چنت اگلك
دير بالك على گلبي روحه بيّك !
وچنت اذا اتأذه مِن انسان اجيّك
هسة من عندك اذيتي
يا هو الاشكيله عليك ؟
شاهينة نذر الحوافي ..البارت 48 .. elma-98
قرائة ممتعة بيباتي😂🤤
_________
شاهينة .. "قبل زمن"
مسحت دموعي ورا ماشفته صعد السيارة وراح .. طلعت للحديقة وحسيت ايد ع چتفي درت وجهي مختلسة
شاهين : شبيچ؟
شاهينة : جلال التحق
شاهين : ايي ، لهذا تبجين ؟
شاهينة : ايي
.. حضني وبجيت
شاهينة : شاهين احس بشي مو حلو گلبي يوجعني شلون عبالك
مسوية جريمة و على لحظة يلزموني
شاهين : ان شاءالله يرجع بالسلامة ، مو اول مرة يلتحق تره
شاهينة : اعرف ، بس اوووف انسى
شاهين : اجتني فكرة ، نطلع ؟
شاهينة : عفواً ؟ ومنو يخلينا
شاهين : يدرون بيج بيتج .. محد اله دخل
شاهينة : ايي صح مايدخلون بيه ، بس بوقت الضرر
شاهين : فهذا سبب حتى ناخذ ويانا جيهان
شاهينة : صدك احجيلي شكو ؟
.. ابتعدت عنه .. تعال نگعد
شاهين : متأكدة ؟
شاهينة : ايي ، حتى إذا تريد تعال نفوت جوا
شاهين : لا ، هيج افضل
شاهينة : تمام ، يلاا سولف شنو علاقتك وي جيهان ؟ ، شديصيرر
.. تنفس بعمق واردَف
شاهين : مابعرف شو بدي اقول او كيف بس هيك
من لا وعي صرت بنجر لألها بحب اتناقر معها واحكي كمان مثل
التنويم المغناطيسي صارت بالنسبة الي مابقدر مابركز معها
كل فكري معها وشو عم تعمل هلا وهيك كتييير عطيت جهد مشان
اتخلص منا بس مقدرت ، قلبي غدرني صرت بتسحب لألها
بعد ماكنت فل منها بحاول الاقي حجة مشان شوية وقت معها
كثير حلوة من كل النواحي الوجه جميلة جداً وملامحها هادئة
بتخطر على بالي الحديث اليقول "الله جميل ويحب الجمال" لما شوفها
اما الشخصية انا وقعت بغرام شخصيتها اول كيف بتقاوم كلشي
وتواجه وصريحة اتجاه كلشي ماعندها لف ودروان اسرت قلبي معها
حبيتها وماكان بيدي شي غير اخضع القلبي
وقلتلها ان انا ابن حرام وقالت "انا كلي اصل " بلهجتها الحنينة
هي كتير حنينة حتى مع اخوتها وانا بشوف تعاملها معهن اتمنيت علاقتي معك هيك بس نحنا نختلف انا وانتِ منا هنن
هنن ربوا سوا واكلوا ولعبوا وضحكوا وسندوا بعض ، انا وانتِ عرفنا
بعض بالصدفة ومن اجيتك ماتقبلتي وماصدقتيني
نحنا نختلف
شاهينة : بس ابد ماأنسى بطل العصير الي انكسر من رجعت
من السفر ونطيته الي ولا أنسى مواجهتك الي ووگفتك من اجهضت
انتَ صرتلي سند واحنا مانعرف بعض مثل مگلت عكسهم همَ ربوا
سوا فما بالك بخوتنا ؟ ، شاهين انتَ اخوية ولا تفكر زايد
انتَ من لحمي ودمي سواء انكروك او لا انتَ وي روحي من جنت
اصفن وتذكر عندي اخ ميت هو "شاهر" او انت نفس الشي ، جنت اتمناك يمي حرفياً مجنت اعرف انتَ عايش بس اتمناك وياي بكل خطوة
واتمنى لو عايش بس ربك يحبني ولگينا بعض ، اشكر الله لأن خلاك اخوية
.. ابتسم ومد ايده الورا ظهري حضني وبست ايده
سحب ايده وباس راسي
شاهينة : يلا احجي شلون اعترفتلها
.. كلام شاهين والطريقة اليحجي بيها ابد مخلتني اشك لو
اللحظة انُ يريد يستغلها خاصة من نطق بلهجة گلبہ "باللبناني"
