الجزء الخمسون
يوم السبت 28 يناير
في مكتب صالح العابد
الإحتياطات الأمنية كانت على أعلى مستوى
و لأنه يوم السبت و الشركة مكانش فيها موظفين
غير فتحي و طاقم الحراسة
و لو شفنا مكتب صالح العابد حنلقوا المشهد كالتالي
صالح وراء مكتبه
و في الكراسي المقابلة فوزي و عصام
و فتحي إلي واقف مقابل الباشا متعه و مركز
على كل ردة فعل لفوزي و عصام
الإثنين فوزي و عصام كانوا يسمعوا بس
و هما مازالو مذهولين من المبلغ الخرافي
إلي حيعطيعم صالح العابد نصه في حال وافقوا على مهمتهم .. و نصه بعد التنفيذ
و أكيد مبلغ من ستة أصفار ميقدرش إنسان معنداش
لا ذمة و لا ضمير يقول عليه لا أو يرفضه
بعد لا كمل صالح شرح خطته أضاف جمل أخيرة:
و بهكي أني نوصل للي نبيه
و أنتم الإثنين كذلك
و فوق من هكي تفتوفة باهية
سأل فوزي باهتمام :
باهي أمتى التنفيذ ؟؟
صالح :مازال مجاش الوقت المناسب
و تعليماتي حتوصلكم في وقتها
و طبعا تواصلكم كله مع فتحي هو حينقللكم
تعليماتي إلي لازم تتنفذ بالحرف الواحد بدون غلط
بش تستاهلوا المبلغ كله
و لو شميت ريحة غدر من واحد فيكم تقدروا تعتبروها
آخر لحظة ليكم في الدنيا
فوزي و عصام قعدوا ساكتين و خايفين من تهديد صالح العابد الصريح
فتحي : شن يا تريس مسمعتش رأيكم؟
فوزي : أني معاك مادام في الأخير
بنرد بنتي و أمها لحوشي أني تحت أوامر صالح باشا
عصام : و أني الباشا من قبل و توا
هوا ولي نعمتي و كلامه سيف على رقبتي
صالح : زينك كلام
فتحي أعطيهم نصيبهم
قرب منهم فتحي مد لكل واحد فيهم
شنطة فيها مبلغ عمرهم الإثنين ما حلموا بربعه
و صالح أشر لفتحي و هو فهم عليه
🌿🌿🌿🌿🌿🌿🌿🌿🌿🌿
في مكالمة فيديو بين صابرين و أيوب
: معقولة حبيبي تقعد الوقت هذا كله مسافر و ماادورنيش بكل معقولة
متقولش صابرين ينشغل بالها عليك
و تفكر شن صاير معاك و أنت مصكر النت
و مش عارفة كيف نقدر نكلمك
أيوب : معليشي يا بيبي مش مني من لما وصلت و أني
عالق و غطست لا وداني في الخدمة
معش لحقت نأخذ نفس بكل
صابرين : خلاص حبيبي سماح هالمرة
مدامك انشغلت في خدمتك
لكن توعدني معش تعاودها
و توا قولي أمتى ناوي تروح؟
أيوب : منعرفش بالضبط أمتى بنروح لكن موضوعي مازال مطول خليني نكمل خدمتي إلي سيبتها في جرتك
قريب فلست و معش لقيت من وين نصرف
صابرين : تمام حبيبي ربي يعاونك
حيييييييه يا حبي قريب نسيت في شنو نبيك
كنت بنهبل و نقولك شنو صاير معاي ؟
هذا مش عيسى جاني و قالي يبي يتزوج أماني
إلي كانت خطيبته زمان
هوا أني أصلا عارفاته كان مش توفت خالته راهو
تزوجها بكري قداش ليه
لكن جت حالة الوفاة و مشيته لسرت معش لقي وقت
و توا شكله رتب أموره و أوراقه و يبي يتزوجها
أيوب : و أنتي شن قلتيله؟
صابرين: هوا خيرني يا نقعد مرته و على ذمته
و على أساس يحاول يعدل بيننا
و لا يطلقني و يعطيني حقوقي كاملة
متأخري و ذهبي و سيارتي كلهم نرفعهم معاي
و بصراحة جت لعندي نبي خلااااص نفتك منه
نكمل عدتي و أنت تجي تخطبني و نتزوجوا
و معش نخافوا من شي
شفت كيف جت لا عندنا يا حبي
و أني قداش ليا خايفة كيف بيصير فينا و كيف بنقوله
أني نبي نطلق و أصلا كيف بنقنع عيلتي
و شن السبب إلي بنقولهولهم
أيوب سمعتني شن قلت ؟؟
أيوب حبيبي
أيوب : معاك معاك يا بيبي
صابرين: خيرك وجهك تغير حسيتك مفرحتش بكلامي
أيوب : لا كيف يا بيبي مفرحتش
فرحت و فرحت هلبا ثاني
لكن أني فكرت في حاجة شكلها كانت فايتاتك
أفرضي اطلقتي
صابرين أني كيف كنت نقولك وضعي المادي ملخبط
أني من لما جيت هني لقيت الدنيا كلها خاشة بعضها
ليا فترة طويلة مسيب خدمتي و مشاريعي
و قاعد معاك في ليبيا و مسيب كل شي
و نبي وقت بش نصلح الوضع
و بعدين لو روحتي لحوش بوك
أني مش حنقدر نخطبك طول وضعي ميسمحش
نبي وقت بش نخطبك
بنقدر أني الوقت هذا كله منشوفكش زي قبل؟؟
لا لا مش موضوع بكل
خلينا نوسعوا بالنا
قوليله منبيش طلاق توا
اقعدي في حوشك
و هوا توا لما يتزوج حينشغل عليك أكثر
و أنتي تفضيلي أكثر
و نعيشوا و جونا مليح
صابرين زعلت : باهي لأمتى حبيبي بنقعدوا هكي زي
الخنابين
أيوب: يا بيبي قتلك نرتب أموري
و نقولك ..
