هز براسه موافق وفرك وجهه وكال.
....غمار ...اهم شي صحتها وتطلع بسلامه ميخالف فدوه الها الله انطاه والله أخذه .
....رسل...بقينا كاعدين ننتظر نورس تقرب من غمار وتعرف عليه وسلم عليه وره نصف ساعة اجتي الممرضه وكالت تگدرون تطبون يمها بس بدون هوسه لان اكو مريضات يمها بنفس الغرفه.
....ردت اني اطب وجان يأشرلي غمار وگال ..
...غمار ...عادي اني اطب ومن اطلع روحي يمها انتي بس اريد اشوفها ..
...رسل ...اي عادي اخذ راحتك.
....راح لسالي وبقينا كاعدين اني ونورس بالممر ننتظر ..
....باوع عليه نورس وگال..
...نورس...جوعانه تأكلين شي تشربين شي .
...رسل...لا مااريد آكل بس اريد چاي حتى اصحصح لان نعسانه بالگوه فاتحه عيوني .
....هز براسه وعافني وراح وره شويه رجع وبيده كوبين چاي سفري اليه واله شربنا وگال .
...نورس...رح تبقين هنا يمها لو ترجعين للبيت ..
...رسل...لا طبعا ابقى شلون اعوفها وحتى يمكن اروح وياها للبيت .
...خزرني بعيونه وكال.
...نورس...يابيت شعندج رايحه هناك ..
...رسل...شلون شعندي اولآ هو بيت امي يعني اول وتالي ارجعله وثانيا مااكدر اعوف سالي وهي بهاي الحاله اكيد هسه نفسيتها متدمره.
....بدون مقدمات گال ..
...نورس...واني .
...باوعت عليه مستغربه ورجع تنحنح وگال ..
...نورس...احم...اقصد يعني شلون ترجعين هناك وتلتهين وياها الامتحانات مابقى شي عليها بعد اسبوعين شوكت تلحگين تقرين والقضيه مالتج بعدلها يومين .
...نزلت راسي وكلتله.
...رسل...الامتحانات اني دااقره كل يوم يعني ممقصره من ناحية الدراسه وهناك ابيت امي هم اقرى مراح اعوف المواد والقضيه بيوم الجلسه نطلع للمحكمه شنو بعد وين المشكله ..
....بقى صافن عليه ثواني ونفخ بحلگه وگال..
....نورس...ماكو مشكله ابد ماكو
...گام وگف باوعت عليه وكلتله..
... رسل...وين رايح ..
....نورس...اروح شويه بره واجي اختنگت من ريحة المستشفى اذا تحتاجين شي اتصلي بيه واجيج ..
....رسل...تمام .
....راح نورس بره وبقيت كاعده انتظر غمار يطلع حتى اطب يم سالي .
.........................
....غمار....طبيت يم سالي واني متردد مااعرف شلون اصلح الي صار طبيت لگيت الغرفه بيها أكثر من سرير والاسرّه واحد بصف الثاني وبين سرير وسرير برده بالنصف تفصل مريض عن مريض يعني محد يشوف الثاني طبيت لگيت السرير الي نايمه عليه سالي اول واحد ويمها برده اسمع اصوات المرضى اليمها بس مااشوفهم..
...تقربت منها كعدت على حافة السرير وهي بيدها الكانيولا ومعلگيلها المغذي ونايمه حطيت ايدي على أيدها وجان تفتح عينها بسرعه خزرتني وسحبت أيدها مني دارت وجهها عني وكالت.
....سالي... اطلع بره بسرعه لا اصرخ هسه واسويلك فضيحه بالمستشفى كلها موطايقه اشوف وجهك .
...غمار....اطلع والله بس اسمعيني.
...غمضت عيونها بقوه وحجت كلمات متقطعه ..
...سالي.... ماا.ريد .. اسمع..شي ..كلت...اطلع..من وجهي...بسرعه هسه يلا.
....غمار ...سالي كله جذب ماتزوجت ولا خطبت ولا شي كله جان لعبه سويتها حتى اضوجج لان جنت زعلان منج ماخطبت أحد ولا سويت شي والله العظيم وداعت متيم ورؤى ..
....دارت وجهها عليه بسرعه وخزرتني بغضب وعيونها متروسه دموع وگالت ..
