سكرلها فمها بيدو وهمسلها في وذنها
ادم : اشششششش بالعكس لميس مكانش واحد مداير فيه الثقة قدك نتي .... الديفو الللي فيا اني نخااف عليك من كلش حتى من الهوا اللي تتنفسيه ماني حاب تتقاس منك حتى شعرة بأذى ماشي قضية ثقة هاذ الهدرة اخر مرة نسمعها منك نحب نعرف كل تحركاتك نحب نسمع صوتك وانتي تتغزلي بصحاباتك قصدي تعيطي عليهم
قبلها من جبينها دزاتو من عليها بلطف وجات خارجة لف يدو على كرشها وجبدها ليه جا صدرو ضد ظهرها حط ذقنوعلى كتفها يتكلم بحنان
ادم : تسامحيني كون نديك في رحلة شهر العسل ؟؟
شقت التبسيمة وجهها ضروسها بانو ناضت تسوطي من الفرحة وتعيط مدايرة يدها على فمها ودارت ليه من الفرحة نسات وش دارلها
لميس : اععععع قول اقسم اك بصحك ؟؟؟؟ ايييه انا يحسراااه ملي سامحتك ولا نسيت
تبسم لفرحتها ملامحها وتصرفاتها طفولية قرصها بخفة في خدها وبعدها حط يدوعلى خدها يمسح عليه بحنية
ادم : هيا مالا ازربي وجدي قشك وانا نعيط للخدامة تجي تلملي القش
حطت لميس يديها على خصرها تخزرلو بغيض
لميس : تهدرها في وجهي نورمال لا حشمة لا جعرة تعيط للخدامة ؟؟ لاه انا مكسرة اليدين ولا حاطني فاشلة في كلش
مسح على شعرها بلطف كي الطفلة الصغيرة بيسك بطولها القصير وحجمها الصغير تبان صح طفلة قدامو بطولو الفارع وحجمو الكبير يا ربي توصل لنص صدرو
ادم : دبري راسك مالا
دا خطواتو للبرا رايح للبيرو تاعو وصل للباب ورجع ليها هاز حاجبو الايسر استغربت من ملامحو هز تيليفونو في وجهها شافت فيه وتبسمتلو بتبهليل
ادم : وش هاذا ؟ وش درتي بيهم هاذو كامل
لميس : وشنهي وش درت بيهم لاه ماعنديش حق في صوارد زوجي الكريم ؟ شريت حوايج خصوني ولا خلاصولك ؟؟
تبسم بسخرية على كلامها مالغري المبلغ اللي صرفاتو كبير بصح مايجيش نص نص نص الربع اللي عندو دار رايح لوجهتو
لميس : ااادم ميش رايح تعيط عليا ؟؟
ادم : لاه نعيط عليك
لميس : على الصوراد اللي صرفتهم في يوم
ادم : هه لميس عندك كارت بونكار اصرفي اللي تحبي وتشتي وتحبي عليه ماتخمميش
لميس : مخلاصوش؟
ادم : ميخلاصوش ديري اللي تبغي اللي يهمني تكوني فرحانة
غلق باب الغرفة مخليها مصدومة في بلاصتها من ردة فعلو كانت حاسباتو رايح يعيط عليها ويلومها على التبذير بصح الرد تاعو كان صادم طبطبت الخدامة حلت عليها لقات الحوايج اللي دومنداتهم وصلو ضحكت بفررحة دخلوهم لا دريسينغ صرفتهم بالفن وراح تشوف وش شرات وهي تصفق بيديها بفرحة
لميس : يسسسسسسس يسسس قالي ديري وش تحببببي اععععع ادم
بدلت قشها لبست بيجامة بيستي وشورت ومشات غلقت باب لادريسينغ
فرزت حوايجها ستفت لي بارفان والماكياج السوايع والسبابط في لادريسنغ مالغري متأكدة اللي ميش رايحة تديرهم خاطر طلبتو هاذو كامل غار باش تخرج ادم من حبال عقلو كل حاجة حطتها في بلاصتها والقش داراتو كامل في الفاليز وخيرت لادم على ذوقها هي مداتلو حتى حاجة رسمية كيما موالف
فرزت الحالة ودات الساشيات ترميهم مع حلت لابوبال حلت عينيها بصدمة ورمات الساشيات من يدها جبدت الروبة اللي لبستها في الحفلة مقطعة تقطاع وداخل لابوبال طاحت دمعة من عينيها خاطر عجبتها بزاااااف الستيل اللي تحبو هي
لميس : ااااااااددددددم
هزت الروبة في يدها حست بدموعها رايحين يهبطوو حلت باب لادريسنغ وخرجت خبطت باب الغرفة تلقات مع الخدامة خلعت كي شافتها في ذيك الحالة
لميس وهي تمسح في دموعها : وين رااه اددم
الخدامة باستغراب : في البيرو
لميس : وين راه هاذ البيرو
الخدامة : كملي طول ودوري ع لادروات
مشات لميس وهي منرفزة واصلة بيها للتوووب كل مرة يدير حاجة يخليها كي المهبولة حلت الباب وخبطااتو على طولو فزعتهم لدرجة ادم وسراج هزو سلاحهم
تنهد براحة ورجع سلاحو لخصرو لمح ملابسها شاف في سراج اللي كان يدنق فيها خبطو بدبزة لخشمو سال بالدم شاف فيه سراج بغيض كي فهمو هبط عينيه وخرج شاف فيها وفي الدموع اللي تشكلو في عينيها قلبو خرج من بلاصتو راح ليه جا رايح يشدلها وجهها بعدتلو يديه وبعدت خطوات للخلف
ادم : وش بيك ؟؟؟ لاه راكي تب.............
