الجزء الرابع و الثلاثون ☄️☄️
📲📲
عفاف : اسمعي متعطليش عليا اليوم قبل العصر تمشي تشوفي المرا و تجيبيهولي منها غدوة ضروري نبي نتصرف في الموضوع
أني معش نقدر نصبر أكثر من هكي
معش نبي الحلول المؤقتة
لازم كل شي يصير بسرعة معش نبي نعطل أكثر من هكي
نوال بنت عمها :
قلت لك يا عفوفة المواضيع هذه تبي وسعة بال
و الحلول المؤقتة داب فليساتك
علاش مستعجلة و بعدين لو تبي حاجتك
ضروري اليوم بتلقي روحك
بتزيدي تدفعي زيادة
لأنك تبيه مستعجل .. و المستعجل يكلف أكثر
خليك ماشية بالدور أحسن
توفري ألف دينار
عفاف بحدة : لا أي دور هذا إلي تبيني نراجيه
بريلها اليوم منبيش نغامر و نحصل
خوديه مستعجل و ادفعيلها عادي المبلغ إلي تبيه
و أني غر ناخد الجمعية آخر الشهر و نخلصك فلوسك كلهم و فوق منهم هدية مليحة مني ليك بعد لا يصير إلي نبيه
نوال لوت شواربها :
باهي يا حبيبة باهي إلي تبيه يصير
دونت ووري يا بيبي (don't worry beby )
اليوم اليوم
خيرك تكشخي انتي
توا بعد لا نجيبه منها العشية نخطم عليك نعطيهولك
عفاف : لا اليوم متجينيش طالعة عندي مشوار
ضروري نمشيله
غدوة الصبح قبل لا نمشي لحوش جدي
توا ندهم عليك بسيارتي و ناخده منك
نوال : مع أنه غدوة بنمشي حتى أني لحوش جدي
لكن تمام تعاليلي غدوة نعطيهولك
عفاف : المهم لما تشديه في يدك
ابعتيلي مسج قوليلي
يلا باي و صكرت الخط
و صاحبتها منية مقعمزة جنبها
في كلية اللغات شافتلها بأسف و تكلمت :
مشيتي مشيتي و صكرتي رأسك و تبَّعتي بنت عمك
مش عارفة كيف سمعتي كلامها و أنتي ديما تقولي أنتي و بنت عمك هذه بالذات متحبوش بعضكم و متبطلوش عراكات
عفاف تحط في تليفونها في شنطتها و طلعت مرايتها تساوي في وجهها :
كان عندك عند الكلب حاجة قوله يا سيدي
و الكلبة هذه لو تشوفيها كيف مخلية خطيبها
زي الخاتم في صبعها
و إلي تقوله عليه يديرهولها بدون نقاش
مع أنها لا لون و لا عون
و هو رايح زي الغزال و ولد عيلة و متسمي
و تبيني أني ناخد خوها حميد الأجرب
خيرني شن ناقصني مناخدش واحد زي جابر
منية : ما هو هذا إلي أني مستغرباته
قبل كانت تجري في جرتك ليل و نهار تبيك لخوها
و أكثر عراكاتكم و مشاكلكم على خاطر رفضتيه
توا و بسهولة هكي اقتنعت و تبي تساعدك بش جابر يحبك و يتزوجك و تخلص عليك لن تحصلي فلوس
و تقضي لك هيا في مشاويرك
هذا كلام بعيد على بعضه و يخوف الحق
و أنتي تهزي في راسك و مستسلمتيلها هكي عادي
عفاف : أني أساسا مكنتش نبيها تعرف أني نكلم في جابر غر هيا سمعتني في حوشنا نكلم فيه بالتليفون و هيا إلي قالت لي لو تبي نساعدك نخليه ميشوفش لبنت غيرك
منية : منعرفش الموضوع يخوف
و بعدين بالسحر يا عفاف بالسحر
مش موضوع نحس فيه
عفاف عصبت : أمالا كيف تبيني ندير
نخلي الفرخة إلي قعدة مطلعتش من الثانوية
إلي عرفها أمس بس تاخده مني و أني نتفرج عليهم
نبي نعيش حياتي زي باقي هالبنات
نبي نلبس و نسافر و نهيج
و مفيش غير جابر يعيشني عيشة مرتاحة
سادني فقر خلاص
مليت كل منقول لبابا نبي هاديكا الحاجة يقولي معنديش فلوس و معنديش باش و هاك تشوفي في الحال و الظروف
و لا ماما إلي كل منقوللها نبي هاديكا الحاجة تقولي على قد لحافك مد رجليك
و أني نبي نمد رجليا بالوسع و بالمرتاح
مليت من الفقر و العازة مليت
أنتي لو تشوفي سنابات خواته إلي يهيجوا برا كيف عايشات ،، لبسهم و حياشهم و عيشتهم
شن فيهم زايد علينا و شن فينا ناقص عليهم
و لا المناشير إلي ينزل فيهم جابر و المطاعم و الأماكن إلي يتغدى و يتعشى فيها هو و عيلته و أصحابه
مكانات منحلمش نفوت حتى من قدامهم
منية : لكن الولد موعدك بشي يا عفاف
عفاف ناضت وقفت :
اسمعي الموضوع معش نبي من يكلمني عليه
جابر ليا و حنخليه يعبدني عبادة
و أنتي لو قعدتي هكي تقولي معش نبي نعرفك
و لا نبي لسانك يخاطب لساني
نهضت شنطتها بعنف و عصبية
و مشت و خلت صاحبتها منية واجعها الحال إلي وصلت له صاحبتها
بطمعها و شجعها
🌿🌿🌿🌿🌿🌿🌿🌿🌿🌿🌿
فيه ناس يقولوا عن كلمة الظروف أنها كلمة مطاطة
مجرد عذر يتسبلوا بيه الضعفاء
مجرد قشرة باطنها الرغبة في البعد
الرغبة في الهجر ،،
الرغبة في التجديد أو حتى الرغبة في التغيير الكلي
لكن مرات يصير في حياة الإنسان ظرف ..