....سالي....كله جذب ..؟ يعني ماخطبت .؟
...هزيت راسي بالرفض وكلتلها...لا
....غمضت عيونها ورجعت فتحتهن باوعت عليه وكالت..
...سالي...وعادي عندك هيج تحجيها انت تعرف شسويت بيه لولا بسبب اللعبه مالتك اني طرحت طفل اكو جنين جان ابطني ومات بسببك ابني مات وهسه جاي تگلي جانت لعبه .. ؟
....غمار...لا مو بسبب هذه الموضوع الجنين ميت ابطنج صارله اسبوع اني حجيت ويه الدكتوره وكالت صارله فتره ميت بس هذه ميعني أنه اني على حق اني اعرف نفسي غلطان ومعترف بغلطي واجيت هنا حتى احجي وياج واصلح كلشي واني مستعد اسوي اي شي تطلبي بس مااريدج تزعلين مني ..
...جرت حسره وكالت..
...سالي...غمار والقرآن الكريم هسه اذا ماطلعت منا اعييط وافضحك والله كوم اطلع من وجهي احسن ..
....غمار....انتي هسه مقهوره مني وحقج .
....قبل مااكمل كلامي فتحت حلگها وعاطت بسرعه حطيت ايدي على حلگها وسديته تقربت منها وكلتلها..
...غمار...اشش اسكتي طالع خلص افتهمت رح اطلع والله .
...بقيت صافن بعيونها الزرگه ومتروسه دموع تقربت وبستها من راسها بقوه وكلتلها ..
...غمار...اني رح ابقى بره مااروح الا الدكتوره تگول صرتي زينه يلا اروح .. اذا تحتاجين شي دزيلي خبر ..
...وخرت ايدي من حلگها وكالت ..
...سالي...محتاجه تعوفني بحالي وبس الله لايعوزني عليك اطلع من وجهي يلا .
....غمار ....عفتها وطلعت لگيت رسل كاعده وحدها سألتني عليها شلونها بقيت ساكت عافتني وطبت يمها .
...................
....رسل...طبيت للغرفه لكيت سالي تبجي تقربت منها وبستها وحضنتها..
...رسل....اشش حبيبتي الحمدلله على كل حال مامقسوم يعيش لتبجين أن شاء الله يصير عندج غيره والله يعوضج ويحفضلج متيم ورؤى لتبجين فدوه .
....باوعت عليه وكالت..
....سالي...ماابجي على الجنين اعرف هذه أمر الله والحمدلله على كلشي بس مقهوره من غمار احس نفسي كارهته واني بعمري وحياتي ماتخيلت يجي يوم وأكره غمار .
...رسل...لا متكرهي لتكولين هيج انتي هسه لان مقهوره منه وزعلانه هيج تحجين يرادلج فتره لما تهدأين وترتاحين وبعدين فكري بهدوء .
...باوعت عليه وكالت..
...سالي...ولج رسل جذب عليه يگلي اتزوجت بدون ميفكر شنو ممكن يصير بيه من الصدمه وهسه اجاني يكلي والله جانت لعبه ردت اقهرج لان جنت زعلان منج بله هذه تفكير واحد عمره 27 وعنده جهال واب عبالك طفل مراهق مو رجال وطول وعرض .
....مسحت دموعها وكلتلها..
...رسل...ياعيني صلي على محمد كولي يالله ونامي هسه وباجر نرجع للبيت واني اخليج تأخذين حقج منه مربع والله العظيم براسي خطه الا اخلي يلحگج من شارع لشارع ويبقى يتوسل بس طيبي هسه وصيري زينه لتفكرين بشي غير صحتج .
...دارت وجهها عني وكالت.
.... سالي...مااريد اشوف وجهه كوليله خلي يروح منا ممنوع يطب عليه بعد ..
....رسل...صار اني احجي وياه بس كافي لتبجين..
....
....رسل...بقينا للصبح بالمستشفى اجتي الدكتوره وكالت ..
...سالي طرحت الجنين وهسه صحتها زينه بس يرادلها غذاء وفواكه حتى تعوض الدم الي نزفته وكتبتلها علاج اخذنا من الصيدليه .
....اخذتها وطلعنا شافت غمار ونورس واگفين باوعت عليه وكالت..
...سالي...خلي نورس يوصلني للبيت .
...هوه سمعها سلم علينا وكال .
...غمار...اني اروح هسه ونبقى على اتصال اي شي تحتاجون خابروني مع السلامه.
