ادعو لوالدي برحمة والمغفرة..
لبيه ياريح المطر والسما غيم..
ولبيه ياصوت المطر بعد غيبه ..
...بعد مرور شهرين ...
و على بداية دخول موسم الشتاء .....
ملاك حملها صار له اربع شهور خف وحامها وبدت تحب الاكل وكل يوم طالبه شي تاكله زاد وزنها شوي
مع بروز بطنها خفيف وزيادة الوزن معطتها شكل جميل صحه وتروي واشراق ....
نهيل تنشف وجها بمناديل ورقيه من بعد ما توضت لصلاة العصر وقفت وعيونه طارت على ملاك اللي جالسه عند الدفايه وتاكل بملعقه من كاس النوتلا
صرخت فيها / انهبلتي انتي تبين تجيبين لنفسك السكر ؟؟!
ملاك تاكل بتلهف /يوم عجزت اقاومها
نهيل تاشر لها تجيبه /اقول هاتيه تبين تنتحرين انتي الظاهر
ملاك بوزت بطفولة / يومه تكفين
نهيل انحنت لها واخذته وهي تسمع صوت الباب يطق /امل يا امل افتحي الباب
جت امل تركض / طيب طيب
ملاك تطالع امها بتسال / كم بقى و تطلعين من الحداد ؟
نهيل تنهدت براحه / مابقى شي اقل من سبوع يالله لك الحمد
ملاك تبتسم/ الحمدلله
نهيل تذوق من النوتلا / يوه مالومك فيها لذيذه
ملاك تضحك / رجعي نوتلتي لا تقضين عليها
دخلت امل وهي ترحب / حياك الله ادخلي
ملاك و نهيل لفو باستغراب من جاي هالجزه بس مسرع ماوقفت ملاك بفرحه / هلا والله شذى
شذى تقترب لها وتضمها / اشتقت لك للي سبوعين ماشفتك
ملاك تضحك / قسم تقل سنتين
نهيل تسلم على شذى /متى جيتو من عمانك ؟
شذى ترد وهي تبتسم / والله مالنا ساعه وهذا انا جيت يمكم على طول
نهيل تبتسم / الله لا يفرقكن
امل تطالع امها باستغراب /يومه علامك اخذه نوتلا ؟
نهيل تطالع فيها وتاشر على ملاك / اختك بتذبح عمرها باكل النوتلا وبرنز هذا
ملاك بدهشه / وشو برنز ؟
نهيل بعفويه / الايسكريم هذا مدري وش تسمونه
امل وشذ يضحكون وملاك ترد وهي تضحك /باسكن روبنز قصدك
نهيل تاشر براسها / اي ذبحك بس تاكلينه
امل ترد عنها/ يومه وحام غصبن عليها
نهيل تنهدت بحنيه / يامك كله سكريات تضرها ماتنفعها
