|غموض جارُنا|
الكاتبة سناريآ
قناة التلي https://t.me/nurse2_4
أ
أرينا: من گال هيج حسيت مثل الصوت صار براسي صرت ما اسمع اي شي شفت يحجي وياي واني اشوفة غواش ردت اوگف بس فقدت توازني ووگعت اخر شي شفتة من اجة يركض علي وبعد ما حسيت بشي
گعدت واني احس بانزعاج فتحت عيوني شفت آدم بيدة گلاص مي ويذب على وجهي من شافني فتحت عيوني لزم ايدي وگال بقلق
_شلون صرتي
صفنت بوجهة وما جاوبت انتبهت اني بحضنة گمت بسرعة من حضنة واني اتذكرت الصار ما اعرف شصار بية عيوني نفتحن مثل الشلال ابجي واشهك بصوت عالي اتقرب بسرعة علي وگال بقلق
_أرينا بس اسمعيني راح افهمج كل شي تمام
اني بجي زاد حضني بدا يمسح دموعي وگال
_صدگيني راح افهمج بس كافي تبجين بس خليني افهمج لا تبجين تمام
قرب ايدة على وجهي مسح دموعي برقة وهز راسة بقلق
نترت ايدة ووگفت بجي بس بعدني اشهگ
گام جاب الطفل وگعدة يمة طلعلة من جنطتة قطعة جكليت واني متعجبة من الطفل ابد ما بجة واني جان بجي بصوت عالي المفروض يفز ويخاف
لزمني من ايدي وگال
_انتظري
گعدني بالگاع شال الطفل وگالي
_ابقى هسة اجي
شفتة وداه عالصالة
ورا شوية اجة تقرب وگعد يمي تنهد وحجى وگال
_راح احجيلج كلشي وانتي الج القرار
تنهدت وبدة يحجي
_يمكن الي راح احجي ما تصدگينة وحقج اذا ما صدكتي محد راح يصدگ اني تزوجتج لهذا السبب بس اني عندي ثقة بيج انو انتي راح تساعديني ركزي زين وياي تمام اري اسمعي اني عندي ثار ويا شخص واريد اخذ حقي منة ولهذا السبب تزوجتج لان انتي المفتاح لنجاح هذا الشي تعرفين راقبتج لمدة سنة كاملة وعرفت كلشي يخصج لهذا السبب اشتريت بيت يمكم واني اصلا جنت مخطط لكلشي شنو الي لازم يصير ووين وشوكت جنت اسوي صوت واوهمج اني عندي سر لان من خلال مراقبتي الج عرفت انتي فضولية واستغليت هذا الشي لصالحي
خليتج ترافبيني شهر وجنت اسوي الصوت وقت الفجر لان اعرفج هيج وكت تگعدين جنت الصوت دائما اسوي ساعة اربعة علمود تتعودين عالوقت علمود تسمعين المكالمة مالتي وانتي فضولية راح تسوين اي شي علمود ترضين فضولج وما تفكرين قبل ما تخطين اي شي متهور فاني من عرضت عليج الزواج وجيت خطبتج جنت متأكد ما راح ترفضين وراح تسوين اي شي علمود تعرفين سري
والسبب الي خلاني اتزوجج مثل ما گتلج انتي مفتاح مهمتي واريد ابني يبقى يم احد يهتم اني اتزوجت امة قبل اربع سنين لان من ردت اتقرب للشخص الي اريد انتقم منة شكو بية فلهذا السبب اختفيت وغيرت نمط حياتي وكان لازم اتزوج وابينلهم اني شخص عادي متجوز ويشتغل بس امة حملت بي وهذا الشي ما جنا مفكرين بي وورا ولادتة باربع اشهر امة گالت اني مليت وانت حياتك غامضة واني كلشي ما اعرف عليك فطلبت الطلاگ واطلگت وراها بكم شهر اتزوجت واحد جان عايش بالخارج وتركت ابنهة وگالت اني ما اگدر اتحمل مسؤوليتة وبقى يمي وكل مرة يتنقل بمكان واكثر المرات جان يبقة يم صديقي محمد بس محمد هسة شغلة صار خطر جبتة يم شخص اعرفة هنا وبقى يمة بس اني ما حبيت ابنى يتربى ببيئة متنقلة اريد اخلي يعيش حياة هادئة فكان لازم اجيب ابني يمي وهسة حجيتلج بعض من حياتي واذا قررتي تساعديني باجر راح اگولج على شغلي وشلون اريدج تساعديني بس حياتي بالوقت الحالي ما اگدر اگولج عليها واذا ما ردتي تكملين راح اتفهم قرارج وننفصل ورا كم شهر هذا كل العندي لهذا اليوم فكري زين
بحقلت بعيونة ببلاهة وعيوني فاتحتهن بدون ما ارمش هذا شجاي يحجي وشجاي يخرط اني منو وشاسوي هنا شجاي يصير واني شوكت تزوجت وذبيت نفسي بهيج مصيبة
