كلشي مامحتاج منّك بس اشوفك
وهيه لاترهم واحبك
لاعرفت شلون اعوفك
#معتصم
نار بصوره حبك بس شكل موجود
لا جاويني يوم ولا انته الطافي
#نورس
.
....................✍️ #زهراء_الطائي
...غمار ...جنت كاعد بالبيت العب ويه الجهال وسالي بالمطبخ تحضر الغده كلت آكل لگمه واصلي واطلع اريد اروح لبيت اهلي اشوف امي
..كاعد ويه الجهال وجان اسمع موبايلي يرن اخذته من الطبله باوعت رقم غريب فتحت خط وكلتله..
...غمار ..الووو نعم .
...اجاني صوتها يرجف وكله رعشه وهيه تحجي وكالت ..
...رفيف .. غماار فدوه تعال بسرعه وينك..تعال اني خايفه..
...غمار ...فزيت من مكاني مذعور من سمعت صوت اختي بهاي الحاله وكلتلها..
...غمار...رفيف ..انتي وين شبيج ليش تبجين اهديء على كيف فهمني شكو ..؟
...رفيف ...اني ..اني بمركز شرطة اخذوني من الصيدليه يكولون اكو مخدرات بالصيدليه مدري شنو بسرعه جيب منقذ وتعالو حباب بسرعه..
...غمار. .. يله يله لتخافين حبيبتي هسه مسافة الطريق احنه يمج لتخافين..
...غمار ..سديت الخط من رفيف وركضت اخذت البصمه مال سياره وطلعت اركض للشارع شغلت السياره ودست بكل سرعتي
...بنص الطريق اتذكرت ماكلت لسالي اني طالع دزيتلها رساله كلتلها بيها ..
..(..اني رايح لبيت اهلي شغله ضروريه من اجي افهمج ليضل بالج..)
...غمار ..بقيت اسوق اريد اوصل لبيت اهلي احس الطريق صار شطوله شعور صعب ينوصف اختي الوحيده توكع بمصيبه وهيه بنيه احنه بمجتمع ميرحم المرأه شلون بنيه تطب مركز شرطة حتلو كانت مضلومه الناس الها الضاهر
...بين الف فكره وفكره دكات گلبي تتسارع من الخوف لحد ماوصلت لبيت اهلي نزلت اركض ملهوف بس اريد اشوف منقذ وينه لكيته كاعد يتغده اول ماطبيت حاولت اسيطر على نفسي لان ماريد امي تحس على شي اخاف عليها من الصدمه..
...غمار ..طبيت وصرت أمثل كدامهم البرود سلمت عليهم وامي أصرت عليه إلا اتغده وياهم كعدت اريد احط لگمه بحلگي مااكدر
گلبي مينطيني باوعت على منقذ واشرتله براسي يعني اريدك بره وطلعت وعفتهم..
...غمار ..طلعت يم سيارتي بره انتضره وره ثواني طلع ورايه يباوع عليه مستغرب وكال..
...منقذ...خير بيك شي صاير شي شو وضعك ماعاجبني ؟
...غمار ...جريت حسره قويه وكلتله بصوت متوتر..
...غمار ...اريد اكولك شي بس الزم اعصابك ماريدك تخاف إن شاء الله نسيطر على الوضع..
...قطب حواجبه وكال .
...منقذ...كول شكو الجهال بيهم شي مرتك بيها شي ؟
...غمار ..لا لا ماكو شي مو الجهال ..بس رفيف ..
خزرني بعيونه وكال بخوف ..
...منقذ ...شبيها رفيف احجي..؟!
...غمار ..اتصلت عليه تكول هيه بمركز شرطة اخذوها بقضية مخدرات..
...غمار ..بمجرد ماخلصت كلامي منقذ جان واكف ووكع من طوله للكاع من سمع الخبر ..قبل ميوگع سندت جسمه عليه ووگفته وكلتله..
...غمار ...يمعود قوي گلبك اني اخذتك على صفحه جنت خايف على امي من الصدمه بيمن احير بيك لو برفيف اتقوى خلينه نروح نشوفها..
...ساند جسمه عليه ولازم صدره ويفرك بي بيده وحجه بصوت تعبان وكال..
...منقذ. ..رفيف ..بالمركز ش.. شلون..زين ..ليش ..ولك اختك راحت اختك راحت غمار ولك منين اجتي المخدرات تعرف يعني شنو مخدرات..؟
...غمار. ...يمعود منقذ كول ياالله قوي گلبك موهيج انته الجبير مالتنا اني كلت انته تقوينا وتواسينا مو توگع من اول كلمه
گوم امشي خلي نروح نشوف شنو القصه إن شاء الله ربك يحلها وتطلع سالفة اشتباه. .
....غمار ...بسرعه صعدت منقذ بالسياره وطلعنه للمركز ...
....................
....رفيف ...اتصلت بغمار وخلصتها بس ابجي وجسمي كله يرجف والضابط كاعد وره المكتب مالته وساكت كلما يريد يسألني ويحقق وياي ابجي اكثر من الخوف
بعدين گام يمشي واجه كعد بالكرسي الي صاير كدامي وچتف ايده على صدره ورچه ضهره عالكرسي وكال بصوت هادئ..
...معتصم ...شكد صارلج تشتغلين بالصيدليه.؟
...جاوبته بصوت يرجف وكلتله..
...رفيف ...اول ماتخرجت .. قبل سنتين تقريباً هوه ابو رامي يصير جيران اهلي وعنده فلوس متمكن مادياً ويسوي مشاريع كل فتره
ووحده من هاي المشاريع فتح صيدليه بس ماعنده شهادة دكتور صيدلاني يعني مو قانوني يفتح صيدليه الا اكو دكتور تواجد وياه حتى اللجنه مال تفتيش الصحه من تجي تلگه دكتور
. اني جنت بوقتها هستوني متخرجه من الجامعه وجنت اريد اشتغل بصيدليه هوه يعرف اهلي واجه عرض عليه شغل كال اشتري شهادتج ادفعلج راتب كلش عالي بالشهر وتشتغلين وياي تواجد بالصيدليه..
واني وافقت كلت هوه رجال معروف بالمنطقه واهلي يعرفونه خوش رجال واشتغلت وياه صارلي سنتين..
