...رفيف ...سديت الخط من ضرار وجان اسمع منقذ يگول..
...منقذ...شبي غمار رفيف شصاير وضامين عليه تعاي يمي .
...رفيف ...سمعته ونشف دمي گمت اتلعثم بالحجي ورحت يمه ...
...بقيت ساكته ماكدرت احجي شنو اگول حاولت اتدارك الموضوع قاطعني وگال..
...منقذ...سمعت المكالمه كلها لتحاولين تكذبين عليه غمار شبي وضرار شيسوي بالمنووم طلبه منج احجي وبدون لف ودوران.
...رفيف...ماكو شي ليضل بالك ضرار خابرني يگول عندي ارق مااكدر انام وطلب مني انطي منوم ياخذه حتى ينام ولأن مينطون المنوم الا بوصفه طبيه دليته على صديقتي يروح يأخذه منها .
...منقذ ...وغمار شبي ليش سألتي عنه هواي ..؟
...رفيف ...مابي شي موكلتلك ياعيني هسه انته المن شاغل بالك وتفكر نام حبيبي ارتاح ليش ترهق نفسك وانت تعبان ..
...خزرني بعيونه وگز على سنونه وگال..
...منقذ...رفييف تحجيين شكوو وغمار شبيي لو هسه اتصل على ضرار وامي واعرف منهم وإذا عرفت منهم واكتشفت ضامه عليه شي والله متلومين إلا نفسج احجييي شكوو ..
...نفخت بضجر وحجيت ..
...رفيف...ههففف ماادري شبي والله العظيم مااعرف ميقبلون يحجولي شي كل الي اعرفه غمار اختفى بنفس اليوم الي اجينا بي لتركيا احنه وبقى مفقود عشر ايام وقبل يومين رجع لبيته ولحد الآن ميقبلون يحجولي عنه شي ولا اعرف شصار وياه لا ضرار يقبل يحجي ولا امي ولا سالي اني هم خايفه عليه وضل بالي يمه موبس انت ..
....مد ايده وكال..
...منقذ...جيبي الموبايل بسرعه انطيني ..
...رفيف ...شتريد تسوي وليش بموبايلي..
...منقذ ...انطيني موبايلج ضرار ميجاوب عليه إذا اتصل بي برقمي صارلي يومين اتصل ومحد يرد عليه جيبي ..
...رفيف...انطيته الموبايل وبقيت ساكته اريد اشوف شيسوي بسرعه طلع رقم ضرار واتصل بي ..
....ضرار ...ها رفيف ..
...منقذ....وياك منقذ مو رفيف ..
...ضرار...هلا بيك منقذ شلونك عيوني شلون صحتك ..
...منقذ...مالك علاقه بصحتي احجيلي غمار شبي شصاير يمكم وضامين عليه.
...ضرار...مابي شي شضامين يعني انت شسامع..
...منقذ...اني ماسامع اريد اسمع منك واريد الصراحه بدون كذب ضرار احجيلي غمار شبي وليش كان مختفي عشر ايام ووين جان ..
...ضرار...والله مااعرف شگولك انته هم صحتك متتحمل يعني اني اگول لو تصير زين وتكمل علاجك وعود من ترجع بسلامه نحجي مو احسن ..
...صرخ منقذ بعصبيه...
...منقذ...ضرااارر قسما بذات الله اذا متحجيلي هسه وبصراحه غمار شبي وشصار وياه باجر الصبح احجز وارجع لبغداد وانعل ابو العلاج لابو حتى العمليه احجييي ولك شبي غمار ..
...ضرار...بس لتصير عصبي يمعود عمليتك بعدها جديده ..
...منقذ...عوف العمليه واحجي فضهاا عاد ..
...ضرار ...رح احجيلك كلشي بس لاتتهور وتنقهر كل مشكله والها حل ترى .
..منقذ...ولك احجي انطق الجوهره عاد موفتيت گلبي ..
... رفيف...بقيت كاعده اريد اعرف شراح يحجي ضرار اباوع على وجه منقذ صار اصفر وگام ينطي الوان وشفايفه ترجف بدون ميحجي شي وگع الموبايل من ايده وتسارعت انفاسه مثل المخنوگ تقربت يمه وكلتله..