لميس : ماتتتهدرش معايا
رماتلو الروبة في وجهو وربعت يديها تحت صدرها
لميس بغصة : ربي يسهل دبررر رااااسك والله غار تخسرها مايهمنيش فييييك لاااه تقطعلي في روووبتي
شاف في الروبة فهم اللي بيها بصح مافهمش لاه كانت تبكي بيسك لميس ميش من النوع اللي يبكي على حاجة كيما هاذي
ادم : باش ماتزيديش تلبسيها
لميس : ماعندو مادخلك فيا ربي يسهل تخسرها ماشريتهاش بصواردك والله غار تقلبها كيما كااانت لشتا مانلبسهاش كي تنفحلي نلبسها لشتا نلبسها في الدار لاااه تتلاحلي لحوااايجي
تنهد وقرب ليها حاولت تمنعو بصح ماقدرتش مسحلها دموعها وقبلها من نيفها
ادم : والبكا لاه ؟؟
دزاتو من صدرو ومسحت دموعها كيما لولاد معلابالهاش بلي بليجاست تاعها ولبستها هاذي راهي تقتل فيه بالعرق كانت كيما الطفل الصغير اللي نحاولو الحلوة تاعو وزيد مع شعرها طالع منكوش
لميس : مانيش نبكي اخسرلي روبتي دبر راااسك
شافت فيه نظرة اخيرة ومشات حلت الباب و عاودت غلقاتو تخزرلو بجدية مفهمش تقلباتها هاذو شاف فيها باستغراب موش فاهم اللي بيها
لميس : اني نروح عند يارا قبل مانسافرو
ادم : وشنهي هاذا طلب ولا أمر ؟؟
لميس : افهمها كيما تحب
خرجت وخبطت الباب في وجهو مسح على شعرو بقوة وتنهد مفهمش كيفاش يدير معاها مقدرلهاش عنيدة بزااف مالقى غار يرضخلها ويعاود يطلب يصممولها روبة كييفها مايقدر يدير واالو متوال دموعها
رجعت لغرفتها ورجعت لادريسينغ باش تزيد تحط قشها في الفاليز حطت الفاليزة في الارض ومشات لادريسينغ تدي وتجيب حشرت القش داخلها قعدت فوقها باش تقدر تغلقها لحق بيها ادم في ذيك الوضعية غلق الباب بالشوي بيسك ما انتبهتلوش بقا يتفرج فيها
لميس : اسكري يعطيك ضربة ان شاء الله
سكرتلها تنهدت براحة وهزت يديها للسما
لميس : الحمد والشكر لله ياااربي
مع ناضت لمحاتو واقف متكي ع الباب عاكس رجليه ومربع يديه يخزرلها بشرود قلبت عينيها وناضت تكركر في الفاليزة وجات خارجة لقاتو مزال متكي ع الباب
لميس : بعد
ملقات حتى رد منو عرفت اللي موش رايح يبعد
لميس : اووووووف ادم والله ماني قادرة ناقشك خليني رايحة نهدر شوي مع يارا قبل مانروحو
ادم : ماتطوليش اني نستنا فيك التحت
دزاتو بعدلها خرجت راحت ديراكت لغرفة يارا ودعتها وخبرتها اللي تداوم على تمارينها ووصاتها على مايا رجعت للغرفة بدلت قشها لبست سروال جين مع بودي بلون وزادت جاكات طويلة بيسك كانت المطر تصب
هبطت الدروج تجري لقات ادم يستنا فيها في الطومبيل كلاتو بعينيها قبل ماتدخل جا بقووص بزاااف سيرتو اللحية اللي كانت مطراسية وزيد شعرو اللي مطلعو بطريقة جذاابة واللينات اللي في عينيه نظرتو حادة كيف الصقر من ملامحو مبين اللي عندو شخصية وهيبة كبييرة راجل تتمناه اي طفلة فاقت بروحها كي سمعاتو حللها باب الطومبيل اتوماتيكمون فاقت اللي هي مزالت ميش تهدر معاه بدلت ملامحها وركبت مشنفة دارت لاسانتير ودورت رراسها للكارو تتفادى النظر فيه اما هو كيلها من راسها لرجليها يتفقد لبستها تبسم برضى لاول مرة مايناقشهاش في لبسة برا فهم اللي هي ميش تهدر معاه ومدية موقف منو تفزع من عياطها على غفلة
لميس : اععععع ادم حبببس حبسسس هاهو لاقلاص روح اشريلي عيييشك
ادم : ميش وقتهم ماكيش تشوفي في المطر ؟؟ كون تمرضي
لميس : مانمرضش متحوسش عليا حتى ونمرض يخي انا اللي رايحة نمرض ونسخن ماشي نتا
هز راسو بيأس منها ومن تخمامها وتصرفاتها معلابالهاش اللي كي تمرض هي يمرض هو اكثر منها يتمنى يموت ومايشوفهاش مريضة ولا حاجة قاستها
ادم بحدة : قلت مكانش
لميس : مشحاااح
قالتهالو ودورت راسها للكارو تشوف في لاكرام بعينين يبرقو وهي تحك في رسغها الايسر بخفة حبس متوال السبيطار هزت الساكودو تاعها وهي تشوف فيه بكره طفولي
لميس : ماتجيش ضك مانطولش ونجي
.........يتبع ♥♥♥