شَوقي إِلَيكَ نَفى لَذيذَ هُجوعي
فارَقتَني فَأَقامَ بَينَ ضُلوعي
أَوَ ما وَجَدتُم في الصَراةِ مُلوحَةً
مِمّا أُرَقرِقُ في الفُراتِ دُموعي
ما زِلتُ أَحذَرُ مِن وَداعِكَ جاهِداً
حَتّى اِغتَدى أَسَفي عَلى التَوديعِ
رَحَلَ العَزاءُ بِرِحلَتي فَكَأَنَّما
أَتبَعتُهُ الأَنفاسَ لِلتَشيّعِ
لقائلها
عرين الصياد بقلمي شذرة
امل : جاي اكنس بالگاع گدام البيت واجه شاكر
خطيه ما فوت السياره جوه خلاها بالباب حدر
واجه يمشي مدنگ سلم وسأل على ديالا
گتله تفتر وره البيت
راح مبتسم عرفت يريد يفززها
كل نوبه يسوي هيج
ديالا : بثواني طلع شاكر من وره المخزن
رمقني بنظرة سريعه كلها غضب وجيت على سنان جضعه بالگاع لزمه ضرب بوكسات
شهگت وسديت اثمي انهد حيلي ابني راد يگع مني كلشي مگدرت اسوي لا احجز ولا اصرخ
شاكر ما انطه سنان فكه فلشه تفلش
اخر شي گام وجان يشيل الكرك تا يضرب سنان
معد اتحمل صرخت وجان اگف گدامه اتوسله يعوفه
گتله هاذ خبل والله يظل يهذي عوفه
هد الكرك من ايده ولزمني من حنوكي
سنان بساع نهزم وشاكر ظل مجلب بيه
عيونه تريد تطلع
شاكر : مهبول مو
امشي نروح غادي ونتفاهم
ديالا : جرني من ايدي معد يندل بروحه نسه اني شايله جاهل گام يسحل بيه سحل ردت اگع
شاكر اترجاك ابني راح يگع بس اواش اصبر اني امشي
اخذني عالسياره
وفتح الباب تا اصعد گاز على سنونه
امل :شفت شاكر اجه گايد ديالا من وره البيت يمشون سريع وصعدها بالسياره
ذبيت المكناسه من ايدي تا اروح اشوف شكو
ديالا : صعد شاكر وجان تجي امل تگف يمي لزمت الباب
امل : وين تريدون شكو
شاكر : نريد لهنه تعذريلي من عمتي والولد مستعجل ما سلمت عليهم
امل : شنهي تروحون هسع خوما صاير شي
ديالا حت ملابسها وملابس ابنها ما ولمتهم وحليبه ومميته
شاكر : بعدين اجي اخذهم عدنه غيرهن بالبيت
ديالا : مدنگه راسي وحاضنه ابني
شاكر حرك السياره ما خله حت امل تكمل سالفتها
امل : شبيهم هذول اكو واحد يروح ويخلي حليب ابنه ومميته وحت ملابسهم وضع شاكر ما يطمن
وديالا خايفه بس لا عدهم طلبه لا سامح الله
ديالا : شاكر امانه سوق على كيفك راح تگلبنه
ما سمعني ولا رد ظل مسرع والسياره تخوط بيه
گمت ابجي واشاهگ
كل همي جان ابني حاضنته وارجف ما وصلت البيت وبيه دم
حدرنه بساع يمشي گدامي ويگلي ورايه بساع
طبينه البيت همزين ماكو احد كلمن بشغله
التفتت عليه واخذ مني ابني
هاي وين تريد بي انطيني الوليد شاكر
شاكر : اصعدي جدامي الگاج بالحجره
ديالا : گالها واخذ الوليد
وفات عالمطبخ يمكن يريد ينطي للبنوات ظليت واگفه عالدرج وانتظره
اجه عاگد الحواجب ولزمني من ايدي يجر بيه
شاكر : ما گتلج الگاج بالحجره
ديالا : هدني شاكر ليش اخذت مني الوليد
ما جاوبني فتح باب الحجره ولگحني بيها قفل الباب واجه يمي لازمني من حنوكي لزگني بالكنتور وعيط عليه
شاكر : هاذ سنان ابن عم حامد النذل
