ادعو لوالدي برحمة والمغفرة..
بيت نهيل الغرقان من المطر و لاحد الان النار شابه بينهم
ملاك من وصلت وهي بغرفتها وتبكي بالم وقهر
عمرها كله مابكت كثر مابكت اليوم وامل عندها
وتحاول تواسيها بعد مافهمت من ملاك السالفه كامله باستثناء حركات صقر اللي كانت معها جريئه استحت لا تقولهم لاختها
و نهيل وابو ماجد بصاله الغرقانه و يغلون من الغضب والقهر ومازن جالس معهم بغضب اشد من غضبهم واللي زاده ان وفاء رفضت ترجع معه والبيت غرقان وقررت تنام عند اهلها
ابو ماجد يسال بمراره مولمه /ملاك للحين تبكي
مازن انتفض ورد عليه بجزع/وانت وش عليك فيها بكت ولا ماتت راحمها بعد سواد وجهها
ابو ماجد رد عليه بصرامه / اي راحمها ماهي بنتي عشان مارحمها البنت مالها دخل باللي صار
نهيل لاول مره توقف ضده بنتها وتكلمت بجزع/الا لها دخل لونها بنتن لها عقل وتفهم مادخلت جناح رجال غريب عليها
مازن يهز رجله بغيظ/هاذي ثاني مره يابوي ثاني مره وكل يوم وحنا مطلعين لها مبرر لين متى لين تجينا حامل
ا
بو ماجد قفز واقف وعطا مازن كف على وجهه وصرخ فيه /تتهم اختك بشرفها ابك هاذي تربيتي والله انها اشرف منك ومن اشكالك يالخايس
نهيل تمسك ابو ماجد مع كتفه وتحاول تبعده من مازن وتهديه /استهدي بالله يارجال وعين خير
ملاك وامل طلعو برعب من صوت الصراخ وشافو ابوهم قريب لمازن وامهم تبعده منه
ومازن يتنفس بسرعه ويتكلم بصوت مرعب /انا تضربني انا ومن عشانه عشان بنتك قليله الامانه اللي ماحفظت عرضك وعرضنا
ملاك من عرفت انه ضاربه حطت يدها على فمها وشهقت وابو ماجد يقترب له و نهيل تشده
ويصرخ فيه / قلت لك ولا كلمه ولا تكلم عن اختك بالكلام هاذا تفهم
مازن شاف ملاك اللي واقفه عند باب غرفتها وجهه كلامه لها/عاجبك اللي سويتي عاجبك كل يوم وانتي جايبه لنا مصيبه بس ماتنلامين مالقيتي اللي يوقفك عند حدك ويعلمك الصح من الغلط
ابو ماجد مازال يرجف/ انت اللي تبي من يوقفك عند حدك ويعلمك الصح من الغلط انت
مازن ياشر على ملاك ويتكلم بنفاس سريعه/ هاذي اللي انت تدافع عنها قبل شوي وقدامك وقدمنا اكلت الرجال بعيونها بقلة حيا حتى صقر احترمنا
و ما طالع فيها قدامنا وهي ما احترمت احد لا ابوها ولا عمها ولا الموجودين كلهم تبحلق بعيونها برجال
ملاك مازالت يديها على فمها الصغير وزاد بكاها
و شهقاتها وامل تبكي معها
و نهيل تكلمت بامر حاد/اسمع يابو ماجد البنت لازم تزوجها بهالاجازه هاذي وتريحنا من هالموضوع اللي اتعبنا سنين
ابو ماجد طالع ملاك اللي تبكي بالم من كلام اهلها ونادا لها/تعالي ياملاك تعالي
ملاك من سمعت ابوها بنادي لها راحت تركض و رمت نفسها بحضه وابو ماجد ضمها له وتكلم بحزم
