اليوم البارت طويل
لان انقطعت فترة
بس ترة القصه وصلت نهايتها
واريد الختاميه حلوة
قرأة ممتعه
♡♡♡
حسين جبار يكول :
وتتعمد تغثني جنت
وآنه بصلاتي جنت
ادعيلك
اماني : كعدت من النوم متكسرة مدري شبيه كل عظم بجسمي يوجعني
مكدر اتحرك تكلبت شفت مبايلي فتحته اريد اشوف رد مصطفى شنو
فتحت المحادثه الي بينا لكيته كاتب تمام دعبول نام وباجر اريد تعويض زين ولكيته كاتب صباحيه
وماأجمل اول صباح فرحاً
تهديه لي الدنيا بعد سنوات
-قريت الرسالة واني الابسامه واضحه بملامحي واحس بشعور ماعرف شنو اول مرة احس بيه مدري حب مدري أمان ماعرف
رديت عليه
صباح النور يانور عتمتي
ونور طريقي
ونور بصري
صباح النور ليومنا الاول
دزيتها وماعنده نت كمت بالكوة من الفراش اجيت انزل هيج من دون تمشيط او شي
تذكرت كلام مريم وبسرعه عدلت غرفتي ومشطت وترتبت ونزل
-ادور محد بالبيت طبيت المطبخ لكيت خالتي سعاد موجوده وامي
صباح الخير للحلوات
رسل : صباح النور بنيتي
سعاد : صباح النور يالعافيه تعالي يمي
اماني : ماجذبت خبر رحت كعدت يم خالتي
شلونج خالة
سعاد : زينه يبعد الخالة لا صيحيلي خالة بعد اني حسبه امج صيحيلي ماما
اماني : هزيتلها راسي برضه
سعاد : شبيه وجهج بنيتي مصوفر
اماني : والله خال سكتت رجعت كلت والله يماما ماعرف جسمي كله متكسرر
سعاد : بس لا صابنج الي ميخافن الله
رسل : ههههه وكل الي صار البارحه وماتردين احد يصيبها زين كامت من نفسها كلت اليوم ماتكعد للعصر
سعاد : اي صدك بنيتي شغلي رقيه عود
اماني : ماشي عود اشغلها باليوتيوب
سعاد : يلا لعد اني اترخص ارجع لبيتي
رسل : ياا خيه وين توج كعدتي
سعاد : لا خيه اجيت اغير جو واصبح على هل وجه الملائكي واروح
اماني : تحجي خالة ولازمه خدودي باستني وراحت وامي وصلتها للباب
رجعت امي يمي
رسل : بنيتي كومي تريكي لا تأخرين ريوكج ترة اذا أخرتيه ماخليج تتريكين
اماني : ماشي ماما
صدك كمت وسويت ريوك دبس وراشي واجبان وجاي وصمون وكيمر عرب رحت يم امي بالصاله جاي تباوع مسلسل حطيت صينيتي يمها وكعدت اكل وباوع وياها
-صدك ماما منو جاب الكيمر والصمون
رسل : ختيبج (بضحك)
اماني : هههههه ها ها سالمين غير اني المفروض اكولها خما انتي ماماااااا
رسل : هههههه فدوة لروحج ياعمري حبيت اشاقيج هذا مصطفى جابه وكال اريد دعبولتي تتريك زين اريدها مدعبله اكثر ع العرس
اماني : ياااااا هو هيج كال شكد ميستحي ههههههه
رسل : صدك وراد يحجي وياج مدري شنو بس من دره بيج نايمه راح
اماني : اها ماعرفتي شراد يحجي
رسل : لا ماسئلته يمكن يدور بوسه شي (بغمزة )
اماني : ههههههه ماما هاي شبيج والله استحي
رسل : ههههه تستحين يولي كون احطج يم بنات اصغر منج وهنه يعلمنج الشغل الزين
اماني : ههههههه انتي موجوده ميحتاج ههه
رسل : كومي لا بارك الله بيج كيفتي على هيج سوالف اتسعن عيونج ملكلكه
اماني : يماااا شسالفه شو انتي تتحارشين وترجعين عليه
