بـ قصر كبير وعظيم وبه من الديباج والالماس
يعني قصور الاغنياء مره المعروفة
هالقصر كان لعائلة (الأدهم) اشهر و اغنى
العائلات بذا البلد ولهم قصة ان هالعايله
رغم كبرها و قوتها ما كان بها الا ولدين
وهالولدين أمير الصغير والكبير أدهم
أدهم و مرته عليا ماتوا من زمان
يوم احترق قصرهم اللي هم به
وتم انقاذ بنتهم الوحيدة بعمر سنة وحده
اسمها (براء)
سموها بذا الاسم لأنه جامع بين اسم الولد والبنت
لانهم كانوا منتظرين ولد تصير كنية
لـ أدهم اذ نادوه (ابو براء)
و رغم انهم حبوها ك بنت بس احترام
لنسب هالعايله الكبيرة والمعروفة على
مستوى البلد .
بعد ما مات ادهم وعليا
خذا اخوه الصغير امير بنتهم
براء امير اللي ما جاه عيال من سنين
زوجته الطيبة ربت هالبنت و كأنها بنتها
ومرت السنين وصار عمر هالبنت
18سنة السن القانوني لزواج .
بذا القصر الكبير :
براء بغرفتها و الدريشة الكبيرة
فاتحة ضوء الشمس طغى على الدار
براء اللي عيونها للمرات وتمشط شعرها
الطويل البني اللي واصل تحت اردافها
براء اللي معروفه بضحكتها الساحرة
ابتسامتها تشبه قوس المطر اذ
ارسم بالسماء و اسنانها اللي وسطها
سنيّن بارزه والباقي تخبأ تحت الشفايف
الزهرية
براء طولها وسط ونحيله على جسم مرسوم
والنهود والارداف بارزه
وهي تناظر للمرات وتضحك ومره فرحانه
ما يكدر خاطرها شيي
نادت عليها وحده من الخدم قالت :
براء امي يبغى تحت
براء بابتسامة وخاطر رحب :
طيب الحين جايه
نزلت براء من ذاك الدرج الطويل الملكي
ووصلت عند عمتها امنه
قالت براء :
هلا عمتي وش بغيتي
قالت :
يا بنتي بعلمتس بشيي ولازم تتقبلينه
استغربت براء وحست بقلبها
به شيي خطاء
براء قالت :
خير يا عمتي وش صاير
قالت وهي ترجف امنه :
عمك امير قرر يزوجتس
انصدمت براء ولا هي مستوعبه :
وش !! بس انا مابغي اتزوج هالحين
توي وتوي متخرجة من الثانوي
امنه زوجها امير مسيطر عليها بكل شيي
وماعندها غير أمر و سم حتى لو هالشي
ما تبغاه لانه قاسي بطبعه وجاف حتى
الضحكة قليل تنشاف على وجهه هذا
اذ ابتسم بحياته
براء المدلله اللي عمرها ما صار بخاطرها
شيي الا وصار اللي ما تدل طريق المطبخ
والطبخ وغيرها من النفخ
اللي عمرها ما نامت جوعانه يمكن ما تعرف
طعم الجوع بحياتها تعتبر براء الوريثة الوحيدة
لعايلة (الأدهم) لانها الخلفة الوحيدة منهم
وعمها بيزوجها لانه طماع بالورث
ويبي يفتك منها .