گام اتقرب علي وشالني وداني عالجرباية غطاني ومسح على راسي طفة ضوة الغرفة وراح عالصالة بقيت الليل كلة گاعدة افكر حتى ما نمت بس بقيت افكر گلت اذا وافقت راح ادخل بشي يمكن يأذيني ويصير خطر على حياتي واذا ما وافقت راح ارجع لحياتي ولروتبني القديم واعيش حياة هادئة واني احب حياتي تكون كلها مصايب وغرايب واكشن واني ما احبها هادئة واذا ما وافقت راح اترك اول شخص حبيتة بحياتي نمت والافكار بعدها تتلاطش براسي
گعدت الصبح حسيت شي يلعب بوجهي فتحت عيوني بانزعاج شفت ابن آدم واگف يم الجرباية يضحك ويلعب بوجهي من شافني فتحت عيوني جر ايدة
گمت من الجرباية واني احس نفسي بعدني مو صاحية بالكامل صرت امشي عبالك سكرانة حسيت شي لزم رجلي انتبهت شفتة الطفل شلتة من الگاع ورفعتة فوگ اباوع بوجهة باستغراب وهو يضحك رجع الصار البارحة لذاكرتي بسرعة نزلت الطفل ردت ادخل الحمام
رجع لزم رجلي ويگول امة امة ويأشر على حلگة عرفت بي جوعان بس اني ما عرفت شاسوي ومنين اجيبة اكل اتذكرت الجنطة مالتة رحت دورت بيها لگيت اكو بسكت طلعت ورجعت الجنطة لمكانها رحت يم الطفل حطيتة بحضني وبديت اوكل بي واني افكر بالصار البارحة ولحد هسة ما مستوعبتة شفتة شبع شلتة رحت غسلتلة حلگة وشربتة مي
وديتة گعدتة يم التلفزيون وگتلة ابقى باوع هزلي راسة واني بسرعة دخلت سبحت دورت بالجنطة ملابس زينة بس ما لگيت طلعت تراك ازرق لبستة وطلعت بسرعة رحت عالطفل لگيتة بعدة گاعد بمكانة هذا الطفل خلاني اتعجب يعني ابد ما يستغرب من الناس الغريبين وبسرعة يندمج وياهم واذا گتلة اگعد يگعد ما يتحرك انتبه الي گام من مكانة واجة علي
لزمتة من ايدة وگعدتة عالجرباية واني بديت امشط شعري شعري جاي وسط فبسرعة كملت تمشيطة رحت عالطفل شفت ملابسة متوصخات ووكع عليهن مي خفت لا يتمرض لان الجو بارد رحت گعدت يمة وسألتة تريد اسبحك ما حجى اي شي بس هز راسة دخلتة بسرعة سبحتة وطلعت لافتة بالخاولي دورت بجنطة لگيت تراكين اخذت واحد ورحت لبستة بسرعة بسرعة نشفت شعرة وگعدتة يمي
سألتة شنو اسمك گال آدم اتعجبت يعني اسمة نفس اسم ابو ردت اسئلة بعد اسئلة بس جان ما يعرف يحجي زين تركت الاسئلة وبقيت العب وياه جان الوقت ملل ابد ما يمشي رحت عالموبايل علمود اشوف الساعة انصدمت طلعت بعدها بالسبعة حسيت نفسي اريد انام رحت يم الطفل سألتة اذا يريد ينام گالي اي جريتة حطيتة بحضني ونمت گعدت ورا فترة من سمعت صوت انتبهت على آدم جان بيدة موبايلين وگدامة لابتوب وجان رابط اللابتوب بواحد من الموبايلات والثاني مدري شيسوي بي گمت من نومي وگعدت عالجرباية اباوعلة هو انتبه الي وگال بإبتسامة
_صباح الخير
ما رديت ورحت عالحمام غسلت وجهي واسناني طلعت لگيتة طالب ريوگ وشايل اللابتوب واوراقة رحت گعدت عالكرسي علمود اتريگ لان بطني من الجوع احسها تتكطع وهو راح يم ابنة گعدة ووداه غسل وجهة ورجع شفت ابنة لازم من رگبتة ويبوس بي اجة جر كرسي وگعد وحط ابنة بحظنة وبيدة يوكلة
آدم: منو سبحك يروح بابا
الطفل آشر علي
رد الطفل حجى وگال امة امة ويأشر على حلگة وبعدها اشر علي
آدم بابتسامة: تسلمين تعبتج وياج
زهراء: لا عادي ما سويت شي
آدم بتنهيدة: شنو قررتي على حجي البارحة
زهراء: موافقة بس لازم توعدني ما اتعرض لاي اذى ولا اي شخص اعرفة وما راح تضم اي شي علي واني بالمقابل راح اساعدك بالاگدر عليه ومن يكمل شغلي وياك ننفصل
آدم: ننفصل!!!!؟
زهراء: اي ننفصل
آدم: بس اني گلت اذا ما توافقين ننفصل
زهراء: هذا شرطي ها شقررت
صفن كم دقيقة بوجهي حاولت اقرا ملامحة علمود اعرف شيفكر بس ما گدرت جنت متأملة راح يرفض او يعترض بطريقة غير مباشرة بس صدمني من گال
آدم: تمام اي شي تردينة راح يصير