رسل : (بخبث) ردت اشوف شنو تردين
اماني : ههه والله عندج سوالف
ضليت ويه امي اباوع على التلفزيون دكت بال ١١ وامي تابع مسلسل عفتها براحتها ورحت للمطبخ سويت تمن ومركه وزلاطه وعفتهن على صفحه ورجعت كعدت يم امي ننتظر لؤي وابوي شوكت يجون
اجمي وصبينا غدنا تغدينا وتعللنا ورة الغده وكل واحد بغرفته
كعدت بغرفتي بعدني مالزمت التلفون جنت ابدل ملابسي صارت بيهن ريحه طبخ اتخبل اذا صارت ريحه غير العطر بملابسي
طن طن مبايلي بمعنى اجت رسالة طفرت عليه وكَلبي يدك بلهفة
شفته مصطفى دازلي هلو
كيفت اول مرة اراسله بلهفة هيج
مصطفى 💬 : هلو دعبول
اماني💬 : هلا حياتي
مصطفى 💬 : شلونج فريخي
اماني 💬 : حمدلله تمام وانته
مصطفى 💬 : بخير يروحي
اجيت الصبح ردت اسولف وياج ولكيتج نايمه
اماني 💬 : اي ادري كالتلي امي الصبح شنو ردت تحاجيني
مصطفى 💬 : لا ماريده هل موضوع رسائل اريده وجه لوجه
اماني 💬 : قلقتني خما اكو شي
مصطفى 💬 : هههه لا دعبول مكو شي يقلقج بس وجه لوجه حتى واحد يفهم الثاني
اماني 💬 : كيفك تريد تجي العصر علينا
مصطفى 💬 : هو راسلتج ردت اكلج العصر اجي اخذج نطلع سوة وهم منها نسولف
اماني 💬 : ها نطلع وين
مصطفى 💬 : بمطعم اي شي المهم اليوم الاول من عقدنا ماريده يضل عادي
اماني 💬 : ههههه كلش عجبني تفكيرك
مصطفى 💬 : هههه بس تعمقي بيه شويه كلني اعجبج متاكد
اماني 💬 : هههه كلش واثق من نفسك ها
مصطفى 💬 : اكيد ههه المهم راسلتج حتى يكون بعلمج ترة كلت لخالتي الصبح ووافقت فا مو تغلسين
اماني💬 : تمام صوفي
مصطفى 💬 : هههه بعد صوفي وعشيرته
اماني 💬: هههههههه
مصطفى 💬: يلا باي حب مشغول هسة
اماني 💬 : تمام صطوف باي
راح مصطفى واني مكيفه بسرعه كمت ونسقت ملابس للطلعه
كملت كل شي ورحت انام شويه لان بعد وكت على العصر واني متعوده على نومه الضهر
نمت وحسيت امي يمي تنده بيه
كعدت بنعس
ها ماما
رسل : كومي امي عيب من مصطفى كاعد جوة بالمطبخ ينتظرج
اماني : سمعت بيها مصطفى وذكرت طلعتنا كبل فزيت وطفرت من جربايتي
ماما كوليله هسة تجيك
رسل : ماشي بنيتي لا تتأخرين عيب
اماني : غسلت ورحت ابدل ركض ركض لبست فستان ابيض مخصر من يم خصري والباقي كلوش بيه ورد احمر لبست شال ابيض وخذاء وجنطه حمر
حطيت مكياج خفيف ونزلت ركض
(بتعب ) هلاوو
مصطفى : رفعت راسي وباوعت هاي ملاكي بويههه اليوم صاروخ طالعه شهل اطلاله هاي شهل جمال خطفت كَلبي
تحجي واني صافن مامنتبه لكلامها فزيت عليها من تسولف
اماني : مصطفى شلونك
مصطفى : ه ه ها زين حمدلله يلا نروح؟
اماني : اي مخلصه معندي شي نروح
مصطفى : ركبنا سيارتي ورحنا حبيت تكون طلعتنا قريبه على النهر اكو كورنيش فا رحت عليه
الطريق كله لازم ايد اماني ومتنسك بيها واغاني الحب ماسكتت من السيارة
-وصلنا دعبول ننزل
اماني : هههه اي ننزل ليش لا
مصطفى : نزلنا والجو جان كلش حلو كعدنا بكوفي عائلي قرب النهر كلش الطله حلوة بيه
