ادعو لوالدي برحمة والمغفرة..
لبيه ياريح المطر والسما غيم..
ولبيه ياصوت المطر بعد غيبه ..
بعد صلاة الظهر....
حريم العقاب وبناتهم مجتمعات على غدا العائلة
دخلت شوق توها جاية من السوق معها عدت اكياس وامها وراها و معها قليل من الاكياس
الجدة صيته بتسال وعيونها على الاكياس/ هو انتي بتهاجرين ولا بتعرسين يومك قاشه السوق كله؟
شوق تنزل عباتها وتجلس وهي تبتسم / ابشرك خلصت من السوق الحمدلله بس باقي تجهيزات الصالون
نوف هتفت بحماس وهي ترضع ولدها/ حجزتي للي معك عند الصالون ؟
شوق ترد بود / اي افا عليك حجزت لك ولانوار بعد
انوار بامتنان / الله يسعدك ماقصرتي
نوف بحسن نيه لفت لمهره بتسال/ وانتي مهره ماتبين معنا ؟
مهره شعرت بغصه بنص حجرتها بس اكتمتها وهي تبتسم بصعوبه / والله مادري بشوف
شوق هتفت بتقصد/ ماتوقع مهره تقدر فهد ماراح يخليها عشان كذا ماحجزت لها معنا
مهره صمتت ماعندها رد لانها ماقالت الا الصدق/...
نوف تغير الموضوع / طيب شوق فستانك وصل؟
شوق تشرح لها بحماس/ اي يجنن كله لولو من عند الصدر لين تحت الاطراف
نوف ابتسمت بحب / تقطعينه بالعافيه
شوق تبتسم بود / الله يعافيك عاد الشعر والمكياج ناويه على شي مميز
انوار تضحك بمرح / خفي على طلال ماهو تصدمينه مره وحده ترا ماعنده خوات ولا عمر احد كشخ له
نوف وشوق/ ههههههه
الجدة صيته بامومه حانيه / طلال تربية مرتن اجودية ان شاءالله انك راعيت بيته وام لعياله
ام ماهر بموده صادقه/ اي والله ان ام طلال وعيالها اجواد ومسلمين
فاطمه نغزتها بزفرة / ليش وحنا يهود؟
ام ماهر ردت عليها بذات النغزه / والله ما عاشرتك كثر ما عاشرت ام طلال وعيالها
فاطمه طارت عيونها وهي تدور الشر / مدامنا يهود بنظرك ليش زوجتي بنتك من عيالنا؟
الجدة صيته تنحرها بحده / قص الله لسانك كانك ماترتاحين الا بالمشاكل
فاطمه بغيظ / ماسمعتيها وش تقول؟
الجدة صيته تطردها/اذلفي داخل ذلفك الله
فاطمه تقوم وهي متجه جناحها / مادري متى الله بيطلع هالغراب من بيتنا ويفكنا منهن
مهره ردت عليها بصوت عالي وهي تشوفها
تبتعد /هذا بيتي بعد جدتي وما الغراب الا انتي واللي مثلك
فاطمه لفت لها بحده / وشو وش قلتي يا بنت ناصر تعالي اطرديني احسن ؟
مهره ترفع كتوفها برود / ثمني كلامك عشان الناس تثمن كلامها معك
شوق تدخلت بقهر / اشوف لسانك طايل يا مهره يبي من يقصه لك
مهره ترد عليها بزفرة / ليش شايفه مالي لسان من اول ؟؟
الجدة صيته تصمتهم بحزم/ اص فضحتونا بصواتكم
فاطمه بغيظ / ماتسمعين بنت اخوك بتطردني وقدام عينك بعد تحسب البيت بيتها هي وامها ؟
مهره توقف بعصبيه / اي بيتنا واذا براسك شي انفضيه برا بيتنا
جاهم صوته الصارم / هيه وش هالصراخ ؟؟
الكل تغطى والجدة نادت عليه تستفزعه /تعال يافهد شف لك صرفه معهن
فهد دخل و رفع حاجبه بتسال غاضب/ منهن ؟؟
فاطمه ردت عليه باستعجال/ مرتك قوى باسها وتهددنا بطردنا بشارع
فهد ناظر بمهره اللي رفعت خشمها بكبر ومن غير
لا ترد/....
فهد تنهد بطولة بال منها ومن طبوعها الجديدة الغريبة وهو يهتف با انهى النقاش مايبي يتهاوش معها قدام الحريم ويكرر نفس الخطاء/ كل وحده تمسك لسانها وتسد فمها احسن لها
فاطمه طارت عيونها باستغراب/ اقول لك تهددنا تبي تطردنا ؟؟
فهد يتجه الباب /مهره الحقيني
مهره ناظرت فاطمه ببتسامه مستفزه ولحقت بفهد ومن طلعت للحوش اختفت ابتسامتها وهي عارفه العاصفه اللي بتصير بينهم بالجناح
فهد دخل جناحه و رمى شماغه على الاريكه وجلس وهو يخلخل اصابعه بشعره وانفاسه تطاير من الغضب مهره اقتربت منه وهي تكتف يديها قدام صدرها / نعم ؟
فهد يطالعها من فوق لاتحت بنظارته حارقه غاضبه بصمت /...
مهره توترت من نظراته ونزلت يديها جوارها وتعيد السوال للمره الثانيه /نعم فهد ؟
فهد بتسال حاد وهو مازال يناظرها بذات النظره الحارقة / انتي لاوين بتوصلين ،؟؟
مهره سحبت نفس طويل وردت برود/ لين يبرد قلبي فيكم واحد ورا الثاني
فهد زفر بشدة وهو يهز راسه باسا/ لاحول ولاقوة الا بالله العلي العظيم
مهره بنبرة مخنوقه / فهد لا تدخل باينا ابدً
فهد وقف بزفرة حازمه / يا سلام و ماتبين اتدخل بعد؟؟
مهره زفرت باشد / اي لا تدخل لا تدخل بينا ان شاءالله نتذابح
فهد صرخ فيها بغضب / بنت اعقلي اعقلي تراي ساكت عنك وعن طبوعك كثير
مهره انفجرت باكيه وهي تدفعه بالكلام العاتب الغاضب/ ساكت لانك عارف خطاك طلقتني ورخصتني عشان مره بعت عشرتي عشانها والحين جاي تهدد عشان حريم بعد ؟؟
فهد يطالع بملامحها الباكيه وعيونها الغارقه وهو صامت/...
مهره تكمل بذات الانفجار / هذا انا مهره اللي متلزمك ولا تلزم بيتك ليش ترجعها ليشششش ؟؟؟
فهد اقترب لها وهتف بنبرة حانيه/ مهره خلاص انسي
مهره تبكي بشدة / تبيني انسى بسهوله اللي سويته يا فهد ماهو قليل ماهو قليل
فهد ماقدر يسيطر على نفسه اقترب وحضنها بحنو بالغ هامس عند اذنها / اششش خلاص خلاص
مهره شاحت بوجها عنه بغبنه / ما ترتاح لين تشوفوني مكسوره ماتبيني انجبر ابد ابد
فهد كان بعالم ثاني ريحتها ادوخته وعيونه على ملامحها العاتبه اللي انحرم منها شهرين متواصله ...
مهره تمسح دموعها باطن كفها / اعيد وازيد يا فهد لا تدخل بينا وبس
فهد انحنى وحط انفه على طرف خدها من يسار وحركه مستنشق لها / تبشرين وغيره ؟
مهره حست فيه كيف دايخ معها لذالك ابتعدت بحركه سريعه من وهي تهتف بعقاب مدروس/ الكلام اللي عندي قلته وانتهى والحين بروح داخل
فهد شد معصمها وعيونه تاشر لها بتسال/ ليش تروحين؟؟
مهره تنهدت بطولة بال /فهد هذا اتفاقنا ممكن تفك يدي؟؟
فهد بمحاوله حازمه / طيب خليك عندي للين اغفي بعده روحي
مهره فهمت خبثه يبي يستدرجها لين هي تدوخ معه ابتعدت لباب / مابي اجلس معك
فهد سحب له نفس وزفرة بشدة (هاذي واخرتها معها؟!)
_________________________________
ملاك كانت متحفظه بعصابها وبارده مع الجميع وهي من داخل متوتره من صمت مازن وفا الغريب
حاسه ان وراهم شي واللي زادها ان امها مازالت عتبانه عليها وماتكلم معها لا سوال ورد جواب فقط..