نزلت راسي ودموعي واگفت بمحجرهن اريد ابجي بس بالگوة مانعة نفسي وبس سنوني يصكن من الرجفة لهدرجة ما يحبني ولو شوية اني الثولة لان حبيتة وما فكرت باي شي
كمل ريوگ ونزل ابنة من حضنة وراح يغسل گمت من مكاني ورحت شلت الطفل رحت گعدت عالقنفة والعب ويا الطفل ورا حوالي نص ساعة طلع الخاولي بيدة وينشف شعرة جاب كرسي وگعد گدامي وبدا يحجي
آدم اول شي قبل ما نبدة لازم توعديني محد يدري بالصار والراح يصير تمام
زهراء: تمام اوعدك
كمل كلامة وگال
آدم: واذا اي شخص عرف بالراح احجي فحسابج ابد ما راح تتوقعينة راح ادمرج واني ما جاي احجي هيج علمود اخوفج بس هذا الي راح يصير اذا احد عرف واعتبري تنبيه لان الراح احجي حياتي و انتقامي متوقف علي ولوما احتاج مساعدتج جان ابد ما حجتلج الصار ولا تزوجتج هسة نبدي بالمهم اني ثاري ويا شخص يتاجر بالمخد**ت صارلي سبع سنين اجمع معلومات كلشي يخصة منو هو ومنو اهلة وين يشتغل وبمنو يلتقي وقت نومة اكلتة المفضلة اصغر التفاصيل عرفتها مستحيل اسمح لاي شخص يخرب تعبي كل هالسنين مفهوم وطبعا ما گدرت اتقدم يمة لان هو شخص كلش حذر واليتعاملون ويا كلش قليلين ويثق بيهم واني بس گدرت اتقدم يم ذولة واكو شخص كلش مهم عندة ويعرفة ويثق بي ثقة عمياء وهنا يجي دورج
زهراء بعدم فهم: دوري بشنو
آدم: الشخص الي يثق بي ويأمنة حياتة هم ولدة
زهراء: واني شدخلني
آدم: لان انتي الج دور كلش جبير باعي هو متزوج اثنين من زوجتة الاولى عندة منها ولد وبنية وهاي تزوجها علمود شغلة اما زوجتة الثانية فهاي تنزوجها عن حب وصارلة ولد منها بس من جان عمر ابنة 3 سنوات اختفت وهسة ابنة هذا خافي وما يعرف بشغلة عمرة يطلع 20 سنة اما ولدة الجبير عمرة 30 سنة بس مستهتر وما علي اعتماد بس بنتة الصغيرة صح عمرها 21 سنة وصغيرة بس هي كلش نبهة وذكية ابوها يعتبرها ذراعة اليمين ومعتمد عليها تقريبا بكل شغلة بس كل شخص مهما بلغ من ذكاء وقوة يبقى عندة ثغرة وانتي هاي الثغرة بالنسبة الها
زهراء باهتمام: اني!! وشلون
كمل كلامة وگال
آدم: قبل سنتين جان اكو طالبة وحيدة ما عدها اصدقاء من هي وصغيرة والكل يخاف منها لان عدها وحمة بوجهة فمحد جان يحب يتقرب منها الا بنية وحدة ما همها هالشي وحبتها وصارت صديقتها فبنت الرجال هذا صارت تحب هاي البنية واعتبرتها اختها صارت بس تثق وتأمن بيها وبنت هذا الرجل اسراء والبنية الصارت صديقتها انتي
زهراء بصدمة: شنو شدا تحجي انت واصلا اني من تعرفت على اسراء ما جان عدها وحمة بوجهة
آدم: مثل ما سمعتي اسراء بنت هذا الرجال وهي الطريق الي يساعدني بتدميرة واذا عالوحمة فهي سوت عملية تجميل واضطرت تترك الدراسة سنتين ومن كملت العملية ونجحت قررت تغير مدرستها و تترك بيتها القديم علمود تبدي من جديد وبهاي اللحظة الي جانت تريد واحد يوجههة ويصير وياها طلعتي انتي بوجهة
زهراء: بس اني ما اگدر أأذي صديقتي واخونها
آدم: انتي ما راح تسوين اي شي بس مجرد شغلة بسيطة وباعي اني ما اريد أذيها بس راح ادمر ابوها لان تعرفين الجاي يسوي يدمر حياة اشخاص بريئين ويجرونهم لمستنقعهم القذر يعني انتي ما تريدين تساعدين صديقتج
زهراء: طبعا اريد اساعدها بس اني شلون اگدر اساعدك وانت امبين شخص ذكي وتعرف تسويها اذا شغلة بسيطة
آدم: تعرفين هاي الشغلة الوحيدة الي ما گدرت اسويها
زهراء: وشنو دوري اني واذا تحجي صدگ اريد اثبات
گام وگف وراج باتجاه اللابتوب ضغط كم زر وراها شغل فيديو جان الفيديو امبين بغرفة كلش قديمة بنايتها من الطين وبنص الغرفة واگفة بنية لابسة اسود كامل ووجهة لابسة علي ماسك واثنين واگفين وراها حراسة جانت تحجي ويا شخص وامبين هذا الشخص مهم الها جان ورا حوالي ست حراس وكلهم مثل المافيا طلع الشخص العندة حراس هواي جنطة واخذها شخص من الجانو واگفين وراها بعدها هي فتحت جنطتها وجانت بيها اكياس بيض صغيرة اخذها ذاك الرجل وراها طفى الفيديو