الي من وراه مات مشعل اخوي واهلج شعنده واگف يمج ويحجي براحته هااا احجييي انطقي وانوب مفرعه جدااامه مفرعه
ديالا :لزمت ايده وادحگ بعيونه
ما عنده شي والله فات بطريقه وسلم عليه واني ما عبالي الملفع واگع من راسي والله
تعصب وجان يضرب الكنتور بوكس بصف وجهي
خفت وگمت ارجف
: راح تضربني مو بدون ما تسمع مني
ــ دحگ بعيوني وعاط بيه
شاكر : احنه ما نضرب النسوااان ما نضربهن
ليش تجذبين عليه لييش سمعت شگالج سمعت
اني هين گلبي طاگ عليج ما انام ليلي افكر شلون اراضيج شلون اخليج تسامحيني
ما گدرت اصبر لباجر ساگتني رجليه عليج من شوگي بس تا اشوفج تالييي الگاج واجفه ويه سنان ولا جن انتي على ذمة رجال ما حسبتيلي احساب
ولا حترمتيني
وانوب اسمع حجي يشل جبروج اهلج عليه ديالااااا جبروووج واني اگول ليش من ساعة اخذتج الگاج تنحبين بالحجره وكل ما اسعلج تگولين ابجي على اهلييي
واني الثول اگعد اهجد بيج وينكسر گلبي علييج
شسمع منج هاا شسمع شتبررين
طلعوو اهلج جابرينج عليه
عليش ما گلتيي من البدايه علييييش
ديالا : بحياتي ما شفت شاكر بهاي العصبيه
هدني وجان يثور بالحجره يشيل ويرجد
شكو شي گدامه دفره رجع عليه انوب لزمني عكسي وعيونه بعيوني
شاكر : انطقيي ليش جبروج عليه ليييش سولفي مو گلبي راح يگف
ديالا : دحگت بعيونه وحجيت بثقه ودموعي تصب
ــ اترجاك لا تظن بيه السوء هاذ سنان من فتحنه عيونه عالدنيا شفنا انته شفت بيته بصف بيتنا لزگ وطريقه من وره بيتنا من سنين يعتبرنه مثل خواته جان حت عالمدرسة ياخذنه من احنه زغار مو حجيتلك كلشي من زمان عن جيرانه ظل هاذ طبعه وو
قاطعني وما خلاني اكمل عاط بيه
شاكر : انلصمييي اني لو اظن بيج السوء ادفنج بمكانج وانعل بليسج
ما عليه من جنتي زغيره ما عليه حت گبل ساعه من اخذتج عليه من صرتي على ذمتي وغاد
اريد افتهم شلون ظليتي واگفه گباله وانتي مفرعه ليش من شفتي ما طبيتي جوه وشلون اهلج اجبروووج
ديالا : اترجاك تفهمني وتركز تره هيه لحظات والله
جنت اتمشى وطلع بوجهي تا يروح على شغله
ما لحگت لشي والله وذب هاي الحجايه ورزلته واجيت انته انطيته حگه
ـ ضغط على ايدي حيل ودفعني عالكنتور
شاكر :لا تثولين السالفه انطقييي ليش جبروج عليه
لييش احجي لخاطر ربج
ديالا : شهگت ابجي واعصر باديني
ـ محد جبرني والله اني ما ردت اتزوج ردت اكمل دراسة من خطبني ابو نشمي الك رفضت كل همي جان ادرس
وراهه من صارت الكونه بگاعتنه وانته وابو نشمي جنتو موجودين وفزعتو للولد
بيومها قررت اوافق عبن شفتكم سند لأخوتي
هاي كل السالفه
رفعت عيوني ادحگله جان متعصب يفور
عافني وطلع ما حجه شي
گعدت الوب بالحجره
بطني گامت توجعني من القهر
ظليت فتره مسحت وجهي وحدرت جوه
لگيت كواكب شايله ابني يبجي
سلمت عالبنوات واخذت ابني
محد سألني شي صعدت على حجرتي
ابجي بعبره انحمست