**
عصبت براء وقالت :
ماني متزوجها توي صرت ثمانطعش
وش هذا ظلم ماني جاهزه لزواج
خبري عمي واللي بيصير يصير
امنه بربكه :
حتى انا مابيتس تتزوجين ما شبعت منتس
يروحي بس شنسوي بـ عمك طبعه شين
ومستحيل ما يسوي الليي براسه وتدرين
يا بنتي انه يعد الايام و الشهور لين
ما ياصل عمرتس ثمانطعش
عشان يفتك منتس ويصير ورث
هالعايله له وحده يحسب بالفلوس
يصنع سعادته وهو عمره ما شقت
الابتسامه وجهه القاسي
تاففت براء :
ايه ادري ما صدق خبر الحين
بس والله ماتزوج لو بيذبحني
طلع صوت طويل ينافح
وقال بكل عصبيه :
آمنـه
خافت آمنه جمدت بمكانها ونزلت
عيونها للأرض
جاء أمير كبير الجثة طويل ودب
ولحية محوطه وجهه عابس الوجه
وعيونه بنظرها حاده وتخوف فقال
بعد ما حط عيونه بـ براء :
عيدي كلامتس تقل سمعت شيي
ماهو مضبوط
براء اللي دايم شجاعه و دافع
عن حقها قالت :
ماني بمتزوجه يا عمي
توني تخرجت بتنفس شوي
بعيش حياتي
قال :
حياتس اللي تكلمين عنها
تعيشينها ببيت زوجتس فهمتي
براء :
لا يا عمي ماني متزوجه حتى ما فكرت
بالزواج ولاني جاهزه له
عصب عمها :
اسمعي يا مدلعه زواجتس بعد يومين
صرتي ثمانطعش خلاص تبين تعنسين عندي
بعد تجهزي وهذا انا عطيتس العلم لا يكثر
مد عيونه لـ آمنة وقال بعصبيه :
جهزي هالمدلعه نبيها تعرس ونتفتك من همها
ارتجفت آمنه وقالت بخوف :
ابشر ابشر ..
عصبت براء :
انت تنتظر هاليوم من زمان يوم اصير
ثمانطعش عشان اتزوج وتستانس بورث
العايلة هاذي لحالك ، بس والله يا عمي
ماحد فكر بفلوسك او ورثهن الفلوس
اللي تغليهن ما شرت ضحكة وحده لك دايم مكشر
عصب أمير ومسك براء من ذراعها بكل قساوه
و رماها على الأرض وقال معصب وبصوت طويل :
شوفي يا مدلعه تراتس دلعتس واجد انقلعي من
وجهي لا اقوم اضربتس زواجتس بعد يومين
وغصبن عنتس يالله انقلعي
راحت براء والدمعة بطرف عينها ضاقت
بها الدنيا بما رحبت .
**
براء جلست بغرفتها يوم كامل وما فتحت
الباب لزوجة عمها اللي كل يوم تطق الباب
براء ما كانت تبكي او ضعفت لانها اقوى
من كذا هي تفكر شلون تتخلص من هالزواج
براء ناظرت للمرات ولفت شعرها الطويل
و ربطته وقالت وعيونها اعلنت التحدي
ابتسمت ابتسامة الفوز وقالت :
نشوف يا عمي انا ولا انت
اجل بتزوجني عشان ما اكل الورث هيين
طق الباب اللي من امس يطق
راحت براء وفكت الباب الا مرت عمها
جت خمتها وقالت بقلق :
انتي وش علامتس قفلتي الباب خفت
عليتس واجد
براء :
ما عليتس يا عمتي انا بخير
آمنه قالت بعد ما نزلت رأسها :
الا ما شفتي رجلتس يا بنتي
براء قالت :
لا ما شفته ولا ابي اشوفه
آمنه عصبت بقلبها واجد على أمير
قايله :
آخخخ فوق ما يبي يزوجتس بالغصب
ما اختار الا واحد قد عمره
براء صاحت :
بعد بيزوجني شايب كبره
والله ما يحلم هيين يا عمي
آمنه قلقانه :
وش ناويه تسوين يا بنتي
براء اللي مليانه تحدي :
بسوي شيي ما توقعه بالليلة الزواج
باطا على غرور عمي وانتي يا عمة
لزوم تتقوين وما تضعفين قدامه
ترا بيتمادى واجد
آمنة :
مالي حيل ولا قوة عمك طاغية كبير
بذا الزمن القوي ياكل الضعيف .
سكتت براء لأنها تعرف وش كثر
عمها قاطع لسانها ولا مخليها شيي
هي طيبة و مسكينة ما تستاهل اللي
يصير عليها .
آمنة قالت :
بكره زواجتس يعمري
براء :
ادري بكره الوعد هيين يا عمي .
بالليل :
جاء امير لغرفة براء دخل بدون استاذان
فقال بجفاء :
انتي يا مدلعه شوي الخدم يجيبون الفستان
جهزي نفسك عااد ماهو كود عمتك تساعدك
انتي مره وتعرفين مصلحة نفستس نصيحه
لا تعاندين وتحطين راستس براسي
لان وقتها بتعرفين من انا زيين
يا ويلتس و سواد ليلتس لو فكرتي
بشيي ابد ماهو من صالحتس اعقلي
وخليتس مره عدله فهمتي .
