...سبأ...وره شويه نزل نورس من فوگ ويسحب بجنطه جبيره مال ملابس باوع علينا بنضره مكسوره وأخذ بصمة السياره مالته وعافنه وطلع راحوا كمال وعماد يصيحون عليه رادوا يحجون وياه وهوه عافهم وداس بانزين بالسياره وراح ووضع البيت انگلب عزه الجو متكهرب والعرس بعدله يومين مال عماد وكلشي مو فاهمين هوسه .
...سبأ...هدأ الوضع شويه كلمن راح لغرفته اني بقيت حايره شسوي نورس ماعنده مكان يروحله وطلع من البيت وأخذ ملابسه وين يبات وين يروح حجيت ويه كمال وسألته ..
...سبأ...كمال حياتي خابر نورس شوفه وين يروح خطيه ماعنده مكان معقوله رح تسكت متساعد اخوك شلون هيج تعوفه يطلع من البيت..
....بقى صافن وايده على خده وگال ..
...كمال...لتخافين عماد طلع وراه رح يساعده دزيته حتى يلحگه شلون نعوف اخونا كل عقلج اعوفه..
...سبأ...كلش فرحت من عرفت كمال وعماد رح يساعدون نورس بسرعه لزمت موبايلي وكتبت رساله بكل الي صار
دزيتها لرسل وكلتلها متتصل بيه لان كمال يمي وحذفت الرساله كلت حتى كمال ميشوفها مااريد يعرف دااوصل حجي لرسل...
......................
...رسل... چنا بالمطبخ اني وسالي نحضر العشاء هذه آخر عشاء النا ويه سالي لان باجر يجي عليها غمار يأخذها وترجع لبيتها الحمدلله تصالحوا هي وغمار وانحلت مشاكلهم دااحضر المقبلات وسالي واگفه على الطباخ تگلي دجاج وجان يجي يركض متيم وبيده الموبايل وگال ..
... متيم...رسل موبايلج اشتغل ضوه بي ..
....رسل...اخذت الموبايل منه وجان اشوف رساله واصلتني من سبأ فتحتها وقريتها...
...انصدمت باوعت على سالي ورجعت باوعت للرساله انتبهت عليه سالي اجتي وگفت كدامي وكالت .
...سالي...ها خير صاير شي وجهج گام ينطي الوان شكو ..
...باوعت عليها وكلتلها..
...رسل....عمه ساهره تعاركت ويه نورس لان كاللها يريد يخطبني وهي رافضتني ونورس عاف البيت وطلع زعل من أمه وهسه ميدرون بي وين راح سبأ تكول عماد راح وراه ومتدري عنه شي لحد الآن..
....ضربت بيدها على صدرها وكالت..
...سالي...عزه العزاج تعارك ويه أمه على مودج خطيه هسه شلون وين راح زين خاف راح يم كرايبهم لو احد من جماعته خابريها..
...رسل...لا مااتصل على أحد عوفيها هسه خلي نشوف شيصير منا لباجر عود اخابرها .
...سالي....زين انتي مو عندج دوام باجر روحي للكليه بلكي تشوفين نورس هناك .
....رسل....شنو احجي وياه حتى لو اشوفه آخر مره تلاغينا اني وياه وسمعته حجي يجرح اصلا اني مصدومه شلون بعده يريدني ومتمسك بيه رغم الصد والرفض الي يشوفه مني ..
....هزت راسها موافقه وكالت ..
...سالي....هم صح والله لو اني بمكانه وهيج ترفضيني مااتفل بوجهج تفله مو اتعارك ويه امي لخاطرج گبر انتي مو وجه نعمه ابد ..
...ضربتها على رأسها وكلتلها..
...رسل....عابت لهلوجه شنو انتي وياي لو عليه اني اختج المفروض تصيرين وياي مو ويه نورس ..
...سالي ...لا حياتي اني ويه الحق ونورس يحبج والدنيا كلها تعرف بي يحبج بس تعاي اگلج أمه ليش رافضه زواجكم هي مو تحبج وزينه وياج شعجب ...
...نزلت عيني للكاع وكلتلها..
...رسل....لان مطلگه اكو غير هذه السبب يمعوده سدي الموضوع تعاي خلي نصب العشاء والصباح رباح باجر نعرف كلشي ..
....رسل ...صبينا العشاء وكعدنا ناكل واني صافنه وافكر بنورس عود مسويه نفسي مااهتم بس اني تفكيري وعقلي كله يمه مااعرف صاير عندي تضارب بالمشاعر ساعه اگول مااقبل بي وساعه اگول ماالگه احد يحبني مثله بس خوفي من عمتي ومن رد فعل حاتم هوه الي مانعني من الموافقه والي جنت خايفه منه صار عمتي رافضتني معناها حقي ارفض نورس واخاف من قرار الزواج ..
...مامه سمعت بلي صار وبقت ساكته باوعت عليه وكالت..
...كفاح ...القرار الج هاي المره اني مااتدخل حتى اي شي يصير بعدين متكولين من وراج وكله بسببج مثل زواجج السابق فبقت يمج توافقين أو ترفضين مااتدخل اني بس اني عندي شرط واحد اذا يخطبج لازم يجي ابوه وياه ميجيني وحده اذا مااجه ابوه وياه ماانطيج اله يكون بعلمج.
....رادت تحجي سالي واني سبقتها وحجيت ويه مامه وكلتلها..
...رسل...دقيقه دقيقه سويتها خطوبه ويجي ابوه هوه منو يكول يخطبني شو بكيفكم كمتوا تقررون سدوا الموضوع عفيه ترى ضجت ..
...رسل...عفتهم ورحت لغرفتي اخذت عزوز غسلتله وبدلت ملابسه ونومته وبقيت اتگلب بفراشي الف فكره وحسبه أبالي ومااعرف شسوي بالي يم نورس هذه وين راح هسه شلون هيج يعوف البيت ويطلع يربي ..
.......................
...عماد...نورس طلع من البيت عصبي ومقهور ركضنا وراه اني وكمال نريد نوگفه نمنعه من الطلعه بسرعه داس بانزين وراح بدون ميسمعنا ضرب على ضهري كمال وكال ..
...كمال ...بسرعه عماد اخذ تكسي وروح وراه الحگه واني احجي ويه امي وابويه واتصل بيك واي شي يصير خابرني .
...عماد ...اخذت تكسي وبقيت اتصل بنورس طول الطريق اريد اعرف وين راح حتى اروحله أكثر من 11 مكالمه وراها يله جاوبني بصوت عالي وعصبي وكال ..
...نورس ...خير عندك شي تريد تحجي وتكمل الموشح مال امي وابويه بدون زحمه اذا كلامك بي مغثه سد الخط وروح عماد ترى دااسوق سياره واعصابي منهاره مالي خلگ اسمع كلمه وحده زياده زين لولا .
....عماد... بس هديء اعصابك عيوني ليش هيج عصبي انت وين هسه اريد اجيك بس گلي وين رحت ..
...نورس...لتجي مااريد اشوف احد عوفوني وحدي ..
...عماد ...بداعت اغلى الناس عندك الله عليك گول انت وين نورس والله مااحجي شي يغثك بالعكس عندي حل لمشكلتك بس اريد اكعد ونحجي وافهمك كلشي .
....جر حسره قويه وكال.
...نورس ...داامشي بالسياره بعدني وين انت نكعد بمكان ونحجي..
...عماد....زين روح للكراده واختار اي مطعم لو كوفي شوب نكعد بي واني هسه بالطريق جاي ..
...نورس...يله انتضرك لا تتأخر..
...........
....عماد....انطيت العنوان للسايق ورحت وراه للكراده لگيته حاجز مكان بمطعم جان الوقت ليل طلبنا عشاء وكعدنا نسولف باوع عليه وكال.
...نورس....شنو الحل الي عندك ابو الحلول تفضل اسمعك .
...باوعت عليه ضحكت وكلتله.
...عماد. ...اذا لكيت خطه تخليك تتزوج رسل الخبله شتنطيني .. ؟
...رفع عينه عليه وخزرني بعيونه وكال...
...نورس....لتگول خبله عليها لا لسانك اگصه هاي أولاً ثانيا شنو الخطه سمعني اول مره وراها اطلب اي شي تريد يجرالك بس كون خطه ناجحه مو بايخه مثل صاحبها .
...ضحكت وكمت اهز بيدي وكلتله..
...عماد....والله ياربي هم مطرود من البيت وهم ماكل عركه غسل ولبس من امي وهم رسل ساحلتك سحل وبعدك لسانك طويل وتتجاوز ولك احترم نفسك اني اخوك الجبير..
...اخذ بطل المي بيده شرب منه شويه ورجعه لمكانه باوع عليه وحط ايده على خده وگال..
...نورس....اسمعك كلي آذان صاغيه تفضل احجي ..
...عماد ...سؤال ...منو الشخص الي يمون على ابويه ويمون على رسل وامها بحيث إذا يطلب منهم طلب لخاطره ينفذوله الطلب ..؟
عقچ وجهه وكال..
....نورس ...منو.. مااعرف..
....باوعت عليه بنظره شريره وحركت حواجبي وكلتله..
...عماد....عادل ابو حاتم ....