خافت/ يابوك انا اعرفك عدل انا اللي ربيتك الخطاء مايجي منك لاكن كان تبين نسوي عرسكم بالاجازة هاذي بنسويه ونرتاح وكان ماتبينه وتبين نتتضر لااخر السنه بكيفك
مازن بمقاطعه/وتشاورها بعد هذا اللي افسدها وقواها علينا
ابو ماجد يطالع فيه ويصد بوجهه عنه ويكمل كلامه لبنته/هاه وش قلتي
ملاك رفعت راسها وتكلمت بقلة حيله /اللي تشوفه
و يرضيك مالي كلمه بعد كلمتك انت ابوي وتاج راسي واللي تامر عليه انا حاظر
مازن يصفق بيديه /شاطره شاطره وتعرفين تصفين الكلام عدل اثر هاذا اللي مخلي صقر يدافع عنك مصدق كلامك ولاعيبك
ابو ماجد يرفع يده له بتهديد/ والله كان ماسكت لا سكتك بكف
مازن يتجهه لباب /انا بطلع وانت تفاهم مع بنتك بطريقتك انت وياها وترا ماهي نافعتك الا بتضرك
ملاك حطت يديها على اذونها وهزت راسها يمين ويسار تحاول تطلع كلامه من راسها
ابو ماجد يقترب لها ويسحب يديها بين يديه /يابوك ماعليك منه ماله كلمه عليك مدام راسي يشم الهوا واللي تبينه بيصير غصبن عليه
ملاك تطالع بامها اللي صدت بوجهها بغيظ وكانها اشطرت قلب ملاك شطرين وتكلمت بجرح عميق عميق /يوبه انا موافقه ان يكون الزواج بالاجازة الجاية
____________________________
مهره من دخلت جناحها راحت للحمام وخذت شاور دافي وتوضت عشان تصلي لانها ماصلت من عقب تعب الحراره وبعده جلست على الاريكا تنتضر فهد اللي راح ياخذ شاور بعدها ولبس له بجامه وهذ هو يجلس قبالها وشد له نفسا عميق ثم تكلم بغموضه/ مهره انتي يوم كنتي بالحراره كلامك كله عن موضوع البارح لهدرجة ماثر عليك ؟!
مهره تحس بصداع من صدمت السوال/ليش وش كنت اقول ؟!
فهد يرجع ظهره على ورا ويمد يده وحده على حافة الاريكا بارتياح ويرد بذات الغموض /قلتي كلام كثير وبعدين انتي عارفه ان صحتك ضعيفه وما تتحمل شي ليش تطلعين بالمطر وتمرضين نفسك
مهره تطالع بظافرها الصغيره المقصوصه بانوثه وترد عليه برائه/كنت بجناحي وخفت من صوت الرعد والمطر وطلعت بروح لجدتي ودخلني مويا وبردت
فهد يراقب كل حركه تسويها وحتى طريقة شفايفها الصغيرة كيف تطلع منه الكلام
ونسفت كل مقاوماته يوم قالت خايفه من الرعد والمطر
وقف واقترب لها وجلس بجمها وحوط كتوفها بيده ويسحبها لصدره وهمس لها /مهره انتي للحين
ما تعودتي علي وعلى انفعالاتي الحاره
مهره تحط راسها على صدره وتكلم بصوت
موجوع/بس فهد انت كل يوم تضربني بسبب و بدون سبب
فهد شد احتضانها له وحس بعاطفه لها وهمس
بخفوت حاني/مهره انتي لو حسيتي اني بضربك ابتعدي عن وجهي بي مكان عشان تسلمين مني
مهره ترفع راسها من صدره وتطالع فيه وكل نظره
تنظرها لوجهه الوسيم تهزها بعنف وهمست
له/قصدك اتخبى عنك؟!