....معتصم ...زين ماشفتي عليه شي مشبوه أو سمعتي عنه شي مثلا منو يعرف ناس ويامن يتواصل ..؟
....رفيف ...لا مااعرف عنه شي اني اصلا مو دائما اتواجد بالصيدليه هوه من يحتاجني يتصل بيه واروح يعني أكثر شي بس من يكون اكو تفتيش من وزارة الصحه اتواجد ..
....فرك لحيته وضييق عيونه وكال..
...معتصم ...هااا اممم يعني اغلب الاوقات انتي ممتواجده بالصيدليه يعني اكو أمور تصير انتي ماعندج علم بيها ..؟؟
...صرت ابجي واشهك وكلتله بصوت مخنوگ..
...رفيف ..اي والله كلشي مااعرف اني اصلا مودائما هناك واول مره اعرف اكو هيج حبوب بالصيدليه والقرآن..
رفيف ...گام من الكرسي فتح ثلاجه زغيره موجوده يم المكتب مالته طلع منها بطل مي زغيير فتحه وقدمه اليه مديت ايدي الترجف اخذته منه شربت منه شويه ورجعته اله
شو هذه أخذه مني وبسرعه شرب الباقي من المي ورايه بقيت صافنه عليه تصرفه غريب شلون يشرب وره بنيه ميعرفها..
...رفيف ...چنت كاعده ابجي شفت باكيت كلينكس عالمكتب باوعت عالضابط وكلتله..
...رفيف ...عادي آخذ كلينسه ..؟
...بدون ميحجي شي مد ايده أخذ العلبه مال كلينكس قدمها اليه واني سحبت منها ثنين ومسحت دموعي والكحله من عيوني ..
...بهاي الأثناء انفتح الباب طب علينه نفس الضابط الي اجه للصيدليه وقبض عليه.. اول ماطب للمكتب باوع عليه وكال..
...حسام ..الله الله نقيب معتصم شنو رأيك اجيبلكم العشه ووياه كلاصين چاي بعد ..شنو القصه هذه كله تحقيق وياهه...؟؟
...رفيف ...بسرعه فز من مكانه معتصم وراح يمه سحبه من ايده وهمس بصوت ناصي وكال..
...معتصم ...حسام بداعت الخوه تعال احجي وياك كلمتين بره المكتب موهنا بس خلافهمك تعال ..
...معتصم ...سحبت حسام وياي وطلعنه من المكتب ورحنه للمكتب مالته يم غرفتي كلش قريب طبيت وسديت الباب ورانه..
.بقه خازرني بعيونه وحاط ايده على خصره منتضر مني جواب ..باوعت عليه وكلتله..
...معتصم ...شوف اعرف انته ضجت مني لان هاي القضيه جانت الك وتحولت اليه بس انته تعرف هذه موذنبي العقيد علاء هوه حولها اليه موصح ..؟
...حسام ...وإذا حولها الك تكعد تسولف وياهه هيج بأريحيه بابه هاي متهمه بقضية مخدرات ولك هاي اصيح بوجهها صيحه وحده اخليها تعترف بكلشي مو كاعد يمها وتنطيها مي وكلينكس.. بعد جيبلها عصير ليمون تهديء اعصابها بي خطيه ..؟
...جريت حسره وضحكت وكلتله..
...معتصم ...ههههههه لو قريب عليه العصير اجيبلها والعباس ..
....صار يهز بيده حسام وباوعلي صفح وكال...
....حسام ..تطورات عمي ..صاير تحلف بالعباس ...
...معتصم ...هههههه وشبي العباس ولك ..؟
...حسام ...مابي شي انته الي بيك ...وين اكو سني يحلف بالعباس..؟
....معتصم ...ههههههه صاير طائفي ياصاحبي..
...حسام ...ههههه مو طائفي بس انته اول مره تحلف هيج ..المهم روح شوف المتهمه البريئه مالتك خلاشوف تاليها وياك.
...اخذتله تحيه وكلتله..
...معتصم ...حاضر سيدي...ههههه
....قبل مااطلع من المكتب گال بتهديد....
...حسام ...خلص القضيه وعوف التمعشق تره أخبث وياك وافتن عليك يم العقيد علاء خوش ..
...غمزتله بعيوني وكلتله...
...معتصم ...والعباس بريئه ونضيفه الا اثبت برائتها وبالدليل القاطع اني گلبي يكلي بريئه وگلبي ميخطأ احساسه...
...حسام ...اي سوده عليه گلب والده گلبك يحس ..صاير حسيس...امشي من كدامي روح لشغلك ..
....معتصم ...هههههه رايح رايح ..
....................
...معتصم ...رحت لمكتبي فتحت الباب وطبيت باوعت عليها بعدها كاعده يم المكتب شافتني ورجعت نزلت راسها باوعت على أيدها طابگتهن ايد بإيد وتفرك بيهن (حركه تدل على التوتر) ..
...تقربت كعدت وره المكتب باوعت عليها وصرت انقر بإصبعي على سطح المكتب هاي الحركه نسويها عادتآ حتى نخلي المتهم يتوتر أو نستفزه بيهه بسبب صوتها المزعج..
...حجيت وياهه ببرود وكلتلها..
...معتصم ...اعرف بيج بريئه...اصلا الولد الي چان وياج بالصيدليه حققنه وياه واعترف بكلشي ..
...باوعت عليه وخزرتني بعيونها وكالت ..
...رفيف ...قاسم ..؟ صدك اعترف بكلشي يعني الحبوب تخص الصيدليه..؟؟
...باوعت عليها بنضره شك ورفعت حاجبي الأيمن وكلتلها...
...معتصم ...لا موبس هيج انطانه تفاصيل كلش هواي وحتى تسجيلات الكامره الي داخل الصيدليه سحبناهه وشفنه كلشي ..
...بسرعه هيه صفگت ايد بإيد وكالت ...
...رفيف ...اي والله صدك شلون راحت من بالي تسجيلات الكامره...اكو كامرات داخل الصيدليه وحتى بالشارع اكو تكدرون تسحبوها وتشوفون كلشي ...
باوعتلها صفح وكلتلها..
....معتصم ...ومتخافين من الكامرات..؟
...ردت عليه بثقه وكالت ..
