بعد ليش أكتب رسَالة وليش أتاني ؟
مالي وَحشة وأدري مو فَارغ مكاني .
مصطفى : ماعرفت شنو السالفه بسرعه جبت البصمه وطلعت
لحكت لؤي لبيتهم بعدني ماطاب يعني وصلت نص الطرمه وجاي اتوجه لباب المطبخ اكلني الفضول وكلش خفت
طلع لؤي شايل اماني بيده وواضح عليها فاقده الوعي ووجها احمر محتقن
خالتي تمشي وراه وتلف بشيلتها
مصطفى: ياستار هاي شكو هنا
لؤي : افتحلي السيارة مصطفى مو وكت حجي يمكن اماني انشمرت من الصخونه
مصطفى : ركضت شغلت السيارة طببها لؤي ليورة ويه خالتي وانطلقت باسرع سرعه عندي
-وين اتوجه دكتور لو مسشتفى
لؤي : مستشفى اقرب خاف كلشي يصير ومانلحك
مصطفى : توجهت للمستشفى وطبينا بس نريد سديه شي حتى نعينها ونطببها محد بحالنا اني هنا فولت ماكدرت اتحمل اكثر ياهو الي نلزمه دكتور ممرض ماينطينا وجه
-عطت باعلى صوت عنديييي
-ماتكلولي لييييييش فاتحيننننننن مستشفى والحاللااااتتت الطارئه محد يصد عليها وووووين مدير المستشفى
كلها على عياطي التمت كمت اشيل بالكراسي واشمر وكلها لازمتني تهدء بيا رجعت عطت
بيكم خيررررر هااااا روحوووو شوفو المريضه
كلها التمت على اماني وشالولها ودوها للعنايه
بشر مايمشي الا بالعين الحمرة هي هاي المستشفيات الحكوميه حتى رحمه مابيها لاحولة ولا قوة الا بالله
طببوها وقاسوا حرارتها كلش مرتفعه
الدكتور منو من اقاربها
لؤي : اني اخوها وهاي امها وهذا ابن خالتي
الدكتور : حجيه بنتج سبحانه وطالعه او هيج شغلات تعرفين جو بارد
رسل : والله جانت البارحه مابيها اي شي جنها ورده
الدكتور : حجيه شلون مابيها لو ماجايبينها من علات اصخونتها جان انشمرت
رسل : دكيت على صدري يما بنيتي
الدكتور : ان شاء الله تنخفظ حرارتها هسة انشدلها مغذي وادويه وتكون بخير
مشه الدكتور لحد الباب ورجع
نعم نسيت احذركم اياكم ثم اياكم تغطوها لحد ما تنخفظ حرارتها
مصطفى : مشه الدكتور واني ضليت رايح راجع روحي طلعت وراها وكل شويه اسئل خالتي شلون وصلت لهيج وضع تكلي مادري
-ادري خالة انتي مو امها مادري شنو لخاطر الكعبه
رسل : ياابني كتلك صعدت لغرفتها مبيها شيي
لؤي : اني رايح اجيب الادويه
مصطفى : راح لؤي واني وخالتي ضلينا ننتظر باماني تكعد دكت بال ١١ وهي ماكو
اماني : ب ب ببارده (بتعب ونعاس)
رسل : يما بنيتي سوده عليه بردانه
مصطفى : خالة ميصير نغطيها الا نتاكد من حرارتها نزلت ومستقرة
ضلت اماني تصيح بارده وبردانه واريد غطه بس مكدرنا نغطيها صحت وحده من الممرضات
خيتي شو تعالي قيسي حرارة البنيه
الممرضه : اي نعم اجيت
خيي حرارتها استقرت واذا صحت تكدرون تاخذونها للبيت مبيها شي ان شاء الله سلامات
مصطفى : تسلمين سمعت هيج خالتي كبل شالت غطه وغطتها
رسل : يعمري يبنيتي متكليلي شسويتي بحالي
اذن الظهر واحنه على هل وضع
يمه يخالة ماكو مكان اصلي بيه
مصطفى : توني شفت غرفه فاتحيها مصلى يصلون بيها نسوان اذا هاي روحي صلي هناك
رسل : يلا ماشي عينك على اماني
بس لؤي وينه شو جاب الدوة واختفى
مصطفى: راح ياخذ لاماني اجازه واني كتله مناك عينك على الشغل اني ارجع خالتي واماني ماريده يخرب شغله وهو بعده بالبداية اني ماعليه شي شكد لحيت عليه يلا راح
رسل : اي عفيه وليدي ماتلام بيه
مصطفى : ضليت كاعد ويه اماني واني اباوع على ملامحها واتامل بيهن
احسها كامت تحرك بنفسها وعيونها تحاول تفتحهن
بالاخير فتحت عيونها والظاهر جاي تريد تركز هي وين
