ادعو لوالدي برحمة والمغفرة..
لبيه ياريح المطر والسما غيم..
ولبيه ياصوت المطر بعد غيبه ..
ابتدا العزا بديوان الشيخ مطلق من بعد ما ودع اخوه الوداع الاخير هو عياله وعيال اخوه ودفنوه وصلو عليه
غاب الذي بالمد ماعنده حدود،،،
غاب الذي ماقد يوم عن شي عيا ،،،
ابو صالح كان جالس بالعزا بتفكير وصمت ودموعه كل شوي تخونه وتنزل على خده ومازن وماجد وجاسر مانشفت دموعهم من بعد ما دفنوه دفنو الضلع الثابت لهم ..
عيال ابو صالح قايمين بالعزا وبالمعزين وقلوبهم على ابوهم خايفين عليه وعلى صحته وصقر كل شوي يرفع جواله ويرسل لدكتوره هانم يسالها عن ملاك وبلغته انها صحت و صامته من غير انهيار واختها مرافقه عندها استاذن وراح للمستشفى يبي يطمن عليها ويرجع يكمل العزا
عند الحريم العمه مزنه كانت جالسه وتبكي بحزن
من جت ودموعها مانشفت على فراق عضيدها
و اخوها الصغير و نهيل قلبها مشغول على ملاك وكل شوي تدق على حصه تسال عنها واللي قايمات بالعزا بنات ابو صالح وامهن متوزعات نص بيت ام ماجد ونص بيت ام مازن وشذى قلبها على صديقتها
من عرفت انها بالمستشفى وهي تبكي عند امل
وامل تبكي عندها
______________________________
بالمستشفى ...
ملاك صامته وماهي قادره تستوعب فراقه تشعر كل اللي صار حلم واذا رجعت البيت بتلقى ابوها كل عاده قدام القهوه ويسندها ويوفق معها و بخطاها يدور لها عذر حتى ولو ما اعتذرت..
(سيبقى رحيلك ياطالب وجعاً يمزقني وهم لايشعرون)
حصه تمسح على شعرها بحنو / ملاك لازم تصيرين قويه امي بحاجتنا تكفين ارجعي لقوتك
ملاك ترجع راسها لظهر السرير / قوتي انهارت ماعاد فيه قوه راح اللي كان معطيني القوه والامان
حصه تحاول تكتم شهقاتها / الله يرحمه
ملاك بغصه والم عميق/ دفنوه وانا ماشفته راح وانا ما شبعت منه ولا ودعته يا حصه ما ودعته
حصه تلبس نقابها وهي تسمع صوت تنحنح صقر الثقيل /احم احم
حصه تهتف بصوت خجول / حياك
دخل صقر بهيبه وكان لابس ثوب ابيض وشماغ ناسفها
من تحت ذقنه على كتفه وعيونه على ملاك /سلام عليكم
ردت هي و اختها عليه بهدو /عليكم السلام
صقر هتف بتسال حاني /شلون صرتي ؟
ملاك ترد بصوت مكسور / صرت يتيمه
حصه طلعت برا الغرفه و صقر انتفض من كلمتها
و انحنى حاضن راسها على صدره / يتيمه وانا موجود اصير لك اب لو تبين
ملاك ترد ودموعها تنزل على خدها وتحرقه/ ماحد يجي مكان طالب
صقر ابعد راسها من حضنه بحنو وناظر
بعيونها / خليك مؤمنه وادعي له بالرحمه والمغفره هو محتاج دعاكم
ملاك بحزن والم/ ليش يدفونه وانا ما ودعته
صقر مسح على شعرها / وش لك بوجع القلب
ملاك عضت شفايفها وسكرت عيونها تحاول ماتنهار كفايه نهيارات من البارح و مارجع لها اللي فقدته؟...
