الجزء الخامس و الخمسون
يوم الاثنين 20 فبراير
آل رزق الله كلهم كان ليهم نصيب كبير
من القلق و التوتر
وضع سمر الصحي السيء خلاهم كلهم على أعصابهم
أمها و بوها و خوتها و أختها صفاء و رائد و الكل
منذر و أصيل اختفوا تماما و مقدروش يعرفوا وين مكانهم و هذا إلي مخلي غضب آل رزق الله مليشي حدود
و خاصة بوها إلي أصر طول الفترة إلي فاتت ميفسخش خطوبتهم مع أنه عارف بنته قداش تحب
رائد و قداش حتى رائد متمسك بيها و يبيها بجديات
و أكبر دليل على مشاعره أنه من لحظة إسعاف سمر
و هوا مسيبهاش لحظة و واضح كمية الخوف
و التوتر إلي باينات على ملامحه
تنهد بثقل و هو يدعي ربي يشفي بنته
بش يقدر يعيد الأمور لنصابها الصحيح
رائد مكانش أحسن حالا الوضع إلي فيه سمر مخليه
في قمة ألمه و خوفه من أنه يصيرلها شي يؤذيها على المدى البعيد
و مايتفكرش غير في كلام الدكتور بعد كشفه على سمر
أنه عمودها الفقري تضرر هلبا
و أنه ممكن تكون مضطرة أنها تقعد راقدة
و تفقد القدرة على الحركة و المشي لأيام و حتى أشهر طويلة
هذا غير حالته النفسية السيئة و تأثير الموقف إلي شافه قدام عيونه
و شن كان حيصير مع سمر لو قدر منذر
يخطفها و يأذيها
المهم أنه رائد فوت اليومين إلي فاتوا واقف على رجليه
و يادوب يشرب في قهوة و أمية و بس
و كل مياخذ غفوة على مقاعد الإنتظار ينوض مخلوع
لأنه يشوف في نومه أنه منذر قدر يخطف سمر
و هيا تعيط و تستنجد بيه و الدم ينزل من كل مكان
في جسمها😔😔
🌿🌿🌿🌿🌿🌿🌿🌿🌿🌿
الساعة 6:30 مساء
في مزرعة رعد
عيسى كان واخد أماني في حضنه
أماني : تقبل الله حبيبي
عيسى : منا و منك صالح الأعمال يا حب عمري
آسف لأني عطلت عليك
منحسابش البنية حالتها تاعبة هكي
يستر الله من الإصابة كان متأثر على عمودها الفقري
و خاصة أنه الخبطة جتها في مكان حادثها
المرة إلي فاتت
لكن غدوة إن شاء الله نوعدك نطلعوا من الصبح
نغيروا جو و ندهورك في المدينة كلها
و تشري الحاجات إلي قلتيلي عليهم بكري
أماني: مش مشكلة حبيبي عادي
الراجل خوه عاطينا إستراحة
طويلة عريضة و مش ناقصتها حتى حاجة
و فوق من هكي بالبلاش، عيب تكون قريب
و في نفس المدينة و ماتمشيش تنشد و تطمن عليهم
حتى لو مكنتش دكتور و مش حاضر عمليتها الأولى
زي ما حكيتلي
و الطلعة عادي تتعوض و بعدين حني اتفقنا
نروحوا بعد غدوة يعني عندنا اليوم كله
و بصراحة أني كنت نبي نقولك لو مفيش إحراج
نمشي لخالة أسيل و نسأل على بنتها
عيسى : أصلا رعد قالي أنهم كانوا ناويين يعزمونا عندهم غر الله غالب الظروف حكمت
أماني : مش مشكلة حبيبي المهم تنوض البنية على خير
بالك ربي يلطف بينا و تنحل المشكلة بين
أسيل و عيلتها و ربي يلم شملهم
عيسى : إن شاء الله يا حب عمري
إن شاء الله عالأقل أنتي تتريحي على أسيل
و أني إلي تريحك يا حب عمري أكيد حتريحني
أماني : ربي ما يحرمني منك يا حب عمري أنت
و دنيتي كلها
عارفاتك قداش تهمك راحتي
و هذا إلي أني متأكدة منه
و ماعنديش فيه شك بكل
عيسى بعد شوية تردد تكلم بحنان :
باهي يا حب عمري مادامك متأكدة من أنه تهمني راحتك
منونتي حبيبتي علاش حاس أنك
مش متريحة و فيه شي ملخبط عندك
دموعك و عيونك إلي مترفعيش فيهم فيا
كأنك خايفة من حاجة أو داسة عليا حاجة
منونتي يا قلبي صارحيني و ريحي قلبي
و بعدين حني مش مفروض يكون أساس حياتنا الصراحة بش نعيشوا أيامنا كلها راحة و تفاهم
و أماني مكانتش محتاجة تفسير لكلام عيسى
و لا أنه يتكلم أكثر بش تفهم شن قصده
الشرخ في علاقتهم الحميمة واضح
و كلام عيسى غصبا عنها رجعها لأيام قاسية و عصيبة حفرت في جسمها و روحها ذكريات مؤلمة و حزينة
و مع كم هالذكريات القاسية مكانش فيه ردة فعل ليها
إلا دموعها و شهقاتها و عبرتها إلي انحبست في حلقها
و عيسى لن خاف عليها من حالتها هذه
ضغط عليها بين إيديه و نهضها قعمزها
في حجره و قعد يطبطب عليها زى البيبي
باس رأسها و خدودها و شفاهها بحنان و حب:
علاش هالدموع بس يا منونتي
معقولة من قبل لا نكملوا أسبوع لينا مع بعض نخليك
تبكي هكي ،، لهالدرجة فقدت تأثيري عليك يا عمري
أماني : مش منك يا عيسى و الله ما منك
إلي شفته و إلي عشته كان أقوى مني
أكبر من كل شي أني تحملته و نقدر نتحمله
أني شفت في حياتي وجع هني
و أشرت على قلبها بأطراف أصابعها
و كملت بصوت مليان عبرة و حزن :
كنت ديما نقول هذا الوجع إلي وجّعته لعيسى
و نيته قداش ما خداني بالعشم
و كل وجع وجعتهوله ربي ردهولي
كنت في كل مرة نقول هذا دعائه عليا لأني سيبته بدون
مانبررله و لانفهمه علاش درت هكي
خلاني نعيش أيام و شهور في جحيم
نار حمراء كنت ننكوى بيها كل لحظة
نار بعدي عني و نار إلي شفته مع ال......
و معش قدرت تتماسك و انهارت بين أحضان عيسى
إلي كمل يهدهد فيها بين إيديه زي البيبي
و دموعه حتى هوا غلبوه و نزلوا
مع صبره عليها لأنه كان ناوي يسمعها للأخر
بالرغم من أنه متأكد من قسوة إلي حيسمعه
: عمري يا منونتي ما قدرت ندعي عليك
قلبي إلي عاش هايم و مغرم بيك عمره ماقدر يدعي عليك مع من كل الوجع إلي عيشتيهولي لما بعدتي عليا لكن و الله العظيم قلبي ما قدر يقسى و لا ينسى و ربي شاهد
و لا لساني إلي ياما قالك قداش يحبك
و متيم بغرامك قدر في مرة ينطق بحرف و لا كلمة سو في حقك
حتى لما هربت من البلاد طيفك سافر معاي
في نومي و في صحوتي
في قرايتي و في تعبي
و في نجاحي
في صحتي في مرضي
و في كل لحظة تمنيت نعيشوها في الغربة
و كل حلم حلمنا نحققوه و حني يدنا في يد بعض
و ربي ما غبتي عن بالي ولااااا جزء من اللحظة
سألتك بالله سألتك بالله يا منونتي ما تخلي شي ثاني
مازال يفرقنا عن بعض شن ما كان
سادنا هم و حزن عشناه
العمر معش متحمل ..