....رفيف...شبيك منقذ شصار منقذ فدوه لتخوفني احجي دخيلك غمار شبي ..
...باوع عليه وكال..
...منقذ....لازم نرجع لبغداد باجر ..
...رفيف... ليش شكو صاير شي..؟
...منقذ...غمار محتاجنا اني وياج ضروري نرجع ..
...وحجالي كلشي وصدمني گمت الطم على وجهي وابجي وكلتله..
...رفيف...عزه العزاني غمار مدمن شلوون منين اجته المخدرات وصار هيج عززه..
...منقذ...عوفي اللطم هسه ماعدنا وقت لازم نرجع لبغداد..
...رفيف...شلون نرجع وعلاجك وعمليتك والأطباء هنا منو يكول يقبلون تطلع..
...منقذ...اوقع على مسؤوليتي واطلع رفيف لازم ارجع لبغداد انتي مستوعبه الموضوع غمار مدمن تعرفين شنو يعني مدمن يعني اذا منتلاحگله حياته تضيع كلها ومااعرف شنو ديعيش هسه من شعور وصراع داخلي ..
...رفيف...براحتك حبيبي نرجع بس غير خايفه عليك اني ..
...منقذ...كلشي مابيه لتخافين عود من ارجع هناك اراجع أطباء ويشرفون على حالتي اني هم دكتور واعرف شدااسوي تعلميني بشغلي شنو ..؟
...رفيف...هاي هي براحتك نرجع ..
.............................
...سالي...اتصل ضرار برفيف وأخذ منها اسم حبوب منومه وگال..
...ضرار...هاي صديقة رفيف باجر الصبح يله اكدر اروحلها يعني هسه مااكدر لان دنيا ليل ومحد يفتح ..
...سالي...شلون لعد نبقى هيج وغمار خاف يصير شي ..
...ضرار ...رح اروح يمه انام هسه وإذا سمعتي صوت صياح لو اي شي لتجين ابد ولتطبين للغرفه لان احتمال يفقد اعصابه أو يسوي تصرف صادم ومااريدج تشوفي بهاي الحاله ..
...سالي ...شلون اني خايفه عليه ..
...جر حسره وفرك وجهه وكال..
...ضرار...لتخافين خليها على الله نتحمل اليوم لما اجيبله العلاج باجر ..
...سالي...راح ضرار لغرفتي نام يم غمار واني مددت بفراشي بس ميته رعب خايفه على غمار من نفسه خايفه ليسوي شي بنفسه الإدمان مو شي سهل ومحد يضمن تصرفاته وردود الفعل شنو رح تكون ..
....................
...غمار ...جنت امدد على الجربايه وصافن افكر بلي صار وياي معقوله حقيقي لو كابوس ممكن اصحى منه وينتهي ويروح ..
اني وين جان عقلي شلون خليت حلا تسوي هيج وياي ماقاهرني موضوع الإدمان بگد مومقهور لان سويت علاقه بالحرام اني اسوي هيج شلون .؟
...اني خلصت عمري استحرم احط عيني على بنيه جنت بالكليه من احجي ويه البنات عيني انزلها للگاع واحجي وياهن بس سالي الوحيده اباوعلها بدون ماافكر بالعيب والحرام لان من اول لحظه شفتها بيها صارت زوجتي وحلالي لذلك اباوع عليها براحتي وبدون تفكير..
... ضرار...طبيت للغرفه حتى انام شفت غمار صافن على السگف وعيونه حمره والدموع غاسله وجهه عرفته ديبجي تقربت كعدت يمه لزمت ايده فز من صفنته وباوعلي حجيت وياه..
...ضرار ...شبيك متگلي شكو اعرف الي صارلك مو قليل بس انت قوي واحنه كلنا وياك ورح نساعدك وتتخطى هاي الازمه بأقل الخسائر إن شاء الله..
...بقى صافن على السگف نزلت دمعه من عيونه وكال..
...غمار ...حتى لو كانت هاي الخسائر سالي ..؟
...استغربت من كلامه وسألته..