آدم: باعي هذا اكبر دليل واذا تگولين يمكن مو هاي اسراء باعي لايدها بيها حرگ وهذا الحرگ سوتة عملية قبل سنة وللاسف اختفى الاثر بس بقى قليل وهذا الشي نگدر نعتبرة دليل
زهراء بصدمة: اي هذا الحرگ نفسة وهي حجتلي وگالت راح اسوي عملية وفعلا ورا شهر سوتة
آدم: ها هسة شقررتي تساعديني
زهراء بتوتر: اي بس شلون
آدم: باعي كل الاريدة اريد تحطين جهاز تنصت ببيت اسراء لاني حاولت بس للاسف ما گدرت لان بيتها بي اجهزة امان كلش حساسة وكاميرات المراقبة منتشرة بكل مكان بالاضافة للحراس والشخص اليگدر يدخل بيتها فهو بس انتي واذا عسؤالج شلون تگدرين تسوين هاي الشغلة فهذا هو السبب الي اجينا بي لهنا
هزيتلة راسي وهو طلب خدمة الغرف اخذو المواعين من طلعوا رجع گعد عالقنفة وجاب اللابتوب وجنطتة يمة وبدة يطلع مواد شكلها غريب ورا ماحطهن عالميز بدة يشتغل باللابتوب وايدة تتحرك بسرعة عالكيبورد سمعت صوت موبايل رن شفتة طلع موبايل اخر من جنطتة انصدمت هاي شدعوة عندة 3 موبايلات ويمكن اكثر بقيت اراقبة وهو يحجي ويا الشخص بلغة ما فهمتها ما جانت انگليزي جانت تشبه الصيني الكوري هيج شي لان سامعتها من قبل من جانت اندي تشوف مسلسلات اسيوية من كمل رحت گعدت يمة بالگاع وگتلة
زهراء: عادي سؤال
آدم: اي احجي شنو سؤالج
زهراء: هسة اهلي ما راح يقلقون علي لان سافرنا بنفس اليوم واني ما گتلهم واصلا متوقعينا قبل بالفندق
آدم: لا تهتمين ولا تخافين اني حجيت وياهم وشغلة ثانية انتي ويا زوجج محد الة دخل بيج
ابتسمت من گال زوجج
زهراء: زين سؤال اخر اذا عندك مجال
آدم بضحكة وهو يمسح شعري : عادي شكد ما تريدين تسئلين اسئلي
زهراء: مو گلت اخاف ما تركز وانت هسة عندك شغل
آدم: لا عادي اركز عالاثنين
زهراء: ليش سميت ابنك نفس اسمك
آدم بضحكة: بس هو مو مثل اسمي اسمة حسين
زهراء بصدمة: بس هو گالي اسمة آدم
آدم بضحكة: من صار وامة تركتة بقيت بس وحدي اني ويا واني شغلة باخر سنتين زاد فجنت اكثر وقتي اسافر وما عندي مكان محدد ابقى بي فجان يبقى يمة صديقي محمد لان جان گاعد وحدة بشقة بغير محافظة بسبب شغلة هاي لان يبقى دائما يم صديقي محمد فهو جان دائما يصيحلة آدم ولان جانو وحدهم فحسوني تعلم على هالاسم وعالهدوء بسبب هذا الشي
زهراء: امم زين شنو هاي الشغلات
آدم: اليوم تعرفين
خلصت الاسئلة البراسي وبقيت اراقبة حوالي نص ساعة وراها حسيت بالملل رحت يم حسوني لگيتة گاعد يباوع عالتلفزيون گعدت يمة وسئلتة حسوني تريد تلعب وياي هزلي راسة شلتة ورحت ويا عالصالة نلعب محيبس جنت اخلي هو يفوز وهو من يفوز يظل يضحك فديتة ضحكتة تجنن بقينا نلعب حوالي ربع ساعة مليت وگمت اخذت حسوني وياي رحنا نباوع عالشوارع والناس من الشباك جنت منبهرة بكلشي حرفيا حتى ما حسيت بالوقت الا من سمعت صوت بالغرفة بقيت حسوني يباوع وجنت مأمنة علي لان الشباك مقفول
دخلت الغرفة وشفت آدم امبدل جان لابس بنطرون جيبنز وتشيرت اسود وقمصلة سودة تغطي رگبتة رحت سألتة راح تطلع جاوبني وگال اي وسألني اذا نريد غدة بس اني اصلا جنت شبعانة واكلي قليل فهزيتلة راسي برفض
بقيت اراقبة راح يم الميز وشال الغراض الغريبة اخذهن واجة يم المراية شفتة طلع شي مثل الجلد حطة على وجهة واني جنت متعجبة هذا شيسوي بقى يطلع ويحط لوجهة وراها لزم علبة بخاخ وبخ على شعرة شعرة تحول بالكامل للون اصفر
باوعلي واني من الصدمة راد يغمى علي شفتة شخص ثاني يشبه الاجانب بشرتة بيضة عيونة زرق وشعرة اصفر والشكل يختلف اختلاف كامل عن آدم بحقلت بصدمة ردت اعيط لا لا شجاي يصير