اني ليش هيج حظي ليش
صار الضهر وشاكر ماكو
نومت ابني وحدرت جوه اعاون البنوات
امل : اولم بملابس ديالا وابنها وافكر هاي شجاهم هيج راحو حت عماد تعجب الله يستر هذول طلايبهم ما تخلص عبالك ديالا انضربت عين
كملت الملابس وخليتهم على صفحه خاف شاكر يجي تا انطيهم اله
خطيه هيه حت ما ارتاحت بجيتها هاي
لگت طلايب رافده وحميد گدامها
ليال : گاعده بحجرتي مگدر اطلع
من وره رافده وشكحه جنت بوحده صرت بثنين
اشكال الحجي يذبن وكله قهر وسم
ظليت لحد الضهر جاعو جهالي وگمت اسويلهم اكل
طلعت عالمطبخ وجان تلحگني شكحه
تعد وتصف عبالك اني گايله لحميد اضرب رافده
ما خلت شي ما حجته تريدني اجاوبها
بس ما رديت مدنگه اثرم طماطه ودموعي تصب
شافتي ساكته وجان تشيل الطماطه لگحتها بالگاع
ولزمتني من عكسي تصيح عليه
شكحه : بربوگ ام الزلم ارتاحيتي هسع
من طشرتي بيتي اخوج النذل معند ما يفعل يطلگ رافده والله لسود عيشتج يا حيوانه
ليال : ما جاوبتها اخاف تضربني
فاتت رافده وجان تشيف خياره وتملحها وتگعد تاكل
وتنحش شكحه علينه وهاي مو مقصره
اخر شي گلبتها عالسحوره
هديت ايدي منها وگمت اغسل تمن
شكحه :بربوگ علمي مرت اخوج رافده گليلها وين سويتي سحر لصائب وخليتي محبس بيدج حت المحلات وحصته من البيت سجلها بأسمج عوزه بس يعبدج
ليال :صديت عليها وما حجيت ورافده تفاجأة
رافده : يمه كل عقلج تحجين يعني صائب سجل حصته بأسمها ليش
شكحه : خبلته يمه هاذ ضرب السحوره روحي عليها خل تعلمج وسوي مثلها شجاج جان هسع حميد هم مسجلج شي بأسمج وطاير بيج مثل ما صائب طاير بهاي العوبه
ليال :شنهي سحرته يربي هاي شجاي يحجن من اظل هين دقيقه اموت هديت كلشي من ايدي وطلعت من يمهن بساع نهزمت على سعاد اول ما طلعت بوجهي نفجرت ابجي
سعاد : شبلاج يولي منهو وياج بس لا ضربنج انوب
ليال : معد اتحمل حجيهن يا سعاد والله تعبت ياريت يضربني ولا يسبن اهلي ويفشرن ويغلطن
انوب يگولن عليه اسوي سحر هو السحر مو حرام يا سعاد والله حت ما اعرف هاذ شلون يصير
سعاد : الله يعثرها انتي وين وين هالسوالف
هاي شكحه جبيره ومو خبيره اسليمه اطمها اكود
ليال : اني ما گلت لصائب يسجل شي بأسمي والله
هوه من كيفه اول ما ولدت راح سجل المحلات وحصته من كلشي بأسمي واسم الجهال
گال يريد يضمن مستقبلهم عبن بوكتها جان خايف من ماجد
شفتي انتي شسوه ماجد بينه
سعاد : اي يگلبي ادري بي حجيتيلي
زين هيه ما تروح تحجي ويه ابنها عش تطلع فعلها بس عليج وبعدين صائب ما بايگ حلالها هيه حصته حطها بأسمج واسم ولده وما يلام ضمن حگج ومستقبلج
ليال : لعبت نفسي والله سممتنه بيهن
ما اريدهن خل تاخذهن بس تفك ياخه عني مو راح اطگ ما يفعل صائب نعزل وحدنه مليت والله
هاذ مو بيت جحيم
سعاد : كافي تبجين مو زيلج يولي هسع تخربين وين اگوم اعول بيج اسكتي لخاطر جهالج
يالله گومي شاهدي وجهج.
