#أبو_رعب
بقلم نورس
( مكالمة صلح )
......................
زنجر قفل روحي
وحاير بناري
ومن گلبي اعلى گلبي
انكطعت اخباري
ذكرتك......
يا عشر تيام تفاحات
عشرة بكل حياتي ...
وصارن أسراري
شچم ليله اعلى ليله
ايعز عليه النوم
بس حلمك توالي الليل خطاري
وتحمر بالعتب وجنات خطاري
يا لطخة كحل بطوارف القمصان
من كل ما گضيته ...
وياك تذكاري
يا وردة بنفسج ...
والگمر نعسان
وعيونك گمر للصبح گماري
يا رفة نبض هنيال من حباك
وندگلك نذر للصوت للطاري
للبسمة التشع بالروح شمس سطوح
وتتناثر شعر ما توصله اشعاري
لعيونك ... عيونك! حيرتي بدنياي
جلت من حورهن قدرة الباري
وتگلي...تغيرت ؟
شو مو رسومك ذيج
تمنيتك تحبني وتنچوي بناري
وكبالي اكعدك عاشك ومعشوك
واحجيلك بحالي شصار وشجاري
واكاسرلك حناني بطعم خمرة دير
ونسكر الزمن وتلاعب أوتاري
واغنيلك غنه بهداي...بهداي
اعلى هضمتنه
اعلى خيبتنه
وسفنة الراحت ويه الروج حداري
وازعلك لذتك بالعشك من تغتاض
وتگطر شفافك عسل گنطاري
وارضيك بولك " يا بعد هاي وهاي "
واتعذر سنة وما تقبل اعذاري
واحبك من صدك...
من حب اهلنا الراح
مو حب هالوكت والعشك طياري .
لـــ( عريان السيد خلف )
جريت نفس وزفرته بحسرة
صرت اكلب بصفحته مال فيس ..
كاتب اسمه
ي****ن الم****وي ..
منشور يجر منشور واخذني الواهس
ينشر اشعار هواي ، وخواطر
واصدقائة متفاعلين وياه ...منها
عاتبني بعتابك خل ترد روحي
اوهسني بدلالك يا شتل شمام
حتى ازهك واشوفك وينها جروحي
بيه اشبع غرورك
يا أعز جتال
يتمايل غنج لو بيه.. ثكل نوحي
كالوا ما تجي وكالوا عليك ابعيد
ودرب كلش طويل البينك وبيني
شح مني الدمع كد ما بجيت اعليك
واعاتب بالكمر هلبت يواسيني
لا تصبغ الشيبات خليها تذكار
كلما تمر ايام تّذكر الصار...
هواي جان ينشر لعريان السيد خلف ..
استوقفني واحد من اشعاره ، ناشره قبل ايام يكول :
يا غريب اذكر هلك
والكالها ابحجية ايتنكت
هيج جروح الكلب...والعين
كت مهضوم... كتت
ذكروها .. وعادة اليذكر يحن
والروح .. لاهل الروح حنت
ونّت او ماظن مثل وَنها
الصخر خنساه ..ونّت
ضليت كل شوي اعيد بيه ..
تشكلت غصه ببلعومي
اجت دموعي تخوني وفزيت على صوتها وهي تفوت وتدفع الباب
اجتني مبرطمة وعاكدة النونة
وكفت كبالي وجتفت ايدها لصدرها وتباوع للكاع
.. تريدني اسألها شبيها
عفت البيدي .. وحجيت : شبيج
هو اني حجيت هيج وهاي انفجرت
ريم: توفي اخذ السلوس ملاتي
لبوة: يبووو على توفي....
ضيكت عيوني بشك وسألتها .. منيلج انتِ فلوس ؟
ريم: جدو انطاني
حجتها وعين عليه وعين بالسكف
تتهرب بنظراتها
.. لان موصيتها ممنوع تاخذ فلوس من اي احد
لبوة: واني شكلت
ردت بتبرير
ريم: غير هو انطاني اني شعليه!.. جدو السعاطيط كلهم انطاهم
لبوة: ديلا يالعمرج 50 سنة
ريم: ماا اريد سلوسي حبابة
خليت شال على راسي واخذتها ومشينه للاستقبال
جان بابا كاعد وامير وجهال حور يمه يوزع عليهم عيديات ...