مش بعد كل هالعذاب نستسلموا و نبعدوا على بعض
و حني قراب من بعض هكي
أماني بصوت هادئ و باينة فيه شهقة البكاء:
و أني نبي نحكيلك و الله نبي نقولك كل شي
لكن أوعدني تسمعني للأخير أرجوك و متقاطعنيش
عيسى إلي كان خايف من إلي حيسمعه
و متأكد أنه زي ما واجع قلب أماني
الوجع حيوصل لقلبه أضعاف الأضعاف 💔💔💔
🌿🌿🌿🌿🌿🌿🌿🌿
في نفس الوقت
رجال آل رزق الله
كانوا مجتمعين مع الأطباء المشرفين على علاج حالة سمر
منصور و أولاده الثلاثة عبد الجبار و محمود و وليد
و زوجته فريحة
و رضا و رائد و أخوالها فيصل و فاروق
و جدهم الحاج رضوان
و من ملامح وجوههم كان باين عليهم أن الكلام إلي يسمعوا فيه مش سهل نهائيا عليهم
فاروق تكلم بصوت رزين و متماسك سأل الدكتور :
يعني خلاصة كلامكم هذا يا دكاترة
أنه سمر مش حتقدر تمشي على رجليها لمدة لا تقل على ستة شهور
و هذا على حسب كلامكم بعد لا تخضع لعملية حساسة
و معقدة هذا غير جلسات العلاج الطبيعي
و كوررسات مكثفة من أدوية و تمارين رياضية و غيرها
و ممكن المدة تطول أكثر
الدكتور المعالج : أنا ما نبي نقول كلام
مش دقيق .. كل هذا حيكون على حسب استجابة الآنسة
سمر و رغبتها للعلاج
و بعدين من إلي واضح قدامنا أنكم كعائلة أكيد
حتصبوا معاها و تكونوا جنبها
و هذا أكيد حيحسن من نفسية المريضة
الدعم النفسي مهم جدا جدا لحالة كيف حالة الآنسة
هذا عدا أنه أنا نفضل الإستعانة بأخصائي نفسي
حيسهل علينا واجد و يسهل عليها تقبل ألم العملية و جلسات العلاج الطبيعي
رائد : الأخصائية النفسية هذه شوري أنا حنتكفل بيها
بكرا أو بعده بالكثير حتكون هنا و تشوف سمر و تقعد معاها
منصور : و بالنسبة للأخصائي الأردني يلي دار العملية الأولى موعد طيارته بعد ساعتين و حيكون هنا
و حيتابع معاكم كل التفاصيل
الدكتور : تمام على بركة الله
اليومين هاذينا حنقرروا موعد العملية
بس أهم شي تفيق من المسكن
و إلا مش حيصير شي
و تأكدوا أن قرار إجراء العملية عندنا هنا في المستشفى قرار صائب لحالة المريضة
لأن نقلها لخارج ليبيا ممكن يسبب ضرر كبير
للعمود الفقري
هذا غير أن الحمد لله المستشفى مجهز بكل الأجهزة
الطبية المتطورة و الدقيقة
يعني كل شي بعون الله تحت السيطرة
منصور : خلاص يا دكتور نحنا واثقين في كلام حضرتك
شكرا جزيلا على وقتك
الدكتور : العفو أنا ما درت غير الواجب
🌿🌿🌿🌿🌿🌿🌿🌿
بالرجعة لعيسى و أماني
بعد لا جابتلهم الشغالة طاستين سحلب
و أماني طلبت من عيسى يطلعوا يشربوهم في
الحديقة بين الورود
عيسى قعمز أماني في حجره ثاني
لأنه حاب يحسسها بحبه و إحتوائه ليها
و خصوصا مع شعوره برجفتها و رعشتها إلي كان متأكد
من أنه مصدرها ذكرياتها الحزينة و المؤلمة
و أماني بدت تحكي بحروف تقطر ألم :
زواجنا كله يادوب كمل سنة
من سبعة لسبعة
عشت فيهم أسوء 12 شهر في حياتي
إلي قعدتهم حرجانة أكثر من إلي كنت فيهم راضية
هوا أصلا أني أمتى رضيت
تزوجت غصبا عني
مكنتش خايفة إلا من حبس خوي و مستقبله إلي
ممكن يضيع بسبب طمع مرته
مقدرتش نزيده بأنانيتي حتى أني
سعادتي مقابل حريته.. صعب يا عيسى صعب
الخيار كان صعب عليا
و في ليلة سوداء لقيت روحي معاه
الليلة إلي كانوا يسموا فيها ليلة العمر
كانت بالنسبة ليا قهرة العمر
عذاب العمر ..
شفت حاجات غريبة عمره حد ماحكالي عليها
و أصلا من بيحكيلي
لا أم لا أخت لا صديقة متزوجة تحكيلي
لما نضت الصبح كانت كل عظمة فيا توجع
كل عضو في جسمي يتألم
و الوجع هذا قعد في عظامي لتوا حاسة بيه
كل شي فيا يقولي إلي صار غلط
مش هكي الزواج
مش هكي المودة و الرحمة
مش هكي يصير بين المتزوجين
حتى لما جتني الجرأة و حكيتله ثاني يوم قالي أنتي
مازلتي صغيرة و ماتفهميش في الزواج شي
و أني حنعلمك و نوريك المهم تقولي حاضر و بس
سكتت و تحملت
و فاتت أيام و أيام و مقربنيش
مفهمتش علاش لكن أني من داخل مرتاحة
منبيش يصيرلي إلي صارلي هاديكا الليلة
و فات قريب شهر
يدير في تصرفات غريبة
أصحابه من قبل لا نسكروا أسبوع يجو يسهروا عنده
نسمع في ضحكهم يوصل لا عندي في دار النوم
ضحك و كلام غريب و أصوات مكنتش نسمع فيها واضحة و بعد لا يروحو يقعد هوا راقد في المربوعة
لن فات أكثر من شهر
هاديكا الليلة تحديدا وجعها قاعدة نحس فيها
في جسمي
صوت السوط إلي كان يرقا و ينزل على جسمي
لن نزل مني الدم
عنفه معاي
و طلبات كلها ذل و قهر يطلب فيها مني
و ......
و عيسى ضغط عليها بين إيديه و تكلم و دموعه ينزلو
:و رحمة بوك و أمك اسكتي اسكتي)
أماني كانت و كأنها متسمعش فيه كملت
و هيا تبكي بأعلى صوتها :
نبي نحكي .. خليني أرجوك
نبي كلامي إلي ليا أكثر من عشرة سنين
حابساته في صدري نبيه يطلع بالك نرتاح يا عيسى
نبي نحكي على كل مرة يبدأ فيها و مايكملش إلا و أني مغمى عليا
و دمي ينزل مني من كل مكان
و نقعد بعدها بالعشرة أيام مش قادرة نوقف على رجليا
و لا نمشي لحد و لا حد يجيني بش ميشوفش إلي أني عايشاته
لكن تعرف عيسى كنت نقول هذه كلها نيتك
أني كسرت خاطرك و كسرة الخاطر واعرة
و أكيد ربي حياخدلك حقك مني
بعد لا سيبتك بدون منقولك و لا نفهمك
و الله والله وقتها قلت لهالة الله يرحمها ادورلي رقمك
كنت نبي نوصل فيك بأي طريقة بعد لا لقيت رقمك إلي نحفظه مقفل
مع أنها كانت تقولي أماني هذه خيانة لراجلك
أنك تفكري في راجل ثاني
لكن يشهد عليا ربي ماكنت نبي غير نقولك أني نتعذب
أني عايشة في جحيم
أني كنت تاعبة و منهارة بالك قلبك يبرد من تالاي
و معش تدعي عليا
كنت نبي نرتاح
وقتها ماكنتش نبي غير نرتاح
كنت نبي نرتاح بس ..
