نهار الخميس pratiquement ديما chargé بالخدمة. نهار الجمعة نخليه لروحي دوش و حجامة. و نهار السبت الصباح منفهموش كيفاش يتعدا جري بين القضيات و التحضير طول تجي السبعة متع العشية. كل نهار سبت العايلة تتلم و نتعشاو في دار واحد من العايلة. كل ويكند يتلها حد بالعشاء. المرة هذي في ضيافتي أنا. خويا و عايلتو و معانا شريك راجلي هو و مرتو ستدعاوه بش يزيد يتعرف على العايلة قبل البزنس و معاهم خبير إقتصادي بش يجي. وكاتب دولة، كان أستاذ كبير في جامعة منوبة خبير في العلاقات الدولية. دونك نهار كامل تعدا جري لين حضر كل شي كيما يلزم. سلمة خرجت قبل بساعة من الخدمة بش تجي تعاوني و ميدو يجي مع بوه من بعد.
المرة هذي كيف بش نقابلهم حاسة روحي نافحة، والعة بحاجة من داخل، متحمسة. منعرش كيفاه نوصفو الإحساس، تقول قصة حب جديدة و إلا كيفاه. نستنا في سلمة وقتاه تجي و نشوفها.
و أحنا نحضرو كل مرة نسألها على ميدو و على قرايتو :
(أنا) - مازال يتعارك مع صحابو ؟
(سلمة) - عامل بعمايلو قتلي معلمتو يضحك في أصحابو في حصة الإيقاظ
- صغيرون خليه على راحتو... ممم و أكا الطفلة لي خايف منها مزالت تقلق فيه ؟
(سلمة) - جاتني أمها و راجعتلي باكو الأقلام قتلي هي تجبد و أمها تجبد منجمتهاش لين فكتهولها في النوم.
امها ؟ تنقرصت شوية، مش قتلي معنديش ؟ بون مش تنقرصت أما خفت أنا هازتها وحدي كان علمت أمها راني وليت في مشكلة. الأقرب أنو أمها تخدم في SOS تنجم تكون تنظف و إلا تشد صغار.
(أنا) - هيا باهي المهم معادش يتعاركو.
(سلمة) - نهار الإربعاء قبل ميكملو بساعة عملتلو اللصق على كراستو و خرجت 4 لبوها تبكي قتلو محمد علي ضربني.
الطفلة معايا نهار الإربعاء ! ميدو باين فيه يكذب عليها و يزيد في حاجات من راسو
(أنا) -لا مش معقول هكا ماو قتلك أنا من نهار الإربعاء كلم الإدارة.
بعد ما قلت الجملة هذي تمنيت لو نجم نرجع بالوقت و منقولهاش منحبش نزيد نكمل عليها الطفلة مش ناقصة و باينين أمها و بوها عايلة يهملو صغارهم و يربوهم على العنف. أما كيفاه تقرا في مدرسة خاصة و مكلفة.
(سلمة) - هي العركة بدات من الإربعاء في العشية قبل كان هو وياها حبك درباني.
(أنا )- الإربعاء الصباح وقت جيت وصلتو حكالي عليها قلي راي تفكلي في لمجتي.
(سلمة) -آه سوكي هذيكا. ماو أنا ولدي كل نهارين يشدلي طفلة. بداها مع سوكي و توا ولات مرام. ماشي يحارب مش يقرا.
فرحت شوية منعرش علاش ... كي عرفت إنها تحكي على مرام.
- و سوكا و إلا سوكي و إلا شسمها شعمل معاها ها الأيامات ؟
- محكاليش عليها النهارين عاملين هدنة. موالف كل يوم يجي يحكيلي عليها هاو تو ولات مرام.
تعدا الوقت و حضرنا الطاولة و أنا نستنا في ميدو وقتاه يجي بش نسألو عليها خفت لا تكون معادش تقرا.
العشاء تعدا كيما يلزم مع الضيف تلهيت بيها مرت شريكهم الجديد و تفاهمنا بش نتقابلو وحدنا زادة. جات معايا للكوجينة حكينا تعرفنا على بعضنا. قربنا شوي من بعضنا. البزنس في جزء كبير واقف على النساء. رجال الأعمال عندهم جو خاص كيف يحلو بزنس جديد يعرفو عايلاتهم على بعضهم. النساء هي لي تهدي و تشجع و هي لي تمنع. الراجل كي تبدا على يمينو مرا مقدية و واعية يرجعلها و يستشيرها و ياخو رايها. L'impression. أنا متأكدة لي مبعد ميروحو راجلي بش يجي يسألني شقولك و هي زادة راجلها بش يسألها. مدام أنا وياها ولينا حبيبات القلوب بش تتحل على بعضها. في البزنس و إلا غيرو المرا هي لي تحل البيبان و تألف القلوب، الراجل ديما على يمينو مرتو هي سلاحو و هي لي بش يذوق بيها الدنيا.
اليوم راجلي معمل عليا، و أنا نحب نقعد مركزة و ناقف معاه منحبش نتشغشب بحاجات أخرى. عندي مدة محضرتش معاه في عشاوات الخدمة. من حزن للحزن. الكوبل متاعنا تشغشب برشا بحكاية الطبة و جيبان الصغار. اليوم قررت نعاود نرجع حياتي كيما كانت و كيما هو يستاهل.
في نفس الوقت نحب نستفرد بميدو و نسألو على الطفلة. وين نقلو ça va l'école يقلي ça va و يسكت.
و أنا منحبش نبقا نسأل فيه برشا قدام العباد أكيد فيبالهم لي أنا لتو معنديش صغير و أقل غلطة نبان أنا مهووسة. أما يا حجرة الصبر صبريني.