حصه ترتب لاستقبال امل بحماس / يا عمري يا مول والله اشتقت لها
ملاك ترد بذات الشوق / اي وربي اني احسب الساعات لوصولها
نهيل جالسه تسمع لهم وصامته /....
حصه تسال وهي تاشر على سرير الطفل/ مسوكه نايمه ؟؟!
ملاك تهز راسها وعيونها على بنتها/ اي نومتها قبل تجي امل وتهجم عليها
حصه تضحك/ مسكين ولدي الحين ماحد يعطيه وجه
ملاك تبتسم / اصلاً الغلا والحلا كله لا ايودي
حصه تطالعها بنص عين / قولي الغلا يمكن اصدق اما الحلا مايدخل الراس انتي جبتي صاروخ مثلك ماعندك حل وسط انتي وبنتك
نهيل هتفت باستعجال / اذكري الله
حصه تضحك بشدة / تفوو عليها هي وبنتها ماشاءالله
ملاك طالعت بامها نظرت عتاب وصدت/......
نهيل انحرتها هالنظره لاكنها صمتت وهي من داخل عتبانه اكثر بكثير عليها/......
شوي وصلت امل استقبلتها امها واخواتها بحب وشتياق وضيفوها من انواع الضيافه وبندر راح بمجلس الرجال مع مازن وعادل ...
امل من بعد ما تقهوت وكلت لها كم قطعه من الحلا اقتربت وهي تنحنى لسرير مسك و تطالع بملامحها وعيونها فاتحه على وسعها / مشاءالله ملاك انتي متاكده هاذي بنتنا ماهو بالغلط اخذينها ؟؟
ملاك تضحك/ لا تطمني طالعه من وسط بطني
امل باندهاش /ياربي تهبل تو عرفت اننا كنا حولان وحنا طايرين بيود ابو راس اللي تقل راس ابوه
حصه تنحرها بزعل مرح / الا يالحيوانه الحين ايود صار ابو راس يوم شفتي ام شيفه هاذي؟؟
امل تشيل مسك وتبوس فيها/ والله الشيفه انا وانتي هاذي مثل امها اكله زين بنات العرب كلهن
نهيل مهمتها الايام هاذي بس تذكرهم بذكرالله / قولي ماشاءالله
امل تبوس بهدو /لاله الا الله ماشاءالله
حصه تضحك / امي من جت مسك و هذي وضيفتها المفروض تعطينها يا ملاك انتي وصقر راتب
ملاك كشرت وشاحت بوجها/...
نهيل تنهدت من هالطاري وهي توقف / بروح اسلم على بندر وانتن لاتكثرن الكلام
امل تطالع امها اللي طالعه / شفيها امي احسها زعلانه من شي؟
حصه صمتت ماتبي تكلم احترام لمشاعر ملاك /...
ملاك رفعت كتوفها بساطه /زعلانه اني مارجعت لصقر تخيلي صارت محاميه له
امل تجلس ومسك بحضنها / طيب انتي يوم زواج رحتي معه وش صار خلاك ترجعين ؟
ملاك تنهدت بوجع / رحت لاني كنت اطلق ولاده ولا عندي احد كلمته يجي يوديني المستشفى وليتني ماكلمته
امل تسال بغرابه/طيب فهموني وش صار ؟؟
حصه تغير الموضوع / اتركينا من السالفه هاذي انتي اللي علمينا كيف الزواح معك (غمزت بعينها )
امل انحرجت وحمر وجها / عادي مثل مانتم تشوفونه
حصه تضحك/ انا من ناحيتي اشوفه حلو انتي مثلي؟
امل تطالع بملاك بتسال/ وانتي ملاك تشوفينه حلو؟
ملاك ماتدري ليش شعرت بقشعريرة غريبه لاكنها ردت بعفويه مدروسه/ على حسب الزوج امل لا تقارنين حياتك بغيرك
امل بحزن شفاف/ ملاك لازم تعشين مع صقر مرتاحه هذا نصيبك خلاص
ملاك تنهدت بذات الحزن الشفاف / كثير تجاوزت عنه وقلت هذا نصيبي حاولت ارضى بالحياة معه لاكنه للاسف خرب كل شي بمحاولة قتل نفس بريئه هدم كل اللي بناه
_____________________________
بعد عدت ايام ...
بكر ليلة زفاف شوق و الكل كان مشغول بتجهيز لها
وترتيب نفسه للحظور و ماحد بالبيت اللي عند الصالون واللي بسوق وام ماهر عند ام طلال تساعدها بستعداد عرس ولدها الا مهره وجدتها كانت جالسه معها بالجناح وهي تذبذب بزعل وتافف بطفش
الجدة صيته طالعتها بضيقه من حالها / يامك ماني من سبوع اقول لك وصي امك تجيب لك فستان وانتي معنده هاه الحين مايمديك ؟؟
مهره ترد بحسره/ انا ليش ماشرطت عليه مايردني عن السوق ؟؟
الحدة صيته طارت عيونها/ هاه شفو الخبله على ان فهد بيمشي وراك شروطك ؟
مهره بغيظ / اي يمشي ورا شروطي ولا يحررني تعبت من سجنه
الحدة صيته تهديها/ اسكتي وتركي عنك المناقره لا رجع انا اكلمه يوديك
مهره صمتت وهي غاسله يدها منه /...
جاهم فهد من بعد ما قالت له الخدامه ان البيت مافي احد انحنى وسلم على جدته سالها عن اخبارها
وبعد عدت دقايق الجدة صيته هتفت برجا / فهد يامك بكرا العرس ومهره ماشرت فستان للحفل
فهد ناظر بمهره اللي تناظر فيه تنتظر رده واضح بتنفجر عليه هتف بحزم / الفستان اللي راحت لسوق وشرته بالملكه تلبسه بالعرس
مهره وقفت بعصبيه واصله حدها / نعم البس نفس البس تبي تضعفني قدام الناس ؟؟
فهد عطاها نظره قويه / انثبري واجلسي لاقوم اتوطى بطنك
مهره لفت لجدتها بحرقه / يبي يذلني يبي يذلني يكرهني
يا جدة كره العما
فهد طارت عيونه وقف هو بعد / انت وش وضعك تبين استخدم يدي معك ؟؟
مهره نزلت دمعه من عينها وهي تصد ماتبيه يلمحها /...
فهد تنهد بضيقه وهو يشوف عيونها لمعت بحزن /...
الجدة صيته تحاول تصلح بينهم / تفاهمو با لهدو ماهو بس طايرين يا دافع كانكم عدوان مانتم بزواج
مهره اتجهت الباب بغيظ غير قابل لنقاش / ماني حاظره العرس خليه يستانس بجلستي بالبيت بروحي
فهد زفر عليها بصوت حاد / جلسه بالبيت مافيه بتحظرين غصبن عليك
الجدة صيته تهتف له بخفوت / انت علامك البنت ترا مجروحه وانت ماطيبت خاطرها بس تعيد وتزيد معها بالعناد
فهد زفر بقلة صبر / وصلتني اقصاي مادري وش فيها انهبلت مره وحده
الجدة صيته تحاول فيه / واللي يرحم عقاب لا تكسرها قدام الناس وتحدها على لبس قديم ودها لقرب محل تاخذ اغراضها وترجع
فهد مسح عارضه بكف يده وكلام جدته بدا ياثر
فيه / بروح اتفاهم معها
الجدة صيته هزت راسها بتفهم / تلقها بجناح امها اكيد تبكي طيب خاطرها
فهد اتجهت جناح ام ماهر فتح الباب ودخل من غير لا يطقه لانه كان متاكد ماحد فيه غيرها ومثل ماتوقعت جدته كانت متكوره على نفسها باخر السرير و تبكي تقدم لها وهي شاحت بوجها عنه جلس جوارها على طرف السرير و نادها بصوت رجولي حاني وهو يفتح ذراعيه لها/ تعالي
مهره هزت راسها بنفي وهي تزيد بشهقاتها/...
فهد اقترب اكثر وسحبها لوسط حضنه و مسح على شعرها بكف يده بحنان وتهدئه وهو يرفع راسه لافوق وقلبه يتقطع من حرارة دموعها على صدره خلاها تبكي كثر ماتبي حتى هدت وحاولت تبعد من حضنه بس هو ثبتها ورفع وجها المبلول لوجهه طبع بوسه حميمه طويلة على شفايفها النديتين المملحه بدموعها
تعمق فيها لانه شعر بتجاوبها معه مايدري هو ضعف منها ولا لانها فعلاً مشتاقة لهاذي الحركه المثيرة ؟....