أو نقولوا طارئ قاهر
يكون فوق قدرة الإنسان أو فوق طاقة تحمله
و توصل معاه للعجز في ظل هالطارئ القاهر
يعني بعد سنين و سنين حب و عشق
سنين من الإهتمام و الإحتواء
سنين من سعادة و فرح
سنين من حنان و عطف
كل هالمشاعر إلي عاشوها
أصبحت بين يوم و ليلة هشيماً تذروه الرياح
و من دون ما يكون للطرفين لا حول و لاقوة
ينجبروا يتفارقوا
و كل حد فيهم يمشي في طريق
بعد لا تعاهدوا تكون طريقهم إلي حيمشوها واحدة طووول العمر
فهل يا ترى حيكون بعد هالفراق..... لقاء !!
هذا حال أماني و إلي صار معاها
إيه هذا حال أماني...
أماني إلي بعد لا صلت المغرب
خدت تليفونها في يدها و لبست شبشبها
و مشت باتجاه حوش الحاجة وردة
بناء على طلبها
لما طلعت من الباب الرئيسي للشارع
و ملقتش سيارة عيسى واقفة قدامه ارتاحت
شوية لأنها مش حتضطر تكون موجودة
في وجوده
وصلت للباب الرئيسي في حوش الحاجة وردة كان مفتوح و مدفوف
فتحاته و خشت
مشت ركبت الدرجات لقت الباب الداخلي الخشبي مدفوف للأخير طقت عليه
و قعدت تستنى لن سمعت خطوات قربت
طلع من ورا الباب علا إلي لما فتحت الباب
و شافت أماني واقفة
بانت على ملامحها الإزدراء
و تكلمت من رأس خشمها :
خشي خالتي وردة تستنى فيك
في دارها
و أماني فاتتها و نحت من رجلها و خشت
مشت باتجاه دار الحاجة وردة
إلي كانت متكية في سريرها و شادة سبحتها و تسبح
و على وجهها أمارات التعب و المرض بدت واضحة
أماني طقت باب الدار و خشت :
السلام عليكم و رحمة الله
كيف حالك يا خالتي اليوم ؟
الحاجة وردة : و عليكي السلام و الرحمة
صكري الباب وراك
و خشي يا بنيتي تعالي هني قعمزي جنبي
و أشرت بكفها على مكان جنبها عالسرير
و أماني طول صكرت الباب وراها
و قربت منها سلمت عليها بالوجه
و باست على رأسها و قعمزت
: ما شاء الله عليك اليوم وجهك ناير يا خالتي
ربي يزيدك من الشفاء إن شاء الله
الحاجة وردة : الحمد لله رب العالمين
ربك يبدل علينا كل ساعة الحال بحال
أماني : الحمد لله رب العالمين
ربي يحفظك و يخليك لينا
الحاجة وردة :
اسمعيني توا و متقاطعينيش
راني تاعبة و حيلي مهناكش
هما كليمتين و حطيهم خرصة في ودانك
و اسمعيهم مني خير ما تسمعيهم من حد ثاني
و خودي الكلام إلي يبكيك راهو إلي يضحّكك بيضحك عليك
أماني : شن فيه يا خالتي وردة شغلتيني راك
الحاجة وردة : شن قلنا سلم بنيتي متقصي عليا
راني نلقط في نفسي تلقيط
توا أنتي قداش ليك عام و عام بروحك
بنيتك كبرت و تفهم
و حتى بنيت المراحيم صبية كبيرة و تعرف
و أنتي دايرة معاهم إلي عليك و الزايد
مفيش وحدة في عمرك تحمل إلي حملتيه
شوفي حالك سلم بنيتي شوفي حالك
راهي الحياة بلا راجل صاعبة و متقدريهاش
متخليش روحك لكلاب الطريق يريشوا و يقطعوا فيك
أماني ضيقت عيونها و وجهها انقلب و خافت :
خيرك خالتي سامعة حاجة ؟؟
حاضر حاضر كملي سامحيني كملي هي
و الحاجة وردة قعدت تكح بقوة و بعدين تكلمت بصعوبة :
إلي مسمعتاش بوداني شفته في عيونهم بدون كلام
يا أماني يا بنتي
الوقت بدي يخوف و الدنيا متطمنش
و الناس مترحمش و أنتي بنت حلال
قدر ربي عليك و قطعت بيك هالحياة
مهوش آخر وقت
العمر قدامك مازال
عيشي حياتك و شوفي روحك
و جيبي وليد يخاوي أخته
متخليهاش بنيتك تعيش بروحها
و تظلميها معاك حتى هيا
افتحي عيونك إلي تصكري فيهم بالسيف
و شوفي من يبيك و من شاريك
فهمتيني يا أماني
و أماني إلي عيونها دمعوا تكلمت بوجع :
كأنك مش عايشة و شايفة يا خالتي
إلي يبيني و شاريني أني بدلته في ليلة سوداء
على رأسي معش طلع عليا نهار بعدها
كيف مازال بيشوف لي بس ؟؟
و الحاجة وردة طبطبت على يدها
و ابتسمت بحنية:
يشوف لك يشوف لك
من أمتى هوا عيونه انعمو عليك
أني خالته و نفهم عليه من شبحة
راهو قاعد شاريك و كانك تبيعي ألف مرة هوا شاريك
و بعدين أنتي مبعتيش
الوقت هوا إلي قهركم الإثنين
و حتى كانك مجيتيش و حكيتيلي
راني فهمتها بروحي ماهيش واعرة
و أنتم توا لا بدا تقهروه الوقت إلي فرقكم
متخلوهاش تبات في جلودكم
أماني متحشمة من الحاجة وردة
و من الموقف عمرها متخيلت تهدرز معاها
على موضوع عيسى تكلمت و عيونها لوطا :
باهي كيف ندير ؟؟
و عيلته و مرته كيف بيقب.....