دخلت العنود وقفت بغصه وهي تشوفه منحني لملاك ويمسح على شعرها الاسود تقدمت تسلم بغنج /سلام عليكم
صقر اعتدل واقف ولف لها يرد السلام من غير
نفس / عليكم السلام
العنود تناظر بملاك اللي تبادلها النظرات /عظم الله اجركم بفقيدكم والله تو دريت
صقر صاد النظر عنها / اجرنا واجرك
العنود بغنج مايع / دكتور صقر اذا احتجت شي انت ولا ملاك ترا انا بالخدمه
ملاك تشيح بوجها ولا لها خلق على المداحره معها ولا هو وقته اللي فيها مكفيها و صقر رد بثبات / مشكوره
العنود تقترب لملاك وهي تحرك المغذي بعبث وتهتف بصوت مايع / لاباس عليك وترا انا قريبه عندك لو بغيتي مني شي
ملاك تطالع فيها من فوق لا تحت / ممكن تطلعين برا
العنود طالعت صقر بدهشه وهو فتح عيونه على الاخر من سلوب ملاك الجريئ حس وده ينفجر ضاحك من شكل العنود اللي طلعت بخطواته سريعه وزعلانه
ناظر ملاك وهتف لها بحزم / عيب اللي سويتيه البنت تبي تخدمك تقومين تطردينها ؟
ملاك عطته نظره قارصه / اذا خايف على مشاعرها اطلع وراها
صقر رفع حاجبه / وتطرديني انا بعد ؟
ملاك تمدد كامل وهي ترد من غير نفس / ترا مالي خلق لنقاش اللي فيني يكفيني
صقر انحنى وغطا جسدها / مافيك الا العافيه باذن الله بس صيري قويه
ملاك تهتف بتعب / بطلع سو للي خروج بروح لامي
صقر يهز راسه برفض/ اليوم لا بكر تطلعين
ملاك تزفر عليه / وليش بكرا و انا مافيني شي ؟
صقر هتف لها برجا / يا حبيبتي اتركي الحنة انتي محتاجه ملاحظه لين بكرا اذا مافي انهيار طلعناك
ملاك بتافف / اوف خلصت كل طاقتي مافي نهيار خلاص
صقر ينهى النقاش وهو يستعد للخروج / ديري بالك على نفسك بروح العزا ورجع لك باليل
ملاك صمتت وطاري العزا يمزق قلبها الصغير
______________________________
الساعه 11 ليلاً ...
دخل البيت هو وعمانه من بعد ماجو من عزا اخو الشيخ مطلق وابو ابراهيم يتجه جناحه/تصبحون على خير
وابو نواف وفهد /وانت من اهل الخير
ابو نواف مسك كف فهد / يا عمك شوري عليك فكر بالمشروع عدل قبل لا تسافر ترا القبيله واهلها بحاجتك غيابك شهر ماهو بسيط
فهد تنهد وهو يشد كف عمه/ ياعم القبله بمانتك انت وعمي محمد وباذن الله مايتغير شي بغيابي وبعدين المشروع كبير ويطلع خير اذا الله بارك فيه
ابو نواف هز راسه باستسلام / الله يوفقك ويسهل دربك
فهد يحب راسه / امين يارب يكفيني دعاكم
ابو نواف بابوه /ومتى السفر ؟
فهد / بعد يومين باذن الله
ابو نواف يتجه لداخل/ تصبح على خير
فهد دخل جناحه وعيونه تجول المكان الخالي منها زفر بضيقه وهو عارف انها ماراح تبات بجناحها من بعد اللي صار اليوم جلس على الاريكه ورمى شماغه بجواره ومسح شعره على ورا بكف يده السليمه ونزل يده مريحها على فخذه وتفكيرة بحالهم يصلح يوم
ويسوء سبوع متى بتزين الحياة بينهم متى يقدر يسيطر على عصبيته ويطنش تفكيرها وغيرتها ومتى هي بتكبر عقلها وتثق فيه وتترك الافكار الصغيره عنها ؟...
هتف بتافف و بهم / اف كيف بنام الحين وانا ماتطمنت عليها ؟ تقدر تنام بعيده عن حضني وهي مره وانا رجال بطولي ولاني بقادر انام بعيد عن حضنها لازم اتصبر وخليها تتادب على طولة لسانها وقلة ادبها
انا شايف انها زايده الفتره هاذي تدلع و تغنج علي عشان اراضي فيها ؟
فهد تنهد وطاري دلعها وذكرى غنجها يلتمس في شي غريبه ولهفه لها تنهد للمره الثانيه / هاذي وش هي مسويه فيني لعنبو شكلها
قام واخذ له شاور ولبس بجامعه وراح لسريره يحاول يسيطر على نفسه و يطنشها
بجناح الجدة صيته ...
