"خَبر موت بـ رسالة و بـ 12 بالليل
و الميت عبد مو سهله سالفته
جذبت الخبر گتله الخَبر جذاب
گلي و داعتك للمغتسل جبته
رحت للفاتحه ، هَم ما مصدك
كضيت الفاتحه و رَديت خابرته . "
الكاتـِبه : أيــلان
حساب الانستا للتواصل : l.1ll8
مُلاذ :-
اسمع اصوات الصراخ و البجي
يلي تصدر من الصالة و الاستقبال
ظليت واكفه بـ مكاني ، صافنه
نظري على الفراغ و صافنه
يختلط اصوات الصياح بـ صوت المي الجاري
غصة ماكله روحي اكل محصوره بـ بلعومي
لا تطلع و لا تنبلع ، تعصف بداخلي و تنهيني
فزيت على لسعه بـ ايدي نزلت نظري ع الكتلي
رميته من ايدي بسرعة بالمغسل ، لزمت ايدي الثانيه متوجعه ، كشولت ملامحي ، فتحت المي البارد
دخلت ايدي المجويه جواه و الحرك يلسع اكثر
درت وجهي دحگت لـ غاده لمن دخلت
ركضت ناحيتي تسألني شبيه
غاده : شكووو مُلاذ ؟
مُلاذ : انطيني كلنس
راحت بسرعة جابت الي كلنس
الي بالمطبخ التفتو الي متسائلين عني
اخذت الكلنس من ايدها خليته على ايدي
مُلاذ : انا راح اطلع
عبرتها و طلعت بسرعة من المطبخ
الكلنسه على جف ايدي و امشي سريع
بس اريد اطلع منا ، المكان خنكني
رحت للحديقة كعدت ع الصبة
الزلم ناصبين جادر بـ الشارع كاعدين هناك
النسوان جوا بالاستقبال و الصالة
الملايه تقرا ، النسوان يعلى صوت بجيهن
هاي الاشياء كلها تذكرني بـ فاتحة ابوي
و منا گلبي ممرود على بيبي و لا اكدر ابجي
لا اكدر اشكي حتى الغصة ما تطلع مني
نزلت نظري لـ ايدي يلي ورمت
و الحراره بيها بعدها ، درت وجهي للبيت
رجعت دحگت لـ ايدي ، رحت حاجيت امي
ما كلتلها عن ايدي گلتلها راح اطلع و اجي
هزت راسها بـ قبول و اكدت عليه ما اتاخر
اخذت سويجي و طلعت ، فتحت باب الشارع
سديتها اتجهت الانظار عليه
جسار واكف شافني و اجاني عيونه حمر
مبين حيله مهدود على بيبي كلش يحبها
اصلاً كلنا نحبها و هسه متدمرين بـ غيابها
كل الفواتح ممكن تصير بيها
ضحك بين الناس و سوالف
بَس فاتحة بيبي ابد ما جانت هيج
كل المتواجدين حزنانين عليها
هذا الشي واضح على ملامحهم
و بـ صوت بجيهم و اهتزاز اجسامهم
جسار : ها تحتاجون شي؟
هزيت راسي بـ رفض
جسار : چا وين رايحه؟
مُلاذ : ايدي انصلخت بالمي الحار
اروح اجيب دهن و اشوفها و ارجع
جسار : صدددك؟ شلون انصلخت؟
شو خل اشوفها
راويته ايدي طلع صوت يدل على انزعاجه
بسبب حالة ايدي و منظرها
جسار : خل اجي وياج
خاف ما تكدرين تسوقين
مُلاذ : لا انصلخت بـ اليسرى
هسه اروح لـ هاي الصيدلية القريبة و اجي
التفتت على صوت اسكندر
اسكندر : وين رايحة؟
مُلاذ : ايدي انصلخت اروح اشوفها
اسكندر : شلون انصلخت ؟
مُلاذ : بالمي الحار
رفع حواجبه و گال يستفزني
اسكندر : خوش حجه
مُلاذ : شقصدك انت؟
اسكندر : ما ترحين لـ مكان اكعدي هنا
هسه احيب الج دهن و شتريدين و اجي
مُلاذ : لا بالله !؟ و شعليك انت!
اروح اجي اطلع ابقى شعليك؟
ما احتاج حجه و لا مخبلة مثلك
حتى اصلخ ايدي متعمدة علمود اطلع
و لا خايفة من عندك و لا ادور حجج
جسار : انت شو تمسلت؟
شنو حجه صاحي انت؟
اسكندر : ما تطلعين لو تموتين
و انت اسكت نايمين على وجوهكم
و رجليكم بالشمس
جسار : تطلع و انا اوديها و غصباً على راسك
انت منو و تحكمها اذا تطلع لو لا ؟
اتقدم اسكندر على جسار
واحد يخوزر بالثاني
اسكندر : و انت شعليك ؟
ليش هيج ******
فتح جسار عيونه بـ وسع
جر اسكندر من ياخته
مُلاذ : جسااار عوفه خيولي
عيب فاااتحة بيبي جسار
جسار : حلكك افركه خاف عبالك ضابط
و تشيخ علينا ما تخوفني لا انت و لا عشرة مثلك
اجا سلطان يفاككهم لمن اشتدت بينهم
جسار يگلي روحي تلاحگي ايدج
اسكندر ما يخليني و واكف بـ طريقي
جسار : عوفها وخر عنها
اسكندر : ما عليك انت
مُلاذ : اسكندر و الله العظيم
اصيح صيحه هسه الم الدنيا هاي كلها عليك
وخر عن طريقي و لا تطلعني عن طوري
مالي خلك لـ افكارك و تصرفاتك السخيفة
اسكندر ظل معارض
جسار گوه لازم اعصابه لان فاتحة و عيب
اسكندر يستفزه و يستفزني ،
ايدي ورمت من الحرك ، فزينا على صوته
الأيهم : صاير شي ؟
التفت اسكندر لـ أيهم موسع عيونه
اندار أيهم صار كدامي ، بيني و بين اسكندر
الناس كلها كاعدة و الفاتحه خزوني
ساعة السودة الي احتركت بيها ايدي
اسكندر : صاير ما صاير شعليك؟
أيهم : الانسان من الجميل يكون لبق
و تصرفاته محترمه و يحترم المواقف
و يحترم الآم الناس خصوصاً بـ هيج وقت
حسب معرفتي جدتكم يلي توفت مو؟
و حسب معرفتي هم بهيج وقت
الانسان يتجنب المشاكل مهما كان هو عدواني
و يخلي احترام لـ الفاتحة و لـ عزيزه
سكت اسكندر و ظل بس يطك صفنات
ما ادري أيهم شيسوي هنا و شجابه
جسار : روحي
عبرتهم و رحت للـ السيارة
سمعت صوت اسكندر وراي يصيح بـ اسمي
انداريت دحگت لـ أيهم لازمه من زنده
و خازرين بعض ، روحي هلكانه تركتهم
درت وجهي كملت مشي
رحت صعدت بالسياره ،
شغلتها و طلعت للصيدلية
ايدي النار يلي بيها تشحط الواحد
و انا امشي بالطريق دحگت بـ المراية
سياره تمشي سريع و قريبه عليه كلش
سوده و عاليه ، دگلي هورن استغربت
صارت السيارة بـ صف سيارتي
نزلت الجامه اسوق و ادحك للسيارة
لحد ما نزل الجامه ، دحگتله أيهم
يأشر الي حتى اوكف على صفحه
مُلاذ : شكووو؟
ما يسمع صوتي من ورا صوت السيارات
بقى يأشرلي ، احركله ايدي بـ معنى "شكو؟"
لحد ما دخلت بـ فرع ، صفيت السيارة
دخل وراي ، وكف السيارة ، نزل منها
فتحت الباب قبل لا انزل
حرك ايده الي بـ معنى " اكعدي "
كعدت بـ مكاني مستغربة منه شيسوي هنا؟
اجا ناحيتي بسرعة ، نظرات القلق بـ عيونه
أيهم : لَـذه !
