🌧🌧يوم الخميس 1 يناير 2015
2:10 م
إلي مدوبني في ليل وآهات...بيحن عليا ساعات وساعات.. مرة بتبعتلي عينيه سلامات.. مرة بنظرات مرة بعبارات..ويداري يابويا عشر مرااات
هوا محيرني معاه كدا ليه.. مرة مع قلبي ومرة عليه..
---------------------
أسييييييييييل يا أسييييييل
واااك زي العادة السماعات في ودانها ومعلّيتهم وماتندريش ع الدنيا منين زارقة
الكلام قالاته العمة ع بنت خوها إلي كانت حاطة السماعات وتقرض في السلاطة الخضراء لغداهم إلي كانت مطيباته كسكسي.
خشت عليها عمتها نحت السماعة وكلمتها بعصبية:
أنتي يافرخة والله ماحتتريحي لن تترزي فيه تليفونك هذا، المرة إلي فاتت خداته منك أسبوع ،المرة هذه معش تحلمي بيه حتى الحلم
أسيل هيا تبشر في الخيار للسلاطة:
متخافيش ياعميمة موصية(بيسا) لما تخش الشعشبونة
وتفتح الباب الخارجي تجي تكلمني
عمتها وهيا تنحي في مغطة الكسكاس :
يعطيك الهني يافرخة على هالريحة
فايحة تفكر فيا في المرحومة ماكُنتش ناكل ونتبنن ونشبع إلا من إيديها،
وبعدين تعاليلي هنايا كانك عابية
على بيسا راهي ناااعسة والتلفزيون حداها
ع قوه يعني متنوضش ولا بمداهمة.
أسيل تحط في الملح للسلاطة
وزيت الزيتون ومن داخلها انغصت
لما سمعت من عمتها سيرة أمها،
ترحمت عليها بالهمس وقالت
لعمتها بنبرة باهتة:
حيه عليا كان روحت الشعشبونة معناها مشيت أني وفوني في خبر كان
عمتها اتكت بظهرها عالدولاب متع المطبخ حست بنبرة أسيل تغيرت لما انجابت سيرة أمها حبت تغير السيرة :
معناها احمدي ربك إلي خشيت قبلها...
وقربت خدت منها سماعة لقتها
تسمع في الأغنية إلي كانت فاتحتها
وتعاود بروحها تكلمت باندهاش وضحكة:
فرخة وحق الله نحس فيك أنتي
مواليد 85 مش أني،
معقولة وحدة في عمرك تسمع في أغنية إيهاب توفيق إلي لما نزلت كنتي قعدة بالشمال.
أسيل قعدت تقلب في عيونها :
إلي يسمعك يقول نتكلم مع العمة باشا
إلي مواليدها ألف ومية وشبشب،
بعدين ماهو الفضل ليك أنتي
إلي حببتيني فيهم الأغاني هادم.
عمتها نحت السماعة من ودنها
وجت بتطلع رجعت تلفتت قالت لها :
هيا وتي السفر ع قولتك
الشعشبونة قريب تروح ماتلقاش الغدي واتي ادير فينا نهار ،من غير شي الأوراق إلي تكمل
فيهم والإجراءات الروتينية بري هني تعالي غادي تنفخ الدماغ هذا غير الجميدي إلي برا والمطر إلي موقفتش من الصبح سقدي روحك .. وطلعت من المطبخ
💫💫💫💫💫
نتعرفوا ع أول عيلة
⭐أماني عبد الحميد شكري مواليد 85
مطلقة وعندها بنت اسمها بيسان
مواليد 2006
أماني دكتورة صيدلانية تشتغل في صيدلية مشاركة فيها بالنص هيا وصديقتها
أماني إنسانة مسالمة وهادية و حساسة هلبا..
وشخصيتها ضعيفة تعرضت في حياتها
لمشاكل ومآسي متواصلة خلت شخصيتها مهزوزة وبدت تخاف من ظلها ..
وحنعرفو التفاصيل لاحقا.
⭐أسيل أحمد شكري مواليد 98
بنت أخ أماني
أمها وبوها توفوا وهيا عمرها 5 سنين
في حادث سيارة سنة 2003.
أسيل النقيض من عمتها
اللسان طويل وماتعرفش تسكت على حقها ،
شجاعة متهورة متخافش من شي شخصيتها قوية عنيدة وأخت رجال زي ما يقولوا.
جميلة وناعمة وملامحها حلوة وطفولية ..
شرسة وحادة الطباع ومتوحشة لما حد يجي على حقها ..
ومع ذلك عندها حنان دفين وحمائية لكل شخص قريب منها ومحتاج لها
طالبة في الثانوية وفي نفس الوقت تشتغل في مزين معروف نظرا لظروفهم المادية الصعبة .
تكفل بيها عمها أسعد وقعدت
تحت وصايته واهتمت بيها عمتها أماني.
أسعد عبد الحميد شكري
مواليد 80 عم أسيل ،،
رجل انطوائي على حاله موظف في شركة مقاولات خارج مدينتهم شخصيته ضعيفة
متردد وقليل الكلام.
ومرته حكمات(الشعشبونة)
مواليد 81 تشتغل مدرسة تاريخ
إنسانة وصولية انتهازية أنانية
يهمها نفسها فقط متحبش حد خير منها،،
تغير من أماني بشكل لا يوصف..