متوقعت مشاعره كذب وكلها ضحك على جيهان وممكن بيوم يكسرها
شاهين : رحتلها وقلتلها انا بحبك ومستعد لكلشي بتطلبي
مني طلبت تفكر وبتعرفي لما فتت للبيت شو قالتلي؟
شاهينة : شنو ؟
شاهين : بتحبني بدون تردد ولا فواصل ولا تفاصيل
.. ضحكت الضحكة عيونه وهو يحجي
شاهينة : يلوكلكم كلشي حلو مثلكم ومثل ضحكتك هسة
ربي يديمها بحق ال محمد
شاهين : امين ، ويرجع جلال بالسلامة
تنهدت : متأكدة يرجع ، بس شلون راح يرجع ؟
شاهين : مفهمت
شاهينة : هيج ولا يهمك .. مديت ايدي اله .. نطلع ؟
عكد حواجبه : مو كأنُ نسينا ان محد يعرف بينا احنا اخوة
شاهينة : اعرف محد كاعد هسة شوف الساعة
شاهين : تمام ، وين ؟
شاهينة : مشتاقه نروح الخيل والعب إلى ان افحط
وكلبي يكوم يوجعني
.. نهض وياي واردف
شاهين : نمر جاي من بعيد ، اني رايح
.. طب سريع ونمر صف سيارته اجه بأتجاهي
نمر : صباح الخير
شاهينة : صباح النور
نمر : جلال هنا ؟
شاهينة : لا ،التحق
.. لبس نظارته الشمسية ورفع فونه يخابر
نمر : ايي ملتحق ، اوك .. باوع عليه.. نحجي بعدين
.. سد الفون وتحرك خطوتين يروح استوقفته
شاهينة : نمر .. دار وجها
نمر : نعم ؟
شاهينة : شلونك
عكد حاجبه بأبتسامة : مشكورة السؤالج ، على الله
.. سكت وكمل .. تعرفين بنت العم اي شي نخلي على الله يتيسر بلا شعور من عدنا واثق من الله بيوم ينطيني على كد حبي ونيتي
حتى وان مو نفسها بس لابد يعوضني .. عادي اكعد ؟
شاهينة : اكييد
كعد بعيد عني حيل : عايني بماأنُ انتِ بادرتي راح انفتح وياج
شاهينة : عادي ، جان عندي فضول عن وضعك بعد مشفت قلق
الولد وجلال عليك
ابتسم : هذوله گلوبہم تنحط بشيشة وتنضم من گد ما
رچيچہ
شاهينة : مفهمت؟.
نمر : كلوبهم لينه واحد يشيل هم الثاني لدرجة انه النمر شالوا
همي شحجي بعد ، الله عوضني بيهم اخوة مو بس ولد عم
شاهينة .. رفعت حاجبي : معبالي هيج علاقتكم قوية
نمر : احنا علاقتنا مو قوية عادية ويجوز بالنسبة للناس اقل من
العادية بس لمتنا وحدة ودمنا واحد من واحدد يصيرله شي بنية ولد
كلنا سوا نتأذى
.. وجعني گلبي يمكن غرت او مفتقده هيج شي
شاهينة : الله يديمكم يارب
نمر : وانتِ ويانا .. ضحك .. تره اذكر من جنا صغار شگد
جنا نكره بعض
ابتسمت : ماأعرفكم صح وعشت وياكم قليل ونسيتكم
بس اذكر ضباب ، اتعارك جنت وي واحد عنده كفشة هوسة
وشعره سرح يعيب على شعري
ضحك : حتى شعري وكع بالمناسبة
ابتسمت : من سألت مرت عمو كالت انُ هذا انتَ وانُ احنا
مجنا نتوالم ابد ودائماً مشاكل
نمر : وحتى مرة جان اكو مناسبة كلش جبيرة
جان البيت هذا مو هيج حلو والحديقة ماكو مكان كله صبة ويطبخن
النسوان بالجدورة الجبيرة ويغسلن خضار ماأعرف شنو المناسبة
بس احنا الجهال نلعب ونفتر ، ومدري على شنو تعاركن
ودفعتج على الباب وتكسرت سنونج اقصد الجم سن العندج
أبتسمت بخجل : ماأذكر
نمر : انتِ عوفج مني جنت اغار منج لأن ابوية يحبج دائماً
من احنا يلعب ياخذج وحدج ويا وترحون اريد اجي ومايقبل