و الله كنت ندعي لربي ياخذني و يريحني يا عيسى
و انهارت بالبكاء أكثر
و عيسى يبكي زيها و أكثر
باس رأسها بعمق و دموعه ينزلو :
خلاص حرام عليك ارحمي قلبي يا منونتي
قلبي إلي و الله العظيم ماكان يبي غير تكوني سعيدة
حتى لما .....
كان هوا يقولي خليها تعيش
من حقها تعيش مع واحد فلوس و غني
يحققلها كل أحلامها
بتاخدها بفقرك و ظروفك المادية الزفتة
بش تشقيها معاك
مش سادها تيتمت بكري و بعدها وفاة أحمد الله يرحمه
خليها تعيش مرتاحة
و أماني حطت يدها على فمه سكتاته :
عمري ما كنت مرتاحة
الوجع كنت نعيش فيه أضعاف
لكن إلي مهون عليا أنك سافرت بش تحقق حلمك
و تكمل قرايتك
و بعد أيام قعد كل شي باهت في عيوني
فقدت قدرتي على المقاومة و استسلمت
صكرت عليا حوشي و استسلمت
حتى أسيل كنت نشوف فيها مرة كل شهرين
نتصل برحاب نوصي فيها عليها و نصكر
يومي يفوت عادي و آخر الليل يا نعيش
الضرب و الذل و الإهانة
يا يرحمني و يمشي لأصحابه و يخليني
فقدت الرغبة في كل شي
و لما خشيت عالنت نبي نفهم
كل إلي قريته يقولي أنه هذه اسمها سا....دية
العنف في العلاقة الزوجية اسمه سا...دية
يعني هو سا....دي و ميتمتعش غير بالع...نف
و الضرب و الذل
حتى لما عرفت روحي حامل مفرحتش
الخبر كان عاااادي جدا بالنسبة ليا
و كأني كل يوم نحمل
لحد مافي مرة صار شي صدمني
شي شفته بعيوني و ياريتني ما شفته
يومها على أساس بنمشي لحوشنا
هو تبي الحق مش أني إلي قلت بنمشي
هو من الصبح قالي بايت برا و بنرفعك بش متباتيش بروحك
قلت يلا خليني نمشي لأسيل إلي كل يوم تتصل بيا من تليفون رحاب و لا آيات و تقولي تعالي استاحشتك
و لما مشيت خشيت شوية لحوشنا
و بعدين مشيت لحوش عمي محمد ملقيتهمش
كلمت آيات قالتلي مشو لحوش خالهم في طرابلس
و رفعوا أسيل بش يمشوا للبحر
وليت لحوشنا
قعدت حكمات تزن أنهم ماشيين لحوش أختها
قلت لأسعد حطني في حوشي في طريقكم
أول موصلت للباب قعدت نسمع في صوت دوشة
و أحذية رجالية هلبا قدام الباب استغربت
و قلت أكيد أصحابه ساهرين عنده زي عادتهم
فتحت الباب و خشيت لداري طول
و سكرت الباب عليا
لأني متعودة ديما يسهرو في المربوعة
نعست من دون نحس
و مانضتش إلا على أصوات غريبة
جاية من وسط الحوش
قعدت خامدة في مكاني
لكن حاجة تقولي نوضي شوفي شن صاير
بالذات أن الأصوات كانت كأنها....
فتحت الباب و ياريتني ماشفت
ياريتني انعميت
تعرف عيسى و الله لو كان جايب مرا و ....
لكن راجل مع راجل
شفته يا عيسى شفته بعيوني
عمري ماتخيلته يكون شا....ذ و يمارس
في خمره و وسخه مع راجل زيه
ماحسيتش بروحي غير و أني نرجع في مكاني
رجعت لن حسيت بمصاريني بيطلعوا مني
و إلي بعدها كان الموت أهون عليا منه
ضرب من كل مكان
يضرب فيا زي الوحش
و بعدها محسيتش بروحي غير و أني في المستشفى
و الدكتورة تقولي متخافيش كتبت لك تقرير
بأنك تعرضتي للضرب بطريقة وحشية
و أنه بنتي قوية زيني و مازالت تقاوم
مع أنه مازالت في خطر
و ممكن نفقدها في أي لحظة
جيراني هما إلي سمعوا عياطي و أسعفوني
وقتها كأنه عقلي رجعلي يا عيسى
حاجة نفضتني نفض من داخل لبرا
لساني و قلبي دعوا لربي بصدق
لو بنتي عاشت حنعيش على خاطرها
هالة و رحاب و آيات و عمي محمد
حتى أسيل و أميرة وقفوا معاي
قالولي أنه مازال فيه ناس تحبني و تخاف عليا
يستاهلوا نعيش على خاطرهم
و يوم بعد يوم كنت نقوى أكثر
حطيت التراب عالنار بدون لا نطفيها
و هيا تاكل فيا و في قلبي و روحي من داخل
لن جي اليوم إلي واجهته بيه
لو مطلقتنيش حنسلم تقرير الدكتورة للشرطة
و منها معش شفته و لا سمعت عنه شي
حتى لما جي موعد ولادتي أموري تعسرت
شفت الموت قدام عيوني
كأنه ربي يقولي مش كنتي تبي تموتي
و دعيتيلي بش تموتي
شفت أمي و بوي و أحمد و حتى فيروز الله يرحمهم
أمي تقولي تعاليلي بش ترتاحي
و بوي يقولي تعاليلي أني نحميك منه و من غيره
أحمد أعطاني بظهره و عيونه مليانات غضب و لوم
الوحيدة فيروز الله يرحمها إلي كلمتني
طبطبت على يدي و قالتلي لا متمشيش
متخليش بنتك زي ما أني خليت بنتي
متخليش بناتك يا أماني متخليش بناتك
لمن بتخليهم و هما أمانة عندك
و بعدها نضت فتحت عيوني
و الدكتورة تقولي أنه ليا 3 شهور في غيبوبة
من بعد ولادتي بالعملية لأنه صارلي نزيف حاد
و منها نضت
نضت و أول حاجة درتها بعتتله يطلقني بش منفضحاش
منعرفش من وين خطرلي نقوله أني صورته فيديو بتليفوني ليلتها مع صاحبه مع تقرير الدكتورة
و لو مطلقنيش حنفضحه
ثاني يوم مشي طلقني في المحكمة
و عشت لأسيل و بيسان
فتحت الصيدلية و عشت
لكن قلبي إلي كان ميت عليك منساكش
لن شفتك في المطعم أول مرة بعد سنين فراق
و عرفت أني كل هالسنين ماكنتش عايشة
كنت نتنفس و ناكل و نشرب لكن مكنتش عايشة
و عيسى حضنها ليه أكثر و تكلم بحنان:
و لا أني كنت عايش يا حب عمري و لا أني
يوم شفت الحيوان هداكا متهجم عليك في الصيدلية
و أنتي كنتي طايحة و منهارة تمنيت لو كنت قتلته
و ندمت ألف مرة فوق ندمي أني مخديتكش غصبا
عن الكل و غصبا عنك حتى أنتي
و لمت روحي علاش سلمت فيك هكي ببساطة
لمت روحي قبل لا نلومك يا منونتي
أماني لفت بوجهها عليه و باساته بكل حب
قبلة قالت له فيها كل كلام الحب و اللهفة
و الوجع و الألم و الشغف و التملك
قبلة مسحوا فيها كل ذكرياتهم السيئة
قبلة ساخنة مسحت عنهم كل برودة الليالي إلي
عاشوها بعاد عن بعض
و معاها دموع ذرفوها الإثنين
و قلوبهم الملهوفة صاخبة بنبضات وصل صداها لكل الكون
عشاقنا كملوا ليلتهم في أحضان بعض
مع وعود عيسى لأماني بالصبر و التفهم
و هو من داخله عارف أنه أماني تبي وقت طويل بش
تقدر تتجاوز كل الذكريات السيئة
لكن هوا بحبه و حنانه متأكد أنه حينسيها كل هالذكريات
و يقدر يخليها تنصهر معاه في حب ياخدها لعالم مليان حب و شغف و رغبة جارفة
زي رغبته هو فيها و أكثر ❤️
🌿🌿🌿🌿🌿🌿🌿🌿🌿
في نفس الليلة
رحاب لما خشت لسريرها بترقد
لقت محمد راجلها مازال نايض
لما اتكت جنبه سألها :
رقدوا البنات ؟
رحاب : أسيل و أميرة قعدات يهدرزوا ..