تقرب علي وغمز بعيونة وگال
_ها شرايج
ما نطقت اي شي بس هاي الكلمين
_ش.... شلون وليش
جاوبني وگال
_صارلي ادرب على هذا الشي ثمن سنوات ويوم عن يوم اعرف اكثر وهاي الطريقة الي خلتني اجمع معلومات الواحد لازم يسوي المستحيل علمود يوصل لهدفة
گالي راح اطلع ديري بالج على نفسج وعلى حسوني ولا تفتحين الباب لاي احد اني ما اطول بسرعة اجي
طلع وقفل الباب رحت عالصالة گعدت اباوع لحسوني بس بالي كلة جان يم آدم شلون غير شكلة حرفيا طلع شخص يختلف لو ما شايفتة گدامي من بدل ملامحة جان ما صدگت هذا آدم
ورا حوالي ساعة سمعت صوت الباب ينفتح طلعت شفت آدم رجع ابتسم وتقرب مني جرني من ايدي ووداني عالصالة گعد عالقنفة وگعدني يمة صاح حسوني بس حسوني ما اتحرك من مكانة متفاجأ بالشخص الگاعد گدامة عاد هو بدا ينزع القناع والعدسات ورجع لشكلة القديم بس شعرة بقى اصفر
حسوني من شاف ابوه اجة يركض علي حضنة وبدة يضحك شفتة طلع من جيبة قطعتين كاكاو انطة لحسوني وحدة وباسة گلة روح باوع عالشارع واكلها يالا يالبطل
تقرب علي انطاني القطعة الثانية ولعب بشعري وگال
_اكليها تخلي الواحد يحس بالسعادة وتجدد نشاطج ومن تكمليها بسرعة بدلي لان راح اطلعكم
گتلة بفرحة وحماس: صدگ؟ كول والله
آدم بضحكة: والله
راح دخل عالغرفة واني اكلت الكاكو بسرعة رحت لحسوني شفت وجهة كلة كاكاو شلتة ورحت عالغرفة شفت آدم سبحان ولون الاصفر رايح وراجع شعرة البني
بسرعة دخلت حسوني سبحتة وبدللتة من كملتلة گتلة روح يم بابا راح واني دخلت سبحت ولبست نفس الملابس الجيت بيهن لان ما عندي غيرهن وما حطيت لوجهي بس مرطب وجه وشفايف ومسكارة طلعت برة لگيت حسوني گاعد بحضن آدم ويلعب بوجهة وآدم مغمض عيونة ومرجع ظهرة ليورة گتلهم كملت گام آدم لبس البالطو مالتة وجانت كل ملابسة لون اسود
شال حسوني وتقرب گرص غدي وگال عفية بالشاطرة ابتسمت واحس فراشات بداخلي گال يالا نتوكل طلعنا قفل الغرفة لزم ايدي نزلنا جوة وهو بعدة لازم ايدي حسيتة يخاف علي وكلش فرحت بهذا الشعور نزلت شفت الفندق جان يجنن وكلش جبير حتى ما انتبهت علي من جينا امشي واني مبهورة بالمكان والناس
من طلعنا من الفندق گال راح نتمشى وصدگ تمشينا واني كلش فرحانة شعوري ابد ما ينوصف يعني بحياتي ابد ما مسافرة وما شايفة هيج بلد حلو بقينا نفتر واني وحسوني اندمجنا بكلشي ولا عبالك هو طفل جنت احجي ويا واگولة شوف حسوني هذا وذاك وهو يأشرلي عاليعجبة حرفيا تونست ودانا على محل مرطبات مدري شنو وطلبلنا تراميسيو جان يجنن احس نفسي طايرة بكل لگمة اكلها ودانا عالمولات اخذلنا ملابس هواي وشغلات جنت محتاجتهن
وراها ردت علمود ناخذ صورة جماعية بس ماعرفت شلون گتلة
زهراء وهي تريد تبجي: اريد ناخذ صورة جماعية
آدم بابتسامة: بس هاي وليش زعلانة هسة ناخذ صورة بس لا تزعل اري
راح وگف بنية حجى وياها بالانگليزي اذا تگدر تاخذلنا صورة والبنية جانت امبينة حبابة وفرفوشة قبلت تاخذلنا صور اخذتلنا صورة وراها سألت آدم اذا احنا متزوجين جديد فهو جاوبها وگاللها قبل يومين هي ابتسمت وگالت راح اخذلكم بعد صور اخذتلنا بكم وضعية وجنت كلش فرحانة من كملت انطت الموبابل لادم شكرها وهي باركتلنا وراحت جان اسلوبها كلش حلو
بس اني بقيت افكرا هسة عبالها حسوني ابنة واحنا مثلهم اطفالنا تحضر عرسنا عزا انفضحنا طردت الافكار من راسي وگلت انا شحجي يمكن البرد اثر علي