كعدت ماقابيل اماني ولازم ايدها وهي مامصدكه على الله ماضلت صورت ماخذتها وكل شويه تعلمني حركه انسويها سويه واطكلها صورة
طلبت عصاير وحلويات النا ونزلوهن
كعدنا بهدوء ناكل واني عيني عليها مانشالت اريد اضمها بكَلبي محد يشوفها غيري
- احم ملاكي شنو خططج المستقبليه
اماني : قصدك شنو راسمه من خطه بالي
مصطفى :اي
اماني : ابالي حالياً اخلص دراسه واصير خريجه
مصطفى : اي
اماني : هههه واتعين واصير اشهر دكتورة بالمنطقه
مصطفى : اي
اماني : واكيد اكوم اجمع فلوس وسويلي عيادة خاصه واساعد الطبقات الوسطى والمتدنيه
مصطفى : اي
اماني : هههههه واشياء بسيطه بس ذني ابرزهن
مصطفى : شنو هاي الاشياء البسيطه ؟
اماني : مثلً ازور دول جنت احلم اروحلها
مصطفى : مثل ؟
اماني : لندن امارات وغيرها
مصطفى :اي
اماني : اي حبيبي ترة صرفت هواي اي
مصطفى : دنكت راسي وكلش ضجت ماذكرت اي شي بيه زواج
-لعد وزواجنا ماله مجال بهذا مخططج
اماني : ه ه ها هذا مخططي قبل اول البارحه ياعيوني بعدني مامخططه جديد
مصطفى : سكتت مارديتلها خلصنا الي نزلناها وكمنا تمشينا
اماني : جاي نتمشى وشفت واحد يبيع شعر بنات
-صطوف صطوفف (تكمز مثل الجهال)
مصطفى : ها دعبول شبيك
اماني :ههههه لا تصير مليق وتكول دعبول احس نفسي صاحبك
مصطفى : هههههه ها شتريدين ياملاكي
اماني : ههههه هسة احسن جاي اشوف ذاك الي يبيع شعر بن....
بعدني جاي اسولف وأأشر على ابو شعر البنات اشو هذا عافني بمكاني وراح جاب ثلاثه واجه
مصطفى : هاج حياتي جبتلج وردي وازرك وبرتقالي خاف نفسج بكلهن
اماني : بس بعدني مامكمله شنو اريد
مصطفى : بس لا تردين بعد شي
اماني : ههههه لا لا هاهي
اخذتهن منه واحنه نتمشة اني فتحتهن واكل شويه واوكله وياي
مصطفى : ههههه ترة كمت اخرخر حلاة
اماني : هههه ادللك غير
مصطفى :ابوس الانأمل الي ادللني
اماني : سحب اصابعي وباسهن صدك اني هنا استحيت غصت بهدومي من المستحه الكورنيش مليان ناس وكلها عيونها علينا
-مصطفى عيب
مصطفى : تردين ننفرد وحدنا ؟؟
اماني : هزيتله براسي مؤيده كلامه
اخذني ووداني لمكان كلش حلو يعني بينا وبين النهر شبر بس امد رجلي بيه بس مبين المكان مرتب وبيه مظله خشب وكراسي جواها خشب مزينه وبيها شموع ريحتها حلوة
الظاهر مسوين هذا المكان للكبلات هههه
-هاي شنو
مصطفى : هههه هذا المكان الكبلات قرب النهر اهدء النا
كعدنا وضليت اتمعن بملامح اماني شلون فرحانه وتباوع للنهر
-تردين تحطين رجليج بيه
اماني : صدككك يعني اكدر
مصطفى : وليش ماتكدرين
خليتها تنزع حذائها واني هم وعفناهن يم المكان الي جنا كاعدين بيه
ضلينا نتمشى على طرف النهر حفاي
اشو هاي عافتني وراحت اخذت عودة وكتبت على الرمل اسمي واسمها وبينهن قلب
هههه هاي شسوين
اماني : اريدد اسوي ذكررى واحط التاريخ وصور ماريد اضيع هيج لحظات
مصطفى: خذي راحتج