ما لكيت مصطفى ..
راحت لابوي تشكيله وتكله
" توفي اخذ سلوساتي "
رجع طلع عشرة من جيبه خلاها بيدها ويبوس بخدها يراضيها ..
عدنه ابوي بالبيت روحه من الدنيا ريم
يتخبل عليها وهي حياله تدلع وماخذته بلسانها
عزل مصطفى ببيت اكبر هو وعائلته
.. وصار عنده 3 ولد
واني رجعت لبيت ابوي ما خلاني اعزل لوحدي
.. وبس هو وفاطمة واموري
مشيت للمطبخ اشوف البنات ..
فاطمة واكفة تهدر بالتمن وحور كاعدة على كرسي تنظف الخضرة
كعدت يمها وكامت تشكي من عمليتها وتحجيلي ع الدكتورة الراحتلها
لبوة: انتي غير شلتي الخياط بعد .. لتخافين فتره ينشف مكانها ومتحسين بيها
حور: بالبداية زينة اشو هسه من كمت اخذ هذا المانع تكرمين حتى وساخة تنزل عليه
لبوة: لو باقية ع القديم ليش غيرتي
حور: يمعودة دشوفي البطن الصارت عندي هذاك ينفخ
لبوة: طبيعي غير توج طالعة من الاربعين
حور: ما ادري والله لعبت نفسي كل يوم مراجعة حتى دورتي الشهرية متخربطة واجتني متأخرة هالشهر
جريت موزة وكتلها بضحك
لبوة: هسه تطلعين حامل وكولي ما كلت
حور: يممممممة الا شاربة نفط .. بعده ابني ما مقبط الشهرين
صبينه الغدة ومدينة سفره بالصالة
وكعدنه ناكل .. سوالف وضحك
للعصر اجت عمتي وياها رنيم وريناد بنتها بحضنها
.. التمينة وجهال وي جهال سبونه سبايه
كاعدة اسولف واجتني تركض وتلهث بتعب كالت
ريم: ماما ماامااا باعي بس باعي ماماا
درتلها .. ها
.. اريد موطة من هذا برد برد
لبوة: لا اكعدي مو زين ولتطلعين بعد
اجه ( جود ) ابن مصطفى اصغر من ريم بسنة .. الشعر طويل وشاديه ذيل حصان ودبدوب صاحب خدود حليو يحجي وي ابوه
جود: اني هم برد
مصطفى: لا بوية اكعد واسكت اخاف عليك لابس وردي ليلزموك ولد المنطقة يحصرونك
ضحكت على كلامة
ريم طنكرت وراحت مني من شافتني قافلة ورجعت التهيت اسولف وي عمتي
جان شوي وتجي شايله بيدها موطة وتاكل بيها
اول مشافتني صاحت
ريم: معليه اني عمو كرفس هو اشترالي
كرفس تقصد ( يوسف ) جهالنه يسموا هيج عود لان عيونه خضر ومشه عليه اللقب
لبوة: وينه هو عمج كرفس لو رجعنه لسوسة الجذب
ريم: والله اني مو جباسة
صدك بعدها تحجي وفات يوسف من الباب وكف بالباب ورفع ايده وكال : السلام عليكم
ردينه السلام وقبل اي كلمة لاحظنة وضعة مخربط ..
شعره مكفش ويلهث عبالك جان بسباق سألته عمتي
سهير: ها ولك شبيك يركضون وراك
يوسف: اسكتي وخليها عمة جان يلحك وراي جلب وطكيتها ركضة لحد ما وصلت
مصطفى: نصيحة من اخيك .. من تشوف جلب امشي بطيء ولتركض بعد فترة راح تشوف الجلب يكلك سلام عليكم شلونك سلملي ع الاهل .. اسأل مجرب
يوسف: لازم ماكلها
مصطفى: يووووه جلاب المنطقة كلها تعرفني واحد منهم من كثر ما ركض وراي هسه صار من يشوفني يكلب وجهة ويكلي اهووو هم انت
خربت ضحك على سوالفهم ..