...غمار عافنا وراح واحنا رجعنا ويه نورس للبيت
...رسل...اول ماطبيت للبيت سمعت امي تدردم عليه وكالت ..
...كفاح ...ادري وينج مو گلتي اخابرج ليش اتصل بيج موبايلج مغلق وگف گلبي متگولين امي يضل بالها ..
...رسل...شوكت اتصلتي محد اتصل بيه ..
...كفاح ...دشوفي موبايلج وبعدين احجي ..
...رسل...طلعت موبايلي لگيته مخلص شحن وطافي شافته مامه كامت تهز بيدها اخذت سالي مني وراحت ودتها للغرفه والجهال يركضون وراها يردون امهم .
....رسل....طبيت وراهن ردت اكول لمامه اروح اجيب عزيز واجي بس مدري ليش استحيت كعدت يم سالي وره شويه بدلت ملابسها ومددت حطت رؤى ومتيم بصفها واحد منا وواحد منا وتبوس بيهم وعينها عليه اعرف بيها ضامه حجي بگلبها باوعت عليها وكلتلها..
...رسل ...شبيج هيج تباوعيلي احجي طلعي البگلبج .
....باوعتلي وكالت .
... سالي....شكد مطوله الاقامه مالتج ابيت عمتج لو رح تستقرين هناك يمهم إن شاء الله .. ؟
....رسل...لا مااستقر ليش شعندي وياهم قابل هي بس تخلص سالفة المحكمه وارجع ..
...سالي ...والمحكمه بعد شكد .
... رسل...عگب باجر الجلسه .
....سالي...خير إن شاء الله بس ترى ماله داعي تصرفج الي سويتي حضرة جنابج الكسيف صايره تزعلين هواي من مامه وعلى اتفه الأسباب .
....رسل...شلون على اتفه الأسباب ماشفتيها شلون صارت تدافع عن حاتم وضربتني كدام اخوها هذه سبب تافه عندج ..؟
.... سالي....مادافعت عن حاتم هي لا تسفطين حجي بكيفج هي صيحت عليج وضربتج لان رفعتي صوتج على خالو عادل وهذه الشي عيب لو مهما يكون رجال اكبر منج بالعمر ميصير تصيحين عليه وبعدين تعاي اگلج من شوكت صايره تدوريلي كرامات ويه مامه وتزعلين من تضربج شو من چنا جهال وتضربنا ماجنتي تزعلين منها لو هسه لان صار عندج ضهر بيت عمتج وتزامطين بيهم ونسيتي امج ..
....رسل....مانسيت امي اصلا اني هناك يمهم خلصتها ابجي وتمرضت لان لا انتي ولا مامه اتصلتوا بيه كلت محد اهتم لغيابي .
....سالي...بالنسبه اليه صح مااهتميت لغيابج وجنت زعلانه منج لان طلعتي بنصاص الليالي من البيت بس مامه تمرضت ارتفع السكر عدها واخذتها للدكتور وحرت بيها وبعلاجها لو يهمج أمرها جان اتصلتي انتي لو تخافين لا تنخدش كرامتج..
....رسل....سالي الله يخليج كافي تلومين بيه ترى اني الضحيه مو الجاني حتى هيج تتعاملين وياي انتوا حتى ماكلفتوا نفسكم تسألون شصار بالمحكمه وشلون دارت الأمور هناك ..
....سالي ...منو يكول ماكلفنا نفسنا غير اتصلت امج بخالو عادل وحجالها كلشي صار وحاتم گلب الدنيا لان المحامي مالته گال .
....موقفه أضعف من موقفج بالقضيه واحتمال يخسر القضيه اخذ مرته ورجع لاربيل وخالو عادل تعارك وياه وگاله ماعندي ولد اسمه حاتم بس بسام ابني .
...رسل...لا صدك يعني اني رح اربح القضيه وأخذ عزيز اليه احلفي كولي والله ..
....سالي....والله العظيم وخالو عادل صاير وياج هوه كال لمامه اي شي تحتاج رسل بس خلي تخابرني واني موجود .
...رسل...زين وهذه سبع البرمبه شلون راح لاربيل والجلسه بعد باجر غير يطلگني يله يروح .
....سالي...ماادري بس يمكن لان تعارك وياه خالو عادل وطرده من البيت قابل هوه ميعرف بموعد الجلسه اكيد يجي بيوم الجلسه ويطلگ..