ولأن شخصية أسعد راجلها ضعيفة وبسبب
ظروف ثانية استغلتها
بدت بالنسبة لأسعد السلام
سلامها والكلام كلامها
كل شي في يدها فلوسه وقراراته ..
ومعندهمش أطفال.
كلهم عايشين في حوش أهل أماني حوش قديم في زنقة من زناقي
هالمدينة الجبلية الشامخة
إلي هما عايشين فيها..
🌿🌿🌿🌿🌿🌿🌿🌿🌿
3:35م
في حوش أهل د.عيسى
كان مقعمز عالاب توب ومركز يشتغل عليه وشاد الدخان بين صوابعه، خشت عليه أمه للبلاكونة ومكانش مركز عليها وهيا تنادي فيه لن وقفت قدامه وفي يدها صفرة فيها فنجانين قهوة ..
عيسى أول ماحس بأمه قام عيونه من عاللاب توب وشاف أمه طول طفى الدخان ووقف خدي منها الصفرة حطها عالطاولة الصغيرة جنب كرسيه
أمه(سليمة): خيرك يا عيسى مسمعتنيش كنت بننشدك تشرب قهوتك في الصالة ولا نجيبهالك في البلكونة.
عيسى : قعمزي ياأمي وسامحيني ياحجوجة كنت مركز في حاجة عالجهاز مسمعتكش، وبعدين علاش الزوز فناجين مش قلنا قهوة لا يام.
سليمة قعمزت وضرباته على ذراعه: اسمع ياولد مش كان وليت دكتور بتتشرط عليا أيوه، على قولت هذه إيه وعشرة غيرها لا.. وحق سيدي مولاي القهوة شاربتها اليوم اللطف عليا عقابها الحاجة سليمة بيحكم فيها ولد أمس.
عيسى وهو يضحك على عصبية أمه: لا عاش ولا
كان يا حجوجة من يكبر عليك أنتي عارفة تهمني صحتك و....
قاطعاته بتعصيب: اسمع اسمع الموت واحدة وربي واحد وفكنا تره وبعدين قولي..
خيرك مش في حوشك حدا مرتك اليوم
خميس يا ولد، شن صاير جديد؟؟
عيسى: والله يما ما عاد فيا راس للمشاكل خلاص، من هداكا اليوم لليوم وحني على نفس الموال وأني تعبت يما تعبت،،،
وخاش على موضوع جديد وخدمتي هذه تبيلها بال صافي جيتك هنايا بش نكملها وتوا مع فنجان القهوة من تحت إيدياتك
ياحجوجة جت في وقتها ..
سليمة وهيا تشرب في قهوتها ومركزة في ملامح ولدها: المهم المغرب تكون في حوشك وتبات حدا رفيقتك وإن شاء الله ربي يهدي سركم.
عيسى : أكيد يما عارفتيني من أمتى نبات برا الحوش أني.. وكمل تركيزه عاللاب توب وأمه تشوفله وواجعها حاله.
الدكتور عيسى متزوج من صابرين.. وأمه سليمة
عنده أختين الصغيرة عبير متزوجة من شهرين وعُلا متزوجة وعندها ولد وبنت (علي ورواسي)
وأخ أصغر منه متوفي من 8 سنين اسمه علي
🌿🌿🌿🌿🌿🌿🌿🌿
في مدينة ثانية بعيدة بحوالي 4 ساعات
عن المدينة إلي فيها عيلة شكري
كان فيه ڤيلا كبيرة وتحديدا
في صالة استقبال الرجال الكبيرة
ناس معزومة على العشي إلي مدايره الحاج رضوان الراجل الكبير عمراً وشأناً
لحفيده (رعد)
إلي كان راجع لبلاده بعد غربة 7 سنوات ،
وإلي سيبها لظروف قاهرة
خلاته يسيب ليبيا ويسيب حلمه معاها،،
بعد ماودع الحاج رضوان وأولاده وأحفاده ضيوفهم ،،
كان الحاج رضوان منفرد بحفيده رعد بش يفهم منه كل تفاصيل جيته المفاجئة للبلاد.
الحاج رضوان وهو مقعمز في مكتبه
مع أولاده فاروق وفيصل
وراجل بنته منصور وأحفاده الشباب:
إيه يالرعد(يحب يناديه بيه معرف)
شن قررت في جيتك ،
نا ليا مخليك من أمس عارف العيلة
مرايفين عليك واجد وماحبيت ننشد..
تو بتفهمني هالجية على غفلة شن هو سببها؟؟
وعلى شنو ناوي؟؟
رعد الشاب الصارم كانت تعابير وجهه حادة
تخلي إلي قدامه ميقدرش يتنبأ بشن يفكر
ولا شن يحس
من كثر جمود ملامحه وقسوتها
تكلم بصوت ليه من اسمه نصيب فيه:
نا ياجدي جاي لمهمة محددة بنديرها ونرجع
من وين ما جيت
نا البلاد هذي ماعندي فيها شي وأنت فاهمني
وغير هكي خدمتي وأحوالي كلها في كندا
مانبي نسيب إلتزاماتي ولا حياتي إلي تعودت عليها..