اماني : صحيت واني الرؤيه عندي مغوشه بس بياض بعيني شويه شويه كامت الرؤيه تعتدل كدامي
-ااني و وين
مصطفى : اااشششش ميحتاج تحجين هسة نطلع منا
اماني : باوعت زين اني بالمستشفى كمت اريد اكعد واحاول اتوازن
مصطفى : شفتها تريد تكعد ساعدتها تكعد وترتجي على الحايط كعدتها وعيوني تلاحق كل حركه تسويها وكل نظرة تنظرها
اماني : اني بالمستشفى شجابني هنا
مصطفى : ارتفعت حرارتج وخفنا عليج فا جبناج هنا
اماني : اها باوعت على الممرضات كل وحده ملتهية باحد رجعت باوعت على المغذي بعده ماخلصان
مادري شجاني وذكرت الضرب الي اكلته من حسام كمت احس نار بداخلي اشتعلت اخخخخخ اخخخخ ضليت اباوع منا ومنا لكيت مبايلات على الميز بصفي اتفقدتهن حمدلله امي جايبه مبايلي هم ههههه لان مالها صرصر
شلت مبايلي وماعرف شنو جنت افكر بوقتها او شنو الي خلاني اسوي هيج كمت صورت ايدي والمستشفى ودزيتها لحسام ليش وشنو مستفاده ماعرف شننو السبب
طلع يمه صح ثنين بس مشايفها عفته وضليت صافنه اني ليش هيج سويت بعد الي سواه المفروض اكطعها وياه ليش هيج سويت شنو يعني عود ينقهر عليه لو نكسر خاطره عليه اخخخ اماني غبيه غبيه كمت شلت المبايل اجيت احذف الصورة وشفت الصحات صايرات زرك يعني شافها
حتى لو مو مهم خل امسحهن بعدني مامسحتهن وجان يدز رسالة شفتها وضليت بس فاتحه عيوني من صدمتي احس احد شلع كَلبي من مكانه وشمره وضل يدوس عليه جان رده كلش قاسي ماتوقعتها منه كاتبلي
عساج بالازود من هذا
انكسر خاطري من شفت رده شلون وكلش تاذيت عفت المبايل من دون مامسح منه شي ورجعت تمددت على السديه وغطيت راسي ماريد احد يشوف دموعي ولا اريد احد يشوف انكساري...
مصطفى : شفت اماني ضربت صفنه مدري بشنو تفكر شالت مبايل طكت صور اني استغربت بهيج حاله والها خلك تصور والله بشر
صورت ومدري المن دزتهن وعافت المبايل هم رجعت صفنت وجان تشيل المبايل واني عيوني تراقب كل حركه منها
شويه شفت عيونها فاتحتهن على وسعهن بصدمه ذبلت ملامحها عافت المبايل وتمددت وتغطت صح ما اسمع الها صوت بس مبين من اكتافها تهتز يعني جاي تبجي اكيد
كلش استغربت واخذني الفضول اعرف شنو هذا الي خلاها هيج تسوي
سحبت المبايل من فوك راسها بدون ماتحس حمدلله مابيه رمز ولا نمط بس اسحب الشاشه فعلاً اول مافتح المبايل على واتساب وجانت اخر محادثه باسم (ابن العم❤️)
ضليت صافن معقولة راسلته وهي بهذا الوضع بالبداية ماردت ادخل بخصوصياتها بس مكدرت ردت اشوف شنو بينهم فتحت المحادثه شفتها دازتله صورة وهو راد عليها رد يكسر الخاطر اني من شوطتي عليه كمت مسحت الصورة من الطرفين ورديت عليه
عساك بالمثل يا ابن عمي واشوفك من مشفى لمشفى
كبل دزيتها طلعت عندي مرئيه كبل حضرته ومسحت المحادثه ومسحت الرقم من الجهاز كله
حقير البنيه دازتلك تتحمدللها لو تكسر خاطرها
اخخخخ وهاي الكلبه شكو دازتله اصلاً منو هو حتى ادزله
اجتي خالتي وكتلها اماني صحت كمل المغذي وطلعنا رجعتهم للبيت وفوتت اماني ويه خالتي لان مثل الدايخه ومدري شبيها عفتهن بالبيت وطلعت على شغلي كلش تاخرت اليوم بس هم زين اخذت اجازة مؤقته وكطعت وياها استراحه الظهر كله لخاطر عيونج ياملاكي هذني كلهن يهونن مو ممهمات عدي
وصلت وباشرت شغلي واني كل تفكيري بيها وليش دزتله هيج وشنو الي خلاها تنقهر من رده واذا رد هيج ليش هيج انقهرت وانكسر غريبه معقولة اماني تريده وترغبه يعني تحبه لو شنو اخ اخخ راسي احسه افتر الف فرة