و الحاجة وردة قصت عليها :
يقبلوا و لا عنهم ما قبلوا
و أختي وحدة منهم ،، سادكم تفكروا في غيركم
و ياريتهم حتى يستاهلوا
العمر واحد و ربي واحد
و مادام متبوش اديروا الحرام متدوروش حد
راهو مش حتلاقي حد يشريك لما الناس كلها تبيعك
أماني فتحت فمها و جت بتتكلم
لكن الحاجة وردة سكتتها :
اسمعي راني عزوز مريضة و متدهشينيش
و اسمعي الكلام
و مفيهاش عيب كان أنتي إلي نيشنتي عليه هالمرة
و بعون الله سهمك حيصيب يعني حيصيب
خالتك الحاجة وردة كلمتها عمرها ما اطيح في وطا
منبيش نقولك كيف اديري متغلبيش
النصيب أعمى و أنتي قوديه
إيييييييه كان نقولك شن درت
بش خليت المرحوم يجي يطلبني
من باباي الله يرحمهم كلهم
و في زماننا كنا منقدروش النفس نتنفسوه
و جبته جبته رحمة الله عليه
و لآخر نهار قبل ربي يأخد أمانته قالهالي
طيحتيني على قرني
مع أنه كان واخد بدل المرا ثلاثة
لكن أني حتى لما ربي تفكره ،،
تفكره و هو رأسه على ركبتي
قطرت له و شهدت له الله يرحمه
و غسلته بيديا بعد لا وصى خوته هالوصية
و مكانش ينادي فيا قدامهم كلهم كان يا وريدة
و لما يبي يدلعني يغنيلي
يا وريداتي يا وريداتي
يلي مفتحة في جناناتي
و مسحت دموعها بطرف رداها
و معش زادت حتى كلمة
تمددت عالسرير و غطت وجهها كله بالبطانية
و أماني معش قدرت تتحمل
و معش قدرت توقف قعدت تأخد في شهيق و زفير و شربت من المالقي المحطوط عالكومدينو جنب السرير
و حاولت تهدي روحها و بعد حوالي العشرة دقائق طلعت من الدار و طول للباب وطلعت من الحوش كله
و هيا مطبسة رأسها
و علا و عبير إلي كانوا مقعمزات يتفرجوا عالتلفزيون في وسط الحوش استغربوا تماما من الموقف كله
🌿🌿🌿🌿🌿🌿🌿🌿🌿🌿🌿
تجي أيامات على حياة الإنسان يحس فيها بشعور ممكن تعجز عن وصفه الكلمات
أني كماسة مقدرتش نلقاله حروف دقيقة بش نوصفهولكم
شعور أشبه بالحيرة
كأنك فجأة تلقى روحك في نفق مظلم
لا تعرف أنت وين بالضبط؟؟
و لا كيف جيت هني ؟؟ و لا مع من جيت ؟؟
و لا أمتى جيت و لا من جابك ؟؟
و الأصعب و الأقسى أمتى و من وين وكيف بتطلع؟؟
نقولوا حيرة .... ممكن تكون حيرة
المهم أنه هذا شعور جابر إلي كان يقرأ في مسج أميرة الأخير
(جابر خيرك تشوف في مسجاتي و متردش عليا شن صاير معاك)
و مش قادر يرد عليها
جابر من لما روحت أميرة من الثانوية اليوم و هو طول الوقت يهدرز عليها لأنه مكانش عنده محاضرات
يهدرز عليها و جوهم على ما أحلاه..