...صرخ بوجهي وخزرني بعيونه وكال..
...نورس....نععمم نعممم منووو عااادل مالگيت غير هذه انت.....ابو حاتم ..
....كمت اباوع على الناس كلهم صارت انضارهم علينا وكلتله..
...عماد....نصي صوتك فضحتنا اسمعني خلي آكل تبن شبيك ..
...فرك وجهه بنفاذ صبر وكال ..
...نورس...تفضل آكل تبن خلي اشوف تاليها..
...عماد....ابو حاتم جان صديق ابويه وصديق خالي عزيز الله يرحمه لاتنسى همه جانوا يدرسون سويه وتفارگوا من مات خالي عزيز وابويه يحب عادل ويريد خاطره وبنفس الوقت عادل يصير اخو مرت خالي عزيز يعني اكيد تسمع كلامه وهم تريد خاطره ..
...نورس...اي واني شنو علاقتي بيهم يحبوه ويردون خاطره واني اريد رسل شعليه بيهم .
...عضيت لساني وكلتله..
....عماد ...لك ركز وياي لتصير اثول خلي اكمل كلامي لتقاطعني لا احط راسك بالچاي ..
....نورس...احجي لخاطر الله..
...عماد ...انت شنو مطلوب منك شتسوي تروح لعادل لبيته وتحجي وياه تفهمه وجهة نظرك وتگله اني جاي من الباب واريد أخطب رسل واني شاريها ورايدها واني اتعهدلك رسل وابنها احطهم بعيوني واعتبره مثل ابني وإذا بيوم قصرت وياه تعال حاسبني بس الي اريده منك تصير وسيط بيني وبين اهلي واهلها وتخطبها اليه منهم وبهيج إذا صار عادل وياك رح تضمن موافقة ابويه وموافقة ام رسل واكيد كلهم رح يحجون ويه رسل الخبله ويقنعوها بيك وفضت راحت انحلت عقدة زواجك من الموناليزا رسل ..
...عماد ....كملت كلامي ورجعت ليوره رچيت ضهري على الكرسي وكتفت ايدي وبقيت اباوع على نورس صفن شويه حك لحيته وباوع عليه وگال..
...نورس...بغض النظر عن الاستهزاء مالتك بيه وبرسل الي بعدين احاسبك عليه بس الخطه عجبتني صح اني استصعبها انزل نفسي لاهل حاتم بس رح اروح احجي ويه عادل مثل ميگول المثل لأجلِ عينٍ الفُ عينٍ تكرمُ ..
....عماد....هاي هي متفقين زين هسه انت وين رح تروح كوم ارجع وياي للبيت .
...نورس...لا ماارجع عوفني اذا امي متتقبل رسل ومتوافق عليها ذاك البيت بعد مااطبله لو اطبله اني ورسل لو مااطب ..
...عماد....ولك كل عقلك تحجي رح تخلي امي زعلانه على مود رسل شبيك يول ..
...نورس....ازعل العالم كله على مود رسل لو نسيت شسووا بيه قبل من جنت رايدها كلهم صاروا ضدي وزوجوها لهذه الي اسمه حاتم لما راحت من ايدي تريد هسه من رجعتلي والله عوضني بيها اعوفها .. لا والخلق الليل والنهار وبسط الأرض ورفع السماء مااعوف رسل لو اعرف ازعل العشيره كلها مو بس امي .
....عماد...براحتك سوي الي يعجبك اني العليه سويته هسه لازم اروح وانت ماكلتلي وين رح تبات هسه وين تروح ..
...نورس...روح انت ليضل بالك اروح يم صديقي ابات لباجر لو اشوفلي فندق انام بي الفنادق تارسه بغداد مو فد مشكله ..
...عماد....يله في أمان الله ديربالك على نفسك ومن نتصل بيك جاوب لتخلي بالنا يمك ..
...نورس...ماشي الله وياك .
......................
...رسل...بقيت الليل كله سهرانه مااجاني نوم كل ساعه الزم الموبايل واكول اتصل بنورس واتراجع اكول خلي وحده مااتدخل لحد ماطلع ضوى النهار واني كاعده بعدين تعبت وغفيت ..
...فزيت على صوت عزوز يتعارك هوه ورؤى كمت ركضت عليهم شفتهم يتعاركون على لعبه على شكل قطار مال متيم رؤى تكول مال اخويه عوفها وعزوز يكول هاي مال ولد مومال بنات انتي عوفيها اخذتها منهم وسكتتهم ثنينهم باوعت للساعه ب9 ونص راح الوقت عليه بعد مومال اروح للدوام طلعت غسلت وجهي وسويت ريوك لكيت امي وسالي متريكات سألتهن.
...رسل....ليش محد كعدني للدوام ..
...سالي....ساعه اكعد بيج وانتي ماكو عبالك ميته شنو صاير نومج ثگيل ..
...فركت وجهي وكلتلها..
...رسل...بالليل مااجاني نوم الفجر يله نمت يمكن لان تعبانه ماسمعتج ..
...عفتهم ورحت اتريك بالمطبخ خلصت ريوك سبحت عزوز وسالي سبحت جهالها وحضرت غراضهم لان تريد ترجع لبيتها لحد ماصار الضهر طبيت للحمام سبحت وبدلت ملابسي وطلعت اخذت الشسوار حتى اجفف شعري وطبيت للغرفه طلعت لگيت سالي وامي يحجن سويه بالمطبخ سألتهن..
...رسل...شكو شبيكم اكو اسرار واني ماادري .
...كفاح....لا مو اسرار خالج عادل اتصل بيه يريد يجي اليوم العصر..
...رسل...اي خلي يجي هلا بي ..
...بقن وحده تباوع للثانيه اني صار عندي فضول أكثر كلتلهن..
....رسل...شكو صاير شي.
...تقربت مني امي وگالت ..
...كفاح...نورس رايح الصبح لخالج عادل وحاجي وياه وطالب منه يتوسط اله بين أهله واحنا حتى يخطبج من عدنا وأهله يوافقون ..
....من سمعت امي هيج تگول عبالك واحد ضربني بطابوكه على راسي انصدمت كلتلها..
...رسل...شنوو نورس شوداه لخالو عادل عزه هذه كل عقله يحجي صدك مخبل شلون يخطبني من خالو عادل عزه العزاني هسه حاتم يسمع ويأخذ عزوز مني ادري هذه شلون هيج يتصرف ماعنده عقل .
....ضحكت سالي وكالت ..
...سالي....اصلا موقفه كلش عجبني وإذا ماوافقتي على نورس تطلعين ثوله وغبيه شوفي شديسوي لخاطرج حارب اهله وراح لخالو عادل يطلبج منه لأن يدري مامه مترفض طلب لاخوها شوفي شلون ديجازف بكلشي على مودج وانتي تفكرين بحاتم خاف يزعل ويأخذ منج عزيز امداج شكد غبيه وثوله لعد ..
....رسل....انتي شدتحجين مو مال رومانسيات هسه اني مااكدر اغامر بإبني على مود اي واحد حتى لو على مود نورس حاتم اذا سمع بيه اريد اتزوج رح ياخذ عزيز مني وانتي تكولين نورس يانورس وخروا عني لخاطر الله.
...عفتهن ورحت للغرفه افتر بالغرفه مثل المخبله كل ساعه الزم الموبايل اريد اتصل بنورس واحجي وياه اخلي يتراجع عن قراره بس خفت من ردة فعله ماادري شبيه متردده حيل ومااعرف اتصرف كعدت على الجربايه وحطيت ايدي على وجهي وكمت ابجي مااعرف ليش حسيت نفسي ضعيفه ومحتاره بين طريقين ولازم اختار لو ابني لو نورس بعدين مسحت دموعي وكلت خلي يجي خالو عادل واني احجي وياه وافهمه كلشي .
...صار العصر واني جسمي كله يرجف وبطني توجعني من التوتر كلما يقترب موعد جية خالو عادل يزيد الخوف عندي لحد ماسمعت صوت جرس الباب يرن اني بغرفتي حسيت كلبي وكع برجلي من الخوف بقيت بالغرفه ماطلعت ابد وره شويه طبت عليه مامه وكالت..
...كفاح...رسل كومي مامه خالج اجه يريد يحجي وياج .
...باوعت عليها بخوف وكلتلها..
...رسل...شگال جاب طاري عزيز رح ياخذه مني مو صح ..
...ابتسمت وكالت..
...كفاح...كومي مياخذه منج نورس جاي وياه ويريدون يحجون وياج ثنينهم..
...من كالت نورس جمدت بمكاني باوعت عليها وكلتلها.
...رسل...نورس هم اجى عزه شنو ناوي هذه شراح يسوي .
...كفاح...كافي عاد رسل يله لبسي شال على راسج والحكيني الرجال ينتظر بره عيب امشي واي شي عندج احجي الهم واتفقوا يله مامه.
...غيرت ملابسي لبست فستان بسيط مال بيت ورهمت عليه شال حطيت عطر وطلعت الهم واني احس رجلي وحده تطگ بالثانيه من الخوف اول ماطبيت للصاله عيني بالكاع سلمت عليهم وثنينهم ردوا عليه السلام رحت كعدت بصف مامه صار نورس على يميني وخالو عادل كدامي الوقت كله اباوع على خالو عادل ابد ماشفت نورس ولا انتبهت عليه بعد السلام جان يحجي خالو عادل وهوه الابتسامه مرسومه على وجهه وعينه عليه وكال .
