أبو رعب

البارت 15

( أبو رعب )
.. بقلم نورس

.......................

رجعت من الشغل تعبان
فتت للبيت

سيارة قسور مو بالكراج .. عندة خفر

طبيت جوة الاضوية مطفية
حطيت ابالي مصطفى نايم

لكن سرعان ما فتت للغرفة وشفتة كاعد على الجرباية ومكابل التليفون وايدة على خدة

اول ما شافني فز كبالي
وشكلة يوحي صايرة مصيبة جديدة

يوسف: شكووو

مصطفى: التليفون ما بطل اتصالات كل شوي من رقم شكل ويدز صور وسكرينات لمحادثات بيني وبين بيان

احس كلامة اجاني مثل الصاعقة على راسي
شوفني الصور والمحادثات ..
الصور جان هو وياها قريبين واحد ع الثاني
بس هي ووجهة ما مبين بس مصطفى

احس لساني انربط وبعد ما اعرف شتصرف
واني جنت اكول عدت على خير
.. طلعت مضمومة النة !

كعدت خليت ايدي على راسي ومدنك .. فكري كلة مشوش وما اعرف اركز بشنو

اتلكاها من هل مصيبة لو افكر باهلنة اذا عرفوا بالصار ؟؟؟

اجاني صوتة

مصطفى: اني بعد هذا ما اسكتله .. راح اشوفلي واحد يعرف بالحسابات والأرقام حتى يطلعلي موقعه

كمتلة بانفعال

يوسف: يعني وعرفت الموقع شراح تسووي مثلا ؟؟

مصطفى: ما اعرف اسوي اي شي .. اروحله ، اريد اعرف لوين يريد يوصل حتى لو اتعارك ، الجلب عندة اكثر من رقم ومن ارد عليه يسدة بوجهي ويحظرني

يوسف: وانت هيج عود حليتهة

مصطفى: يعني انت  كلي شسووووي ؟؟ اضل كاااعد وساكت واضل متخوووف منه لهل زبالة .. شنو حرمة كدامك اني ؟؟

يوسف: وانت شمدريك هو بس واحد ؟ يجوز عصابة ضاحكين عليك ويردون يوكعوك ويجوز حتى هاي اللي اسمها بيان وياهم وتريد تورطك

.. اكعد خلي نفكر بعقل ترة هي مو بالهوبزة

بعدنة نحجي ودك تليفونة
.. كمزنة ثنينة عليه ، جان رقم

سألته .. منوو ؟

مصطفى: ما اعرف

يوسف: رد بسرعة .. اخاف هو

اول ما فتح خط اجانة صوت بنية تبجي

.. مصطفى الله عليك لتسد الخط .. احلفك بالله بس اسمعني .. الوووو مصطفى تسمعني .. الووو

باوعلي بتوتر وكال بصوت خافت

مصطفى: هاي بيان

جريت التليفون بسرعة من ايدة