و بيسان ناعسة
مسيكينات هالبنيات يا محمد يقطعوا القلب
بالذات أسيل كل منشوفها يوجعني حالها
مع أنها تضحك و تبصر لكن عارفتها ضحكها ضحك شوارب بس .. و القلب الله أعلم قداش معبي بالهم
و هيا مازال صغيرة عالهم ياناري
محمد : ربي إن شاء الله حيعوضها أكيد
توا ربي يرزقها بولد الحلال إلي يعيشها مرتاحة
تكبر و ادير عيلة و صغار و تعيش زي هالناس
ما يدوم حال يا رحاب
رحاب : و أنت خيرك ؟
قاعد تفكر في موضوع الولد إلي جاك اليوم
محمد : شن تحسابيه ساهل الكلام إلي قاله يا غالية
رحاب : عاد جاك في اللحم الحي
أميرة هذه دلوعتك إلي مترضاش فيها دقة الشوكة
محمد : عمرها ما تكبر في عيني
من يومي نشوف فيها البنية الصغيرة الدلوعة
مش عارف كيف بيجي يوم و نعطيها لراجل ثاني
كيف بنتهنى عليها
معقولة بيحبها زي ما أني نحبها
و كيف بيدللها زي ما أني مدللها و نحرث في البحر بش
منقص عليها شي مع أنك عارفة البير و غطاه
أني و حق الله ليلة إلي نشوفها ناقصتها حاجة
الليل ما نقدر نرقده مرتاح لن نقدر نجيبهولها
نحرم في روحي بش هيا ما ينقصها شي
كيف تبيني نعطيها لراجل كيف
رحاب : هوا تبي الحق الموضوع كله أني مش خاشلي رأس
كيف الولد يجيك بروحه و بكل عين قوية
و يقولك نبي بنتك مع أنه أمي و بوي مش موافقين
كيف هكي ماتحشمش منك
شن يحساب بنتنا ملوحة
محمد : ماهو إلي جاني يا رحاب مش ولد
جاني راجل ماشاء الله عليه
راجل عقله يوزن بلاد
راجل طموح و واثق من روحه و واثق في كلامه
و عارف ربي وين حاطه
و أني تعرفيني يا رحاب نظرتي للناس متخيبش
راجل زي هذا يتأمن عالروح
رحاب : لا عاد يا محمد متقوليش أنك اقتنعت بكلامه
حني بنتنا مش رخيصة عندنا بش نعطوهاله هكي
بنتي يجونا رجالة متمسميين و يترجونا نعطوهالهم
و نتشرطوا عليهم بش نوافقوا
محمد : باهي و كان بنتك تبيه؟
مفكرتيش فيها هذه ؟
إلي شفته في عيونه أنه فيه بينه و بين بنتك كلام
افرضي قالت لك حتى أني نبيه و موافقة عليه
شن نديروا بعدين ؟
نسيتي كيف كنا قبل 30 عام فاتوا
افرضي وقتها بوك قالي منبيش نعطيك بنتي
لأنك مش من نفس المدينة
و لا ولد عمها عاطي فيها الكلمة
ممكن أني اليوم لزيت الولد و عصبت عليه
و قتله يا تجيب بوك يا معنديش بناويت للزواج
لكن لما هديت و فكرت كأب يحب بنته و تهمه سعادتها سألت نفسي
لو بوك الله يرحمه موافقش عليا
كيف كنت حنعيش
قداش كنا تعذبنا أني وياك
صح أني وقتها لا كلمتك و لا هدرزت عليك
لكن لما كنت نمشي لبلادكم و نشوف فيك ماشية و مروحة من المعهد إلي تقري فيه
و نشوف في شبحة عيونك ليا نقول هيا هذه رفيقتي
إلي نبي نكمل عمري كله معاها
رحاب: و أني عمري ما تخيلت روحي نكون مرت راجل غيرك
طول عمرك كنت ليا راجل و ظهر و سند
حتى لما مقدرتش نجيبلك الولد و أمك الله يرحمها و خوتك و حتى أصحابك
يزنوا عليك يبوك تتزوج عليا
وقفت لهم و قلت رحاب و بس
عمري ما ندمت أني سيبت عيلتي و بلادي و خديتك
لأنه كنت متأكدة حبك ليا حيخليني سعيدة معاك عمري كله
محمد: و تبيني نحرم بنتي من هالسعادة يا غالية ؟
رحاب: باهي كيف تبيها ترتاح و الولد قالك بلسانه أنه لا أمه و لا بوه موافقين على بنتنا
الوحدة فينا متتزوجش راجل بروحه
تتزوج معاه أمه و بوه و عيلته كلها
كيف تبيني نتهنا عليها معاهم و هما ميبوهاش
بنتك أكيد حتتعب هكي
محمد تنهد : و الله ماني عارف
أهو أني قلتله يمشي في حاله
لكن واجعتني بنتي و كسرة قلبها
رحاب : شن رأيك نقعمزوا معاها و نهدرزوا عليها
و بنتك ماشاء الله عليها عقلها سابق سنها
قعمز فهمها الولد تنساه إلا لو جي هو و عيلته و خطبوها
بنتنا مربيينها من يومها عالعز
و مانرضولهاش تعيش مكسورة مع راجل
مهنا كانت تحبه و تبيه
محمد : هذا إلي ناوي نديره
غدوة إن شاء الله حنهدرز عليها و نفهم منها
بنتي حتى كان تحشمت مني و ما تكلمتش
أني من عيونها نقدر نفهم هيا شن تبي و شن تحب
رحاب : خلاص يا غالي ارقد و ارتاح و الصباح رباح
محمد : أني عارف روحي
مش حنرتاح لن نزوجها إلي يهنيني عليها
و يكرمها و يعزها زي ما كانت عايشة في حوشي و أكثر
لكن على قولتك الصباح رباح
تصبحي على خير يا غالية
رحاب : تصبح و تربح إن شاء الله
🌿🌿🌿🌿🌿🌿🌿🌿🌿🌿
و في الدار إلي جنبهم وين ماكانوا أسيل و أميرة يهدرزوا
و الأخيرة كان باين عليها الضيق و القلق
و أسيل كانت تحاول تواسيها :
معليشي يا ميرو الغايب عذره معاه
مش كتب لك مشغول و غدوة بيجيك في الكلية
و قالك متخشيش لمحاضرتك لأنه جايك بكري
يعني حاله باهي و مفيش سو إن شاء الله
أميرة : بمسج عالواتس يا سيلا
لا كلمني و لا دورني و لا رد على مكالماتي
واضح فيه حاجة صايرة معاه
أسيل : حتى ولو يا ميرو حتى لو صايرة معاه حاجة
يا خبر اليوم بفلوس
غدوة الصبح بكري يبدأ بالبلاش
أميرة: ماهو تعرفيني قداش بديت متحسسة
من لما صارت له قصة السحر و أني بديت نخاف
كل ما يتغير عليا شوية و لا يرد عليا اشبح كيف
نقول أكيد السحر تجدد و بيولي لحالته الأولى
