وعند كَرامتي سلامٌ
عليكَ وكأنكَ
لم تُخلق
😊😊
اماني : قضيت الوقت بملل احس الوقت ما يمشي
ورة العشه كلنا كاعدين بالصاله نباوع ويه امي مسلسلها هههههه مجبورين مو بيدنا هذا الشي
طخت بالي فكره
اكول شتكولون باجر نروح للزوراء نتونس بما انو باجر جمعه عطله للكل
محمد : اي والله خوش فكره اني هل فترة جنت حاير وين اطلع وغير جو
اماني : خوش اذا هاي حتى اشوف صديقتي بالكت هي وعائلتها هم يجون نتفق
محمد : مابيها شي بنيتي بكيفج
لؤي : واني راح اكول لمصطفى يكول لعائلته هم يطلعون ويانا
محمد : بكيفكم سوو الي يعجبكم
رسل : هههه خوش حتى احضرلي فد امل ناخذه ويانا منا
لؤي : يما امانه سويي دولمه وناخذ ويانا منقله وحطب هههههه نطبخ هنا
اماني : لا والله باجر مانطبخ اي شي نريد جاهز شنو هو كل يوم طبخ
محمد :هههههه تدلل الاميرة علينا
لؤي : ها يابه شنو كل مرة توكف وياها دكف وياي اني ابنك المسكين (بحزن مصطنع)هههههه
اماني : شفته هيج ورحت يم بابا حضنته وطلعت لساني لؤي اعيبله
لؤي : اخخخ يجي يوم اكصه الج حقيرة تتحامين بابا
اماني : بابا احجي وياه
محمد : عوف اختك لك
لؤي : هااا هيج صارت اماني اني الج
اماني : ههههه ضحكت عليه ورحت للمطبخ سويتلي كهوة جكليتيه اعشقها وفوكاها رغوتها حطيتها بكلاص وصعدت
ضليت ارتب بغرفتي وفاتحه شباكها الجو والهوة كلش عجبني باوعت للكنتور مالي بيه عبايه البسها بالزيارة وطكت بالي اغنيه ذبي العبايه وجان اكوم افتحها باليوتيوب ووربطت تلفوني بالثريه الي عندي وخليت صوتها وسط وعندي شال مصري بيه خرخاشات
(خلاصه كلام طكن فيوزاتي )ههههههه
شديت الشال على خصري وبدت الاغنيه وكمت اتمايل وياها وهز
ههههه نسيت حتى مريم تذكرتها بنص الهز
دكيت عليها وفتحت وياها كامره من دون سلام شافتني وهي هم كامت تسوي نفسي هههه شغلت تسجيل شاشه وضليت اركص
فاله شعري بطولي واني اهز وهي تهز وياي ههه صار تنافس بيني وبين مريم هي تهز خصر واني وياها وترجع تهز شعر واني وياها
هههههه كلبناها دسكو اختفت مريم ماعرف وين راحت ضليت اني اسمع حسام الرسام ومندمجه هههههه
ططفت يمي الكهرباء وراح الصوت واني فحانه شفت ضوة مال فلاش من الشباك جاي على الحايط عرفته هذا مصطفى شكد استحيت وتفشلت كبل سديت الشباك ورحت لبست شي يسترني شعري وجسمي يمااااا شكد عيب هذا شلون اطلع اشوفه
لا لا ماطلع اضل كاعده مكدر احط عيني بعينه ههههه فضيحه يمااا