فهد يده مازالت محوطتها ومد يده الثانيه و يبعد شعرها من وجهها ويثبته ورا اذونها الصغار ويهمس لها بنبرته الغامضه /اي تخبي حتى لو اضطريتي تقفلين الباب ولو كسرته لاتطلعين
مهره بنبرة خوف /اخاف بعدين تذبحني
فهد حس بجرح عميق لهدرجه تخاف منه
واخذ نفس ورد عليها بتهدئه /من ناحيت هاذي لا تخافين ماراح اذبحك
مهره تبتسم برائة وعذوبه /فهد ترا بكرا السبت وانت مواعدني كل سبت اروح لامي ولا نسيت
فهد يذوب يذوب مع برائتها وطيبة قلبها ومسرع ماتنسى قساوته وجفاه يحس وده ياكلها اكل ويتذوق لذتها ولاكنه همس لها بحنو بالغ/ لا مانسيت بس مابيك تروحين لها وانتي تعبانه
مهره تنتفض من بين يديه وتوقف بنعومه /بس انا مافيني شي شوف والله مافيني شي
فهد كان جالس ويمد كفه ويمسك بكفها ويرجعها تجلس و يهتف لها بغضب /اياك تعيدينها وتوقفين وانا اتكلم معك اكسر لك رجولك فاهمه
مهره تطالع فيه بدهشه مسرع يقبل مزاجه تو يقول تخبي عني وخايف علي والحين قلب بدقايق
وفهد يطالع فيها بنظره مباشرة /بكرا اجيب امك لك وتجلس عندك كثر ماتبي
مهره تهز راسها برضى وفهد يمد يده ويحط ظهر اصابعين من اصابعه على شفايفها الورديه ويرجعهم لشفايفه ويبوس اصابعه
مهره نزلت راسها بحرج
و فهد عاجز عاجز عن مقاومتها هاذ
هشه ما تنقاوم مثل ماقلت جدته عنها
___________________________
بيت ابو صالح الكل هجوم على شذى وبذات امها المنحرجه منها وجدها ابو صالح اللي مازال منفعل من سواد وجهه عند اخوه / انتي اهلك ماربوك يومك تسحبين البنت معك و تودينها لجناح خالك تالي اليل
شذى مازالت تبكي/والله ماكنت بضرها بشي ملاك صديقتي مارضى عليها
ابو صالح يكمل كلامه بذات الانفعال/ و مادامها صديقتك كذا تسوين فيها تفشلينها وتفشلين اهلها معها
وفا بتدخل /يوبه شذى مالها دخل بس هي تبي تبرر لملاك اللي مشتهيه هي بنفسها تروح للجناح ماحد جابر احد على شي
ابو صالح كان جالس بصاله على الكنب وقابض بيده على عصاته ولما اخلصت وفا كلامها رفع العصا ورماها فيها /اخسي ياللي ماتستحين تكلمين عن بنت عمك كذا
وفا رفعت رجوله عن العصاة اللي ضربت فيها بخفه وام مهند تكلمت بحرج/يابوي خلاص اللي صار صار وشذى اعترفت بخطاها والحمدلله ان ماحد من حريم خواني هنيه ولا عمتي ام ماجد عرفت شي ولا كان انفضحنا عند الناس
ابو صالح يزفر بقهر/انا ماقاهرني الا صقر اللي ماحترمني ولا حترم عمه ولا كانه سوى.شي حتى كلام بكلمه عطاني ظهره وطلع برا البيت
ام صالح اللي جالسه قريبه له حطت يدها على فخذه وطبطبت عليه بتهدئه حانيه ثم تكلمت بخفوت/ هد نفسك يابو صالح وصقر هذا طبعه من صغرة عصبي
وما يتفاهم لاكن انت خله يومين لين يهدا وتكلم معه
___________________________________
بعد مرور سبوع وليلة زواج ابراهيم بن محمد
والوقت الان قبل المغرب
الجدة صيته تلبس المسرح حق الزوجات وبعده تلبس برقعها وتاخذ عصاتها وبيدها الثانية تاخذ عباتها المعلقه وتطلع لصاله الخالية من الناس وتنادي على الخدامات /ميري
ياميري
ميري جت تركض /نعم جدة
الجد صيته بتسال وهي تطالع بانحى البيت/وين البنات ماحد جاء من الكوفيرات للحين يتكوفرن
ميري تهز كتفها/مادري مافي احد يجي
الجدة صيته تمد لها عباتها/خذي عباتي علقيها لين اروح اشوف المسكينه اللي كسر قلبها ولد عقاب
و تتجه لجناح فهد وتطق الباب وشوي وافتحت مهره اللي وجهها مورم من كثر البكى
الجدة صيته انتفضت بجزع وقتربت لها/يامك ليش تسوين بنفسك كذا وللحين مالبستي وجهزتي
مهره تفتح الباب وتتجه لداخل وترد بالم /وليش اجهز اصلا فهد يبي كذا مايبيني احظر
الجدة صيته تدخل وتسكر الباب وراها وتكلم
بحزم/وليش ماتبين تروحين وش تبين الناس تقول عنا
وفهد ماقال لك لاتروحين للعرس !؟؟؟
مهره تجلس على الاريكا وتهتف / بس رفض اروح الكوفيرة وتجهز مثل باقي الناس يومه يرضيك يبيني اقل من غيري !!!