...عادل ... شوفي بابه رسل اني سابقآ كلتلج انتي بنتي واني بمكان ابوج الله يرحمه وتعرفين انتي شكد الج معزه خاصه عندي رغم كل الي صار من خلافات بينج وبين ابني بس هذه كله ماغيير مكانتج بگلبي يشهد الله عليه ولحد الآن بعدني عند كلمتي ارجع واگول انتي بنتي واني بمقام ابوج ..
...سعل سعله خفيفه وباوع على نورس وكال..
...عادل...وبما أنه اني بمقام ابوج اليوم الصبح اجاني عليج ولد شاب ابن عالم وناس وطلب ايد بنتي مني واني اعرفه هذه الولد حق المعرفه لان ابوه هم كان صديقي يعني انتوا ثنينكم نفس المعزه عندي لذلك اني وافقت بس كلتله اشور بنتي وإذا وافقت عليك ميكون خاطرك الا طيب فَ القرار الج انتي بابه شتكولين موافقه نورس يصير زوجج اذا عندج طلب او شرط اسمعج كولي..
...رسل...بقيت منزله عيني وافرك بإيدي من التوتر وهوه يحجي اني اسمعه واحس نفسي عبالك اول مره انخطب شعور الخوف مسيطر عليه كمل كلامه وسكت ينتظر مني الجواب باوعت عليه بنضره كلها خجل ونزلت عيني حجيت بصوت يرجف وكلتله..
...رسل....خالو اني احترمك واحبك مثل بابه بالضبط بس اني مااكدر اعوف ابني مااكدر اعيش بدون عزيز ولا يوم وإذا تزوجت خاف حاتم ياخذ عزيز مني لهذه السبب...
...قاطعني وگال..
....عادل....لهذه السبب اني اگولج عزيز يبقى يم أمه وميفارگها وحاتم مااكدر أئمن على عزيز عنده حاتم مو أهل للثقه حتى اخلي طفل عمره سنتين يمه وهوه كل فتره يسافر لمكان ممستقر ابد زوجته جابت بنيه ذاك اليوم خابرتني تبجي تگول كل فتره يأخذنا ويسافر واني تعبت اريد استقر ابيتي بس حاتم ميكعد بمكان يعني لتخافين اول مره حاتم خلي يحافظ على بنته وزوجته عود بعدين يفكر بعزيز .. بابه بنيتي اذا موافقه على ابن عمتج وماكو مشكله تخص الزواج اتوكلي بالله ووافقي ترى مو كل يوم تلگين ابن حلال هيج يحبج وشاريج مثل نورس ..
.....ابتسمت ورفعت راسي باوعتله وكلتله..
...رسل...يعني عزيز رح يبقى يمي متاخذه مني مو صح.. ؟
...هز براسه موافق وهوه يضحك وكال...
...عادل ....يبقى يمج يبقى لتخافين ..
...رفع ايده وصار يأشرلي بأصبعه السبابه وكال ..
...عادل ...بس هاا مو تحرميني منه كل اسبوع لو عشر ايام تجيبي يبقى يمي ليله اشوفه ترى هذه حفيدي العزيز ..
....ابتسمت وكلتله..
...رسل....تدلل خالو من حقك كل فتره اجيبه الكم يبقى يومين يمك ويرجعلي ..
...ضحك وكال..
...عادل... يعني شنو هسه موافقه على الزواج من نورس لولا نگول مبروك ..؟
...اختفت الابتسامه من وجهي وكلتله..
...رسل...بس هوه اهله مموافقين على زواجه مني شلون اوافق اني ..
...قبل ميرد خالو عادل رد نورس وكال..
...نورس....ابويه موافق واخواني كلهم موافقين بس امي رافضه لان بعدها متعرفج زين بس وره الزواج اكيد رح تعرف أنه هي ضلمتج وتتقبل وجودج بحياة ابنها رسل اني رايدج وشاريج لتخلين رفض امي يخرب حياتنا ترى اني تعبت صارلي سنين واني اقنع بيهم حتى ابوج الله يرحمه جان رافض زواجي منج وهسه امي بس اني ميهمني رأي امي وابوج اهم شي انتي اذا توافقين هسه انفذ كل شروطج واني الممنون صدكيني
انتي بس وافقي ومراح تندمين ابد اني اوعدج وعد شرف وهاي گدام امج وخالج اذا بيوم من الايام زعلتج لو قصرت وياج لو ويه عزيز بشيء حاسبيني وكولي نورس انت مو رجال وماوفيت بوعدك اليه بس وافقي لتصيرين ضدي مثل امي ..
....باوعت عليه ورجعت نزلت راسي كلامه كلش فرحني حسيته طالع من گلبه وصدك يحبني بس استحيت اجاوبه بقيت ساكته رجع حجى ويه امي وخالو وكال ..
... نورس...بدون زحمه خاله عادي احجي ويه رسل على انفراد عشر دقائق اذا ما بيها زحمه.
...رسل...انصدمت من سمعته هيج گال باوعت عليه وخزرته بعيوني بس مامه وخالو عادل ماگالو شي بالعكس أيدوا طلب نورس وطلعوا من الصاله وكالوا من حقكم تحجون عافونا وحدنا بس الباب بقى مفتوح
واني احس گلبي يدك بسرعه كلش استحيت اول مره انحط بهيج موقف بهاي الأثناء گام نورس من مكانه وتقرب اجه كعد يمي على نفس القنفه بس ترك مسافة اشبار بيني وبينه اني من تقرب مني ارتبكت گمت وكفت باوع عليه وكال..
...نورس....اكعدي بس احجي وياج دقايق رسل الله يخليج خلينا نحسم الموضوع اليوم حتى ارتاح بس اسألج سؤال وجاوبي اي لو لا وبكل صراحه ..
...كعدت وحجيت وياه بصوت يرجف وكلتله..
....رسل...اسأل شنو..
....نورس....انتي ترديني مثل مااني رايدج لولا ..
...باوعت عليه ردت احجي قاطعني وگال..
...نورس....بصراحه رسل بدون مجامله اهم شي الصراحه عندي ..
....كمت افرك بإيدي وكلتله..
...رسل....شوف اني ماالكه احسن منك رجال اكدر أئمن على نفسي وعلى ابني وياه وهذه الكلام اني شفته بعيوني مو مجامله اني عشت وياك بنفس البيت فتره وانت وگفت وياي وگفات زلم ساعدتني وصرت اليه سند وعلاقتك بعزيز ابني كلش حلوه ..
....مييل رأسه صفح وحجى بإستفهام وكال ..
...نورس.....بس..؟؟ اي كملي
...باوعت عليه وكلتله..
...رسل....بس اني مااكدر اتزوجك وعمتي مموافقه مااريد الناس تگول عاف أمه على مودها واصير الزوجه الشريره الي فرقت بين الابن وامه اني هم ام وعندي ولد واحس بعمتي اعرف شنو شعورها وهي تحبك ومن حقها تفرح بيك ..
....ضحك ضحكه كلها خيبه امل دنگ راسه وصار يفرك وجهه بإيده الثنين بعدين رفع راسه باوع عليه بنظرة عتاب وگال ..
...نورس....تتوقعين اني اذا طلعت من يمج هسه وماحصلت على الموافقه رح ارجع لبيت اهلي وتنحل مشكلتي ويه امي ..؟
...لا بالعكس رح تتأزم المشكله أكثر رسل اني واحد عاف اهله وامه والبيت كله واجاج وهوه حاط گلبه بإيده يقدمه الج هديه عفت كلشي وره ضهري واختاريتج اذا تعوفيني هسه معناها رح أصفى وحدي لا أهل ولا حبيبه ....
... غمض عيونه وجر حسره قويه وكال..
...نورس...باوعي رسل اني مااتوسل اكثر من هيج اني رجال هم عندي كرامه الي عليه سويته رح اسألج سؤال واحد وأخذ الجواب واطلع منا وعلى أساسه اتصرف ..
...نورس....لآخر مره اگولج انتي موافقه نتزوج لولا .؟
....بقيت ساكته ماعرفت شنو ارد عليه فكرت بداخلي كلت اذا رفضته رح اكون جاحده وضالمه ومااستحق هيج رجال عاف اهله لخاطري ووگفات نورس وياي هواي وكلهن يرفعن الرأس وهوه ثبت للكل أنه هوه فعلا رايدني وشاريني واني ماالگه هيج واحد يحبني لو افتر الدنيا..
.... باوعت عليه وابتسمت وكلتله.
...رسل...موافقه طبعا..
...خزرني بعيونه وصارت عيونه تلمع فرح رفع ايده كدام وجهه وفرك وجهه باوع ليفوگ وكال...
...نورس...ياالله يارب مااعرف شنو اگول ..
...باوع عليه وهوه يضحك وعيونه تلمع وكال..
...نورس....شنو شگلتي عيدي ماسمعت ..
...ضحكت وكلتله..
...رسل....موافقه شبيك ..