عكدت حواجبي ادحگله
و هو يتجهه الي ، گلت بـ تساؤل
مُلاذ : شتسوي هنا ؟
كنبص كدامي و يدور عيونه بـ ايدية
أيهم : شبيها ايدج؟
مُلاذ : شنو شمدريك؟
أيهم : جسار گلي
مُلاذ : شتسوي بـ فاتحة بيبي شجابك؟؟
أيهم : تعالي بـ سيارتي خل اشوف ايدج
مُلاذ : عوفها رايحة للـ الصيدلية
أيهم : اي انه هم اكدر اشوفها
يلا تعالي وياي ما تكدرين تسوقين اولاً
ثانياً خل اشوفها و انه اوكف يم صيدلية
اجيب الي تحتاجينه
مُلاذ : لا ماكو داعي
أيهم : مُلاذ يلا حبابه ايدج ورمت
مُلاذ : ما اريد هسه انا اروح
أيهم : بس اشوفها الج
و نضمدها و ارجعي
مُلاذ : لا شكراً دكتور ما اريد
أيهم : ليش ما تجين وياي ؟
مُلاذ : ليش حتى اجي وياك؟
أيهم : بس اشوف ايدج
دحگتلها انتفخت اكثر
يدحگلي عين عليه و عين على ايدي
اتنهدت و طلعت من سيارتي
كام بسرعة وكف كدامي
أيهم : ها رح تجين؟
مُلاذ : بس هالمره
لان ايدي جاي توجعني
دحگلها بـ نظرات حزن
ميل راسه و گال : سوده عليه
مُلاذ : لا تروح زايد
اتحمحم و دار وجهه يفرك كصته
سديت باب سيارتي ، قفلتها
راح قبلي فتح الي باب سيارته بالصدر
صعدت سد الباب ، اجا من الجهه الثانية
صعد بـ السيارة ، شغلها و حرك بـ سرعه
عين على الطريق و عين على ايدي
أيهم : شصار بـ ايدج ليش هيج؟
مُلاذ : انصلخت بـ المي
أيهم : انتظري هسه اجيب الج دهن حروق
و ندهنها عدل و انطيج علاج زين
مُلاذ : شتسوي يم بيت بيبي؟
أيهم : سلطان خابرني
مُلاذ : ليش؟
أيهم : واحد من اهلكم ما اعرفه متخربط وضعه ، خابرني حتى اجي و اشوفه
لان ما يكدرون يجيبونه گال يمكم هوسه اصلاً
اجيت شفته انطيته علاج و علكتله مغذي ،
صار احسن و اصلاً جنت ناوي اروح
بس شفت اسكندر و جسار يتعاركون اجيت الكم
مُلاذ : سلطان منين عنده رقمك؟
أيهم : من يوم الجاب اختج للمستشفى ،
اخذ رقمي خاف يصير بيها
مثل لمن صار بـ المدرسة و تمر بـ نوبة
حتى يخابرني و يعرف شلون يساعدها
هزيت راسي بـ قبول
وصل لـ الصيدلية ، نزل يجيب الي دهن
الشمس صارت بـ عيني عمتني
و انا انتظر ، اتصلت عليه امي
فيروز : ها يمه مُلاذ شصاير؟
مُلاذ : شنو؟
فيروز : هسه سمعت اسكندر متعارك وياج
شكو وينج شصاير؟؟
مُلاذ : ما صاير عيني لا تخلين بالج
من ارجع اسولفلج هسه شويه و ارجع
فيروز : انتبهي على روحج
مُلاذ : تمام فوفو ، لا تخلين بالج
نزلت التلفون و سديت الاتصال
اجا أيهم بـ اتجاهه السيارة دحگتله ،
درت وجهي فتح أيهم باب السياره حتى يصعد
رفعت ايدي انزل يلي تحجب الشمس
بـ اللحظة يلي نزلتها بيها طاحت صور هواي
بـ نفس اللحظة صعد أيهم بـ السيارة
تطشرت الصور على كاعية السيارة
ظليت ادحك مستغربة ، رجعت عيني على أيهم
يلي عينه عليهن ، تعابير وجهه تشرح صدمته
رجع يدحك بـ وجهي و انا ادحكله عاكدة حواجبي
اريد انزل المهن ، نزل قبلي بسرعة
أيهم : عوفيهن
لمهن بـ طريقة مُبعثرة
كل شوية تطيح وحدة و يرد ياخذها
اخذ لاستيكه و شد الصور و هنه على ظهرهن
حتى ما كدرت اشوف شنو يتضمنن
حط الصور بـ جهته ، بعدني بـ نفس الاستغراب
شعره طاح على عيونه و اتبعثر
مسح وجهه بـ ايديه حيل
رفع ايده و هو يمسح بـ وجهه لـ شعره
رجع شعره لـ ورا و ادحك لـ وجهه لونه مخطوف
مُلاذ : اكو شي ؟
اندارلي دحگلي هز راسة بـ رفض
مُلاذ : شنو ذني الصور؟
أيهم : صور هيج
ما احب احد يشوفهن
مُلاذ : ليش ضامهن هنا؟
أيهم : ناسيهن
قوست شفتي مستغربة
من ردة فعلة و توتره الواضح
حرك السياره و الهدوء سيد المكان
صرنا بـ مكان فارغ وكف السيارة و طفاها
اندار الي دحك لـ ايدي بـ نظرة سريعة ،
و رجع دحك لـ وجهي و عيوني
أيهم : يلا خل اشوف ايدج
انداريت كعدت صفح
هو هم كعد مثلي اخذ كفوف لبسهن
حتى ايده ما تتدمر دهن
اخذ ايدي بـ هدوء لزمها ، ايده ترجف
مثل منشفة صغيرة نكعها و خلاها ع الحرك
المنشفة دافية مو باردة
مُلاذ : دكتور المشنفة شو حاره؟
أيهم : ما يصير تخلين على مكان الحرك شي بارد
مثلاً ثلج او شي بارد كلش ، تتاذين زايد
ظل مخلي المنشفة على ايدي
كم دقيقة بعدين رفعها عن ايدي
و هو يرفعها انطاني حباية ، شربتها
و يسألني عن الحرك دهن ايدي بـ دهن الحروق
ظل الدهن كم دقيقة على ايدي
اخذ شاش و كص قطعة الشاش
سواها مربعه عقمها زين خلاها على مكان الحرك
اخذ باقي الشاش و لفه على قطعة الشاش الصغيرة
و ثبتهن بالكلبسات رجع لم الادوية يلي تطشرت
خلاهن بيناتنا ، مركزه ويا
أيهم : ايدج شوية شوية تبدي تخف بالحرك
و بين كل فترة غيري الشاش جبتلج هنا بالعلاكه
مُلاذ : شكراً
أيهم : واجبي
گالها و هو ينزع الكفوف من ايده
طلع علاكه ثانية بيها بطل مي قدمه الي
اخذت شربت شويه و رجعت انداريت دحگتله
وجهه قريب مني و مبتسم يدحگلي
أيهم : تحسين ايدج احسن؟
هزيت راسي بـ قبول
رجع انطاني حباية ثانيه شربتها
مُلاذ : دكتور
أيهم : ها عيني
مُلاذ : شكد صار سعر الادوية ؟
أيهم : ليش؟
مُلاذ : ما احب واحد يبقالي دين يمه
اندار عليه عاكد حواجبه
أيهم : لَـذه بطلي هالحجي
مُلاذ : ترا ما يصير هسه من نروح لمكان
حتى يعالجونا غير لازم ندفع فلوس؟
هسه انت عالجت ايدي لازم انطيك حقك
أيهم : مُلاذ بطلي فواصه ما رايد منج شي
اعتبري موقف انساني و سويته
مُلاذ : شنو فواصه؟
أيهم : لا تتفوصين عليه اهجدي
رفعت حاجبي ادحگله و درت وجهي
عيوني ع الطريق اتجتفت و گلت
مُلاذ : انت الفوصة
أيهم : انتِ
مُلاذ : انت
أيهم : انتِ
مُلاذ : دكتور گلي شكد سعر الادويه؟
أيهم : بلاش
مُلاذ : و الله ارجعهم بعدين
اول و تالي اعرفهم شكد
أيهم : ميخالف
مُلاذ : و اذا ما اخذتهن
اخليهن ع البنيد و اروح
أيهم : ميخالف
مُلاذ : و ينباكن لان ما اخذتهن
أيهم : ميخالف
مُلاذ : و لان ما اخذت الفلوس
و انا خليتهن ع البنيد يجي واحد يبوكهن
و يطلع هذا الواحد مو خوش
و يروح يشتري بيهن مخدرات
لو سوا بيهن شغله مو زينه
و الله تكسب ذنب و تصير فلوسك حرام
اندار دحگلي موسع عيونه
نظراته تشرح صدمته بـ القصة السويتها
أيهم : زين حضرة المحامية مُلاذ
بلا زحمه اريد اسئلج سؤال
مُلاذ : اي
أيهم : الفلوس الگلتي عنهن مو فلوسي
هنه فلوسج و اجا الحرامي اخذهن
اشترى بيهن شغلات مو زينه ، هو صار عليه ذنب
لان هو سوه هيج بـ روحه و سوه الذنب
بهالحالة انه شدخلني حتى اكتسب ذنب
هي كوتره لو گوه؟
مُلاذ : ما ادري بس من وراك
لان ما اخذتهن صارت عنده فرصه يبوك
و يروح يجيب شغلات مو زينه
أيهم : ديلا بلا انه بعد ما احجي
ابتسمت و التفت الي دحگلي
عين عليه و عين ع الطريق گال
أيهم : رصعاتج حلوات
مُلاذ : منيلي رصعات؟
أيهم : عندج
دحگت بالمراية طلع صدك عني
بس خفيفات ، درت وجهي للجامه ساكته
و احنا بـ الطريق شغل اغنية
"يا شمس الدنيا و الگمر" ظلينا ساكتين
و كلمات الاغنية تطن بـ راسي
وصلني لـ سيارتي نزلت و تشكرته
رحت صعدت بـ سيارتي و رجعت للـ البيت
دخلت يم امي طمنتها عليه
اخترعت لمن شافت ايدي ملفوفة
سولفت الها عن يلي صار برا
عصبت من اسكندر و تصرفاته بس سكتنا
احتراماً لـ فاتحة بيبي و لا وقت مشاكل و عرك
و اعرف مطلب اسكندر المشاكل
حتى يذبون الصوج بيه
كمت رحت لـ غرفة بيبي
و اجت امي وراي دحگت لـ عمتي منارس