مهره متمدده بجوارها على السرير و لويتها ظهرها ماتبي تسمع احد ولا تكلم احد رفضت تبات بجناح امها و اخوها عشان مايعرف ان صاير بينها وبين فهد شي راحمه افكاره وقت الاختبارات
الجدة صيته متمدده على الطرف الثاني وعيونها على ظهر مهره وقلبها يتقطع على حال هالبنت متى ترتاح وتريحها متى فهد يعقل ويفهمها ومتى هي تعقل وتترك الغيرة عنها وش ناقصها عشان تغار من شوق هي اجمل بكثير الكثير منها واللي عندها زين مثل مهره وجسمها الا انوثي ونعومتها وبياضها المفروض ماتغار ابد تكون واثقه بس هي تنظر لوسامته الغالبه على وسامتها وتشوف انها ناقصه عنده
الجدة صيته هتفت بصوت هادي/ ادري انك مانمتي بس ترا البنت العاقله الفاهمة مهمها صار بينها وبين رجلها ماتنام بفراش غير فراشها
مهره ردت بصوت مبحوح / متضايقة من وجودي ؟
الجدة صيته تنحرها / انتي علامك منخبله لوني متضايقة منك طردتك بس انا مابي البعد يجي بينك وبين رجلك
مهره تنزل دموعها من غير لا ترد/....
الجدة صيته تنهدت بحنيه / يامك خلي عنك الوسواس الرجال يبيك و شاريك لاتخلين الشيطان يجي بينكم
مهره زاد بكاها وهي ترد بالم / يبي يعرس علي سمعتي كلامه ؟
الجدة صيته باسا من حالها / لونه بيعرس كان اعرس من مبطي بس هو يقول هالكلام يبي يخوفك
مهره تغطي وجها بالفراش / تصبحين ع خير
الجدة صيته ترد عليها بحنيه / وانتي من اهل الخير
طال اليل وطال الانتظار والجدة صيته غفت ومهره ماغمض لها جفن و افكار توديها وافكار تجيبها
________________________________
يوم جديد بالمستشفى ...
وتحديد بمكتب الممرضات العنود تفتح نقابها وهي تاكل قطعة حلا مسويتها سوسن زميلتها / لذيذ بسراحه ما ينقاوم
سوسن تبتسم /بالعافية جنى مدي يدك وخوذي قطعه
جنى تهز راسها بنفي/ لا مابي مسويه رجيم انا
العنود تطالعها بنص عين / امحق رجيم اللي يخليك تزيدين ماتنحفين
جنى فتحت عيونها على الاخر / امانه سوسن انا زايدة؟
سوسن تضحك / لاوالله انك نحفانه بس هاذي مخها ضارب ماتشوف عدل
العنود ترفع كتوفها/ كلن وله نظره
جنى بزفرة / كلهم يقولون نحفانه الا انتي حتى الدكتور صقر امس شافني ماعرفني تخيلي يقول جنى مشاءالله وش هالرشاقة
سوسن طارت عيونها/ صقر يعرف يمدح غريبه بالعادة شايف نفسه و مايرى الناس شي
العنود بغيظ/ والله مرته اللي شايفه نفسها و طويلة لسان اعوذبالله
جنى باستغراب/ وانتي وين شفتي مرته وش عرفك فيها؟
العنود تكشر من طاريها / هنيه مرقده بالمستشفى من امس
سوسن تقفز واقفه / احلفي بي غرفه بروح اشوف اللي الناس تمدحها
جنى ترفع حواجبها باستغراب / تعرفينها انتي ؟
سوسن بحماس/ لا بس مرت اخوي تعرفها و تقول مزيونه
العنود ترد وهي تغلي بالغيرة / يمكن مرته الاوله ؟سوسن تهز راسها بنفي/ لا بنت عمه الثانيه
جنى تلف للعنود بتسال /انتي شفتيها حلوه ولالا؟