....گام وگف مشى خطوات للامام ورجع باوع عليه وكعد بصفي وگال ..
...نورس....شسوي هسه احضنج لو اعييط لو ابجي مااعرف شسوي صدك موافقه رسل الله عليج احلفي بروح ابوج موافقه لو سمعت غلط اني ..
...ضحكت ونزلت راسي خجلانه وكلتله..
...رسل...نورس كافي استحي عفيه شبيك كلتلك موافقه وخلص اني رح اروح استحي كدامهم هيج تسوي عفيه ..
...عفته وطلعت من الصاله اركض كلش استحيت منه طبيت للغرفه واني اضحك على الموقف الي صار ردة فعله كلش قويه جانت ماتوقعته هيج يفرح .
....بقيت كاعده بغرفتي صح فرحانه بس فرحتي بيها غصه لان ماجنت اريد عمتي تكون زعلانه جنت اتمنى هي الي تجي تخطبني من امي بس شسوي هذه الي صار...
....وره نصف ساعة طبن عليه للغرفه مامه وسالي وهنه يضحكن كعدن يمي وحجت مامه وكالت ..
...كفاح....مبروك يعروس..
...ابتسمت وكلتلها..
...رسل...الله يبارك بيج مامه .
...كفاح....شوفي رسل أني وافقت على نورس بس حطيت شرط كلتله متصير الخطوبه الا يجي ابوه يطلب ايدج وهوه وافق يكول رح يجي ابويه بعد مااعرف صدك يجي لولا خلي نشوف شيصير..
...سالي....خالو عادل هم حجى وياه نفس الحجي وگاله يجي ابوك يطلبها يعني اكيد رح يجي الله يتممها على خير يارب..
.....باوعت على سالي لكيتها مبدله ملابسها كلتلها..
...رسل....وين رايحه انتي شو مبدله..
...سالي....رح يجي غمار يأخذنا ارجع لبيتي ..
...رسل....ها الحمدلله الله يديمكم والله لا يجيب زعل بعد إن شاء الله..
...سالي....حياتي تسلمين يارب افرح بيج واشوفج سعيده ومرتاحه ويه نورس .
...بادلتها بإبتسامه وبقينا ساكتين مامه عافتنا وطلعت من الغرفه تقربت سالي يمي وكالت ..
...سالي....شوفي رسل صح نورس ماقصر ودخل خالو عادل وسيط بيننا وبين اهله حتى يخطبج بس انتي مالج علاقه بكل هذه الحجي
بعد كم يوم يصير العرس مال عماد ابن عمتج انتي بدلي ملابسج وروحي لبيت عمتج احجي ويه عمتج وبرري موقفج فهميها أنه انتي نيتج سليمه وأنه انتي تحبيها وماعندج غايه سيئه اتجاهها خليها تاخذ عنج صوره حلوه
احتمال تهاجمج بالكلام أو تسمعج كلمه تجرح أو يجوز متستقبلج بس انتي سوي الي عليج على الأقل تكونين بيضتي وجهج كدام نورس وثبتيله أنه انتي تحبين عمتج وغايتج الصلح رح تكبرين بعيونه أكثر اسمعي كلامي وسوي مثل مااگولج متخسرين صدكيني ..
....هزيت راسي بالموافقه بدون مااحجي شي وره شويه رن جرس الباب واجه غمار سلمنا عليه وهوه جان فرحان مبين على وجهه السعاده
من اباوع على غمار وسالي احس هذوله الثنين انخلقوا لبعضهم
يفهم عليها شبيها من نظرة عيونها وهي هم من حركات وجهه ونظراته تعرف بي زعلان لو مرتاح
شلون كيميا موجوده بيناتهم سبحان الله شفت نظراتهم كلها فرح واحد للثاني ودعيتلهم من كل گلبي أنه الله يسعدهم ولا يفرقهم لان يستاهلون غمار وسالي تعبوا بحياتهم وآن الاوان أن يعيشون بسلام وسعاده ..
....سلموا علينا وأخذوا الجهال وطلعوا راحوا لبيتهم ..
...اني اخذت عزيز حتى انومه لان صار الليل ووقت نومته مامه راحت لغرفتها واني طبيت لغرفتي نومت عزوز وبقيت بفراشي افكر بلي صار اليوم وبداخلي خوف من المستقبل رفض عمتي اليه كلش مخوفني .
...اثناء صفنتي وجان اسمع موبايلي يرن نغمة رساله فتحتها من نورس كاتب بيها ..
...(كاعده اخابرج عادي )
...رديت عليه..
(كاعده )
...اتصل بيه فتحت خط اول مافتحت خط قبل كلشي كال ..
...نورس...احبج
...ضحكت وكلتله..
...رسل....هاي بدال كلمة الوو..
...نورس...اي حتى خاف تسدين الخط بوجهي اكون كلتها الج ووصلت يعني موخساره اذا انسد الخط بوجهي وصلت شعوري الج قبل كلشي ..
....رسل....اممم وليش اسد الخط بوجهك يعني ..
...نورس...لان خبيثه تحبين تشلعين گلبي كلشي اتوقع منج ماكو ثقه .
...رسل....عززه هاي اني هيج شلون نظره ماخذ عني والله مو هيج اني فقيره .
...نورس....رسل ..
...نعم
...انتي صدك موافقه عليه لو لا يعني محد ضغط عليج حتى توافقين هذه القرار نابع من گلبج ..؟
...رسل...نورس شبيك خايف ليش هيج تحجي اني موافقه واصلا محد يكدر يفرض عليه الزواج اني انسانه واعيه وراشده واكدر أقرر وحدي وبعدين منو يفرض عليه مثلا مامه لو سالي لو منو ليش هالخوف الي عايش بي غير افتهم..
...جر حسره قويه حسيتها طالعه من گلبه وكال ..
...نورس....تدرين اني جان حلمي اشوفج بس شوف جنت اطلب من رب العالمين بكل صلاه أنه يخليني اشوفج لو من بعيد ماتوقعت بيوم من الايام تصيرين اليه وتكونين حلالي يعني زواجي منج هذه اكبر وأعلى من سقف احلامي ..
...رسل...كلامه خلاني احس بي هوه شكد تعذب وتعب بحياته هوه يحجي واني اكول بداخلي ليش ماعرفتك من زمان ليش ماعرفتك قبل مااعرف حاتم وين جنت عني يانورس وين .
....كمل كلامه وحجيت وياه وكلتله..
...رسل....كملت كلامك ؟
...نورس...اي
...رسل...نورس اني موافقه اتزوجك واعيش وياك باقي عمري اني الشي الوحيد الي جان مخوفني هوه فراگ ابني وبما أنه خالو عادل كال عزيز يبقى يمي هاي هي خلصت كل مخاوفي اني وين الگه احد يحبني وشاريني هيج مثلك اذا عليك مااوافق عليمن اوافق لعد ..
...نورس...واني اوعدج وعد مااخليج تندمين ابد على هذه القرار رح احاول شكد مااكدر اسعدج واعوضج عن كلشي صار بحياتج ونبدي صفحه جديده اني وياج وابننا الحلو عزيز ..
...رسل....بقينا نحجي اني وياه ونخطط لحياتنا سويه كأنما صارلنا نعرف بعض العمر كله مو كم شهر وختمنا الاتصال بكلام حلو ونمت ولاول مره احس نفسي فرحانه من بعد الي صار بيني وبين حاتم ماحسيت بهيج فرح وسعاده ابد ..
..............................
...نوار....من بعد مرض منقذ والعمليه مالته التهينا بمشاكل غمار وخطوبة رفيف اني راجعت هواي أطباء وكلهم كالولي صحتي زينه وماعندي اي مشكله تمنع الانجاب بس صارلنا أكثر من سبع اشهر ولحد الآن ماصار حمل وهذه الشي كلش متعب نفسيتي اني حيل اتمنى اصير ام واحسب الايام والأشهر حتى احمل ويصير عندي طفل منقذ بارد من ناحية هذه الموضوع كلما احجي وياه يگول خليها على الله شوكت ميجي هله بي بروده ينرفزني ردت افتهم ليش هيج ممهتم للحمل معقوله ميريد يجينا طفل كلت اليوم لازم اكعد واحجي وياه وافتهم منه لازم اسوي حل لنفسي ميصير هيج ابقى ساكته .
....انتضرته من اجه من المستشفى طب للغرفه سلم عليه وأخذ ملابس من الكنتور وراح للحمام سبح وطلع باوع عليه شافني كاعده وكال ..
...منقذ...وين الغداء شو بعدج كاعده .
...نوار....منقذ اريد احجي وياك ممكن تكعد شويه ..
...اجه يمي وكعد وهوه ينشف بشعره بالمنشفه وكال ..
...منقذ...اسمعج كولي.
...باوعت عليه وكلتله..
...نوار....ليش لحد الآن ماصار عدنا طفل ..
...جان ينشف بشعره اول ماسمع كلامي وگف عن الحركه نزل عينه ورجع باوع عليه وكال..
...منقذ ...شنو هذه السؤال شبيج نوار كلشي بيد رب العالمين احنه سوينا العلينا وربج ماكاتب يصير شنسوي يعني خوما نعترض على حكم الله .