بعدين تقدري تقوليله معش قدرت نعيش مع ضرة
و هوا بالتأكيد مايصدق حيطلقك
تكملي عدتك اليوم و اليوم إلي بعده نخطبك
و نقروا فاتحتنا و نطير بيك معاي هني
و نعيشوا زي ما نبو و أحسن
و تشوفي شي بعيونك ما شفتيه يا بيبي
حنعيشك ملكة و تقولي أني كيف كنت عايشة قبل
حتحسي روحك ماكنتيش عايشة أصلا صدقيني
شنو اتفقنا حبيبتي؟؟
صابرين: باهي خلاص من أمتى نقولك لا أني
على حاجة تبيها .. اتفقنا
أيوب: نحبها أني إلي تسمع في كلامي
و متقوليش لا
خلاص بيبي نخليك توا
عندي موعد ضروري.. نتكالموا بعدين
باي باي
و صكر الخط قبل حتى لا ترد عليه
: ههههههههههههه عليك ممثل يا راجل
تستاهل جائزة أوسكار
أني بروحي كاني مش عافك راني قريب صدقتك
أيوب : ماهو يا ولد خالتي ميمشوش إلا بالكذب
قتلك كل ما تكذب عليها كل ما تكبد عليك أكثر
طلال : وجهة نظر تستحق التجربة
أيوب : جرب و ادعيلي يا ولد خالتي
لا و الغبية صدقت أني نتزوجها
و نجيبها معاي لبريطانيا
مالقيت من ناخد كان وحدة خاينة و ألعبي زي هذه
هذا ما ناقص
متحسابش اقنعتها تقعد على ذمته
بش لما نضربه ..
الضربة تجيه من حوشه و دار نومه
هكي بس أني تبرد ناري و نردله إلي داره فيا
🌿🌿🌿🌿🌿🌿🌿🌿🌿🌿🌿
و رعد العملاق كمل ليله كله في تفكير مستمر
عقله موقفش لحظة
كل ما ليها المشاكل تزيد و الحياة تتعقد
مرقدش الليل كله و ماصدق صبح الصبح بش يمشي لجده و يهدرز عليه
إلي صار امبارح في عقيقة ولد عمته زاد الطين بلة
كان حاسم أمره لازم يقعمز مع جده
و يحلوا كل هالقصص المتشابكة
أول ما وصل لفيلا جده توجه للمكان إلي جده
يحب يقعمز فيه و يمارس فيه طقوسه الصباحية
فيراندا كبيرة مليانة ورود و شجيرات صغيرة
و أرضيتها معشبة و واحد من جدرانها زجاجية بكبر الحيط كله و لما يكون الجو دافي
تنفتح النوافذ الزجاجية و تبدأ و كأنك مقعمز في حديقة في الهواء الطلق
و الحاج رضوان متعود يفطر فيها الصبح
و فعلا أول ما خش رعد لقاه مقعمز فاتح راديو
يهدرز بحداه و قدامه طاسة سحلب
رعد: صباح الخير يا جدي
رضوان : صباحك مبارك بالصلاة على النبي
رعد باس على رأسه : عليه الصلاة والسلام..
كيف أحوالك اليوم ؟
رضوان : في خير و نعمة بفضل رب العالمين
و أنت كيف أصبحت ؟
رعد : الحمد لله على كل حال
عندك علم أني ماجاني نوم طول الليل
و أول ما صبح الصبح جيتك
رضوان: زينك جية جيتك
أنا اتصلت بباتك و عمك يجو يشربوا معايا قهوتي
بما أنك جيت نشربوها مع بعضنا
رعد : حاضر يا جدي
كيف حال حني اليوم ؟
فاقت و لا ما زالت ناعسة ؟
رضوان : لا فاقت و فطرنا مع بعضنا
خليتها فوق مع حنك مهرة و أنا نزلت نشرب قهوتي
قولي يالرعد راضي عن إلي داره خيك رائد أمس؟؟
رعد : جدي أنا نبي ندوي معاك و بصراحة
أنا ليا فترة طويلة نعرف بمشاعر رائد تجاه سمر
بس خليته بروحه يتصرف عشان مهما كان
الموضوع شخصي و يحله كيف ما يعرف و يحب
بس بعد حكا التافه هذاك قدامكم خلاص لازم نتكلم
و على كلامهم هذا خش فاروق و خوه فيصل
و كان واضح أنه معصب و راقيله :
فاروق : كان لازم أنا نعرف ..
يا سيدي المفروض حد فيكم اعتبرني باته و حكالي
و فهمني شن صاير
رعد : أرجوك يا باتي بلاش عصبية
فاروق : كيف ما تبيني نعصب و أنا قعدت كيف
الأطرش في الزفة قدام العيل و باته
و حتى قدام باتي
و بدال ما سيادة الأستاذ رائد يتواضع
و يحكيلي بعد إلي صار
لا مصار شي و لا حكالي
عدى لجناحه خبط و عيط و كصر و خلى بنته تعدي
تهرب منه لجناح عمتها و تخاف
و بعدها ما عاد سمعناله حس
و أنتم نفس الشي كل حد عدا نعس
و كأن شيئا لم يكن
رعد تنهد : يا باتي صدقني الوضع امبارح بروحه قعد متوتر واجد
و أي كلام فيه و الأعصاب مشدودة حيعقد الأمور
بدال ما يحلها
نحنا قلنا لرائد يحاول يرتاح
و اليوم بعد يهدأ أنا تو نتصل بيه يجيكم و أفهموا منه
فيصل عمه : بس خيك غلط واجد
لو فعلا يبي البنت كان حكا لباتك و خطبتوها من باتها
بس توا عمك منصور قال كلمة
مش حيتنازل عنها لو مهما صار
رعد تلفت على جده : يتنازل يا جدي
لو أنت حكيت معاه و قتله أنه رائد حيحط سمر
في عيونه و أنه أولى بيها من الغريب
و بعدين أنتو كلكم قلتوا مش راضيين عنه منذر هذا
ليش فجأة نال رضا الكل و الكل موافق عليه
و مصبي في صفه
فاروق : لأنه إنسان عاقل و ذكي
حتى لما رائد فقد عقله
و تصرف كيف المجنون معداش بلغ عنه
مسكها جميلة علينا
على جدك و عمك منصور و عليا أنا شخصيا
و بعدين كيف تبي عمك منصور
يوافق يزوج بنته لبلطجي يأخد في حقه بذراعه مش بعقله من أمتى كان رائد هكا أصلا
من طول عمرنا نقولوا عنه العاقل و الواعي
رعد : أرجوك يا جدي
و نفس الرجاء ليكم باتي و عمي فيصل
رائد يبي البنت بجد و لو خداها غيره حينجن و