نزع حذائه ودخل سلم على ابوي وعمتي وعايدهم ورجع عايدنه احنه البنات
وكعد يسولف هو ومصطفى وعمتي تسأله على مرته..
تنهد بتعب وملل ونبرة صوته بيها غصة .. كال
يوسف: والله عمة كلبي خلص صار سنين اراجع بيها لا بيدي ولا بيدها شي .. هذا ال الله كاتبة ما مقسوم النه الخلفة
ضلت تحجي وياه تصبر عليه
كلوبنة كلنه معصورة عليهم خطية صار سنين ما خلوا دكتور يعتب عليهم ، طلع بيها للخارج وعلاجات كومة وحتى انابيب سووا كم مرة وفشل
لا مرته بيها عله ولا هو بيه صوج
بس بعد حكمة رب العالمين ..
اجه عمو جهاد وعمو أسر بدشاديشهم البيض عايدونة ومن الباب وراحوا ، وياهم ابوي يعايدون كرابتنه ...
الولد كلمن طلع
وضلوا عمتي والبنات لليل تعشوا يمنه
ل12 تقريبا ..
رجعوا عمامي والتموا بالاستقبال
جنت كاعدة بالغرفة اجتني حور كالت
حور: عمو جهاد يصيحلج
كمت للاستقبال جان هو وعمو أسر وابوي وياهم كاعدة عمتي ..
توجهت الانظار عليه اشرلي اكعد
كعدت مقابيلة وبداخلي تساؤلات ومستغربة بنفس الوقت ..
جهاد: شلونج بنيتي
لبوة: الحمدلله عايشة .. تفضل عمو محتاجني بشي
تجة ظهرة ع التخم وكال
جهاد: لا بنتي لا اسأل عليج
ضل يسألني عن ريم وعالدوام
باوعت لعمتي واشرتلها براسي .. شكو
جذب انتباهي صوته وهو يكول :
اسمعيني ام ريم الله شاهد وهاي كدام ابوج بناتي 4 وانتي خامستهن بيناتنه زاد وملح واعرف طينتج شنو
.. تره الدنيا خلصانة والزعل يعمي ما ينراد
بعده ممكمل عرفت شنو يقصد كتله
لبوة: عمو الله يخليك اذا على ذيج السالفة منك وسدها ما الي قابلية للحجي والله
أسر: عمج يحاجيج اسمعي منه بالاول بنتي
رجعت كعدت واني مكتفة ايدي لصدري واهز برجلي وعيني ع السكف .. عيوني كامت تحركني
اختنك كلما ينجاب هالطاري كدامي ..
يعيد عليه ايام تجرعتها بالمر
كمل عمو كلامة
جهاد: ما رايد منج تحجين بس اسمعيني والقرار اول وتالي الج .. هاي صار سنين احد جبرج على شي ؟ ..لا
هالتشوفين الدنيا تركض ركض ومحد يدري شوكت تنزل ورقته .. تره لا الزعل يرجع الراح ولا العناد والمكابره تلين الكلوب بشر غلط وياج وعرف شنو غلطة وانه واحد من الناس وكفت بوجهة وصرت وياج عليه وما قبلتله .. زين وتالي ؟ جندوب العمر يكضي كلمن مرته وجهاله وانتوا مصيركم ما معروف لا للسما ولا للكاع وبيناتكم بنية ...
غوركت عيوني من جاب طاري ريم وكمل على كلامة عمو أسر
أسر: عمج يحجي .. ريم شكد عمرها ؟
رديت .. 4 سنوات
أسر: بهالاربع سنين بداعت بنيتج ما اجت وسألتج وين بابا ؟ ليش ما يلفي للبيت ؟ شتردينها بله ..
هاي طفلة عمو تريد ابوها كفرر تخلص عمرها وتكبر ابوها ما موجود كبال عينها
وهذا كله حرام عليج وتحاسبين عليه
لبوة: يعني هم رجعتوا تلوموني ورجعت اني ام الصوج
جهاد: احنه منلومج بابا بالعكس وياج وبدليل لهذا يومنا محد غصبج وكلج ترجعيله غصبا ما عليج ..