كعدت على الجرباية واجتي الكهرباء واني العب باصابعي من المستحه والفشله واكل بنفسي من ثول الي يثولني غير اسد الشباك نسيت غرفته مطله على غرفتي اخخ شهل فشله
احس روحي صخنت شجاني يبوووووو
طلع صوت من مبايلي تنبيه اكو رسائل كمت شلت المبايل هذا مصطفى دازلي بالواتس
مصطفى 💬 : أجملُ الحب في الحلال وليس لي حلالٌ سواكِ
اماني : اقرة وحسيت بخجل كلامه حرك شي بداخلي ماعرف شنو بس مصطفى خله الحياة بعيني تزهي شكد ما جانت سوده دائماً يجي ويلونها بالوان حبه
اماني 💬 : اسفه على المنظر مامتقصده اعوف الشباك مفتوح
مصطفى 💬 : مو مشكله بس اني اشرتلج بالفلاش لان شفت شباب مرو من الشارع وخفت لا احد يشوفج
اماني 💬 : لعد ماحذرتني من البداية قبل لا يجون
مصطفى 💬 : مكدرت اشيل عيني عنج وكل عاده ردت اشوف كَلبي ليش اني قافل عليج ورايدج وجماله كل يوم حبي الج يزيد يبنت خالتي
اماني : استحيت مارديت عليه
مصطفى 💬 : وقل للحسناء حيائوها زادني عشقاً
اماني 💬 : هههههههه ترة استحي
مصطفى 💬 : ملاك كَلبي
اماني 💬 : نعم ؟؟
مصطفى 💬 : الله عليج انطيني فرصه
وعد مني اذا مارتاحيتي وياي واذا حسيتيني اني ماناسبج اني بوقتها اعوفج برحابه صدر
(بداخلي جذب ماعوفها لان اعرف راح اسوي المستحيل على مود راحتها)
اماني 💬 : انطيني فترة افكر مصطفى مو سهلة
مصطفى 💬 : كل الوقت الج ملاكي
اماني : سكتت مارديت عليه سرحت بافكاري
عدت حياتي كلها شريط كدامي صدك حبيت حسام وردته وهو هم حب من الطفولة بس تالي هذا الحب شنو حصلت منه؟ بشنو ضحى؟ بشنو جازاني ؟
وين جان من انكسرت؟ بس مصطفى جان موجود وحسام سبب كسراني
وين جان من اضوج؟ بس مصطفى جان موجود وحسام سببب ضوجتي
وين جان من ابجي ؟ بس مصطفى موجود وحسام سبب الي يخليني ابجي
صفنت شكد مصطفى حاول وياي وسوة المستحيل على مود رضاي وحسام بابسط موقف هاني وخلاني علج بحلك الي يسوة والي مايسوة
اني لازم احسم الموضوع ويه مصطفى اما اي اما ما أأمله بيه ابد اخخخخ اخخخ شنو افتهمت من حياتي الي بعمرها لو عدها حبيب لو مخطوبه لو مزوجه وعدها جهال واني شحصلت من الحب
باثناء تفكيري راسلتني مريم
مريم💬 : هلوو حب اعذريني اشتراكنا خلص وجددناه
مستعده تنطيني قصه قبل النوم؟
اماني: ضحكت على رسالتها ورديت الها
💬 : اي يلا نصعد اتصال
مريم 💬 : يلا
صعدت اتصال ويه مريم وكملت مين ما توقفت . .. ...
.
.
.
.
.
.
.
.
.
.
.
.
.