الجدة صيته تنحي لها وتمسح على شعرها /يامك والله ان الزين زين ولو صحى من النوم والشين شين ولو كحل العيون انتي زينك من الله وهن زينهن عند الكوفيرات
مهره تبتسم بصعوبه على مصطلحات جدتها والجدة صيتة تبتسم من ابتسامتها وتهتف لها باستعجال/يلا مافي وقت قومي وكشخي والبسي عشان نروح قبل تجي الناس وش تقول عنا
مهره تهز راسها برضى/ابشري بجهز عشانك معن حتى فستان ماعندي جديد مدري ليه فهد يبي يذلني قدام الناس
الجدة صيته تنحرها /لا تقولين كذا فهد مايذلك والله انه يعزك بس يامك العز ماهو بالبس عندك لبس البسيه وخلصي الزواج كله جاء فجئه حتى اهله ماتجهزو
مهره تقوم واقفه /عندي فستان جديد شاريته من قبل زواجي بلبسه
الجده صيته تبتسم برضا/اي البسيه وانا بروح احتريك بالصاله لين تخلصين
____________________________________
ملاك هذا حالها من سبوع
ماتطلع من غرفتها حتى المدرسه تغيبت عنها يومين
والحين جالسه على سريرها ولامه ركبها بحضنها وتفكر بكلام ابوها اللي قال لها/ سالت عن صقر وقال ابو صالح انه مسافر له يومين ونبي ننتظره يرجع ويحجز للعرس
ملاك تنهدت وحطت يديها على شعرها وشدته من كثر التفكير
يكفى ان امها هاجرتها من كم يوم ولا تكلمها
واللي خفف عليها وجود خواتها حصه وامل لو ماكانو بحياته كان الله اعلم وش يصير فيها
و حصه اللي فهمت السالفه كامله وقالت لهم البنت صغيرة على الزواج واذا اخطت ماهو كذا تنحل الامور في الف حل وحل
قطع افكارها دخول حصه وكرشها قدامه وهي تبتسم /ملوكه ليش ماجيتي تقهوين معنا
ملاك تحط ذقنها على ركبها اللي لامتهم بحضنها وترد بنبرة ميته / مابي قهوه ولا غيرها انتضر الحاكم يرجع عشان يحكم علي بالاعدام
حصه تكلم بوجيعه /لا ياملاك لاتقولين كذا ماتدرين وين الخيرة وانا قلت لابوي ينسى موضوع الزواج هذا نهائي لين تخلصين المتوسط
ملاك تبتسم بحسرة/اي هذا ان فكرو مجرد تفكير براينا ولا بكلمنا اصلا انا ياحصه ماعاد يهمني لو يقلون للي اليله عرسك
________________________________
ابو صالح واقف بصاله وينتضر صبا تجيب المبخرة /هاذي وين راحت هي و بخورها
ام صالح جالسه على الكنب وتبتسم له /الحين تجي من بيروح معك غير صالح
ابو صالح يرد عليها وهو يعدل شماغه/صالح وابو ماجد بس
ام صالح بستغراب /والعيال ماهو رايحين معك
ابو صالح يهتف لها بزفرة/منهو اللي تبينه يروح صقر اللي ماندري ارضه من سماه ولا فالح اللي يقول ماله داعي تروح لعرس ديرة العقاب
صالح دخل وسمع اخر كلام ابوه ورد بموده/تبي الصدق يابوي وهو صادق ماله داعي نحظر ونتعنى لديرة العقاب بينا وبينهم طريق طويل
ابو صالح بجزع/كيف ماله داعي وهم حاظرين عرس ولدنا ومقدرينا وعانتهم اغلى العانات
صالح ياخذ المبخره من يد صبا اللي جابتها ويتبخر /يابوي وحنا حظرنا عرس شيخهم وقدرناه وعطيناه كثر عانتهم
ابو صالح ياشر له يعطيه المبخره /اقول عطني خل اتبخر ونروح لانتاخر على الناس وبعدين هذا ولد عم الشيخ وله حق علينا
صالح يمد له البخور ويبخر ابوه ببتسامه /عشانك يالغالي انا رايح اصلا
ابو صالح يبتسم وتجاعيد عند عينه تبين ويرد بموده/الله يستر عليك ليت اخوك المطيور جاء مثلك
ام صالح بدفاع عن ولدها/صقر ماهو مطيور يابو صالح بس انتم ماتخلونه بحاله
ابو صالح يطالعها بنص عين/حنا مانخليه بحاله الا متى بيرجع عمه يسال عنه حتى مدري وين هو مسافر
صالح يرد عليه برضا/يوبه صقر مسافر للامارات عنده مشروع وبيرجع هاليومين انت بس لاتشيل هم
_______________________________