حب و مشاعر و حنان و لهفة و مراعاة
قعدوا هكي لقريب آذان العصر
و بعدين جابر قاللها أنه خلاص نعسان و عيونه بيتسكروا
و اتفقوا على أنهم أول مينوض من نومه يبعت لها مسج
و لو كانت تقدر تتصل بيه ادير له رنة
و جابر لما ناض حس روحه قلبه مغموم
و خلوقه مطبقات
و لما جي بيشرين على أميرة مقدرش
و لا قدر يرد على مسجاتها إلي توصل له مسج ورا مسج
كان تايه و حايس و حلقه مغصوص بدموع محبوسة
لدرجة بدي يتبنن في ريقه مرار
و نفسه شبه مقطوع و حاس بنار راكبة فيه من راسه لأصابع رجليه
ميندريش على روحه غير و هو نايض للحمام
و خش تحت الدوش
فتح الأمية المسقعة و وقف تحتها بحوايجه
دقات قلبه كانوا يرجفوا
و إيديه فيهم رعشة خفيفة حاول قد ما يقدر يهديها
قعد أكثر من نص ساعة على هالحال
لن قريب طاح من طوله
طلع يكر في روحه كران
لوح حوايجه و بدلهم بملابس جافة
و تلوح على سريره و رجع رقد بالنوم
و معش حس بشي بعدها للصبح
أما أميرته بعد لا شافت المسجات إلي تبعت فيهم لجابر يطلعوا لها مرئي و هوا ميردش عليها في الأول استغربت و لما جي الليل هيا معش بعتت له شي و هوا مردش عليها
فاتت عليها ليلة حرفة
و المشكلة أنها مقدرتش تمشي تبات مع أسيل و تفضفض لها لأنه بوها بايت برا الحوش
و اضطرت تقعد تبات مع أمها
و ربي عالم بليلتها كيف شكلها و كيف فاتت عليها
قعدت طول الليل تتقلب لن و أخيرا جاها النوم إلي كان متقطع و مليان كوابيس من كثر التخميم و الخوف
🌿🌿🌿🌿🌿🌿🌿🌿🌿🌿🌿
و في مربوعة أول مرة نخشولها
منذر خطيب سمر و صديقه أصيل مقعمزين يهدرزوا
منذر : يا را لو شفت ضيوفهم شكون كنت عذرتني
يا را تخيل أول أمس بس
لقيت عندهم (....) و (.....)
هاذينا ناس بعد تقعد معاهم في مكان واحد تنفتح ليك أبواب و أبواب واجدة مقفولة
فما بالك بعد يعرفوا أنك مناسب
آل رزق الله على سن و رمح
فرصة واحدة و بعدها تبقى فوووق فووووق
في العلالي
و نا طموحي و إلي نبيه واضح
فرصة واحدة بس نعدي فيها لدولة أوروبية أو أميركا و ننضم للسفارة فيها و بعدها تشوف صاحبك كل شي يمشي كيف مأنا مخطط له
أصيل : على أساس داير شي جديد أنت وضعك مرتب لعند توا و وظيفتك في السفارة مضمونة
منذر : لاااا مش كيف
مش كيف أبدا لما تعدي على أنك موظف بسيط في السفارة و في دولة بسيطة و على قدها
و لا تقعد موظف كبير بوصاية كبيرة من معارف آل رزق الله الكبااار و الكبار واجد و في دولة أوروبية كبيرة
و ياريت تكون أميركا و منها تقول لليبيا و العيشة فيها باي باي بالقوة،، تكون بيزنس ليك و شغل لحسابك
بعد لا تتعرف على الناس المرتشة
و بعدها تفوت الخدمة الحكومية و سريبها لو توفقت
في البزنس
أو تشتغل الإثنين زيادة الخير خير و خير
و تودع كل القرف إلي قعدين نشوفوا فيه في هالبلاد أنت و ضناك لأبد الآبدين و تعيش حياة منظمة
و مستقبلك يقعد مضمون
أصيل : و مادامك مرتبها و حاسبها ليش
ماجبتش سيرة سمر في حساباتك
منذر : لا تقدر تقول سمر مجرد كوبري ،،
جسر يوصلني لطموحي و تشاو
نسافروا و تقعد معاي لعند انظم أموري و نحط كرعيا على أرض صلبة و بعدها كلمتها و نردها لهلها معززة مكرمة
أصيل : بالبساطة هذي ؟؟
و هلها ،، آل رزق الله مش خايف من نفوذهم
أو يستعينوا بمعارفهم الواجدين يطقوا فيك و يأذوك وين ما تكون
منذر بشر : ليش شايفني عيل عشان تقول هالدوة
بنتكم معاد فيه نصيب بيننا
و كل حد عدا في حاله
و لو وجعولي رأسي نمسكهم من يدهم يلي توجع ،،
بنتهم و عرضهم و سترتها حيسكتوا
و حيبوسوا الأيادي عشان مندويش و نفضحهم و نفضحها
أصيل : دماغك سم يا صديقي
دماغك سم
و منذر حط تليفونه على ودنه بش يشرين على سمر من غير ما يعلق غير بنظرات مليانة شر و تخطيط أسود و شيطاني
🌿🌿🌿🌿🌿🌿🌿🌿🌿🌿🌿
في حوش الحاجة وردة
عيسى كان واقف مع أخته عبير في المطبخ
هيا تغسل في الأماعين و هو يساعد فيها
كان ينشف في الحاجات إلي تمصمص فيهم و يرجع فيهم لمكانهم
و أخته علا روحت مع راجلها و صغارها و أمه خشت للحمام ادوش بعد لا روح آخر جار من الجيران كان عندهم
عيسى : علاش حاس أنه فيه حاجة داسينها عليا
و أنتي بالذات يا عبير من أمتى تعرفي ادسي عليا
أني من لما مشيت روحت بصابرين للحوش و جيت و أنتم وجوهكم مقلوبة
و لا أنتي و لا أختك قمتوا عيونكم فيا
خيركم شن صار معاكم في غيابي ؟؟
عبير حطت الطنجرة إلي تغسل فيها عالرخامة
و تلفتت للباب و تكلمت بصوت منخفض :
بنقولك لكن بالله عليك أمي متقوللهاش
و علا بالذات فكني منها و من لسانها و الله لو تعرف أني ...