معش نبي وجع قلب ثاني يا سيلا
و الله معاد قلبي متحمل وجع و لا قهرة ثانية
أسيل تنهدت : ربي يبعد عليك وجع القلب
أنتي تفائلي خير يا ميرو بس
بعون الله مش حيصير إلا كل خير
و بعدين جابر قالك أنه راد باله كويس
و منتبه للقطات إلي حذره منهم الشيخ إلي عالجه
أمالا أني شن تقولي عليا يا ميرو
حالي المايل شي مقالش نتعدل بكل
كل منقول بنعيش زي الناس تتصكر في وجهي من كل تركينة
حتى لما زعميتني بنولي نحب و ننحب زي البنات
و أني من قصة لقصة
و آخرها يقولي فيه موضوع مهم بنجيك يوم الثلاثاء نحكيهولك
أهو على إلي صاير مع بنت عمته سيب خدمته كلها
و رجع لعيلته و لا صار من جية و لا هم
و أني كل منفكر في الموضوع قلبي ياكلني
و أنتي تعرفيني قلبي كل ماياكلني
معناها بتصير مصيبة
آاااااه و خلاص
نوضي نوضي اطفي الضي خلي نتمرقدوا
أنتي عالأقل تراجي في غدوة الصبح و أهو قريب يجي
صاحبتك تراجي في حاجة في علم الغيب
لا عارفة لا شن هيا و لا أمتى بنعرفها
كل إلي حاسة بيه أني بنتعب تعب مايعلم بيه إلا الله
و زيديها عمتك فيروز الأيامات هذه
كل ليلة تجيني بشكل
و عمرها ما جتني جية تريح القلب
و كل مرة تنوضيني يا داهشة
يا قالبة الدنيا بعياطاتي لن صوتي يريح
أميرة : على قولتك خلي انوضوا نرقدوا
و بإذن الله خير
تصبحي على خير
أسيل : بالله عليك شوفي بيسو ساويلها بطانيتها
تصبحي على خير
و رقدوا الإثنين و كل وحدة فيهم عقلها مليان أفكار
مخوفتها و خلت ليلتها كلها تفوت في تخميم و قلق
و لا أسيل اتصل بيها رعد قبل لا ترقد زي ما وعدها لما اتصلت بيه العشية
و قاللها كلمتين و أنهى المكالمة
و لا أميرة جابر رد على مكالماتها و مسجاتها
و لا طمنها عليه و ريحلها بالها
و ياليل شن يجيبه صبحك
🌿🌿🌿🌿🌿🌿🌿🌿🌿🌿
يوم الثلاثاء
الساعة 8:35 صباحا
منصور و فاروق و فيصل رزق الله مقعمزين
في مقهى إفطار صباحي جنب المستشفى إلي راقدة فيه سمر
بعد لا طلبوا فطور خفيف فاروق هو إلي بدي بالكلام
: اسمع يا ولد سيدي
أمس عدا في أمس تمام ؟؟
و توا نحنا أولاد اليوم
أنت عطيتني بنتك و نهار حطيت إيدي في إيدك
و قرينا فاتحتهم قتلك حتقعد كيف
بناتي بالضبط
و أعتقد أني كنت قد كلمتي و وعدي
عشان هكي يا ولد سيدي أنا توا
طالب يد بنتك سمر تقعد بنتي
كيفها كيف صفاء و رواسي و رغدة
أنا قبل هكي ما دويت لأني عارف
أنك ماتبي تقعد عيل بعد عطيت كلمة للعيلة الأخرين
بس بعد فضيت كل شي بينكم أنا نبي
نخطب منك سمر لولدي رائد
عارف بتقول رائد كبير واجد على سمر
بس أنا نبي نقولك نحنا عطيناك أختنا و بينكم 15 عام
و قلنا ولد سيدنا و مفيش برانية
و لو على أنه عنده بنت
فأنت تعرف مضبوط أنه رهف تحب سمر
و متعلقة بيها واجد
هذا غير أنه رائد جايبلها مربية دوبها دوب بنته
يعني سمر حتعيش معززة مكرمة
و خودها مني أنا كلمة عمرها لا تنهان و لا تنضام
منصور : أنا توا مانبي غير سمر تفيق و تصبي على كرعيها
فيصل : لا عاد يا ولد سيدي
افتح فمك بالخير سمر بعون الله حتصبي على كرعيها
صح الدكاترة قالوا الموضوع حياخذ وقت بس حتصبي
و حترجع قوية
و بعدين ولد خوي قالها ليا حرفيا
هيا تفيق بس و أنا حنكون رجليها إلي تصبي عليهم
فرحنا يا ولد سيدي
سادنا حزن و خوف ..
البنت غاوية الولد ليش نحرموهم من بعض
وبعدين من حقنا نذكروك
كيف ما صبينا معاك لما طلبت بنتنا
حقنا تصبي معانا بعد طلبنا بنتك
و لا ناسي أنه سمر بنتنا ..
المفروض ما نقعدوا نترجوك توافق يا منصور
و منصور رشف من قهوته و تكلم :
كيف ما قلتوا البنت بنتكم
و مادام طلبتوها مني مستحيل نردكم
أنا و الله العلي العظيم ما نبي غير سعادتها
تفيق و تصبي كيف قبل و أنا نجيبها ليكم بدبشها
فاروق : لااااا بنتنا بعون الله حتصح و أنا نديرلها
فرح كيف فرح أختها و أحسن
و تنزف زفة تقعد حكاوي يحكوها آل رزق الله
سنين و سنين
فيصل: خلاص بعد نعدوا للمستشفى و نخبروا رائد
الراجل بينجن خلينا نفرحوه و نفرحوا العيلة معانا
و بعون الله حتقعد سمر كويسة
منصور : يارب العالمين اشفيها أنا و الله ما نبي شي غير ربي يتمم شفاها و نشوفها مستورة عند راجل يحفظها و يصونها
فاروق: بعدين من كيفك يا ولد سيدي بناتك الإثنين يقعد عمهن هو نفسه خالهن إلي حيقعد مضلل عليهن
طول ما رب العالمين عاطيني عمر
منصور : طول العمر ليك إن شاء الله
🌿🌿🌿🌿🌿🌿🌿🌿
الساعة 8:50 صباحا
في المستشفى إلي راقدة فيه سمر
صوت دقات خفيفة على باب الدار إلي راقدة فيها
فيقت فريحة من نومها
خشت بعدها صفاء بعد لا فتحت الباب و تكلمت بهدوء:
صباح الخير ماما
فريحة إلي متكية عالكنبة ناضت قعمزت:
صباح الخير حبيبتي.. جيتي بدري
صفاء : ماقدرت نصبر عشان نطمن عليكم
كيفها اليوم ؟ مازالت ما فاقت ؟
فريحة : امبارح فاقت توجعت واجد قطعت كبدي عليها
لما شافها الدكتور عطاها مسكن قوي
بش تقدر ترقد و ترتاح
المسكينة بكت واجد و تألمت لعند راحت في النوم
صفاء : ربي يشافيها و يخفف ألمها يارب
ماما صبي عدي للحمام عشان تغسلي وجهك و تصحصحي..