براء لجمت عليه ومن كلامه لها
ابد ما ردت عليه لانها بتحط رأسها برأسه
وواثقه انها تبي تتخلص من هالورطة اللي
جبرها عليها .
راح عمها امير جابت الخادمة الفستان
وجاب حراس يشددون الحراسه عليها
يعني مالها مفر الا انها تخضع لذا الزواج
براء حست بضيقه و انها على وشك
عتبات الاستسلام بس به شيي قوي بقلبها
يقويها هي لو تنذبح مستحيل تتزوج
هالشايب اللي اختاره لها عمها وحتى
لو ما كان كذا هي رافضه الزواج
اللي يجي بالاجبار .
**
من بكره يوم العرس عرس براء
براء تتجهز وحولها الكوافيرات يزيننها
براء معصبه والابتسامة اختفت من وجهها الحلو
عمتها آمنه قريبه لها تواسيها فقالت بضيق :
قلتلتس و علمتس عمك طاغيه كبير ما قد
احد تحداه و خسر مالك الا تتزوجين يمكن
هالرجال يكون ارحملتس من عمك اللي
ما بقلبه ضمير .
براء معصبه :
لا يا عمه بلقى طريقه لو اهرب ..
امنه خافت :
وش تهربين
براء تستوعب الكلمة اللي قالتها حرف حرف
أ-ه-ر-ب ...
ابتسمت بعد الضيق الكبير اللي بها
حست انها لقت مكان تتنفس منه فقالت :
أهرب مالي الا كذا
امنه زاد خوفها :
ياويلتس تفكرين تسذا والله لا غير يذبحتس
اذ لقاتس اكيد انه بيدور عليك بالخلان ولا
يخليلتس اثر لانك بتكصمين وجهه قدام العربان
يوم هربتي بالليلة عرستس تذكري ان له سلطه
كبيره و رجاله اقوياء وواجد تكفين يا براء
براء ملزمه على الهروب :
اذ ما هربت بيخليني اتزوج ذاك الشايب المعفن
والله ما اتزوجه خليه يذبحني ارحم لي من عيشته
آمنه خمت يدينها لبعض وصارت ترجف
تدري شكثر عناد براء هي يمكن اعند من عمها
الطاغية صارت تدعي بقلبها ان الامور تصير بخير
وتعدي هالورطه هاذي على خيير
جاء الليل بسرعه :
الوقت هذا اللي لازم براء تلبس الفستان
الابيض وتنزف على زوجها
براء طارت عيونها بضيق على هالفستان
اللي يتلامع من كثر ماهو حلو بس بعيونها
تشوفه اقشر شيي ممكن تلبسه او تشوفه
براء تفكر وشلون تهرب طارت عيونها
بالخادمات وهي تفكر واجد وبالحظة
جت ببالها خطه نادت بصوت طويل :
يا عمه تعالي
جت عمتها بربكه وقالت :
وش تبين يا بنتي
براء مسكت يدين عمتها تترجاها قالت :
تكفين يا عمه اطلبي من حدا الشغالات يلبسون
الفستان على انها انا وانا بلبس اي شيي ممكن
يطيح بعيني واهرب تكفين زودي الراتب او
اغريهم بالفلوس ماني متحمله هالزواج
آمنه خافت وقالت :
انتي وش تقولين انخبلتي
براء تحن على آمنه :
تكفين والله بذبح نفسي لو اعرست
على هالشايب المنتهي ساعديني آخر مره
آمنه زاد خوفها :
بس وين بتروحين لا هربتي من هنا
براء :
بدبر نفسي بس ابي اطلع من قفص عمي
اللي ما به الا وجع الرأس
آمنه خذت نفس وحاول تتشجع شوي
وقالت :
بس عمك بيذبحني والله .