و عيسى قاطعها بعصبية :
تكلمي الزفت يا عبير من أمتى تعرفيني نعاود في الدوة أني تكلمي طول
عبير و عيونها على باب المطبخ:
خالتي وردة بكري قالت لنا لما تجي أماني بنت جيرانهم دخلوهالي لداري طول
و هيا خشت لدارها رفعتها ماما بش تصلي فيها المغرب و طلعت و خلتها
شوية و طقت علينا البنت فتحت لها علا و دخلتها على خالتي في دارها
و بعدين الباب تصكر طول
و معش سمعنا منهم شي لن طلعت جارتهم و وجهها منفخ و خليقتها مقلوبة شكلها بكت لن خلاص
و لما خشينا على خالتي لقيناها تبكي بدموعها
و ترعش لن خفنا عليها
و علا قعدت تقوللها :
شن دارت فيك بش غششاتك هكي
قوليلي و أني نمشي نقتلها
لكن خالتي كشخت عليها تكشيخة حارة أول مرة في حياتي نشوف خالتي وردة هكي
تكشخ بحرارة و معصبة هكي و الله لن خفت حتى أني
و قعدت تقوللها :
ردي بالك سادها البنية إلي راته من هالحياة
إلي ما خلت ما غيبت عليها من هم
البنت ما ذنبها في شي ما ذنبها في شي
من عشرة سنين لليوم و بعد إلي داراته
راهي ماذنبها في شي
و إلي داراته ماهوش بجودتها و ماذنبها في شي
اطلعوا و خلوني بروحي اطلعوا و خلوني بروحي
ماما قعدت تبكي و شدت علا من يدها و طلعتها
خالتي وردة كانت تبكي بالصوت قطعتلي قلبي
و معش طلعت من الدار لن صلت العشاء و بعدين اتكت في سريرها ثاني و قالت لماما قولوا للناس تاعبة و متقدرش تقابل حد
و ماما عطتها دواها و غطتها و طلعت
عيسى لما يسمع في كلام عبير الوطا معش قدر يقعد فيها
و السماء ماطالهاش
و أفكار ترفعه و أفكار تجيبه
شن كانت تبي خالته من أماني؟؟
و شن إلي صاير بينهم
كمل تنشيف الاماعين مع عبير و معش زاد و لا كلمة
و طلع من المطبخ لقي أمه تصلي في وسط الحوش
مشي لدار خالته فتح الضي لقاها راقدة
غطاها كويس و طلع
و خدي التوب متعه و مفاتيحه من المدخل و لبس في رجله و مشي لسيارته
قعمز فيها وصكر عليه
و عيونه على حوش أماني
فتح تليفونه و حط على رقم أماني
و شرين عليها و كان الرد
( الرقم المطلوب مقفل )
تنهد بحرارة و قلبه معبي بهم
و وجع ليه عشرة سنين و لحد اليوم
يزيد ما ينقصش😔😔
🌿🌿🌿🌿🌿🌿🌿🌿🌿🌿🌿
فيه مثل متعارف و متداول بيننا يقول
( الغريق يتعلق بقشة)
و الإنسان إلي يكون عايش على حلم طول إلي فات من عمره متمنيه و يطلب فيه من رب العالمين
و لما رب العالمين يحقق له أمنيته و يلبي له أمنيته
يحس كأنه شد بين إيديه سراب ،، و كان متأمل في عذاب و حزن
في لحظات قهر و يأس يقول ياريته هالحلم قعد حلم
و متحققش ،، ياريتنا قعدنا نشوفوا منه في الجانب الحلو بس
الجانب الوهمي إلي لما نتخيلوه نموتوا من فرط السعادة و ترتسم البسمة على شفاهنا
و قلوبنا تبلغ الحناجر من حلاوة الفرحة
لكن للأسف اليوم مفيش في إيدينا غير واقع لحلم تحول لكابوس مؤلم و قاسي
لكن مضطرين نعيشوا و نتعايشوا
لأنها هذه الحياة
و هذه هالة إلي هكي صاير معاها حرفيا
هالة عاشت سنين و سنين تتمنى في عابد
تحلم بعابد
و تطلب من الله في عابد
و لما أصبحت زوجة عابد قدام ربي و خلقه
الأحلام تلاشت و الأماني رست على شواطئ الخيبة و الألم و الوجع
لكنها هيا توا الغريق إلي كلام أماني عن أنه لما تجيب ولدها أو بنتها عابد يتغير، ، و تتحسن علاقتها معاه
و تتيسر أمورهم ورتها القشة إلي تتعلق بيها
لكن قبل هكي فكرت كيف ممكن تجذبه ليها
و تحاول و تحاول بدون كلل أو ملل
و توا هيا مقعمزة هيا وياه في صالة المعيشة و يتفرجوا
و هالة تبي بأي طريقة تقنعه بلي هدرزت عليه مع أماني الصبح في الصيدلية
هالة : بالله عليك يا عبيدي قول باهي أرجوك
و الله خاطري نطلع و نغير جو متأكدة حتتغير نفسيتي