...ضرار ...وليش ممكن تخسر سالي انت جنت خايف لاتعرف بيك صرت مدمن وتعوفك وهسه هي عرفت وقررت تبقى وياك لحد ماتتعالج ومتتخلى عنك بعد ليش تخسرها ..؟
...رفع ايده وصار يمسح بعيونه من الدموع وكال..
...غمار ...ماادري ضرار عوفني وحدي اريد انام .
...ضرار ...يعني اطلع من الغرفه قصدك ..؟
...غمار...لا ابقى بس لتحجي وياي .
...ضرار...براحتك نام واي شي تحتاج اني يمك ..
...غمار ...عافني وراح نام بفراشه واني حاولت انام وماكدرت عندي ارق فضيع مدااكدر انام ولا دقيقه مااعرف ليش رح يصيرلي يومين مانايم ابد احس جسمي تعبان كلش ..
...بقيت افكر بكلشي صار وياي ونسيت الوقت يمر وموعد الجرعه قرب ..
وره نصف ساعة أو أكثر مااعرف شكد حسيت نفسي تعبان جسمي أحسه ياكل بيه اكل الوجع مينوصف احس نفسي تعبان اريد ارتاح
دماغي مااعرف شنو بي اكو صوت بداخلي يريد يحس بشعور الراحه بس مااعرف شلون لزمت راسي بإيدي الثنين وصرخت صرخة كلها وجع هزت البيت كله هز.
...غمار....آآخخخخخخ رااااسي ياعللييي رااسسي آآخخخخخ دخيلكم ياناس يااارب الهي ارحمني يااارب ساعدني ضررااااررر..
...فز ضرار من فراشه مخترع وركض عليه بلهفه لزمني من ايدي بقوه وگال ..
...ضرار ...ها غمار حبيبي بس اهدأ لحظه كول ياالله اهدأ غمار تسمعني احجي جاوبني
...رفعت عيني عليه وصرت اتوسله..
...غمار...دخيلك ساعدني احس نفسي دااموت ضرار محد حاس بيه اني جسمي كله يوجعني دخيلك مااريد اصير هيج خلصني دخيلك ..
...ضرار...حبيبي گول ياالله بس اسمعني ركز وياي شوف غمار حاول تقنع نفسك أنه هاي كلها فتره صعبه ويجي يوم وتعدي غمامه سوده تمر وتروح وتصير ذكريات..
...غمار ...الحجي سهل لان انت موحاس بيه انتوا شبيكم ليش محد يفهمني ..
...صرخ بوجهي صرخه كلها وجع وقهر ..
...غمار...اني داااموووتتت ومحد حااس بيه انت شنو متفتهم دااكولك اريد الابره ساااعدني ساااعدني ضرار رح اموووت
... ضرار...بقيت لازم ايده ومااعرف شلون اتصرف وياه وهوه ينود يوِن ويإن من الالم احتاريت شسوي وبدون تفكير صحت سالي ..
...ضرار...سالي وينج تعاي ..
...مجرد ماصحت اسمها طبت للغرفه عرفت بيها جانت واگفه بالباب كلتلها..
...ضرار...بس فهميني شلون اتصرف وياه اني مااعرف شي بعلم النفس والطب النفسي شسوي ..
..بقت صافنه عليه ودموعها تنزل على خدها وحلگها يرجف بدون متحجي شي تقربت منه بسرعه وحضنته حاوطت أيدها حول راسه ووجهه وصارت تبوس بوجهه من كل مكان متجاهله وجودي وياهم وتبجي وتشهك كعدت كدامه بالگاع وهوه عالجربايه كاعد لازمه وجهه بين أيديها وتحجي وياه عبالك تحجي ويه طفل ..
... سالي...حبيبي غمار شوف انت هسه عندك شعور قهري يخليك تريد هاي الابره حتى تحس بشعور الراحه لان دماغك يوحيلك بهذه الشي ويوهمك بأنه راحتك وراحة جسمك بهاي الابره بس هي غلط .. هاي الايحاآت كلها غلط الدماغ هسه فاقد السيطره على شعور العقلانيه وديتصرف تصرفات لاعقلانيه يعني انت هسه عقلك متوقف ومو كلشي يوحي الك تسمع منه مرات العقل يكون غلطان ..