حتى ضرب يضربنا مقابل شاهينة بنت اخو
.. وترحون وحدكم تلعبون ويحرك دمنا من يكول اخذتها للالعاب او شترالج كذا حاجة وكذا يالله ارييد اكطعج ساعتها من الغيرة
تررره ابوي اخذتي مني .. ضحك وكمل .. بعدين كمتي تبجين ماتقبلين
ترحين ويا ليش مدري اكو غبي يرفض هيج لعب ودلال
غيرج ! .. بس كام يشيلج على حايط وانتِ تبجين بخوف
يكلج اعلكج بالبنكة إذا ماتلعبين وياه رغم ابوية يشاقه انتِ
حييل تبجين وترحين وياه لأن تخافين من المرتفعات .. رغم ماأعتقد
تذكرين كل هذا .. بس الكل يحجي بنت جلال من هي وطفلة
"شاهينة اسمها ظلمها ، كلها أنوثة جنها غزال وهادئة
وتسمع الكلمة وصوتها ماينسمع عكس الشاهينة تماماً ، بس عمي يبرر ويكول انُ سماج شاهينة للنذر بس وانما انتِ مثل الطير الناعم وهو جناحج دائماً هذا كلامه رغم عيشتكم القليلة ويانا .
باوعتله واني ارجف من جاب طاري سالم الكلب
عيوني دمعت : لا ماأذكر كل هذا بس ، بس من جان ياخذني
لللعب اذكرر
.. ابتسم بهدوء : شبيج ترجفين ، احتمال خفقانج من القلق والتوتر
على جلال علت نبضات كلبج
.. شاهينة : لا لا ، عادي
نمر : اصيح الهدير
شاهينة : مايحتاج والله عادي
نمر : شكراً شاهينة ، تغير مزاجي بجم كلمة ..
جنت مشتاق الهيج ايام
شاهينة : العفو ، ان شاءالله تحصل حبيبتك
نمر : هي مرمر واسمها عليها مرمرت كلبي .. من رخصتج
بالمناسبة بعدني اغار على ابوي منج
..
همست : ياريتك مو ابنه ياريت !
... طبيت للبيت اخذت علاجي واني انتظر شنتظر بالضبط
ماأعرف بس مثل العنده امتحان وممحضر زين ومنتظر الاسئلة
سحبت فوني دخلت الحساب جلال الانستا مناشر شي
مثل العادة اصلاً إذا ينشر تصير معجزة وساعتها سببها
أصدقائه "شكور وحمود" يمنشنو شهالاسامي مدري بس هي القاب البعض مطلعينها حسب كلامه ..
البايو مالتهم كذلك مطقمين سوا لأن عدهم بيج سوا للاخبار
حسب كلام جلال لأن مداخل الصفحاتهم ولا عندي علاقة
بأي احد من طرف جلال ولا من طرفي يعني انسانة عايشة النفسي
"دمٌ عراقي ، كُلنا للعراق وكُلنا أمة محمد "
من سألته وگال انُ ضد الطائفية الصارت فترة بالبيج بسبب
بعض البوستات والأخبار من الاحزاب وحطوا بايو البيج وبصفحاتهم الشخصية حتى يدل عليهم
بايو جلال ..
جلال المحمد
"دمٌ عراقي ، كُلنا للعراق وكُلنا امة محمد"
"يوم المبارك اصبح الديني شهيد 🇮🇶🖤"
.. ابتسمت وطلعت من الصفحة ودعيتله
بالاكسبلور وجذبني
فساتين رسم تجنن تصاميمها اقل ما يقال بحقها
.. طبيت للبيج جلال متابعة !
تجاهلت الموضوع
.. حاولت اعرف بس رسم ينشروا لو قيد التنفيذ
خاصة التفاصيل الناعمة الي بالالبسة اسرت گلبي
.. راسلت بدون ماأباوع للوقت
💬 .. سلام ، ممكن اعرف هذهِ التصاميم قيد التنفيذ ؟
.. سديت الفون وبالي يمهن من كد ماعجبني
اخذت كوب جاي وكعدت اشرب وسحبت كتاب
"خيال اسود"
(اه! النفس البشرية ماأغربها! وماأوسع تناقضاتها وغرابتها واحتياجها وتخبطها وضعفها! البشر جميعهم بحاجة للحب والمودة والمديح والفخر من قبل الآخرين كأنهم اطفال مدارس!