نا ليبيا ماعاد عندي فيها شي
ولولا ثأري وناري إلي لعند تو مابردت
راني ماعتبتها البلاد نهائيا
يعني هيا فترة مؤقتة وإن طالت
الجد شاف لحفيده بنظرة عميقة شاف فيها من عيونه إصراره على إنتقامه من ناس طعنت الحفيد في ظهره،
شاف لمحة حزن عميق وظلم
تعرض له حفيده ومش قادر ينساه بعد
كل هالسنين، لكن هو الرعد الحفيد النسخة
المطابقة لجده إلي مستحيل
يسكت عن حقه ولو بعد سنين
لذلك قال بنبرة حاسمة وقوية في وسط
الصمت إلي كان مالي المكان وماحد من الموجودين قطعه بالرغم من عدد الموجودين
في المكتب معاهم:
نا عارف وحاس بيك وعارفك مش حترتاح غير لما تجيب حقك بإيدك ونا معاك ،
مانبي نقول غير عينك من روحك
وماتنساش أنه في ظهرك أعمامك وضناهم..
يعفسوا عالنار على سباك.
رعد وقف وطبس باس على رأس جده
وهوا يقول:
عارف ياجدي وبعون الله حناخد بحقي
من كل حد ظلمني وخدا مني كل أحلامي،
وتو سامحني ياجدي هااالك
ونعسان دوبني ندير كم مكالمة ونعدي
نرقد عشان
عندي موعد مهم حنتفق فيه على كل
تفاصيل مخططي على أرض الواقع،
تصبح على خير ياجدي
تصبحو على خير يا عيلة.
الكل رد عليه أما الجد تنهد بحرارة وكان يشوف لظهر حفيده :قدامك كل الخير وربي ينصرك.
العيلة الثانية عائلة الحاج رضوان إبراهيم
رزق الله
عنده 2 أولاد فاروق وفيصل
و2 بنات توأم فريحة،
و فيروز إلي توفت من وقت طويل
⭐فاروق الولد الأكبر رجل أعمال معروف
زوجته شريفة سيدة مجتمع وناشطة اجتماعية
أولاده رضوان مواليد 82 محامي
زوجته عواطف عنده توأم ضحى وضياء...
رائد مواليد 84 أرمل
وعنده بنت اسمها رهف مقيم في تركيا،
رضا خاطب بنت عمته صفاء..
هوا ورعد مواليد 87 توأم
رواسي مواليد 90 متزوجة
ولد عمها إبراهيم،
رغدة مواليد 93 في السيمستر
ماقبل الأخير كلية المحاسبة
⭐فيصل دكتور في السياسة ومذيع مشهور
زوجته ناجية ربة بيت
أولاده إبراهيم مواليد 84 راجل رواسي،
آدم مواليد 86 يخدم مع عمه في مجموعة شركات العيلة ،،، زوجته جنات ،
إسلام مواليد 90 دكتور أسنان
⭐فريحة أستاذة جامعية
زوجها ولد عمها منصور
أولادها عبد الجبار على اسم جده مواليد 88،
محمود مواليد 90،
صفاء مواليد 92خطيبة رضا
وليد 93،
سمر مواليد 95.
🌿🌿🌿🌿🌿🌿🌿🌿
يوم الأحد 4 يناير 2015
الساعة 10:40م
كانت أسيل وعمتها أماني مكسدات في فراشاتهم في دارهم البسيطة يلي كانت عبارة عن فراشات بسيطات بمساندهم ودولاب مهني جهة منه محطوطين فيه ملابسهم والجهة الثانية للبطاطين والحاجات الزايدة..
المهم العمة كانت عيونها خلاص بيتسكرو
التفتت لبنت خوها وتكلم فيها بصوت نعسان:
أسيل .. سيلا
أسيل وهيا تتصفح في الفيسبوك:همممم
أماني:غدوا كان طلعتي قبل الخمسة من المزين ادهمي عليا نروحو جميع بش نخطمو عالمحل نأخد رأيك في اللبسة إلي بنشريها لبيسا كان عجباتك بناخدها ذوقك ديما حلو يافرخة.
أسيل التفتت لعمتها وقابلتها: تمام بيناتنا تليفون كان كملت خدمتي قبل لا تروحي ندهم عليك.
غطي بيسو الجو يصقع هلبا في الليل.
أماني وهيا تغطي في بنتها: أصلا مستغربة كيف رقدت جنبي ومش بحداك الليلة.
اسيل لفت بترقد على جنبها اليمين زي عادتها لأنها خلاص جتها النعوسة :مش منها من اللعبة إلي زلبحتيها بيها في فونك بش تجي حداك..
وسكرت فونها بعد لا سكرت النت
تصبحي على خير عميمة.
أماني وهيا نايضة بتطفي الضي: وأنتي من أهله.
طلعت طفت ضي الصالة وسكرت باب دارهم ورجعت رقدت في مكانها جنب بنتها.
🌿🌿🌿🌿🌿🌿🌿
يوم الإثنين 5 يناير 2015
في زنقة حوش أسيل وأميرة صاحبتها ماشيات الإثنين للثانوية ،،، الاثنين كانوا سنة ثانية ثانوي قسم علمي أميرة نديدة أسيل مواليد 98
أسيل كانت ماشية وشبه نعسانة: والله حرام عليهم إلي اخترعوا القراية وهمها حسني ناقصة نووووم.😑😑
أميرة تضحك عليها: أني في حياتي ما شفت وحدة تحب النوم زيك يعني لو قعدتي 23 ساعة ونص في اليوم راقدة متقوليش لا.