...رفيف ... وليش اخاف اني ماسويت شي انته ليش مصرر تسويني مجرمه والعباس اني مالي علاقه بالحبوب هاي ولا اعرف شي عنها زين انتو ليش متدورون على ابو رامي وتحققون وياه اني شنو علاقتي ...
....سحب جگاره وورثها وسحب منها نفس وزفره بوجهي وكال..
....معتصم ...ومنو گال مندور عليه ابو رامي كلها شكم ساعه ونلگاه وين يروح يعني لو يطير للسما هم نصعدله ونجيبه...
...اختنگت من الدخان گمت انفخ واهفي كدام وجهي احاول اوخر الدخان من وجهي وكلتله..
....رفيف ...افففف ...قاسم يعرف كلشي عن ابو رامي حتى يندل بيته وكل التفاصيل لان هوه يصير زوج بنت اخوه يعني نسيبهم...تكدر تاخذ كل المعلومات منه واني طلعني تره مالي علاقه بالموضوع كله.
.... سحب نفس من الجكاره وزفره بإتجاه السگف وضحك ضحكة استهزاء وكال ..
....معتصم ...هههههه اي مو هيه لعب چعاب حتى اطلعچ ..انتي زيارتج مطوله يمنه دكتوره اذا ماوصلنا لأبو رامي واعترف باللسانه أنه انتي بريئه ومالج علاقه بالحبوب متطلعين منا واحتمال تتحولين للمحكمه..
....رفيف ...من گال هيج ومحكمه حسيت گلبي يريد يوكف من الخوف باوعت عليه وكمت ابجي واحجي بقهر وكلتله..
...رفيف ...انته ليش ممصدگني والقرآن والله العظيم اني مالي علاقه بالحبوب وكلشي مااعرف عنهم يعني اني وجهي وجه وحده تدور هيج سوالف اني دكتوره وبنت عالم وناس محترمه مستحيل اسوي شي حرام لو أئذي نمله انوب أبيع ممنوعات للناس موحرام ...
....راد يحجي چان يندك الباب وصاح ..
...معتصم ...اتفضل ..
...دخل ضابط وگال..
...سيدي اكو ثنين زلم بره يكولون همه اخوان المتهمه...
....رفيف ...باوعت عليه وكلتله برجاء...
...رفيف ...اخواني خليهم يطبون الله يخليك ..
...خزرني بعيونه وكال..
...معتصم ...بدون صوت وكافي بجي ..شنو صدر بحقج حكم اعدام حتى تبجين ..؟
...رجع باوع للضابط وگاله...
...معتصم ..دخلهم خلاشوف تاليها..
...رفيف طبوا عليه منقذ وغمار اول ماشفتهم ركضت عليهم بسرعه ومنقذ أخذني بحضنه بس عينه عالضابط وكال ..
...منقذ ...لتخافين إن شاء الله تخلص على خير يابه مااعوفج لو ادفع فلوسي كلها كفاله واطلعج.
...رفيف ...گمت ابجي باوعت على غمار وهوه هم عينه عليه ابتسملي وعيونه كلها قهر تقرب مني وباسني براسي وگال ..
...غمار...يروحلج فدوه غمار والكاظم المسموم اليوم مااطلع من المركز الا وانتي وياي لو اعرف اطب للسجن وياج ..لتخافين .
...رفيف ...شفتهم هيج ملهوفين عليه القهر زاد بيه وگمت ابجي اكثر باوعت على منقذ وكلتله..
...رفيف ...والعباس ابو فاضل والحسين اني مااعرف شي عن الحبوب واول مره اسمع بيها اصلا.. منقذ اني خايفه ماريد ابات هنا بالسجن اخاف ...
...باوع عليه وابتسم بس لمعت دمعه بعيونه والتجاعيد الي بوجهه علامات الكبر واضحه عليه وصار يواسيني عبالك اب يواسي بنته وگال بصوت حنون ..
...منقذ ...هاي شبيج ..شنو تباتين هنا الا اني مييت بالنجف يله تباتين هنا لتخافين يابه محلوله إن شاء الله ..
....رفيف ...بهاي الأثناء سمعت التليفون مال الضابط يرن رد عليه وكال ..
...معتصم ..الو نعم ..نعم سيدي .. حاضر سيدي اجيت ..
...سد الخط وباوع علينه وكال..
...معتصم ....اجتنه اخباريه هسه عن مكان المدعو أبو رامي ورح تطلع دوريه امنيه تجيبه اذا قبضنه عليه واعترف أنه الدكتوره بريئه رح تطلع من المركز هيه أساساً لحد الآن لم يثبت عليها دليل بخصوص القضيه وملفها نضيف ...
....فز من مكانه منقذ وكال .
...منقذ ..يعني شنو رح تبات هنا اختي ؟ ..لا متبات اني ادفع كفاله شكد متطلبون بس متبقه ولا دقيقه هنا اختي ..حضرت الضابط ارجوك اسمحلي اطلعها بكفاله ..
....ابتسم معتصم وكال ..
...معتصم ...شوف اني مومن صلاحياتي أطلق سراحها حتلو كانت بريئه لازم تبات الليله بالمركز لحد الصبح لما يجي الضابط المسؤؤل عن القضيه لان حاليا غير متواجد ...
...هنا غمار خزر الضابط بعيونه وكال..
...غمار ...اوكي لعد اذا هيج الحجي اني ابات وياهه للصبح لما يجي الضابط المسؤؤل.
. اني حلفت مااطلع من المركز الا واختي وياي لو اعرف ابات بالسجن ..
....ضحك معتصم وكال ..
...معتصم ..ههههه بس اعصابك ..شوف اني ماكان عندي نيه اخليها تبات بالسجن نضرآ لسمعتها كدكتوره ولأن ماعندي دليل يثبت جرمها كنت ناوي اخليها بمكتبي للصبح لان واضح عليها بنت ناس مو وجهه جرائم.. ف لتخاف تكدر تروح والصبح تعالوا متدخل للسجن الدكتوره ..
...غمار ...لا يابه وين اكو هيج حجي مااروح ابات وياهه هنا بالمكتب اني حلفت مااطلع بدونها صدك تحجي..
....جر حسره قويه معتصم وباوع على اخواني وگال..