وخليهن يظلن يهرطن اسمعي من هاي الأذن وعبري من هاي صيري گويه يولي تره الضعيف ابيتكم ينوجل اگفي جدامهن والي تغلط عليج ارعطيها بالنص
ليال : شنهي ارعطها بالنص
سعاد : يعني شگيها وصلتين
ليال : كل عقلج يمعوده اني منين اگدر
وهنه حيل كبار وشكحه سمينه
سعاد : تره هيه معنى الحجي يعني من اگول لبشر ارعطگ بالنص خوما اسويها صدگ
لا القصد من هاذ يعني تگفين وتردينهن عنج
ليال : اذا اردهن يضربني
سعاد : الله يضربهن ان شاء الله
زين رجلج الشفيه شنهي موقفه
ليال : گام ينهزم من البيت من وراهن من گرگتهن
سعاد :ينهزم ويخلي الضيم عليج
هاذ صائب يراد ادزله لعمامي يعلمونه الرجوله
ليال : جان بركات يفزعلي منهن بس مدري وين راح خايف لا تطلع الحمله عليهم عبن فرار من الجيش
سعاد : شلون قهر يربي زين جان دزيتي خبر لعماد خلي يجي ياخذج
ليال : لااا لا مستحيل ادز على عماد وياخذني
صائب هددني اذا اروح ياخذ،الجهال مني
سعاد : يبو يالبهض هسع كافي تبجين ورمن عيونج گومي غسلي هذولاك جهالج يدورولج
ليال : جوعانين هذول جنت اسويلهم غده وما گدرت
ما خلني
سعاد : عجل ظلي هين راح اناديهم يجون يتغدون هين
ديالا : مر شهر وشاكر متجاهلني التحق ورجع ونفس الشي گام يعاملني مثل الغريبه معد حت يطيعني على حاجه يولم ملابسه وحمامه ويخدم نفسه وينام ما يصد عليه انقهرت حيل حسيت بشعوره من هجرته
صرنه مثل الغربه بهاي الحجره ما نحجي ويه بعض
اريد اگله يروح يجيب ملابسي ظلن يم اهلي صارلهن شهر بس مگدر اخاف من انفعالاته نومت ابني
وحدرت جوه شفت نشمي مبدل يريد يطلع
شافني وجان يگف
نشمي : ها مرت عمي شلونها الكشخه
ديالا : حلوه الله يحفظك شنهي رايح تخطب
نشمي : ويحفظ غواليج
منين اخطب يحسرتي محد تفعل ترضه بيه بس معزوم يم رفيجي ساكن بديرة اهلج
ديالا : منصح رايح لديرتنا
نشمي : هههه غاديه تسولفين مثلنه اي منصح
تحتاجين شي
ديالا :صفنت شوي خن اوصي مزاله رايح
اي نشمي ولو ازحمك اذا لحگت مر لهلي نسيت غراضنه غادي عدل وگفته وفتل شاربه
نشمي : تبشرين بهالشارب
محتاجه شي انوب
ديالا : سلامتك وكفو من شاربك.
راح وهو يغني ويمسح بأدينه يفقد عالطلعه
مكيف مستخلي الوضع عبن صياد مو هين
صارله سبوع من طلع عالبر ساجي وباهي فاعو بديره ونشمي راح لرفيجه
جوانه :الولد بالشغل وامل اخذت امي وراحت لهلها مرت اخوها جايبه محد هين البيت هدوء صبره مدري وين فايعه وهاجر خانبه بحجرتها
اخذت حب شمس وحمصته ولفت وره البيت اگرز
اجه ثائر گال
ثائر : اجه علينه زلمه فات گعد بالديوان يريد ملابس عمه ديالا
جوانه :منهو هاذ شاكر تقصد
ثائر : لا مو عمو شاكر هاذ واحد جديد
وگال اريد مي وديتله
جوانه : گالها ثائر وراح يلعب
قوست اثمي وگمت انفض بأديني منهو هاذ
الي اجه طلعت شفتها سياره شاكر
گمت ادور لثائر تا اضربه شلون يگول مو شاكر مو هاي سيارته انوب يگول زلمه جديد
رحت عالديوان دگيت الباب وفتت من شفته كنشت
طلع هاذ المعثور نشمي مرتاج وحاط ايده على خده ويفر بالسبحه
فتريت ورجعت وجان ينادي عليه
نشمي : هيي ول هين شنهي ما عندج طروگ العرب