و رائد برا يبي يخش عليها يشوفها
فريحة ناضت وقفت و تنهدت تنهيدة وجع :
مسيكين وليدي قعد طول الليل خاش طالع علينا
بعد قعدت تبكي و تتوجع قريب انجن
ماباش يطلع من هنا لا عند نعست
أصريت عليه يروح ينعس في فراشه بس هو رفض
صفاء : هوا راحته معاها يا ماما
الباين كلنا ظلمناه واجد بعد أصرينا عليه يسيبها
خشي أنتي للتواليت و أنا حنطلع اناديه
خلي يشوفها قبل يجي بابا
فريحة ناضت وقفت : تمام عدي
صفاء طلعت لقت رائد واقف جنب رضا
و ملامحه باين عليها التعب والإرهاق
تكلمت بشفقة و هدوء: تعال يا رائد ماما فاقت
رائد تحرك بلهفة خش للدار
و رضا إلي قرب من صفاء :
و سمر كيف حالها؟
صفاء: مازالت ناعسة ماما قالت أنها فاقت في الليل
بس الدكتور عطاها مسكن ردت نعست
رضا : خبرني رائد.. طهور إن شاء الله
صفاء : اللهم آمين
رضا : تعالي حبيبتي قعمزي ارتاحي
أنتي لكي يومين مصبية و جسمك محتاج راحة
و في الدار لما خش رائد شاف سمر راقدة على بطنها
نزل على ركبيه مقابل وجهها و طبس باس جبينها بحب
و تكلم بصوت دافي و حنون :
بنيتي السمحة ليش هكي تعذبي فيا معاك يا غلاتي
فيقي يا عمري و رب الكون حياتي ظلام بدونك
فيقي غلاتي و أنا نوعدك نطلعوا من هنا
و نطير بيك لآخر حدود الكون
و مافيش مخلوق يفرق بيننا
لا باتك و لا جدي و لا أي مخلوق
مورتي يا قلبي فيقي حرام عليك
قلبي قاعد يذوب و متوجع لوجعك يا عمري
فيقي و أنا نوعدك تكوني مراتي على طول
و لو من قال لا مش حنعدل عليه
فيقي بنيتي هيا
خلينا نعدوا لحوشنا أنا و أنتي و رهف بس
و خوذيها كلمة مني نقعد كل شي في دنيتك
يا كل دنيتي
هيا مورتي يا نبض قلبي سألتك بمن خلق حبك في قلبي
تفيقي راني ميت بلاك يا عمري كله
و الدموع من العين فاضت و الوجع وصل لمنتهاه
طبس غمر رأسه جنب رأسها و يأخذ في شهيق و زفير
قوي من ريحتها إلي أدمنها
و صوت بكاه وصل لفريحة إلي طلعت من الحمام
و جت قعمزت عالأرض جنبه و حطت يدها على كتفه
و تكلمت و هيا تبكي :
حتفيق يا رائد بنتي قوية و حتقعد قوية بحبك ليها صدقني
حتفيق و حتعيشوا مبسوطين
و رائد قام رأسه و حطه على صدر عمته و هو يبكي زي البيبي : نبيها يا عمتي نبيها
نحبها و الله و الله نحبها
ريحي قلبي يا فريحة أرجوك
أعطيها ليا و أنا نوعدك نقعد ليها باتها و أمها و هلها كلهم
أعطيها ليا و أنا نقعد لها رجليها إلي تصبي عليهم و ظهرها إلي حيقعد سند ليها لآخر العمر
أعطيها ليا يا فريحة راني بلاها ميت
و فريحة تبكي معاه و تكلمت بنبرة حزن :
حاضر يا رائد حاضر😭😭
و جنبهم كانت سمر إلي بين نوم وصحوة تسمع في كلامهم بقلبها الهايم في حب رائد
لكن تأثير المسكن مخليها مش قادرة تحرك لسانها
و لا تفتح عيونها
🌿🌿🌿🌿🌿🌿🌿🌿🌿🌿
الساعة 9:20 صباحا
كلية الطب البشري
أميرة و لأول مرة من لما خشت للكلية
تغيب عن محاضرة
كانت مقعمزة في جردينة الكلية تستنى في جابر
بناء على طلبه و هيا الأفكار بتأكل رأسها
شن الموضوع إلي يبيها فيه جابر و طلب منها تستناه
و الخوف معبي قلبها و الخوف باين في عيونها
: صباح الورد
أميرة نهضت عيونها بفرح و قلبها رفرف أول ماشافاته :
صباح النور
جابر قعمز مقابلها و حروفه مليانة شغف :
قداش كانت عندي نعمة و أني مش مقدرها
و أميرة تشوف له بعدم فهم
جابر : شوفت وجه الغزال الصبح بكري حاجة حلوة
للشلاتيت غر أني كنت مفوتها عليا
لكن هاه ديري في بالك أني إنسان نزبط مليح
حاجة زي هذه معش تفوتني
لذلك ديري في حسابك كل يوم نجيك بكري قبل وقت محاضراتك بش نتصبح بوجه الغزال
أميرة : خيرك جابر مريض ؟
من أمتى تقول فيها للشلاتيت هذه ؟
و لا الثانية شن هيا ؟ وجه الغزال ؟
شن صاير معاك ؟
جابر : هذا يا أميرتي يا سنفورتي يا غزالتي
مشيت لبوك أمس
و بلا فخر طردني شر طردة
أميرة خبطت خدها خبطة خفيفة :
حيه عليا يا جابر
شن تقول أنت
أمتى مشيتله ؟ ووين ؟ خيرك مقتليش؟
فهمني جابر بالله عليك
كيف صار هكي ؟
جابر : أصبري بس نفهمك
هذا يا أميرتي مشيتله أمس لحوشكم
و لوسط مربوعتكم
هوا أني عبيت روحي بالريحة إلي أنتي تحبيها
غر شكلك أنتي مخشيتيش للمربوعة أمس
المهم بلا طول سيرة
قتله يا حاج محمد نبي بنتك و كريمتك أميرة على سنة الله ورسوله
و من الأخير هكي بوي ميبيش و لا حتى أمي
لكن أني بنتك شاريها و مستعد نعطيك فيها دم قلبي
مهر ليها
و واخذها يعني واخذها
تبي و لا متبيش واخذها
غصبا عن أمي و بوي و غصبا عنك شخصيا
طبعا منبيش نحكيلك الشبحة كيف
خارق حارق يا أميرتي
لكن أني عاد جابر الرايق و لاااااا دورت
قعدت نحكيله في حكايتي من يوم جابتني أمي
و على شن ناوي بالتفصيل
بنسافر نكمل برا على حساب الدولة
و بنرفعك معاي تكملي طب غادي
و قتله من الأخير أني غادي احتمال نغسل اماعين
في المطاعم بش نصرف عليها و عليا
لكن أني راهو رافعك معاي يعني رافعك معاي
ليه عندي نروح بيك دكتووووورة قدددددد الدنيا
و أميرة طول ما هوا يتكلم كانت تشوفله
بفخر و حب و إعجاب
و عيونها يلمعوا بدموع عشق لجابر
: معقول جابر هكي قلت لبابا
جابر : إيه و علاش مستغربة
ماهو متجيش يضيقوها عليا و هيا واسعة
أني غيرك أنتي مش واخد خوديها و لا خليها
أميرة: باهي بابا شن قالك ؟
جابر : اسمعي هوا تبي الحق من كيف قعد يسمع
فيا أني تشجعت
هوا في الأول ناقص غر الضرب مضربنيش
لكن أني عاد قعدت نهدرز فيه و نلود عليه لن قعد
يأخد و يعطي معاي
و صح آخر شي رست على أنه قالي بمنتهى الأدب
يا جيب بوك معاك يا معنديش بنات للزواج
لكن أني مستحيل نفقد الأمل
أميرتي ليا و مانيش مسلم فيك لو شن مايصير
أميرة بحب : و أني ليك حبيبي
و عمري ما حنرضا نكون لغيرك
ممكن بابا ميرضاش يعطيني ليك من غير ما تجي عيلتك معاك
لكن مستحيل يزوجني لحد غصبا عني
جابر : خلاص يا حبوبتي
أني و الله مانبي نسمع إلا هالكلام
و أمس مابيتش نرد عليك بش نجي نسمع الكلام و أني عيوني في عيونك يا عيوني أنتي
أميرة: ربي يخليك ليا يا جابر و مايحرمنيش منك
جابر : و لا يحرمني منك شن رأيك بعد لا نمشوا نفطروا
حاجة نشر......
