Sa tuwing nagmumuni-muni ka sa kalangitan
inaalala ang pag-ibig na biglaan kang binitiwan
sana hindi kumakalam ang sikmura mo.
Sana may tahanan kang uuwian.
Sana masagana ang 'yong agahan,
tanghalian, at hapunan.
Baka nga . . .
may meryenda pa
— di ba?
Sa kabila nang kabiguan
sa pag-ibig na nagpahinto
ng mundo mo
sana makita mo na
may tahanan kang uuwian.
Sa gabi,
may kama kang hihigaan.
Hindi mo kailangang manatili
sa lansangan.
Sana huwag kang mapagod makita
yung magagandang bagay na meron ka
— mga bagay na pangarap lang para sa iba.
Sana makakuha ka ng inspirasyon
sa patuloy na paglaban nila.
Kumplikado ang kanilang sitwasyon,
pero mas pinipili nilang maging masaya
— magtiwala at maniwala sa pag-asa.
HINDI DAHIL MAY ISANG TAONG NANAKIT SA'YO
SASAKTAN KA NA RIN NG BUONG MUNDO.
'WAG MO SANANG ISARADO
ANG PINTUAN NG PUSO MO.