...معتصم ...اوكي واحد منكم يبقه وياهه رح ابقيكم بمكتبي على مسؤليتي بس لو انته لو اخوك واحد يبقه مو ثنينكم..
....غمار ... اشكرك حضرت الضابط ممنون منك ...
....رفيف ...بقيت بالمكتب وغمار بقه يمي ومنقذ طلع وكال الصبح يجيني لان ماسمحوله يبقه وياي ..
...................
....معتصم ...عفتهم بالمكتب وطلعت چانت خفارتي بيومها لذلك لازم ابات بالمركز رحت لغرفة حسام لگيته يريد يطلع لان مو خفارته طلبت منه ابات بغرفته وكلتله الي صار وجان الرفض منه متوقع وگال .
....حسام ...معتصم تره هيج دتخاطر بالوضيفه مالتك شلون تتحفظ عليها بمكتبك وهيه طلعت بريئه تدري اذا سمع العقيد علاء شيسوي..؟
تتعاقب مو كافي الترقيه مالتك اتأخرت انوب تتعاقب هوه انته عايز ..؟
....معتصم ...حسام الله يخليك سايرني شويه هوه عقيد علاء شلون يعرف إذا اني وياك ماگلناله ..هسه بس خليها للصبح وباجر اطلعها..
...حسام ..ولك انته تخبلت اني مو اتصلت عليك وكلتلك أطلق سراحها مو احنه لزمنه ابو رامي شلون تبقه متحفظ عليها وهيه بريئه..هذه الشي ضد القانون ياحضرة النقيب خوما اعلمك بالقانون.؟
...معتصم ...يمعود اعرف اعرف ضد القانون هسه قابل رح اسجنها مؤبد هيه للصبح وتطلع..
...هز رأسه بأسف وكال ..
...حسام ...مخبل بالقرآن الكريم موصاحي ...احمد ربك الدنيا ليل واجوي اخوانها وحدهم ماجابوا محامي لو جاي المحامي جان انكشفت اللعبه مالتك ونوگع بورطه ...
....جريت حسره قويه وكلتله..
...معتصم ...اكبر من الورطه الآني بيهه هسه مااعتقد اكو ..
...ضربني على چتفي وكال ..
...حسام ...حط عقلك برأسك ياصاحبي هاي علويه حتلو تريدها منو يكول يقبلون ينطوها الك وانته من غير طائفه...
....معتصم ..وليش مينطوها شنو اني كافر تره هم أعبد الله مثلكم ..
...حسام ...اكو ساده صعبين مينطون بناتهم الا لنفس عشيرتهم أو نفس المذهب مالهم مااعرف اني بس ردت احذرك لان انته صاحبي ..يله اني رايح للبيت باجر اشوفك ..
...معتصم ...الله وياك روح ..
...................
معتصم ...بقيت كاعد بالمكتب وصافن وكلام حسام ماطلع من راسي ..شنو القصه معقوله انرفض من اهلها..ليش وإذا مو نفس الطائفه وإذا علويه شنو يعني.. ؟
...بقيت افتر بالمكتب اروح واجي لحد ماتعبت وكعدت عالكرسي ومديت رجلي عالكرسي الكدامي.
..وعيني عالسگف صافن ..بعدين تذكرت هيه قريبه بالغرفه البصف غرفتي ...مجرد ماخطرت أبالي ابتسمت .
.عجيب أمرها هالبنيه ... مجرد ماافكر بيها احس بشعور السعاده واني كلشي مااعرف عنها غير بس اسمها وشغلها ...
...معتصم ...باوعت للساعه شفتها صارت ب2 بليل صار عندي فضول اشوفها كلت اروح للمكتب بحجة آخذ ملف من المكتب واشوفها...
...رحت للمكتب فتحت الباب على كيف اول ماطبيت شفتها نايمه عالقنفه ولامه رجلها وحاطه راسها على رجل اخوها ومغطيه جسمها بالستره مال اخوها وهوه راچي راسه عالقنفه ونايم وأيده على رأسها ولازم أيدها بإيده الثانيه عبالك خايف عليها لتطير منه ...
....معتصم ...منضرهم جان حلو عفتهم وطلعت من المكتب ورحت لغرفة حسام بقيت أدخن جگاير للصبح
...وافكر كلت معقوله متصير اليه هذوله اخوانها يخافون عليها من الهوى اذا اخطبها منهم غير يشرحوني تشرح..
....معتصم ...هاي شلون طلابه منين طلعتيلي انتي ياغضب ..
...معتصم ...صار الصبح گلت اروح اطلعها بسرعه قبل ميجي العقيد علاء وتنلاص عليه
.. رحت للمكتب مالتي دكيت الباب بقوه اريد تكعد تعدل نفسها قبل مااطب وره ثواني طبيت لگيتها كاعده وأخوها كاعد يمها من شافني گام وگف وكال..
...غمار. ..صباح الخير حضرة الضابط ها بشررني شصار ..
...معتصم ...صباح الخير . كل خير إن شاء الله تكدر تاخذ الدكتوره وتروح للبيت ماعدنا شغل وياهه بس وقعلي هنا وهيه هم توقع ..
...غمار. ..تقدمت وقعت على ملف جان عالمكتب كدام الضابط .. ووخرت ..
...رفيف ...تقربت اني دااوقع بهاي الأثناء صدفه صارت عيني بعين الضابط ..جان اشوفه صافن عليه...
كلش استحيت من نضرته عزه هذه شبي هيج يباوع بسرعه ذبيت القلم وعفته ووكفت وره غمار ..
...سلم غمار عالضابط وطلعنه.. بس نضرة الضابط بقت براسي مااعرف ليش استغربت منه شلون يباوع مدري خفت منه مدري استحيت مااعرف ...
....................
...غمار ...لزمت رفيف وطلعنه من المركز بعد مااخذت بطاقتها والموبايل الي جان عند ضابط الاستعلامات.
.. طلعنه بالسياره اول ماشغلت السياره اتصلت على منقذ وبشرته وكلتله...طلعنه.
.سديت الخط باوعت على رفيف شفتها حاطه راسها على الكرسي ليوره ومغمضه مديت ايدي گرصتها من خدها باوعتلي وابتسمت...