صدك كملت وكتبت التاريخ ولزمت ايدي وطكت صورة للكتابه وييه ادينا
حضنت كتفها وضلينا نمشي وهي مكيفه ومتحاميه بيه احس نفسي بهذا الوقت حققت اكثر احلامي حسيتها مستحيله قبل ايام
-احم فريخي الاسبوع الجاي زواجنا ان شاء الله
اماني : شنووو مصطفى شنو هل حجي لا عفيه
مصطفى :ليش ياروحي ليش
اماني : عفيه هاي اخر سنه بكليتي وهم منا وراي تطبيق واريد اجيب معدل خاف اقدم دراسات عليا وهم اريد افتهم من زواجي شي خما ازوج منا واداوم منا
مصطفى : اي وشكو بيها
اماني : لا عفيه صطوفي تصير عليه ضغوطات ويصير الزواج محلو
مصطفى : دنكت راسي بخيبه امل
حياتي جنت احلم احطج يمي واريح كَلبي من اكبر همومه
اماني : عفيه يروحي بس انطيني صبر هل كم شهر واخلص ونزوج براحه نفس ليش تبهذلني
مصطفى : هاهي بكيفج بس حطيها بالج تتخرجين منا تتزوجين منا ماشييي مو ماكو مجال ومدري شنو ترة الشغله عندي تيتت
اماني : ههههه مححح (بوسة بالهوة )
اروحلك فدوة
مصطفى :هاااا اذا ضليتي هيج ترة اخليها صدك الاسبوع الجاي ترة وضعي يكسر الخاطر
اماني : ياااا عزااا عيببببب
مصطفى : هههه شو تعالي
كامت تركض وطبش بالمي واني وراها اريد بس الكطها ام العزااا اليوم انكعج بس اصلج
ضليت وراها ووصلتها حضنتها ورفعتها بالهوة
اماني : عفيه صطوف نزلني والله دخت
مصطفى : هههههه ديلا تعالي نرجع نتعشة
اماني : (بلهث) اي اي تمام
مصطفى :رجعنا لبسنا احذيتنا وصعدنا للكورنيش
-صعدنا وركبت سيارتي رحت لارقى مطعم قريب علينا حجزت حجز خاص عدهم
اريد هذا اليوم مميز ماكو منه
صدك لكيت اخر حجزين هم زين افف
رحت ادور على مكان اصف بيه السيارة ازدحام كدام المطعم كلش ضجت لان مالكيت مكان بسهولة
نزلنا من السيارة واني كايد اماني بيدي ولازمها بكل قوتي عبالك تريد تفلت مني ههههههههه
شكلي مثل طفل ومتمسك باعز لعبه عنده
بطريقنا للمطعم مشي لان صار شويه مسافه بعيده بين المطعم والسيارة
واحنه ماشين جذب نظري محل ورد بيه اشكال والوان
اخذت اماني وياي ورحت اخذتلها باقه ورد متكونه من وردتين حمر
اماني : ياااايييي يجننن (بفرح)
مصطفى : تصرفاتها طفوليه مع كبر عمرها هههههه تربعت بنص كَلبي هل بنيه
-مو احلى منج ذني
اماني : هههه بعد عمري انت
مصطفى : كملنا مشي واني كل شويه اسرق نظر على اماني وهي تباوع على الورد وتشم بيه وتضحك ههههه فرحانه واني على فرحها فرحان وياها
طبينا المطعم وجان مكان حجزنا طابق ثاني صعدنا وكعدنا على طاولتنا
اني نزلت شورما وببسي
-انتي شتردين عمري
اماني : هاا والله معرف يلا نزلي مثلك
مصطفى : هههه تمام
نزلنا الطلب لنفرين اكلنا واحنه نسولف ونضحك من بين الكل الانظار علينا واني لازم ايدها وفرحان وهايم بيها
خلصنا وكملنا طلعنا ورجعنا للبيت وطريق الرجعه كله اني لازم ايدها واسولفلها شلون جنت احبها وماتدري بيه وشلون جنت اتعذب من اشوفها تحجي بحسام وادوس على نفسي لخاطر حبي الها ....
.
.
.
.
.
.
.