...أشرت بإيدي على صدري وكلتله..
...نوار...آني سويت العليه ورحت للدكتوره وكالت ماعندي مشاكل تمنع الانجاب انت ماسويت شي منقذ لحد الآن كلشي ماسويت ..
...قطب حواجبه وضييق عينه وكال..
...منقذ...شنو قصدج مافهمت .
...نزلت راسي وكلتله..
...نوار ....مارحت لدكتور وشفت نفسك مادام اني مابيه شي معناها......
....قاطعني وصرخ بوجهي وكال..
...منقذ ...معناها شنووو احجييي كملييي شنو معناهااا..
....باوعت عليه وكلتله..
....نوار...معناها الصوچ منك انت ..
...بدون ميحجي شي بسرعه صفعني راشدي بقوه انصدمت لاول مره منقذ يمد ايده عليه ويضربني عافني وطلع من الغرفه بدون ميحجي كلمه بقيت وحدي وبس ابجي مااعرف شسوي ومااعرف منو غلطان اني لو هوه يمكن استعجلت من واجهته وهيج حجيت وياه.
....بقيت حابسه نفسي بالغرفه لا آكل ولا اشرب لحد ماصار الليل اني نايمه بالفراش ودموعي مانشفت محد سأل عن غيابي بالبيت ابد وهذه الشي كلش حز بنفسي
لحد ماصار الليل سمعت صوت الباب انفتح بقيت على وضع نومتي ماتحركت اشتميت العطر مال منقذ بالغرفه عرفت هوه الي دخل للغرفه بدل ملابسه وتقرب على الجربايه ومدد بصفي ماحاول يحجي وياي ولا حاول يبرر تصرفه ابد
اسمع بس صوت انفاسه واني صوت شهگاتي هوه يدري بيه كاعده وداابجي واني اعرف بي كاعد ومسوي نفسه نايم لا هوه بادر بالصلح ولا اني بقينا هيج للصبح طلع ضوى النهار واني تعبت عيوني من البجي غفيت وغلبني النعاس .
....سمعت رنة المنبه مال منقذ فزيت عليها وكعدت باوعت لگيته نايم على ضهره وحاط ايده على وجهه كمت طفيت المنبه وندسته بإيدي حتى يكعد اعرف بي كاعد بس مارد عليه بقى على وضعيته نايم
عفته وكمت غسلت وجهي وفرچت اسناني رحت حضرت الريوك اله كلت هسه يگوم بين ميبدل ملابسه يلگى الريوك حاضر ويطلع للدوام بقيت انتضره مااجه ابد رحت للغرفه اشوفه لگيته على نفس نومته نايم على ضهره وحاط ايده على وجهه..
....تقربت منه وكفت قريب من الجربايه وحجيت وياه..
...نوار....متروح للمستشفى شنو ترى من زمان رن موبايلك الريوك جاهز رح تتأخر عن الدوام.
....بدون ميحجي شي رفع ايده عن وجهه باوع عليه وگام گعد على حيله اشر بإيده على الجربايه بصفه وكال ..
...منقذ....اكعدي احجي وياج..
...كعدت يمه قريبه باوع عليه وكال..
...منقذ ...شكد تحبيني ..
...استغربت سؤاله باوعت عليه وكلتله..
...نوار...شنو هذه السؤال اول مره هيج تسأل ..
...غمض عيونه وكال..
...منقذ ...نوار شكد تحبيني جاوبي .
...ابتسمت وكلتله..
...نوار...احبك هواي أكثر من روحي يعني مااعرف شكد بس الي اعرفه مااكدر اعيش بدونك كلش هواي احبك ..
مد ايده على أيدي سحبها وصار يبوس بإيدي ونزلها باوع عليه نضراته حسيته يريد يحجي شي بس متردد جر حسره قويه رفع رأسه ليفوگ وغمض عيونه ثواني عبالك شايل هم بگد الجبل رجع باوع عليه وكال..
....منقذ...شوفي يابنت الناس رح اكون صريح وياج واحجيلج كلشي وخلي القرار الج وانتي اختاري مصيرج بإيدج..
....نوار...شبيك منقذ خوفتني شكو. ..
...منقذ...اول شي اني اعتذر لان مديت ايدي عليج صارت عندي ردة فعل موقصدي اضربج خوما زعلانه مني ..
...نزلت راسي وكلتله..
...نوار...انقهرت حيل لان اول مره تسويها واصلا هذه مو اسلوبك انت متمد ايدك عليه ابد ليش هيج تسوي مااعرف .
منقذ....كلتلج موقصدي والله اني اكرر اعتذاري مره ثانيه بس هذه مو موضوعنا الموضوع الأهم هوه الاطفال صح لولا ..
...هزيت راسي بالموافقه بدون مااحجي جر نفس قوي وكال ..
...منقذ...تتذكرين من رجعت من تركيا واتفقنا نراجع أطباء حتى نجيب طفل وانتي بوقتها راجعتي أطباء .
...نوار...اي صح .
...باوع عليه وكال.
...منقذ ...اني من شفت التحاليل مالتج كلها سليمه ومابيج شي هم رحت للدكتور وسويت تحاليل اليه بس ماكلتلج بيها ولا احد يعرف.
...باوعت عليه واني احس الخوف سرى بداخلي وكلتله..
...نوار....اي وشنو جانت النتيجه..مابيك شي صح ..؟
...هز براسه رافض وهوه مغمض عيونه وكال..
...منقذ...عقيم النتيجه اني عقيم وميصير عندي اطفال نسبتي للانجاب كلش ضعيفه..
...نوار...الخبر اجى مثل الضربه على راسي صدمني حاولت أتمالك نفسي حتى ميبدر مني رد فعل يجرحه لان هوه مو ذنبه هذه الشي بإيد رب العالمين جريت نفس وابتسمت وكلتله..
...نوار....نسبتك ضعيفه يعني مو صفر يعني اكو امل اذا تتعالج يصير عدنا طفل صح ..؟
...باوعلي بنظرة حزن وكال ..
...منقذ ...بالعراق مااليه علاج راجعت اكثر من دكتور ومن افضل الأطباء في اختصاص العقم ببغداد وكلهم كالوا نفس الكلام مااليه علاج داخل العراق نسبتي شبه معدومه يعني اذا تردين تصيرين ام لازم تعوفيني .
...نزلت راسي وعيوني دمعت كلش انقهرت حسيت نفسي انحرمت من اجمل نعمه وهي نعمة الامومه مسحت دموعي وابتسمت وكلتله..
...نوار....بس اني احبك ومااكدر اعوفك
...لزم ايدي وكال.
...منقذ...بس انتي من حقج تصيرين ام ويصير عندج طفل شنو ذنبج تنحرمين من الامومه بسببي يابنت الحلال احنه لا اول ثنين يتطلگون ولا آخر ثنين مثل مادخلنا بالمعروف نطلع بالمعروف وكل حقوقج محفوظه اني رح اطلع هسه والقرار الج اني مااريد اشيل خطيتج وتنضلمين وياي صدكيني ماازعل منج اهم شي عندي تكونين راضيه..
...مد ايده سحب راسي وقربه منه باسني من جبيني وعافني وگام راد يطلع من الغرفه وصل للباب ركضت عليه وحضنته من ضهره وگمت ابجي وگف بمكانه اندار عليه وحاوطني بين ايده باوع عليه عيونه بيها دمعه تلمع وابتسم حجيت وياه واني ابجي وكلتله..
...نوار...اني ابويه مات من جان عمري 11 سنه وماحسيت بحنان الاب والأمان الا من تزوجتك عادي تعتبرني بنتك وتصير ابني وننسى موضوع الاطفال كأنما ماحجينا بي ولا فتحنا الموضوع منقذ اني مااريد طفل بطلت اريدك انت مااكدر اتخيل نفسي متزوجه شخص غيرك احس نفسي انخلقت حتى اكون زوجتك وبس ..
...ابتسم ابتسامه دافيه وكال ..
...منقذ...وين اكو ام عمرها 28 وابنها عمره 43 هاي شلون ترهم ...
....حضنته بكل قوتي ودفنت راسي بصدره وكلتله..
...نوار...ترهم ترهم انت بس خليك وياي ولتعوفني وكلشي يرهم والله اوعدك وعد بعد ماافتح موضوع الطفل ومااريد طفل بس اريدك انت وهاي هي والله .
....بقى حاضنني ويشتم بيه وگال..
...منقذ...الله يحفضج إليه ولا يحرمني منج يادعوتي بجوف الليل وياسجدتي الي كلها طاعه وإخلاص لله عز وجل انتي دعوة امي اليه وعوض ربي الجميل الله يقدرني واعوضج عن كلشي انحرمتي منه واكون الج خير الزوج والسند يارب ..
................................
...رسل.... مرت ايام على جية نورس النا وهذه الوقت كله اني وياه على اتصال كل يوم يخابرني ونحجي ونسولف سويه ..