حاضنه صورة بيبي وشيلتها على گلبها و تبجي
كعدت يمها و ظليت ساكته ،
رفعت عيني دحگت لـ صورة بيبي
يلي معلكه على الحايط
تحتضن وجهه بيبي الحنون
احن انسانه راحت و تركتني
اتذكرت مواقفنا موقف ، موقف
الكل يبجون و يتلوعون و يعبرون عن حزنهم
الا انا گلبي صار زنزانه للقهر و الحزن
اتعودت من طفولتي هيج
حتى من كبرت اذا اريد اظهر حزني ما اكدر
و لا اريد اظهر هذا الشي لان ما احبه
تعودت اخلي يلي بداخلي سر بيني و بين نفسي
ما اشارك شخص عن مشاعري و لا اذيتي
بحيث العالم كلها تنظرلي نظرة الباردة
الغير مُبالية عكس النار الجواي
دخلت للغرفة دحگت لـ صافيناز
كاعدة يم عمتي و ساكته
صافيناز اجت للـ الفاتحه
ما قطعنا تواصلنا وياها
نزلت عيني على عمتي يلي اهتز جسمها تبجي
حاولنا نهديها ما هدأت و زادت صارت تصيح
كعدت على حيلها تدك على راسها
عمتي من بين كل اخواتها هي متعلقة بـ بيبي
بقت يمها عمر كامل و ما تزوجت علمودها
و لا تركتها و ظلت لحد هاللحظة هي تعشق امها
و هي اصغر وحدة بـ اخواتها
التموا كل النسوان على صوت صراخ عمتي
و انا لازمه بيها من اكتافها احاول اثبتها
بس هي فقدت ما صاحية على افعالها
بعدها مصدومة بـ موت امها ، افهم شعورها
لوعة فقدان الاهل ما مثلها لوعة
خصوصاً فقدان الفرد المتعلق بي من عائلتك
مُلاذ : غااده جيبي الابرة
اخواتها التمن و يبجن و يدكن على صدرهن
زادوا حالتها سوء و انا بس اريد اهديها
صار وجهها احمر و اختنكت من كد البجي
مُلاذ : فرغوا الغرررفة يمه فدوة اروحلج
هزت امي راسها بـ قبول و اخذت مشايتها
اتجهت هي و خالة جنات و النسوان و صافي
راحن لـ عماتي هدوهن و طلعوهن من الغرفة
بقينا بس انا و عمتي منارس
دخلت غاده بـ ايدها كاسة مي
بـ الايد الثانية الابرة اخذتها من عدها
اتبعها دخول صافيناز صحت عليهم
حتى يثبتون عمتي ثبتنها بـ سرعه ع الفراش
و انا ضربتها الابرة
بقت لحظات بدت تهدأ انفاسها تدريجياً
ظلت صافنه بالسكف و متمدده و انا يمها
لحد ما عيونها بدت تنغلق بـ انعدام مقاومة
نزلت من الجرباية كعدت ع الكاع
خفضت نفسها غاده كعدت يمي
تعلمت اضرب ابر و اشد كانولات
قبل فترة دخلت دورات لان امي كل فترة
من وجع راسها ننجبر نشد الها مغذي
و انا بديت اتعلم بـ هاي الاشهر
انداريت لـ غاده لمن همست
غاده : الله يرحمها
مُلاذ : خسارتنا جبيرة بكد خسارة إلياس
غاده : بـ مكان افضل همَ
مُلاذ : اعرف يجي يوم و كلنا نلحكهم
غاده : اللهم حسن الخاتمه
صافيناز : امين
غاده : كومن خل نطلع
هزيت راسي بـ قبول
كمنا انا وغاده و صافي سديت البردات
و الاضوية ، طلعنا من يم عمتي
مُلاذ : نور وين؟
غاده : ما اعرف ماشفتها ابد
مُلاذ : شنوو؟
غاده : و الله بنص الفاتحه و اختفت
مُلاذ : ما شفتيها ابد؟
هزت راسها بـ رفض
بقيت ادور عليها بالبيت ما لكيتها
سألت امي عنها گالت ما شافتها
رجعت اسأل عماتي و من لا جاره سألت امها
هم ما يدرون اصلاً ما ملاحظين اختفائها
طلعت لـ برا صحت لـ جسار
سألته اذا شافها طلعت گال ما شافها
دورنا عليها بالحديقة ما لگيناها
رجعت لـ غرفتها على امل اشوفها هم ماكو
دحگت للدرج و سويته بايتين
صعدت للسطح ادور عليها هم ما لگيتها
يا ربي وين هاي البنيه !! نزلت لـ جسار
جسار : ها ما لكيتيها ؟؟
مُلاذ : لاا
جسار : وييين راحتتت!!
مُلاذ : ما اعرررف ما اعرف
جسار : دورتي بالسرداب؟؟
صفنت و هزيت راسي بـ رفض
ركضنا على السرداب انا و جسار
غاده و صافيناز وياي ، نزلنا
مُلاذ : نور
دورت بـ عيوني لحد ما شفتها خاتله
بـ مكان بعيد ، تبجي بـ خنكه ،
ايدها على حلگها مانعه صوتها من الخروج
رفعت ايدي مستوقفه جسار و غاده و صافي
و انا ادحگلها ، وكفوا مكانهم ،
اشرتلهم يروحون اجا جسار الي
جسار : طمنيني عليها
هزيت راسي بـ قبول
اخذ غاده و صافيناز و راحوا
اتقربت بـ هدوء من عدها كعدت كدامها
مُلاذ : نور؟
رفعت عيونها المغرغره بـ الدموع دحگتلي
لزمت ايدها الثانية و انا اهدء بيها
مُلاذ : شتسوين هنا؟
ظلت حاطه ايدها على حلگها و تبجي
وخرت ايدها عن حلگها وسعت عيوني مصدومه
مُلاذ : شنوووو هااااي؟!
ادحك لـ شفتها طاكه دم و حلگها كله دم
رجعت ايدها على حلگها و بقت تبجي
مُلاذ : شصاااير نور فهميني ؟
منو سوا بيج هيج؟ امج؟
هزت راسها بـ رفض ، خبلتني
مُلاذ : سووولفي
حجت بـ صوت متقطع
و هي تبجي و تناشغ و تتغصغص
نور : طلعت برا سلطان صاحني
شهكت تبجي و كملت كلامها
نور : انطيته جاي و من ردت ارجع
اسكندر شافني عباله طلعت كدام الزلم
ضربني على حلكي و طحت ع الكاع تعورت
و ... و اجا جرني هنا شمرني ما خلاني اطلع
نار اشتعلت بيه ، مستحيل يكون هذا بشر!!
زاد بجيها و انا امسح دموعها و اهدي بيها
نور : مُلاذ امي ماتت بعد منو يحميني منهم؟
انقهرت عليها ، كانت مخلية بيبي بـ مقام امها
كل وقتها هي و بيبي و على طول هنه سويه
و اذا بجت نور بيبي تلعب لعب بيهم
مُلاذ : تعالي عيني تعالي وياي
شلتها وكفتها على رجليها ، سندتها عليه
طلعنا انا وياها من السرداب
جسار واكف بالباب اتحولت تعابيره للاستغراب
اشرتله بعدين احاجي
دخلت نور جوا ، غسلت الها
البنات واكفات وياي خليت لزكة جروح لـ شفتها
ردت اخذها للصيدلية خاف بيها شي
لو داخل بالجرح شي بس نور ما قبلت
كعدتها بـ غرفتها و خليت البنات يمها
كمت من يمها طلعت من البيت
ادور على اسكندر ، دحگت لـ عزيز واكف
مُلاذ : وين اسكندر !
عزيز : ما ادري ليش؟
رفعت تلفوني خابرت عليه
جاوبني اول ما جاوب عطت بي
مُلاذ : انت حيووووان؟
اسكندر : و سرطان نصي صوتج
لا احرك الخلفوج
مُلاذ : سرطان بـ گلبك حيووووان
ما تستحي انت تسوي مشاكل و فاتحة بيبيتك؟؟
كسر بـ ايدك الضربت نور كون يا خايس
و علي اذا شفتك يمها لو ماذيها اشهرك شهيره
عزيز : مُلاذ شكو فهميني ؟؟
سديت الاتصال اعصابي فايرة
سولفت لـ عزيز عن نور و اسكندر
اتحلف بي ، تركته و دخلت
لكيت نور كاعدة يم النسوان
رحت اتطمنت عليها و كمت شفت امي بـ المطبخ
سألتها اذا تحتاج شي ، هزت راسها بـ الرفض
اخذتها و رحنا كعدنا يم نور ، و انا كاعدة
دحگت للـ نسوان مجموعه
يدحكن النا انا و ملاك و يتهامسن
لمن شافني ادحك الهن دارن وجوههن
درت وجهي من الجهه الثانية
هم لكيت مجموعة يدحكن و يتهامسن
دحگت لـ مرة عمي يلي كاعده على القنفة
على ثغرها ابتسامة خبيثه يمليها الشر
انداريت لمن وحده ندست امي
و امي اندارت الها ، دحگت لـ مره جبيرة
عمرها يبين بالسبعينات
المَره : داده اريد اسألج سؤال
فيروز : گولي خاله
تدنت المره و هي متربعه
صارت لـ كدام امي و تحجي وياها بـ همس
بس انا اسمعهم و اذاني وياهم
المَره : خاله انا سمعت يعني
دحگتلنا و دارت وجهها و كملت
المَره : سمعت بنياتج خطفوهن
و هنه مو بنات هسه يعني انهدر دمهن
و مثل ما وصانا الاسلام
المسلمين اخوان و يسترون واحد ع الثاني
شرايج تزوجين بتج لـ وليدي هم يطم عارها
و يستر عليها و هو عمره ٤٠ سنه
و عنده سياره و فلوس و بيت
بحلقت عيوني على كلامها
درت وجهي ادحك بالوجوهه
كلهم التمو لـ يم امي و يتهامسون علينا
يجيني مشامر الحجي و الاسئله
عن خطفنا و اغتصابنا و محاولتهم سترنا
متسائلين شلون بعدنا عايشات !