....غمار....رفيف خاف نرجع للبيت لتحجين كدام امي على موضوع المركز لان اني ومنقذ ماگلنه شي الها نخاف عليها ...
...رفيف ...لعد شتعرف اني وين ؟
...غمار ...منقذ كاللها انتي بايته يمي ابيتي وهسه اني ارجعج...واني هم وصيت سالي اذا احد سألها هيج تگول...
....رفيف ....ههههه مسوين اتفاقية سايكس بيكو عليه ..
....غمار ...ههههه هاي فكرة منقذ لان يخاف على امي من الصدمه موتدرين بيها ضغطها يرتفع..
...رفيف ...هسه اني ميته تعب حاسه نفسي راجعه من سفر يايمه شكد جنت خايفه اريد اروح للبيت اسبح وانام اسبوع كامل ماريد اطلع من البيت ابد ولا اشوف احد ..
....غمار ...ههههههه عليمن خايفه والكاظم لو صايره صدك الا اعترف على نفسي واكوللهم اني حطيت چيس ممنوعات بالصيدليه واشيل التهمه عنج كل عقلج اخليج تطبين سجن واني موجود ..؟
....رفيف ...يابعد روح اختك والله اني مااسوه شي بدونكم انته ومنقذ انتو سندي ..
....غمار ...واحنه هم ماعدنه غير رفيف وحده وحياتنه محلوه بدونها..ههههههه
...................
....رفيف ...وصلت للبيت سويت نفسي جايه من بيت غمار كدام مامه ونوار..
لان منقذ ماگايل الهن شي بسرعه طبيت لغرفتي جان اسمع صوت منقذ واگف ورايه اباب الغرفه انداريت عليه باوع عليه وابتسم وفتحلي ايده الثنين مثل الاب من يستقبل بنته ..
...بسرعه ركضت عليه وحضنته حيل وهوه هم حضنني وباسني براسي وگال...
....منقذ ...قسما عظما إلا آخذ حقج مربع من هذه ابو قندره ابو رامي والله إلا اندمه على كل لحظه خلصتيها بالمركز ...
.... رفيف....عوفه فدوه لعيونك اخاف عليك هذه طلع يشتغل بالممنوعات واحد موسهل مابينه حيل تحتك وياه وتصير مشاكل المهم اني مالگوا عليه شي وطلعت والحمدلله...
....منقذ ...روحي ارتاحي هسه والباقي كله سهل ..
...........................
...معتصم ...اول ماطلعوا رفيف وأخوها اخذت الملف مالها وشعلت الجداحه عليه لحد مااحترك كله .
.وصار رماد ووكع بالگاع وطلعت من المكتب رحت لملازم مصطفى المسؤل عالحاسبه والجرد .
. طلبت منه استخدم الحاسبه بحجة ادور على اسم مجرم ...
ولان اني أعلى منه رتبه لبى رغبتي كعدت بمكانه وطلبت منه يجيبلي چاي ويجي
...شفته راح وبسرعه طبيت على معلومات السجناء خلال هذه الاسبوع طلعت اسم رفيف الثلاثي وطلعت المعلومات مال الملف مالها وحذفتها كلها طبيت للارشيف حتى أتأكد اكو بعد معلومه تخصها مالگيت شي وبسرعه طلعت وسديت الحاسبه..
....طبيت للمكتب مالتي وويه طبتي اجه الرائد حسام وكال ..
...حسام ...صباح الخير معتصم ..
...معتصم ...صباح الخيرات ..
...حسام ...بشرني حليت المعضله مالتك لولا ..
...معتصم ...اي راحوا قبل شويه..
...حسام ...الحمدلله لان هسه وصل العقيد علاء ويريد الملف مال الدكتوره يريد يطلع عليه ..
...معتصم ...ها ...ياملف ..؟
...حسام ...الملف مال القضيه مالتها شبيك مو عندك غير انته المسؤل عن قضيتها جيبه يريده العقيد ..
حكيت لحيتي وكلتله...
....معتصم ...حرگته..
...حسام ...شنو ..شحرگت ..؟!!
...معتصم ...الملف مال الدكتوره حرگته...تريد تاخذه هذه بالكاع أخذه وودي للعقيد ..
...باوع للكاع حسام وفتح عيونه على وسعهن وگال..
...حسام ...الله ياخذك يامخبل ولك هاي شسويت ..؟ حرگت الملف البي معلومات القضيه ولك شگول للعقيد هسه أنته تريد تهجم بيتي الله لايوفقك...
....معتصم ...عليمن عصبي وخايف اكعد هنا اني رايح للعقيد واحجي وياه مالك علاقه انته ..
...حسام ...اي روح روح وين الله وأبو الحسن هيج ويفصلك فصل نهائي حتى ابرد گلبي بيك يااثول..
...معتصم ....ههههه هاي اني اثول لاتغلط حيوان اني اكبر منك بالعمر ..
...حسام ...ياعمر هوه انته خليت بيها عمر عقلك وين متگلي وين ..عمرك نگعه واشرب مايه....ابو عمر ..
...معتصم ...خلاروح للعقيد واني أعلمك شلون اشرب المي اصبرلي ..
معتصم...رحت للعقيد واني اتقدم خطوه وارجع خطوتين ...صح حرگت الملف والمعلومات بس هذه الشي بي عقوبه وغير قانوني بس جنت مستعد اتحمل كافة المسؤليه يعني طبيت لمكتب العقيد بصفتي
نقيب واني متاكد من اطلع من مكتبه رح اكون خسران الرتبه هاي واحتمال حتى الوضيفه...بس گلت خليها على الله شيصير خلي يصير...
....دكيت الباب وطبيت...
....اديت التحيه وكلتله..
...معتصم ...صباح الخير سيدي ..
...عقيد علاء...صباح النور معتصم تعال ..
...تقدمت بخطوات متردده وبقيت واگف كدام المكتب منتضر منه هوه يبادر بالسؤال وفعلا سألني وكال ..
...عقيد علاء...تفضل معتصم محتاج شي..
....معتصم ...سيدي اريد احجي وياك بموضوع مهم بس اريدك تسمعني للاخير وبعدين تحكم عليه واني قابل بحكمك مهما كان..
....عقيد علاء...ياستار...حكم واسمعك..؟ ...احجي شنو الموضوع ..