حيتعب واجد
هذا إذا خلاها تتزوج غيره و أنا متأكد أنه حيتصرف
بتهور و إحتمال يودي نفسه في ستين داهية
حاول تحكي مع عمي منصور يا جدي
يعني لو كان رائد أرمل و عنده بنت
نحنا كلنا نعرفوا كيف سمر تحب رهف
و رهف تحب سمر و حيفرحن واجد
بعد يعيشن مع بعضهن
و لو على فرق العمر رائد حيدللها و يعيشها كيف
ما تحب و تستاهل بس أنتم صبوا معاه
رائد مكسور خاطره واجد من رفضكم للمرحومة أم رهف
و مازال شايلها في قلبه عليكم
ما تخلوه يحس أنه الموضوع فيه هو شخصيا
مش في إختياراته
هو قالها ليا بعظمة لسانه في المرحومة قالوا أنها
مش على ديننا و مش من بلادنا
لا تعرف عوايدنا و لا طباعنا و خليتوه يعيش
معاها كيف المنبوذ لعند ماتت و ربي خذا أمانته
بس سمر كنها
ليبية و مسلمة و من نفس عيلتنا
و باتي و باتها ضنا عم ليش الرفض
جدي أرجوك و أنت يا باتي بلاش تصبوا
في وجه سعادته حتى هالمرة
فيصل : لو فرضنا نحنا اقتنعنا بكلامك
و وافقنا على كلام رائد و زواجه من سمر
غلط نعدوا نخطبوله و البنت هيا أصلا مخطوبة
حتى في ديننا منهي عليه الشي هذا
و شي ثاني عمك منصور حيوافق ؟؟
مستحيل يعني بين شاب مش متزوج قبل
و بين أرمل و معاه بنت لو أنا في مكانه
مستحيل نعطيها لرائد مستحيل
رعد: بالله عليك يا عمي ما تصكرها
نفكروا في طريقة ينحل بيها الموضوع أرجوكم
و أنت يا جدي .. اسمع نخبرك شي مهم
بعد وفاة المرحومة جلنار رائد تعب واجد
و نفسيته تعبت أكثر
المشكلة كبرت عنده و اضطر يشوف طبيبة نفسية
و شخصت عنده مرض اسمه فوبيا الفقد
أو رهاب الفقد
و هذا مرض نفسي مش سهل على المصاب بيه
تخيل بعد رائد يخسر سمر كيف يصير فيه
فاروق: أنت شن قاعد تحكي
أي طبيبة نفسية هذه إلي تحكي عنها ليش أنا ما عندي علم بالموضوع و لا حد خبرني
رعد : لأنه يا باتي مافيش حد يعرف غير رائد
و أنا عرفت الموضوع من فترة بسيطة
فيصل: بس أنا على حسب معلوماتي البسيطة
مرض كيف هذا ممكن يوصل للإنتحار
فاروق: إنتحار!!
فيش تحكي يا فيصل
صح هالكلام إلي قاله عمك يا رعد؟
رعد : هوا صح بس الحمد لله حالة رائد تعتبر مستقرة
قاعد يتابع مع دكتورة نفسية ممتازة
و ياخذ في علاجه بانتظام
و يعدي لجلساته كلهن
و الدكتورة مرتاحة لوضعه يعني إلي يوصلوا
للإنتحار هاذينا ناس مش معترفين بمرضهم
النفسي أصلا و مش مهتمين بصحتهم
لا يعدوا للجلسات و لا ياخدوا في علاج
صدقني يا باتي رائد وضعه ماشاء الله ممتاز
و قاعد يمارس في حياته بشكل طبيعي جدا
يشتغل و شغله ممتاز و يربي في بنته
كأنه أمها و باتها و مش مقصر معاها
لا في تربيتها و لا في دراستها
و الدليل أن و لا مرة حد فينا شك بحالته النفسية
بس أنا يلي خايف منه لو رائد فقد
سمر كيف يصير فيه
رضوان : لا حول ولا قوة إلا بالله العلي العظيم
لا حول ولا قوة إلا بالله العلي العظيم
اللهم أني لا أسألك رد القضاء و لكن أسألك اللطف فيه
فهمنا يا رعد شن خبرك رائد بالضبط عن حالته
رعد فرح بخوف جده على رائد
هالشي أعطاه بصيص أمل : حاضر يا جدي حنحكيلك
🌿🌿🌿🌿🌿🌿🌿🌿🌿🌿🌿
في نفس الوقت
في فيلا منصور رزق الله
المناقشات كانت على أشدها من صبح ربي
منصور و أولاده الثلاثة عبد الجبار و محمود و وليد
و مرته فريحة إلي ملتزمة الصمت من بداية النقاش
محمود : بصراحة يا باتي أنا العيل يلي اسمه منذر
عمري ما وافقت عليه و وليد و جبار يعرفوا
عمري ما تريحت له و لا وافقت نعطوه أختنا
بس بعد دويت نحنا سكتنا
بس تبي الحق رائد ولد خالي
أولى أنه نعطوه سمر
منصور : مستحيل هالكلام أنا عطيت كلمتي و تم
ماعاد نبي دوة فيه
و أنا مصبي معاكم عشان نقول كلمة و نبيها تتنفذ
بعد تكمل أختكم جامعة حنطلعوا الفرح
الكلام هذا قلته لخالكم فاروق امبارح
و هو تفهم موقفي أنا مانبي نعطي بنتي لأرمل و عنده بنت
و لا أنا راضي على أن نعطي بناتي الإثنين
لنفس العيلة خاصة لو قعدن خوت
ما نبي مشاكل و نبي نرتاح على بناتي
و نادى بصوت عالي : سمر بابا يا سمر
و سمر إلي كانت واقفة بعيدة و تسمع في كلامهم
و دموعها ينزلوا لما سمعت بوها ينادي عليها
حاولت تهدي روحها و تأخذ في شهيق و زفير
و مسحت دموعها و طلعت :
نعم بابا
منصور : تعالي يا بابا تعالي
قعمزي جنبي
شوفي يا سمورتي
أنتي تعرفي أني ما عندي شي أهم من سعادتك
و كل إلي كانوا يتقدموا عشان يخطبوك
بعد ترفضي فيهم أنا خلاص نسكت و نمشي برأيك
بس بعد جاك منذر و وافقتي وافقتي برضاك صح ؟؟
سمر هزت رأسها إيجابا و الكلام عالق
في حنجرتها
منصور : و أنتي أكيد ما تبي باتك يقعد عيل
بعد قال كلمة للناس يرجع فيها
أنا ما نبي نسألك لو فيه شي بينك و بين رائد ولد خالك
ما يهمني توا أي كلام فيه الموضوع و لا نبي نعرفه