: أميرة
و الإثنين شافوا للجهة إلي جي منها الصوت
و أميرة أول من تكلمت : بابا
و ناضوا وقفوا الإثنين
محمد بدون لا يقرب منهم أكثر تكلم بهدوء :
جيبي شيتاتك و كتاباتك و ألحقيني بنروحوا
و جابر قرب منه و تكلم بتوسل:
عمي محمد بالله عليك خليني نفهمك
محمد و عيونه على بنته :
كلامي مش معاك أني ملياش سلطة عليك أنت حر في تصرفاتك
كلامي مع بنتي إلي الباين أني معرفتش نربيها
و مش هني .. لينا حوش نتكلموا فيه
دقيقة و نلقاك جنبي في السيارة
و أعطاهم بظهره و مشي لسيارته
أما أميرة إلي كانت حاسة أنه قلبها بيوقف من الخوف
و تمنت الأرض تنشق و تبلعها و لا أنه بوها يشوفها
في لقطة زي هذه
لمت شيتاتها و هيا تحاول متبكيش
لكن جابر وقف مقابلها و تكلم بثقة
: متخافيش يا حبي مستحيل نسيبك لحظة
المهم أنتي خليك على كلامك و وعدك ليا باهي حبي ؟
و أميرة هزت رأسها إيجابا و تحركت بسرعة للسيارة
و هيا حاسة روحها بتطيح من كثر الإرتباك و الخوف
🌿🌿🌿🌿🌿🌿🌿🌿🌿🌿
و فاتت ساعات اليوم كلها كئيبة بشكل غريب
آل رزق الله كلهم كانوا مشغولين على سمر
إلي مازالت مفاقتش من تأثير المسكن بشكل كامل
و الدكتور خايف عليها من حالتها النفسية
لأنها واضح أنها تهرب من إلي الخوف و الرعب إلي عاشاته بالنوم
أهلها كلهم كانوا خايفين عليها
و خاصة أنه التأخير في العملية الجراحية مش لصالحها نهائيا
رعد طول الوقت كان يتهرب من أسيل و مكالماتها
و مسجاتها .. المفروض اليوم يكون ماشيلها و حاكيلها على الموضوع إلي داسه عليها
لكن الباين أن أسيل مقدر ليها أنها تعرف الموضوع
بطريقة ثانية و من أشخاص ثانيين
رائد إلي كان حاس روحه واقف على الجمر
من كثر خوفه على سمر
حادث اختطاف زي هذا مستحيل
يمر مرور الكرام عند إنسانة عاطفية و حساسة
زي سمر
يعني إلي صارلها أكيد حيخلي آثار نفسية عليها
هذا عدا عن الآثار الجسمية و إصابتها في العمود الفقري
و أكثر المتأثرين بلي صاير الحاج رضوان
إلي صار لسمر خلاه مضطر يعيد التفكير في هلبااااا قرارات اتخذها و منهم زواج رائد و سمر
بالذات بعد لا شاف عمة حفيدته أماني جاية تزور في فريحة
و تطمن منها على أحوال سمر
و الإستقبال الحار إلي استقبلتهولها الحاجة نجمة
و فريحة و صفاء إلي كانوا من ضمن المتواجدات لما أماني زارتهم
🌿🌿🌿🌿🌿🌿🌿🌿🌿
ليلا
الساعة 9:45
في مزرعة رعد
عيسى قرب من أماني إلي مقعمزة تتفرج على المطر
و شاد في يده طاستين Hot chocolate 🍫 😋
: حب عمري تسمحلي نشاركها التقعميزة الحلوة هذه
أماني : أكيد يا قلبي تعالى جنبي
عيسى قرب حط الطاستين على حافة الصالون
و قعمز جنبها و قامها من وسطها قعمزها على رجليه
: تعرفي أني حاس بروحي قاعد في حلم
حلم عمري ما نتمنى أنه يكمل لو شن مايصير
أماني باساته بوسة خفيفة :
مش حلم يا عمري
حقيقة ربي عوضنا بيها بعد صبر سنين
عيسى : الحمد لله رب العالمين
أني ناوي بعون الله أول منروحوا حنذبح زوز خرفان
و حنوزعهم على كم حوش نعرفهم حالتهم المادية على قد حالهم و مياكلوش في اللحم إلا من العيد للعيد
لأني مؤمن بكلام ربي (و لئن شكرتم لأزيدنكم)
و أني بصراحة نبي ربي يزيدني عمر على عمري
بش نقدر نوصلك كل الحب إلي في قلبي
أماني و عيونها مليانات بلمعة عشق :
أني المهم عندي تقعد جنبي و تحبني بس
تعرف عيسى خايفة هلبا من مرواحتنا
كل منفكر أني لما بنروحوا ب....
و سكتت و نزلت رأسها و قعدت تبكي
و عيسى لف وجهها ليه
و قعد يمسح في دموعها بحنان :
لا يا حب عمري لا
معقولة نبكيك كل ليلة في أول أيام لينا مع بعض
مع أنه المفروض حني في شهر العسل
و أني ندعي في ربي في كل وقت أنه نقدر نخلي
كل أيامنا كلها عسل يا عسل أنتي ❤️
أماني باساته على خده و تكلمت برجاء :
بالله عليك ياعيسي لما نروحوا ما تتغير عليا
أرجوك حبيبي و الله منقدر نتحمل لحظة تبعد فيها عني
عيسى ضمها لقلبه :
أني مش حنقولك شي
لكن حنخلي الأيام تثبتلك أنه عيسى
إلي ميت على تراب رجليك مفيش حاجة في الكون
ممكن تغيره عليك
أماني ابتسمت من قلبها :
و أني واثقة منك يا عيسى
أني سلمتك روحي و قلبي و كلي و عارفة
أنك حتكون قد الأمانة
عيسى : قوليلي بكري نسمع فيك تتكلمي
اتصلتي بأسيل ؟
أماني : لا لا هذه رحاب قلتلها متقولش للبنات أني
غدوة مروحة نبيها مفاجأة
عيسى : يا متع المفاجآت أنتي
أماني : حاسة روحي تقول ليا سنة بعيدة عليهم
من كثر ما مستاحشتهم
عيسى : طبيعي منونتي أنتي مش متعودة تباتي بعيدة عليهم و لا تغيبي عليهم أكثر من الساعات
إلي تقعدي فيها في خدمتك
أكيد حتستاحشيهم
لكن غدوة إن شاء الله تروحي لهم
أصلا أني إلي المفروض نقولك متتغيريش عليا لما
نروحوا و تنسيني
أماني : ننسى نفسي و ما ننساكش يا عيسى
أني منسيتكش لما كنت غايب و بعيد عليا
بننساك و أنت قريب مني و راجلي
عيسى باس شفايفها بوسة حللللوة :
الله الله محلاها كلمة راجلي يا ناس عسللللل
أماني : نحبك عيسى ❤️
عيسى : نحبك يا حب عمر عيسى
و كملوا ليلتهم كلها حب و غرام و هيام
صح أماني مازال ماقدرتش تتخطى العذاب إلي عاشاته
في زواجها الأول
و خاصة في موضوع علاقتهم الحميمة
لكن عيسى كان مقرر يوسع باله معاها
و يعطيها فرصة تنسى أي ذكرى مؤلمة عاشتها
و يحولهالها لذكرى حلوة تجمعهم في حب و انسجام و متعة و تفاهم
🌿🌿🌿🌿🌿🌿🌿🌿🌿
الساعة 11:45
في ساحة المستشفى وين ماكان رعد واقف يدخن
و جنبه رضا
قرب منهم رائد : مازال ماعديتوا
رعد : أنا كنت حنركب السيارة عندي مكالمة ضروري
نكملها و حنخش جوا نقعد جنبك