اماني : رجعت للبيت وامي ومصطفى سندوني حتى اطب للبيت واني روحي احسها مايعه مدري شبيه طاقتي خارت احس كل الدنيا والوانها انطفت بعيني وصارت سوده
رسل : يلا يمه اوديج بغرفتي اقربلي حتى كل شويه اجي اشوفج
-هزيت لامي براسي بمعنى اي وودتني خطيه للغرفه خلتني امدد على جربايتها وغطتني
رسل : اي شي تردينه بنيتي لاتكومين بس كليلي او صيحيلي
اماني : ماجاوبتها بس من ملامحي مبين علامه الرضه راحت امي واني لزمت مبايلي وغطيت راسي بالغطه مافتحته بس جان بيدي اباوع على شاشته السوده وكَلبي مكسور ليش حسام ليش ماتفهمتني وفهمت موقفي ليش هيج سويت
ضليت ابجي ودموعي ينزل عليه مثل الجمر فتحت المبايل حتى ارجع اشوف المحادثه حتى اشوف كَلبي الي هواه صار سنين شلون يرد عليه لان مافاد ويه كَلبي من هاني وكتلني خله دمي بطولي
اخخ يكَلبي لو بيدي اشيلك واشمرك بعيد عني
فتحت المبايل مالكيت المحادثه استغربت
ضليت ادور وبحثت عن الاسم ماكو واتسابه فد مرة رجعت بحثت بجهات الاتصال هم ماكو هذا وين راح
صراحه مو مهم احسن حتى ما اضعف وارجع مرة ثانيه وانهان لا لا هاهي مو مهم شلون وليش انمسح المهم خلصت اي خلصت
احجي هيج وارضي بنفسي واني بداخلي صراع بين عقلي وكَلبي
عقلي يوجهني على الفراق
وكَلبي يوجهني على القرب
حرت اخخخ هاهي من اليوم احط نقط للحروف وارجع للدراسه اني انطينه مجال اي اني منو يكول ماجان يضحك عليه كل هل سنين وجان حب طفولة وارجع وبعده يحبني مستحيل هو رائد شايف اشكال النسوان
(احجي واريد اكره نفسي بيه اتناساه حتى اكدر اكمل دراسه بالنسبه الي هاي سنه مهمه جداً وبيها تحديد مصير )
.....
الواقع
اماني : كافي يولي تعبت والله
مريم : يوووو مو خوش متونسين وجاي تحجين دخلصي
اماني : والله قصتي كلش طويلة ماتخلص باول ساعه لو ساعتين
مريم : يا ساعه ترة صار اقل النص ساعه نحجي
اماني : هاييي شبيج باعي على وقت المكالمه ترة صار فوك الساعتين ونص
مريم : ههههه يااااا وربي ماانتبهت
اماني : لعد خوش ادعبلي من يمي ترة نعست والله ولخاطرج صابره
مريم : ههههههه ماعوفج والله الا اتخلصين اليوم سماح واضل كل يوم اتصل بيج تحجيلي ترة اموتج
اماني : ههههه اوكي سهلة بس وخري والله طفيت
مريم : يلا مع السلامه حياتي
اماني : مع السلامه
سديت الخط من عدها جذبت عليها من كلت اني نعسانه لا مانعسانه بس تحركت عندي مشاعر ماعرف اوصفها حقد كره اشمئزاز وحبيت اتوقف هنا مكدرت اكمل
طارت من عيني النومه ضليت اكلب بالفيس مقاطع واشوف وعندي كروب بالفيس ويه بنات القسم مالنا بس ناشرات منشور جان محتواه
وهل للغائب عودة للقلوب
رديت اني هنا للمنشور هذا
وان عاد الغائب من سفرٍ طويل لن يجد القلوب لنفس اصحابها💔💔
طلعت من الكروب ورجعت اكلب بالفيس
ضليت اكلب ورجعت اكلب بصفحات الشخصيه اني بس اريد انعس وله ادري الفيس ممل
ضليت اكلب ولكيت صفحته
لا مو هيه يمكن متوهمه قريت الاسم
حسام جاسم وحاط صورته ويه بنيه صغيرة
فتحت الصورة وشفته ملامحه هي هي بس مبين بيه الكبر وطالع بلحيته شيب
باوعت على البنيه الي وياه عدها ملامح منه نفس نظراته وحلكه بس الباقي لا على امها سبحان الي خالقها عيونها زرك وشعرها عسلي
صراحه ماكول مانكسر كَلبي من شفت هاي الصورة لا انكسر شصاير لو متحمل يروح الموضوع واصير اني ام هل طفله شنو الي يصير لو ما نزل من قيمتي كدام الكل شنو الي يصير