ليا من شهر العسل مطلعتش معاك لمكان بروحنا و حني قعدين عرسان ره
القعاد في الحوش خلاني عايشة طول الوقت في جو المرض و الوحم لن خلاص قريب ننتهي نحس في روحي
أرجوك يا عابد أرجوك أرجوك حبيبي متقولش لا
و عابد تلفت عليها بكامل جسمه و إحساسه بالذنب تجاهها مكبل رقبته بأغلال من حديد و نار :
علاش تترجي فيا من بكري بس بالله عليك تسمعيني و تفهميني بالعقل أني يا هالة منبيش نقولك لا لأنه هكي نبيه لا
لا و الله ماصارت
أنتي مريضة و حامل و السفر و السيارة مش باهيات عليك و خطر على صحتك و على الجنين
متنسيش قداش ضربتي إبرة تثبيت لحد الآن
منبوش نخاطروا
هالة : عارفة و مش ناسية و أصلا كلمت الدكتورة و قالت لي وضعك مستقر شوية
و تقدري ترجعي تمارسي حياتك زي قبل و طبيعي جدا
و جتى لو بنرجع نشتغل في الصيدلية
غر متضغطيش على روحك بش متتعبيش
بالله عليك عبيد بالله عليك منبيش نسافروا برا
ارفعني لأي مكان نغيروا فيه جو نقعدوا فيه يومين ثلاثة بس
نشموا هواء نظيف و نبعد عن جو المرض و التعب
نبي نصحصح و يولي حالي باهي أرجوك
عابد سكت شوية يشوف للتلفزيون و بعدين تنهد :
فيه مزرعة في أطراف المدينة حاجة مليحة
صاحبها يأجر فيها و أني نعرفه كويس
توا نشوفه لو قالي فاضية و مش مأجرة نمشولها طول
نقعدوا فيها أيامات،،
مليحة فيها شجر و امية و نظيفة و واسعة
و فيها حوش قنين الصيف إلي فات واحد من الجماعة مأجرها مداير فيها عرسه مناقصها شي
لكن بشرط نمشوا للدكتورة و نشوفوا شن توصينا قبل
هالة نطت عليه قعدت تبوس فيه من خدوده :
يا ربي سلمك ليا و فرحك زي ما فرحتني
خلاص نمشولها لأنه موعد مراجعتي معاها بعد غدوة و منها تمشي معاي تشوف البيبي
و عابد حط إيديه الإثنين على خصرها و قامها قعمزها كويس في حجره و هو يشوف لها برغبة :
تبي تشكريني و تبوسيني اشكريني كويس
و لا قعدة متعلمتيش كيف ؟؟
شن رأيك نعلمك ؟؟
مدامه دكتورتك أعطتني الكرت الأخضر
و هالة حطت رأسها على كتفه
و دست وجهها منه خجلا لكن عابد مخلاهاش
إلا بعد ما عاشوا ليلة شرح لها فيها درسها بتأني و مراعاة
بعد ليالي طويلة من الجفا و البعد
رقدوا فيها الإثنين و عابد مقرر يعوض هالة شويا من إلي مدايره فيها
و هو يقول لنفسه برغم كل الإهمال و التهميش إلي محسسها بيه لكن حبها ليا مخليها تسامح فيا
و معيشتني سعيد و مرتاح
و هالة فيه بذرة أمل أنزرعت في قلبها أنه يجي يوم
و عابد يحبها و يحس بيها زي ما تتمنى و تحلم
🌿🌿🌿🌿🌿🌿🌿🌿🌿🌿🌿
صابرين بعد لا روح بيها عيسى دارت دورة في حوشها
و بعدين خشت دوشت و فتحت شنطتها بش تأخد حبة من حبوبها قامت الشريط في يدها
فكرت شوية و ترددت و بعدين حذفت الشريط على طول يدها جي فوق دولاب دار النوم
بش تبعده عن عينها و يدها
و مشت للمطبخ سخنت طاسة حليب دافية و حطت فيها عسل و حركاته و بعدين قعمزت في سريرها
بعد لا طفت الضي و ظلمت الدار
شربت طاستها و قعدت تتقلب حوالي ثلث ساعة
و لما ما قدرتش ترقد و قلقت جبدت تليفونها من فوق الكومدينو تبي تكسد عليه لن تنعس
و تنسى شعورها بالحاجة للحبوب المخدرة
و أول ما فتحاته و ربطاته بالنت
بدت الإشعارات ورا بعضهم
لكن أكثر شي لفت لها نظرها الكلام إلي باعتهولها طلال من رقم مش متسجل عندها
( تحسابي روحك فالحة و تحظري في أرقامي
تفرجي و شوفي شن عندي ليك
تفرجي كويييس بش غدوة
نلقاك زي الكلبة تحت رجليا يا 🤬🤬🤬)
و بعده فيه فيديو مدته 10 ثواني و فيه لقطات +18
غر صورة الأشخاص إلي فيه مدغدشة
لكن مكانش صعب على صابرين تعرف من هما الأشخاص إلي في الفيديو
و بعدها فيه كلام ثاني مكتوب