بيتي وبيت ابوج مفتوح الج دائما بس لشوكت؟ تره محد دايملج وهاي انه احجيها .. انتي ام الحك ولو صارت و رجعتيله ترجعين وهو الممنون وانتي المتفضلة عليه خليها بالج
ومثل ما كال عمج البنية بدون ابوها لا شيء لتكولين اني اربيها وجدها موجود تره كلنه منكدر نسد مكان ابوها
أشرف: بابا لجين شما صار انه وياج وبيتي هذا مفتوح الج ولبنيتج .. ما اقصر عليج ولا عليها بشي هذا بحال لو جنتي سادة بابا الرجعة بس لو الج نية تردين لا والله بيدي اخذج لبيت رجلج معززة مكرمه وتره احنه بشر وطبع بني آدم خطاء ما بينة واحد معصوم وهو غلط واعترف بغلطة واعتذر .. كاافي ارجعيله لخاطر هالبنية عاد
جهاد: مثل ما كال ابوج احنه كلنه وياج ومحد يكدر يجبرج .. الانسان ما معصوم من الغلط ياهو بينه نظيف وما عنده زلات بحياته ؟ كلنه نغلط بس اكو شي اسمه التسامح ..
جا ليش ربج فتح باب التوبة لعباده .. الله بعظمته يسامح عبده لو غلط وتاب منو احنه البشر حتى ما نسامح
سهير: والله بعده يحبج ورايدج اسألي عمج لحد ذاك اليوم اجانه للبيت وجهة اسود والتعب ماخذ حيله ولج بجه بجيي خله دموعنه تصب وياه
جهاد: حاله يصعب ع الكافر لتشوفينه ماخذ الدنيا بحيل صدر تراه تعبان لا مرته ولا بنته بكربه .. اول ما صارت الهوسة كلت هذا ياخذله جم شهر سنة بالزايد ويمل ويكعد لو يروح يتزوج بس مال واحد يتحمل 5 سنين لخاطر مره !.. والله فلا توقعتها منه
جا كولي شكد يحبج شكد معزتج بكلبه جبيره حتى هيج متمسك بيج
أسر: اخذ جزاته بعد انسي الفات وابدي صفحة جديدة احسن ما بعدين تتندمين اذا صارله شي وتعضين اصابيعج ندم عالعمر الخلص وانتوا كلمن بصوب
ضلوا هواي يحجون لحد مراحوا
.. بيومها منمت الليل من التفكير
هاي مو اول مره تصير ويرجعون يحجولي بسالفة الرجعة .. سنين وهو يودي ناس ويجيب ناس
بس هالمره اني اللي احس كلبي خلص ..
احن واشتاق..
ما كرهت !
مو طبعي هذا .. بس محمله بكلبي عليه هواي
حاولت انسى
بس اجذب اذا اكول نسيت .. صعب
انسدت السالفة ومرت 3 ايام وره العيد
.. جنه مقررين نروح زيارة لكربلاء
اني وعمتي ويانه يوسف و وتين وعمه أميرة
.. بيومها تحضرت جنه مقررين وره صلاة الفجر نطلع
نومت ريم يم فاطمة اخاف تكعد تفز ومتلكاني ومخليه يمها علاكة حلويات ..
وصيتها عليها
وخابرني يوسف ..
اخذت جنطتي وطلعت
صعدت وسلمت ومشه بينه لبيت عمتي ناخذها مناك
.. وصلنه جانت بعدها ما مكمله طلع النه عمو جهاد كال
جهاد: يابة انزلوا السالفة مطولة
لبوة: عمو شوارها بدكير ومنكير اشو حتى بعرس بناتها مطولت هلكد
جهاد: اندري بعد عمج هاي سوالفجن
نزلنه بالصالة طلعت رنيم مطفيه كوة تباوع خطيه .. سلمت وجابتلنه مي
يمكن نص ساعة لبين ما خلصت عمتي وواكفة تحجي وي رنيم وتوصيها هيج اطبخي وهيج سوي .. وهاي مطفية من النعاس بس تهز براسها
طب يوسف الوجه مصفر كال
يوسف: اجرتلجن تكسي روحن انتن
أميرة: ياا جا وانت
يوسف: ما اكدر شو مالي خلك خلبها غير مره
سهير: على بختك عمه جا نروح احنه بس نسوان والطريق شطولة
يوسف: الولد صديقي مأمن عليكم .. قابل شكو
سهير: شنو صاير شي شو وجهك انكلب
حجة بنفاذ صبر
يوسف: لا يابة شصاير قابل .. بس اني لوحدي وطريق طويل ما اندل لو مصطفى رايح جان تناوبنه ع السواقة
نوب اروح اكلبها بيكم ويصير قدر لا سامح الله .. روحوا انتوا توكلوا بعد
صدك رحنه ومتفاجأين شبي هيج كلب
.. وصلنه لهناك زرنة وصلينه وكعدنه بحضرة الامام الحسين ( عليه السلام )
من لزمت شباكه انفاضت دموعي وبلساني شي واحد ..