....معتصم ...سيدي القضيه مال دكتوره رفيف الي جبناهه البارحه بتهمة الممنوعات تعرفها ..؟
...علاء ..هههه طبعا اعرفها ..شبيها ..؟
...معتصم ...سيدي انته سلمتني القضيه اليه واني بدوري حققت وياهه وحسب التحريات الي جمعناهه والأدله ماكو اي دليل ضدها وهذه صاحب الصيدليه المدعو أبو رامي اعترف بكلشي وكال أنه الدكتوره مالها علاقه وحتى طلع صاحب سوابق هوه بس الدكتوره ماعدها ملف يمنا ابد يعني ملفها نضيف مابي شي...وطلعت بريئه..
...علاء ...اوكي وصلتني بعض المعلومات بخصوص القضيه بس طلبت الملف مالها من رائد حسام حتى اطلع عليه بنفسي جيبه خلاشوفه..
...معتصم ...احم احم...سيدي مو هوه هذه الموضوع الي اجيتك بي .
...علاء ...الي هوه ..؟
...معتصم ...سيدي اني اعرفها الدكتوره قبل متجي للمركز بصراحه واعرف وين تشتغل وجنت معجب بيها من قبل متجي للمركز بس شسوي حضي المصخم خلانه نفتش الصيدليه الي هيه تشتغل بيها وهم حضي المصخم جابها هنا بهيج تهمه .
..واني اعرف بيها بريئه قبل مااحقق وياهه بس حققت كإجراء روتيني مواكثر ..
...جر حسره قويه وكال...
...عقيد علاء...لحد الان مافهمت المطلوب شنو مني معتصم بدون لف ودوران ادخل بالموضوع ..
....معتصم ...سيدي مو كتلك اني معجب بيها واريد اخطبها.. لذلك ..اني شسويت
..احم...اخذت الملف مالها وحرگته لان مااقبل زوجتي المستقبليه يكون اسمها بين المجرمين وخاصتآ هيه طلعت بريئه...
....اني حجيت وياه هيج وهوه خزرني بعيونه وضرب ايده بقوه عالمكتب ووگف على حيله وگال..
...علاء ...شنووو ..شسويت عيد عيد ماسمعت شحرگت..؟؟!!
...باوعت عليه وگلت بگلبي هيه انلاصت بعد خلاكملها للنهايه وانطي الرتبه مالتي واطلع خسرت كلشي بعد ...
...معتصم ...سيدي حركت الملف مال الدكتوره..
...صرخ بوجهي صرخه هزت المكتب وگال.
وعلى إثرها دخل حسام يركض مصدوم من الصياح ...
....علاء ...معتتتصصمم هاي شسوويتت انته تخببلت شلون تتجرأ وتتصرف مثل هيج تصرف اهوج...منو سمحلك تحرگ ملف متهم اجه للمركز ..؟
...معتصم ...سيدي طلعت بريئه مو متهمه.. وبعدين ماكو اي دليل ضدها المن باقي الملف عدنا لو بس تشويه سمعه وخلص ..
....رجع صرخ بوجهي وكال..
...علاء ...انته الضاهر يرادلك عقوبه تكسر ضهرك حتى تتعلم الاحترام وتحترم الضابط الاعلى منك
...وين كاعدين احنه بسوگ مال مخضر شلون تتصرف هيج تصرف خالي من المسؤليه شلون تخاطر بوضيفتك لخاطر متهمه..
نسيت نفسك انته شنو ..انته ضااابط ضاابط مو موضف مدني حتى تتصرف بهاي الطريقه ...ماخليت احترام حتى للرتبه الي على كتفك..
....معتصم ...سيدي مادام طلعت بريئه ليش تسميها متهمه ..؟
صرخ بوجهي حسام وگال
....حسام ...اسكت معتصم رح تعم على نفسك اشش اسكت ..
باوع للعقيد علاء وگاله
...حسام ...سيدي سامحه هالمره انته اخونا الجبير وگلبك رحب يوسعنا احنه واخطائنا وهوه ميقصد الحب عامي عينه وخلاه يتصرف بطيش ..
...معتصم ...خزرني بعيونه العقيد علاء وكال ..
.... علاء...تعال معتصم ..وقع على هذه الكتاب ..
...معتصم ..تقربت عالمكتب شفت الكتاب .. قريته...وكان مكتوب ..
( عقوبة لفت نظر .. وعلى أثرها يتم تأخير العلاوه والترقيه للضابط النقيب معتصم مكي عمر لمدة سته اشهر من تاريخ توقيع الكتاب ..)
....معتصم ...وقعت عالكتاب واني الممنون...اصلا كلش زين اني جنت متوقع رح اخسر الرتبه مالتي وبيها فصل هم .. وقعت وبست ايدي وجه وگفه اصلا ..
...باوع عليه العقيد علاء وكال..
...علاء ...صح الدكتوره بريئه وانته بدافع الحب سويت هيج بس تصرفك كان خالي من المسؤليه والاحترام
...وهاي العقوبه مجرد جرة اذن الك حتى مره ثانيه من تتصرف من راسك تفكر الف مره قبل متسوي اي شي
.. اني جان المفروض اخليك تدخل دورة تدريبية نهاية هذه الشهر حتى تترقى من نقيب إلى رائد بس بسبب تصرفك هذه اتأخرت الترقيه مالتك.. روح شوف شغلك ...وهذه آخر انذار الك ..
...معتصم ...ادينه التحيه اني وحسام وطلعنه من المكتب...
...اول ماطلعت لزمني حسام من ايدي وگال ..
...حسام ...تعال لمكتبي..
...معتصم ...رحت وياه ...واني اعرف بي شيريد ..
...اول ماطبيت وسديت الباب استلمني صياح وحجي بعصبيه وكال..
...حسام ...احمد ربك الف مره اجتي بس على تأخير العلاوه والترقيه مالتك اصلا قليل بحقك هيج عقوبه المفروض يسحب منك الرتبه .
.بابه فهمني انته وين عقلك شلون تسوي هيج ولك ماخفت على وضيفتك شبيك هاي كله على مود الدكتوره شبيك هيج لاحسه مخك ماعندك عقل ..؟
....معتصم ...هسه عوفك من هذه الحجي اهم شي عدت سلامات اذا عالترقيه سهله خلي تتاخر سنه ميهمني ...