بس تعرفي شن هو إلي لازم أنتي تعرفيه
لو صار و عرفت أنك تكلمي فيه أو بينكم اتصال
صدقيني حتنحرمي من دراستك و فرحك حيطلع بعدها بأسبوع بس
و حتحرمي أمك من هلها و خوتها
و هذا آخر كلام عندي
و سمر لما سمعت كلام بوها معش قدرت تتحمل
ناضت من جنبه و دموعها على خدها
و أمها مازالت ساكتة و معلقتش بولا حرف
و منصور تلفت لمرته و أولاده :
الموضوع أنتهى و مات في أرضه
ما نبي مشاكل بيني و بين ضنا عمي
الموضوع اصكر خلاص
و مشي و خلاهم
🌿🌿🌿🌿🌿🌿🌿🌿🌿🌿🌿
في فيلا رضوان رزق الله
الحاج رضوان طلب من أولاده و حفيده يصكروا موضوع رائد و سمر لن يفكر فيه و يفكر كيف حيتصرف
و لفت نظرهم أنه الموضوع ممكن يسبب مشكلة بينهم
و بين راجل أختهم
و يسبب مشاكل و فراق بين العيلتين
و هما اضطروا يسكتوا و يصبروا لن تهدأ الأمور
و يحاولوا يوصلوا لحل يرضي جميع الأطراف
بعد لا طلعوا فيصل و فاروق من جنب بوهم
قعد معاه رعد إلي قرر يتكلم معاه في موضوع أسيل
رعد : جدي ما زال موضوع ضروري ندووا فيه
و هو موضوع أسيل بنت عمتي فيروز رحمة الله عليها
رضوان : الموضوع هذا بالذات ما نبي حد يحكي عنه
سبق و قلت البنت هذه ما هي أغلى من بنتي
يعني في وقت ما أنا تبريت من بنتي و حرمتها
من الجية هنا و حرمت حنك منها
مستحيل نوافق بنتها تجينا و نتعرفوا عليها
رعد : بس يا جدي البنت ما ليها ذنب أبدا
و هيا أولا و أخيرا بنت فيروز
و باتي و عمي أخوالها
و عمتي فريحة خالتها و من حقها تعرفهم و تتعرف عليهم
ليش يا جدي كل هالعناد أنا مش فاهم و الله
بصراحة مالاش داعي
و الحاج رضوان تكلم بصوت عالي :
يعني آخر عمري حتجي تعلمني شن إلي له داعي
و إلي ماله داعي حضرتك
كأنك تحق فيا عيل قدامك
رعد : حاشاك يا جدي حاشاك
قدرك كبير من يومك بس البنت
و قاطعه رضوان بصوت عالي:
البنت باتها خذا بنتي مني و لعب بعقلها
و خلاها تعاندني و تطلع عن طوعي
مستحيل أنا نجيب بنته عندي و نعترف بيها
و نخليها تعيش بيننا مستحيل
و لو البنت طامعة في شي من أموال آل رزق الله
خبرها أنها تحلم و نجوم السماء أقرب ليها
و ناض بيطلع
لكن رعد خلاص كان معش متحمل يساير
جده أكثر من هكي و لا قدر يحافظ على هدوءه:
جدي البنت أنا نبيها
و لو أنت ما تبي تجيبها هنا
فأنا نبي نجيبها عندي
و مافيش قوة تبعد بيني و بينها حتى لو كنت أنت
و شي ثاني البنت ما تعرف عنك و لا عن آل رزق الله أي شي
و قالتها بالحرف ما تبي تعرفكم و لا تتواصل معاكم
و لا يهمها رزقكم كله
لأنه كيف ما أنتم تخليتوا عنها بعد كانت صغيرة
و محتاجة ليكم واجد..
هيا توا مستغنية عنكم تماما
أنت و باتي و عمتي و عمي
بس أعتقد أنه نحنا كيفها ما لينا ذنب في شي
حتتقبلنا و تحبنا
و أنا حندير كل جهدي نعوضها عن كل لحظة تعب
و هذا وعد ليا قبل نوعده لأي حد
بس فيه شي أنا نقوله لك يا جدي
لو جا يوم و تلاقيت مع بنتك فيروز
و سألاتك عن بنتها شن حترد عليها
و أنت مش بس رفضت تستقبلها في حوشك
أنت حرمتها من أنها تتواصل مع عمتي فريحة و حني
و باقي العيلة
جدي أنا حنصبي مع رائد و سمر
كيف ما حنصبي مع أسيل
و لو كان المقابل أنك تنفيني من عيلتي كيف مادرت
مع فيروز
نتمنى أنك تراجع نفسك ماعاد ما زال في العمر واجد
و أنا ما نبي نموت و وقت نتقابل مع عمتي تقعد زعلانة مني و مترضاش تسامحني 😔😔
نستأذن يا جدي
و مشي طلع و خلى الحاج رضوان
مقعمز و الله أعلم شن فيه في رأسه
🌿🌿🌿🌿🌿🌿🌿🌿
يوم الأحد 29 يناير
الساعة 1:20 ظهرا
📲📲📲
كانت ناسية تليفونها في حوشهم و حاطاته في الشحن
و مشت بتروح ببنتها بيسان من المدرسة
أول ما خشت ساعدتها في تغيير حوايجها و الحوش كان فاضي لأنه خوها و مرته مهناش
لما شافت للتليفون لقاته فيه 11 مكالمة فائتة من عيسى
من دون تردد نحاته من الشحن و طلعت لدار المعيشة
و اتصلت بيه طول و هو رد عليهآ من أول رنة
و تكلم طول :
وينك منونتي وينك ليا 18 ساعة نشرين عليك
معقولة هكي شغلتيني عليك وين كنتي؟؟
أماني : عيسى حرام عليك شن 18 ساعة
هيا يا دوب نص ساعة مشيت روحت ببيسان من المدرسة و روحت
عيسى : كيف روحتي بيها مش قلتيلي مسجلتيها في باص
أماني: من الصبح بكري لقيته باعتلي رسالة بأنه باصه واقفة اضطريت نكلم عمي محمد يرفعها
و في المرواح خديت منه سيارته و مشيت روحت بيها أني و ادهمت شريت حاجات ناقصتها من المكتبة
و بضاعة غذائية و روحت طول
عيسى : خلاص يا حبيبتي يا عشقي أنتي
هااانت كلها أيام معدودات بس
و نريحك من التعب و الهم هذا كله
كل شي ناقصك أنتي أو بيسا أني نشريهولكم
و كل شي ينقص حوشنا أني نأمنهولك و أنتي تقعدي منونتي الملكة إلي تدلل على قلبي و روحي
أماني: عيسى قلبي بيوقف خلاص
شن معناه كلامك هذا
عيسى : معناه يا قلب قلبي أنتي