بعد عدت ثواني شعرو بانفاسهم طارت دفعه وحده
و فهد ابعد منها يحاول يجمع انفاسه و جسده ولع ولع و بدا يعرق وهي صدت عنه بخجل وخدودها وردت هو تنحنح يحاول يطلع الكلام من حنجرته المخنوقه / احم بوديك لسوق بس بشرط
مهره لفت له باستغراب / انت تشرط ؟
فهد ابتسم بخبث ناوي عليها / وليش لا ماهو بدينا بشروط ننتهى بشروط؟؟
مهره عيونها على ابتسامته و صدرها يرتفع وينزل /...
فهد هتف بنبرة خبيثه / وين تطالعين ماشبعتي ؟؟
مهره شاحت بوجها وهي تحسب عليه/...
فهد سالها بتوجس لايخلو من الخبث / تبين تسمعين شرطي ؟
مهره ردت باستعجال / مابي اسمعه لاني ماراح اوافق عليه
فهد رفع كتوفه برود مدروس / بكيفك
مهره هتفت بغيظ/ تبي تلوي ذارعي وتجبرني على شي مابيه هذا مستحيل حتى لو حظرت الزواج بعباتي
فهد يطالع فيها من رجلها لين راسها بشجن وهتف بنبرة شجن اعمق / طيب وش اللي تبينه عشان طفين النار اللي مولعه فيني ؟؟
مهره حطت عينها بعينه مباشر / لين تطفي نار صدري
فهد هز راسه بتفهم / طيب ومتى تبي تطفي نار صدرك
مهره ترفع كتوفها / الله اعلم
فهد تنهد بضيقه شديده / على العموم شرطي ماهو اللي جا بالك ابدً
مهره قطبت جبينها بتسال/ اجل!؟
فهد مسح على شفايفها بطرف اصابعه / شرطني تنامين عندي بالغرفة فقط عشان احول اصلح اللي بينا
مهره ردت بوجع / ماراح تقدر اللي انت سويته مايغتفر
فهد زفر عليها بحزم / مهره خلاص انتي تعالي نامي عندي وجربي
مهره تطالع فيه بتردد/ تبيني انام عندك عشان تستدرجني لك؟؟
فهد رفع حاجبه بثقل / ليش مانتي واثقه بنفسك خايفه من تهوراتك؟؟
مهره نزلت عينها لصابعها اللي تفرك فيهن وردت بعفويه صادقه / اي وخاف اندم بعدين
فهد تسارعت انفاسه و زادت دقات قلبه وكاد توقف من سراحتها وبرائتها وهو يسحبها مددها نص تمدد على ذراعه ويدفن راسه بنحرها يستنشقها بعمق شديد و مهره هتفت بهدو / فهد اذا بتوعدني ماراح يصير شي بينا بالغصب انا موافقه انام عندك بالجناح بس توديني السوق قبل
فهد يحرك انفه على نحرها / وعد ياللي تبينه بيصير كم مهره عندي انا ؟؟
مهره توترت من حركاته وكلامه قامت واقفه مبتعده من بين يديه ومن السرير كله / متى توديني ؟؟
فهد يطالع فيها و مارد عليها يحاول يجمع ثباته/...
مهره توترت بزيادة / احم فهد اكلمك
فهد وقف بحركه سريعه / انتظرك بسيارة
مهره من طلع جلست وهي تهفهف على وجها بطراف اصابعها تبي هو بارد ...بعد ثواني قامت ولبست عباتها وجهزت بسرعه خافت تاخر و يقلب عليها ويعصب
وهي طالعه من الغرفه شافت جدتها جايه من المطبخ و تسال /هاه يامك عسى بيوديك؟؟
مهره تهز راسها بايه / بيوديني تروحين معي ؟
الجدة صيته تبتسم / لا يامك انتم روحو و حاولي تركدين وتتركين المشاكل تراه ماسكن اعصابه لا تنفلت ماحد يحرز فيه
من ركبت مهره معه السيارة حال الصمت بينهم لين وصلو المول وقف وطفى سيارته سحب المفتاح لف لها شافها فتحت الباب بتنزل شد ذارعها وهتف
بتفحص/ طالعيني بشوف عيونك لايكون حاطه كحل شي ؟؟؟
مهره طالعت فيه وهي تهتف بغيظ/ اول شي ماحد يقول كحل الحين هذا يسمونه ايلاينر وثاني شي تطمن ماحطيت شي وعباتي مثل ماتشوف بعد عريضه
فهد نزل عينه على جسدها بتفحص هز راسه برضا/ اي زينه يلا انزلي
دخلو الموال وهي اتجهت لمحلات الفساتين ماعجبها شي طلعت وهو معها صامت ومن داخله غير مقتنع بحومتها بالمول دخلت محل اخر وهي تلفتت يمين يسار تدور على فستان يلفت الانتباه جاها صوته الصارم بخفوت/ اخذي اي شي وخلصينا ترا وراي شغل ماني فاضي لك
مهره عطته نظرة / شفيك ترا تو دخلنا خل اخذ اغراضي؟
فهد بصرامه اعمق / اقول اخلصي علي
مهره تقدمت للفساتين بزعل / طيب طيب
فهد وقف وراها وهي تختار من بين الافساتين اعجبها واحد بالون الاسود على شال فضي انيق وناعم
فهد همس لها / غيري عن الاسود
مهره لفت له / ليش ماهو حلو؟؟
فهد يطالع بعيونها باستكنان/ كل شي تلبسينه حلو بس الاسود عليك يفتن غيريه
مهره بعناد / لا باخذه
فهد صر على اسنانه/ كيف يعني عناد؟؟
مهره ترفع كتوفها بساطه/ لا بس عاجبني باخذه وحط بالك لو غيرته واخذت ثاني بيطلع احلا مهيره اللي تبي تلبسه ماهو حي الله
فهد هنيه صمت صمت وهو يزيد ولع من كلامها /...
خذت الفستان و نسقت معه حذا وهي طالعه همست له برجا/ بمر محل الثاني باخذ للي اكسسورات
فهد برفض حازم / لا بنطلع خلاص
مهره صمتت بزعل /...
فهد لمح محل لانجري اعجبه و مال من طوله لطولها وهمس بخبث/ بنمر هذا المحل
مهره لفت وطارت عيونها بخجل/ لالا مابيه
فهد شطفها وهو يسحب يدها متجه المحل دخل وهي وراه اشر على قميص نوم راقي / باخذه لك؟؟
مهره بلعانه / مارح البسه لو اخذته
فهد مارد عليها وهو يطلب من الموظفه تطلعه له
واختار معه كم قميص ملفتات النظر رسم بخياله فيه جسد مهره المثير فيه
ركب فهد السيارة وهي ركبت بجاوره هتف لها
بتسال/ وش مشتهيه عشا؟؟
مهره صاده عنه وترد من طرف خشمها/ مابي عشا
فهد مسك كف يدها بكف يده / بوديك مطعم هندي حار يولع فيك
مهره ضحكت غصب عليها / هههه تبي تحرقني انت اكله واحترق منه
فهد شد على كفها وضحكتها الرقيقه تعمل فيه العمايل/ انا من زمان محترق وخالص
مهره صمتت وعلى شفايفها انرسمت ابتسامة نصر من تحت النقاب /...
فهد تنهد وهو ينحنى ويبوس يدها بدفى / بنتعشا وبعده نرجع ننام وراي شغل من الصباح
___________________________________
الساعة 2 ليلاً بدبي
عند صقر كان جالس بكوفي راقي و مشغول الفكر من بعد ماكلم امه حاس من نبرتها التوتر وانها مخبيه عنه شي رشف من كاس الاسبرسو وعيونه تجول بين الناس
بس عقله بعيد يفكر ويفكر فجئه تصلبت عظامه
وهو ينزل كاس الاسبرسو (لايكون بنتي فيها شي مايبون يعلموني ؟؟!)
دفع الحساب وطلع ركب سيارته و اتجه المطار حجز اقرب رحله لسعودية على الفجر تقريباً دق رقم ملاك عدت مرات لاكنها مازالت مبلكته قلبه بدا ينغزه والخوف على بنته يتلبسه ...رجع الفندق جهز شنطته واتجه المطار مافي صبر يبي ينتظر لموعد الرحلة ،،،
بعدة صلاة الفجر اقلعت الطائره للمملكه العربية السعودية ...وصل على الساعه سابعه صبحاً ركب سيارته واتجه البيت وطول هالوقت وهو قلقان كثير وافكار توديه وتجيبه ...