...باوع عليها وهوه يبجي وحجى وياهه كأنما يفهم قصدها وعن شنو تحجي رد عليها..
...غمار...سالي مااگدر اكو حرب بداخلي اني تعبان اريد ارتاح مااعرف شلون اوصفلج شعوري بس اني تعبان والله تعبان اريدها جيبوها بس آخر مره آخذها وبعدين اترك بس هالمره اريدها ..
...گامت گعدت كدامه عالجربايه ومسحت دموعها وصارت تحجي وياه متجاهله كلامه ..
... سالي...صدك غمار اني ماحجيتلك شصار ويه متيم مو راح للروضه والمعلمات كلهن معجبات بذكائه واتصلت بيه المعلمه تمدح بي تگول كلش شاطر ...
...ضرار ...بقت تحجيله عن متيم ورؤى وهوه متجاهل كلامها ويردد..
..غمار...اني تعبان اريد الابره ..
...وهي مستمره تحجي وياه عن حياتهم وتحجيله عن الجهال لحد ما فقد اعصابه غمار وضربها راشدي (كف) وصرخ بوجهها..
...غمار...لتتجاهلين كلامي موعبالج علم النفس مالتج الدارسته تطبقي عليه افتهمتي لولا..
...انهال عليها بالضرب والغلط وكام وگف وصار يدفع بيها واني هم ويصرخ علينا ..
...غمار...اطلعوا براا برااا مااريدكم ..
...ضرار...وصل للباب وعافنه وطلع يركض سالي بسرعه ركضت اسرع منه وصلت لباب الشارع قفلته بالمفتاح وأخذت المفتاح منه وطبت جوه غمار شافها هيج وتحول الى وحش من العصبيه صار يركض وراهه ويصيح..
...غمار...جيبي المفتاح وين اخذتي...
...سالي...ماانطي شتسوي بيه تريد تطلع حتى تأخذ السم هذه لا ماانطي انت تبقى هنا بالبيت لحد متتعالج زين لولا ..
...ركض عليها راد يضربها لزمته اني من ايده الثنين وقيدت حركته صار يصرخ عليه ويحاول يبعدني عنه ويغلط وعصبي..
...غمار...وخررر عنيي عووفني شتردون مني وخررواا اريد اطلع عوفوني معليكم بيه ..
...ضرار...سحبته بقوه ورجعته للغرفه وطبيت وقفلت الباب بالمفتاح وسالي بقت كاعده خارج الغرفه يم الباب اسمع صوت البجي مالها وغمار انهارت اعصابه صار يكسر شكو شي كدامه بالغرفه ويصرخ وحاول يتهجم عليه ويضربني واني ابتعد عنه بقى هيج يتعارك ويتصارع ويانه وويه نفسه تقريبا أكثر من ساعه لحد ماتعب صار يلهث من التعب كعد بالگاع ورچه راسه عالحايط ويبجي ويحجي بصوت يرجف ..
...غمار...اني تعبان اريد ارتاح ساعدني ضرار خليني اطلع منا دخيلك ليش قافل الباب ..
...ضرار...مواني قافل الباب سالي قافلتها علينه المفتاح بره عدها مو يمي يعني مااكدر افتحها ..
...غمار...اكسرها وطلعني منا ..
...ضرار...وين تروح تطلع بس فهمني وين ..
...غمار...ماادري اروح ادور على حلا اريد الابره .
...ضرار...غمار انت موكلت تريد تترك هذه الشي شلون تريد تروح لحلا متخاف اذا سالي عرفت بيك رايحلها يمكن تزعل وتعوفك ..
...رفع ايده وصار يحك براسه وبخشمه مثل البي انفلاونزا..
...غمار...شبيك متفهمني دااكولك اني تعبان تعبااااان احس نفسي رح اموت اذا مااخذت الابره ..
....ضرار...لا متموت كلشي ميصير بيك لازم تكون اقوى من هيج حتى تتعالج اذا بقيت مستسلم للادمان مراح تكدر تعوفه ولا تكدر ترجع مثل قبل لاتنسى عندك اطفال متيم ورؤى بعدهم زغار ومحتاجين ابوهم اذا مو لخاطر نفسك لخاطر جهالك تتعالج ..
