة هي التضررت
حسب معرفتنا تحبين الناس القريبين عليج
اكثر من روحج ههههههه
مُلاذ : منو انت ؟! و شتريددد؟
انت ردت تدعمني الي؟؟
- مو مهم منو انا ، بالضبط انتِ كنتِ الهدف
الج مهله اسبوع و هواي عليج
البنية اذا ما كانت كدامنا خلال هذا الاسبوع
و اذا ما عاودتي الاتصال بينا
٣ قناصات واحد على اختج و الاخر على امج
قناص اخر اضافي يتوجهه على الدكتور أيهم .
فتحت حلگي مصدومة
و انغلق الخط ...
يتبع ...
لا تنسى التصويت بـ نجمة +
التعليق بين الفقرات +
متابعة حسابي على الانستا🩶
______________
طبعاً البارت كان طويل كتبته
بس هسه قسمت البارت نصين
نزل اليوم بارت و باجر
يوم ٩/٩ ينزل البارت الرابع و الثلاثين🩶
و غلسوا ع الاخطاء عفية
لان نعسانه و اقرا بـ البارت و اغفي
يمكن كتبت اسم اركان بدل ضرغام بالغلط
فـ هم غلسوا لان اخربط بين اسمائهم 🥲🩶
تابعوا حسابي على الانستا :-