دخل لصالة العائلة شاف امه وابوه وهدى يفطرون الكل استغرب من دخوله المفاجئ ام صالح وقفت بخرعه/ يا ساتر صقر وش فيك؟
صقر اقترب لها وهتف بتقصد / ليش وش فيني مشتاق لكم وجيت؟؟
ابو صالح بتسال وهو يشوف صقر انحنى على راسه وباسه / يابوك قل الصدق عسى مافيك شي ؟؟
صقر من بعد ما باسه على راسه مسك كفه
وباسها / والله مافيني شي يا الغالي بس جاي بسلم عليكم
صقر سلم على امه وعلى هدى وجلس معهم على وجبة الفطور يحاول يدرس ملامحهم من بعد ماخلصو سال بصوت حازم/ انتم فيكم شي مخبينه عني ؟؟
ام صالح توترت / وش نخبي يامك ؟؟
صقر بذات الحزم / انا اللي اسالكم يومه انا اعرفك عدل لا توتري بس قولي بنتي فيها شي؟
ام صالح انتفضت بجزع / بسم الله عليها لا انشاءالله
صقر شعر براحه اهم شي عنده بنته لاكنه مازال مستغرب / اجل وش صاير ؟؟
ابو صالح ينهى النقاش/ مافي شي يابوك بس تقهوا تقهوا
هدى تمد له فنجال وتبتسم بحب / بنتك لو تشوفها ماشاءالله عليها طالعه مثل القمر
صقر ابتسم بلهفه/ والله اني متشفق على شوفتها
ام صالح بحنان / نام يامك واضح انك سهران لاصحيت يكون خير
صقر قطب جبينه راد بحده / ماني نايم قبل ماشوفها هدى روحي جيبيها للي
هدى الحين هي من توترت / الوقت بدري الناس نايمه خل لين انت تنام و تصحى وتبشر
صقر نزل فنجاله بصرامه / بتجيبينها ولا بروح لها انا؟؟
ابو صالح تنهد بطولة بال/ روحي ياهدى جيبي بنته يسلم عليها
هدى بتردد/ مادري عن ملاك يمكن...
صقر بمقاطعه غاضبه/ خليها تفتح فمها بس وشوفي وش راح اسوي فيها
ام صالح تنهدت / عين خير يامك
هدى قامت لبست وراحت بيت عمها طقت الباب وفتحت لها نهيل وهي مرعوبه من جيتها على وجه الصبح هدى بخفوت / صباح الخير ياعمه
نهيل بذات الخفوت /صباحك نور عسى ماشر؟
هدى تنهدت وهي تهتف بذات الخفوت / صقر موجود ويبي يشوف بنته
نهيل انتفضت برعب حقيقي/ وش يبي فيها لايكون درا عن سوات ملاك؟؟
هدى تطمنها/ لا مابعد درا بس يبي يسلم عليها
نهيل بتاكيد/ اكيد يا هدى؟؟
هدى بعتاب / افا يا عمه بكذب عليك و الله انه يبي يسلم بس ولا علم بشي للحين
نهيل ارتاحت / الله يطمن قلبك اجل اصبري بجيبها لك مدام امها نايمه لو تدري سوت لنا مناحه
هدى تهز راسها بتفهم/ زين تسوين وانا احاول ماتاخر ارجعها قبل تصحى
نهيل دخلت لبست مسك وسوت لها رضاعتها ورجعت لهدى وهي تهتف بحرج / يامك العذر منك خليتك واقفه بالحوش نسيت لا قول ادخلي
هدى تبتسم وهي تشيل مسك/ معذوره وانا مستعجله وراي صقر معجلني بعد
نهيل تمد رضاعتها/ هذا حليبها لو اشغلتكم وهاذي لهايتها
هدى تبوس بمسك / يا ماشاءالله عليها تفتح النفس
نهيل تبتسم / بس لاصاحت تسد النفس قشرا مثل امها وابوها
هدى تضحك وهي تتجه الباب/الله يصلح حالهم
وصلت هدى ومدتها لصقر وهو اخذها منها بالهفه عميقه يناظر بملامحها اللي كبرت شوي وزانت اكثر ابتسم بتسال/ ماشاءالله ماسرع تكبر ؟
ام صالح تبتسم بحنيه / لها شهر الحين وكل شهر بتكبر وتغير
صقر مال لها وباس خدودها من يمين ومن يسار وقلبه كل ماله يزيد دقاته ريحتها ملاك ملامحها ملاك فتنته هالصغيرة مثل فتنت امها رجع باسها مع كل مكان بوجها لين انفجرت بصياح وهو انتفض
بخوف / هاذي علامها؟؟
هدى تمد له الهايه /مالومها اكلت وجها بحبحبتك
صقر يضمها على صدره بخفه خايف على صغرها بين يديه / لا تلوميني يا هدى قسم اني ملهوف عليها تقل عايشه معي سنين وعمر
ام صالح بامومه صادقه / الله يخليها لك ماتنلام يامك مسوكه تنحب
ابو صالح ابتسم / مسك يا زين الاسم وراعيته
صقر ابتسم لابوه بتسال / اعجبك اسمها يابوي ؟
ابو صالح بتاكيد/ اي بالله انه اسمن زين من زين مسميتها
صقر صمت من طاري مسميتها ملاك /...
هدى تغير الموضوع / بترجع دبي ولا خلصت ؟؟
صقر يتنهد بحيره /والله مادري باقي اخر سبوع للي افكر ارجع ولا اسحب مايضر
ام صالح برجا امومي /اسحب يامك افتك من هالشغل البعيد
________________________________
عند ملاك صحت وهي تقوم منحنيه تطالع سرير بنتها فاضي ابتسمت توقعتها مع امها ... راحت الحمام غسلت وفرشت اسنانها وهي طالعه تنشف وجها بالفوطه شافت نهيل بصاله تجهز الفطور قطبت جبينها وهي تلفت /وين مسوكه؟
نهيل توترت / تعالي افطري
ملاك بفطانه تعرف توتر امها لذالك عاد السوال /يومه وين مسك؟؟
نهيل تنهدت بطولة بال/ جت هدى وخذتها عمك بيسلم عليها
ملاك طارت عيونها بغضب/ كيف وليش ماقلتي للي يومه من اللي طلب مسك من؟؟؟
نهيل ترد بزفرة/صقر بيسلم على بنته نرده بعد ؟؟
ملاك انهارت بصراخ / بينتقمون مني بيذبحون بنتي عشاني رديت ابوهم وانتي مشتركه معهم بنفس الجريمه
نهيل تخرعت / ملاك انتي انهبلتي صقر مادرا عن شي هدى حلفت تقول بس يبي يسلم عليها
ملاك بمقاطعه منهاره / انتم مجرمين والله لاخذ بنتي ونحاش منكم بتذبحون ماتخافون الله انا وش سويت فيكم تعاقبوني وش سويت ؟؟؟
نهيل بكت بحرقه /ملاك استهدي بالله يامك وش هالكلام
ملاك تاخذ شرشف الصلاة / بروح الحق على بنتي قبل يقتلونها والله ان اذبحوها ماسمحكم حتى انتي حتى انتي
نهيل تشد كفها/ يا ملاك يامك هدي وين تروحين تبين صقر يذبحك انتي ؟؟
ملاك تنفض يدها و تبتعد منها /اجل يذبح بنتي هذا اللي انتم تبون اكرهكم اكرهكم
مازن دخل برعب /شفيكم وش صاير ؟؟
نهيل تبكي /صقر اخذ بنته بيسلم عليها وهي جتها حالتها
مازن بحده / انتي شفيك تراك اشغلتيني بنتك ماحد ذابحها هذا وسواس براسك
ملاك انحنت و اخذت ترمس الشاي ورمته بالارض انكب بحرارته وهي تصرخ / بس مابي اسمع كلمه منكم لا اذبح نفسي وريحكم مني بس بس
نهيل ارتاعات /خلاص اهدي اروح اجيبها الحين اهدي اهدي
ملاك ترفع اصبعها بتهديد / قسم بالله ان صار فيها شي ماراح تشوفون رقعت وجهي مره ثانيه تفهمون
مازن يهديها وهو مخترع / تطمني بنتك بخير روحي يومه جيبيها
نهيل تلبس عباتها وتطلع ومازن هتف لملاك
برحمه /الحين تجيبها امي بس اجلسي ارتاحي
ملاك بغضب وعيونها مليانه دموع /اطلع برا برا
مازن طلع بصمت ودخل جناحه شاف وفا طالعه من الحمام بروب للاستحمام وتسال/شفيهم اهلك يتصايحون من صباح الله خير ؟؟
مازن جلس بارتباك / ملاك تصارخ عشان صقر اخذ بنتها يسلم عليها
وفا طارت عيونها وهي تقترب له / صقر هنيه متى جا؟
مازن يرفع كتوفه / مادري والله بس امي تقول خذو بنته بيسلم عليها
وفا بتسال وحقد /عرف باللي سوته ملاك مع ابوي؟؟
مازن يقطب /ماتوقع لو عرف كان صارت علوم
وفا تتجه غرفة الملابس / انا اللي بروح اعلمه
مازن وقف / وفا لا تدخلين بشي مرده بيدري
وفا طنشه / اقول اطلع منها انت بس
__________________________________
ليلة البارح من بعد ماتعشو بمطعم هندي راقي
رجعو للبيت وراحت معه لجناحها على طول لانها متاكده ان جدتها وامها نايمات بذا الوقت وبذات
ان وراهن تجهيز وعرس من بعد مالبست لها بجامه حرير وتمدد على سريرها اللي اشتاقت لنوم فيه
الا فهد يتمدد بجوارها من بعد مالبس هو بعد بجامته فتح حضنه ونادا عليها بنبرة خاصة / تعالي املي للي حضني
مهره اشرت له بنفي/ مابي اجي وحنا اتفقنا وخلصنا
فهد رد بصوت حازم / وانا قلت بخلف الاتفاق ؟؟
مهره ترفع كتوفها بساطه /مادري ؟
فهد تنهد بطولة بال / تعالي خلصيني
مهره رفضت بصرار / بنام مكاني ممكن لا تقرب للي
فهد نفذ كل صبره اقترب لها وسحبها بالغصب
لحضنه وهمس لها بذات النبرة الخاصه / ماني خابرك عنيدة وش جاك؟؟
مهره استرخت بحضنه بسكينه / اللي جاني كله من وراك انت جرحتني كثير
فهد شد احتضانها وكانه يعبر عن ندمه باللي صار /...مهره تنحنح / احم فهد والله مرهقه بنام بكرا لازم اصحى بدري
فهد هز راسه بتفهم / نامي يا مهره
مهره بهدو /ممكن تبعد عني ؟
فهد انحنى وباس انفها وابتعد معطيها ظهره /...