أسيل وهيا تخمس في وجه صاحبتها: الله أكبر من عينك حاسدتيني حتى على النوم طبعا يا ماما راحة وهدوء وأحلام سعيدة وين تفهمي أنتي استمخاخ يا بنتي استمخاااااااااخ.
أميرة ضربتها على كتفها : باهي يا استمخاخ أنتي خفي روحك تأخرنا بلاش أبلة مبروكة اليوم تعاقبنا ،،، ساد الأسبوع إلي فات كله تأخير ونتسبلوا بالمطر، وحضرتك تقوليلي ماخاطريش نمشي والله لو بمزاجك راهو ....
قطعت عليها أسيل : لو بمزاجي راهو نقرو في الأحلام مناهج حالمة رومانسية سعيدة عن العشق والغرام 😍😍مش ديناميكا وفيزياء وهم مايلتم .
ضحكت عليها صاحبتها وكملوا طريقهم وهما يتناقروا زي عادتهم من لما كانوا يقروا مع بعض في صف أول ابتدائي.
أميرة صاحبة أسيل وجارتها الحيط في الحيط
زي الوخيات بالضبط
🌿🌿🌿🌿🌿🌿🌿🌿🌿🌿
4:00م
مكالمة هاتفية: أيوة دكتور عيسى
إيه إيه عرفته المطعم طلعلي على الgps
خلاص نص ساعة ثانية بعون الله
ونوصل فيك.
د.عيسى:تمام يا أفندي في الإنتظار توصل بالسلامة.
رعد: سلام ..وسكر المكالمة
ورجع يتفرج على مشارف المدينة من شباك سيارته وفي قلبه غصة وتنهيدة لمدينة كانت الحلم .. و الظلم💔.
🌿🌿🌿🌿🌿🌿🌿🌿🌿🌿🌿🌿🌿🌿
4:20م
ميرو كلمت عميمة قالت لي تستنى فيا
في الصيدلية بنمر عليها بما أننا كملنا
قالت لي بتستناني.
أميرة:تمام وأني بنكمل الزبونة هذه
وبنكلم بابا بش نمر عالخياطة اليوم بنستلم بدلتي قالت لي أمس عدلتهالي
خلاص كان هذا راهو سايرتك
وروحنا جميع.
أسيل:خلاص أني طالعة قولي لمدام
نوال طلعت باي يا قلبوشتي.😘
أميرة: باي😘
المسافة من المزين يلي تشتغل فيه أسيل وصيدلية عمتها حوالي 10دقائق مشي عالرجلين،
وهيا في نص المسافة اتصلت بيها
عمتها وكان صوتها ملخبط وملهوف،
فتحت أسيل الخط :أيوا عميمة..
أماني كانت ماشية وتتلفت
وتتكلم بسرعة :
أسيل اخطمي عالصيدلية خودي من هالة
شنطتي وروحي طول كانك طلعتي من المزين
أني سبقتك للحوش.
أسيل باستغراب: شن صاير عميم....
وقبل لا تكمل جملتها كان الخط تسكر.
نحت التليفون من ودنها وقالت بحيرة:
خيرها هادي..؟؟
رجعاته لجيبها وكملت طريقها
باتجاه الصيدلية إلي تشتغل فيها عمتها وهيا مسرعة في مشيتها لأنها انشغلت على عمتها
وتبي تفهم خيرها
أول ماوصلت قدام الصيدلية بالضبط تلاقت مع صاحبة عمتها وشريكتها في الصيدلية هالة طالعة
منها ويبان عليها القلق:
أسيل باهي إلي جيتي خشي اقعدي
في الصيدلية خلي نمشي نشوف عمتك
طلعت بتجيبلنا حاجة ناكلوها من المطعم إلي جنبنا ومعش جت ليها أكثر من نص ساعة
طالعة توا
أسيل: توا توا كلمتني وأني جاية وقالت لي ادهمي عالصيدلية جيبيلي شنطتي وقالت لي أنها روحت لكن صوتها معجبنيش اشبح خيرها
هالة باستغراب: إن شاء الله خير وأني اتصلت بيها ندور فيها ماردتش عليا اشبح شن صاير
أسيل: يستر الله توا أني مروحة طول نشوف شن صاير ونكلمك
حييييه ياحييييه شن هالحاجات الصقع
بي ام دبليو حلم حياتي😍😍
وجت بتمشيلها شدتها هالة من يدها
:ياغبية وين ماشية نهارك ابيض
أسيل وعيونها يلمعوا 😍😍
بي إم ياهلولة خليني خليني إن شاء الله حتى نحط روحي تحت عجلاتها رااااضية
هالة : ياعليك حالة حالتك ماعندكش الروح مع البي إمات أنتي لاحسين لك عقلك
افرضي يطلع فيها حد
خلي نخش نجيبلك الشنطة استنيني
هني تتحركي نهارك بلاش فضايح نعرفك أني
هالة خشت وأسيل معدلتش على كلام هالة قربت من السيارة بدون تفكير وقعدت تتفرج عليها
وتساوي في وشاحها على مرشها المظلم
تكلمت بصوت منخفض وهيا عيونها يلمعوا بانبهار :
الله الله هذا إلي بيشري ولابلاش
بي ام عالية وفخمة وسوداء زيادة
مفصلة على ذوقك يا بنت يا سيلا
وتقول لك هالة لاحسين لك عقلك
تي هيا لحست لي عقلي وخطفت لي قلبي
نهضت رأسها وقالت : أعطيني ياااا الله
ونفخت خدودها المليانات بطفولية وهيا تشوف في السيارة بانبهار
وفتحت تليفونها وصورت سيلفي بكذا لقطة ليها مع السيارة
شوية وطلعت هالة لقتها تتأمل في السيارة زي الصغار إلي ماشيين لديزني لاند أول مرة في حياتهم