العنود ترد من غير نفس/ روحو شوفوها الناس الذواق مدري
سوسن بتسال/ كم الغرفة ؟
العنود تطالع بجنى اللي وقفت بحماس بعد / رقم غرفتها 108
طلعت سوسن وجنى متجهات للغرفه طقن الباب طقتين وجاهم صوت هادي /ادخل
دخلن وعيونهم على اللي واقفه بنقابها قدام
السرير /سلام عليكم
حصه ترد بهدو /عليكم السلام
سوسن تهتف بتسال /هاذي غرفة زوجة الدكتور صقر ؟
ابعدت حصه عن السرير وهي تاشر على ملاك /اي هاذي زوجته ليش ؟
راحت عيون جنى وسوسن لمكان ماشرت عليه حصه و وقفن مدهوشات من الحوريه للي جالسه و ظهرها مركى لظهر السرير و قاطبه حواجبها باستغراب من نظرات الممرضتين لها كانن فعلاً ينظرن لها بتفحص
و عاجزات عن الكلام يشوفن صورة مرسومه من احسن الصور حتى اشهر الرسامين ما يرسمون دقت ملامحها مع البياض وصفى البشره والعنق اللي متناثر خصل سودا عليه والجبين الصغير الشفاف مقبوط والارهاق معطيها منظر مثير غريب
ملاك زفرت بتسال /شفيكم ؟
سوسن تنحنحت بحرج / احم ابد بس جينا نسلم عليك بما انك زوجة زميلنا
حصه ترد بموده / الله يسلمكم من الشر
جنى مازالت تناظر بملاك وتسالها / محتاجة شي تبين شي ترا حنا نعين ونعاون
ملاك تطالعهن باحتقار من فوق لا تحت وترد من غير
نفس/ ماني بحاجة احد
حصه حست بحرج وهي ترقع كلامها / ابد مانبي الا سلامتكم
سوسن ماعجبها رد ملاك وهي تطالعها بغيظ وترد على حصه بتسال / انتي اختها ؟
حصه تهز راسها / اي اختها
طق الباب وجاهم صوت صقر الرخيم /احم احم
سوسن ردت باستعجال/ تفضل يا دكتور صقر
حصه وملاك تبادلو النظرات بدهشه من جرائتها
دخل صقر عليه ثوب وشماغ ناسفها بترتيب ونظارته الشمسيه بخمبات جيبه من قدام وعيونه على جنى وسوسن وهو فاهم عدل ليش جايات يبن يتفرجن عليها بس هو شعر بغرور وثقة ان زوجته تشرف النظر عند زميلاته بالعمل هو مثل اي انسان طبيعي يحب يتفاخر عند الناس بالشي المميز اللي يدفعه للكبرياء
حصه راحت بزاوية الغرفه من الخجل وصقر تقدم وهو يسمع جنى تهتف / الحمدلله على سلامة المدام
صقر ابتسم غصبن عليه من كلمة مدام /الله يسلمك
سوسن بتسال / ليش ماقلت لنا انها هنيه نقوم بالواجب؟
صقر يرد بصوت ثقيل / ماله داعي فيه من يقوم فيها
جنى تبتسم / خايف عليها من اخطانا الطبيه؟
سوسن تضحك / من قلت لها نحفانه وهي مستخفه
صقر ابتسم مجامله وعيونه تروح لملاك اللي ماعجبها ابد نقاشه مع الممرضات و تستمع لهم بصمت وحصه كذالك مصدومه من جرائة الممرضتين معه ولاكن ما خفاها غرور صقر وتكبره عليهن
صقر ياشر لجنى بعمل /جنى جيبي للي اوراق الخروج من عند الاستقبال
جنى تهز راسها برضا / حاظر يا دكتور الحين اجيبهم
طلعت جنى و سوسن وقفت متنحه بملاك وعندها فضول تشوف تعامله معها هل هو مغرور مع زوجته مثل غروره معنا بس صقر ما عطاها فرصه وهو اذكى منها /سوسن شوفي للي الدكتورة هانم وينها؟
سوسن تتجه لباب بصمت /...