...رفعت ايدي ودعيت .
...رسل...الله يسمع منج يااارب هيج ويطلگني وارتاح حاسه نفسي بحلم .
....بقت صافنه عليه وابتسمت وكلتلها..
...رسل... شبيج هيج تباوعيلي..
....سالي...قبل أربع سنوات رفعتي ايدج وهم دعيتي بنفس هاي اللهفه بس جان الدعاء مختلف كلتي ياارب هيج ويخطبني حاتم واصير زوجته واحقق حلمي ... سبحان الله الدنيا شلون تدور بالانسان.
....نزلت راسي وصفنت وتذكرت الماضي صدك اني جنت قبل اتمنى حاتم يصير اليه وهسه صرت اتمنى اخلص من حاتم سبحان الله..
....قطع صفنتي صوت مامه تصيح علينا وكالت ..
....كفاح...كومن للصاله صبيت الغده كافي سوالف .
....رحنا نتغده اني وسالي وره شويه فتحت موبايلي صار بي شحن شويه وشفت رساله واصلتني من نورس .. يگول .
...(متى مااردتي المساعده أنا بالقرب منكِ ولن اتوانا عن دعمك والوقوف بجانبكِ لحظه واحده )
.....رسل ...ضحكت ودزيتله..
..(هاي شلك بيها عليمن تفكر وتكتب وترتب كلمات بالفصحى خوب گول من تردين ترجعين للبيت خابريني اجيج وفضها )
....وره شويه رجع دزلي ..
(ياعلي هذه لسانج لو الزمه شسوي بي جاروشه مال حجي ليش دائما تفشليني هسه دغلسي واقري واسكتي إلا تحجين وتفشليني عابت لهلوجه..)
...دزيتله..
(دااتغدى فد ساعه تعال أخذني وسلملي على عمه ساهره من طلعت جانت نايمه وماكلتلها طالعه)
....وره شويه دزلي صوره اله ولعزوز كاعد على القنفه وحاط عزوز بحضنه وبيده چبس وملابسه ملطخه كلها ..وجوه الصوره كاتب ..
...نورس....ميريدج ابقي هناك عيني رح آخذه اليه على عنادج ..
....ضحكت ودزيتله..
(والله هذه فد مصلحچي وين مايلگه دبگ يلزگ بي مثل ابوه يحب الي يدلله ويهتم بي )
....وره شويه دز
(العصر اجي عليج أخذي راحتج)
....رسل ...صفنت على الرساله حسيت بي ضاج بعدين عرفت ضاج لان جبت طاري حاتم بس اني موقصدي هيج حجيتها على نيتي اخخخ من لساني شكد يچفص صدك جاروشه مال حجي..
....رسل...خلصتها سوالف اني ومامه وسالي اخذت تراك ولبسته لان اني مااخذت ملابسي كلهن من طلعت اخذت قسم لبست تراك لونه احمر وبي بمكان الصدر قلب اسود وبداخل القلب سهم مرسوم بتطريز من فضه بقيت ويه مامه بالمطبخ هي مثكله وجهها عليه عود مسويه نفسها زعلانه واني وسالي وحده تباوع للثانيه نريد نخليها تحجي وماكو مامه تحب عبد الحليم حافظ كلش دائما تسمعه جان اغمز لسالي بعيوني وفتحت اغنية عبد الحليم حافظ بموبايلي وعليت الصوت كل علوه اسمها توبه ...
فتحت الاغنيه وجريت مامه من أيدها وصرت اركص وياها رقصة سلوا واغني الاغنيه وهي تضحك وتغلط عليه وتصيح تريد اعوفها واني بس اغني واركص وياها بعدين اندمجت وياي وكامت هي تغنيها صوتها يجنن مامه كلش حلو ..
توبة، توبة
توبة إن كنت أحبك تاني توبة
بس قابلني مرة وتبقى دي آخر نوبة
وبعدها توبة، توبة
توبة، توبة
توبة إن كنت أخاصمك وأرجع أصالحك تاني
ياما البعد سقاني وياما القرب ضناني
توبة
وإن فات طيفك يوم في منامي وجاه صحاني
برضه أطاوعك بس أهي نوبة
وبعدها توبة، توبة
.....خلصناها ضحك ومنطلقين وجان يندك جرس الباب اني جنت ملتهيه احجي وياهن واضحك وطلعت افتح الباب واصيح بالطرمه..