جبدتها مع يدها وتبعدوا شوية عطتها شنطة عمتها ونسختها من مفاتيح الصيدلية
واعطتها على رأسها لأنها مسمعتش كلامها
وأسيل خدتهم وولت دارت طلة أخيرة عالسيارة
ومشت بتروح وكانت كل شوية تتلفت تشوفها لن ادرقت عليها تماما
أما هوا إلي كان مقعمز في السيارة ويستنى في مكالمة من حراسته الخاصة إلي نزلوا يأمنوا في المطعم إلي بيخشله
كان فاتح فونه يتصفح في خريطة المدينة عالgps
لما نهض عيونه لفتت نظره البنت إلي تتأمل في سيارته بانبهار ويشوف فيها اتمتم بكلمات مسمعهمش بوضوح
وبعدين طلعت تليفونها وبدت تصور
بكذا لقطة مع سيارته
جذباته بحركاتها الطفولية وكيف واضح قداش عاجبتها السيارة لحد ماجتها وحدة ثانية بعدتها وكيف ولت تتأمل في السيارة للحظات
وبعدين بدت تتبعد قعد مركز
عليها من مراية السيارة ويضحك عليها لأنها كل ماتبعد شوية تلف وتشوف السيارة ثاني لن اختفت تماما عن عيونه
🌿🌿🌿🌿🌿🌿🌿
في مطعم (نجمة الجبل )
مطعم بسيط وديكوره حلو ومتواضع ..
في طاولة في إحدى زواياه كان الدكتور عيسى عيونه على نافذة المطعم المطلة على جبال منظرها ساحر ..
تحدد في معالم هالمدينة الجبلية،
ودماغه كان يراجع في لحظات
مروا عليه زي الحلم شاف فيهم مصادفة
حب عمره،
إلي كبر عليه من أيام كانوا مع بعض،
في المدرسة والثانوية وحتى في الجامعة،
حب عمره إلي تخلت عنه بدون سابق إنذار
بعدما كان باني معاها أحلام وآمال
ضاعت منهم بكلمة ،
لعند هاللحظة وهو مش فاهم ولا قادر
يصدق كل الكلام إلي انقال،
مع أن يلي داراته سببه واضح وضوح الشمس..
وفي هالأثناء كان رعد متجه
للطاولة إلي مقعمز عليها الدكتور عيسى
المقابلة هذه كانت بالنسبة ليهم الاثنين
مصيرية،
وعلى أساسها حيتحدد مصير هلبا حاجات
حتكون نقطة تحول بالنسبة ليهم.
عيسى لما شاف رعد وقف سلم عليه وقعمزو على طاولتهم
عيسى: نورت البلاد ومدينتي تحديدا يا أفندي
وأخيرا اجتمعنا
رعد: المدينة منورة بهلها تصدقني لو نقولك المدينة هذه يعلم الله قديش في قلبي ليها،،
أشر بسبابته ع قلبه :
الحلم مات فيها والموجعة ماجتني كان منها.
بالرغم عشت فيها أجمل أيام حياتي
عيسى وهو يسمع في هالكلام منه يتأمل في نظرة عيونه إلي كانت مليانة بلمعة حزن وغضب
ذكراته بمشاعر كانت في قلبه ..
ومست فيه وجع وحرقة قلب ،،
تنهد بكتمان وقال:
شن تحب نطلبو أني قاعد لتوا
بلا غدي وميت من جوعي وبصراحة وأني جعان مستحيل نجمع معاك كلمة وحدة
من إلي ناوي عليه يا أفندي.
رعد ضحك وكان عارف أنه عيسى قصده
بهالكلام يغير السيرة:
تمام تمام نا عارفك منظرك هذا يقول أنك ربع ساعة ثاني احتمال تولي عليا نا وتاكلني،
نادى عيسى العامل وطلبو وجبات خفيفة ..
حكو فيها دردشة عن وضع البلاد
بشكل عام وحاول عيسى يعطيه معلومات
عن وضع المدينة إلي هما فيها
بشكل خاص ورعد من خلال كلامه
حاول يجمع ويرتب أفكار عن المهمة
إلي كان ناوي ينفذها وحاط كل تركيزه عليها.
رعد ملتفت للإطلالة الجبلية للمطعم ..
التفت لعيسى وقال:
توا خلينا في وضعنا الصح ،،
طلع فونه من جيبه وفتحه ومده لعيسى
إلي شاف للشاشة وبعدها شاف لرعد
باهتمام
رعد سكر الشاشة وقاله:
الأسماء هذه هيا إلي ظلمتنا في بداية مشوارنا ..الناس هادم غدروا بينا
عيسى: الأسماء الثلاثة هادم حناخد بثاري منهم ولو آخر يوم في عمري
بالنسبة للمنتصر هذا ساهل نوصلوا فيه
ماليشي هاديكا القيمة ملعبهاش صح
لما انقلب عليهم قلبوا عليه
و جمال ابريك هذا مجرد ذيل
عند الرأس الكبيرة قعد شاد فيه ولاقي مصلحته معاه
كل خدمته إلي مش نظيفة هو إلي يمشيله فيها لكن طبعا المعلومات هذه سرية
وماحد قدر يشد عليه شي
أما صالح العابد هذا هني حاجة مش ساهلة،
بعد الأحداث ركب الموجة مع أن كل
الناس هني عارفين هوا منو وشن مداير
لكن كان لاعبها صح لحد هالساعة،
مفيش من وصل فيه غير بشوية كلام فيس وتعليقات من وراء الشاشة
غير هكي مافيش.