ومن طلعت بلغت الدكتوره هانم بطلب صقر وراحت لغرفة العنود شافت جنى جالسه عندها وتكلم
بحماس /ماتوقعتها كذا جميله جميله بالحيل
العنود حاطه رجل على رجل وعيونها تشتعل
بغيرة/ الدكتور صقر موجود عندها ؟
جنى ترد بذات بحماسها / اي واضح ميت عليها مالومه تاخذ العقل فل كامل ماشاءالله
سوسن تجلس وهي تشاركها / ماتوقعتها بذا الزين بس شايفه نفسها
العنود تهز رجلها / قايله لكم
جنى تنهد باعجاب /يويلي يحق لها انا لو عندي ربع زينها ماتنازلت لاحد
سوسن تعقد حواجبها بتسال/بس كانها صغيرة حيل على الدكتور صقر لاحظتي ؟
جنى تهز راسها/ اي والله فرق بينهم بس يمكن شكلها صغير
العنود تقوم واقفه / لا ماهو شكل بينها وبين صقر عشرين سنه
جنى وسوسن بصوت واحد /عشرين سنه ؟؟
العنود تهز راسها بتاكيد / اي شايب عندها
سوسن بتسال/ وانتي وش دراك؟
العنود تجه لباب /اخته صديقتي وقالت للي
جنى وقفت هي بعد بتوتر/ نسيته يبي ورقه خروجها
________________________________
قبل صلاة الظهر بساعه ...
طق باب جناح الجدة وجاها صوت فهد الخشن / ام عقاب
الجدة صيته تنادي له بخفوت /تعال يافهد
دخل وهو مستغرب من خفوتها ولاكن ماسرع مافهم وهو يشوف مهره نايمه على السرير قباله وجها وصدرها طالع من تحت غطى الفراش اقترب وحب راس جدته /صباحك خير
الجدة صيته ترد بخفوت /صباحك نور يامك
فهد يناظر بمهره ويرجع يناظر بجدته بتسال
خافت/ نايمه ؟
الجدة صيته تهز راسها / اي طول اليل ما رقدت
فهد تنهد بضيقة وهو يجلس مجاور الجدتة / تشوفين سواد وجها تترك جناحها وتنام عندك
الجدة صيته تهديه / يامك البنت زعلت من تهديدك لها بالعرس ومن البارح تبكي حتى ماراحت عند امها عشان اخوها مايشوفها
فهد يرفع حاجبه / انا ما اهدد انا اعطيها خبر يامره تعقل ولا لاحدن يلومني لا عرست عليها
الجدة صيته تهتف له برجا خافت / لا تقول هالكلام عندها ترا اللي فيها مكفيها
فهد لف يناظر بسرير وقلبه ملهوف عليها ورجع النظر لجدته / بكرا عندي سفر شوفي وش هي محتاجة عشان تبلغيني اجيبه لها قبل اروح ؟
ثم ردف بتوصيه و تهديد /وياك يا يومه تعتب عتبت الباب اذا انتي تحبينها وتخافين عليها لا تطلع من البيت ترا ان طلعت منه علي بالحرام ماعاد ترجع له
الجدة صيته انتفضت بخوف / لا يامك ماهي طالعه عندي انا وامها لين ترجع حتى ام ماهر بقول لها تجلس عندنا لين انت ترجع
فهد يوقف / اي لا تروح بيتها لين ارجع و اتفاهم معها
الجدة صيته تهز راسها / باذن الله لا تشيل هم انت
فهد يتجه الباب / تبين شي ؟
الجدة صيته ترد عليه وعيونها على مهره اللي غاطه بالنوم بتعب ولا هي حاسه باحد / سلامتك الله يحفظك
بعد الغدا رجعت الجدة صيته للجناح ومعها ام ماهر شايله صينية القهوه والشاي وعيونها على السرير الخالي وهي تحط الصينيه على الطاوله وتسال بخفوت / هي صحت؟
الجدة صيته تهز راسها /اي دخلت تغسل بالحمام
ام ماهر تجلس بجوارها وهي تهتف بضيقه / مدري متى ربي بيزين حالها وحال رجلها
الجدة صيته تحط باطن كفها بظهر كف ام ماهر / لا تشيلين هم الامور بتزين بينهم باذن الله وفهد اخطا بمدت يده عليها وهي جازته بنومتها عندي
ام ماهر بخرج / ماله داعي لو راحت جناحها ونامت فيه هي المخطيه الله يهديها اجل تبي ترد الرجال عن السفر
الجدة صيته تهزها تسكت / اص جت
مهره تقدم وهي تنشف وجها المورم من كثر البكا البارح والسهر وتجلس قبالهم على الاريكه /صباح الخير
ام ماهر تنهد / اي صباح يامك الناس الظهر وتغدينا وانتي عداك نايمه
مهره تفتح عيونها وتلف تطالع الساعه اللي بالحيط ورها شافتها 2 الظهر /يوه نايمه لا هالوقت وصلاة راحت علي؟
الجدة صيته تهتف بحنيه /قومي صلي يامك مابعد دخل صلاة العصر
قامت مهره صلت صلاتها ورجعت جالسه من بعد ما قهوة امها وجدتها وخذت لها فنجال قهوه و فذة تمره
الجدة صيته تسبح بسبحتها بصمت /...