...نام بالگاع وقرفص جسمه وصار يتلوى من الالم ويبجي يتحرك حركات عشوائيه توحي بالألم الي يشعر بي ويإن بقى هيج لحد ماطلع الصبح وهوه مانايم ابد بس يتلوى من الالم ويبجي واني بقيت كاعد يمه اخاف ليسوي شي بنفسه لحد الصبح لا هوه نايم ولا اني نايم سمعت صوت سالي بره تحجي وياي من وره الباب ..
...سالي ...ضرار تسمعني ..؟ شلونه غمار محتاج شي افتح الباب..
...ضرار...لا بقي مقفول بس انطيني موبايلي بالصاله بدون زحمه عليج اريد اسوي اتصال مهم ..
...سالي...اوكي لحظه .
..راحت وره دقيقه شمرت الموبايل من جوه الباب اخذته شفت مكالمات 3 من رفيف و7 من منقذ وعمه زحل هم متصله ونوار متصله شنو هاي الدنيا مخبوصه اتصلت على نوار وحجيت وياهه..
...ضرار...الووو شلونج عيني
...نوار...هله بيك ضرار شلونك شنو الاخبار غمار شلونه خاله زحل تريد تجي تشوفه فد شويه..
...ضرار...لا لتخليها تجي هسه ديربالج نوار خليها تلتهي بشي كوليلها غمار وضرار طلعوا بشغل لغير محافظه ...ها شوفي كوليلها ضرار وغمار راحوا لاربيل حتى يتفقون ويه طبيب يعالج رؤى من مرضها سمعوا اكو طبيب يفتهم هناك وراحوله ويمكن يبقون يومين هناك يتأخرون..
...نوار...وليش تجذب عليها غمار بي شي يعني ..؟
...
...ضرار...غمار مريض ومااريدها تشوفه هسه بهاي الحاله مالته بعدين اني افهمج كلشي اهم شي هسه لتخلين عمه زحل تجي لهنا كوليلها محد اببيت غمار طالعين ..
...نوار...اوكي رح اتصرف ليضل بالك..
...ضرار...مشكوره تسلمين ..
خلصت المكالمه ويه نوار اتصلت برقم منقذ يطلعلي خارج نطاق التغطيه اتصل برقم رفيف نفس الشي...مدري شنو قصتهم ثنينهم ارقامهم خارج نطاق التغطيه ليش .
...طفيت موبايلي باوعت على غمار لگيته نايم ومغمض عيونه تقربت منه حجيت وياه ميرد عليه شفته غاط بسابع نومه ...بسرعه صحت سالي فتحتلي الباب وطلعت ورجعت قفلته..
...سالي ...غمار شلونه عادي اشوفه ..
...ضرار...نايم من التعب عوفي صارله من البارحه ليهسه مانايم ..
...سالي...كلش خفت عليه ليسوي شي بنفسه بالليل ..
...ضرار ...اني هم خفت عليه بقيت كاعد يمه مانمت كلت خاف يسوي شي
...سالي...هسه شلون شسوي يربي ..
...ضرار...باوعي رح اروح للصيدليه الي كالت عليها رفيف اجيب المنوم منها واجي مااتأخر لتفتحين الباب حتى لو يطلب منج غمار خوش بس بين مااروح وارجع ..
...سالي...اوكي رح ابقي مقفول ..
...ضرار...عفتها وطلعت شغلت سيارتي وتحركت..
............
...غمار...بقيت أتألم حاولت اطلع من البيت بكل طريقه بس فشلت لان ضرار وسالي اتفقوا عليه گلت اسوي نفسي نايم بلكي يفرغ البيت واكدر اطلع ..
...وره شويه طلع ضرار واسمعه يحجي ويه سالي بس ماافتهم شنو يگول بقيت كاعد بالغرفه انتظر الفرصه تذكرت موبايلي اخذته واتصلت على حلا رن اكثر من مره ومترد عليه عفته بقيت افكر شلون اخلي سالي تفتحلي الباب گلت اجذب عليها واخليها تفتح الباب اكوللها اريد اروح للحمام.. بس تذكرت اكو حمام داخل الغرفه مراح تعبر عليها ..