و بيا وجهه نطلع كدامهم و امي شلون رضت!
رغم ما اغتصبونا
لان انا جنت يم الملثمين شي ثمين
ما يكدرون يتدنون الي لان اجيب الهم سعر زين
تخيل تكون سلعه!! يبيعونك و يشترونك بكيفهم! بواسطتك الناس تاخذ فلوس شكد شعور مقرف
لمن اشتراني شرف اتفاقي وياه
كان اركص و اسوي كلشي يريده
و المقابل مو فلوس ، المقابل كان ما يلمسنا
لا انا و لا ملاك
شرف يعرف بـ قصة الريس يلي قتلته
لذالك ما لمسنا ، و لمن حاول يلمسني
ضربته بـ راسه بالمزهريه
و ما كدرت اهرب بسبب الحراس
و من جهه اخاف على ملاك
اساساً اشتراها شرف وياي حتى يهددني بيها
و ما يكون عندي طريقة للـ الهروب
لان اختي مو وياي و ما اكدر اهرب وحدي
اذا جنت بـ ملهى او بـ اي مكان عام
كضيت سنه كامله انا كله اتفاقات
و المقابل ما يلمسونا لا انا و لا ملاك
ما اريد يلوثونا بـ قذارتهم و بالاخص ملاك
امي تعاركت وي المرة
و اسمعها تدافع النا و المره تهز بـ ايدها
النسوان اصواتهن صارت تعلى و يتهمنا بـ شرفنا كاعدة بالنص و اسمع مشامر الحجي منا و مناك
وصلت حدها وياي كمت وكفت بـ النص عطت بيهن
مُلاذ : انتن شنو من بشرررر!
ما تستحن على رواحجن ؟؟
جايات بـ نص فاتحه و تدورن حجي و گالات
تدرن انتن شنو عشنا؟ كل وحدة كاعده بـ بيتها
تألف سيناريو من كيفها تدرن بـ شنو مرينا ؟
تدرن شنو اتحملنا و شصار بينا ؟
تتحملن انتن الجوع و العطش و الحر و البرد ؟
تتحملن ما تنامن للصبح ؟
تتحملن اصوات الصريخ و البجي مال جهال
و اصوات الرصاص و الضرب و التعذيب
تتحملن يصعقوجن بـ الكهرباااي
تتحمممملن؟ منيه بيجن تكول اي اتحمل
الي تكول انا اتحمل خل تكوم
و بس تحط ايدها جوا مي حار يصلخ
مو جكاره تنحط على جلدها و لا يجووها بالنار
لااا بس تحط ايدها جوا مي حار !
وكتها راح تعرفن شيصير بيج
من تنجوين بـ كل لحظة و انتِ مالج ذنب
شعرجن يلي تخافن تكصنه و محافظات عليه
و معتبراته رمز للقوة الي تكص شعرها
معناتها هي قوية ، انا زينوه لـ شعري زينوه
و زيان شعري لا شيء كدام الي صار بينا
انا و ملاك احترمن نفسجن
انتن بـ مكان فاتحه و مكان عزاء
مو مكان السوالف و الغيبه و النميمه
و خل اخلي عدجن علم
ما اريد وحدة ابنها يستر عليه
انا محد يستر عليه لان انا و لا ملاك ما ننعاب
اذا اكو عيب ف هو بيكم و اكبر دليل هسه افعالكم حجيكم و نظراتكم و انعدام انسانيتكم
و عدم تقديركم للمواقف و الشخص المقابيلكم
كلجن عدجن بنات و جهال خافن الله
لا تندار بيجن الدنيا ، ما ابرر الجن
و لا مجبورة ابرر قومن بـ واجبجن اتجاهه بيبي
و كلمن بـ دربه ما ظلت عيشتنا انا و ملاك عليجن خشمجن خلنه بوجهجن و لا تحشرنه بـ حياة الناس
انداريت لـ المَره يلي حاجت امي
و گلتلها ابني يستر عليها
مُلاذ : و انتِ حجيه صحيح الاسلام
علمنا الستر على بعضنا
بس هم علمنا عدم سوء الظن
و علمنا نسمع من كل الاطراف
علمنا الرحمه و علمنا الخوف من الله
و علمنا عدم اتهام الناس بـ شرفها
راجعي معلوماتج عن الاسلام افضل
ظلن مصفصات عيونهن تريد تطلع من محجرها
انا انفجرت بيهن ، لعبت نفسي من هذا الموضوع
دحگت لـ ملاك تبجي جريتها من زندها وكفتها
اخذت امي وديتهن يم عمتي منارس
و البنات لحگني
امي عكس كل مره ما تقبل احجي و ارادد
بس هاي المره قبلت بـ كلامي و گالت زين سويتي
لان اذا نسكت الهم ياكلونا بـ گشورنا
اعرف ورا كل الصار مرة عمي
لان كل يلي حجو مرة عمي تكعد و تسولفه الهم
ينقلون بين بعضهم الحجي من وحدة لـ وحدة
و يبدي يتحور الحديث و ينضاف اله بهارات
غاده : يستاهلن همزين حجيتي فوختي گلبي
صافيناز : ليه يحكوا هيك
ما يفكروا شو رح تحسوا بسببهم؟
مُلاذ : وين عدهم احساس ذوله
كامت ملاك من يمنا
اندارينا انا و امي سألناها
بـ صوت واحد : وين؟
ملاك : اريد اغسل
طلعت من الغرفة و راحت
كمت اريد اروح وراها
انداريت لـ امي لمن لزمت ايدي توكفني
غاده : عوفيها خليها بـ راحتها
مُلاذ : هسه يضوجنها!
هزت راسها بـ رفض
غاده : لا ما يضوجنها هسه حايرات بـ زمانهن
اتفشلن و اكلن رزاله كدام خلق الله
نصهن تلكيهن راحن
دحگت لـ امي و البنات
هزن راسهن بـ معنى "ابقي"
بقيت كاعده بـ مكاني بس الوب اخاف يضوجنها ...
ملاك :-
طلعت من يمهم ، گلبي محترك
اخاف صدك يزوجوني واحد من ولد العشيرة
و انا اتعدى الصالة سمعت المَره يلي حاجت امي
تصيح عليه تستوقفني
المَره : بت فيروز اوووكفي
لمت عبايتها و كامت تركض الي
ظليت واكفه بـ مكاني ادحگلها
و دموعي رجعت تنزل مثل اول
وصلت الي و وكفت يمي
المَره : شنو رأيج اخذج لـ وليدي
عنده سياره و بيت و انتِ بنيه شابه يربيج على ايده
و هم حليوه يفرشلج الكاع ورد و يفرج بالعالم كله
و تسافرين و تطلعين و شتسوين بـ راحتج
يشتري الج الي تريدي و تلعبين لعب بـ راحتج
انتِ اقبلي و انا اقنع امج
طلعت تلفونها تراويني ابنها
بـ المعنى الحرفي رجال شايب
الشيب تارس راسه ، بلعت غصتي
عفتها و مشيت للحمام ، ذبيت روحي
اغسل و ابجي ، بجيت من كل گلبي
شكد احاول انسى ،
شكد حاولت اطبق كلام الدكتورة
بس مداكدر كل دقيقة تمر عليه مثل السم اتجرعه
اتذكر لمن يدخلون الملثمين و يدورون عليه
و كم مره حاولوا الحراس بـ بيت شرف يلمسوني
بس ما حجيت لـ مُلاذ خفت ، خفت احجي الها
و تثور عليهم و ياذوها و يضربوها
كل شي يمر كدام عيني مثل الشريط
بجيت بصوت عالي حسيت گلبي و زردومي يتكطعن
بالمعنى الحرفي حسيتني راح اتقيء گلبي ،
وكفت احاول اخذ نفس و اتذكر و ارجع ازيد بالبجي
انفتحت باب الحمام
التفتت دحگت لـ نور ركضت عليه ضمتني لـ صدرها
تمسح على شعري ادحگلها بالمراية دموعها تنزل
مغمضه حيل حاولت تهديني و غسلت وجهي
نور : تعالي نطلع للحديقة
هزيت راسي بـ رفض
ملاك : ما اريد
نور : اخذي نفس شمي هوا
تعالي بسرعة يلا عيني
اخذتني و طلعنا انا وياها للحديقة
اجت جابت الي مي تغسل بـ وجهي و تشربني
ظلت يمي تفرك صدري و تهديني
احتضنتني لـ ثواني و فزينا على صوته
سلطان : شتسوون هنا؟ شصاير؟
التفتت نور دحگتله
و انا هم كمت امسح بـ دموعي و ينزلن
نور : ماكو شي
سلطان : احجي نوووور
اجا اتقدم كنبص كدامي
دحگلي ابجي اندار لـ نور و خزرها
سلطان : شكووو شبيها منو بجاها؟؟؟
حاجيني نور احجي انطقييي
ملاك : ماكو شي
سلطان : ملاك احجي!
