بداية الشتاء وبداية البرد وبدت ترشرش وتمطر
مع صوت الرعد وكهربا البرق
الجدة صيته حاطه دفايتها قبالها وماده رجولها اللي عليهم شرابات دافيه وتدعي /اللهم اجعله صيباً نافعاً غير ضار
مريم تمد يديها لدفاية/ ياربي يصوت الرعد ياربي ترحمنا وتنجينا من عذابك
الجدة صيته تزفرها /هاذا صوت رحمه ماهو عذاب وان شاءالله تسقي البلاد والعباد
مهره جالسه بزاوية وتشد احضان الجاكيت بالون الزيتي عليها من البرد والجدة صيته تنادي لها بحنيه/تعالي يامك اقربي عند الدفاية
مهره تقوم وتجلس قريب لجدتها وتهمس برعب/ يومة صوت الرعد والمطر يخوف
الجدة صيته تحط كفها على كتوف مهره وتشدها لحضنها/الرعد ما يخوف وانا امك وحنا بخير وعافيه بيتنا وبامان وسلام و حافظنا ربنا كيف المساكين اللي بخيام لا بيت يحتويهم ولا دفايات ان شبو نارهم طفاها المطر وان دخلو خيمتهم غرقهم الماء
شوق بندماج مع الجدة صيته وترد/ياربي مساكين مايخافون يغرقون ولا يجمدون من البرد
الجدة صيته ترفع يدها وتاشر لسما/ربك فوق ارحم مني ومنك هو اللي يتولى امرهم
حسنا جت تمشي ومعها الكرك /شكل الكهربا بتطفى والله من البرق
مهره انتفضت برعب /تطفى ؟!
الجدة صيته تحضنها وتحط راسها بحضنها/بسم الله عليك ماهو صاير شي انتي بس اذكري الله
ام ابراهيم تطالعها بنص عين/وخري لا تكسرين رجول عمتي بس
مهره حاولت تبعد من جدتها بس الجدة صيته شدتها لها بحنان وترد على ام ابراهيم بحزم/ماحدن شكى لك الحال عشان تدخلين بينا
ام ابراهيم بجزع/هاذا جزاي خايفه عليك وعلى رجيلاتك
حسنا تغير الموضوع /الا ابراهيم ملزم يعرس بالبرد
ام ابراهيم بقلة حيله/ عجزنا عنه نقول له اصبر وقت برد ومطار وطلعات وبران ماهو وقت عروس بس مايفهم
الجدة صيته بحزم/ لا توقفين بوجه الولد يا فاطمه خليه يعرس مافرقت برد ولا حر
حسنا تصب كرك بالكسات اللي قدامها بصينه/الا والله تفرق لو جاء مطر ليلة عرسه وطفى الكهرباء والله لانتوهق بالناس
ام ابراهيم تاخذ كاسه وترشف منها/بكيفه يتحمل
هو مدامه يبيه بالبرد
الجدة صيته تمسح على شعر مهره اللي بحضنها بحنان وتكلم بتسال/نوف وينها ؟!
حسنا تمد اخر كاس لشوق اللي تطالع بمهره بغيرة وحرقه وترد حسنا /داخل تذاكر لعبدالله