**
براء :
سوي نفستس ما دريتي بشيي
خليتس مصدومه وكذاا
آمنه خمت براء وقالت :
طيب يا بنتي حتى لو عمك بيذبحني
بتحمل عشانتس وتري هذي اول مره
بحياتي اتجرأ و اكون ضده ما ابيك
تتعذبين اكثر هنا يمكن الحياة اللي برا
ارحملتس من حياة عمك اللي انتي
اكبر همومه .
آمنه قالت لوحده من الخادمات
انها تلبس الفستان وراح تدبر لها
فلوس تعيش بها طول حياتها
وافقت الخادمة لأن هذا العرض مغري
لها واجد
لبست الخادمة الفستان بعيد عن
انظار الخدم كلهم وطلعت
جاء امير وصار يناظر لـ براء
اللي لبست فستانها عباله انها براء
ارتاح و راح
براء اللي طلعت من الغرفة وصارت تدور
على اي شيي قدامها يغير من شكلها الا
شافت لبس الخادم عباره عن بنطلون وشوي
متشقق على طول لبسته وعلى ما لبسته
ارتاحت وحست ان عمها ماراح يعرفها بس
ضايقها شيي وحييل الا هو شعرها البني
الطويل عصبت وقالت :
انت بعد يبيلك تغيير
خذت المقص القريب وقصت شعرها الطويل
وحطته بجيبها على الاكيد ما بقى من شعرها
غير صلعته صارت مثل قست الولد
عدلت الجبه من اطرافها وقالت بتحدي :
الحين بهرب ولا راح تلقاني طول عمرك يا عمي
وخلك تعفن بأسم هالعايله و فلوسها لأنها ما همتني ابد
براء صارت تتسلق الإسوار و الجدران تحاول
بكل جهد الهروب وصلت لسيب الكبير الطويل
الا واحد جاي قدامها وطي رجوله قوي
وما كان بذا القصر بهذ المشي غير عمها
هنا ارتبكت وحست ان قلبها بيطلع من مكانه
تجمدت مكانها ولا قدرت تتحرك شبر قدام
نزلت القباعه على وجهها وصارت تناظر
بطرف عين الا انصدمت كان عمها صدق
وجاي صوبها هي بالوكاد خلاص تجمدت
جمدت ثلوج الجبل القطبي
صاح امير من شاف ذا الخادم قدامه وقال
بصوته الطويل :
انـت ..
**
براء ارتبكت وحست ان عمها ما عرف
انها هي خشنت صوتها وقالت :
امرك
قال امير وهو مستغرب منه :
وش عندك هنا رح كمل شغلك
لا افصلك
قالت :
اسف اسف ابشر عن اذنك
راحت براء وهي تتمايل بمشيها
من الخوف ان عمها يكشفها
امير كمل طريقه
براء وصلت لحديقة القصر الكبيرة
خذت نفس وقالت وهي ترجف :
عمي كان بيكشفني بس الله ستر
الحمدلله
براء تفكر :
الحين انا من وين اهرب الباب الكبير
كله حراس قد عمي ياالله
الا طاحت عينها على كلب الحراسه
اللي يتمشى وقالت بابتسامة :
مالي الا ذا الباب
ركضت براء لين ما وصلت
باب الكلب اللي مثل الجحر يطلع
على برا نزلت وحاولت تطلع من
عنده بس كان ضيق مره عليها بس
هي ما استسلمت ومعنده تطلع منه
صارت تجرجر نفسها لين ما اطلعت
والكلب صار ينابح لانها طلعت من
بابه جاء احد الحراس على صوت نبحه
وقال :
ليش تنابح به حرامي او وش
ركز بانظاره وما شاف شيي
ممكن انه يجيب الشك عصب
على الكلب وقال :
لا تنبح بدون سببب هاذي
آخر مرة
راح الحارس والكلب يناظر لبابه
اللي طلعت منه براء .
**
براء قدرت تطلع خارج اسوار القصر
وهي على عتبات الهروب نادتها عمتها
آمنه من وراء هالجدران الطويلة قايله :
براء تسمعيني براء ..