نور : لا تلح على البنيه
سلطان : احججججن لا و علي
ادخل جوه هسه اگلب عاليها واطيها
و انعل سلفه سلفا يلي بجاج احجججن
سولفت اله نور مختصر عن يلي صار جوا
و هو اتخبل يريد يدخل يتعارك وياهم
لمن راد يروح لزمت بـ جف ايده ،
نظرات التوسل بـ عيوني
ملاك : حباااااب عوووفهم
نزل راسه الي اعصابه محتركه
و وجهه احمر استغربت ردة فعلة
گال و هو يحرك بـ ايديه و كاز على سنونه
عاكد حواجبه وجهه مطعون احمر
سلطان : لاااا تبجين
ولج لاااا تبجين من وراهم
رجع يريد يروح و انا لازمه بي
و نور تتوسل و تحاجي
ملاك : الله يخلييك الله يخليك حباب لا تروح
اشتد صوت بجيي گمت كوه اجر النفس
اندار الي و اجاني من زاد وضعي سوء
و صار صوت بجيي اعلى
ملاك : حباب لا تروووح حباب
سلطان : اشش اهدي تمام ما رايح
نور : اهدي ملاك حبيبتي
تعالي ندخل جوا
سلطان : لا عوفيها عوفيها يمي
ادخلي انتِ و انا اجيبها وراج
نور : وين تظل هنا ؟؟؟
الطاب و الطالع يشوفها و يضوجوها بالزايد بعدين!
سلطان : يمييي نور ادخلي
انا اجيبها وراج
دحگتلي نور هزيت راسي بـ رفض
ردت اروح وياها جرني سلطان
سلطان : اريد احاجيج ما تروحين
انا اوديج بعدين
نور : عوفها سلطان ما تشوف وضع البنية
سلطان : خل احاجيها و اعوفها
ملاك : حبـ ...
سلطان : اششش بس احاجيج
نور ادخلي اجيبها وراج
دحگتلي نور بـ نظرة اخيرة
هزيت راسي بـ قبول دارت وجهها و راحت
رجعت عيوني على سلطان
لزم رداني و اخذني لـ نهاية الحديقة
وكفنا يم شجرة
ملاك : شنسوي هنا؟
سلطان : هذا انسب مكان
ما اريدهم يشوفونا و تجيج حجايه
هزيت راسي بـ قبول و هو كمل
سلطان : شصار سولفيلي؟
هزيت راسي بـ رفض
ملاك : ما صار
كز على سنونه بـ عصبية
سلطان : ملاك احجي لا تفورين اعصابي
اشر على البيت بـ ايده
وجهه بـ وجهي و يدحك بـ عيوني
كاز على اسنانه و يحجي بـ عصبية
سلطان : ما دخلت الهم بس حتى تهدأين
گوه لازم رووووحي عنهم احجي ملاك !!
سولفت اله عن يلي صار جوه
و اختصرت مثل نور بس ما قبل
گلي يريد احجي كل شي بالتفصيل
حجيت اله كل شي و لمن طلعت
و المره الي اجتني حتى اقبل بـ ابنها
لمن وصلت بهالموضوع
وسع عيونه بـ صدمة و زاد احمرار وجهه
انصدمت اكثر لمن جرني عليه
خلا ايده على فكي شبهه ضاغط عليه
اتجمعت الدموع بـ عيوني
سلطان : قبلتييي؟ قبلتتتتي بي؟
هزيت راسي بـ رفض بسرعة
عاف وجهي و ظل لازم بـ راسة
اندار يريد يدخل الهم ركضت ورا اوكفه
ما يقبل يوكف و كمل مشي و هو اضخم مني
اذا الزم بي اريد اوكفه يجرني وياه
وكفت مكاني و هو مكمل مشي صحت وراه
ملاك : اذا رحت و الله اقبل بي و اوافق
ما اعرف شنو رح يصير بعد كلمتي
ليش گلت هيج اصلاً
و ليش احجي كلام انا مو گده
اتصنم بـ مكانه ، منطيني ظهره
بلعت ريكي ساكته ، اندار الي
اجاني بـ خطوات بطيئه و انا اتراجع لـ ورا
سلطان : شگلتي؟
ملاك : اقبل بي
كمل مشي و انا اتراجع
و هو يعيد سؤاله
سلطان : عيدي الگلتي؟
ملاك : اقبل بي
يحجي بـ هدوء و انا ارعش
گال بـ تساؤل
سلطان : تقبلين بي؟
عثرت رجلي بـ شي وراي
و بسرعة عدلتها و استمريت اتراجع و گلت
ملاك : ا... اي
وصل الي ، صار كدامي
ما يفصلنا غير كم سانتيم
سلطان : تقبلين بي؟
ملاك : اي
جر ايدي عتها من مكانها
شكيت بيها انخلعت
سلطان : تدرين انا شسوي من تقبلين بي؟
ظليت ساكته و ادحگله
و هو كمل كلامه
سلطان : ازرفه تزرف
يزفونه بـ تابوته يوم العرس
وراها تابوتج و يلحگج تابوتي
نزلت دموعي و نزلت راسي
كارضه شفتي بـ غيض منه
بـ نفس الوقت خفت من حالته و عصبيته
و من يحجي ، يحجي بـ جديه
ابتعد عني ، دار وجهه يزفر انفاسه
ضرب على وجهه حيل بـ ايدية و يهمس وي روحه
اندار الي ، رجعت نزلت راسي ، اجاني
وجهي كدام صدرة و هو قريب عليه
گال بـ هدوء عكس قبل شوية
سلطان : ملاك
ظليت ساكته و منزله راسي
و الله لو مُلاذ هنا و شافته يهددني هيج
جان گلبت الدنيا و كمشتني كتلتني لان ساكته
رجع كرر كلامه
سلطان : ملاك دحگيلي
رفعت نظري دحگت اله
أردف بـ هدوء : لا تاذيني عليج
ملاك : بس انا ما مسويتلك شي حتى اذيك
سلطان : ملاك
ملاك : اممم
سلطان : لا تحرگين گلبي بهالسالفة
ابن النعال هذا ما تقبلين بي و شحدج تقبلين
و هاي امه الـ***** الا **** ****
شهكت و كممت حلگي
مصدومه بـ فشاره و هو يحجي بـ جدية
نزلت ايدي و گلت مصدومه موسعه عيوني
ملاك : شكد عيب !
رفع ايده فرك وجهه
صار شعره مبعثر وفوضوي
و خر ايديه و دحگلي
سلطان : معليج بهالكلمات انسيهن خيولن
ملاك : بس عيب ما يصير تحجي هيج
سلطان : ادبسز انا ما عليج
بعدين اتربى على ايدج
ملاك : شلون تتربى على ايدي؟
ابتسم تك خد و نفض راسه بـ رفض
سلطان : هيج انسي
هزيت راسي
سلطان : الي يحاجيج لو يضوجج
تجين و تگليلي
ملاك : تمام
سلطان : شتسوين من يضوجوج ؟
ملاك : اجي و اگلك
سلطان : المن تجين ؟
ملاك : المن؟
سلطان : لـ سلطان ، المن تجين؟
ملاك : بس مُلاذ تكلي
تجين تكليلي عن اليضوجج
يعني اگللها و بعدين اگلك ؟
سلطان : لا گليلي بعدين گليلها
ملاك : خاف تعصب
سلطان : ما تعصب ،
هسه المن تجين من يضوجوج؟
ملاك : لـ سلطان
ابتسم و گال
سلطان : يا حلاة اسمي بـ صوتج
ظليت ساكته و اوزع ابتسامات
تدنى عليه و شاورني و يحجي بـ همس
سلطان : ديربالج على نفسج
و اذا سمعت بيج حاجيه وي المره الخطبتج
انعل هيد هيداج ، زين عيني؟
ملاك : زين
فتحلي الطريق و انطاني الحرية حتى اروح
ركضت ركض جوه و بـ وجهي للغرفة
لكيتهم متطشرين رحت كعدت يم راس عمتي
و عيني على صورة بيبي
طول الفاتحه كل شوية اريد اصيح الها
و اتذكر هاي فاتحتها فد ينعصر گلبي
و اظل ادمع لا ارادياً ...
مُلاذ :-
كعدت عمتي و ظلت على حالها
تبجي و ملابس امها بـ ايدها
نص راحو و نص باتو
وكفت اجلف بـ الجدوره مال طبخ
لان باجر لازم هم نسوي بيهن
بـ ايدي الجلافه و اجلف التفتت على ندسه
دحگت لـ الطفل الواكف وراي
مُلاذ : ها
دنك شاورني : خاله عمو أيهم يريدج
وسعت عيوني مصدومه
و الطفل بـ مكانه
مُلاذ : شنوو؟!