...واليوم اتصل بمامه وأخذ منها موعد على جيتهم هوه وأهله حتى يخطبوني وقرروا بعد زواج عماد اخوه يجي يخطبني هوه واخوانه وابوه وباجر الحنه مال عماد هوه صح زعلان من أمه وميقبل يحجي وياها بس اخوانه صالحوا وكالوا لعمتي نريد اخونا ويانا يفرح بعرس عماد عوفي الزعل هسه بس هي بقت مثگله وجهها على نورس وهوه ماحاول وياها خلاها براحتها لان يعرف النقاش ويه عمتي شبه مستحيل اني بهاي الأثناء بدلت ملابسي لبست احلى فستان عندي وحطيت مكياج وحتى عدسات لبست طلعت حلوه كلش وكلت لمامه رح اروح احجي ويه عمتي وارجع امي اول مره رفضت بعدين خليت سالي تخابرها وتقنعها وطلعت اخذت سياره ورحت لبيت عمتي..
...اول ماوصلت جان البيت هوسه وعدهم خطار لان الحنه مال عماد بالليل تصير طبيت واني كلش خايفه سبأ فتحتلي الباب واستقبلتني بالحضن سالتها على عمه وكالت جوه طبيلها
...طبيت لگيت عدهم خطار كرايب بابه من بعيد اني مااعرفهم ابد لان علاقتي بيهم مو قويه اول ماشافتني عمتي تغيرت ملامح وجهها وصارت توحي للغضب طبيت سلمت على الكل ورحت لعمتي دنگت عليها وبست راسها وهمست بصوت ناصي بس هي تسمعه وكلتلها..
...رسل...عمه احلفج بروح بابه بس اريد احجي وياج ضروري اني مااجيت على مود الحنه اجيت احجي وياج وارجع بس اسمعيني آخر مره.. بروح بابه..
....بقيت واكفه بمكاني انتضر منها رد اتجاهلت وجودي وصارت تسولف وتضحك ويه النسوان الكاعدات اني عفتها وطلعت من الصاله رحت للمطبخ يم سبأ شفتها تشتغل هي وشكم بنيه من الكرايب شافتني ضايجه بسرعه عافت الي بإيدها واجتني وكالت ..
... سبأ...ها رسل شبيج ضايجه عمتي سمعتج حجي مو ..
....رسل....لا ماحجت وياي اصلا اتجاهلتني ..
...سبأ....ميخالف اصبري شويه يرادلها وقت...
....رسل...دااحجي وجان اشوف عمتي طبت علينا للمطبخ وصاحت عليه وكالت ..
...ساهره ....تعاي وياي عندي حجي وياج ..
...رسل...رحت وراها واني خايفه هالمره ماخايفه منها خايفه لا تحكم عليه حكم مسبق يضلمني ويخليني اخسر عمتي الوحيده الي من ريحة ابويه واني ماصدكت رجعتلها ورجعت علاقتي بيها ..
...طبت لغرفتها واني طبيت وراها اشرتلي بإيدها وكالت ..
...سدي الباب وراج .
...طبيت وسديت الباب بقت واكفه بمكانها باوعت عليه وهي مقطبه حواجبها لاول مره تنضرلي بهيج نضرات وكالت ..
....ساهره ...شرايده جايه اسمعج كولي.
....بلعت ريگي وحجيت بصوت يرجف وكلتلها..
...رسل...عمه والله العظيم وروح بابه اني موقصدي ازعلج مني ولا اليه غايه افرق بينج وبين نورس اني احبج الله يشهد عليه انتي بعدج متعرفيني بس يجي يوم وتعرفيني زين انتي مو مره كتليلي انتي حالج حال بنتي ليش هيج تغيرتي عليه معقوله بدر مني تصرف خلاج تضوجين مني لو سويت شي زعلج مني .. ؟؟
....چتفت ايدها وكالت ..
...ساهره....تردين ابقى عمتج واحبج ومتخرب علاقتنا ونبقى حبايب ..؟
...هزيت راسي بالموافقه وكلتلها.
...رسل...اي ياريت فدوه عمه اني ماعندي غيرج والله ..
...رفعت حاجبها وكالت ..
...ساهره ... ارفضي نورس ولتوافقين عليه وقنعي يرجع للبيت ..
....رسل....بقيت ساكته ماكدرت احجي شي بس نزلت دموعي وتأكدت أنه عمتي قافله ومتريدني اصير لنورس ابد بقيت بس ابجي بدون مااحجي وهي بقت ساكته وتباوع عليه ومارف الها جفن ولا تأثرت من حالتي ابد بهاي الأثناء انفتحت الباب وطب نورس عصبي ويصيح ووياه كمال يهدأ بي ..
........
..سبأ... جنت بالمطبخ اشتغل وجان اسمع صوت نورس وكمال يحجون ويضحكون بالطرمه بسرعه لبست حجابي وطلعت اشوفهم لكيت نورس واكف قريب على المطبخ صحتله اجاني واجه وراه كمال وكلتله..
... سبأ....نورس رسل اجتي قبل شويه وعمتي اخذتها وطبت لغرفتها تحجي وياها ..
...خزرني بعيونه وگال..
...نورس...شجابها لهنا رسل شلون تجي بدون ماادري ..
... سبأ...ماادري والله .
عافني وراح يركض لغرفة عمتي وكمال راح وراه ..
......
...رسل...طب علينه نورس وهوه عينه عليه خازرني وصاح عليه وكال ..
...نورس...انتي شجابج لهنا شلون تجين بدون متكليلي .
...اجه بسرعه سحبني من ايدي واخذني وطلع من الغرفه بدون ميباوع على أمه ولا يحجي وياها هوه يمشي ولازم ايدي بحيث صرت اركض وراه وماالحك وكمال يمشي وراه حاول يوگفه وهوه ابد ولا يسمع أخذني وطلع للسياره مالته فتح الباب الامامي ودفعني بإيده بقوه صعدت بالسياره ورگع الباب حيل اندار للصفحه الثانيه وصعد وكمال يصيح عليه يريده يوگف وهوه ماكو متجاهل الكل حرك السياره بسرعه ومشى بقينا نمشي بالسياره وهوه بس صوت انفاسه مسموع واني بس ابجي واشهگ وباوع عليه شافني ابجي بسرعه وگف السياره بمكان على صفحه وطفاها وبقى ساكت وعينه ليكدام ماحجى شي تقريبا ربع ساعة ساكت مسحت دموعي باوعت عليه ردت احجي وجان يقاطعني وصاح بصوت عالي..
...نورس....منووو سمحلج تجين لبيت اهلي بدون مااعرف انتي شلون هيج تتصرفين من وحدج هااا شلووون..
...بجيت وكلتله..
...رسل....نورس عمتي متريدني ومستحيل توافق على زواجنا عوفني الله يخليك وارجع لبيت اهلك .
...ضرب الستيرن مال سياره بقوه وصرخ بصوت عالي وكال..
...نورس....موهذه الجنت خايف منه هذه حجت وياج شكم كلمه وگلبتج عليه مو هاي هي يعني قروا براسج عليه وانتي صدكتي الحجي مو .. ؟
...باوعت عليه وكلتله.
...رسل...نورس عفيه بس أهدأ وخلينا نحجي بدون عصبيه مراح تفهم عليه ولا أفهم عليك اذا هيج تبقى عصبي وتصييح..
...فرك وجهه بنفاذ صبر وعض على شفته العليا بقوه وگال..
...نورس....رسل ترى اذا عفتيني مراح ارجع لبيت اهلي بالعكس رح اروح لمكان الجني الازرگ ميندلني بي واخليكم تحلمون تشوفون واحد اسمه نورس يعني قرار الترك مو القرار السليم امي من حجت وياج عبالها من تعوفيني ارجعلها بس لا ماارجع قسماً بالله الكريم ماارجع واخليها تحلم تشوف وجهي بعد .
....رسل....وبرأيك هذه الحل هيج انحلت المشكله مو ..؟
...نورس.....لااا يابووي موهذه الحل الحل تعوفيني ويحرموني منج مثل ماسووها قبل من جنتي صغيره وحرموني منج مو هوه هذه الحل ست رسل ..؟
....نزلت راسي وكلتله..
...رسل...شسوي هسه اني فهمني انت گلي شسوي اني مااريد اخسر عمتي وتصير تكرهني ..
....بقى ساكت ماحجى ولا كلمه باوعت عليه لگيته صافن عليه وعيونه حمره وبيها دموع انصدمت اول مره اشوفه بهيج حاله ماتوقعت نورس هيج حساس وبسرعه يتأثر ردت احجي بسرعه أشر بيده على حلكه وكال ..
...نورس....اشش اسكتي ولا كلمه خليني شويه وحدي هسه اجي ..
...فتح باب السياره ونزل راح يمشي بعد مسافه كدام السياره حط ايده على خصره ورفع رأسه فوك اخذ نفس قوي ونزل راسه مسح وجهه بإيده الثنين بقى واگف ثواني ورجع يمشي بإتجاه السياره فتح الباب وصعد اندار عليه وكال..
....نورس....اني تعبت ...تعبت من كلشي من اهلي ومنج ومن هذه الحب الي ماحصلت منه بس العذاب والقهر اني شجابرني اعيش هيج عيشه رح يصير عمري 30 سنه ولحد الآن موقف حياتي ومااريد ارتبط بوحده لان گلبي يحبج ..
...اشر بإيده على صدره من جهة گلبه وكال..