اماني : كلش كيفت بطلعتي هاي وفرحت
مصطفى كلش رومانسي ولطيف ماتوقعت هيج اشعر بالأمان وياه
تعشينا ورجعنا للبيت واني احس احنه نفر حُب هههه طريق الرجعه كله مصطفى يحجيلي عن حبه الي من دون ما ادري وشلون جان ينقهر من يسمعني احجي بحسام
انقهرت عليه وحسيته ميستاهل كل الي صار وياه واتمنيت لو جانت بدايتي وياه هو جان اختصرت عليه وعلى نفسي هواي طرق ومطبات
وصلنا البيت وطبك مصطفى يم بابنا
-شكراً حبيبي جان يوم كلش مميز احبك
مصطفى :هذا لا شيء تذكرين من كتلج اختاريني واخليج اسعد انسانه وكلها تحسدج
اماني : اي اذكر
مصطفى : بعدني عند كلامي
اماني : بعد عمري
مصطفى : قبل لا تطلع اماني جريتها عليه واخذت منها بوسه دام ضوة السيارة طافي
اماني : ياااا مصطفى شبيك لو شايفنا احد
مصطفى : ههههه بالحلال يحلالي مو مهم لو احد شاف
اماني : هههههه لا طاخات عندك اليوم اروح اني قبل لا اسوي شي ثاني
مصطفى :هههههه يُفضل هل شي
اماني : نزلت وقبل لا اسد باب السيارة صديت على مصطفى
-عمت مسائاً ياصباحي
مصطفى : ههههههه فديت الفصحه الطليقه
اماني : ههههه محححححح (بوسه بالهوة )
-رحت وطبيت للبيت لكيت امي تابع مسلسل
مشيت على كيفي وصلت يمها وكلت
-بخخخخ
رسل :اسم الله الرحمن
-شبيج بنيتي تخبلتي هبطتيني
اماني : هههههه شكلج يضحك متتت ههههه
رسل :هههه بعد عمري تعالي يمي شوكت اجيتي
اماني : توني اجيت
رسل : تعالي سولفيلي ولج متشوقه اعرف شلون يومكم الاول بعد العقد
اماني : هههههه احسج مريم مو امي
رسل : عمري ماحسستكم اني امكم
اماني : رحت وكعدت بصف امي وحضنتها بستها من راسها
-اي صح واني خصيصاً عمري ماحسيتج امي بس انتي صديقتي وواختي واحلى ام بالعالم
رسل : هههه بعد عمري
يلا سولفي لج ههههه فضولي الف
اماني : هههه ماشي
-سولفت كل شي لامي وابسط التفاصيل عدا البوسات ههههه استحيت منها بس هي اكيد تعرف صار هيج شي
رسل : بعد عمري يروحي ربي يسعدج ويتمملج على خير واشوفج احلى عروسه واحلى ام اهئ اهئ ذاك اليوم جنتي هل كدوتج اهئ
اماني : ها ماما انكلبت بجي شكو
رسل : مامصدكه يروحي كبرتوا وراح تحملون مسؤليه جهال وبيت اهئ
اماني : ههه اني هم متعجبه احس روحي بعدني طفله
رسل : تعالي احبج يروحي
اماني : باستني امي ودك تلفونها هاي خالة سعاد هههه انسردن بالحجي واني صعدت لغرفتي اريد ارتاح وانام لان كلش تعبت
بسرعه بدلت وطبيت بفراشي ونمت نومه عميقه
-مرت عليه العطله كلش حلوة اني ومصطفى كمنا نطلع كل يوم مكان مول مدينه العاب والخ ماخلينا مكان مارحناله
اجه وكت الرجعه للقسم واني مصطفى تزاعلنا بهل فترة يردني اطلع من الاقسام وسجل بخط بس اني مقبلت هي هل كم يوم وابدي اطبق هنا على شنو اسوي هيج
المهم بعد مفاوضات ويه مصطفى وتنازلات بكومه امور قبل واقتنع ورجعت للاقسام وهو راضي عني
بس الي استغربت منه مريم متغيرة
تلفانه وتعبانه والظاهر شايله هموم الدنيا
شكد حاولت وياها وحجيت ومقبلت تحجي او بالاحرى جانت اطللع اعذار اني ماجنت ااشوف الصدق بعيونها ابد
استغربت من تصرفها والي استغربت منه اكثر بردت صداقتنا واني كلش مقهورة على هل شي
اماني :مريم وضعج ماعاجبني
مريم : حياتي لاتنقلقين ضروف عائليه
اماني : اني مو وحده من خواتج ليش متفرغين همج يمي