"تبقى البشرية طفولة خالدة تحتاج للدلال .. "
أصدق من هيج مقاريه .. اقرا وابتسم فرحانة بالكتاب حيل
خاصة الكاتب عراقي "ادهم عادل"
احس بفخر مو طبيعي كأنُ اني كاتبته
.. وثانياً انُ هذا ثاني كتاب اقرا بأسبوع واحد
فززني المسج الوصل للفون .. اخذته وابتسمت اكثر
من شفت البيج رد
💬 .. وعليكم ، نعم
.. حلوو يعني أكدر اخذهن باوعت الجسمي خاصة اني ورا
ماأجهضت هاا عوود شوية سمنت لأن اهتميت بصحتي
بحجة مريضة والا ماكو حجة لخ ابعد جلال عني بيها
المهم فصاير ارتب واحلى رغم زيادة القليلة يجوز كيلو ونص ..
رديت بشوكت اكدر اخذ إذا كاملات
💬 .. حالياً كاملات نعم ، بس مانعرضن بالسوك لهذا
السبب نعتذر من حضرتج ، إذا تكدرين تجين للشركة طلب خاص
ابتسمت واووو شي خاص بيه
💬 .. اكيد لان حييل حبيتهن ، ممكن اعرف المحلات التابعة للشركة
او صاحب الشركة والمصممين ومنو يدير وكلشي يخصها إذا ممكن ؟
💬 .. ههههه ، طبعاً مجمعات ال*** هي تابعة للشركة
وصاحب الشركة والمصممين همَ يديرون المجمعات نوعاً ما
صفنت اعرررفها هووواي جنت اشتري منه بغداد
حتى مرة خالة كلثوم ذكرت هو صديق الوالد وجلال
شاهينة 💬 .. اها أستاذ ليث اعرفه ، قبل كل من مجمعاتكم
اخذ .. حالياً ماأگدر اجي البغداد حتى اروح للشركة
عادي اتواصل وي صاحب التصميم بشكل مباشر
.. مجنت اعرف ليث هو نفسه شكور او حمود لأن اصلاً
مافرق بينهم اسامي تشابه واحداث جلال وياهم تضحك
ماميز من يحجي فقط اضحك ويا
💬 .. اكيد ، حسب اليعجبج لأن شركائي يصممون وينشرون هنا
دزيت التصميم الاريده
ووصلني حساب صاحبه او صاحبته
💬 .. هذا حساب المصممة شخصياً ، ولان حضرتج تعرفينا
حسب كلامج وطلبتي دزيته الج
انطيت لايك للرسالة وطبيت للحساب
مبين شخصي مو للشغل من خلال اليوزر والبايو
إضافة انُ خاص .. دزيت رسالة واني انتظر رد
----------
الحبّ، قادر على اقتحام أرواحنا، كعاصفة، قادرٌ على إشاعة
الفوضى في كل الأشياء المنظّمة في حياتنا.
...
نظر : تعررفككك استااذ ليث تعرفككك ؟
ليث : شعليه اني گايللها تعرفني والله الحساب ماعرفه يول
نظر : شلون ماتعرفه وانتَ مشايفه
ضحك معتصم : اسف الك ليث اتمنى تتخطى
شمر عليه الملف : انتَ تنجب منو الگللہا تعرفني
معتصم : الحساب مفتوح عدكم هم وتشوف معليه
لازم ابري ذمتي الضلعتي
ليث باوعله بأشمئزاز وهو يضحك واني اقرا الرسائل
معتصم : راح ادز حسابج
نظر : دز خنشووف ، منين تعرررفه
ليث : جيب فووونك شوو .. ابتليت صرت معروف
حياة الشهرة صعبة خل نطيها بلوك
نظر : دقيقة دقيقة اكو مشتركين بينا بحسابي الخاص
وبحساب البيج بالله خل اشوف منو هذا
سكت معتصم وهو يضحك لأن مشتركين
معتصم : اكيد ليث هو المشترك
ليث .. سحب الفون يشوف الحساب : ماأعرفه الحساب
طلع المشتركين منو
نظر : جلال !