....نورس...كله صوچ هذه گلبي .. گلبي واحد هتلي ومسربت لو ماهتلي ماجان سوه بيه هيج وحب وحده بعيده عني وماعدها احساس اني مشتري العذاب شرايه والله كله مني .
....دار وجهه للصفحه الثانيه واني مدري شبيه اجتني الضحكه وبالگوه حابستها مااعرف ليش من كال گلبي هتلي ضحكني باوع عليه وكال.
...نورس...شكو عليمن الضحك .
...انفجرت وضحكت من كل گلبي وهوه صافن عليه متفاجأ..
..وره شويه سكتت وكلتله ..
...رسل....گلبك هتلي ومسربت يمه والله ضحكتني من صدك .
....اني اضحك وهوه صافن عليه لا ابتسم ولا شي بالعكس ينضرلي بنضره جديه وصار يهز بيده وگال.
...نورس....مخبله والله الكريم مو صاحيه وشاخطه انتي بيج واير محروگ روحي تعالجي .
...سكتت وكلتله ..
...رسل...نورس ..
... نورس...الله ياخذ نورس وارتاح كولي شرايده .
...رسل...اسم الله لتكول هيج اذا رحت وعفتني ويامن اتعارك بعد .
...باوع عليه بطرف عينه وكال..
...نورس...مو رح تعوفيني المن باقي .
...هزيت راسي بالرفض وكلتله ..
...رسل...لااا لااا مااعوفك كاعده على گلبك .
...ابتسم وكال..
...نورس...يعني شنو..
...رسل....يعني شوكت تجي تخطبني ..؟
...ابتسم ورچه راسه على الكشن مال سياره ورجع باوع عليه وكال.
...نورس....احبج واريدج ومستعد اخسر الدنيا كلها بس تصيرين اليه وسالفة امي اريدج تنسيها وبعد ممنوع ينفتح الموضوع اني بس نتزوج وره العرس آخذج واروحلها واراضيها بس هسه عوفيها لتدخلين بيني وبينها خوش ..
...رسل....اوكي موافقه ..
....نورس...هسه رح اوصلج للبيت وارجع يم الولد لان خطيه عماد عفته وحده بس يخلص عرس عماد اجيب ابويه وعمي واخواني واجي اخطبج ونتزوج ياأحلى عروس .
...رسل....كلامه خجلني بقيت ساكته وهوه حرك السياره ورجعني للبيت صح انقهرت من كلام عمتي بس كلام نورس نساني الكل وبقيت بس افكر بي مااعرف يمكن بلشت احبه رجعت للبيت وحجيت كلشي لمامه وكالت.
...كفاح ...عوفي عمتج هي مشكلتها مو وياج مشكلتها ويه ابنها لان عاندها وكسر كلامها هسه يتصالحون وره العرس ومهما كان يبقى ابنها بس انتي لاتدخلين بيناتهم عليج بس بنورس وبس ..
............................
.... رفيف....مرت اسابيع على جية معتصم النا ودز اهله حتى يخطبوني والنسوان اتفقن على موعد الخطوبه وحددوا المهر وكل التفاصيل وجنت طايره من الفرح حسيت نفسي من صدك عايشه احلى قصة حب كلت وأخيرا لكيت الإنسان الي رح يعوضني عن كلشي عشته بحياتي وخلصتها سوالف وضحك ويه معتصم حتى مامه بلشت تلين وتحبه من شافته
حضرنا الصالون وحجزنا البدله مال المهر وكل التفاصيل وجنت داابدل ملابسي حتى نطلع للسوگ نشتري الذهب والنيشان بعد اسبوعين المهر مالتنا اني ومعتصم واكفه على المرايه اعدل الشال مالتي وجان يرن موبايلي رقم غريب فتحت خط وسمعت صوت بنيه تبجي وتتوسل كالت..
...الله يخليج أتوسل بيج فدوه لتوافقين على معتصم ارفضي انتي حتى يعوفج ويبقى اليه دخيلج لتكسرين گلبي وتهجمين بيتي فدوه اروحلج .
...رفيف...كلامها صدمني كلتلها انتي منو وشنو علاقتج بمعتصم صارت تبجي وكالت ..
....اني زوجته واسمي سرور اصير بنت خالته وصارلنا 3 سنوات متزوجين بس صارت بيني وبينه مشاكل واتعارك ويه اخوتي واني هسه زعلانه ابيت اهلي صارلي ست اشهر عايفني وميسأل عليه
وقبل فتره سمعت بي يريد يخطب والله عبالي يجذب عليه ويريد يحرگ كلبي ماعبالي صدك هسه عرفت دخيلج لتوافقين عليه والله احبه وماعندي غيره بس هوه لان تعارك ويه اخوتي يريد يحرگ كلبي بالزواج ..
....رفيف....ومنين جبتي رقمي ..
...سرور ...رجعت للبيت هسه واخذت رقمج من موبايل أمه بدون متدري فدوه لعينج عوفي والله مااكدر اشوفه ويه غيري اموت والله ..
....رفيف....من سمعت الحجي مالها حسيت الدنيا كلها صارت ضلمه بعيني اختنگت اريد اجر نفس مااكدر كمت ابجي دموعي تنزل على خدي مثل النار بس نارها دخلت لگلبي وحرگته حرگ ليش هيج صار بيه شنو معقوله منقذ من سأل عنه ماسمع بي متزوج شلون متزوج واني ماادري لا اكيد اكو شي غلط ..
...لزمت موبايلي اتصلت بي مرتين يرن وميجاوب رجعت اتصلت مره ثالثه جاوبني وكال .
...معتصم ...حياتي يمي صديقي شويه واخابرج..
...رفيف...معتصم سرور منو .. انت صدك متزوج لولا ..؟
....بقى ساكت ميرد صرخت بأعلى صوتي وكلتله ..
...رفيف....معتصم احجيييي انت متزوووج لولا لتبقى سااكت..
...معتصم ...بس خلي افهمج عمري انتي فاهمه غلط ..
...رفيف...لا فاهمه صح هسه خابرتني زوجتك وحجتلي كلشي حتى مشاكلكم واريد اسمع منك احجي الي عرفته صح لولا ..
... معتصم....رح اطلگها وعيونج اطلگها اصلا اني انجبرت عليها امي جبرتني عليها لان بنت اختها بس انتي احبج اول مره من شفتج حبيتج رفيف بس اسمعيني شوفي اني جايج للبيت لازم نحجي هسه مسافة الطريق واجي ..
...رفيف...بسرعه غلقت الموبايل وقفلت باب الغرفه وكعدت بالگاع كمت ابجي والطم على وجهي واشلع بشعري جريت الشال من راسي بكل قوتي بحيث طب الدنبوس بإيدي صرخت صرخه طلعت روحي وياها وكمت الطم عبالك فاقده عزيز اجوني منقذ ونوار وامي كلهم يصيحون ويدكون الباب يردون ارد عليهم واني ميطلع صوتي بس دموعي تصب لهناك وانكسر باب الغرفه وطب منقذ عليه صار يحجي وياي واني بس ساكته ودموعي تنزل بعدين اندك جرس الباب وعافوني وطلعوا عرفت معتصم اجه ..
....رفيف...مرت حياتي كدام عيني مثل الشريط تذكرت طفولتي ويه ضرار وايام الشباب وعلاقتنا واجتي على بالي رؤى الله يرحمها اخخخ يارؤى هسه حسيت بالوجع مالج وعرفت شنو شعور وحده ياخذون منها حبيبها يمكن هذه الي صار بيه كله عقاب من رب العالمين.
...لزمت موبايلي واتصلت على ضرار اول مافتح خط كلتله..
...رفيف....طلعت حوبتها بيه مثل ماحرمتها منك اني هم انحرمت من الرجال الحبيته عبالك رب العالمين اخذ حقها مني ومنك انت بقيت وحيد وبدون زواج واني هم بقيت وحيده احنا شسوينا ضلمنا انسانه مالها ذنب انسانه بريئه..
...ضرار....شبيج رفيف شكو ليش هيج تحجين فهميني ..
...رفيف....ضرار معتصم طلع متزوج وكذب عليه ...
.............................
....رسل....بعد الموقف الي صار بيني وبين عمتي همه التهوا بالعرس مال عماد وبعد العرس بكم يوم اجه نورس هوه وأهله وعمه وولد عمه واخوانه وطلبوا ايدي وجانوا حاضرين الخطوبه غمار وخالو عادل وجنت كلش فرحانه نورس من اجه ويه الزلم جايب وياه سيد كال نعقد اليوم ونبلش تحضير للعرس يعني ميريد يتأخر لان كلشي جاهز وماعدنا مشكله تأخر العرس ومامه وافقت ..
...رسل...لبست فستان ابيض مخصر على الجسم وسالي حطتلي مكياج بالبيت وشعري سويته برم كله وتمت الخطوبه وعقدنا اني ونورس وزعنا الكيك والعصير وراها الزلم طلعوا بقينا بس احنه النسوان بس الي قهرني عمتي مااجتي والنسوان صارت تحجي ليش أم العريس ماكو ومامه كل ساعه تطلع عذر مختلف ..