...خطرت براسي فكره كمت طبيت للحمام اخذت مي من البوري وبللت بجامتي وطلعت للغرفه گمت أصيح عليها حتى تفتح الباب..
...غمار...سالي ..وينج تعاي ..
..ردت عليه من وره الباب..
...سالي...ها حبيبي محتاج شي..
...غمار ...تعاي شوفي ملابسي اريد أبدل ملابسي افتحي الباب ..
...سالي...غمار اخاف افتحها وتسوي شي لو تنهزم من البيت ..
...غمار ...سالي بللت ملابسي تعاي ساعديني اني زين مابيه شي لتخافين ..
...سالي ...فتحت الباب حتى اشوفه باوعت عليه لگيت بجامته مبلله معقوله حالته هيج صعبه لدرجة يتدرر على نفسه گمت ابجي شفته يباوع عليه بسرعه مسحت دموعي وابتسمت وتقربت منه ..
...سالي...عادي حبيبي ولا يهمك تصير طبيعي اصلا هسه اطلعلك ملابس وطب أسبح ..
...طلعت ملابسه من الكنتور واخذته للحمام فتحت الدوش ونزعته ملابسه ردت اسبحه بس هوه طلب مني اطلع اسويله اكل لان جوعان وهوه يكمل سبح ..
...سالي...طلعت للمطبخ احضر الريوك اله كملته كله بصينيه وحضرت الچاي ورحت للغرفه حطيت الصينيه عالطبله ادور على غمار ماكو طلعت للصاله مالگيته طلعت بره لگيت باب الشارع مفتوح ..
...گمت ابجي عرفت جان مسوي لعبه عليه حتى يطلع .. اووف منك غمار شسوي وارجعك مثل قبل ...
...لزمت موبايلي واتصلت على ضرار وحجيتله كلشي صار عصبي ويصيح وگال..
..ضرار ...يااربي وتالي وياك غمار شنو هالاعناد مالتك انوب حتى هاي الصيدلانيه مموجوده بالمستشفى صديقة رفيف ...
...سالي ...اتصل على رفيف وشوف شتگول ..
...ضرار...دااتصل بيهم مااحصل احد ارقامهم خارج نطاق التغطيه ضل بالي انوب بس لا صار شي على منقذ اني مااعرف شسوي عفت منقذ مريض هناك وهنا غمار ومشاكله شسوي وتالي مااعرف شلون..
...سالي...غمار يرجع هسه اصبرله شويه ويرجع راح يدور على الابره اكيد اذا ميلگاهه يرجع للبيت ..
....ضرار...هي تحجي واني افكر گلت ..
...شلون رح يلگه حلا اكيد يندلها والا شلون هيج يطلع من البيت بثقه لو ما يعرف مكانها وين ..
...سالي...الووو ضرار تسمعني..
...ضرار...ها وياج اسمع ..
..سالي...وين رحت دااحجي وياك ..
....ضرار...كولي اسمعج..
...سالي ...تكدر تجي للبيت رح اروح لبيت امي بس اشوف الجهال شلونهم عفتهم يمها واجيت وبعد مارحت اروح اشوفهم واجي وانت ابقى بالبيت خاف يرجع غمار ..
...ضرار...يله مسافة الطريق يمج ..
..........
...غمار ...طلعت من البيت بدون متدري سالي طول الطريق اتصل بحلا آخر شي ردت عليه بصوت نعسان ..
...حلا ...الووو شنو هالازعاج من الصبح متگول عالم نايمه ..
...غمار...حلا اريد اجيج انتي وين ..؟
...حلا ...اني طالعه مو بالبيت عليمن جاي شسوي بيك ..
...غمار...حلا اسمعيني اني تعبان لازم آخذ الابره العندج الله يخليج اني صارلي يومين مانايم ولا دقيقه راسي رح ينفجر وجسمي كله يوجعني بس مره وحده اريدها ..