ليث : ها شوفي معناها من الاقارب
معتصم : هسة اول مرة يراسلون صدك جذب
نظر : اول مرة وحدة تكول بشكل مباشر اعرف استاذ ليث
معتصم : بابا هذه التصرفات حتى تاخذ التصميم خاص
ليث : هذا يفهم عقلية شغل
نظر : واني عقلية ايش ؟
باوعلي بتركيز وضحك : غيييرة وبس
نظر : وين الغيرة بالموضوع ؟!
معتصم : المهم اني اترخص بماأنُ خلص الاجتماع
طلع هذا بعد ماعلگها ودفعني
ضحك ليث وصلت رسالة الحسابي الشخصي من نفس الحساب
المشكلة ماكو معلومات بالبايو ويوزر مشفر
رديت على رسالة
نظر .💬 . ياهلا، تفضلي
بسرعة ردت بعد مانطت مقدمة وحجت بالموضوع
شاهينة. 💬 . اريد التصميم بس ماأگدر اجي البغداد
.. باوعت الليث وحكيت خدي بطرف ابهامي
ليث : شبيج ؟
نظر : تريد التصميم طلب خاص الها
ليث : انتِ حُرة
نظر : من جهة احسها متحمسة ماأريد اكسرها ومن جهة
اني داصمم المجمعاتنا
ليث : اتفقي وياها بخصوص الموضوع
نظر : يعني ؟
ليث : كلليلها هي تأخذ اول قطعة بس مايكون التصميم
بس الها بعدين نعرضه بالسوك وبسعر مختلف حتى لا تصير
مشاكل قانونية
نظر : هو هيج
.. اتفقت وياها ومرفضت
شاهينة. 💬. ماعندي مشكلة بالسعر ، ايي اعرف هيج حالياً
اني رايده اوول قطعة الي بشكل خاص
نظر .💬. تمام نتواصل بوقت التحبين ، والسعر مراح
يختلف هاي الخاطر معرفتج بليث
كتبتها متقصدة
شاهينة. 💬. اشكرج جد ، فرحتيني
.. يلا وعي كتبت ودزيت 💬 . جد لو عم
.. ردت امسح وملحكت شافتها غميت نفسي وضحكت
راحت الهيبة يالعباس كل من ورا ليث
شاهينة .💬. ههههه ، رغم عتيگه السالفة بس اوك
.. صدك ضحكت من كلبي ودزت
شاهينة. 💬. اگولچ مناصبة عليه؟
نظر .💬. هههه ، لا حشاج اعتذر بالغلط وصلتج
جنت ادزها الغير احد
شاهينة .💬. سبحان الله
اهوو مبينه لسان ورا الكيبورد هاي
نظر .💬. نتواصل علمود التصميم
شاهينة. 💬. تمام
.. نظر : ليث راح اسأل منين تعرفك
.. رفع فونه من اللابتوب ديصفي الحسابات
ليث : مبين أقارب مو شفتي المشترك ؟
نظر : اقارب ايش؟ أقاربك؟!
ليث : لا ، اقارب جلال ..
رفعت حاجبي : اها اها صدكت ، وجلال من شوكت عنده اقارب
بغداد غيركم والبنية دتكول هي قبل منا تاخذ
ضيك عيونه : مدري ، سوي التردي خل اكمل حتى اروح للدائرة
.. باوعتله صفح ودزيتلها
نظر.💬. من وين تعرفين ليث ؟
.. سديت الفون واني انقر بطرف اصابيعي عليه
لزم اصابعي بانزعاج وكمل شغل بايد وحده .. صفنت بحركته
رجعت بالوقت قبل فترة
.. بعد ما معتصم دبر لقائي وي رسل رحت للمكان النلتقي بيه
ابتسمنا بوجه بعض وسلمنا برود من الطرفين
نظر : ايي مبروك ، سمعت حامل
رسل : يبارك بيج ، ان شاءالله تتهنين بزواجج
نظر : شُكراً
وكت الربينا سوا هسة نتحاجه مثل الغربة
رسل : ايي ليش ردتيني؟
نظر : تذكرين من اجيتي البيتنا تتوسلين
رسل : جؤ ، زين تذكرين تهديد حازم
نظر : تهديد فارغ ، طلعتوا ابوكم من السجن بفلوسنا
كأن رسل أخرى كبالي
رسل : الفلوس ابوية استثمر بيها يرجع النا بيها
نظر : هذا الحجي تحجي بالقانون من اشتكي بتهمة ..