....وره الخطوبه مباشرتاً بلشنا تحضير للعرس نورس اجر شقه صغيره على كدنا واثثها اثاث بسيط لان منكدر نسكن يم اهله لان زعلان ويه عمتي واخوانه كمال وعماد ساعدوا بكلشي حتى بفلوس العرس وكمال كال محضرنا مفاجأة ومنعرف شنو هي ..
...حضرنا كلشي صالون وبدله ونيشان اني ماطلبت هواي نيشان حتى ملابس وذهب ماخليته يشتري لان اني عندي ذهب وعندي ملابس هواي كلت خطيه مااريده يصرف هواي والشقه ايجار مااريد اضغط عليه بالمصاريف بس نورس ماقبل كال لازم اشتريلج شي بسيط للعرس انتي عروس وهذه حقج اشترالي حلقه وگلاده وسوار ناعم وكال ..وره الزواج اعوضج اجيبلج ذهب احسن من هذه ..
...حضرنا كلشي وصارت الحنه سواها بقاعه وعزم اهله واصدقائه كلهم واخوانه حرگوا الجو ركص واغاني وثاني يوم العرس لبست بدله هوه اختارها على ذوقه وكال عاجبني اشوفج بيها وماحبيت اكسر خاطره واصلا ذوقه كلش حلو البدله طلعت تجنن عليه جانت كلش مستوره ردان طويله وكلها مسدوده مابيها شي مكشوف ابد والتصميم بسيط ونازك مالها .
...بيوم العرس اخذوني من الصالون للقاعه طلع كمال حاجز بقاعه للعرس على حسابه وكال هاي هدية زواجكم مني جننا كاعدين بالكوشه والشباب كرايب نورس وولد عمه كلهم حركوا الدنيا ركص واغاني لحد مااجى ابن عم نورس وبإيده مايك وطلب من نورس يغني نورس خجل من المعازيم ماقبل يكوم يغني وكلهم صاروا يصفكون ويصيحون بإسمه انحرج منهم وكام يغني شغلوا الموسيقى مال اغنية هيثم يوسف اسمها حب قدر وصار يغني نورس ويباوع عليه..
...حبك قدر مكتوب .. حبك يشيب گلوب
يوم الي تزعل بي من عمري مامحسوب
عقلي بجمالك طار ...خلاني اضل محتار
حبك ذنب لو صار ..يامحلى هيج ذنوب
.......
...الكل جان فرحان حتى نورس كل ساعه يلزم ايدي ويتغزل بيه بس احس بي فرحته مو كامله لان أمه مو وياه باحلى يوم بحياته كلش حازه بنفسي عمتي ماكو ويانه بهذه اليوم .
...خلصت الحفله واخذونا بزفه للشقه مالتنا كمال وسبأ صعدوا ويانا للشقه خطيه جابوا العشاء وكلشي جهزوا اخوان نورس ماقصروا ثنينهم عماد وكمال وكفوله وگفه وساعدوا بكلشي ..
...طبيت للغرفه مالتنا شفتها حلوه وبسيطه وكلش مرتبه والتحفيات حلوه البيها عرفت هذه ذوق سبأ لان اعرف بيها تحب سوالف التحفيات وهاي الشغلات.
...بقيت واگفه واباوع للغرفه وجان يطب نورس وطبگ الباب اول ما شفته فزيت من مكاني نزع الستره مالته واجه وگف كدامي لزم ايدي وباسها بكل حب ولهفه وكال ..
....نورس ... احبج ياحلم الطفوله والشباب وكل العمر ..
...نزلت راسي كلش خجلت منه رفع راسي بإيده وتقرب باسني من جبيني وكال ..
...نورس....شوفي اني اليوم مااريد منج كلشي ومااريدج لا تتوترين ولا تخجلين مني ابد هسه شنسوي .. نبدل ملابسنا ونتوضى ونصلي صلاة شكر لله عز وجل لان حقق حلمي ورزقني زوجه حلوه وتخبل مثلج وراها نتعشى ونامي ارتاحي لان ادري بيج تعبتي اليوم .
...رسل...استغربت كلامه الي يشوف لهفته وحبه اليه ميتوقع هيج تكون ردة فعله بليلة عرسنا باوعت عليه وكلتله..
...رسل...صدك لو تتشاقى عادي يعني انام اليوم متزعل مني .
....مد ايده الثنين ولزمني من خدودي وباسني من ارنبة خشمي وكال ..
...نورس...شنو ازعل كل هاي السعاده الي دااعيشها وتردين ازعل شنو اريد من الله بعد حققلي كل الي اتمنى دراستي كملتها ووضيفه توضفت والبنيه الي حبيتها صارت حلالي وزوجتي وصحتي زينه والحمدلله اكو احلى واجمل من هيج سعاده ..
....رسل ....ابتسمت لكلامه وبقيت ساكته بعدين مييل رأسه صفح وباوعلي بنظره ماكره وكال ..
...نورس....اما بالنسبه للموضوع الي براسج عادي اذا مااخذته اليوم باجر أخذه وين تروحين يعني غير يمي انتي قابل طايره..
... بسرعه وخرت من يمه وضربته على صدره وكلتله..
....رسل...ديله وخر عني واني اكول حباب ومابي شي طلعت هم تفكر بهاي السالفه وخر عني صاير منحرف ..
...ضحك وكال.
...نورس....هااا خلينا حبايب لتخليني اگلب عليج خليني حباب ..
....عفته ومشيت بإتجاه الكنتور وكلتله.
...رسل....اطلع من الغرفه اريد أبدل ..
...حط ايده على خصره ورفع حاجبه وكال..
...نورس....ايبااااه اطلع من الغرفه شنو غير زوجتي ولج .
...رسل...اي ميخالف حتى لو زوجتك اطلع من الغرفه أبدل ملابسي وبعدين تعال ..
.... نورس....يله رح اروح اتوضى واجي حتى اصلي الج مهله خمس دقايق تنزعين بيها البدله ترى وره الخمس دقايق افتح الباب واطب مالي علاقه.
...رسل....ضحكت على سوالفه عافني وطلع اني بسرعه اخذت سيت مال نوم بس مستور عباره عن كيمونه وبجامه وعليها روب لونه وردي بدلت ملابسي وفتحت شعري كله ومشطته مسحت المكياج بكلينس رطب وغسلت وجهي وره شويه سمعت الباب يندك رحت فتحت الباب لگيته شايل الصينيه مال العشاء باوع عليه من فوگ ليجوه وكال ..
...نورس....اگلج يصير تنسين الحجي الي سمعتي مني قبل شويه ونعيد المشهد من جديد ..
...ضحكت ضحكه قويه وكلتله.
...رسل....لا ماكو خليك عند كلمتك انت كلت اليوم انام لان تعبانه.
...ضحك وطب للغرفه حط الصينيه مال العشاء على الميز مال مرايه وكال ..
...نورس....لايمعوده كولي غيرها صدك رح تنامين وتعوفيني واهون عليج واني عريس واليوم اول ليله اليه بعدني في ريعان شبابي وعنفواني المعهود هيج يصير بيه ياوسفه .
...تقربت منه كرصته من خده وكلتله.
...رسل....عوف الريعان والعنفوان وتعال نتعشى يله اني جعت ..
...حطينا الصينيه وتعشينا وغسلنا وكلتله..
...رسل....اني رح انام صدك تعبت اليوم يله تصبح على خير..
...من سمعني بسرعه گمز من الكاع طفر على الجربايه وكال ..
...نورس...اي واني هم اريد انام نعست وتعبان ..
...ضحكت ونمت بفراشي تغطيت وهوه راح طفى الضوء واجه نام يمي اني كلش خجلانه منه بس أمثل كدامه مابيه شي اول مانام يمي وجان يمد ايده واخذني بحضنه ردت احجي وجان يحط راسه على صدري وحضنني حيل وكال ..
....نورس...نامي كلشي مااريد واني عند كلمتي بس اريد احضنج وانام حتى اصدك حلمي تحقق ..
.............................
.... سالي....رجعت لبيتي اني وغمار وتصالحنا والحمدلله مشاكل رسل كلها انحلت تقريباً ماعدا مشكلة عمتها وهاي متروكه للزمن هوه كفيل أنه يلين القلوب ويحنن گلبها على ابنها .
...أما ابويه بقى يحاول يتواصل وياي واني بس على كد الاتصال وهم زين مهند ميندل بيتي لذلك انكطعت علاقته بينا وغمار رجع للدراسه قدم على جامعة بغداد وانقبل كلية هندسه ..
...حياتنا شبه مستقره والحمدلله
........................
الى كل من يعاني من مرضٍ أو نقصٍ ما ويخجل أن يفصح عنه أمام الملأ اقول له
كن جريء واجه الخوف ولا تُعِر اهتماماً بالغاً للناس وآرائهم المغلوطه فيك فأنت تستحق السعاده والعيش الهنيء
وإن اتهموك بالوقاحه فقل لهم ..
....إنني مجنون وما على المجنون من حرج ..
.......
من أعياه الألم فقد أحياه الامل ...
#رهان_مقبوضه (OCD)
الى اللقاء في عمل جديد مع حبي لكم
بدأت كتابة الروايه في تأريخ 17/4/2022
تمت الروايه في تأريخ
25/11/2022
بقلمي زهراء الطائي ✍️