أني كنت توا مقعمز مع فوزي بو بيسان
و هو قالي أنه قرر يسافر و معش بيروح لليبيا
و أنه موافق على أنه بنته تعيش معاي
مقابل أني نعطيه وعد راجل لراجل بأني
نحط بنته في عيوني و لو حسيت روحي معش
متحملها و لا نبيها تعيش معاي نتصل بيه
و نبلغه و هوا يجي يرفعها تعيش معاه
أماني تفاجئت : معقولة كيف هكي
قصدي علاش قالك هالكلام هذا؟
شن معناه ؟؟
لا لا عيسى قلبي مش مطمن ره
عيسى: اسمعي فكيني من هالكلام
منونتي يا عمري أني متحركتش
لن فهمت منه كل شي و بالتفصيل
هذا يا حبي جاياته خدمة مليحة في ماليزيا
عقد عمل مهم و أني شفته بعيوني العقد كان
موقع من شركة ليبية مهمة غادي
و المرتب فيه بالدولار هذا غير الحوافز و المكافآت
و العقد مدته 10 سنين قابلة للتمديد
و هوا باين عليه فرحان و ميبيش يضيع الفرصة من يده
قالي أنه دبر ألف واسطة و واسطة و دفع مبلغ كبير
بش يحصل العقد هذا
و لما سألني على وضعي أني وياك قتله حني
ناويين نتزوجوا خلاص
بارك لي و قالي أنه ميقدرش يرفع بنته معاه
و هو وضعه غادي يبي وقت بش يرتبه
و معنداش كيف يرفع بيسان معاه
لذلك الحل الوحيد أنها تقعد معاك
و زي ما قتلك قعد يوصي فيا عليها
و أني قلتهاله حرفيا بنت منونتي حبيبتي بنتي
لذلك توا اسمعيني جاي
اليوم بالصلاة على محمد الأحد
أني من هني للخميس الصبح كله عندي عمليات
الخميس عشية بعون الله نكون عندكم
في حوشكم و حنطلبك رسمي من خوك
رتبي أمورك على هالأساس و معش نبي نقاش نهاااائي
و أماني من ممكن يكون سعيد زيها بعد لا سمعت
هالكلام من جهة ضمنت بنتها تقعد معاها
و من جهة بتجتمع مع حب عمرها عيسى
تكلمت بكل حب ولهفة :
حنقعد نعد في الأيام بالساعة و الدقيقة و الثانية
لن يجي يوم الخميس عشية و تجي تخطبني
عيسى : و أني حنقعد نعد بالثانية و الجزء من الثانية
لن تكوني مرتي و في حوشي و في حضني
حبيبتي منونتي أني توا عندي عملية لازم نخشها
و إن شاء الله بعد لا نطلع نتصل بيك
و نهدرزك على هلبااااا تفاصيل مهمة في حياتنا مع بعض مكنتش نبي نحكيهالك لن نحلوا مشاكلنا كلها
لكن توا بما أنه أمورنا تيسرت الحمد لله
لازم نتفقوا عليها باهي منونتي ؟
أماني بصوت فرحان :
باهي حبيبي إن شاء الله
عيسى : خلاص بنصكر توا حبيبتي وقت عليا
كنت بنلبس للعملية لما شرينتي
مقدرتش نصبر لن نديرها و نتصل بيك
عارف روحي مش حيطيقني صبر بش نفرحك معاي
ديري بالك على روحك حبيبتي
أماني: و أنت موفق في عمليتك إن شاء الله
في أمان الله
عيسى: إن شاء الله يا عمري مع السلامة توا
أماني : سلامتك❤️❤️
و من زيك يا أماني بعد إنتظار 12 سنة
بس حيكمل حلمكم هالمرة و تجتمعوا
و إلا حتنكسر قلوبكم للمرة الثانية؟؟
و نقولوا إن شاء الله خير
🌿🌿🌿🌿🌿🌿🌿🌿
يوم الثلاثاء 31 يناير
الساعة 3:10 عصرا
نبي نفهم علاش جايبتيني هنايا
حني شبه مفلسين و المطعم باين عليه غالي
يعني مرات منقدروش ناخدوا منه طاسة عصير
تعالي نروحوا فكينا نتغدوا في حياشنا
و خلي فلوسك اديري بيهم حاجة تستفيدي منها
أميرة : تعرفي تصكري فمك خير ما نضربك عليه نصكرهولك بطريقتي الناس تشوف فينا
أهوا الراجل تعالي نمشوله
لو سمحت يا أستاذ
: تفضلي يا آنسة
أميرة : فيه حجز بإسم أسيل أحمد
: إيه أنتي الآنسة أسيل ؟
أميرة شدت أسيل من يدها :
لا هذه صاحبتي أسيل
و الراجل شاف لأسيل و تكلم بلطف :
تعالي معاي يا آنسة لو سمحتي
و أسيل شافت لأميرة و مش فاهمة شن قصة الحجز إلي كان باسمها لكن لأنها واثقة في أميرة
و أميرة شجعتها بعيونها
مشت أسيل وراء الراجل
لن دخلها لباب في نهاية الممر
يوصل لمكان كان مظلم
و أول ما أسيل قربت بخطوة بسيطة
بدت الأضواء تنفتح بالشوية بالشوية
و تبان عليها طاولة مليانة شموع و إضاءة حلوة
و يبان واقف بعدها ظل طويل و عملاق
و بعد لحظات حست بالباب إلي وراها تصكر
و كلمات واثقة وصلت لأعماق روحها
مع صوت خطوات جاية باتجاهها
: عمري ما كنت نعترف بأعياد ميلاد
و لا مناسبات كيف هذه كنت نحس فيهن تفاهات
و دواوي فاضية و أنا كبرت عليهن
بس من أيام و أنا نفكر اليوم هذا يكون يوم مميز
أنا جيت للدنيا و رب العالمين مقدرلي نشوفك
من سنتين فاتن بس شفتك أول مرة
و قعدتي قدري و مربوطة بحياتي
حتى الدم إلي قاعد يجري في عروقي
قعدتي تجري فيه لعند آخر عرق
عشان هكي أنا نبي تكوني معايا و جنبي في ذكرى ميلادي
أسيل و قلبها ينبض بجنون :
و أني إلي أمس كله نخطط و نفكر كيف نفاجئك
بش نحتفلوا مع بعض
متتخيلش كمية الإحباط إلي جتني لما قلت لي
مشغول و متقدرش تجي زعلت و فشيت القمم
رعد : ههههههه فشيتي القمم فيه بنوتة كيوت كيفك
تقول لحبيبها فشيت القمم
أسيل رفعت كتافها بعفوية:
هذه أني ..