مر من الوقت وكل واحد موجه الثاني ظهره ولا حد منهم نام كلن بعالم اخر بس فهد عاجز يتحمل ان تكون مهره معه على نفس السرير وريحتها قريبه له ولا يبرد لو شوي من شوقه فيها
مهره انتفضت على حرارة انفاسه عند اذونها وهمسه الحار / يازين النومه بحضنك لو كانت ناقصه
مهره لفت تطالع بعيونه القريبه من عيونها/ فهد حنا وش اتفقنا عليه ؟؟
فهد بحراره اعمق / ماذكر شي
مهره تحاول تنفلت منه / اجل اروح انام عند جدتي عشان تذكر اتفاقنا
فهد كان لازق صدره بظهرها ويديه محوطه خصرها ويهمس لها باشتياق / والله ماني مسوي شي بس ابي اشم ريحتك من قريب وحس بحرارت ضلوعك بين ضلوحي
مهره ارتخت بين يديه مستغله الفرصه / فهد ممكن اطلب منك طلب؟؟
فهد كان دايخ دوخان ماهو طبيعي / انتي تامرين ماتطلبين
مهره مالت راسها على صدره / اكيد يا فهد ؟
فهد رفع يده وحده وابعد الخصل من نحرها / مهره والله لو تطلبين روحي بالوقت هذا ماغلت عليك
مهره دق قلبها من كلامه / بكرا البنات بيسون مكياجهم عند الصالون ودي اروح معهن ؟
فهد باس نحرها / وليش ماتسوين هنيه ؟
مهره تنهدت بزعل / ماعرف وبعدين انت قلت تامرين يلا نفذ
فهد اقترب لها اكثر/ ابشري بنفذ كل شي تبينه بس البسي للي القميص اللي شريته لك اليوم
مهره توترت / فهد ارجوك لا تخليني اندم اني جيت ونمت معك
فهد صر على اسنانه / يا بنت افهمي انا ماراح اكلك ترا ولا راح اسوي لك شي
مهره تلف وجها لوجهه ضاع الكلام منها وهي تشوف ملامحه قريبه منها صدت بسرعه خافت تضعف له
فهد بعد ماهو قادر يمسك نفسه ومتاكد لو استمر بقربها كذا راح يخلف الاتفاق وهو من يومه ماتراجع عن كلمته لذالك باسها مع نحرها بوسه عميقه يبي يتصبر فيها ابتعد معطها ظهره وهالمره حالف ماعاد يتراجع لها لازم ينام ويرتاح
بالصباح ...
صحت مهره لفت لمكانه شافته خالي منه
ماتدري متى نام ومتى صحى اللي تذكره انها نامت ليلة البارح وهو مازال يتقلب وراها...مهره انفضت الفراش
وقامت تحممت وتجهزت تبي تروح لصالون اللي فهمت من كلامه انه قال ابشري دخلت شافت الكل مجتمع سلمت وجلست وهي تسال جدتها/ امي وينها ؟؟
الجدة صيته تطالع فيها بتفحص /امك عند ام طلال راحت من فجت الضو
فاطمه تقهوا وتنغز / بتعونها يعني ولا بتفرج على تجهيزها ؟
مهره ردت بحده / ماهو طبعنا التجسس يافاطمه
فاطمه تطالعها من فوق لاتحت / اي انتم عاد طبعكم غير.
مهره انقهرت/ كيف غير ؟؟
الجدة صيته تقاطعهم/ ماهو وقته ورانا عرس
شوق كانت صامته وهي متوتره تخاف مايملى عينها بعد فهد احد وتخاف تعافه من اول ليله بينهم
مريم حاسه فيها/شوق انتي جاهزة نطلع الصالون ؟
شوق تطالع نوف بتسال/ هاه نوف تروحين معنا؟
نوف تاشر بايه / اي بخلي ولدي عند امي وبروح معكم
مهره بتسال /من بيوديكم؟؟
نوف ترد عليها/ ابوي يمكن
مهره هزت راسها برضا/اجل بروح معكم مدام عمي ناصر بيوديكم
الجدة صيته هتفت باستغراب ونست
الموجودين / رجلك يدري انك بتروحين؟
مهره ناظرت جدتها بنظرت عتاب / اي علمته
الجدة صيته صمتت وهي غير مقتنعه /...
نوف بحماس / اجل يلا نروح
شوق وقفت وهي ماهي مع العالم /يلا بلبس عباتي
فاطمه عيونها على مهره بغرابه/ انتي متاكده ان فهد راضي؟
مهره توقف وطنشها متجه لجناحها بتلبس عباتها/...
فاطمه بحره / قليلة ادب شلون تحقرني كذا
الجدة صيته تسكتها/اص انتي ولا كلمه ماتصبرين عن المشكل حتى وقت العروس ؟
_________________________________
صقر مازال حاط مسك بحضنه و يلعب عليها
و شاطف هدى اللي كل شوي تلح عليه تبي توديها لملاك خايفه تصحى وماتلقى بنتها وتصير كارثه
جاهم صوت طق على باب الصاله ابو صالح سال باستغراب/ من جاي بهالصبح؟
هدى تقوم وهي فعلاً توترت / بروح اشوف من
شوي ودخلت هدى معها نهيل بعد ما سلمت وسالت عن اخبارهم هتفت بحرج عميق عميق / والله ماني عارفه وش اقول بس ملاك منفعله تبي بنتها حاولت اهديها عجزت عنها
صقر رد بغضب حاد / بنتك الظاهر انها تبي تربيه من جد و جديد ؟
نهيل بذات الحرج / والله ان نفسيتها تعبانه حتى صارت تهددنا تنحاش
صقر صدم من كلامها/ تنحاش؟؟
نهيل دمعت عينها / مادري وش جاها والله انها تقوم من عز نومها تفقد وجود بنتها
ابو صالح برحمه / عطها البنت يابوك خل توديها لامها
صقر شعر بضيقه تغشاه من اللي سمعه عن ملاك تنهد وهو يوقف و يمد لها مسك ويهتف
بزفرة/ وصليها لامها لا يطق لها عرق وتموت
نهيل تاخذها وهي تعتذر منهم/ العذر من الله ثم منكم والله لو ماني خايفه من تهوراتها كان خليتها تصيح و تجلس
ابو صالح بصوت حازم / لا تعتذرين يام مازن وملاك ماهي مستمسكه بنتها من خلا الا من شين مرعبها
صقر زفر بغبنه / غلطه وطلبت من الله السماح وانتم ماتبون تنسون ؟؟
ام صالح بامومه / يامك ماحد معصوم من الخطاء
نهيل طلعت بصمت /....