مريم :افف اماني علواه الموضوع بهل بساطه
اماني :مالحيت عليها عفتها براحتها وكل وحده بينا صدت تقرة باجر اخر كوز وكل واحد يروح ياخذ كتاب ويقدمه بالمستشفى الي يريدها حتى يبدي يطبق بيها
كملنا واستغربت مريم مانتظرتني مكمله ورايحه ماخذه كتابها والي عرفته من البنات لامه غراضها كلها وابوها جاي ماخذها
كلش انقهرت ليش ماودعتني او كالتلي راح اروح شبيها مريم ليش هيج تغيرت فجئه معقولة سويت شي بدون قصد زعلها مني شلت هم وماعرف شسوي
امشي بالطريق وسمعت احد يصيح بأسمي
حسن : اماني اماني لحضة
اماني : عرفته حسن وشكد حاولت اجنبه ورة خطوبتي بس الظاهر كلش لزكه
صديت واني مخليه ايدي على كَلبي اخاف مصطفى يجي يدورلي ويلكه هذا يمي وتصير مشكله
حسن : هلو امون
اماني : هلا
حسن : بما ان هذا اخر لقاء ويمكن احضى بفرصه اشوفج بالحفله ويمكن لا ردت اسئلج سؤال
اماني : اي تفضل اسئل
حسن : صدك انخطبتي
اماني : كلش متنفرزه منه ايييي انخطبت واني مخطوبه من زماننن هسة شرايد
حسن : دنك راسه بحزن وحجه
-اعتذر ردت اتاكد ربي يسعدج ويتمملج زواجج على خير
اماني : انقهرت عليه لان نترت بيه هاي مو اني الي اتعامل هيج ويه غيري
اسفه على فضاضتي بس ترة عليه ضغوط ومطايقه نفسي
حسن : ادري بيج واعرف هاي الضغوط لان مريم بارده هل فترة وياج
اماني : بتعجب شمدريك
حسن : شتتوقعين من واحد يتابع بنيه وينتضر ابسط فرصه منها على مود يتقرب منها وهو راسم وياها احلى احلام
اماني : نعمممم؟
حسن : اسف خيتي ربي يسعدج وينير طريقج باي
اماني : ضليت صافنه هذا شبيه مارديت عفته وكملت طريقي
رحت جبت كتابي من الادارة ورحت اني لامه غراضي بالليل لكيت مصطفى واكفلي بدخوليه الجامعه وصلني للاقسلم نزلت غراضي ورجعت وياه واني مهمومه
مصطفى : شبيك دعبول اليوم ضايج
اماني : والله حبيبي مريم وضعها معاجبني
مصطفى :ليش شبيها هاي
اماني : حجيتله كل شي وشلون علاقتنا بردت
مصطفى :حبيبتي انطيها مجال يجوز البنيه جاي تمر بضروف قاسيه او مشاكل عائليه لا تحكمين عليها بسرعه
اماني : اي هم صح كلامك
رجعنا للبيت واني كل الي بالي مريم
طبيت البيت مقهورة واحس روحي ممروده
مع انو مصطفى الطريق كله يحاول يغيرلي جوي بس مافاد
هاي اختي الي ماولدتها امي ليش هيج تغيرت شنو ضرفها الي خلاها هيج تبتعد عني
في مكان ما في بغداد
الساعه : ٧:٠٠ مساءً
مريم : كاعده اسوي عشه وبالي مشغول
جنت اكلي بتيته واختي الاصغر مني بسنه تثرم زلاطه قريب يمي
ماحاسه على نفسي كمت ولزمت الطاوة بدون مكايه
-اخ اخ يمه اخخ حارة
تبارك : اسم الله خيتي شبيج ماشوفينها الزيت يغلي بنصها شلون تلزميها هيج
مريم : اخ اخ مدري مانتبهت بالي شارد
تبارك : والله كثرت شردات بالج هل ايام متكليلي شنو وشبيج
مريم : دنكت راسي ومعرف شجاوب اختي واكعه بحيرة ميعرفها بس ربي شايلة هم وخايفه ومدري شسوي
-ما ما مابيه شي
تبارك : مو عليه هل حجي مريم اني اعرفج اكثر من روحج
مريم : تبارك لازمه ايدي اداوي بيها وتحجي وياي واني حايرة اكللها لا
بس ماعندي خيار ثاني اذا ماكللها واخليها تنطيني حل وين اروح ومنو
يدليني على الحل الصح
-تبارك راح اكلج بس امانه هل موضوع بينا وماريده يطلع من بينا
تبارك : اي اكيد شبيج يايوم حجيتي شي وكلته لاحد