....هز رأسه بأسف وكال...
...حسام...اللهم الصبر منك ياااارب ثبت عقلي لان رح يطير بسبب معتصم ..
...معتصم ...ههههههه ميطير لتخاف ..يله اني رايح محتاج شي..
...حسام ..انگلع گلعه كون ولك من الهبطه صار بيه سكر من وراك امشي اطلع من وجهي برااا ...
..............................
....رسل ...طلعت من البيت وكلت لمامه رايحه للدوام بس اني بالحقيقه اتفقت ويه رنا تاخذلي اجازه من الكليه يوم واحد كلت اريد اروح اشوف بيت عمتي ام كمال لان اعرف مامه اذا اطلب منها تجي وياي متخليني اروح أصلا
فقررت اروح وحدي ...أجرت سياره ورحت للمنطقه مالتهم اني اندليت نقطة داله من مامه وكانت اسم اسواق قريب عليهم وصلت للاسواق وبقيت واكفه بالسياره اريد اعرف بيتهم ياهوه بالضبط لان فرع كامل وهواي بيوت
طلبت من السايق ينتضرني ثواني نزلت سالت ابو الاسواق عن بيت عمتي وانطيته اسمهم ودلاني عالبيت وجان ثالث بيت يبعد عن الأسواق
.. رحت للسايق انطيته الكروه وراح واتجهت للبيت وصلت اريد ادك الباب بس صوت دكات گلبي جان أعلى من اي شي جنت كلش خايفه ..
خايفه لا انصدم خايفه لا ترفضني عمتي ومتستقبلني ابيتها خايفه من كلشي بس قويت گلبي وأخذت نفس قوي ودكيت الجرس مرتين بس ايدي ترجف شعور كلش صعب جان ..
...وره شويه سمعت صوت رجال يكول منو ..؟
...مارديت عليه انفتح الباب وجان اشوف رجال تقريبا شاب يطلع عمره بداية الاربعين أو اقل تقريباً سلمت عليه بصوت يرجف وكلتله..
...رسل ...سلام عليكم..
...وعليكم السلام تفضلي اختي منو رايده..؟
....رسل ...بدون زحمه مو هذه بيت ام كمال ..؟
...اي هوه بيت ام كمال وصلتي انتي منو وجايه على منو . ؟
...رسل ...اني رسل بنت عزيز اخوها واجيت حتى اشوف عمتي أم كمال ..اذا موجوده ..
...أنصدم من سمع اسمي وگال ..
...انتي رسل ..؟!!
...رسل ...اي
... هههههه ماشاء الله كبرانه شلون متغيره آخر مره شفتج بيها بالفاتحه مال خالي چنتي كلش زغيره.
....رسل ...هههه اي زغيره جنت ..
...رد بتوتر وكال ..
... هههههه ماعرفتيني اكيد .؟ اعرفج بنفسي اني كمال ابن عمتج تعاي تعاي تفضلي عذريني من الصدمه نسيت اكولج اتفضلي .
...رسل ...ههههه لا عادي ماصار شي...
...كمال ...تعاي طبي امي جوه ..تعاي يمه يمه شوفي منو اجاج.. اجتي بنت اخوج المرحوم تعاي ...
...رسل ...طبيت للبيت جان بيت كلش حلو ونضيف وراقي حيل اول ماطبيت بوجهي للصاله باب الصاله يطل عالطرمه.
...طبيت شفت عمتي وجنت مااعرف شكلها لو ما ابنها عرفني عليها لان اني ماشايفتها من سنين
...اول ماطبيت بقت عيني بعينها ودمعت وصارت تبجي وگالت...
....تعاي يمه تعاي اويلي عليج كبرانه صايره مره ليش هيج عمه گاطعه وياي متسألين على عمتج متكولين عندي عمه من ريحة ابويه أسأل عليها .
...رسل ..تقربت منها وكمت ابجي وحضنتها وابوسها وكلتلها...
...رسل ...والله عمه مااندل بيتكم هسه يله عرفته انتي هم عفتيني وماسألتي عليه ليش عمه الناس گامت تعيرني يكولون ماعندج أهل عمه صدك اني ماعندي أهل ..؟
....ام كمال ...شلون ماعندج أهل يمه لعد احنه شنو هذه ياهو كال ماعندج أهل .
....رسل ...عمه وينج كل هاي السنين ليش عايفتني مواني بنت اخوج الوحيده ..وماعندي غيرج ..
...ام كمال ...ولج يمه شلون عايفتج والله جنت اخابر مرت ابوج كل فتره واطلب منها احجي وياج وكل مره تطلع بعذر جديد واخر مره كالتلي اتزوجت رسل بعد اني شلت ايدي كلت بنت اخويه شافت حياتها وبعد مو بعازتي واتزوجت...
...رسل ...يعني شنو امي كفاح ماقبلت تحجين وياي ..؟
...ام كمال ...اي والله يمه وروح المرحوم شكد اخابر واريد وماكو
...يله عوفج من هذه الحجي المهم اجيتي هسه وشفتج ..يمه صلاوات على محمد وال محمد شصايره تخبلين كبرانه وصايره مره احجيلي شلونج شلون زوجج هم صاروا عندج جهال ..؟
...رسل ...ردت احجي وجان تطب علينه بنيه شابه وبيدها صينيه بيها عصير ومي وگالت ..
....عمه على كيفج وياهه خلي ترتاح وبعدين تسولفلج... هههههه
...قدمتلي المي وگالت ..
...اهلا وسهلا بيج عيوني اعرفج بنفسي اني سبأ زوجة كمال ابن عمتج ..
...رسل ...اهلا وسهلا بيج حياتي اتشرف بيج .
...سبأ...اليه الشرف عمري ارتاحي هسه واليوم غداج يمنه...
...رسل ...لا والله مااكدر أتأخر لازم اروح عندي دوام اجيت من الدوام الكم خليها غير مره اهم شي شفت عمتي وسلمت عليها ...
....ام كمال ...لا والله وداعت عافيتي متطلعين الا تتغدين وياي اليوم ..
...رسل ...بس عمه والله ..
....ام كمال ...بدون بس وميو اكعدي شو اكعدي ...كومي سبأ حضري الغده اليوم رساله تبقه يمي ..