عوده الى الماضي
التهيت بدراستي ونسيت شي اسمه حسام حذفته من بالي خفت يعيقني عن دراستي ويكون حاجز بنجاحي اجتهدت وتعبت
اعتزلت الطلعات والطبات وحتى كعدات الاهل والمناسبات واهلي وكلشي بس كد وجبه ومحد جان معترض هل شي على حكم اني سادس وتعب
ضليت اروح وارجع اما ويه مصطفى او لؤي وجان دائماً من اطلع ويه مصطفى يحجي وياي ويغير جوي ويزيد من حماسي للسادس ويأملني بكل شي
تعبت كلش هواي والحمدلله مارسبت لا بداية سنه ولا قبل دخولي للوزاري فا جنت مطمنه اني داخله عفت الشهر الاخير ماامتحنته اخذت اذن من المديرة وكعدت قبل المدرسه بشهر بالبيت اقرة وضليت ملتزمه بجدول صارم جداً بالدراسه امي جانت اطب للغرفه ماتكدر تحرك ورقه وحده تخاف ايضيع شي وتتورط وياي ههههه
الغرفه عبارة عن ملصقات وملاحضات وملازم ولابتوب بيه مدرسين واوراق وخبصه
جان دائماً مصطفى يدري بيه اضل سهرانه اقرة دائماً يضويلي بفلاش او يدزلي رساله بالواتس اطلع للبلكونه اخذ منه جرعه نشاط وحماس
لؤي خطيه اشترالي ثلاجه صغيرة لغرفتي وما فد يوم اجيت لكيتها فارغه دائماً هو يجي يشوف شنو ناقصها يروح يجيبه وهو يصفطه (خلاصه كلام اهلي بهل فترة ماخلوني اشيل شعرايه من الكاع ) بكل شي داروني واهتموا بيه وجانوا الجزء الاساس بمسيرتي
تعبت على نفسي واقتربت الامتحانات
واني الخوف والقلق ماكلني لان ادور معدل مو نجاح بس بس دعم اهلي ومصطفى خلاني واثقه من نفسي اي واثقه دخلت وزاري واني حمدلله ماعندي نقص او تاخر بشي كلهن مخلصتهن وجان دائماً بالروحه اما مصطفى او لؤي يراجعولي بالطريق هههه بس بطريقه مضحكه يغيرولي جو بيها
امتحنت وزاري واني بهاي الفترة ماكول ضعفت لا بالعكس صرت بطه لان ماتحرك بس الخوف والسهر مبين بالسواد الي جوة عيني وذبول وجهي امتحنت وخلصت وحمدلله ماطلعت من امتحان الا واني راضيه عن نفسي وبكل جدارة باخر امتحان طلعت واني كلش فخورة بنفسي طلعت واول ماطلعت كلت كلمه لهسة مذذكرتها
-مو اني الي تمد ايدك عليها ياحسام
صح كلت هيج بس جذب لو يوكف بوقتها كدامي كَلبي يرجع يدكله رجعت للبيت منتهية تعبانه ماشوف دربي بسرعه طبيت اهلي اخر يوم ماسئلوني شلوني لان مبين عليه التعب عافوني براحتي
بوقتها صيف والقاعات مابيها لاتبريد ولا شي بحيث اعرك وعركي ينكط على الورقة واني امسح بيكصتي حتى مايخرب دفتري الامتحاني
طبيت سبحت بمي بارد احس روحي ردت عليه طبيت لغرفتي السبلت مشتغل والغرفه بارده ثلج طفيت الضوة وسديت البرده مال شباك ونمت هي النومه ماعرف شكد ضليت بس اهم شي شبعت نوم بحيث كعدت منتعشه كلي حيويه
انصدمت من امي كالتلي صارلج يومين نايمه ماصدكت بس من شفت التاريخ والوقت صدكتها ههههه حيللللل مو لهل درجه جنت اكعد عطشانه اشرب مي وارجع انام اشوف الغرفه ضلمه عبالي بعد وقت
مرة عليه الوقت ونفستي تحسنت واني انتظر بالنتائج بعد يطولون بيها يلا ينشروهن