رعد يسمع باهتمام:
ناكل يلي هوا فيه ما يهمني في شي، ناحكايتي معاه عمرها 8 سنين فاتن،
وتوا جا وقت ناخد حقي
والعين بالعين والبادي أظلم.
عيسى:وأني معاك وأنت عارف
لكن هذا راهو في الجديات هو حية وماهوش ساهل يعني مش بالساهل نوصلوا فيه
تبيلها تدبير وتخطيط وتكتكة صح
رعد: كلامك فيه صح لكن لو خدمنا بدقة نوصلوله وناخدوا بحقنا منه ثالث ومثلث ونا حاسب بحساب كل خطوة
وبعون الله يصير كل شي كيف مانبوا
وماتنساش دعمنا المهم هنا الأفندي
سليمان حتى هو صاحب ثأر
عيسى بتركيز: تم وأني قلتهالك ومازال عند كلامي قولي المطلوب وع بركة الله.
رعد: أنت تو خليك على اتفاقنا
وتمارس حياتك عااااادي جدا، لعند نبدوا في تنفيذ أول خطوة مع بعض ونجمعك بسليمان في أقرب فرصة إن شاء الله
عيسى: متفقين ياأفندي وربي يبرد نارك
وناري
رعد تنهد من وسط خاطره وكملو يشربو في شاهيهم ..ودعوا بعض وكل حد منهم مشي لوجهته.
🌿🌿🌿🌿🌿🌿🌿🌿
أسيل خشت لحوشهم استغربت من الهدوء إلي فيه شافت في المطبخ مالقت حد،
خشت لدارهم هيا وعمتها أماني لقتها راقدة
على فراشها وعاطية بالظهر محبتش تكلمها
حولت شنطتها وشنطة عمتها
وغيرت حوايجها وطلعت وسكرت الباب.
لفت للجنان الخلفي لقت عمها
أسعد يلقط في زيتونتهم إلي في الجنان
وفاتح حداه تليفونه
على راديو إحدي الإذاعات
الليبية ومكسد عليه.
أسيل: السلام عليكم سعدون
أسعد وهوا يثبت في السلوم
بش بيركب عليه للزيتونة تلفت عليها:
وعليكم السلام ورحمة الله ،
باهي إلي جيتي وجابك ربي عمك
غابر بالعطش جيبيلي امية
وكان تسخنيلي حتى طاسة شاهي
تبدي أحسن وحدة ..
عمتك لتوا مروحتش وأني من بكري
عابي عليها قالت بتروح قبل العصر بش تجي تعاونني
أسيل استغربت كيف عمها ميعرفش أنه
أخته روحت :
أماني راقدة في الدار شكلها روحت
مريضة خشت رقدت طول ومادوراتكش.
أسعد: غريبة مش عوايدها مدورتش
حتى بنتها
أسيل: والله منعرف، وينها هيا بيسا؟؟
عمها وهوا يأشر على جنان جيرانهم :
طلعت تلعب مع مصعب وفرح بوهم يلقط في زيتونات جنانه.
أسيل لفت وهيا بترجع للحوش:
10 دقائق بس ندير شكشوكة عالسريع
ناكلوها مع بعض أكيدة جعان حتى أنت
وأني متغديتش علقت خدمة دريكت.
خشت للمطبخ من باب الجنان وهيا تفكر في نفسها:
زعما خيرها عمتي !؟
وهديكا الشعشبونة كالعادة
مخلية راجلها ومدايرة سيارتها وتلود،،
اااااخ يا ربي كان نعرف هوا على من يخدم
إلي تسكرف ومخلياته كل يوم بروحه...
استغفر الله من هالعيشة وخلاص.
كملت شكشوكتها دارت بيها سندويتشات
وسخنت الشاهي وطلعت معاه
شيشة امية وطاسة
وطلعت نادت على بيسا كلت معاهم ..
وأسيل قعدت تعاون في عمها بالرغم
من قلقها وخوفها على عمتها وشن صار معاها
خدموا لن أذن المغرب وخشوا مع بعض.
🌿🌿🌿🌿🌿🌿🌿
يوم الثلاثاء 6 يناير 2015
3:45م
في المزين إلي تخدم فيه أسيل
كانت مقعمزة هيا وأنتيمتها أميرة
في الفيراندا متعه ويهدرزو.
:والله منعرف خيرها اليوم جوها ملخبط،
قلت لك امبارح دوبها ناضت توضت
وصلت العشاء وخشت لقتني نغسل في الماعين طلعتني وكملتهم هيا،
وأني خشيت نعست طول من التعب ،
والصبح كانت عادية مهدرزتش عليا إلا
عالخفيف كلمة وقص
وطلعت وخليتها في الحوش،،
حتى الوصايا إلي متعودة تنفخ لي
بيهم رأسي في كل مرة
تقول أول مرة نطلع للشارع بروحي اليوم مدورتنيش بكل.