على العموم كل سنة و أنت بخير
يارب تعيش سعيد و فرحان و تحقق أمانيك كلها.
رعد : عندك علم أنك سعادتي يا سيلتي
و كل أمانيا تعيشي جنبي و معايا
أسيل بخجل : إن شاء الله 😊😊
احم أني راهو جابتني أميرة على ملا وشي
زي العبيطة من الكلية و مش واكلة حتى حاجة
من الصبح بكري
و بطني حاليا تزقزق لأنها شمت روائح شهية و لذيذة 😋😋
رعد : خسا الجوع صغيرونتي
خلاص تعالي نتغدوا
و مشو باتجاه الطاولة لكن أسيل شافت يمينها لقت فيها
كنبة عريضة و محطوط عليها وسائد زي المساند كبيرة و ملونة
مشت باتجاه الكنبة خدت منها الوسائد
و حطت اثنين على بعض
و بعدها مشت للطاولة إلي محطوط عليها الحاجات
و رعد مستغرب فيها ،، قرب منها :
كنك يا عمري شن فيه ؟؟
أسيل شادة صونية تعبي فيها من الحاجات المحطوطة
: بصراحة تقعميزة الكرسي و الطاولة متشبعنيش بكل
أنا مناكلش و ما نشبعش إلا لما نقعمز و متربعة
رعد شد يدها و حط الصونية عالطاولة :
خلي عليك أنتي بس
أنا نكلمهم يجيبو كل شي لعندك .. تعالي معايا بس
أسيل : أوكي بس قوللهم يستعجلوا لأني جعااانة موت
و رعد مشي لمفتاح ضغط عليه يشتغل زي
الجرس في حال احتاج حاجة
و رجع لأسيل مشي هو وياها جهة الوسائد إلي حطتهم
لقاها حاطتله حتى هو وسائد جنبها بش يقعمز عليهم
أسيل : شن رأيك مش هكي أحسن؟؟
و رعد نحا جاكيته حطها عالكنبة و جي قرب الوسائد منها.. و قعمز جنبها
أي شي تشوفيه مناسب قوليه ليا على طول
أنا ما نبي منك غير تكوني مبسوطة و مرتاحة و سعيدة
أسيل : أصلا أني نظامي المفروض تكون فهمته
منحبش نجامل و لا نساير
و لا نحب ندير روحي حاجة كبيرة و جو الاتيكيت مايمشيش معاي
أني يا حبيبي أهم حاجة عندي راحتي و بطني و بس
رعد يشوف لعيونها :
حلوة وااااجد طلعت منك كلمة حبيبي
أسيل: باهي يا حبيبي أنت شوف البنات إلي فالتات فيك فناراتهم خلي يشوفوا شن وراهم
مش حلوة وقفتهم هكي
و قوللهم يدوروا على محطة ثانية يفلتشوا فيها
رعد : ههههههههههههه أنا متأكد حناكلك يوما ما
و أشر للعاملات و طلب منهم يحولوله الجلسة أرضية
و قبل لا يقوللهم شن يبي منهم بالضبط
أسيل شافتله بنظرة حادة
و قعدت هيا تتكلم معاهم و تفهم فيهم شن يديروا
و رعد نزل عيونه في الأرض و هوا شاد ضحكته
و من داخله فرحان هلباااا بتصرفاتها إلي بينتله هيا
قداش تحبه و تغار عليه و متحملتش نظرات
البنات الجريئة ليه
رعد استنى البنات يرتبوا كل شي و أول ما طلعوا :
قوليلي يا قلبي كيف أخبار الدراسة ؟
أسيل : ماشي حالها
البداية صعبة هذا غير أنه أغلب الكتب و المراجع
إلي يقولولنا عليها مفيش منها هني
و في أحسن الأحوال نلقوهم في طرابلس
توا غر شن جاب سيرة القراية نبي نفهم
قولي أنت شن صار مع خوك و بنت عمتك
قداش ما وجعوني مساكين
جدك هذا مش عارفة خيره هكي
توا هوا كان كلم راجل عمتك شن كان صار؟؟
المفروض هو عمه الكبير و راجل عمتك راهو تحشم منه
شن معناها يبي يفكر في الموضوع
اثنين يحبوا بعضهم علاش يفرق بينهم
بصراحة الباين أنه جدك هذا شخص
قاسي و متسلط و طاغية
المفروض اديروا عليه مظاهرات
و رعد شافلها بنظرة عميقة :
جدي هذا ياما داير فينا
بس يقعد جدي و حقه علينا الإحترام و التقدير
هوا دار واااجد عشان اسم عيلتنا يقعد له احترامه
و هيبته بين الناس و يؤمن لنا حياة كريمة
أسيل : ممكن ،، أني جو الهيبة و جو اسم العيلة
عندي مش مهم زي ما يهمني نعيش سعيدة
و مرتاحة حتى لو كنت فقيرة
لكن ممكن لأني معنديش عيلة نقول هكي
يعني عيلتي بالدرجة الأولى عمتي أماني و بنتها و أميرة
و أمها و بوها و أختها آيات
غير هكي ميهمنيش
و رعد مد لها طاسة عصير مانجا طبيعي :
و رعد العملاق يا سيلتي وين عدا
أسيل : رعد عمري و حياتي و دنيتي كلها كلها
رعد : الله الله بصراحة ما كنت نبي أكثر من هك
أسيل أشرت للطاسة في يدها :
اسمع متزلبحنيش بالكلام
توا أني قتلك جعانة بنموت بالشر
تمشي تمدلي طاسة عصير بش معش نقدر ناكل
لا يا حبيبي أني أهم حاجة عندي بطني ره