....رسل ...انحرجت منها خطيه شفتها فرحانه كلش كلت ابقه عيب افشلها..
..وره شويه طب طفل صغير يركض بالصاله ويلعب وعمتي تصيح عليه اكعد بدون هوسه طلع ابن كمال الزغير..
...رسل ...مااعرف ليش حسيت بدفو من طبيت لبيتهم عبالك اعرفهم من زمان كعدنه نسولف اني وعمتي وكاعد يمنه كمال مخلصها بس يتشاقه ويضحك شكله كلش مرح وينكت هواي على كد مابجيت لان مشتاقه الهم على كد ماضحكني هوه وكلساع يحجي نكته..
لحد ماصار الضهر گامت عمتي تتوضى وتصلي واني هم صليت وياهه وخلصت استحيت من سبأ شفتها تشتغل وحدها كلت لازم اكوم وياهه رحت ادور عالمطبخ
سمعت صوت المواعين بوحده من الغرف طبيت جان اشوفه المطبخ لكيتها تصب الغده وحدها وكلتلها..
...رسل ...اساعدج بشي ..؟
...سبأ ...عليمن حبيبه روحي اكعدي هسه دقايق واجهز كلشي لما يجون عمي والولد من الدوام ونصب ..
...رسل ...ياولد منو يجي ..؟
....سبأ...ولد عمتج انتي عبالج بس كمال ابن عمتج ...هههههه
تره عندج بعد ثنين غيره ولد عمه وبنيه وحده ...بنت عمتج طيف متزوجه وعدها جهال .
..وبعد عندج ولد عمتج كمال الجبير وعماد الوسطاني ونورس الزغير ..
....رسل ...ابتسمت بوجهها وكلت بگلبي ..هم نورس بالكليه نورس وهنا نورس يربي لو عايشه بفلم هم متصير هيج تشابه اسماء وياي ..
....رسل ...رحت كعدت ويه عمتي وصارت تحجيلي عن ابويه وعن حياتهم شلون جانت ماخلت شي ماحجته بحيث حسيت نفسي عايشه وياهم واعرفهم من زمان ..
خلتني اتندم لان ماعرفتها قبل هالمره .. يربي شكد طيبه وحبابه عبالك من نسوان قبل يسموهم من أهل الله ...
...رسل ...دتحجي وياي وبهاي الأثناء طب علينه شخص وجان تباوعله عمتي وكالت ..
....ام كمال ... تعال يمه نورس تعال شوف منو اجه اليوم ..
...رسل ...انداريت على صفحه الباب وجان اشوفه طب يضحك وكال ..
...نورس ...يمه هلا بالخطار منين ماجاي...منو جاي....
...رسل ...وصل يمي اول ماشافني اختفت الضحكه من وجهه وبقه صافن عليه مصدوم.
....رسل ...اني هم من شفته انصدمت بس مابقيت ساكته مثله شلون ابقه ساكته لازم الوصها لوص ..
...بسرعه بدون مقدمات گمت وكفت وكلتله..
...رسل ...هم انته وين مااروح الگاك يمي ..حتى هنا ..؟
....هنا عمتي استغربت من ردة فعلي وكمال هم بقه يباوع علينه وكال .
...كمال ...شنو تعرفها.. ؟
...بقه صافن عليه نورس ورد عليه ببرود وكال..
...نورس ....طالبه عندي بالكليه ...بس شويه لسانها طويل يرادله گص ..
...رسل ...بقيت ساكته ماكدرت ارد عليه لان استحيت من عمتي بس خزرته بعيوني وكعدت جان كمال يگوله..
...كمال ... والله لو تعرف منو هاي الطالبه جان ماحجيت هيج ..؟
....باوع عليه نورس وگال ..
...نورس ...منو يعني ..وزيرة حقوق المرأة..؟
...كمال ...ههههههه لا ولك هاي رسل بنت خالي عزيز الله يرحمه ..
...رسل ...من سمع هيج نورس بسرعه اندار عليه مصدوم وفتح عيونه متعجب وكال ..
...نورس ...لا بروح الحسين ..صدك هاي رسل لو ناصب عليه احلف.
...كمال ....ههههه والحسين رسل شبيك ..
...رسل ...هنا تغيرت نبرة صوته باوع عليه وابتسم وكال..
... نورس...ياهلا بيج رسل ...شلونج شذكرج بينه بعد هاي السنين..؟
...رسل ...باوعت عليه ورفعت تك حاجب وكلتله...
...رسل ...اجيت اشوف عمتي مااجيت عليك.
.... ابتسم بوجهي وهز رأسه بأسف عبالك يكول ماكو فائده وياج . وعافني وطلع من الصاله .
....رسل ...صبوا الغده تغدينه وصارت ساعه 3 ونص اني من السوالف نسيت نفسي اتأخرت عالبيت الا اتصلت عليه امي تسأل عليه وكلتلها طالعه ويه رنا هسه اجي
..بسرعه سلمت عليهم وطلعت...وهم زين نورس اصلا مااتغده ويانه ماشفته من سلم عليه وراح بعد مااجه.
اني طلعت من يمهم وعمتي بالگوه خلتني اطلع إلا اخذت رقمي مال تليفون ووعدتها اجيها مره ثانيه يله خلتني اطلع .
.بس طلبت من ابنها كمال يوصلني بالسياره مالته يله خلتني اطلع
..واني وافقت لان دنيا ضهر واكيد ماكو سيارات بهيج وقت. وصلني كمال لبيت اهلي وسلم عليه وراح ..
...رسل ...وصلت لبيت امي وجنت ناويه اگلب الدنيا عليها فعلاً ثبتلي هيه مرت اب ...
مااعرف شنو الخلاهه تحرمني من عمتي كل هاي السنين ومتگلي عن اتصالاتها بيه .. اخخخ طبيت للبيت واني عبارة عن كتلة غضب متحركه .....
........................
....يتبع ♥️
#زهراء_الطائي
....
....
تصويت وتعليق وتعليق بين الفقرات اريد تفاعل قوي بنات.
هذه يوزر التلگرام مالتي راسلوني عليه حتى اضيفكم للقناة موجوده سالي ويانه وتسولف وياكم بطلة الرواية 👇
@Sofjj95