...حلا ...ياابره منيلي انت شدتحجي بابه شنو عبالك اني مفتحه سوبر ماركت وكل يوم تجيني روح عيني روح گلتلك بعد لا اعرفك ولا تعرفني ولا تجي يمي ولا توصل يله باي ..
...انسد الخط..
...غمار...جنت امشي بالشارع سدت الخط كعدت على الرصيف بالگاع كمت افرك بوجهي وراسي عيوني تدمع وخشمي يسيل عندي رشح قوي أكو وجع بعضامي وخمول بجسمي گمت اباوع بالشارع على الناس اباوع للاطفال طالعين للمدرسه وعلى ضهرهم الجنطه وفرحانين حسدتهم على راحة البال العندهم موجوده تمنيت لو اني هم طفل وكل همي بالحياة شلون اروح للمدرسه وشلون اكتب واجباتي الشعور الي جان بداخلي بذيج اللحظه كرهني بكل الناس الي اعرفهم للحظه نسيت حتى سالي والجهال گمت افكر بنفسي وبس افكر شلون اريح نفسي والبي رغباتي المتوحشه بذيج اللحظه تجردت من الإنسان الي بداخلي حسيت نفسي وحش كاسر كل همي شلون آخذ الي اريده وبس بدون ماافكر بالعواقب الوخيمه الي ممكن تلاحقني بالمستقبل ...
.
...نفضت الأفكار من راسي ورجعت للبيت رجعت مشي مااجرت تكسي جانت المسافه عن البيت تبعد ساعه مشي يعني اني بقيت ساعه كامله امشي بالشارع لحد ماوصلت للبيت وبدون مااحس على نفسي..
...........
...سالي ...بدلت ملابسي اريد اطلع جان يجي ضرار كال يبقى بالبيت بين مااروح وارجع رحت لبيت امي اريد اشوف الجهال وصلت سلمت عليها وسألتني على غمار..
...كفاح ....رسل راحت للكليه گلت بس تجي الضهر اجيبها واجيج اشوف غمار ضل بالي شلونه شگال ماگال..
...سالي ...گمت ابجي حاطه رؤى بحضني وماعرفت شنو ارد عليها شافتني وكالت..
...كفاح...شبيج مامه صاير شي غمار بي شي ليش تبجين فهميني ..
....حطيت ايدي على وجهي وكمت ابجي واحجي بقهر..
...سالي...مامه غمار جان مخطوف ومخلينه مخدر تحت تأثير البنج عشر ايام وهسه جسمه تشبع بالمخدرات وصار مدمن مااعرف شسوي احس ايدي مربطه احس نفسي بكابوس ..
...صدمتني ردت فعلها ماتوقعت هيج تكون بهاي القسوه وگالت
...كفاح ...شنووو مدمن ..؟! وانتي جايه تردين تأخذين الجهال تحطيهم يمه لا عيني ممنوع اصلا حتى انتي عوفي وتعاي يمي شعندج باقيه يم واحد مدمن ولج هذه عنده استعداد يصير مجرم شلون تأمنين على نفسج وعلى جهالج يمه شلون ..
...باوعت عليها مصدومه ..
... سالي...مامه شدتحجين انتي عود صدك لو تتشاقين شنو اعوف غمار وبعدين غمار مومجرم غمار ضحيه انتي شفتي حالته شلون صاير يصعب عالكافر تردين اعوفه واتخلى عنه بهيج ضرف صعب ..؟
...كفاح...ولج يمه هذه مدمن تعرفين شنو يعني مدمن يعني اذا ماحصل على السم الي يشربه ممكن يضربج أو حتى يضرب الجهال اهله وينهم شنو هيج ذابينه عليج موعنده اخوه دكتور ميعالجه ادري ابتيلي بيهم خوما ابليتي..
...سالي ...مامه منقذ مريض ومسافر حتى يتعالج كم يوم ويرجع ونتصرف بس اني مااعوف غمار مستحيل اتخلى عنه زين لولا ..
...كفاح...ولج يمه لتشلعين گلبي اني خايفه عليج شلون أئمن عليج يمه هسه خليتي بالي يمج اووف شسوي وياج ..
...گمت وكفت وكلتلها..