جوانه : وگفت وصديت علي جتفت اديني
شتريد شعندك. عش جيت علينه
ـ وگف وجان يگول
نشمي : جيت اشوفج ميت عليج هاي انتي اجان تجفتين عالزلم لا خجل ولا مستحه
جوانه : هي اواش الزم حدك تره عباليك شاكر
واجيت
نشمي : وذا شاكر شنهي مو زلمه هوه
امشي ولي جيبي ملابس مرت عمي ناسيتهم يمكم
خليني انگشر
جوانه : گالها بعصبيه وجان اروح بنتر واجيب الجنطه لگيته واگف بالباب ملتهي يورث الجگاره حطيت الجنطه يمه وجان يجلب بأيدي
نشمي : گضبتج يالعرمه
جوانه : گمت افالت منه واتلفتت هين وهناك
اخاف احد يشوفني
هدني هي شنهي هاي اخلاقك اشو متستحي هد ايدي
نشمي : ليش هذاك اليوم عضيتيني من ايدي ونهزمتي ما تدرين احنه ناخذ حگنه مربع
جوانه : گالها وجان يدحگ عالباب شاف ماكو احد وجان يسحبني وعضني من اذني شوط روحي
گمت ادفع بي ولازمه اذني غورگن عيوني من كل عقله عضني هاذ مخبل
دحگ بوجهي ويضحك ويغمزلي
نشمي : اخذت ثاري
جوانه : عصبت وجان اضربه راشدي
وفتريت تا انهزم لزمني بساع ولوه ايدي راد يكسرها
نشمي : مو توني اخذت بثار العضه
ليش ما نجرتي هسع لازم اخذ بثار هاذ الراشدي واتوبج
جوانه : يالله اضربني زعم اني خايفه منك
نشمي : ما نضرب النسوان خاصة العرمات احنه نعرف شلون نربيهم.
جوانه : خايب ما توخر شگد مكروه
دفعته حيل وضربته على صدره
لزمني وجتف اديه وجان يبوسني
تخبلت وگمت افالت هدني وجان اضربه راشدي انوب وبكل قوتي
لزمني بقوه ورجع باسني اقوه من گبل
نشمي : يالله اضربي هديتلج ايد
جوانه : مسحت اثمي وغورگن عيوني معرفت شحجي تعصبت نار وشتعلت بيه
هدني خن اروح
نشمي : شبلاج صافنه ما تضربين
جوانه : ما اريد هدني خن اروح
حط ايده عالحايط وگرب مني
نشمي :راح ادز اهلي يخطبونج انوب وافقي اخيرلج
اذا ما وافقتي انهبج
جوانه : دفعته وجان انهزم ضربت الباب برجلي
وشاطت روحي گمت اگمز وهو ينادي ورايه
نشمي : ربج ما يضرب بعود حيل بيج هاي حوبتي
جوانه : فتت عالبيت گعدت بالصاله
ابجي من وجع رجلي اضفري گام يطلع دم
دحگت على نشمي من شباك الصاله
اخذ الجنطه وراح انگلع روحه بلا رده
بسيطه الك اذا ما اگول لشاكر عليك
ديالا : گاعده بحجرتي ابدل لأبني
واندگ الباب گمت فتحته شفته نشمي واگف بالصاله اجه حط الجنطه گدامي تشكرته
نشمي : واجبي مرت عمي تأمريني
ديالا : گالها وراح يغني
اخذت الغراض اعزل بيهم
فات شاكر ومثل المعتاد ما يدحگ بوجهي
مليت من هاذ الوضع
قررت اليوم اخلي حد لهاذ الجفه الي بينه
كملت شغلي من وكت
ترخصت من البنوات وصعدت صليت العشه
رتبت روحي وگعدت اتاني
اجه شاكر اخذ السجاده وگام يصلي
كمل ولمها وجان يحدر جوه بدون ما يدحگ عليه
صبرت نفسي وگلت حقه ميخالف لازم اتحمل واتنازل لخاطر بيتي وابني لو واحد غيره جان شك بيه عندي شي ويه سنان بس شاكر مستحيل يشك صحيح يغار بس عنده ثقه بيه وهو حزت بخاطره عبن وگفت گبال سنان وملفعي ناصل على رگبتي
وانوب سمع منه زعم اهلي جابريني تخبل
ظليت بحجرتي الوب وادعي الله يهدي النفوس بينه