...رسل...اصبرن هسه افتح الباب واجي نرگص على اغنية ساجده عبيد عبد الحليم حافظ ميرگص ميسوي واهس..
...كمت اضحك فتحت الباب وجان اشوف نورس واگف والضحكه على وجهه اول ماشافني جمد بمكانه وعينه مارمشت ابد بقيت صافنه هذه شبي هيج يباوع حجيت وياه..
...رسل...شو اجيت من وقت مو كلت العصر اجي ..
...نزل عينه بالگاع والضحكه حاصرته وكال ..
....نورس....هاي شلابسه بنت الاوادم طبي لبسي حجاب شلون تطلعين هيج للباب .
...انتبهت على نفسي طالعه بالتراك الاحمر وبدون حجاب طفرت طفره وحده من الباب لغرفة سالي ركض بسرعه بدلت ملابسي واني اضحك على نفسي شكد ثوله لبست فستاني الي أجيت بي وشالي وطلعت لگيت نورس كاعد بالصاله ومامه كاعده يمه وتسولف وياه بطرف خشمها هوه شافني وكام بسرعه وكال ..
...نورس...يله اذا جاهزه نطلع لان عزيز يبجي عليج وامي كالت اجي آخذج للبيت حتى يسكت .
...رسل...طبيت سلمت على مامه وكلتلها بس تخلص الجلسه ارجع عگب باجر سلمت على سالي وكلتلها بعدين اخابرج وافهمج على الخطه مالتي الي كلتلج عليها وبوست الجهال وطلعت.
....صعدت بالسياره اباوع على نورس حابس الضحكه ويسوق مدري شبيه سألته..
...رسل....شبيك خير .
...نورس ...شبيه ماكو شي.
...رسل....شكو تضحك سامع نكته..
ضحك وكال.
...نورس....شعليج حتى بضحكتي تدخلين والله حلوه هاي .
...رسل...لا مو اني اعرف ليش تضحك ترى ماادري بيك انت بالباب واني جنت ملتهيه اسولف ويه مامه وسالي وماانتبهت لنفسي طالعه بدون حجاب يعني الي شفته تنساه ابدا لتفكر بي ..
....صار يسوق ويضحك وكال .
...نورس...اي صح جنتي تسولفين بموضوع مهم وشييق وهوه من يرگصج اكثر عبد الحليم حافظ لو ساجده عبيد..
...رجع باوع عليه وكال..
...نورس....صدك انتي تعرفين ترگصين لو بس حجي ؟
....نفخت بضجر وكلتله..
...رسل ...نورس كافي عاد اصلا عيب هيج تحجي وياي دااكولك انسى الي شفته ..
....يباوع للطريق وكال ..
....نورس....ليش عيب شحاجي حتى عيب ..
...باوع عليه وكال..
...نورس... مثلاً گلت احبج حتى عيب .؟ لو گلت طالعه حلوه وعيب ؟ شگلت حتى عيب فهميني.
....باوعت عليه ورفعت حاجبي وكلتله.
...رسل...كافي نورس والقرآن انزل من السياره ترى .
...بدون ميحجي شي وگف السياره على صفحه ووخر ايده من السكان وصار يدك على الجامه بإصابعه بدون ميحجي شي.
....رسل...ليش وگفت السياره متمشي .. ؟
....اندار عليه وعدل كعدته بإتجاهي وگال ..
....نورس...ليش هيج تسوين عود ..؟
...رسل...شسويت .
...نورس ...مااعرف انتي صدك غشيمه لو تغشمين نفسج لو متعمده هيج تسوين بيه حتى تشلعين گلبي لو شنو الفلم بالضبط .
...رسل...ولا وحده من الي كلتهن اني اريد اعيش مرتاحه وابني بحضني واخلص من حاتم وأكمل دراستي وبس كلشي مااريد ..
....صرخ بوجهي صرخه كلش خفت منها وكال..
...نورس...بس اني اررريدد اريدج الج ليش تسوين نفسج غبيه وانتي تعرفين كلشي ..
...رسل ...اول شي لتصييح احنه بالشارع وثاني شي شنو هوه الي اعرفه بله ممكن افتهم..
....ضحك ودار وجهه للصفحه الثانيه ورجع باوع عليه وكال..