هدى هتفت لصقر بتهدئه وهي تشوف عرق جبينه قام يصب من العصبيه / يا صقر لا تلومها ترا البنت صغيرة وماهي فاهمه الحياة يبي لها وقت تنسى
صقر جلس وهو متنكد/ ماصارت عاد اللي هي تسوي
شي كبير لا تبي ترجع و لا تبيني اشوف بنتي بعد ؟؟
دخلت وفا وهي تشتعل بالحقد وزاد بمصادفتها لنهيل راجعه معها مسك سلمت على صقر ولا ردت على نظرات ام صالح وهدى اللي يهددونها تسكت هتفت بتسال متقصد/ علمتو صقر باللي سوته ملاك مع ابوي ولا اعلمه انا ؟؟
ابو صالح زفر عليها بشدة /قص يقص لسانك يا قليلة التربيه
صقر قطب جبينه باستغراب من كلام وفا ومن عصبية ابوه المفاجئه وهو يسال بحده / وش مسويه ملاك ؟؟
وفا بغبنه / يوبه لازم يعرف والله لو نسكت و مانعلمه ماراح يسامحنا بعدين
ابو صالح وقف بغضب شديد / ان تكلمتي شقيت حلقك
صقر وقف وهو يامر بصرامه / بتقولون للي وش هي مسويه سويدة الوجه ولا رحت وطلعت الكلام منها بالقوه ؟؟؟
وفا صمتت خوف من ابوها وهي متاكده صقر ماراح يسكت يطلع العلم منهم بالقوه /....
صقر صرخ بصرامه اعمق/ بتقولون ولا شلون؟؟
ام صالح انفجرت مافيها تسكت اكثر / ابوك راح يمها يبي يجمع شملكم وهي عيت تقول لو ثمن رجعتي لصقر رجعت طالب للحياة ماراجعت
صقر نشف الدم بعروقه وعيونه غيمت بالحمار
و نفاسه ضاقت ضاقت لابعد درجه وهو يوجه سوال لابوه بصدمه / رحت لها للبيت ؟؟
ابو صالح رد بحزم / رحت اسلم عليها وكلمتها وهي تعبانه وما..
صقر بمقاطعه وجسمه بدا يرجف وعروقه تبرز/ تردك بزر يا مطلق الجاسر بزر ؟؟؟
وفا كملت ولاهي خايفه من احد / لا وتقول له ياعم مابغيته وانا ورع ولا ابيه وانا كبيرة النفس عايفته
ابو صالح يتجه لها بتهديد/ اطلعي لاطلع روحك اطلعي
وفا طلعت برعب من بعد ماوصلت العلم/....
صقر اتجه الباب كان ناوي على شين كبير لاكن اوقفه ابوه اللي حلف بصوت عالي /والله والله ان رحت يمها لاتبر منك لايوم الدين
صقر لف عليه بقهر حقيقي وهو يرد بعتاب
عميق/ تحلف علي عشانها عشان الكلبه الي ماقدرت جيتك ولا مكانتك؟؟
ابو صالح يهديه بحزم / اهدى وافهم السالفه عدل
صقر ينتفض نفض غير طبيعي حاس روحه بدت تنشلع من بين ضلوعه / ماهو انا اللي تقو علي مره وتكسر كلمة ابوي حرام حرم الارقاب اني لا دفعها الثمن غالي
ابو صالح انتفض بحميه / لا ياولد اللي يجيها ترا جايني يابوك كانك تقدرني اتركها عنك هي بزر وماتعرف الاصول
صقر فاير دمه / اسمع يابو صالح بنتي باخذها منها غصبن عليها وخلها هي تجلس معلقه لين تموت ماعاد للي خاطر فيها والله ان النفس عافتها
ام صالح برجا/لا يامك حلفتك بالله لاتحرق قلب ام على ضناها
ابو صالح يرفع اصبعه بوجهه بتهديد / والله يان اخذت البنت من امها اني ماسامحك طول من انا حي
صقر انتفض بجزع وغبن / يابوي انت علامك تكسرني بحلوفك لا تروح لها لا تاخذ بنتها وش تبي اموت بحسرتي عشان بنت اخوك ؟؟؟
ابو صالح نزل عقاله ورماه عند رجل صقر / اذا عقال مطلق الجاسر له قدر عندك اتركها هي وبنتها عنك
صقر رجع على ورا خطوه بصدمه من حركت ابوه
و بعده طلع بصمت مجبور /...
لفت ام صالح له بقهر /الولد بيموت من القهر من تحت راسها ؟؟
ابو صالح صرخ بغضب/كله منك انتي وبنتك ماترتاحن لين تهدمن بيته
صقر يدور بجناحه من لوعت القهر وطعن الجفا
عايفته وتقولها للجميع بكل وقاحه وترد طلب ابوه
عزالله انها ماتستاهل الحب ولا العشق اللي اهداه لها
يشعر بانه عافها صدق من اقصاها لين ادناها تمدد على السرير يحاول يهدي من نفسه وقهره لاكن بالاخير عجز يهدا اخذ مفتاح سيارته و اتجه اقرب بقالة شرا له كم بكيت دخان وركب سيارته فرغه بكت كامل بدقيقه واحده ؟؟
صقر اللي ماعمره حط الزقارة بفمه ولا يسمح لاي احد يدخن قدامه الحين صار يشربه بشكل غريب شكل مريض يبي يهدي من روحه المجروحه كل اللي سواه فيها ومازالت عايفته فهم انها طول الفتره للاخيرة كانت تجامل معه وتضحك على مشاعره ضرب صدره من يسار وهو يشعر بحزن وعتاب على نفسه ( الله يلعنك متى تموت وتريحني )
حرك سيارته يفر الشوارع شارع شارع والدخان ماطفى من بين شفايفه وحده ورا الثانيه ...سمع صوت اذان العصر نزل اقرب مسجد توضى وصلى ورجع ركب سيارته وهو يشعر بدوخه من السهر كمل 35 ساعه
ما نام ولا هو قادر ينام اصلاً مايبي يرجع للبيت حاس انه راح يقطع حلف ابوه ويروح يذبحها و يذبح نفسه وراها ...؟!!
اخر شي صفط سيارت على يمين الشارع ودق رقم مازن شوي وجاه صوته الخايف واضح/ هلا صقر ؟؟
صقر امر بحزم من غير حتى سلام / ود الجوال لاختك بكلمها
مازن تنهد / بس دقايق توي واصل البيت من ادخل اتصل عليك
صقر بحزم اغرب/ مازن معك عشر دقايق
مازن ينهى الاتصال/ تامر يابو مطلق
________________________________
دخل مازن البيت شاف امه بصاله متضايقه هتف بتسال/ وين ملاك؟
نهيل تاشر على غرفتها / هناك عند بنتها ليش؟
مازن يتجه لها/صقر بيكلمها
نهيل وقفت بخوف / وش يبي ؟؟
مازن رفع كتوفه / مادري عنه
نهيل دخلت وراه وهي تشوف ملاك حاضنه بنتها
و ماتنظر حتى فيهم مازن مد لها الجوال/صقر بيدق ردي عليه بيكلمك
ملاك هزت راسها برضا من غير رد/....
طلع مازن و نهيل معه بصمت /....