خلصت تعليلتهم وفات عاد بدل وجان يمدد ويحط ايده على عيونه وگفت واعصر بأديني شسوي هسع
تشجعت وجان ادحس نفسي بحضنه ونمت على صدره
ما دارلي بال وجان يصد بصفحه حضنته من ضهره وگمت ابجي ما اعرف شحجي بس تبردت ابجي واشاهگ يربي معد اتحمل هاذ الجفه بينه الهجران من الحبيب يذبح وهاي صارلنه بالشهر على هاذ الوضع علت شهگاتي وعبرتي
واني حاضنته التاف عليه وسحبني لحضنه
عصرني عصر ويحجي بغصه
شاكر : كافي تبجين شجاج
ديالا : دفنت وجهي بصدره واگهد طلعت عبرتي كلها
يسكت بيه ما افعل اسكت ما صدگت ابجي واطلع ضيم گلبي ذبحني الكتمان
زهگ مني وجان لزم وجهي ويبوسني
لفيت اديني على رگبته بدالته المشاعر من كل خاطري وجوارحي حيل مشتاگتله وهو هم ذبحه الشوگ ما صدگ لزمني وطلع ضيم الصبر والهجر
انتهت الليله بحب بدون كلام وعتاب ثنينه نسينه الي صار نمت على صدره وهو يبوس بعيوني وخشمي دحگت بعيونه يلمعن طلعت الكلمه مني بعفويه
ــ احبك
ابتسم ودفن راسه برگتي
شاكر : واني اعشگج دلال گلبي
ليال : شكحه ورافده بدلن الحال
من ليش حميد ما يجي يطلگ الى ليش حميد ما يجي يشوف رافده لاگحها صار شهر محد يعرف هالثنين شنهو الي يريدنه بالضبط
وطبعاً بالحالتين اني مو خلصانه راح صائب وده نضال لهلها واستلمني وراه رافده وشكحه
حت بحجرتي فاتن وگامن يحجن
يردني احجي خفت يضربني محد هين يفزعلي لا صائب ولا بركات ولا سعد يربي انطيني الصبر
فحن من طبعهن وطلعن مسحت وجهي وطلعت بره
وگفت بالطرمه ابجي واشم هوا احس ختنگت صوجي ما رحت ويه صائب من وده نضال على اقل اطلع من البيت شوي
جتفت اديني ورتجيت عالدنگه
شفت سياره عالشارع مالنه عكست علينه
فات من يمي والتفت يدحگ عليه
هاذ صياد مبدل سيارته طبگ يم بيت غازي
فكرت اروح اسأله على ديالا
من يوم ولدت ما شفتها مشتاگه عليها جثير
مسحت وجهي ورحتله توه حدر من السياره بعده لازم الباب سلمت علي حط ايده على صدره
ورد السلام
لزمت ارداني وبلعت ريگي گوه حجيت
شلونها ديالا زينه
صد بصفحه يمسح بلحيته
صياد :اي زينه الحمد لله
ليال : وصللها سلامي بلا زحمه
دحگ عليه وهز راسه بقبول
صياد : ان شاء الله يصل سلامج
ليال : ابتسمت ورجعت بمكاني
سندت راسي عالدنگه
ادحگ على صياد طبگ باب السياره بقوه
طلع غازي وگف يمه انطا علاگه
وصعد سيارته ومن رجع
هم يدحگ عليه صديت بصفحه
ديالا : گاعده بالطرمه حاطه العدس بصينيه وانجي بي اجه صياد يمشي وجاتف ادينه وراه مبين ضايج جثير عبن عاگد حواجبه فوگ اللازم
فات من يمي وجان يگف وبدون ما يصد
صياد : جنت يم سعاد واجت اختج دزتلج سلام
ديالا : گالها وراح ما لحگت حت اسئله شلونها لزمت گلبي بعد روحي ليال يربي ميته على شوفتها
ذبيت الصينيه من ايدي وصعدت تا اسأل صياد على وضعها شفت باب حجرة مشعل مفتوح
فتت من يمه وادحگ صياد شايل مدري شنهي مكورها بيده ويشم بي ومغمض عيونه
رجعت بساع بدون ما يشوفني
انتطرته ليما حدر جوه ناديته اواش ابو نشمي
وگف بدون ما يصد عليه
جاتف ادينه وراه
صياد : گولي يابه شرايده
ديالا : ردت اسألك شلونها ليال
شفتها زين وضعها