رجعت اندمج ويه عائلتي ولمات الاهل كلش اشتاقيتلها بس بالسادس اي دقيقه ثمينه بالنسبه النا
لهيت نفسي بالبيت بالحلويات والكيكه وكل يوم اودي لبيت خالتي
مرة من المرات وديت كيكه بارده اريد خالتي اضوك
طبيت مالكيتها بس مصطفى
مصطفى: بويه شسالفه ترة الثلاجه انترست حلوياتج احد كال احنه فئران تجارب
اماني : ومنو كال ذني الك كلهن لخالتي وعيبتله بلساني
مصطفى : والله يهينالها لخالتج على هل دلال جيبي خل اضوك
انطيته منها بصحن وضليت انتظر رده على طعمها مثل طفل ينتضر اول شهادة اله
مصطفى : احم شحاطه بيها
اماني : شنو شحاطه بيها بسكت وحليب وصوص ككو اني سويته
مصطفى : وشلون سويتي صوص الككو
اماني : اكيد ككو ومي وشكر وزيت شويه وهم حليب
مصطفى : احم ا ا ا اعتقد بدلتي الشكر بالملح
اماني : سمعت كلامه وفكيت حلكي ماصدكته عبالي يشاقه وياي
كمت اكلت منها
يبوووووو ايع ايع ايع شنو هاي تنكط ملوحه معقولة انت ماتحس بهيج ملوحه شو تعابير وجهك جامده من اكلت منها
مصطفى : ههههههههاي ولج بويه ماردت افشلج وله الملوحه كطعت معدتي ههههها ي
اماني : يما عزة جيب اروح اذبها زين عمتي ما ضاكتها جان تفشلت
مصطفى : عمتي؟؟
اماني : هااا لا شنو عمتي قصدي خالتي
مصطفى : هههههههههاي ان شاء الله تنكلب عمتج باذن الله بس يحن كَلبج عليه
اماني : لا اضل غثيث كلمه وبالغلط
مصطفى : (بغمزة)ويمكن مو بالغلط
عفته ورجعت لللبيت
مرت عليه العطله كله يا حلويات ويا بيت ويا طلعات ويه اهلي وبيت خالتي
قبل اعلان النتائج باسبوع
جنا كاعدين اني وماما نسوي دولمه هي جانت تثرم الحشوة واني جنت احفر بالبيتنجان والشجر وحضرت باقي الشغلات
جاي اغسل السلك سمعت مبايل يدك رحت طايرة اكيد هذا مبايلي وصلت بعدني ماصاعده الدرج لا هذا الصوت من غرفه امي
طبيت غرفه امي هذا مبايلها اخذته اشوف من يدك
يااا هاي خالة سهام شعدها ركضت وديت المبايل بيد امي ورجعت اغسل بالسلك
رسل : الوو
سهام : هلو خيتي شلونج شخبارج (باستحياء)
رسل : هلا خيتي هلا بيج يعمري شلون شخبارج
سهام : حمدلله بخير انتي شلونج
رسل : بخير اذا كلكم بخير
شو ماتبينين شكد دكيت عليج ماكو
سهام : والله يخيه ملتهية بكم شغله واليوم كلت ادك عليج
رسل : شبيج خيتي شو صوتج مو على بعضه
اماني : خصلت السلك وكعدت كدام امي اسمع شنو تسولف امي ويه خالة لان صوت خالتي ماواضحه ابد
سهام : والله خيتي مستحيه منج ماعرف شنو اكول ومين ابدي
رسل : كولي خيتي مابينا مستحه
رسل : ..... صدمتني ام حسام بعزيمتها ومعرفت شرد عليها وادري بأماني ماتريد تجي وياي
سهام : وينج خيه وياي
رسل : اي خيه وياج ربي يجيبلهم الي بيه صالح ويسعدهم ان شاء الله اشوف ابو لؤي ونحضر
سهام : ماشي عمري يلا مع السلامه
رسل : مع السلامه
اماني : اباوع على امي مندمجه ويه خالتي ام حسام شو على فجئه امي جحضت عيونها بس تضحك يعني عيونها بيها لمعه قهرة بس شفتها تكول العكس شنو السالفه هسة امي متفاجئه لو فرحانه مفهمت سدت امي الخط