وام ماهر هتف بحزم /قومي تغدي وتعالي بتكلم معك شوي
مهره تنهد /الغدا مابي الحين ولا للي نفس واللي بتقولينه يا يومه وفريه ليوم ثاني لاني تعبانه ومابي اسمع شي
الجدة صيته بحزم اعمق / اقول اسمعي امك واتركي الخبال عنك
مهره تصد بوجها بصمت وام ماهر تكلم
بصرامه /اسمعيني يا مهره رجلك بيروح شغل ماهى لعب واللي سويتيه ترا عيب الحريم العاقلات مايسون سواتك
مهره تنزل فنجالها على الطاوله بعصبيه /قلتيها العاقلات انا ماني بعاقله ولاني بفاهمه
ام ماهر تنهد بقلة حيله / يامك المره تعاند الجبال الحجر القاسي ولا تعاند الرجال
الجدة صيته تهديها / انتي وش تبين بضبط علمينا خلي نفهم ؟
مهره بكت وهي تضم وجها بين كفوفها/ مابي شي بيسافر بكيفه
الجدة صيته تنهد بالم من صوت بكاها/ تراه عندي الصباح وتطمن عليك وسال عنك ولا هو مطاوعه قلبه يسافر بكرا وانتي زعلانه وبعيده عنه روحي له بالجناح اذا رجع وتفاهمو بالهدو
مهره رفعت عينها بصدمه /بكرا يسافر ؟
الجدة صيته تهز راسها/ اي بكرا
مهره تقوم واقفه / ماني رايحه له ولا ابي اشوفه خلي السفر واللي بسفر يفيدونه
طلعت مهره لجناح ماهر والجدة صيته وام ماهر تبادلو النظرات بدهشه من كلامها وعنادها الغريب
______________________________
بالمستشفى....
طلع صقر من غرفة ملاك ينتظرها تجهز هي واختها كان واقف بالممر يشتغل بجواله شوي وجاه صوت عادل اللي يهتف بالسلام /السلام عليكم يابو مطلق
صقر دخل جواله بجيبه وهو يسلم عليه بمصافحه وحب خشوم / عليكم السلام حي الله ابو اياد
عادل بتسال واهتمام /شلونك شلون الاهل عساهم طيبين
صقر يرد عليه بثقل /بخير الحمدلله وجزاكم الله خير اتعبناك واتعبنا اهلك معك
عادل يبتسم /يارجال حنا اهل المهم انكم بخير
طلعت حصه وهي متغطيه بالكامل ومرت من عندهم بصمت وصقر لف عنها معطيها مجال تمر وعادل هتف بموده /تامر على شي يابو مطلق؟
صقر يرد بذات الموده /سلامتك
عادل ابتعد وملاك طلعت لابسه عباتها ومشت مع صقر لسيارته ركب وشغلها وشغل المكيف على الاخر لان الجو حار وهي ركبت وسكرت الباب بصمت/...
صقر لف لها بتسال / تبين تروحين جناحك ولا بيت امك ؟
ملاك ردت باستعجال /اكيد بيت امي
صقر تنهد بضيقه /طيب ومتى تجين
هي بتسال /وين اجي ؟
هو بحزم / وين يعني جناحك
هي بزفرة /صقر ماراح ارجع لين امي تخلص حدادها
صقر طارت عيونه فيها / متى متى ؟!!!