وشوي رن الجوال سحبت لها نفس وهي ترد /الو
جاها صوته المشتعل بالغضب / مطلق الجاسر لادخل مجلس الرجال الاشناب مايطلع الا بيد مليانه وانتي يا البزر تردينه وترجعينه مع الباب بيد فاضيه ؟؟؟
ملاك ردت بهدو غريب / والله لونه طالب رقبتي لا سلمها له من غير تردد لاكن اللي طلبه مستحيل يصير
صقر شعر بسكين غرزتها بين ضلوعه وهو يرد بصوت ملتهب / اصلاً انا اللي الحين مابيك والله لو تقدمين للي ماوراك ودونك مارضيت فيك نفسي عافتك وانا رجال عيوف لاكن عندي كلمتين وابيك تحطينهن حلق بذونك
ملاك ماتدري ليش نزلت دمعه حاره على خدها
من كلامه شعرت بالم بوسط وسط قلبها لاكنها ردت بتحكم مدروس/ وش الكلمتين ؟؟
صقر سحب له نفس وزفرة بشده و رد بصرامه / طلاق ماراح اطلق بخليك معلقه بذمتي لين تموتين وبنتي ماراح ترديني عنها ولو حاولتي مجرد محاوله تبعدينها عني لاسحبها منك وحرمك منها طول عمرك
ملاك ردت بذات التحكم / اصلاً مايهمني طلقتني ولا علقتني لاني عارفه انك ماراح تفرط بوحده مثلي وبنتي ابعد عنها يا صقر لا تحدني اهج فيها
صقر صرخ بغضب متفجر /انتي وش شايفه نفسك تعلميني اني مافرط بوحده مثلك والحين تتهددين تهجين بعد ملاك احشمي نفسك وثمني كلامك وعرفي ان ماردني عن رقبتك الا حلف مطلق اللي ماقدرتيه
ولا كان جيت وقطعتها لك
ملاك تنهد بطولة بال / صقر خلصت كلامك ؟؟
صقر بقسوه خاليه من الرحمه / لا طبعاً في خبر مهم ابيك تعرفينه
ملاك بتوجس وهي ماتدري ليش ارتعبت / وشو؟؟
صقر بذات النبرة القاسيه/ انا خطبت وحده تعرفت عليها هي و اهلها بدبي وزواجي قريب وابيك تعرفين انها تسواك وتسوى اشكالك
ملاك وقفت بانفعال وتسلط / ماهو بكيفك تفهم تزوج وتعيش حياتك وانا تعلقني طلقني و بقلعتك تزوج بدال الوحده اربعه
صقر شعر بانتصار من ردت فعلها المنفعله حاس من نبرة صوتها القهر اللي هو يتمناه فيها ورد بقسوه اعمق / انتي تبقين محرومه طول عمرك مني ومن غيري انا مابيك ابي البنت اخترتها بنفسي
ملاك انطحنت من الغير والوجع وهي ترد بتهديد
حازم / والله لو تسويها يا صقر لاخلعك حتى لو انخلعت روحي بعده
صقر بتحدي واثق / فيك خير اوصلي المحكمه وجربي يمنا صقر وش تسوي ؟؟
ملاك صرخت بغبنه / صقر صقر الو الو ؟؟!!
سكر السماعه بوجها جلست منهاره تبكي بشدة
خذت وقت على حالها واخر شي تلبسها برود غير طبيعي وهي تطمن نفسها( ماراح يسويها يبي يقرني هو مايقدر يعيش من غيري يبي يذلني له بس يبطي عظم )
______________________________
.....بقاعة النساء......
كان الكل كاشخ و متأنق والبنات كل وحده احلا من الثانيه لاكن مهره كانت اسطورتهن بجمالها وجسمها
فتنه تمشي على قاع الارض حاسه بفرحه كبيرة اللي فتكت من شوق وعثراتها بطريقها تو تحررت من خذت فهد وشوق وجدتها واقفات لها بالبلعوم واخيرً خلصت منها بعد الصبر فرج ....
الجدة صيته جالسه على صالة الرقص وتاشر لمهره تجي اقتربت وهي تنحني لها /امري ياجدة ؟
الجدة صيته بعصبيه / انتي يومك تروحين لصالون من ورا رجلك مابراسك عقل ماتعرفين فهد تبين اعرفك عليه ؟؟
مهره باستغراب / ياجدة والله اني معلمته البارح وقال ابشري
الجدة صيته تقرص عضدها العاري ومهره انقزت بوجع /اه جده علامك علي ؟؟
الجدة صيته بذات العصبيه / ماجاك شي يا سويدة الوجه فهد يتوعد فيك ولله يانه ناوي يسحبك مع رقبتك غير مادخلت بشاربه يعفي عنك لين ينتهى العرس
مهره تصلبت بصدمه / جدة انتي تكلمين من جد ؟؟
الجدة صيته زفرت عليها / ليش فاضيه انا عشان امزح معك ؟؟
مهره دق قلبها بخوف / وش قال سامحني ولا ؟
الجدة صيته بضيقه/ لا بالله يتوعد فيك و قال للي اذا ماتبين اروح اسحبها قدام الله وخلقه لا تدخلين اليله بينا لو انثر دمها قلت لا بالله ماني متدخله اذا هي طالعه من وراك تستاهل مايجيها
مهره جلست جوار جدتها وهي مهمومه/ ياجدة ورب اللي خذ ناصر اني مارحت الا برضاه هو قال ابشري الا اذا هو مايقصد وانا فهمت غلط مادري ؟؟
الجدة صيته تنهدت بضيقه/ والله اني عارفه انك ماتسوينها بس يمكن فهمتي غلط وهو يادافع مايتفاهمً
مهره بتسال مرعوب/ ماراح توقفين معي بتخلين عني؟
الجدة صيته هتفت بقلة حيله/ واعدته يامك بس كان بتسمعين كلامي عندي لك حل
مهره تسالها بتوتر/ وش الحل؟!
الحدة صيته تخفت لها/ اكسبيه بطريقتك لاجا فهميه انك مارحتي عناد حاولي تسوين حركات البنات الفطينات وهو ينسى
مهره قطبت /مافهمت شي وش حركات البنات؟!
الجدة صيته زفرت بنفاذ صبر / انتي علامك لحوح المشكله اني اعرفك عدل جريئه وموقعتن ولدي من طوله
مهره ابتسمت وهي تفهم عليها/ افا عليك ياجدة بس هذا المطلوب والله لاخلي يطخ من ساعته
الجدة صيته ابتسمت باعجاب / وكاد لاشافك كذا متزينه ماهو قادر عليك بس عاد انتي الله الله بالعلم الزين ماهو تضيعين علمي وتجيني تبكبكين
مهره تقوم واقفه وهي مازالت تبتسم / لا تشيلين هم
من بعد مانتهى الزواج وهذا مهره تدخل مع جدتها وامها للبيت وهي فعلاً متوتره من داخل وخايفه فهد يرجع لطبعه القديم ويضربها وهي ماعاد فيها تحمل ضربه زي اول وتسكت صارت حاره وشديده وتزعل بسرعه ام ماهر استاذنت وراحت غرفتها تبي تبدل
و ترتاح ومهره جلست بجناح جدتها تبي تحتمي فيها ماتبي تروح جناحها يتوحد فيها
شوي ودخل فهد عليهم وعيونه تقدح باشرار شاف مهره وقفت له ببتسامه عذبه وهي تهتف بترحيب مدروس / حي الله ابو عقاب
الجدة صيته جالسه صامته وكاتمه ضحكتها /....
فهد اقترب لها وهو يحاول يغض النظر عن فتنتها شد عضدها بقوه وهزها بتسال غاضب / من سمح لك تطلعين لصالون ؟؟
مهره بلعت ريقها / فهد انا البارح طلبت منك وانت قلت ابشري
فهد رد بصرامه غاضبه /. تبين تقوليني كلام ماقلته بعد؟؟
مهره بنبرة دلع / طيب عطني فرصه اشرح لك
فهد بذات الغضب وهو مازال شاد عضدها / انتي تبين اذبحك وتخلص منك قو راسك وتحسبيني بسكت لك تحومين وتجولين على كيفك ؟؟
مهره ناظرت بعيونه بوله / طيب نروح جناحنا ونتفاهم بينا
فهد صر على اسنانه / اص ولا كلمه شين وقوة عين
مهره هنيه نفذت تخطيطها ولا اهتمت باحد اقترب وحضنته وهي تهمس باذنه / بالجناح اراضيك
فهد ارتخت اعاصبه و تصلبت اقدامه و ارتعش فواده بس لعنها الف مره وهو يشوف ابتسامة الجدة صيته وهي تهتف بتقصد/ تراها مخبولة لاتسوي اكثر من كذا خذها لجناحكم و تفاهمو بينكم
فهد ابعد مهره عنه وهو يناظرها بتوعد / انتي ما بوجهك حياء؟؟
مهره بغيظ / والله مادري وش يرضيكم ان ابتعدت هاوشتوني وانا اقتربت هاوشتوني
الجدة صيته توقف وهي تبتسم / بلا ماعندك حل وسط يا تفصخين الحيا مره وحده يا دافع يا تغلين وتيبسين راسك
مهره ابتسمت بعذوبه / خلوني براحتي
فهد ضاعت علومه وهو يتجه الباب /الحقيني
الجدة صيته تضرب كتفها/ روحي له والله انك لعوب يا بنت ناصر
مهره حبت راس جدتها وهي تضحك متجه الباب
قبل تدخل جناحها سمت برحمان ودخلت شافته جالس على الاريكه من بعد مانزل شماغه وحرر شعره
اقتربت وجلست جواره وهي تهتف بهدو / فهد والله البارح قلت لك وانت قلت لو تامرين على روحي ماتغلا عليك توقعت انك راضي وبعدين اللي ودانا عمي ناصر
فهد ناظر فيها بعشق صادق / بمشيها هالمره لك بس المره الجايه والله لايصير شي مايرضيك
مهره تهز راسها برضا وهي تنهض تبي تروح تبدل بس يد فهد امسكت كف يدها ورجعتها جالسه وهو يطالع بانقتها بتفحص/ قلتي تبين ترضيني ؟؟
مهره ابتسمت بخبث / اي بس هونت
فهد قرب وجهه لوجها وهتف بنبرة مولعه / ماهو بكيفك تراجعين عن وعدك
مهره بدلع / لنفرض اني تراجعت بتجبرني
فهد حضنها بقوه وهمس لها / اي ماعاد انا قادر اوفي بوعدي اكثر من كذا خلاص
مهره تمسح على عارضه / فهد
فهد يبوس يدها اللي تمسح خده / عيونه
مهره همست بولع مولع / اشتقت لك
فهد مارد مارد تصرفاته هي اللي ردت عنه دمج شفايفه بشفايفها وروحه بروحها
_______________________________
يوم جديد ...