ادعي من الله وابا عبد الله يهديني ويلين كلبي على ابو بنتي حتى اكمل حياتي
كاعدة وكدامي وتين لازمه كتاب الزيارة مدنكة تقره ودموعها تهل .. انكسر كلبي عليها
ميتة على ريحة الطفل ..
كلنا ندعيلها الله يرزقها بالذرية الصالحة
كاعدة على مسافة مره كبيره بالعمر وجهة نوراني تباوعلها .. سألتني عليها وكتلها هيج وهيج سالفتها
تقربت كعدت يمها وخلت ايدها على رجلها .. رفعت راسها باوعت للمره كالت الها
: خاله فوضي امرج لله واهل بيته ما يصعب شي على رب العالمين .. ناس تضل 20 سنة واكثر يمكن وربج يرزقهم ولو بعد حين .. النبي زكريا عليه السلام اخذه الكبر وهو ما عنده ذرية وبليلة وهو بمحرابه جان يلهث بالدعاء لرب العالمين ولح بدعائه بنفس اللحظة نزل عليه الوحي يبشره كله.. { يا زكريا إنا نبشرك بغلام اسمه يحيى } شوفي رحمة رب العالمين شلون واسعة بدعاء ربج استجابله ومو بس هيج مو اي ابن جان واحد من انبياء الله
.. لتيأسين الا ما رب العالمين يجبر بخاطرج وبخاطر رجلج ويملي حضنج بجاهل
خطية شبعت بجي والمره تحجي وياها وتنصحها .. وتكلها
وتين: خاله ادعيلي فدوة ..
المره: بدون لا تكولين يخاله الله يرزقج بالوليد الصالح ويكمل فرحتج
وتين: الله يريح كلبج مثل ما ريحتيني
تشكرت منها عمة هواي
طلعنه وتغدينه .. ورجعنه وره صلاة الظهر
بعدنه بالطريق وخابرت عمتي على رنيم تسألها على عمو .. كالت
رنيم: ما ادري من البارحة ورة ما طلعتوا راحوا هو ويوسف ولهسه مراجع
سهير: يااا شبيهم ذول .. هم خابرتي صاير شي شو كلبي لاعب اني
رنيم: والله ما ادري
سدته منها وخابرت على عمو مره وبالثانية يلا جاوب .. حلفته كالتله صاير شي .. كلها مصطفى واكع بالدراجة ونمنه بيه مستشفى
عمتي تخبلت واني بالي كله يم حور وشحالها والخوف ماكلنه
ستونه دخلنه للبيت ..
جان يفوت ورانه مصطفى الوجه مينعرف يا لون حتى دخل لا سلام ولا كال شي
اباوعله متفاجأه يمشي ما بيه شي!...
تلكته عمتي
سهير: جا شلون عمك يكول مكلوب بالدراجة
مصطفى: يا دراجة ؟
هنا لزمت كلبي وعرفنه بعمو جذب علينه سألته عمتي بفزع
سهير: احجي ولك مصطفى شصاير جهاد وين .. أسرر بيه شي احجي ولكك
باوع بتردد وعيونه تشكلت عليه وكال وهو مدنك
مصطفى: قسور ضربته طلقة تايهه......................
❄️❄️❄️❄️❄️❄️
_جزء اول من احداث البارت