( لو مدورتينيش أنتي و جيتيني برجليك خوديها مني كلمة راجل الفيديو هذا و غيره من الفيديوهات حيوصل للدكتور عيسى كاملا و من دون تعديلات و لا إخفاء للوجوه و لا شن رأيك انزلوها للشباب الليبي المحروم عارفة الوضع عندنا جفاف و شبابنا محتاجين فيديو ساخن هكي يفجروا فيه طاقاتهم صدقيني حتبدي مشهورة في ليبيا زي مايا خليفة و أكثر ،، حتى هوا اللحم الوطني غالي في السوق و أنتي تعرفي)
صابرين كانت تقرأ في هالكلام و هيا عيونها مفتوحات على وسعهم و إيديها إلي شادة بيهم التليفون يرعشوا
بحركات عشوائية و هيا تبكي و تعيط
(الله يلعنك يا طلال الشيطان
لعنة الله عليك يا هويدة و يا طلال
لا الله يلعني أني .. أني ملعونة و نستاهل الحرق)
مسحت كل المسجات إلي وصلت لها و الفيديو مسحاته من المحادثة و بعدين صكرت تليفونها
و ناضت شافت فوق الدولاب لقت روحها بحالتها الهستيرية هذه مش حتلحق و لا حتقدر توصلهم
طلعت من الدار مشت لدار الضيوف كان فيه وسائد بالسريتة فتحت وحدة معينة محطوطة في الطرف و جبدت منها شريط
خدت منها حبتين بلعتهم في مرة واحدة و بعدين رجعاته في مكانه و ولت لدارها خشت لسريرها بعد لا طفت الضي و لسانها يردد في جملة واحدة مفيش غيرها
( شن درتي في روحك يا صابرين)
🌿🌿🌿🌿🌿🌿🌿🌿🌿🌿🌿
و في حوش شكري
في دار البنات أسيل خشت بعد لا كملت تنظيف المطبخ
لقت عمتها غامة وجهها بالبطانية و تبان راقدة
و عالفراش إلي جنبها بيسان ناعسة و لعبتها في يدها
مشت طول لبيسان نحت منها لعبتها و ساوتها عالفراش و غطتها كويس
و فتحت فلاش تليفونها و صكرت باب الدار و الضي و خشت لفراشها بش ترقد
و كالعادة فتحت النت تبي ادير فيه دورة قبل لا تنعس
و حطت تليفونها صامت بش متزعجش عمتها و بنتها
و بدت الإشعارات توصل فيها تباعا
فيس بوك و انستا و غيرهم
لكن إلي لفت نظرها و هيا تشوف فيهم يوصلوا
مسجات عالواتس آب من رعد العملاق
فجأة قلبها دق بقوة لدرجة شافت جهة عمتها كأنها كانت خايفة يوصلوها صوت هالدقات
و فيه شعور غريب حست بيه و هيا تفتح فيهم
المسجات كانوا كالتالي
: (مرحبا أسيل كيف الحال ؟)
(أسيل ممكن بعد تكوني فاضية تبعتيلي مسج نا طول الوقت عندي تغطية نت)
(أسيل محتاج ندوي معاك بعد تفضي كلميني)
و أسيل تتأمل في الحروف المكتوبات وقت طويل و مش عارفة لا شن تكتب و لا كيف ترد عليه
لن وصلتها منه رسالة :
( أسيل )
و أسيل لما شافتها عرفت أنه شاف مسجاته انقرت
و معش تقدر متردش عليه
طول كتبت له (نعم )
و الرد جاها على طول
( مرحبا أسيل كيفك)
( الحمد لله كيف حالك أنت ؟)
(نا بخير الحمد لله كيف الأهل وشن أخبارهم
و دراستك ؟)
(أهلي كويسين حتى هما الحمد لله و دراستي ماشي حالها ملخبطة شويا لكن ماشية)
(ليش صاير شي عشان تقعد ملخبطة)
(المفروض كنا نديروا امتحانات الفترة الثانية أقل شي من أسبوعين فاتوا لكن الوضع الملخبط على خاطره تأجلوا)
(أسيل نقدر نتصل بيك مكالمة ؟)
(لا و الله منقدر آسفة)
(تمام مش مشكلة)
(آسفة بجديات😔)
(خلاص قتلك تمام و عشان الامتحانات إن شاء الله بكرا تتعدل الأمور )
(رعد عمتي راقدة جنبي و الله منقدر نرد عليك
و لو طلعت برا الدار و كلمتك مرت عمي حتسمعني متزعلش باهي)
(خلاص أسيل و الله العظيم يا بنتي ما زعلان
بلاش تعامليني برسمية عشان ما نزعل منك بجد)
(لا لا خلاص خلاص أهو سكتت قولي وينك مغطس ليك أيام معش شفتك فيهم لا في الثانوية لا في الشارع)
و رعد من داخل كان فرحان لأنها حست بغيابه لما كان مسافر يعني حست بيه و فكرت فيه بشكل من الأشكال
(كنت مسافر عشان عندي شغل ضروري كملته و رجعت)