صقر مازال مواصل وكمل 48 ساعه ولا ذاقة عيونه طعم النوم قضى ليله كله بالتفكير والهواجيس
ودخان مايطفى من فمه حتى اصبح اصبح و الحسره اللي فيه لا يوصفها لا شكوى ولا يوصفها شعار ؟...
قرر واتخذ قرار مستحيل التراجع عنه يبي ينتقم منها يحرق قلبها اكثر من ماحرقت قلبه... ملاك اللي كان مايرضى عليها نغز الابرة الحين يسعى لقهرها الدنيا غريبه تغير من حال الا حال ولا حد يبقى على حاله ...
دق على سعود وقال انه بيسير عليهم هو وابوه وخوانه و بعد صلاة العصر وهذا هو يحاول يقنع ابوه يروح يخطب معه وابو صالح رافض بحميه / تبين اروح اخطب لك على بنت اخوي ؟؟
صقر بطولة بال وجسمه كله متعب / بنت اخوك
ما قدرتك عشان تقدرها تبي تروح معي يابو صالح تخطب بسلوم الرجال ولا ترا رحت وخطبت من نفسي ولا ني بحاجة احد
ام صالح تهتف لابو صالح بغضب/ علامك يا مطلق ماتبي تروح مع الولد تبي تحده على الردا ؟؟
ابو صالح يسال بضيقه / انت اكيد صامل ماهو
لا خطبنا ترجعت وفشلتنا عند الرجال
صقر بعتاب غاضب/ افا يا بوصالح وصقر عمره تراجع عن كلمته ؟؟
ابو صالح استسلم / الناس تعرفهم عدل من قبيلتنا ؟؟
صقر بحزم غريب / اعرفهم عدل و معاشرهم بدبي ونعم العائله بس ماهو من قبيلتنا من قبيلة الغانم
ابو صالح بمحاولة يغير رايه/ طيب ليش ماترجع بنت جاسم كانت مرتك وباخصها عدل
صقر تنهد بوجع / بنت جاسم قد حرمتها على نفسي
ام صالح بحزن / ليش يامك والله ان اميرة ذهبه
صقر ينهى النقاش/ هذا اللي صار والكلام مايرجع اللي فات الحين انا بروح لرجاجيل مواعدهم
ابو صالح سال بحزم / صالح وفالح بيروحون ؟؟
صقر رد بذات الحزم / ايه بيروحون
ابو صالح وقف /اجل يلا على بركة الله
راح ابو صالح وعياله وتممو الخطبه وابو سعود عطاهم من غير حتى شور بنته صقر له جميل عليهم وهو من اول متمني نسب مثل نسبه واللي فمهم من ابو صالح ان بنت عم صقر ماهي عنده وهو يبي يعف نفسه بالحلال وحددو معهم الزواج والملكه بيوم واحد بعد سبوعين وطلب صقر منهم اجر تحاليل الزواج من بكرا هو تحليله جاهز من زوجاته الثنتين
رجع صقر البيت وهو فعلاً طافي ماعاد يشوف طريقه من السهر والتعب اخذ له حبتين منوم وطاح ونام مايبي العالم كله يبي بس يعيش بين حلمه وخياله
______________________________
عند ملاك كانت عايشه بذات برودها الامس من بعد ماكلمت صقر ولا لها احتكاك باحد حتى بامها وخواتها
متوحده بغرفتها مع بنتها فقط لاغير؟...
امل بصاله تهتف لامها بهم على اختها / يومه ملاك صايرة ماتبي لنا ولا تكلم معنا ؟؟
نهيل تنهدت بوجع حقيقي/ مادري وش جاها بنتي من بعد ماعرفت ان صقر سلم على بنتها وهي حالتها تروع
حصه بتسال/ صقر مكلمها امس ماقالت وش يبي منها ؟؟
نهيل تهز راسها بنفي / عيت تكلم بس متمسكه بنتها وحابسه نفسها بهالغرفه
امل دمعت عينها/ والله اني ولهانه على ملاك وضحكها وسوالفها تغيرت كثير
نهيل تطمنها/ يامك هاذي فتره وتعدي من ضغط الولاده وهم الزواج يمكن لاطلعت الاربعين تزين نفسيتها
امل بتسال/ كم باقي وتطلع ؟؟
حصه ردت وهي تحسب بصابعها/ يومين ثلاث ايام باقي لها خمس ايام
نهيل تهز راسها بتاكيد/ اي خمس ايام عاد مدري بتكمل مدرستها ولا لا اخاف تتركها عشان بنتها
امل طار قلبها/ لا مستحيل ملاك تنازل عن دراستها
حصه بخفوت / يومه لازم نطمنها ان بنتها بامان عشان تدرس وهي مرتاحه حرام كذا متاثره احسها مرعوبه
نهيل بقلب محروق / حسبي الله على من تسبب فيها
وفا تدخل وهي تبتسم / مساءالخير
الكل استغرب من جيتها ومن ابتسامتها الغريبه لاكن ردو بهدو/مسا النور
وفا بتسال / ملاك وينها؟؟
نهيل عرفت ان وراها شي/ وش تبين فيها؟؟
وفا ترفع كتوفها بساطه / كنت بعطيها خبر جديد وحصري
حصه بغبنه / وش الخبر يا وفا خلصينا ؟؟
وفا بحقد واضح/ صقر خطب اليوم وملكته وزواجه بعد سبوع حياكم الله ترا انتم اول المعزومين
نهيل وبنتها انتفضن بتسال واحد / خطب ؟؟
وفا تتجه الباب / اي وحده تعرف عليها بدبي ويمدحها ادعو له بالتوفيق
نهيل ضاقت انفاسها/ هاذي صادقه ولا تستهبل
حصه ماهي مستوعبه / شكلها صادقه واضح من كلامها
امل برعب / ملاك لو تدري راح تقلب الدنيا فوق راسه
نهيل تخافت معهن بحرص / يويليكم احد يطري لها شي بنتاكد اول يمكن هاذي تكذب علينا
امل تقوم / اسال شذى وهي تعلمنا
حصه تايدها / اي روحي كلميها سرعه وصيها ملاك لاتدري عن شي
نهيل بغضب/ والله كان طلع صدق لايطلقها غصبن عليه
حصه تهديها/ يومه اهدي ترا اللي سوته ملاك مع عمي يزعل تلقينه من القهر يبي يقهرها
شوي وجت امل وجها شاحب /...
نهيل تسال بحده /شقالت؟؟
امل بكت وهي تحاول تكتم شهقاتها/يومه صحيح خطب وعرسه بعد سبوعين
نهيل توقف ونار تولع بصدرها / والله ليطلقها انا بروح اتفاهم معهم
حصه تقوم تمسكها/ يومه نصيحه ابعدي عن المشاكل مانتي راده رجال عن كلامهم
نهيل بحرقه / وبنتي اخليها معلقه
حصه بواقع/ هي اللي رضت وقالته لهم الله يوفقه خلوه يتزوج
نهيل جلست بقلة حيله وهي تدعي من قلب / يارب لاتوفقه يارب تحرق قلبه مثل ماحرق قلبها على صغر سنها شيب فيها
_________________________________
تحياتي (شغف)...