...نورس...تعرفين بيه احبج واريدج موهسه من زمان من جنت صغيير اريدج .. رسل كلهم صاروا ضدي لتصيرين مثلهم على الأقل انتي كوني مختلفه عنهم ولتغدرين بيه مثل ماسووا بيه اهلي واهلج قبل .
...رسل...نورس الله يخليك كافي سد الموضوع ورجعني للبيت مااريد احجي بهذه الشي ابد .
....بقى صافن عليه وكال..
....نورس ...رح ارجعج للبيت بس ماانسى ولا اسكت ولا اتخلى وابقى اكولها الج بصوت ناصي وصوت عالي وهمس وكتابه واتصال وبكل اللغات هم .
...صار يعدد على اصابعه وگال.
احبج بالانگليزي
love
احبج بالتركي
aşk
احبج بالالماني
Liebe
احبج بالفرنسي
aimer
....نورس...احبج وغصبآ ماعليج رضيتي مارضيتي اني احبج .
....رسل...ضحكت من كال احبج بكل اللغات ماتحملت أضم الضحكه شافني اضحك وكال ..
...نورس...اييي اضحكي شكو عليج انتي اضحكي واني طامس بالوحل من وراج ..
....رسل... بقيت اباوع عليه وهوه هم كل ساعه يندار عليه وره شويه فتح اغنية هيثم يوسف وصار يغنيها بصوته اسمها صبر ايوب ..
اصبرلك صبر ايوب وبكده بعد مرتين
وابقى بها تجي وياريت منتظرك يا نور العين
خلي يطول خلي يطول صبري وياك
ما اتعب مااتعب ولا انساك
واني اللي صبرت سنين
ظلت على السنه وسنتين
ما اتعب واگولك ليش
لا باجر ولاهسه
شكد بعيوني حلوة ايام
حلوة وياك ما انسى
ما اتعب واقولك وين
واظل وياك خد عين
واني الي صبرت سنين ضلت على السنه وسنتين ..
....جان صوته حلو بس اني اجذب عليه احط ايدي على اذني واگله .
...رسل...عفيه اسكت صوتك مزعج زرف آذاني شنو هاي.. خابصنه بهيثم يوسف چنك اختي سالي ليل نهار تسمع هيثم أندري شعاجبكم بي ..
...طفى الاغنيه وگال ..
...نورس...عود هم عندج ذوق اكو واحد ميحب هيثم يوسف امير الحب هذه .. بس انتي مستواچ ساجده عبيد تحبين الطربگه والردح متحبين الطرب..
...رسل ...ديله عيني استاذ طرب سوق وانت ساكت ترى دوختني .
...ضحك وبقى يسوق وصلت للبيت سلمت عليهم وحجيت لعمتي كلشي صار وياي .. وكالت هي تخابر مامه وتسلم على سالي .
...رسل...مرت يومين واني مخلصتها ادرس لان امتحانات عدنا اجه موعد الجلسه ورحت وهناك انصدمت بوجود خالو عادل وحاتم سلم عليه وعلى عمو عماد الدين وطلع يعرفه من زمان اتفاجأت شلون يعرفه لخالو عادل المهم خالو عادل شهد ضد حاتم بأن هوه كان مقصر بحق ابنه وبحقي وبسبب شهادة خالو عادل القاضي حكم بحضانة عزيز اليه وحكم أنه ينقطع من راتب حاتم كل شهر مبلغ نفقه لعزيز واله حق يشوف عزيز 3 ايام بالشهر فقط حاتم رمى عليه يمين الطلاق بحضور الشهود وتوفر كل الشروط وبهيج تطلقت منه شرعاً وقانونا طلعت من المحكمه جنت كلش فرحانه عبالك حمل وانزال من ضهري ..
....سلم عليه خالو عادل وگال ..
... عادل...يابه رسل اني اجيت وشهدت وياج ضد ابني حتى اوفي بوعدي الج من كلتلج بيوم زواجج من يزعلج حاتم رح تلگيني اني بوجهه
واعتقد وفيت بوعدي بس عندي طلب منج .. اريدج كل فتره تجيبيلي عزيز اشوفه لا تحرميني منه هذه حفيدي واني مااكدر على فراگه وترى الي عافج هوه خسر انتي جوهره متتقدر بثمن بس ابني ماعرف قيمتج وخسرج يجي يوم ويندم على كلشي سواه بيج صدگي ..