(وين سافرت )
(كندا)
(كندا مرة وحدة سعدودك أني من الطاقة السلبية و النكد إلي حواليا نحس في روحي متمنية نمشي حتى لطرابلس و لا أي مكان برا..... و نغير جو)
و رعد وصل للي هوا يبيه ،،
يعرف علاش الصبح كان واضح على وجهها
زعلانة و متضايقة
(أسيل كنك صاير معاكِ شي مضايقك احكيلي)
(هوا أني نبي نحكيلك و مش عارفة علاش
لكن خايفة نوجع لك رأسك)
(يا بنتي اوجعيلي رأسي نا مبسوط)
(بنتي 😊😊؟؟)
(أهه بنتي نحنا بيننا 11 سنة و أنتي مازال صغيرة واجد)
(أنت مواليد 87؟)
(و أنتي مواليد 98😉)
(حيه عالجو كيف عرفت ؟)
(تقدري تقولي مصادري الخاصة و ممكن بلاش تلفي و تدوري و تحكيلي كنك و ليش الطاقة السلبية؟)
(القراية من جهة
تشوف في الجو كيف خايفة يوقفوا القراية نهائيا السنة هذه و تضيع علينا السنة و حني شهادة
و صايرة معانا مشاكل في الحوش مبتش تنحل و قصة حزينة)
(نقدر نعرفها نا المشاكل هذي؟؟)
(قصدي يعني لو ممكن نساعد ؟؟)
(اممممم هو منقدرش نقولك عليهم كلهم لأنهم خاصات بغيري)
(لكن فيه وحدة ممكن نقولك عليها و أنت ممكن تساعدني فيها)
(تمام قولي و ما يهمك في شي)
(عندي عمي مرتبه واقف ليه شهور و أنت زابط حوش بلا مرتب كيف
و على قد ما راجع كل مرة يقولوله ناقصة ورقة أو متسجلة خطأ و بعد لا يشحطوه يمشي لكذا مكان بش يصلحها و لا يحطها في ملفه يقولوا له مش هذه
فيه حاجة ثانية ناقصة
و الله مسكين لن تعب في جرته و حالته النفسية ولت له على قلبه و جاته جلطة خفيفة غر ربي ستر كان هذا مشي فيها)
( أسيل تسمحيلي نتدخل؟؟ ممكن نقدر نساعدكم بشي ؟؟)
(هههههه رعد العملاق ما يصعب عليه شي أني متأكدة)
(خلاص خليها على رعد العملاق و بعون الله يكون خير)
(مش رح نقولك لا
على خاطر عمي أسعد)
(خلاص بعد نوصل لشي نبلغك
تم)
(تم يا قلم 🤭🤭)
(أسيل)
(نعم)
(فيه شي نبي نحكيه لك بس ما نبي تفهميني بطريقة مش حلوة)
(إن شاء الله خير قول رعد)
(ممكن تخلينا على تواصل
يعني نتصل أو نتراسل معاك في أي وقت
للصراحة لو سألتيني ليش نقولك مانعرف ليش
نا إلي نعرفه أني نبي ندوي معاك و بس)
(رعد لو مفكر فيا بطريقة مش حلوة لا ره
أني مش هكي و لا عمري حنكون هكي لو مهما كانت الظروف)
(لحظة لحظة يا بنت أي طريقة مش حلوة تحكي عنها
نا و حق الله ما فكرت فيك غير أنك أسيل
أسيل و بس نحكي معاك و نكون قريب عليك و بس
لا فكرت في شي أكثر و لا أقل)
(معناها خليني نقولك أني و نتكلم معاك بصراحة
قصة أنك تتصل بيا في كل وقت و نقدر نرد عليك هذه صعبة شويا
أنت تعرف خدمتي في المزين
و قرايتي و زيادة لما نبدأ في الحوش مرات تكون الشعشبونة في الحوش منقدرش نرد عليك)
(شعشبونة؟؟)
(ههههههه هذه مرت عمي أسعد
اسمها حكمات و اسم الدلع شعشبونة)
(ليش حاس أنها كيف السبة؟؟)
(لا أي سبة بالله عليك توا أني وجهي وجه سبان
أني بنية كيوت و طيوبة و العيبة ما تطلعش من فمي
دلع دلع الشعشبونة دلع خش و اسأل عمي القوقل توا يقولك من هيا الشعشبونة)
( تم يا قلم)
(ههههههه حيييه حفظتها
خلاص اصبر عليا أربعين يوم و حنخليك تحفظ مصطلحاتي كلللللها)
(نفهم من كلامك البداية كانت من عند
شعشبونة و تم يا قلم)
(إيه أعطيني أربعين يوم بس)
(تمام .. أسيل أكيد اليوم واعية بدري
و محتاجة ترتاحي
و نا ما نبي نسهرك معايا)
(أوكي)
( تصبحي على خير 💓)
(ليلتك سعيدة و قدامك كل خير)
🌿🌿🌿🌿🌿🌿🌿🌿🌿🌿🌿
يتبع ✍️✍️
رجاء عزيزاتي متنسوش التصويت بنجمة
⭐️⭐️
و تعليقاتكم
و توقعاتكم الحلوة
فرحتلي قلبي
و أعطتني حافز للكتابة أكثر
💕 قراءة ممتعة 💕
ليلتكم سعيدة و قدامكم كل خير
Masa 💎💎