-عمو أيهم يريدج انتِ مو مُلاذ ؟
هزيت راسي بـ قبول
تعابيري توحي للـ استغراب ، غسلت ايديه
طلعت ورا الطفل و هو يدليني على أيهم
لگيته واكف يم الباب الخلفي
الطفل راح لـ أيهم انطاه أيهم فلوس
و هو راح يركض فرحان و انا تخبلت
مُلاذ : تعبت و انا اسألك شتسوي هنا؟
أيهم : اجيت اشوف ايدج شلونها؟
مُلاذ : زينه ايدي كل ما تعور و اتاذى
تجي تشوفني شلوني؟
اتقرب عليه و وكف كدامي
گال بـ هدوء و هو يدحك بـ عيوني
أيهم : لو اكدر اصد الاذى و الجروح عنج
و اخلي صوابهن عليه و اذيتهن بيه ،
خنجر يحفر بـ گلبي اذيتج
بلعت ريكي بـ هدوء نزلت نظري عنه
مُلاذ : تكدر تروح ايدي زينه مابيها شي
درت وجهي اريد اروح مشيت كم خطوة
استوقفني من صاح اسمي
التفتت اله دحگتله ، اجاني وكف كدامي
أيهم : اتمناج تعرفين كل شي
بس مو الوقت المناسب كل شي غلط
و حتى فهمج الي و لـ تصرفاتي غلط
لَـذه ما يهمني كل شي هسه ، يهمني فهمج
مُلاذ : فهمي لـ شنو؟
أيهم : لـ تصرفاتي وافعالي وياج
مُلاذ : شلون افهمها و انت صم بكم
كل شي ما اعرف لا عنك و لا منك
و تلاحكني بـ كل مكان اكرهه هالتصرفات أيهم !
أيهم : ما ملاحكج فعلاً اجيت اتطمن عليج
مُلاذ : تمام شكراً
ردت اروح و استوقفني لمن اتقرب اكثر
و بدا يحجي بـ وهن ، تجولت عيونه بـ وجهي
الأيهم : انا اخاف اعاينلج
والله اخاف اعاينلج بـ الحرام
و انتِ مو الي بس عيني وكحه
افترت ب كل الوجهه تدور عليج
لمن لكتج ما كدرت تبعد عنج .
ظليت ادحگله و هو يحجي
و يذب نفس و يجر حسرات
ابتعدت عنه ، رافضه الافكار يلي اجتني
رافضة حتى الامان يلي حاوطني
رافضه انجذابي لـ الحنيه يلي بـ صوته
الاهم من كل هذا
رافضة الراحة يلي احس بيها اتجاهه
عكس شعوري اتجاهه كل الولد
الراحه تتسلب مني لمن يحاجوني
مُلاذ : واعي على كلامك !
دحگلي بـ نظرات ذبلانه
ظل ساكت ابتعد عني ،
فتح السياره و فتح الباب الورا
عيوني تراقبة اخذ شي و سد الباب
التفت الي بـ ايده بطانيه صفرة صغيره
مرسوم عليها مبينه مال اطفال
اجا بـ اتجاهي ، حطها على متوني ، لفني بيها
حجا و هو يحطها على متني الثاني
أيهم : بعد لا تطلعين هالشكل باردة
و ملابسج خفيفة يلا ادخلي للبيت
ابتعد و انا بعدني واكفه عقلي مدري شصار بي
عطل بعد لا اعرف احجي و لا اعرف ارد
-ادخلي
مُلاذ : ما جاي افهم شي منك
انت منين تعرفني ؟
-ما اعرفج يلا ادخلي بسرعه
مُلاذ : منين تعرفني!
أيهم : ما اعرفج
مُلاذ : تعرفنييي
أيهم : ما اعرف لَـذه
بطلنا من سالفة المراقبة نوب هسه منين اعرفج
مسحت وجهي ابتعدت ردت اوخرها
ما خلاني و رجع خلاها على متوني
أيهم : لا ترديني خليها عندج
دحگت لـ تلفوني لمن اجاني اتصال من امي جاوبتها تسأل عني وين
گلتلها رح اجي و سديت الاتصال
درت وجهي انطيته ظهري
مشيت خطوتين و وكفت التفتت دحگتله
-اتمنى ما يتكرر هالشي
الجيران و الناس تشوف
ما اريد تصير عليه سمعه بسببك
مايهمني الناس و حجيهم
لكن گلت هيج حتى امنعه يجي بعد
درت نفسي و كملت مشي
صاح وراي : اسف حگج عليه
درت وجهي دحگتله ، صعد السيارة
و شخطها ع الكاع بقى بس العطاب وراه ...
غاده :-
شفت مُلاذ تروح ورا طفل
مشيت وراها اصيحها بس متسمعني
لان صوت غسل و حجي و هوسه
طلعت من البيت من باب ثاني
استغربت و عكدت حواجبي
لحگتها و وكفت بـ الباب رايده اصيح الها
و اسئلها ليش طلعت ، بس مشيها سريع
وكفت مكاني لمن شفت الطفل يلي وياها راح
و هي تتجه لـ رجال وكفت كدامه و تحجي ويا
ما مبينه هيئته عدل لان بعيد
غاده : يا مُلاذ يا بلا اخلاق
طلع اكو معرررس و ما گايلتلي
ارجعي و انا اعلمج
حجيت و انا اتحلف
و اشوفها تسولف منفعله
دارت وجهها ناحية الباب تمشي
گلت بـ گلبي "اجيتي و الله جابج"
اريد اشفي غليلي بيها
شلون ما تسولفلي عن سعيد الحظ!؟
بس لحظات و عبرها الرجال ، صار كدامها
و صاروا اقرب الي و ملامحهم وضحت
ركزت بـ وجهه الرجال عاكده حواجبي
صبيت كل تركيزي بـ وجهه هلبت اغلط روحي
فركت عيوني و رجعت ادحك نفس الوجهه
گلت بـ صوت هامس مصدومة : رَماد ! ...
هتان :-
رفعت نظري لـ امي يلي سببتلي قلق
تفرك بـ ايديها تلوب تروح و ترجع بـ الغرفة
هتان : ماما بس اهدي
-ولج شلووون اهدي شلووون
رح اموت يا ربي ساعدني
هتان : عليمن كل هذا قلقج!!
- ولج اليوم رجع من السفر
و ما اجا و استقبله شلووون بـ اخوج شلون ؟
رح يموتني ناقصة عمر
هتان : ماما يمكن عنده شغل ؟؟
يعني ما رح يفتهمه اذا اجا متأخر؟
-عصب صار نار هسه تصير ملاحم بينهم
شيفكهم يـ ربي ساعدني و عدي هاليوم على خير
هتان : هسه شويه و يجي ماما
لا تخبليني وياج قلقتيني
- الساعه بـ الوحدة بالليل وين يجييي بعد
هسه يطلع راجع لـ بيته و هالمسكين شنو ذنبه
صارله يوم ما شايفة و يدور عليه
هتان : ماما هو بس اليوم ما شافه
عادي قابل يكعد يمه اربعه و عشرين ساعه
-واجبه هذا
هتان : اعرف واجبه و هو قايم بـ واجبه
دتشوفي من اول ما يرجع لحد ميروح هو يمه
و يطلعه و يونسه و ممخلي شي بـ نفسه ...
قبل لا اكمل كلامي و دفاعي
انجفلنا انه و امي على صوت العياط العالي
يلي يصدر من الصاله ، كان صوت ابوي
امي : هياته اجا و هذا اكبر دليل
صار الخفت منه صااار
هرولت امي خارج غرفتي
تطفي الحريق الي رح يگب باللصالة
ثبتت خطواتي لمن شفت ألايهم
متجي روحه ع الحايط
ابوي شايط وجهه مگلوب احمر
صوته رج البيت رج ، باهر يفرك عينه بـ نعاس
ابوي : رحت و رجعت الكاك تشرب
و تجي بـ نصاص الليالي ما استقبلتننننني
أيهم ادمرك و الله و تعرف شلووووون!
رجعت وجهت نظري على امي
بس تريد تسكت ابوي و تهدي
اعاين لـ الأيهم يترندح ، متجي روحه ع الحايط
رفع نظره لـ ابوي و بـ نظرة تجاهل و برود
بـ كل هدوء گال
أيهم : شعره من شعرات **** ما تحرك
اتخطى ابوي ، شال أبيل من الكاع
راحوا هو ويا للـ الغرفه
ابوي گلب الدنيا ورا أيهم بـ الصياح
بس أيهم كمل طريقة بلا اي اهتمام او ردة فعل
مجرد ملامح يكسوها البرود و التجاهل
الي خلا ابوي يزيد ثوران و عصبيه
تركت امي البركان المشتعل بـ الصاله
ركضت ورا أيهم ، حاول باهر يهدء ابوي
بس ما كدر انتهى بينا المطاف تاركينه بـ الصاله
يزمجر بـ عصبية و يعبر عن غضبه بـ الشتم
حسب ما افتهمنا انو أيهم جاي سكران!؟
راح باهر بسرعة على غرفة ايهم يريد يفتهم
ليش هو شرب ؟!
لان هاي مو من عادة الأيهم
و يتصرف هالتصرف الطايش ،
بعمره أيهم ما حط شرب بـ حلگه اصلاً يكرهه
و يموت من عنده و ينبذ يلي يشربون ..
دخل باهر بسرعة و انه دخلت وراه
عاينت لـ أيهم كاعد على القنفه ، مفرع رجليه
منزل جسمه ، امي كدامه تنوح و تنحب
تعاتبه على سوايته
امي تعتب لكن ايهم كان بـ غير عالم
مغمض عيونه و متجي راسه
بلع ريگه و نزلت دمعته ، گال بصوت ثمل
مبين بي التعب من بين غصته
أيهم : احبـــهه
وكفت امي مصدومه تعاينله
الأيهم : جرح گلبي اخ احبــهااا !