وفا العشاء جاو الضيوف بش يروحو عطيتهم les cadeaux و المرا فرحت بيهم على الآخر.
-أهوكا مرتك سامية و هذي مدام سلمة و أنا مرتي سليمة ينجح المشروع نحطولهم S على المدخل.
خليتهم يتفكهجو على عتبة الباب و هزيت ميدو للكوجينة بش نعبيلو من chocolat و أهوكا صقسيتو على سوكي قلي مريتهاش و راهي ترجع نهار الإثنين و بعد قلي بدلوها من القسم. حاصيلو منجمتش نعرف منو شي.
(سليمة مرت الشريك) - نتقابلو غدوة نعملو petit dej مبعضنا
(سلمة)- نخليوه فطور خير أنا غدو الصباح بش نلوج على déguisement ميدو عندو مسرحية Mardi
( خويا ) - ريت أهوكا طفاونا ولاو يخرجو وحدهم مالا نوليو أحنا نمشيو لل Golf
(ميدو ) - طاطا سامية تجي Lundi تتفرج فل البروفة ؟
و أنا هذاكا فاش نستنا قلبي قعد معلق غادي و نحب نرجع ...
●نهار الإثنين في الصباح :
خليت الرونديفوات الكل للعشية و تعديت الصباح هزيت ميدو عندو ساعتين قراية و بعد مسرح. رميت عيني على الباب مفماش بقيت مبركية مفماش.
دخلت للكافيتيريا و شربت قهوتي و gateau نلقاه شد الريسبتور بالسكوتش. بقيت ساعة أما مجاتش. كيف جيت نخلص سألت مولا القهوة عليها طلع يتفكرني قلي ملي كسرتلو الرسبتور مرجعتش. حسب كلامو يوكلها ديما من عندو بلاش و هي تجي تمسخ و تبلبز و يقعد يقعد و يقلي يعجلو لله. فهمت من كلامو إلي مديرة المدرسة هي لي كفلتها بش تقرا بلاش خاتر المدرسة قريبتلها للدار.
و فهمت من كلامو لي من عمناول تعمل في المشاكل و لي بش يرجعوها للمدرسة عمومية بعيدة شوي خاتر برشا أولياء تشكاو منها. حسب كلامها عندها عايلة، ماليها عايشين أما version لي حكاهالي مدخلتش لمخي.
جا الوقت دخلت تفرجت في الصغار يدربو على المسرحية و الغناية عملتلهم تصاور و حكيت مع أستاذة المسرح متاعهم عطيتها تمويل صغير بش يحسنو من المتريال و وعدتها نرجع العشية و إلا غدوة. و خرجت خاطر قلقت قلت نمشي لعيادتي بكري ما ركحت روحي كان كهو. الطفلة كان سمعت عليها حاجة تو نهزلها طرف فلوس. عندي أيامات نخمم نمشي نطل عليها وين تسكن أما زايد.
وصلت وين rond point العادة حسبت روحي عادي أما أنا مش عادي. مشطها الدنيا الكل بعيني ضربت فران عطلت لي ورايا. مفماش...
كملت القدام كل ما نبعد ميترو على روند بوان نحس روحي نأيس أكثر. لين ريت فيل صغير يمشي على الجهة الأخرى من الكياس. فيل ؟ المسرحية ... déguisement.
وقفت و زمرت شي، منجمت نشوف شي من بعيد. خطفت الدورة و خلطت على الفيل
- سوكييي، إيجا ماما أطلع.
طلعت بسيف و أنا الكراهب ورايا يزمرو و يعاودو مخلاوليش الوقت بش نبركي.
- متع المسرحية هذا ؟
- شبيك ما جيتش
-جيت و تفرجت في أصحابك و إنت مجيتش
- السبت ستنيتك إنت مجيتش.
- صار تجي إنت لل école. أحكيلي شعملت النهارين هذم.
حسيت روحي كثرت عليها و هي صغيرة و مطفيتني لاهية في الفيل لي لابستو. المرة هذي لقيتها في بلاصة أبعد من rond point. شتعمل طفلة صغيرة لنا وحدها ؟ كان تضربها كرهبة و إلا حاجة. منتصورش تابعة SOS منتصورش يخليوها تخرج هكا وحدها. مستحيل...هذا يزيد يأكدلي إنها عندها عايلة.
SOS الباب ما يتحل فيه كان ب أوامر
-فاش تعمل لنا سوكي ؟
-مشيت للفريب نشري في القناع.
- شكون شرالك، شكون عطاك فلوس ؟
-عندي فلوس .
-وين ماشية تو ؟
-بش نمشي للحانوت ناخذ كاكي و بعد نمشي للمسرحية.
-باهي أتو نهزك أنا.
كلمت السكريتيرة قلتلها أجل الموعد و سكر العيادة و أخرج روح على روحك عندي إلتزامات عائلية.
تعديت لرستو خذلتلها حاجة بش تاكلها و بقيت نتفرج فيها، نفس اللبسة شعرها مشدود المرة هذي مش مشبشبة و لابسة صباط مقطع أما بلي يبقا حاميها من البرد.
(أنا)- عجبك الفيل ؟
(سوكي)- كان هو جا قدي
-تحب نشوفو حاجة أخرى ؟
-غالين محبش يعطيني
-تو أنا نشريلك
- الراجل يروح توا، هو قلي معادش تجي راو الفريب بش نسكر
- ههه شعمتلو حتى قالك هكا. نعرف بلاصة أخرى باهية أتو نهزك.
دخلتها غسلتلها إيديها و ركبتها .
-بش نعملو شوبينق سوكي