...سالي ..مامه لتخافين كلشي مابيه اني وغمار مااعوفه هسه لازم اروح اتأخرت أجيت اشوف الجهال بقيهم يمج بين مااشوف حل للمشاكل العندي يلا اخذهم مااريدهم يشوفون ابوهم بهيج حاله ..
...كفاح ...اووف منجن ادري بس حظ بناتي هيج مصخم رسل باقيه معلگه لا هي مطلگه ولا هي متزوجه والافندي مالها مسافر وعايش حياته..
...وانتي صايره ممرضه لغمار مره بي مرض قلب ومره يجذبون علينه يكولون ميت وهسه انوب صار مدمن ادري تبقن هيج انتي ورسل حياتجن مخربطه..
... سالي...مامه ليش تحجين على مرض غمار تره المرض ابتلاء من الله ميصير هيج تحجين حرام عليج عود انتي صايمه ومصليه شلون هيج يطلع منج حجي ..
...كفاح ..يمه اني مااكره غمار بس اني ام ومن حقي اشوف بنتي مرتاحه وغمار من اول مااتزوجج ماشفتي يوم راحه وياه مخلصها امراض ومشاكل ..
...سالي...مامه اني مرتاحه اني شتكيت الج گلت حجيت .. عود من اجي اشتكي بذيج الساعه احجي وحاسبيني يله اني رايحه ..
...كفاح ...روحي الله وياج خلي اشوف تاليها وياج ..
...سالي...بوست الجهال وسلمت على مامه وطلعت أجرت تكسي ورجعت للبيت.. اول ماطبيت وجان اسمع صياح غمار وضرار يتعاركون ركضت عليهم طبيت للصاله وسمعت الحجي الي صدمني صدمة عمري ...
...غمار ...كاعد بالگاع ويفرك براسه وبخشمه وضرار عصبي منطي ضهره للباب ويحجي بعصبيه..
...ضرار...انت ليش هيج ضعيف وماعندك اراده شلون تحاول تتصل بيها شلون بعد كل الي سوته بيك تنهزم من البيت وتروحلها نسيت نفسك عندك جهال وزوجه وبيت ليش اناني وتفكر بس بنفسك وبس غمار شبيك عقلك طار من راسك ..
...غمار ...اني تعبان انت شدتحجي انت موحاس بيه ولا تعرف بشعوري الحجي سهل مومثل الي عايش هذه الشعور اني كل الاريده هسه انام وارتاح وبس اني صارلي 3 ايام ماضايك طعم النوم مستعد هسه انفذ اي طلب لأي شخص المهم احصل على الابره افتهمت لولا..
...صرخ ضرار..
...ضرار...تنفذ اي طلب يعني مثل شنو يعني مستعد تبيع زوجتك وبيتك لخاطرها..
...گام وگف غمار وصرخ بي ..
...غمار ...انت موفاهم شي دااكولك متفهم شعوري ولا تحس بيه انت تعرف اني بشنو ضحيت وشنو انطيتها بس حتى آخذ الجرعه منها ..
...غمار ...اني سويت وياها علاقه بالحرام طلبت مني اكوون وياها علاقه وآخذ الجرعه ..
... ضرار... انت شدتكول غمار .. علاقه يعني شنو ....
...صرخ بوجهه وباوع عليه وعرف بوجودي سمعت كلشي
...غمار....يعني نمت وياها شنو علاقة شنو ليش هيه العلاقات انواع ..
...سالي...حجاها واجتي عيونه عليه شافني بدون مااحجي شي عفتهم وركضت للشارع بدون تفكير اول سياره وگفت كدامي صعدت بيها ورجعت لبيت امي واني ممصدگه الي سمعته ...
..........
..رسل ...طلعت للدوام اليوم طبيت للمحاضره خلصت اول محاضره وطلعت للكافتريا عندي ريست نص ساعه وتبدي المحاضره الثانيه اول ماگعدت جان يسحب الكرسي وگعد كدامي وكال..
...نورس...اريد احجي وياج واريدج تسمعيني للنهايه بدون متقاطعيني وإذا فتحتي حلگج بكلمه لسانج اگصه ..
.....................
...يتبع ♥️
#زهراء_الطائي