سكت شويه وعصر ادينه برزت الدمارات كلها
تنهد وگال
صياد : مو زينه عيونها جانو مورمات باجيه جثير
وجها شاحب ومو مرتاحه
ديالا : نزلت عيوني بقهر
عمت عيني عليها اكيد مشيباتها
الي ما يخافن ربهن
صفنت افكر شلون صياد
فصل ملامح ليال وهوه ما يدحگ بوجه المره
دحگتله ظل واگف بمكانه وشارد
صد عليه نص التفاته وهو مدنگ
صياد : تروحين تشوفينها
ديالا : ابتسمت وكيفت
گلت اي بعدين تذكرت شاكر ونفخت
صياد : اذا ماجله هم شاكر اني احجي ويا
ديالا : اخاف يزعل مني وما يفعل
غمض عيونه وتنهد
صياد : ما يرفضلي طلب هيري روحج
ديالا : گالها وراح فتت عالمطبخ
واجه شاكر تخوصر گدامي يدحگ عليه
رفعت حواجبي ـ خير
شاكر : خير اللهم اجعله خير
ديالا : شكو
شاكر : زعم ما تدرين شكو ابو نشمي عش طلب مني اوديج تشوفين اختج
ديالا : بيش تريدني احلفلك اني ما طلبت منه
على هاي حجايتي وفات صياد وجان يخزر شاكر
گام شاكر يبلعم
شاكر : يالله بساع هيري روحج تا نجي بضوء
ديالا : صعدت بساع ابدل لأبني ولنفسي
حدرت لگيت شاكر على وگفته متخوصر وخازرني اوف يربي هاذ البيت مگضيها ناس تخزر بناس امت يكبر ابني ويسوي وكاحه واخزره
مشينه وبلش شاكر الطريق كله يدردم
راسي گام يوجعني
ليال : گاعده عالممشى وحاطه ايدي على خدي اتاني سعاد تخلص شغلها تا نگعد نسولف مر وكت واني روحي لايبه انوب صائب غير طس طسه
شفت سياره اجت دحگت عليها من الملل
عكست علينه وجان اگف عرفتهم گبل لا يصلون هذول شاكر وديالا
شهگت وركضت عليهم لگحت
نفسي عالسياره وگف شاكر وعاط بيه
شاكر : مهبوله انتي جان دعمتج
ليال : عفته وجان افتر وفتح الباب على ديالا واحضنها وابوسها گمت انگز يربي ما مصدگه ابجي واضحك بنفس الوقت مجاي استوعب گمت ارجف من فرحتي
رزلني شاكر حت ولا رديت سلمت علي وشلت ابنهم بعد روحي شگد حلو ملامحه مخلوطه من شاكر وديالا
شميته وحضنته لصدري يعمري
عزمتهم فاتو جوه گعدنه بالهول شاكر طلع يفتر بره تگول واحد لازمله العصه تا يروح
ديالا :رحت بحجرة ليال جانو جهالها نايمين
بوستهم بعد روحي ريحتهم تنگرط
مبينه جالفتهم ومنومتهم
دحگت عليها رغم تضحك بس الهم
والضيم ماكل گلبها تعبانه وعيونها مورمه
حجتلي عن وضعها بالتفصيل شبعت قهر
شگحه ورافده حت ما اجن سلمن علينه
مو عايزه خفتن وراحه
طمنت ليال على وضعي كيفت وگامت تضحك
مردت ابني مرد هالگد ما بوسته
رجعنه عالهول نسولف ونضحك
فات شاكر واشرلي تا نروح
مشينه عاد گوه ودعتها
وگفت بره تلوحلي وتبجي عمت عيني
انربطت حياتها بحياة رافده
صائب مانعها ما اطب بيت اهلي
يربي همزين سعاد يمها جان طگت وماتت
رجعت لبيتي وگلبي يلوب عليها
ثاني يوم فتت بالصدفه من يم شباك الهول
وسمعت سوالف صياد ونشمي
صياد : البنت رفضتك يا نشمي عش تلح
اكو جثيره بناويت مابيه اروح انوب واحرج ابو علي
نشمي : يابه ادري بيها رفضتني ميخالف نروح انوب مو هاذ عمي شاكر هم انرفض بالبدايه بعدين وافقو وهسع شحلاتهم الله يحفظهم
صياد : خير ان شاء الله اروح باجر واطلبها انوب
وذا نرفضت نشوفلك وحده تناسبك وتعرس انته واخوانك.