من كملنا كامل ما رجعنا الا ساعة 12 بالليل وثاني يوم بدا يعلمني شلون اتصرف واتعامل ويا اسراء اذا دخلت بيتها وشلون ما اتوتر واذا حسيت راح اوگع بمشكلة شنو راح اسوي ولازم اركز دائما عالاشياء الصغيرة لان هي المهمة بقينا هيج لمدة شهر يبدي يعلمني من الصبح والعصر يطلعنا نشوف المدينة ومن خلص الشهر گال راح نرجع باجر ومن سألتة اذا اهلي سألو عن حسوني هذا منو شراح اگول گالي گوليلهم هذا ابن اقاربة واهلة توفو وهو تولى تربيتة
اليوم اخر يوم وباجر نرجع للعراق قرر اليوم يكون بس ونسى ودانا عالمطاعم والمولات اشتريت هداية لكل اهلي
وگضيت اليوم بس ونسى هذا الشهر جان احلى شهر بحياتي وآدم جان كلش لطيف وابد ما عصب ودائما يبتسم واذا سئلتة اسئلة هواي جان ابد ما يمل من عندي حسيت نفسي حبييتة اكثر واكثر من السابق بس هو احسة ما يحبني صح يعاملني بلطف بس متأكدة هو ما يحبني وراد بس مساعدتي بمهمتة
حزيران: صار اسبوع من تزوجت زهراء والبيت حرفيا ملل آسر ابد ما يطلع من غرفتة بعدة مثأثر
جنت گاعدة بغرفتي عالجرباية احس نفسي مخنوگة لامة رجلي لبطني وحاضنة نفسي اباوع عالحايط وصافنة علي هذا الشعور صار براودني اكثر من شهر احس مختنگة ضايجة حسيت شي وگع على خدي لمست خدي طلعت دموع هاي گمت ابجي بسبب الي اني بي
انتبهت القرآن معلگتة عالحايط صفنت علي اني صار شكد ما قارية قرآن يمكن بس برمضان ويمكن حتى ما اختمة جي على بالي صلاتي الي اصلا ما منتظمة بيها
بقيت افكر وافكر لما وصلت لموضوع الحجاب اني حتى ما اتحجب والحجاب فرض عالبنية واني ما البسة بس من اصلي اهلي رادو البسة بس اني گتلهم بقناعتي
گمت عالحمام توضيت ولبست الاسدال گمت اصلي واني ابجي اول مرة بحياتي ابجي بالصلاة شعور غريب خوف ورهبة بقيت ابجي وراسي منزلتة بخجل خجلانة من رب العالمين بس بوقت ما احتاجة التجئ الة شكد انانية اني
من كملت بديت ادعي واني اصلا ما حافظة اي ادعية صرت ابجي وادعي ربي يسامحني ويغفرلي على كل تقصير بحقة بقيت حوالي ساعة اني اصلي وابجي وراها بديت اقرا قرآن حسيت براحة وشعور حلو من صليت وقريت قرآن
قررت لازم بعد اتحجب عمري 20 واني مو صغيرة والاخرة اهم من الدنيا والوقت يمر ما اريد من اكبر احس بذنبي الحمدلله وعيت عالصح قبل فوات الاوان
نزلت جوة جان الكل مجتمعين بالصالة يحجون رحت عالمطبخ سويت جاي وكعك وديتة عالصالة وگعدت يمهم كلش احب الگعدات العائلية حتى لو ما اشارك بيها بقيت گاعدة وصافنة آسر انتبه علي صاحني اگعد يمة رحت يمة حضني بايدة والايدة الثانية بقى يمسح شعري بيها
آسر بهدوء: شبيج
حزيران: آسر راح اگولك سر بس ما اتگولة لاي احد
آسر: تمام گولي
حزيران: اني قررت اتحجب
آسر بفرحة: صدگ
حزيران: اي والله والعصر اروح ويا امي عالسوگ واشتري ملابس محجبات وشالات اني كبرت وجان من زمان لازم اتحجب
آسر: عفية بنيتي هذا القرار الصحيح وان شاءلله راح اسويلج حفلة بهاي المناسبة الحلوة
حضنتة وگتلة احبك آسوري
گلت لامي العصر نروح عالسوگ وصدگ صارت ساعة ثلاثة رحت لغرفتي سبحت واخذت ملابس من غرفة زهراء تنورة وقميص وشال لان ملابسي كلهن بنطرونات وقمصان ما عندي شي طويل بقيت حوالي نص ساعة اشد بالشال يالا انشد زين من كملت باوعت لنفسي بالمراية هالمرة حطيت مكياج خفيف حسيت برضة على شكلي الحمدلله گعدت قبل فوات الوان
نزلت لگيت امي امبدلة واندي هم سئلتها انتي شعندج رايحة ويانا گالت مزاجي ردت اضربها بس جان مزاجي حلو ما حبيت اخربة بسببها
امي تعجبت من شافتني متحجبة ما حجت اي شي بس تقربت مني حضنتني وباست راسي گالت عفية بنيتي ربي يهديج عالطريق الصحيح
آسر اخذنا للسوگ وبقى ويانا ما عافنا اخذت ملابس طويلة وشالات وامي هم اخذتلي على ذوقها لان هي تعرف اكثر من عندي
كملنا آسر رجعنا وبطريقة اخذ عشة من المطعم لان تاخرنا كلش وصلنا البيت وبابا وامجد شافوني لابسة حجاب حضنوني وشجعوني على هالقرار