- ها ماما شتريد خالة
رسل : عزمتنا على عرس احد قرابتهم وكالت الا تجون
اماني : باوعت بعيون امي بشك اكيد تريد تاخذني وياها
-ماما انتي وبابا روحي واني اضل يم خالة ام مصطفى
رسل : وحتى خالتج انعزمت ويانا
اماني : شنو ماعليه ماروح اريد اضل هنا مالي خلك اروح
رسل : ولا كلمه ماخليج وحدج وتروحين ورجليج فوك راسج (بعصبيه)
اماني : انصدمت من رد فعل امي القوي يعني حتى لو تريدني اروح وياها ميحتاج تعيط عليه
ضلينا نشتغل بالغده اني وامي بس ماما ملامحها كلش غريبه عجيبه مبين اكو شي تفكر بيه وشايلة همه
انتظرنا لؤي وابوي يجون وفعلاً اجمي بس وجوهم ماتتفسر يباعون عليه بنظرات خوف ماعرفت شنو هية وشنو تفسيرها
كعدنا تغدينا كلنا سويه ولاول مرة نتغده بدون لا ضحكه ولا سالفه مدري شبيهم كالبين خلقتهم
محمد : لؤي كلت لبيت عمك ابو مصطفى ؟
لؤي : هسة اكمل غده واروح لمصطفى انطيه علم يجهزون نروح باجر؟؟؟
محمد ؟ لا نروح الاربعاء ونرجع الجمعه
لؤي : تمام ان شاء الله ابلغه يكول لاهله
اماني : اني كاعده بنصهم مثل الاطرش بالزفه وكل شويه اشوف امي تباوع على ابوي بنظرات حزينه ماعرف شبيها اكيد زعلانه منه لو بابا مسوي شي ماعجبها
كملنا غده واول مرة بحياتي ماما تخليني اغسل مواعين وارتب مطبخ وحدي دائماً هي وياي عافت كل شي غسلت اديها وطبت للغرفه رجع بابا طب وراها وثنينهم وجوهم ماتتفسر
اماني : اكلك لؤي شبيه ابوي ويه امي شو ملامحهم تبين اكو شي
لؤي : اباوع عليها بقهر اخخخ ياخيتي
-(بنترة)ماعرف لاتدخلين بسوالف اكبار عفتها وطلعت اكول لمصطفى نطلع عكب باجر للبصرة سوة
اماني : هم لؤي ضايج شبيهم ذوله عفتهم وكملت المطبخ كله سويت كيكه جتي بالي وكملتها خليتها بطعم الفراولة وزينتها هم بكريمه فراولة
عفتها بالثلاجه تبرد وصعدت لغرفتي اخذت غفوة بسيطه
مصطفى : اجاني لؤي وكالي على روحتنا للبصرة وشنو السبب اني ماكول مافرحت لا والله فرحت و من الفرحه الكاع ماتسعني معقولة راح تفرج
لؤي : اسمع يخوي ادري بيك تريد اماني وهاويها ونيتك وياها حلال بس ماكول غير ربي يجيب الي بيه صالح الكم ثنينكم
عفت مصطفى ورجعت للبيت واني بالي كله بالحقير حسام بس لا يريد يعوف اختي معلكه وهو ياخذ راحته بحياته شنو قصده هذا وشنو مغزاه من النهوة لو جان يستهزء بينا من نهة ضل بالي كله بنهوة حسام على اختي وشنو معنى كل تصرفاته طبيت لغرفتي نمت من التفكير برد فعل اماني وشنو راح يكون موقفها اذا انحطت بنص هل وضع اخخخ يمونه ادري موقف صعب بس لا زم تواجهين كل عقبه انتي كبرتي بعد لازم تتحملين مسؤليه كل قرار تاخذيه
... . يُتبع
شنو تتوقعون الموقف
الي سواه حسام واثر بأماني
وشنو علاقه العزيمه بحسام
واماني شنو راح يكون موقفها
من تواجه حسام بعد الكتله الي اكلتها منه
كل هذا واكثر في البارتات الأتيه
قراءة ممتعه
دمتم بخير احبتي