صرخ احبها بـ صوت عالي و اتلوى بـ مكانه
امي فوراً سدت حلگه بـ ايدها
بسبب صوته الي رج الغرفة و خوف أبيل
باهر يعاين اله بـ استغراب و حيره
دكت امي ع رجلها بقهر ، گالت متوسلته يحجي
امي : منيه يمهه منيه ليش ما گتلي اخطبها الك
منيه الهيج معذبه گلبك و تخليك تلجئ للـ الحرام
الأيهم : ذات العيون الكحلاء
امي : بس اسمهاا منيه؟؟
هز راسه بـ رفض و هو مغمض
يحجي يجر الكلمة جر
أيهم : لا اغار عليها اسمها بـ گلبي
سحل باكيته من جيبه بـ خمول
طاح الباكيت و ضحك هو بلا سبب
رجع اخذه من الكاع ، تجى ظهره على القنفه
سحب الجكاره ، طاحت من ايده
تناول الجكاره بـ صعوبة من الكاع ورثها
حطها بين اصابعه سند كصته على ايده
الجكاره بعدها بين اصابعه ، غمض عيونه
ابتسم بـ طرف شفته و همس
ألايهم : عنن عَليّ ذنيج رصعات الخدود
فرك رجله و عض شفته
ضحك كأنما ديتذكر
لا مو طبيعي تصرفاته متشتته
كأنو مو أيهم يلي كدامنه
او هو هذا ايهم لكن ايهم الولهان بـ حُبه ! ...
علامات الاستفهام مبينه على وجوهنا
منو يلي هيج يحبها ؟
امي : أيهم ابني فدوة اروحلك اصحى
باع ابنك خطيه شلون خايف
أيهم : يمه رصعاتها لمن تضحك
ضحك كأنو يتذكر شلون هي تضحك
و بـ مجرد اتذكر ضحك بـ استرخاء و راحه
و رخى جسمه اكثر ،
شعره مبعثر ، مغمض عيونه
ضحكه ظاهره اسنانه مرسومه على ثغره
أيهم : عيونها الكبار
سوادهن الي اتمنى اتيهه بي
شعرها المنثور الي يشعلني ما يطفيني
من يشوفه غيري لو يشمه ، خبالها عليه
لسانها ابتسامتها الفالته و تكرهها بس انه احبها صوتها ، ضحكتها ، عركها ، خزرتها
قبض ايده حيل و عكد حواجبه و هو مغمض
امي باقيلها شعرايه و تتسودن
بس تريد تفتهم منو هاي
و من شوكت يحبها وليش ما حاجي عنها
أيهم : السرسريه سنين على حلاوتها بنت الـ...
وكف قبل لا يكمل
نفخ بـ ضجر و كمل كلامه
أيهم : لا خطيه ميت يروح يعجعجن عظامه
لان اجت اله مسبه من وره بنته الفوصه ام شعر
كاصته الجلبه الفوصه
ما كدرت اتحمل و ضحكت
عاينت لـ باهر وضحك وياي
انهدينا بالضحك بـ الكتمه كوه مسكتين رواحنا
أيهم : الف رحمة على روحك
لان ما نمت ذيج الليله
ملخت امي خدودها
بس تريد تسد حلگه و هو اندلع
كامت امي تكمز ، انه و باهر
مفعلين وضع الانبطاح من الضحك
طردتنا امي برا بس بقينا بـ الباب
أيهم : فوكها الفوصة تحط حُمره حَمره
دنعل امج على ابوج تهيجين ناري ليش؟
عايز انه ؟ و هيج تسوين بيه !
كوه سكتته امي ، طلعتنا دفع و طردتنا
انا و باهر منفلقين من الضحك
رجعت اذاني ع الباب
أيهم : يا بويه اذا اكمشج يابويه شسوي بيج
شعرج الكاصته الا اوكلج تبن عليه
فتحنا الباب مدينا راسنا
هفتنا امي بـ نعالها طفر باهر
و طاح النعال بيه ايدي كامت توجعني
و هي تخوزر بينا
جر أيهم أبيل من ايده باس كصته
و حضنه لـ صدرة و هو ساكت ، مغمض عيونه
ظلوا على هالحال كم دقيقة و أيهم انتجى و غفى
اخذت انا ابيل نومته يمي
و هو مرتبك من تصرفات أيهم
نسيته السالفة بـ الالعاب و الفيديوات ...
غفيت و فزيت الصبح ، لكيت أبيل مو يمي
نزلت جوه ، دورت على اهلي
سمعت صوتهم من المطبخ
دخلت لـ يمهم ، اعاين لـ امي تحجي وي أيهم
امي : أيهم انت من شوكت تشرب و هذا حالك؟!
من شوكت انت تغضب رب العالمين !
أيهم : ما اشرب انه البارحه لحظة غباء
شربت بيها و متندم ، خلص انتهى الموضوع
ابتسم أيهم و هو يحجي لمن عاين لـ أبيل
يلعب بـ سيارته ، جره و باس خده
امي : زين هالمسكين شوكت ترجع امه؟!
استغفر أيهم
فرك وجهه بـ عصبية
أيهم : ما اريدها لا ترجع شو لا زايده و لا فايدة
المن مخليها بس تسوي مشاكل يابه ما اريدها
حتى ايديه تعبت من الكتل!
امي : بس هي مرررتك و شئت ام أبيت
هي مرتك و أبيل يحتاجها و يحتاج وجودها
حتى لو غلطت عليه انه مسامحتها
أيهم : لا مسامحتها و لا مسامحتج
ختولي شيحتاج منها انه اربي
شنو هالقذرة تربي ابني ! حتى تعلمه يتمادى عليج
لو تعلمة على سوالفها الما بيها خير !
زفرت امي نَفس تعبانه من الحجي وي أيهم
تذكرت اخير مشكلة صارت بين أيهم و مرته ...
الدنيا مغرب ، دخل أيهم للبيت
اتقدم كعد على القنفه ، سلمنا عليه و بوسنا
طلع أبيل يركض من الغرفة طاير على أيهم
لمن سمع صوته ، ضحك أيهم لمن شاف ابيل
قَدم ظهره و هو كاعد فتح ايدية لـ أبيل و شاله
خلاه بـ حضنه يبوس بي
كانت لحظات من الاطمئنان و السعاده
لحد ما نزلت المنحوسه لينا يلي مفلته اعصابنا
و ما تنزل غير المغرب لمن تكعد من النوم
امي دتمسح بـ الارضية و انه وياها
رفعت راسها امي دحگت لـ لينا
گالت مبتسمه ملاطفتها
امي : مساء الخير
عاينت الها لينا من فوك لـ جوا
اخذت كاسة مي ، گالت بـ نبرة استهزاء
لينا : مساء الـ*** وين اكو خير بـ شوفتج؟
كزيت على سنوني هاي مو المره الاولى
و امي خطيه تبلعها و تسكت حتى ما تگول لـ أيهم
و بـ طبيعة الحال لينا مجانت تدري بـ أيهم موجود
لحد ما خيم على الارض ظله و ظهر من وراها
أيهم : منيه الماكو خير بـ شوفتها؟
وسعت عيونها مصدومه ،
طاحت كاسة المي من ايدها
اشرلي أيهم بـ عيونه اخذ أبيل
واكف وراها و ايديه بـ جيبه وكفته مستقيمه
بهاللحظات لينا سوت الدرج بايتين
و ركضت فوك و انه اخذت أبيل خليته يم باهر
رجعت للـ الصالة عاينت لـ أيهم
يلي يعاين الي و بـ نظراته يسأل "وديتي أبيل؟"
هزيت راسي بـ قبول و بلعت ريكي بـ خوف
دار وجهه ، ايديه بـ جيبة
صعد الدرج بـ كل هدوء بـ خطواته الخفيفة
گال و هو يلحن بـ صوت هادء ،
يهز بـ راسه يمين و يسار : ليـــنا
وصل فوك و انه و امي ملزمين ايدين بعض
نز جسمي على صوت كسرة الباب
اتبعها صوت صراخ لينا بـ خوف
و صوت صراخها بـ ألم رغم هالشي
و الي صار بقينا نسمع صوتها
تفشر على امي و تغلط عليها !.
نزل ايهم ايديه حمر و عروگه ناطه
التفت و صاح بـ صوت عالي
أيهم : اذا رجععععت و لگيتج
ما تلومين الا نفسج و تعرفيني كلش زين
نزل نظره لـ امي
أيهم : تخابرين اهلها يجون ياخذوها
من ارجع ما اريد اشوف خلقتها
دار وجهه راح شال أبيل
الواكف بـ باب غرفة امي ، اخذه أيهم و طلع
فزيت راجعه للـ واقع ماحيه الموقف من ذاكرتي
التفت أيهم و عاينلي ابتسم و گال
أيهم : اجت الفتانه
هتان : استاز أيهم بليز
ام نوت فتانو ام هتانو
(الترجمه : استاذ أيهم رجاءاً
انه مو فتانه انه هتان)
كام ضربني على راسي بـ خفه و هو يضحك
ضحكت و بست خده ، دفعني أبيل عن أيهم
رفع ايديه لـ أيهم ضحك أيهم و شاله من الكاع
وكف يحجي ويا
أيهم : تولي هتان؟
أبيل حط اصبعه طرف اصبعه بـ حلكه
و يعاين لـ أيهم ، هز راسه بـ معنى "اي"
ضحكت و تدنيت كرصت ايده بـ خفة
جريت وجهه عضعضت خدودة ...