قبل لا اكمل قاطعتني : شتشتكيين؟!
نظر : عليكم كلكم ، حتى امج تطب للسجن هالمرة واحتمال حازم
في حال صارلنا شي لأن هددنا
رسل : المطلوب
نظر : انتِ تساعديني ارجع املاكنا خوش ؟
رسل : وليش حتى هيج اسوي
نظر : اهلج مايخيسون بالسجن
رسل : الاهل العافوني وحدي مايهموني
نظر : مفهمت؟ ، عاافوج!
هزت راسها بقهر : ايي ، ليش من ردت اجهض واخلص كلتلهم
اطلك رفضوا ، والله يحبني ومدللني
نظر : رسل .. استغفرالله .. رسل حرام تجهضين روح الله حطها بيج تدفرين نعمة الله غيرج يتحسر عليها ، بعدين هو ابد ماأذاج
يعني كلام اهلج رغم كلهم خطأ الصالحج
رسل : كلبييي مو يمه هذا مو سببب كافي ، مو حرام احسن
من مااجيب ويعيش وسط نزاعي وي ابو
نظر : بيج ولد ؟
هزت راسها : ايي وبالتالي يصير مثل ذوله الدنشوفهم
شلون يكرهون اهلهم
.. حطيت ايدي على ايدها
نظر : الكلبج يمه توفق شاف حياته
هزت راسها : اعرف كال معتصم أنُ خطب فرح وحتى معتصم
ناوي يستقر بعد ماتغير وضعه
هزيت راسي : شوفي كلنا نحاول نتغير الخاطر نفسنا كلنا
دنحاول نستقر وي النستاهله ..
رسل : شفتيي نظر وين جنا قبل كل خططنا سوا شنوو تغيير
شنووو الغيررررنه هسة كل واحد بجهة
سحبت ايدها
نظر : الفلوس وابوج طمعهم والجشع ، يجوز لو ما طمعه
جان حتى تعرفتي على قطر وحياتنا مثل قبل واحلى بس اهلج طمعوا واخوج ديحاول يكمل بمسيرته بس حقدد مو طمع
رسل : حياتج وي ليث ؟
ابتسمت : مرتاحة الحمدلله
رسل : اذكرج جنتي تردين واحد حتى اهل ماعنده تالي اجاج
ووياه حتى طفل
نظر : من نعيش نعرف امانينا شي ومشاعرنا شي ، مرتاحة
حتى وي اهله مسلم جزء مني ابني الماجبته
خاصة من يصيح "مما ندر" كلبي يريد يطلع يجننن
يقين وحده كيوت حييل وخلوقة ومنصفة وكذلك البقية محد
مأذيني ودائماً محسسيني اني مفضلة عليهم ومحترمين
شنوو اريد بعد
رسل : الله يديمها
نظر : شُكراً ، زين شوفي تحاولين بكل الطرق تجيبين الاملاك
الي وورا ماتخلفين شتردين يصير ، طلاق ؟
اني اعرف صديقتي محامية تمشيلج بالقضية وتطلع حقج من حلك السبع ووابنج الج .. بالمقابل تجيبيين اهلج للدرب
رسل : نظرر صعبةةة
نظر : هذا العندي اني تخليت عن انتقامي من امج وتزويجها
الاجباري الي بس الخاطر الخطوة الانتِ راح تخطيها ماتخطين هيج
خطوة ، ساعتها تعذريني كدامج نظر لخ الزمكم قانون
وحدي ويمج الحساب .. لا تنسين آثار ضرب امج بعدها على جسمي
ماسويتلها اي حل خاف بيوم يختفن ويختفي انتقامي
وياهن ، اوك ؟
رسل : نظررر ، امي أخذت الموافقة من حلكج بعدين دتكولين
هسةةة حياتج جنةةة
نظر : مايهم هسة جنة نار المهم أفعال امج ، خلتني اعيش
بخوف وتعنيف باكوووا ابووي حرمواا امي من عدنا واحنا منها ومن اختناا ، لججج هددتني بشرفي وحلفت تشهرني وتحط صوري وي ولد اذاا ماوافققق على ليث ، عبالها الدنيا تدوملها
صبرية لعبت بنفسها .. من رخصتج ، عود فكري