وصدگ ورا اسبوع آسر سوالي حفلة وجانت كلش بسيطة بس عائلتنا وسمر واختها وصديقة اندي باركولي على قراري وشجعوني علي
مر اسبوع اخر وبدا الدوام ما داومت اول اسبوع لان ما ناخذ محاضرات الا ثاني اسبوع داومت والطالبات تعجبو من شافوني متحجبة لان اني شكلي قبل جان يوحي اني ابد ما راح اتحجب صديقاتي جانن يعرفن لان گتلهن من راسلتهن
مشن اول يومين بالاسبوع الاول وباليوم الثالث جنت اتمشى وحدي بملل انتظر السايق
عگدت حواجبي باستغراب من شفت طالب ويانا اجة باتجاهي وگف يمي وطلب يحجي وياي
تنفست بهدوء بس داخلي كلش منزعجة اني ابد ما احب احجي ويا شباب ومتنجنبتهم بس على عگد الدراسة گتلة
_تفضل
_خل نگعد بمكان هادئ واگلج شعندي اذا ما تصير زحمة
_اسفة بس ما اگدر گول العندك واحنا واگفين صدمني
_امممم... صراحة اني معجب بيج رجاء لا تفهميني غلط الله شاهد على نيتي حبيت احجي وياج واعرف قرارج اني نيتي زواج وما احب السوالف التافهة وانتي صراحة كلشي عجبتني بسبب اخلاقج وثقافتج
_شكرا اخي لكلامك هذا بس اني ما معجبة باي احد وما مفكرة بهالشي بالوقت الحاضر اعذرني لان ما اگدر ابادلك هالمشاعر وان شاء الله تلگي انسانة تستحق هالمشاعر
_انتي فكري بالبداية ورجعيلي جوابج بعدين
_بس......
_بس فكري كم يوم ولا تتسرعين
عافني وما خلاني ارد بقيت اليوم كلة صافنة بالحجي الگالة صح هو ما شاءلله حلو واخلاقة زينة بس اني بعدني افكر بحارث الي ابد ما راح اصير الة
رجعت للبيت وبقيت افكر انطي فرصة للولد لو لا گلت من ترجع زهراء اخذ رأيها
بس الي صدمني وما جنت متوقعتة من يوم جنت اراسل سمر وگالت حارث فصخ خطبتة وطلگ زوجتة
اندي: صار حوالي اسبوعين من تزوجت زهراء واني ردت انقل بغرفتها بس ماما ما قبلت گالت عوفيها يمكن مرات تجي يمنا تبقى بغرفتها فعاد ما لحيت هواي عليها لان اعرفها ما راح تغير رأيها
گاعدة بغرفتي وارتب بكتبي لان باجر راح يبدي الدوام سمعت صوت رسالة لزمت الموبايل شفتها نقطة الرسالة بس نقطة هذا الشخص راح يخبلني صار حوالي عشر ايام يدز نقطة اول ما دز حظرتة رجع دز بغير رقم وهم حظرتة بس ما مل رجع دز بغير رقم واخر شي ما حظرتة گلت شسويلة ما دام ما حاجي اي شي ويدز بس نقطة اعوفة يويلي ما اهتميت لرسايلة وما عرفت هذا ولد لو بنية وشنو معنى هالحركة
ثاني يوم گعدت متحمسة مو علمود الدراسة بس لان راح اشوف وليد وغزل وصدگ جتني غزل من الصبح حضنتها عبالك صار سنة ما شايفتها عالرغم جت بحفلة حزيران وشفتها
رحنا نتمشى اني وياها والجو جان هدوء وحلو لان جان فصل الربيع بس الي خلاني اتعجب هو ما شفت وليد ابد من رحنا وحتى من رجعنا غزل تعجبت وگالت مو من عوايد وليد يغيب بس گتلها جوز ما يداوم اول يوم
بس جنت غلطانة مر اسبوعين ووليد ابد ما شفنا ولا عرفنة اخبارة بدا الشك يدخل لگلبي والشيطان يوسوسلي هو واگع بمشكلة والا ليش ما يداوم
وابو النقطة ما توقف يومية يدز نقطة واني حايرة بوليد وضاربة دراستي بعرض الحايط هذا ليش ما يداوم
غزل: بدا الدوام واني بديت اضاعف جهدي بالقراية صرت ما انام بس ست ساعات وخطية خالة ام علي منعتني من الشغل گالت قرايتج اهم من الشغل وبيداء تخبلت صارت تحاول تسوي وياي مشاكل لان ليش ما اسوي شغل وهي تسوي مع الرغم اني اغسل المواعين بكل الوجبات بس هي ما ادري ليش شادتها وياي فاني گلت تجنبا للمشاكل ابقى بغرفتي وصدگ صرت ما انزل بس وقت الاكل اكل واغسل المواعين
بس الي شغل بالي هالفترة وليد صار شهرين وهو ما مداوم واندي تخبلت گامت تبجي ليش ما يداوم اكيد واگع بمشكلة اني القلق زاد عندي منا وليد الي اختفى واعتبرة مثل اخوية واخاف صايرلة شي ومنا القراية ومشاكل بيداء