احس جمرة بنص كَلبي صارت طلعت من الصورة الشخصيه وضليت اكلب بصفحته كلها صور اله وللبنات واكو صور لعرسه
اباوع وعيوني انترسن دموع حاولت ماخليهن ينزل بس خانني اي خانني مكدرتلهن اخخ اخخخ ليش هيج كسرتي ليششش
طلعت من الفيس وعفت المبايل على الشحن ضليت صافنه بالسقف
اباوع عليه وصافنه وعيوني ينزلن بدون ارادتي تذكرت كل موقف بشع وياه تذكرت كل اهانه انهانيتها
صفنت وافكاري كامت تروح وتجي تعوذت من الشيطان وكمت غسلت وجهي وصليت ركعتين لوجه الله كعدت ادعي من حركه دمي
ربييي ليشش بعده بكَلبي لييشش ربي ليش كل هذا الي سواه بيه وبعدني اميل اله ليش يربي ربي اتمنى تشيله من كَلبي لا مو بس من كَلبي من فكري ومن كلشي مستحيل مستحيل حتى لو كَلبي يميل اله مستحيل افكر يوم ارجع علاقتي وياه بعد الي سواه شنو ماعندي كرامه
ربي اسئلك التوفيق بالقرارات الجايه واسئلك راحه البال وتيسير الحال يارحمن يارحيم ضليت اسبح بال ١٠٠٠ تسبيحه
لميت المصلايه والسبحه ورجعتهن لاماكنهن
تمددت بفراشي والافكار تنهال عليه من كل الجهات ضليت استغفر ربي وبنص استغفاري غفيت
نمت وكعدت ثاني يوم وحدي محد كعدني مدري تعودت على مريم كل يوم تكعدني سحل هههههه
كمت باوعت للساعه بال ١٠ ونص يااااا عزةة شلون نومه
لميت فراشي وغسلت وجهي مشطت شعري وسويته ضفيرة وحده ورة ورحت يم امي صباااح الخير مدري ضهر الخير هههههه
رسل : ههههه هل يرهم رهميه بنيتي عذريني ماكعدتج ويانا على الريوك شفتج تعبانه وانقهرت عليج
اماني : لا مو مشكله ماما
رسل : ابوج جاب كاهي وكيمر عرب تلكيهن بالثلاجه
اماني : ياااا صدك اجن بوكتهن
رسل : هههههه بالف عافيه ياعمري
اماني : رحت طلعتهن وحميت شيرة الكاهي وحطيتها عليه والجاي اصلاً مخدر بس حميته صار ريوك يخبل صورته وعدلت الصورة وكتبت عليها اخر روقاااان هههههه نشرتها على الفيس والواتس
كملت ريوك ولميت المواعين انتبهت امي جاي تباوع على مسلسل معرف شنو هو كعدت بصفها واخذني الواهس بيه كل شويه اسئلها عليه شي هاي منو وهذا شنو يقرب لهذا ومن هل اسئله
رسل : لجججج كافي راح تخرب الحلقه عليه بعدين اسئلي او بالاعلان
اماني : هههههههاي يمعوده ارجع اعيدها الج باليوتيوب لو اي برنامج بس لا تخلين بيه فضول
رسل : ااااشششششش خل اسمع شنو يكول البطل
اماني : سكتت ضليت اتابع ويه امي بس المسلسل ماعجبني كله حب وسوالف مدري شلونها
يمي مبايلي لزمته وكمت اكلب بيه ههههه كل البرامج كلبتها ماخليت اخر شي فتت على الواتساب باوعت منو شاف الحالة كلها شافوها ومن ضمنهم رفل وتمارة بنات عمي كلش اشتاقيت الهن بس هنه بعد الصار لا اني ولا هنه راسلنا بعض
جيت اكتبلها رساله
هلو شلونج مشتاقتلج يالكاطعه
بعدين صفنت على الرساله شويه ورجعت مسحتها مايحتاج اي صله رحم بيهم مالي نفس اسولف وياهن ويكتن اخبار اخوهن كلها يمي اني لحالي ماطايقه اسمه
عفت الواتس وطبيت للفيس هم اشوف منو شاف بيهم وضليت اكلب اولهم لؤي ومصطفى وثنينهم حاطيلي قلوب هههه ضليت اكلب بالمشاهدات ولكيت حسام من ضمنهن
شنوو هذا شجابه لحسابي وبس لا يدري هذا الي معقولة ماخذه من رفل؟
ضليت بحيرة من امري بس ما انطيت الموضوع اكبر من حجمه غلست وكمت ويه امي اساعدها بالغده مرة النهار عليه كلش عادي بين البيت والعائله ماكو شي جديد
... . يٌتبع