ملاك ترفع كتوفها /لين امي نخلص حدادها
صقر نفخ بوجها / وانا بخليك تجلسين 4 شهور عندها
ملاك تلف له / اجل ؟
صقر يحاول يهدي نفسه بس ماهو قادر / معك يومين ترتاحين فيهم وبعده ترجعين عندي غير هالكلام مافي
ملاك بعناد / ماراح ارجع انت شفيك ماتحس ترا اللي ميت ابوي ابوي
صقر ضرب السكان بكف يده بقوه / وانا قايل شي ابيك ترجعين جناحك باليل بس والنهار روحي لامك ماحدن رادك
ملاك تلف وجها عنه / متى ما ارتحت رجعت لجناحي شهر شهرين لا تضغط علي
صقر عض شفايفه وهو يحرك السياره بغضب /كيفك ان شاءالله تقعدين عندها سنه
ملاك تطالعه كيف مسرع سرعه جنونيه وهي تهتف بخوف /صقر هد تبي تذبحنا انت ؟
مارد عليها ولا هدا وهي صمتت وتدعي الله بداخلها ترجع لامها بالسلامه وهو كان مقهور على حظه الزفت وهو يتذكر الوعد اللي بينهم كان المفروض يصير اليوم بس كل شي صار ضده مايدري فعلا متى الدنياء بتضحك له على قولة امه كل ماقترب ابتعدت وكل
ما اقتربت ابعدتها الظروف لامتى !!؟
وقف عند الباب وهي نزلت لبيتهم من غير نقاش
دخلت و سكرت الباب و صقر نزل لبيت اهله
وهو يذم نفسه وحظه
ملاك تمشي بالحوش وعيونها تغيم بالدموع
ذكرى ابوها كسر كل شي قوي فيها وقفت بالحوش وهي تستند على الجدار خايفه ترجع تنهار ماقدرت توقف طاحت بالارض وهي تلم رجولها وتدفن راسها وتبكي بنجيب ولا حست بحرارة الشمس فوق راسها وحرارة الارض اللي تحرق جسدها بكت وبكت وهي عاجزه ترفع نظرها للبيت وراسها مازال مدفون بحضنها
امل طلعت للحوش وبيدها عباتها المبلولة تبي تعلقها بمعلوق بشمس عشان تنشف ولاكن العبايه طاحت بالارض وهي تركض لملاك وتضمها وتصرخ
بندا /يومه يومه الحقي ملاك
نهيل جت تركض ومازن طلع من جناحه مفزوع من الصوت كلهم تجمعو عليها و نهيل تسحبها وتحضنها وتنفجر معها بالبكا /يامك ليش تجلسين بالشمس ليش تعذبين نفسك
ملاك تبكي بقوه /يومه ابوي مات مات
نهيل تشد احتضانها /ادعي له بالرحمه
مازن يمسح دموعه وهو يهتف بحنو /تعالو ادخلو على المكيف
ادخلو كلهم الصاله وملاك حاضنه امها ومازالت تبكي على صدرها وامل جالسه بزاويه وتبكي معها مازن واقف ويمسح دموعه سمع جواله بمخباه يدق طلعه وهو يرد / هلا صقر ارحب
صقر بهتمام / ملاك نزلت بالبيت شفتها ؟
مازن تنهد بحزن / اي ياخوك مادرينا عنها كانت جالسه بالشمس وتصيح
صقر انتفض بخوف / والحين شلونها؟
مازن يطمنه /ماعليها طيبه هاذ هي بحضن امي وتهديها
صقر نزل نظره على حضنه الخالي بقهر تبكي بحضن غيرة وهو موجود رد بهدو / خل بالك عليها ولو تتعب كلمني
مازن يهز راسه وعيونه على امه وملاك اللي يسمعون بصمت/ ابشر ابشر
من سكر هتفت نهيل بتسال / وش يبي صقر؟
مازن بجلس / مايبي شي بس يسال عن ملاك ويوصي عليها
نهيل بذات التسال / اليله هو اللي بيسوي العشا صدقة عن ابوك؟
مازن يهز راسه / اي والله ذبح 4 ذبايح ثنتين وزعهن وثنتين يبي يسويهن عشا اليله للمعزين
نهيل تهز راسها /الله يحزاه خير
مازن يقوم واقف /عمي وعياله رفضو اي احد يسوي صدقه الا اهل البيت امس سوا الغدا عمي مطلق والعشا عياله صالح وفالح و الغدا اليوم انا وماجد والعشاء اليله صقر
نهيل تمسح دموعها / الله يجعلها صدقه عن الميت
ملاك تبتعد عن حضن امها بارهاق / يومه انتهى العزا ولا باقي ؟
نهيل تمسح على شعرها /باقي يامك الناس تجي العصر لين اليل بكرا اخر شي
ملاك تمسح دموعها / بحظر عزاه يكفي ما حظرت وداعه
_________________________