مر ثلاث اشهر من بدة الدوام واليوم اخر يوم اداوم بي لان انطونة عطلة اربعين يوم قبل الامتحات للمراجعة گعدت تريكت وبدلت ملابسي طلعت اتمشى لبيت اندي دکيت الباب طلعلي اخوها آسر ابتسملي وگال
_السلام عليكم
نزلت راسي بخجل وگلت
_وعليكم السلام
_دخلي اندي هسة راح تجي
_لا عادي راح انتظرها هنا
بقيت واگفة شوية بعيد عالباب هو راح صاحها ورجع طلع ركب سيارتة وراح طلعت اندي بس مو نفسها اندي القديمة الحزن امبين على ملامحها صبحت عليها ورحنا نتمشى بهدوء محد حجى شي
بنص الطريق سمعنا صوت ورانا گال
_غزل اندلس
التفتنا ورانا شفنا وليد بس مو وليد القديم جان ضعفان ووجهة شاحب الحزن امبين بعيونة تقرب منا واني بعدني بصدمتي
وليد: السلام عليكم شلونجن
غزل: الحمدلله بخير انت شلونك
وليد: الحمدلله
باوعت على اندي شفت دموعها تجري حاطة ايدها على حلگها تحاول تكتكم شهگاتها گالتلة بصوت تعبان
اندي: وين جنت ليش اختفيت ما گلت هسة اكو احد يخاف علي ليش سويت هيج بينا وليش هيج صاير شكلك انت زين؟
وليد: والله العظيم ادري غلطان بس اني ما اگدر اسوي اي شي ابوية جبرني ادرس بالبيت ومنعني اطلع من البيت اليوم يالا بعد توسلات يالا گدرت اخلي يسمحلي اطلع وبس طلعت جيت اشوفجن سامحني عالسويته بس هذا مو بيدي
بقو حوال خمس دقايق ساكتين واحد يباوع بوجه الاخر ومحد يحجي اندي تبجي ووليد الحزن مالي عيونة
عرفت نفسنا راح نتاخر گتلة يالا وليد راح نروح لان راح نتاخر
اندي گالت
_بعد شوكت نشوفك وشلون
_ما ادري بس اني ما راح انساجن راح ارجع اشوفجن وانتن لا تنسني
ودعت وليد وجريت اندي من ايدي ورحنا عالمدرسة وهي بعدها تبجي همزين ما تاخرنا خلص الدوام رجعت عالبيت فرحت لان شفت وليد واطمنت هو بخير
رجعت من الامتحان فرحانة احس هم وانزاح من صدري
اليوم اخر امتحان واني فرحانة بكل السويتة والمعدل الي راح اجيبة راح افرح بي والي قاسمة الله راضية بي
بديت اتذكر ايامنا اني واندي ووليد من جنا نمشي من هذا الطريق صار حوالي شهرين ما شايفتهم ووليد خطية من اخر مرة شفتة بيها ضل بالي علي دعيت ربي يريحة ويوفقة
وصلت البيت دخلت من باب المطبخ لگيت خالتي ام علي واگفة تطبخ رحت حضنتها وگتلها يمة واخيرا خلصت هي مسحت على راسي وگالت ان شاءلله الله ما يضيع تعبج روحي بنتي ارتاحي ونامي بين ما يجهز الغدة هزيتلها راسي ورحت لغرفتي سبحت حسيت بانتعاش لان الجو جان كلش حار رحت على جربايتي اتمددت وبقيت افكر ما مصدگة كملت نمت من التعب ما گعدت الا على صوت نرجس تگعدني علمود نتغدة گتلها روحي بس اغسل وجهي وارجع
غسلت وجهي شفت الساعة وحدة ونص نزلت جوة شفت الكل گاعدين عالسفرة گعدت وبديت اكل شفت الفرحة بعيون الكل مادري همة يومية هيج لو اني لان فرحانة اشوفهم هيج كملنا غدة شلت المواعين ورحت غسلتهن جت نرجس نظفت المطبخ وگالت لا اتعبين نفسج ارتاحي بعدج توا كملت امتحانات
كملت المواعين رحت يمها گرصت خدها وگتلها تعرفين شكد احبج يمة فديتج سويت جاي ووديت الهم بالصالة گعدت يمهم
اوس تحمحم وگال لامة ولابو يريد يتزوج امة سألتة مني تريد نخطبها الك هو گاللها بكيفج يمة راح ارضي باختيارج
امة گالتلة مو تدلل
بقيت يمهم شوية ووراها صعدت اراسل اندي من كملت مراسلتها ردت اتصل على آميد علمود يجي ياخذني ابقى يمهم كم يوم اتونس من ابقى ويا حواء بس وگفت من شفت جتني رسالة من رقم غريب جان كاتب
_السلام عليكم
صراحة حرت شاسوي لان اول مرة رقم غريب يراسلني
رديت
_السلام وگتلة منو حضرتك
جاوب ورا حوالي عشر دقايق وجان كاتب
_آسر اخو اندلس
يتبع.......