أميرة: تلقيها صارت معاها حاجة وخافت
تبان عليها تشدها مرت عمك
وأنتي عارفتيها دراه الكبد هديكا ادور في راس من تعشش.
أسيل: باهي شنو إلي صاير معاها نبي نعرف !!... حتى للصيدلية ممشتش اليوم كلمت هالة تفتح مكانها
والشعشبونة تعشش وسكتتي،
تحبكلها قصة تأليف وسيناريو وحوار حكمات الشعشبونة،
حني حوشنا وتعرفيه لا تقدري تفرحي ولا مسموح لك تنكدي إلا بعد ماتقدمي مبررات
لحضرتها بش تريحك،
وأني والله ماواجعتني غير بيسا من هذا كله....
خنقتها العبرة وسكتت وهيا أصلا مكانتش محتاجة تقول أكثر من هكي ..
أميرة رفيقتها وجارتها وأختها
إلي مجابتهاش أمها عايشات مع بعض 24 ساعة في الحوش
وفي المدرسة ولتوا وهما في الثانوي
وحتى المزين ادربوا مع بعض وخدمو فيه مع بعض و مفيش بينهم أسرار.
كملوا العصير إلي كانوا يشربو فيه وناضو كل وحدة بتبدا في خدمتها إلي وراها.
🌿🌿🌿🌿🌿🌿🌿🌿
يوم الجمعة 9 يناير
الساعة 4:30م
وفي المدينة الساحلية
في ڤيلا الحاج رضوان رزق الله
ولأن اليوم الجمعة كانت لمة العيلة كالعادة
أولاده فاروق وفيصل وبنته فريحة وعائلاتهم
مجتمعين عالغدي
يتغدو مع بعض وبعدها يقعمزو
على عالة الشاهي والهدرزة والجو الحلو،
الحاج رضوان رجل قوي الشخصية
وفارض كلمته على أولاده وأحفاده
بس مش بالغصب كان عنده
قدرة كبيرة عالإقناع،
وهذا بحكم عمله كقاضي أحوال شخصية ومستشار قانوني كبير ومعروف
وحتى بعد التقاعد أهالي منطقتهم
وقبيلتهم ديما يلجئوله في حل
خلافاتهم و مشاكلهم.
نساوين العيلة كانو مقعمزات
في الصالة الداخلية إلي مفرشة
جلسة عربية حلوة لامتهم فيها الحاجة نجمة وكناينها شريفة(مرت فاروق)
وناجية(مرت فيصل)
وفريحة حماتهم
والحاجة مهرة سلفة الحاجة نجمة ،
عواطف مرت رضوان الحفيد،
رواسي مرت إبراهيم وأخت رعد،
جنات مرت أدم،
كانوا يتكلمو على تحضيرات عرس رضا توأم رعد وصفاء بنت عمته...
وخوها عبد الجبار ..
رواسي: الله ياماما لو رضي خويا رعد خطبناله راهو تو عرسه مع توأمه محلاه الجو
شريفة أمها: والله كان بودي هالشي
نفرح بيه ويقعد تحت عيني هنا معانا..
كافيني رائد إلي شاق قلبي عليه وعلى رهف(بنته)
منشوفوش فيهم كان في الأعياد
وميطولش يومين ويرجع لتركيا..
الحاجة مهرة كانت مقعمزة جنب سلفتها
الحاجة نجمة إلي كانت كعادتها اطيب في الشاهي بالعالة:
ليه عليك يوخيتي يانجيمة كنتي كلمتي
مولى بيتك عارفاتيه عنده كلام معاهم
وخديتولهم مع خوهم الإثنين
راحو رجالة نتهنوا عليهم
ونفرحوا بيهم كلهم.
الحاجة نجمة تخدم في الشاهي:
والله يا مهيرة ياأختي من لما عرفت
بمرواحة الرعد ونا كلمت الحاج يكلمه
لو عنده مكان نعدوله نخطبوله ولا نحنا
ندوروله بنات الحلال واجدات
ونا والله خايفة يدير كيف خوه مع المرحومة يجيبها لينا ويقول هذه مراتي
لا وجتنا بطنها قدامها، والله عدت أيام علينا
يعلم الله بيها كيف كانت
نا نبيهم كلهم يلتموا ويقعدوا قراب
لكن أنتي تعرفي كيف هو
كره البلاد بكبرها وماعاد عنده بيها
وجده قال نا مانبي نضغط عليه راح راجل
وكافيه ماعانى في هالبلاد خليه يقعد وين مايلاقي راحته
ناجية مرت فيصل: إيه ياعمتي صدقتي والله فيصل وقتها قالي باتي يستر الله مايعدي فيها الشر بعيد وبرا..
لكن الحمد لله ربي لطف بينا
شريفة: ونا كلمت فاروق يكلم عمي
وحتى هوا مش عاجبه حال أولاده متغربين كل واحد في بلاد لكن قال باتي قالي عيالك
رجالة وأدرى بمصحتهم. وهو حالف من بعد
يلي صار مع رائد حالف يمين ميتدخلش
في زيجة ولا واحد مرة ثانية.
جنات مرت آدم: تو غير ليش هالسيرة النكد
بس خليهم يجيهم يوم ويتزوجو...