تعبيهالي نعطيك عيوني غير هكي لا و ألف لا
رعد : خلاص يا روحي يلا مدي يدك
و أسيل ماصدقت طاحت في الأكل قدامها
و رعد يشوف لها بحب و حنان
و مازال قلبه الصخري خايف بيموت من ردة
فعلها لو عرفت هو شن داس عليها
خايف تضيع منه و يخسرها للأبد
🌿🌿🌿🌿🌿🌿🌿🌿
و في نفس المطعم بعد حوالي نص ساعة من تقعميزتها
انحطت مفاتيح سيارة قدامها عالشيت إلي تنقل منه في
ملاحظات في مذكرتها
: السلام عليكم غزالتي
أميرة قامت عيونها فيه :
و عليكم السلام غزالي
جابر : شن الجو؟
أميرة : الحمد لله شن جوك أنت؟
جابر : أااااه تعب رأسي نحس فيه استاكا خلاص
أميرة: الإمتحان كان صعب اليوم ؟
جابر : هو مش صعب هلبا
لكن جي مركز و قتلك الدكتور هذا
دقيق و ما يفوت في شي
يبي كل شي بيرفكت
أميرة : لكن أني عارفاته غزالي ما يغلبه شي
جابر : أني حاليا ما نبي شي غر نكمل إمتحانات
و نخطبك رسمي بدون مشاكل و لا عراقيل
هذا توا إمتحاني الأصعب بالنسبة ليا
أميرة : الإمتحان هذا تحديدا أني متأكدة
أنك حتنجح فيه و بتفوق
و لأنه جابر محبش يخوفها حب يغير الموضوع
أشر عالشيت قدامها
: شن اديري ؟؟
أميرة : هذه محاضرة الفيسيو الأخيرة
الدكتور طلب مننا نلخصوها في عشرة سطور أو أقل
بياخد عليهم درجات المشاركة
قلت نكسد عليها توا
من هني للأسبوع الجاي نجهزها بالوسع
جابر : خلي نطلبوا حاجة ناكلوها لأني جعان
و بعدين نشوف في شن نساعدك
أميرة : على فكرة غدانا اليوم على حساب رعد
جابر : لا شن على حساب رعد هذه متجيش
هوا يغدي حبيبته و أني نغدي حبيبتي
أنتي مسؤولة مني و مفيش حد غيري يصرف عليك
قرش واحد
أميرة : دير رأيك هوا أصلا دافع الحساب
مش حياخدوا منك تفاهم أنت وياهم
🌿🌿🌿🌿🌿🌿🌿🌿
و عند أسيل إلي كانت شادة البوكس المغلف باللون الوردي :
كيف هكي يعني عيد ميلادك و أنت تهديني هدية
عمري ما سمعت بيها هذه بصراحة
هو أني شريت لك هدية لكن مجبتهاش معاي
لأني مكنتش نعرف أني بنشوفك اليوم
و رعد طلع ساعة حزامها أسود
و إطارها فضي من جيبه : قصدك هذي ؟؟
أسيل حطت البوكس و شدت الساعة :
حيه على أمها الفرخة أميرة
معناها متفاهمين من أمس و أني طايحة نقوللها خسارة
مش حنقدر نعطيهالك اليوم لأنك متبيش تجي
و هيا تقولي عادي كل تأخيرة فيها خيرة
و ماشية جايبتها و عاطيتهالك من وراي
رعد : بس بصراحة عجبتني واااااجد
و الأحلى أنها منك
شن رأيك ممكن تلبسيها ليا ؟
أسيل تحشمت من طلبه
لكن هو مستناهاش مد لها يده
نحت منها الساعة إلي كان لابسها
و لبستله ساعتها
و هيا مطبسة رأسها و ميتة من خجلها
و رعد شد يدها باسها بحب :
يسلمو إيديك يا حبي
أسيل ارتبكت جبدت يدها و قعدت تفتح في
غلاف هديته و لما فتحتها كان فيها
سنسال حلو في نهايته اسمها هيا وياه
منقوش بحروف عربية مزخرفة و متشابكة
صعب على أي حد يفهمهم إلا بعد تركيز
يعني يبانوا من بعيد كأنهم زخرفات بلقطة حلوة
أسيل : الله محلاهم ... أسيل رعد
رعد يتأمل في الفرحة المالية عيونها :
كنت واثق أنك حتشوفيهم بقلبك قبل عيونك
أسيل رفعت عيونها فيه :
ربي يخليك ليا رعد
أني و الله ما نبي منك حاجة إلا أنك
تقعد معاي و تحبني
و يا رب ما يصير شي يفرق بيننا طول العمر
و رعد لما سمع دعوتها الأخيرة حس بقلبه انقبض و الخوف سكن فيه
تكلم بصوت رخيم :
أوعديني سيلتي تلبسيه و ما تشيليه من رقبتك
و تأكدي أنه مهما صار أنا نحبك و نعشقك وااااجد
و متيم بغرامك😍😍
و زي ما يقولوا اللحظات الحلوة ديما قصيرة و أتم بسرعة
لكن معقول تكون اللحظات الحلوة بين رعد العملاق و أسيل هذه نهايتها 🤗🫣
🌿🌿🌿🌿🌿🌿🌿🌿
يوم الخميس
2 فبراير
الساعة 11 صباحا
و تسكنني خيبة لا تبكيني
و لا تحزنني
هي تؤلم قلبي فقط💔💔
كان راجع لحوشهم بخطوات ثقيلة
بحال مختلف تماما عن حاله و هو طالع منه و ماشيلها
ما صدقش روحه لما فتح عيونه على رسالتها
( رائد أنا في حديقة فيلتكم من الخلف تعالالي نبيك حالا)
على طول ناض من سريره
خش للحمام دوش عالسريع وبدل حوايجه في أقل من عشرة دقائق..