مريم : ادري بيج امينه بس الموضوع حساس شويه
تبارك : حساس شنو ولج صخام بعينج شمسويه
مريم : حطيت ايدي على حلك تبارك علة صوتها شويه
-اششششس فضحتيني كلشي مامسويه
بس حايرة بموضوع وماعرف حله
تبارك : شو احجي يجوز اكدر الكاله حل وياج
مريم : دنكت راسي بمستحه معرف شسولف
-اكو واحد يريدني ويريد يجي يتقدم هل ايام
تبارك : ياااااايييي صدك تحجين احلى خبر هذا شكد حلو هيج يالله
مريم : المشكله مو بهذا الموضوع
تبارك : لعد ؟؟ شبيج
مريم : الي يريدني اخو صديقتي
تبارك : لا تكوليلي صديقتج الي هي اماني
مريم : اي هي
تبارك : وشجابه عليج يمصخمه
مريم : تذكرين من رحنا اني وماما وبابا للزوراء حتى اشوف اماني
تبارك : اي اذكر بوقتها ضلينا وحدنا
مريم : اي هناك كملتلي اماني قصتها كلها ومصطفى عزمنه على اكل بالمطعم وبعدين حسيت عيب اضل وياهم مياخذون راحتهم
تبارك : اي كملي لا توكفين لج
مريم : عفتهم ورجعت يم عائلتنا وعائلتهم
تبارك : اي
مريم : جان ماموجود لؤي بوقتها
تبارك : اخوها اسمه لؤي ؟
مريم : اي خل اكمل راح اموت
تبارك : كملي كملي
مريم : دك عليه هذا الاستاذ الغثيث ابو كرش
تبارك : الي يزعجج دائماً بقسمكم
مريم : اي زعم خابرني ويكلي درجاتج زينه بالامتحانات ومدري شنو عود شوفيني شفتهن الج
تبارك : ما تلامين من كلتي عليه غثيث
مريم : تشكرت منه وسديته وحضرته حتى لا يضل يزعجني
تبارك : اي
مريم : ضليت كاعده جوة الشجره وحدي اكلب بالموبايل
سمعت خرخشه وراي فزيت
بعدين اجاني لؤي وكف كدامي
تبارك : اي
مريم : وكالي تلفونه ضايع ويدور عليه وسئل اهلي واهله ومحد عنده رصيد
كالي عندج رصيد
وجاوبته اي عندي
اخذ مبايلي ودك منه على مبايله سمعنا صوت مبايل بعيد راح دور لكاه بالسله الي جابتها امه بيها فاكهة
تبارك : يا ثوله هذا متقصد
مريم : شمدريني استحيت ونسيت كل كلاوات الولد
بعدين ضل يراسل بيه واتساب ويعترفلي بحبه اول ماشافني وان نيته صافيه وياي ورايدني بالحلال وماعجبته بنيه بحياته بكدي
تبارك : وشنو المشكله هسة مبين الشاب مشتريج
مريم : صعبه تبارك اقبل بيه وبعدين تاخذ اماني عني فكره انو اني مصاحبتها على مود اخوها
تبارك : شهل ادرامه ترة محد يفكر هيج غيرج
مريم : ولج تخيلي بعقد اخته شكد صحتله فرص يشوفني ووحدنا بس ماقرب عليه ابد اقرب شي صار الي بيني وبينه مترين وجان يشرب مي وكالي يوم النا وافرح بيج
تبارك : اوييييي شهل كياته
مريم : انجبي خايفه اخسر صديقتي الوحيده
تبارك : اما تواجهيها بهل شي اما تخليه هو يكللها
مريم : مدري صعبه عليه كلش
تبارك : انتي الي غلطتي وماكتيلها من البداية
مريم : دنكت راسي اي ادري الغلط مني بس ماعرف شلون اتصرف
تبارك : انتي هاي صديقتج واعرف بيها تصرفي بحكمه اي غلط ترة تخرب صداقتكم
مريم : هزيت راسي لتبارك وكملنا العشه من حجيتلها حسيت هم وانزاح عني
صح قوت علاقتي بلؤي لان كل يوم يراسلني وانعجبت بيه وبأدبه بس اضل اخته صديقتي واخاف على مشاعرها او تروح تفهمني غلط وعلى كولت تبارك اني غلطانه من ما كتلها من البداية بس هم شفتها فرحانه ولاول مرة وماحبيت اخرب فرحتها
اخ اخ ضيم شسوي هسة
... . يُتبع
شراح يصير للصداقه
الي بين اماني ومريم
راح تخرب؟
او لا
شنو نهاية صداقتهن
ترقبوا الأتي
دمتم بخير احبتي
♡♡♡