....تقربت بست ايده وهوه باس راسي وكلتله ..
...رسل....خالو اني اعتذر اذا بيوم من الايام بدر مني تصرف بالحظة عصبيه وبالنسبه لعزيز تدلل كل اسبوع ادزه الك يبات يمكم ليله اني مالي علاقه بحكم المحكمه اني بس ردت الحكم حتى اضمن حقي من حاتم بس شوفة عزيز شوكت ميعجبك بس خابرني ادزه الك هذه ابنكم ومرجوعه الكم مهما كان.
....عادل ...الله يحفضج ويبارك بيج بنتي روحي اتوكلي بالله .
...رسل...رجعت لبيت عمتي ولميت غراضي كلها وملابس عزيز وسلمت عليهم ورجعت لبيت امي طبعا نورس ميدري بيه من طلعت لان جان طالع بالدوام صادف بيومها دوامه مسائي ..
....رسل ...رجعت للبيت لگيت الوجوه مگلوبه مامه ضايجه وسالي مثلها باوعت عليهن وكلت ..
...رسل...ها خير منو مات شبيكم ..
...كفاح ...ارتاحيتي هسه من طلگج ..
...ضحكت وكلتلها..
...رسل ...تردين الصدك لا والله ماارتاحيت ..
...سالي...انوووب لعد شنو اليريحج..
....رسل... هسه اني اگلج عفتهن ورحت لبست ثوب وشديت وصله وگمت ارگص على اغنية ساجده عبيد خاله وياخاله..
...اركص واضحك وسالي تغمني بيدها وتضحك عليه تگلي خبال اي والله مامه شافتني هيج عافتني وراحت لغرفتها وخلصناها ضحك اني وسالي للصبح بيومها .
...............
...رفيف...من يوم المشكله مال سالي وسمعنا بيها سقطت غمار حابس نفسه بالغرفه ميطلع منها ابد بس ياكل ويأخذ علاجه وينام واحنا عفناه براحته اليوم رجعت من الدوام طبيت للبيت جان اشوف نسوان بالصاله وامي ونوار يمهن ويسولفن اول ماطبيت صاحتني امي كالت تعاي ..
...طبيت وسلمت عليهن كلهن استقبلني بالاحضان ويتغزلن بيه وحده تباوع للثانيه ويگولن ..
...حلوه ماشاء الله اكول عصام كاتل نفسه عليها..
...رفيف...هنه كالن عصام واني وگف گلبي عزه منو هذه اانوب..
...عفتهم وركضت لغرفتي اول ماطبيت اتصل بيه معتصم فتحت خط واني ابجي وكلتله..
...رفيف...عزه العزاني معتصم الحگلي ..
...معتصم...خير ياستار شبيج .
...اكو نسوان اجني يخطبني من امي هسه شفتهم .
...ضحك وكال..
...اي هاي امي واختي ومرت اخويه شافوج مو ..شگالوا اكيد عجبتيهم.
...رفيف...معتصم شبيك مو اهلك سمعتها تگول حقه عصام كاتل نفسه عليها ..
...ضحك اقوى وكال ..
...معتصم ...ولج هذه اسمي الثاني مواني عندي اسمين بالجنسيه اسمي معتصم وبالبيت يصيحولي عصام يله عوفي الحجي وروحي حضري نفسج اريدج تطلعين گمر حتى امي تشوفج احلى عروس .
....رفيف...صدك هاي انت دزيت اهلك ليش ماكلتلي مو الصبح خابرتك .
...اي اني ردت أسويها مفاجأه روحي هسه يمهم ومن يطلعون نحجي حبيبتي ..
...رفيف ...اوكي رايحه باي ..
...رفيف لحظه .
...ها شنو .
...احبج
...يله باي
...باي
.........
....رفيف...بدلت ملابسي لبست فستان وردي وحطيت مكياج خفيف ومشطت شعري وبقيته مفتوح حطيت عطر ورحت يمهم اول ماطبيت وجان اسمع امي تگول ..
....زحل ...الله يرزقكم ببنت الحلال بس ماكو نصيب شنسوي .
......رفيف...بقيت جامده بمكاني شنو يعني امي رفضت ليش عود شنو السبب ..
..........................
يتبع ♥️
#زهراء_الطائي
تصويت وتعليق وتعليق بين الفقرات حبايبي 🌺