حتى أنه مجففش شعره مع أن الجو برا مصقع و يجمد
و نزل يجري للمكان إلي قالت له عليه سمر
و لما وصل غادي لمحها واقفة و مدرقة بجذع شجرة كبيرة
قرب أكثر لن وصل فيها
كان ماشيلها بقلبه قبل رجليه
و خداها بين أحضانه لن رجليها ارتفعوا عن الأرض :
رايفت عليك رايفت عليك يا روحي
رايفت عليك بنيتي السمحة رايفت عليك مووووت
و قعد يشم في ريحتها
كأنه كان ميت و أخيرا تنفس و رجعت له الحياة
و سمر مكانش حالها أحسن منه
خلت روحها في حضنه مكانتش تبي غير تشبع منه
لأنها عارفة و متأكدة أنه حيكون الحضن الأخير💔💔
قعدوا دقائق طوييييلة انعزلوا فيها عن الكون
و مفيش غير صوت دقات قلوبهم الملهوفة على بعض
شوية و بعدها رائد و نزلها بالشوية و بتردد عالأرض:
طمنيني عنك غلاتي كيف حالك؟؟
باتك شن داير فيك ؟؟
عمتي فريحة.. احكيلي بنيتي شن صار بالتفصيل؟؟
سمر بعدت عيونها عليه
خايفة لو شايفة هاللهفة و الحب في وجهه و عيونه
تتراجع و تلوح كل شي ناوية عليه وراء ظهرها
حاولت تبان قوية:
رائد فيه شي ضروري نحكيه معاك
و رائد من لهفته عليها مركزش على حزنها الواضح :
قولي حبيبي أي شي قوليه و أنا بعمري نسمعك
سمر : رائد باتي حلف بالله لو كلمتك ثاني
حيحرمني من دراستي و ح....
و رائد قاطعها : شن هالتخريف أنسي مستحيل
سمر : مش تخريف يا رائد
كلام باتي عمره ما كان تخريف
أنا ما نبي ماما تتفارق هيا و عيلتها بسبب علاقتنا
ماما مش حتتحمل و لا أنا
عشان هكي نبي نقولك
أنا نبي ننهي علاقتي أنا و أنت
علاقتنا غلط كبير و أنا ما نبي نستمر في هالغلط
رائد حس كأنه صخرة عملاقة طاحت على رأسه
لدرجة قريب فقد توازنه
: كيف مش فاهم
كيف يعني علاقتنا غلط فهميني مورتي
قاعدة تشفطي عليا صح
سمر بإصرار :
لا مش تشفيط و الله مش تشفيط
أنا ندوي جد مش رح نتحمل ماما تشوفلي
و تلومني عشان حرمتها من هلها و خوتها و أمها
باتي كلامه واضح لو شافني معاك حيقطع علاقة ماما
بيكم .. و تحديدا باتك و خالي فيصل
و حتى حني معقولة بعد انحرمت من خويلة فيروز الله يرحمها
تنحرم من ماما هيا مش حتتحمل
نحنا مش لازم نقعدوا أنانيين رائد
خلاص أنا مخطوبة و فرحي في الصيف
و أنت أكيد حتلاقي إلي تنسيك فيا و في كل شي
حزين أنت مريت بيه
أنا بنعدي.. رائد سامحني أرجوك
مافيش في يدي شي
و وقفت على رؤوس أصابعها و باست رأسه
بكل إلي في قلبها من حب و ألم و عذاب
و مشت تجري لأختها صفاء إلي كانت
تستنى فيها و واقفة تراقب في المكان
أما رائد إلي حس بزلزال ضربه
و دمره و مزقه لأشلاء
مكانش يسمع غير في صوت طنين قوي في ودانه
و رجليه ثقيلاااات
و عيونه يشوفوا للجهة إلي مشت منها سمر
بعيون مليانة دموع محبوسة
قعد واقف أكثر من ساعة هكي لن قعد يرجف كله و مش فاهم السبب بالضبط من الصقع أو من الوجع
مكانش غير يبي يرجع لسريره
و هو يقول بكلمات خافتة :
حلم أكيد أنا نحلم
لا لا مش حلم هذا
هذا كابوس كابوس
نبي نعدي لسريري
حننعس و نفيق و مفيش شي صاير
سمر مستحيل تخليني
مستحيل تعدي و يزفها غيري
لا سمر مستحيل اديرها فيا
قعد يمشي و يتمتم خطم من جنب أمه و بوه و أخته رغدة إلي مقعمزين عالصالون
و يهدرزوا
استغربوا هلبا لحاله..
كأنه مشافهمش و خصوصا و هو مازال يتمتم و يكلم في روحه
و لأن رغدة كانت أقرب وحدة ليه وقفت طول بعد لا شافت حالته كيف منهار و دموعه ينزلوا و يرعش مع بعضه و حتى مشيته مش متوازنة
تكلمت بخوف : ينا عليا خويا كنه يا بابا؟؟
و أمه و بوه ناضوا وقفوا و لحقوه
كان هو راكب أول صفة في الدروج
لما معش قدر يوقف و رجليه معش حملوه
شهق بقوة و وجع و حط يده على قلبه إلي يتوجع
و طاح على طوله مغمى عليه
و رغدة ركبت تجري و تعيط بعلو حسها : رااااااائد
🌿🌿🌿🌿🌿🌿🌿🌿🌿
يتبع ✍️✍️✍️
همتكم معاي
بعد خمسين جزء
بفضل الله قريب نوصل لعشرة آلاف صوت
اللهم لك الحمد
متنسوش التصويت بنجمة ⭐️⭐️
و تعليقاتكم
و إلي مصوتتش على جزء تصوت
شن خطة صالح العابد؟؟
و شن معني إلي قاله فوزي لعيسى؟؟
و شن ليه علاقة بمخططهم؟؟
أماني و عيسى بيتزوجوا و أخيرا و لا؟؟
أي ضربة حتوصل لعيسى قبل ؟؟
ضربة أيوب و لا ضربة صالح؟؟
و لا ضربة عيسى؟؟
رعد العملاق شن شكله العذاب إلي مازال مستنيه؟؟
و جده قلبه حيلين على أحفاده و لا لا ؟؟
أسيل أمتى حتعرف بصلة القرابة بينها و بين آل رزق الله ؟؟
حتتقبلها ؟؟
و رائد حينوض من طيحته هذه و لا لا؟؟؟
و شن حيصير في سمر؟
Masa💎💎