رضا حيخش يشيل صفاء و يعدوا عشان ترتاح
المسكينة من الصبح بدري قاعدة هنا
رائد تنهد : كل ما يعدي الوقت نخاف أكثر
سمر لو مادارت العملية من هنا لعند يومين وضعها حيقعد أصعب
و احتمال ترجع تمشي على رجليها حيكون محتاج
لجراحات و دوة واجدة
سريب له أول و مالاش آخر
رعد طبطب على كتفه: خير .. إن شاء الله خير
خليها على الله بس و كل شي حيكون أحسن
سمر محتاجة كلنا نصبوا جنبها و ندعموها
الدكتور قال أنه أهم شي بالنسبة لحالتها
أنه نفسيتها تقعد مرتاحة
و بعدين متنساش كلام عمي فيصل إلي أكدلك أنه عمي منصور يستنى في سمر تفيق و تتحسن و حيوافق على
خطوبتكم و زواجكم
رضا: كلام رعد مزبوط أنت لازم تقعد قوي و متماسك
عشان لما تفيق سمر تقويها
و تساعدها تتجاوز المحنة إلي أنتم فيها
رعد : أنا ماشي للسيارة عندي مكالمة نكملها و نخش جوا
رضا : و أنا خاش نحاول نقنع عمتي فريحة تروح عشان ترتاح في فراشها
و الصبح بدري نجيبها هنا مع صفاء
رائد : و أنا حنتصل بمربية رهف نسألها
رهف نعست و لا مازال
رعد لما ركب سيارته تكا رأسه على ظهر كرسيه
كان حاس بتعب و إرهاق
دماغه كان حيتفجر من كثر التفكير
من جهة مكالمات سليمان إلي بدت الصبح
و إلي بلغه فيها بتحركات مريبة ليها علاقة بصالح العابد
لكن للأسف لحد هاللحظة مقدروش يعرفوا هو على شن ناوي و لا شن مخطط
و من جهة منذر إلي مقدروش يعرفوا وين اختفي
بعد لا لقو السيارة إلي كان راكب فيها هو و صاحبه
مركونة في مكان بعيد و هما مليهمش أي أثر
و من جهة أسيل إلي مش عارف شن يقوللها و لا كيف
حيوضحلها سبب تباعده عليها الأيام الأخيرة
و لا عارف يمشيلها يحكيلها على إلي داسه عليها
و لا عارف يقعد جنب خوته و عيلته إلي هما توا في
أمس الحاجة لوقفتهم جنبه
و بالذات بعد لا سليمان نبه عليه ميطلعش من مدينته
تحسبا لأي كمين ناصبهوله صالح العابد
بعد تحركاته المخيفة و المشبوهة و إلي مش عارفين شن نيتها بالضبط
تنهد بثقل و فتح تليفونه على آخر مسج واصله من أسيل
بعتتهوله قبل نص ساعة :
(رعد معقولة هكي مخليني
علاش حاساتك داس عليا حاجة كبيرة
قولهالي بالله عليك حتى في رسالة
بما أنه ظروفك متسمحلكش تجي تحكيهالي
رعد صدقني لو سمعتها من غيرك و لا طلعت تكذب عليا في حاجة عمري محنسامحك
رعد بالله عليك طمني عليك
علاش تشوف في مسجاتي و متردش عليا)
و رعد كان حاس بألم فظيع في قلبه
غمض عيونه بقوة و طفى شاشة تليفونه
و هو مش قادر يرد عليها
لأنه كان خايف لو رد عليها يضعف و يمشيلها
و هالتصرف في هالوقت تحديدا ممكن يكون فيه ضرر على أسيل أو فيه خطر عليها من صالح العابد
و هذا طبعا بعد تحذيرات سليمان ليه
بعد تحركات صالح العابد المريبة
🌿🌿🌿🌿🌿🌿🌿🌿🌿🌿
و فاتت ساعات الليل بإيقاع غريب
هادئ و ساكن بعد ساعات من أمطار غزيرة
و ريح قوية و طقس باااارد
هادئ و ساكن و مخيف..
مخيف لأنه الليل بسكونه
و هدوءه
و ممكن زي ما يقولوا الهدوء الذي يسبق العاصفة
يوم الإربعاء 22 فبراير
الساعة 12:40 ظهرا
عيسى و أماني كانوا في السيارة مروحين لمدينتهم
بعد لا سلموا مفتاح المزرعة لرعد و سلموا عليه
و هما في الطريق و يهدرزوا شرين تليفون عيسى
نقص في صوت الأغاني إلي مشغلها في السيارة
و فتح الخط : أيوة يا صديقي
و سليمان تكلم بصوت باين فيه التوتر :
وين وصلت عيسى ؟
عيسى استغرب في سليمان لأنه لا صبح عليه
و لا سأله عن حاله
: مازال حاجة نص ساعة بالكثير و نوصل
سليمان: عيسى أول ما وصلت البوابة لحقاتك سيارة حراسة كانت تستنى فيكم
و عيسى تلفت لأماني إلي كانت شبه ناعسة جنبه :
علاش خيركم شن صاير ؟
سليمان: اسمع منبيش نكذب عليك الموضوع مش خير بكل
لكن رد بالك تخلي مرتك جنبك تركز
و أول ما توصل نفهمك
عيسى حتى هوا توتر : أدوي يا راجل ؟
سليمان : أسيل بنت خو مرتك انخطفت
و عيسى تكلم بصوت عالي:
تي شن تقول يا راجل ؟
سليمان : عيسى أهدى مفيش داعي عمتها تحس بشي
أوصل على خير و نهدرزوا
البنت فيه سيارة قامتها من طريق مستخطية
الله أعلم شن كانت ماشية ادير غادي بروحها
لكن عالأغلب اشبح كيف مستدرجينها
و الحارس إلي حاطه رعد مختفي و مش
عارفين وينه
عيسى خبط الستيرسو بيده
و عيط بصوت عالي: لاحول ولا قوة الا بالله
لا حول ولا قوة إلا بالله
كيف صار هكي بس ؟
سليمان: عيسى هدي روحك تربح
أوصل على خير و نهدرزوا
رد بالك على روحك
و حاول متخليش المدام تنتبه لن نفهموا القصة بالضبط
سلام توا
أماني بقلق : خيرك حبيبي علاش تعيط
و عيسى زفر بقوة بش يهدي روحه:
مريض دايرله عملية قبل العرس
كنت نتابع في حالته بالتليفون
أمس بس كان وضعه مستقر و حاله باهي
اليوم قالولي أنه مات
أماني بشك : إلي كان يكلم فيك سليمان صاحبك
شن علاقته بالمريض؟
عيسى تلخبط : ماهو..احم
المريض جارهم هذا علاش كلمني
و أماني شافتله بعدم اقتناع : الله يرحمه و يغفر له
🌿🌿🌿🌿🌿🌿🌿🌿
يتبع ✍️✍️
كل سنة و أنتم بألف خير غالياتي و ماساتي
الجزء طويل بجزئين
معش حنتكلم عن التأخير لأنه صدقا فوق من إرادتي
ادعموني بتصويتكم بنجمة ⭐️
و تعليقاتكم
شن قصة خطف أسيل ؟؟
و شن مازال بيصير من أحداث
حني في الأجزاء الأخيرة
و هذه بعون الله حتكون آخر رواية ليا
انزلها بالطريقة هذه
رواياتي الجاية بعد لا نكتبهم و نراجعهم حنبدأ
في نشرهم تجنبا للتعليقات المحبطة و السلبية
رجاء صوتوا على كل الأجزاء إلي مصوتتوش عليها
نتمنى كل الأجزاء توصل لأكثر من 300 تصويت
و طامعة في كرمكم و تشجيعكم
نحبكم في الله ❤️
Masa💎💎