نشمي : ان شاء الله يابه تم
ديالا : اوف يربي هاذ نشمي ما يفعل يگشط جوانه من راسه وهاي ما تريده راح تفشله انوب
شلون هسع اتلافه هل وضع
انتظرت الليل وحجيت لشاكر
شاكر : اي شكو بيها خلي يروح يخطبها ما تكيفين تجي اختج وياج هين
ديالا : افهمني يا شاكر جوانه ما تفعل تعرس انته شفت طبعها شلون جم نوبه رزلتها على عرامتها وما تفعل تاخذ الحجي هيه حت لو رضت ما توالم نشمي واني ما اريد اتفشل ويه اهلك خاصة ابو النشمي
شاكر : هسع شتردين اسوي
ديالا : روح احجي ويه نشمي گله يعوف هالطريق
جوانه ما راح ترضه والله عيب يتفشل ابو نشمي
شاكر : ما راح يقتنع هاذ المصگوع
بس اني راح احجي ويه ابو نشمي اترخص منه واني اروح اخطب بداله
ديالا : اي خلينه نروح اني وياك
شاكر : لا انتي ما تروحين
ديالا : ليش عود
شاكر : بدون ليش امشي ولميلي الحمام
واحسبي حسابج
ديالا : هو انته ما تفكر بس بهاي
شاكر : روحي مثل الخوش ولا تخليني اعتگ بالماضي
امل : اجانه شاكر الضهر گعد ويه عماد
وخطب جوانه انوب لنشمي ابن صياد
ومثل المعتاد اجه عماد شار جوانه ما فعلت توافق
طلع شاكر وجان تلحگه جوانه
وگفت يمه ادحگ على شاكر عگد حواجبه
جوانه : هاذ نشمي فوگ سوالفه الفاسده جاي يخطبني
حجيت لشاكر كلشي سوا رغم هالشي فشله وعيب بس حجيتله خلي يربي
ديالا : رجع شاكر متعصب اول ما فات سأل على نشمي
گتله بالساحه مال التدريب راح بساع ولحگته تا اشوف شكو مو زعم راح تا يحاجي اهلي اشو رجع گالب وجهه
لحگته اشو هاذ اول ما طب الساحه وضرب نشمي راشدي ولزمه من فانيلته ويرزل بي
مدري شيگله ما اسمعهم بعيدين
نشمي جان منزل عيونه ويبلعم
رجعت جوه ما ردتهم يشوفني ويتفشلون
اجه شاكر متعصب ويمسح بگصته
سألته شگالو اهلي
شاكر : اختج ما تفعل ترضه وما تلام نشمي مو خوش ادمي
ديالا : ليش شبي والله ورده هالنشمي بس جوانه اتعنف
خزرني شاكر
شاكر : هاذ الحجي مو داحمج لا دافعين لحد
ديالا : شگلت قابل
شاكر : ما گلتي شي
عالعموم اني حجيت لأبو نشمي گتله اذا اجاك نشمي انوب وگالك اريد اخطب
ودي سفره عالعرين خلي يتربه
امل : گاعدين نتعلل ونقنع بجوانه تا توافق وهاي ما تفعل العجيب حميد ايد قرارها خلانه فاكين اثومنه
حميد : شبيكم فاكين اثومكم مثل المخابيل اي اني ايد جوانه عش لو عرست خليها مرتاحه
امل : گالها حميد وگعد يگرز حب
وجوانه تفلي بي وعماد تعصب عليهم.
عماد : هاي ثاني مره يجون. الناس ونرفضهم ونفشلهم والله عيب
حميد : شنهي العيب خطبو والبنيه ما تريد شنهي نجبرها
عماد : انتو متأكدين هاذ حميدنه لو لا
جاهد : نفس الخشم ونفس الصوت بس الحال متبدل خاف واحد يشبهه
عماد : هاي صحوة الموت يول لو شجاك
يتبع………