ملاك :-
مر على موت بيبي فترة طويله
بـ يوم بـ الليل طلعت اشتري من الاسواق
رغم امي رادت تجي وياي بس توسلت بيها
اروح وحدي بسرعة و ارجع
لان هي تتعب بعدها ما متعوده على المشي
تمشي ع المشاية من ترجع مُلاذ من الشغل
تمرغ رجليها و تظل يمها ساعات
لان رجلين امي تظل توجعها و تصل عليها
دامشي للـ البيت راجعه بـ ايدي العلاكه
دحگت مرعوبة و موسعه عيوني مصدومه
على صوت الصياح صايرة هوسه
الدنيا مگلوبه كدام بيتنا
خطيت خطواتي حتى اكمل مشي
ارتفع صوت الرمي ، تجمدت بـ مكاني
عيوني كانت رح تطلع من محجرها
صوت رميي ! گبل فكرت رمي ابوي راح يموت
راح يموت شخص امي جاي يرمون عليها
اجو يكتلون كل عائلتي شلون ما كتلو ابوي
راح يكتلوهم كلهم ما اريد اشوف منظرهم
ما اريد اشم ريحة دمهم
ما اريد تتلطخ ايديه بـ دم اهلي ما اريددد!
لمن رجع الرمي فززني من صفنتي
انهد حيلي ، كعدت ع الكاع جسمي يرجف
زحفت على ايديه ، صرت بين السيارات
لميت رجلية لـ صدري ، كل ذرة بجسمي ترجف
فتحت عيوني بـ وسع و انا اتخيل منظر اهلي
اتخيل امي ملطخة بالدم ، مُلاذ !!
مُلاذ اخذوها مني حتى مُلاذ عاااافتني
سديت اذاني ، اصوات الرمي تطن بيها
عيوني يحرگني كلش
ما اتحملت ، صرت اشهك اختنكت ، تدمرت
الصوت استمر باذني رغم سادتهن بـ ايدية
شهكت حيل و صرخت اهتز جسمي
ملاك: امي كتلو امي كتلو مُلاذ بقيت وحدي
كتلو امي امي امي كتلوها
ما كان صوت الرصاص مجرد صوت اخاف منه
كان الصوت الي دمر حياتي
رفعت عيني لمن تظللت الكاع
بـ ظل شخص طويل اي اجا يكتلني
يلا خل يموتني خل اخلص
رفعت نظري ، بعدني مسكرة اذاناتي
الهث عبالك كنت اركض ، ايديه ترجف
دحگت للـ السلاح الي ضمه ورا رجله
يبعده عن نظري رفعت نظري اكثر
دحگت لـ وجهه اندهشت سلطان! سلطان هذا
كعد كدامي بـ خوف ، يطبطب على خدي
ما اتذكر شنو يحجي يدحگلي بـ نظرات توحي القلق همست بـ روح رايحة
ملاك : كتلو امي
كمت اناشغ و دموعي تنزل
احس بـ شفتي ترجف : تيتمت
شالني بين ايديه ، انا شهكت
فوك المناشغ مالتي رجعت كررت : كتلوها !
دحگتله و هو يگول اسمي و يصحي بيه
خارت كل قوتي و احس روحي مرفوعه
طاحت ايديه من الجهتين انعدمت سيطرتي
من بعدها اسودت الدنيا كدامي
اذاني صار بيها ضجيج و هوسة
اتبعها صوت صفير بـ اذني ...
مُلاذ :-
اغسل بـ الماعين بـ المطعم
عقلي فاصل عن العالم
هاي امتحاناتي و راح اخلص المرحلة الرابعه
بعدها رح ابدي تدريب و اتدرب ع المحاماة
صافنه و حايرة بـ زماني ، اتذكرت أيهم
بـ يوم الراح اجتني غاده تركض
و تسأل عن أيهم شيسوي هنا
رجعت بـ ذاكرتي لـ ذاك اليوم
درت وجهي و كملت مشي دخلت جوه
فزيت لمن دحگت لـ غاده واكفه كدامي
عگدت حواجبي بـ استغراب
مُلاذ : شتسوين هنا؟
غاده : منين تعرفين رَماد؟
مُلاذ : يا رَماد ؟
غاده : هسه الكان واكف
مُلاذ : أيهم ؟؟
غاده : شنو أيهم غير اسمه رَماد؟
مُلاذ : لج يا رَماد شبيج تخبلتي؟
هذا الدكتور أيهم يلي كان واگف
غاده : و الله العظيييم رَماد
شايفته الف مره و اعرف شكله كلش زين
مُلاذ : بابا و الله أيهم الدكتور العالجني
رَماد منوو ؟
غاده : انتظري دقيقة
راحت تركض لـ جوا
نفخت بـ ضجر و رحت كعدت على جذع شجره
انتظرها تجي ، اجتني ورا دقايق بـ ايدها تلفونها
عگدت حواجبي بـ استغراب اتصلت على شخص
مُلاذ : منو؟
غاده : باهر
مُلاذ : شتريدين من عنده؟
غاده : رَماد دوم يجي وياه
و هي تحجي فزت و گالت
غاده : هلو باهر ، شلونك هههه
ظلت تسولف وياه و انا مشتوله منتظرتها تخلص
اريد اشوف شنو تريد ، لحد مگالت
غاده : باهر رَماد شنو اسمه الحقيقي؟
وسعت عيونها مصدومه و دحگتلي
رجعت تحجي بـ التلفون
غاده : لا هيج بس صار عندي فضول
تمام ، اي ، باهر امي تصيحني
دقايق و ارجع اتصل
نهت كلامها ويا
نزلت تلفونها ساده الاتصال
غاده : رَماد اسمه أيهم !!
مُلاذ : شنو اسمه أيهم
غاده لا تخبليني أيهم هو الدكتور السوه عمليتي
بدت تسولفلي عن جياته للـ الكُلية وي باهر
و شلون الكل يحبونه و يحترمونه
و صوته الغنائي الي الكل يحبه و يندمج ويا
و رجعت توصف مواقفه ، ظليت ادحگلها مستغربة
مُلاذ : بس كل الاعرفة هو دكتور
شجابه على كُلية الحقوق؟
غاده : ما اعرف دوم يجي وي باهر
مُلاذ : يمكن صدفه عادي
غاده : ما اعرف بس استغربت
ليش اجاج شيسوي هنا ؟؟
رفعت الها ايدي اراويها و سولفت الها
لمن سلطان ماخذ رقمة و متخربط عمي
و هو اجا شافه و بعدين شاف عركتنا الخ...
غاده : و انتِ ما تحجيلي كلبه
مُلاذ : شحجيلج انسان عادي
و حاله حال اي رجال
غاده : شو بالله سولفيلي كل مواقفكم
مُلاذ : شسولفلج كل مواقفنا
كل شي ماعدنا
غاده : مُلاذ سووولفي حبابه
مُلاذ : غاده و الله ماكو شي شنو اسولف!!
تدرين بيه ما اعبر هاي السوالف و لا احبها
غاده : كل هذا الوقت تعرفينه و ما كايله الي
مُلاذ : شنو اگلج مثلاً ؟!
ترا ماكو موقف يستحق حتى احجي
غاده : خل تخلص الفاتحه
و انا اعلمج اخليج تطلعين شكو سالفة...
فززني من صفنتي دغه بـ جتفي
التفتت دحگت لـ سنار واكفه وراي
مُلاذ : ها؟
سنار : تلفونج صارله ساعه يرن
عكدت حواجبي و دحگت لـ تلفوني بـ ايدها
نشفت ايديه ، اخذت تلفوني
دحگت كومه اتصالات ، من سلطان ، من جسار
من اسكندر ، من امي ، شصاااير!
و انا ادحك للـ الجهاز فزيت على رنين التلفون
من جسار الاتصال ، فتحت المكالمة بسرعة
مُلاذ : شصاااير شبيكم؟؟
جسار : مُلاذ لگيت الكاسيت !
يتبع ...
لا تنسون التصويت
+ التعليق بين الفقرات🩶
_______________
الا صدمه صدومي مو؟ 😶
مثلكم اجتني الصدمات وحدة ورا الثانية
الأيهم نفسه رَماد 😃؟
و عنده ابن ؟ و متزوج ؟؟؟؟؟؟
صيحوا بـ اعلى صوت يبوووووو
بس قبلها ابد لا تحكمون على الأيهم هسه
انتظروا و رح تعرفون كل شي يخصه
بعد ما بدينا بـ قصة الأيهم
رح تتوضح بالبارتات الجايه 🔥 ...
منو يرمي و ليش كان يرمي؟
السلاح شيسوي بـ ايد سلطان!
بالنسبه لـ جسار يلي لگا الكاسيت؟
شنو ممكن يتضمن ؟ هل رح يوصلهم لـ ثغره؟🤔
كل شي رح تعرفون بالبارتات الجايه
و المخفي رح ينكشف🤫🔥
تابعوا حساب الانستا
انشر بي اشياء تخص الابطال و اجاوب اسئلتكم
قبل كم يوم نزلت صورة عين ملاك
و شفايف مُلاذ او على گولة أيهم براطمها😂🩶