براء قربت للجدر وكانها تحضنه بقوه
تبي تسمع صوت عمتها قالت بضيق :
هلاا هلاا يا عمه
آمنه قالت :
اسمعي يا بنتي انتي لازم تعرفين الحقيقة
استغربت براء :
وش حقيقته يا عمه
آمنه :
بقولتس لو على ذبحي لزووم تعرفيين
عشان تعرفين مين عدوتس من صديقتس
براء :
قولي يا عمه وشيي
طلعت من القصر وصرت اركض
مو لاني ابي اهرب بس الا اني
انصدمت حييل من اللي قالته عمتي
ماني مصدقه مستحيل مستحيل
صرخت بقوا ما عندي
لااااا ماني مصدقه
هنا ركضت والدموع اربع من عيوني
مشيت يمكن كيلومترات بدون ما احس
بالتعب لان التعب بقلبي ومن اللي قالته
عمتي اهلكني اغمى عليي وانا من وقتها
ما حسيت بنفسي الا باليوم الثاني
وصوت يدعيني يقول :
هيي انت قم لين متى وانت ناييم
هنا فتحت عيوني شوي شوي .
**
فتحت عيوني وشفت قدامي واحد
لبسه اسود كله عيونه مكحله وحاده
جسمه مشدود وعريض طويل
يمكن عمره 28س
صحت من شفته ووخرت وطولت
صوتي عليه وانا ارص يديني
على جبتي :
انت منن وانا ويني
قال ببرود :
هشش لا طول صوتك
استغربت من كلمة لا طول صوتك
هذا يحسبني ولد
قال :
شسمك
رديت بدون وعي :
براء
قال :
براء امم
قمت وقلت معصبه :
انا وين تكلم يا انت
الا جاء ثنين من الرجال ولابسين سود
بعد انا عقلي وشوي يطير ليش لابسين
نفس اللبس ليكووون ذولاء ...
قال واحد منهم :
يا ريس سطينا على الدكان وكسرناه
انا انفجعت وعرفت وقتها انهم عصابه خطيره
يااربي اهرب من مجرم و اطيح بين مجرمين
انا وش سويت عشان يصير كل هذاا
رجعت انظار ريسهم لي وقال :
هذا اسمه براء ومن اليوم راح يكون عضو
منا وبيكون اكبرمخترق بينا
صحت بعقلي وقلت وانا بالعه العافيه :
يبيني اكون اكبر حرميه ياالله
ابتسموا الرجال الثنين وبنظرات فخر
يناظرون لي
بكذا انضميت لأكبر عصابة سطو وتكسير
واختراق بالبلد
ومن حسن حظي انهم يحسبوني ولد
من شكلي ولبسي واسمي ساعدني
ولازم ما يعرفون اني بنت ابدد
هالعصابة لها مقر سري مخفي مثل
جناح فندق فخم وبه كثير من الوحات
ومتكونه هالحراميه من ناس واجد
ماهو واحد او اثنين وكل يوم فريق
يداور المهمة
قالي بدر الا هو ريس هالعصابة
انه لقاني طايح ومغمى عليي بحده
هالشوارع وهو خذاني هنا و قرر يضمني
لهم .
**
انا صرت محجوزه بذا المكان
بس حسيت ان هالحراميه رغم انهم
مجرمين بس حليلين حتى الان
ما اجبروني على شيي ما ادري
شسالفتهم
و ريسهم كل يوم يجي وكأنه يطمن
عليي
الا جاء بالليل وقال لي :
براء لازم نستفيد منك وتساعدنا
صحت بقلبي اساعدكم على
وشش على الاختراق والتكسير
وش يحسب نفسه هذا
قمت وانا احاول ادافع عن نفسي
وقلت :
لو سمحت انا ماني حرامي-ه
هنا بلعت العافية وسديت حلقي
صرت اتكلم بطريقة بنت
قحيت وخشنت صوتي وقلت :
اسمع انا ماني حرامي ولا اعرف
لذي الأمور .
ضحك ضحكه من قلبه يطنز عليي .
وقال :
اذ ما اشتغلت معنا اكيد اني
برجعك للمكان اللي انت هارب
منه واكيد ماودك بذا الشيي
تجمدت ضلوعي وش يقول
هذا يبي يرجعني لعمي لا مستحيل
انا هنا سكت وقمطت العافية
وهزيت برأسي ب ايه
بصير حراميه زيهم بصير اي شيي
بس ما ارجع لعمي وبعد ما علمتني
عمتي آمنه بالحقيقه اللي هدمتني .