مابيقعدو عزابة طول أعمارهم..
وبعدين من عارف ممكن جيتهم
هذي تخليهم يغيرو رأيهم (قالتها بلؤم )
ركزت على رواسي تشوفلها
هيا وعواطف بتركيز خلاها تتوتر حبت تغير الكلام..
قصدي تو يشوفو خوهم
تزوج يفكرو يديرو كيفه ويستقروا حتى هما..
وقعدت توزع في الابتسامات
ومنها كملو كلام على تجهيزات الفرح...
🌿🌿🌿🌿🌿🌿
وفي تركينة بعيدة عنهم في نفس الصالة
كانوا مقعمزات رغدة بنت فاروق وسمر بنت عمتها فريحة
سمر ورغدة قريبات لبعض هلبا في العمر
(رغدة مواليد 93 وسمر مواليد 95)
ومن صغرهم يلعبوا مع بعض ديما
لن كبروا وبدوا صديقات ..
كانوا فاتحات تليفون رغدة
على الصفحة الشخصية في الفيسبوك
لرائد أخ رغدة.
سمر وهيا تتأمل في صورته
وهو عالحصان ومركب معاه بنته رهف:
الله لو تعرفي قديش رايفت عليه،
يا الله بنموت يارغدة يوم بعد يوم
حبه يكبر في قلبي ويوم بعد يوم
نفقد الأمل فيه،
تعبانة يا رغودة والله تعبت 😢
ودموعها نزلوا،،
تصدقي نخاف نفتح نا صفحته الشخصية منمسكش نفسي ندرزله مسج
نحكيله كل شي في خاطري ليه😢😢
رغدة: لالا سمور فكينا عاد توا
ينتبهولنا بالله عليك،، بلاش دموع
فكينا من جنات عرفتها متصدق تمسك
في قصة،، امسحي دميعاتك واسمعيني.
سمر لفت للعيلة لقتهم لاهيات في الهدرزة
مع بعض رجعت شافت لرغدة
وهيا تقول بحسرة:
لو تعرفي كيف نستنا في رجعته هنا على نااار،
مرايفة يا رغودي مرااااايفة ،شوفي شوفي ووجهتلها الصورة في التليفون:
شوفي رهوفة نسخة عن المرحومة
الله يرحمها كيف بينساها وهو قعد
يشوف في ملامحها كل يوم وكل لحظة
كيف بينساها بس قوليلي .
رغدة وهيا موجوعة على حال بنت عمتها:
غر اسمعيني وركزي معاي أهو تو
العرس جاي وهو مروح ممكن تكون
فرصة ليكم ونا نوعدك إني نساعدك أنه يحط عينه عليك ولو اضطر الأمر إني نكلمه عنك بنفسي.
سمر بفزة وبهمس:
لا يا رغودة لا بالله عليك لو تعزيني بالله عليك ،،نا عشت حبه من لما عرفت
معنى حب، من لما عرفت شن يعني راجل
يملك نبضة قلبك الأولى،
رائد الحلم ومستعدة يقعد حلم
عمري كله ولا أنه يشوفلي بنظرة
مش حلوة ولا انزل كرامتي تحت رجليه
مستحيل هالشي لا نقبله
ولا نتحمله يارغودة والله مانقدر
رغدة كانت عارفة شخصية سمر كويس
لكن متحملتش دموعها خاصة وهيا
عايشة معاها حبها يوم بيوم
ولحظة بلحظة
رغدة: خلاص سمورتي منكلماش
بس حنحاولوا ينتبه ليك بطريقة
غير مباشرة وتق...
قاطعتها سمر:
لا يا رغدة بالله عليك عارفة
نيتك شنو بس منقدرش والله😢
رغدة حطت يدها على يد سمر:
غر اسمعيني بس نحنا حنفكروا
ونحسبوها بدون ميطيح قدرك
ولا كرامتك قدام رائد بعدين أنتي
تعرفي خويا حنون ومتفهم ومنفتح
يعني مفيش باس لو قربتي منه
لكن بالعقل يا سمورة..
متقعديش تشوفيله من بعيد وبس،،
هذا حب طفولتك يستاهل بلاش تسلمي فيه بالساهل ونلقوا وحدة ثانية واخدة مكان المرحومة..
سمر دموعها نزلو لمجرد تخيلت
هالشي يصير مرة ثانية:
تعرفي والله يومها قلبي حيوقف بالأكيد ،،
والله ماني حمل جرح جديد ،،
لا هذا مش حيكون جرح
لا حتكون نهايتنا نا وقلبي في الأكيد.
وأنتي تعرفي شن يصير فيا لما نكون قدامه منقدرش نحط حتى عيني في عيونه ..
رغدة: بعيد الشر عنك وعن قلبك
أنتي بس طاوعيني ولو موصلناش لنتيجة معاه مش خاسرين شي ..
الله بعدين أحلى شعور والله
مرات خويا تكون رفيقة عمري
سمورتي السمحة أم عيون صفراء..
سمر ضحكت وفي صدرها
غصة حزن ولمحة أمل أنه
ممكن يكون ليها مكان في قلب حب طفولتها (رائد ).
يتبع✍✍✍
رجاء ادعموني بالڤوت بالنجمة والتعليقات بش نحس أنكم مركزات معاي
تحمسني وتشجعني
و بعون الله حندير جهدي نكمل معاكم أول بأول
Masa💎