وإذا لا حتى احجي وي المحامية نمشي قانون واحرك انتقامي
.. دفعت الحساب وطلعت اجرت تكسي ورحت للبيت
ومثل المعتاد .. نزل من حضن اقبال اليه حضنته بقوة
مسلم : مثاث
نظر : بس وحدة ها
مسلم : يس مامي
.. ضحكت وبوسته انطيته مصاص وطب ليث بدون
اي حرف يمشي واردف
ليث : نظر وراي
نظر : شكو ؟
باوعلي وعيونه تخزر
ليث : خالة خلي مسلم يمج ، تعالي
.. صعد باوعت مستغربة
اقبال : شبيج؟
نظر : سلامي ، تبقى يم بيبي هسة اجي
.. صعدت ورا وذبيت جنطتي
نظر : شكو ليث .. تقدم اليمي بعصبية وايده بجيبه واليسرى ركع
الباب بيها قوي لأن ماسديته وبنفس الوقت تحاصرت
ليث : جمممم مرررة بمرررة سألت إذا انتِ مجبوووورة لو لااا ؟
هااا ؟! جممم مررررة كلتلج.. وسألت الحدددد اخر لحظةةة إذا
عندج تواصل وي بيت ال**** ووي رسل وكلتييي لااا
اهووو هذا منين عرف
نظر : ايي مجان عندي تواصل و
.. صم حلگي بقوة بأيده اليمنى : ديربااااالج تنكرين ديربااالج
دفعت ايده بهدوء : مناكره تمام ؟ كلتتت مجاااان سابقاً
بسس هسةةة رجعت اتواصل وياها ايي منكرررت شي
ليث : وكلااااامج انتِ مامجبووورة وزواجج منييي لجج
انتِ استغليييتي عاطفتييي ويااااج واستغليتي مسلم وتعلقه بيج
وستغليييتي حتى طريقة خطبتي منججج حتى توصلييين
الانتقااااامج شهالانانيةةة !
هيججج احنا هينين ومشاعرنااا تلعب بيهاا بس لاااان
ماتدرررين عندي اماااانة من تقدمتلج كل هذااا تطلعيييينه
بيييه لاااان صبرييية هددتج
.. نظر : ليث مو ه
.. رفع ايده قاطعني وعيونه دم
ليث : مشكورة ، خيبتج ماتنسي ومايحتاج تهددين البنية
ماعدهااا حل اني راحح ارجع املاكج وانتِ حُرررة بريئة
منييي ومن مسلم اوك ؟
نظر بهدوء : ليث فدوة افهممم مو هيج
ليث : شنوووو المو هيييج شنووو ؟ ، مو كملتي علمود
الاملاك وجم فكرة تافهة مال انتقااام مووو ؟
وورررراها شتسوووين مثلاً مو تطلكين .. هاي اني فاتحلج الطريق واكلج املاكج وكلشي الكممم يرجعلكمم بس خلييي
انتقااامج بعييييد عني اني وابني
لزمت ايده أهدأ من عصبيته : ليييث فدوة باااع والله
مو هيج
رفع حاجبه ونفسه سريع : لعددد ؟
نظر : شوووف هو صح لهذا السبب كملت بس
.. ضحك متهستر وسحب ايده
ليث : الافضضضل تسكتييين
نظر : لككك ليييث بس انطيييني مجاااال احجججي
ليث : ماكووو حجي العندي كلته الج ، الله ومحمد وعلي وياج
كتفت اديه برود : والله ولا اطلع ولا اروح عاجبني ابقى
ماريد اروح ولا اريد اطلك خوش
ليث : كتلج اني ارجع املاكج
نظر : حلوو ،هم ابقى وهم تخفف شغلي بس شوف عنددي
شررررط
.. هو نار واني احجي برود تقدم عليه بعصبية
ليث : شلوون لا، شرررطي
نظر : شووف ..
بعدني محاجيه وعصر فكي بين اديه غيرر شاغت رووحي
ليث : العييين الصلفةةة شلوون تصييير؟
.. دفعته : هااي كدامكك خوووش
.. حط ايده ورا راسي لزم شعري بقوة غمضت
عيوووني بألم شال ايده عن شعري وقربني الوجها
ليث : ماتردين تطلكين موو
نظر : ايي
ليث : خوش ، لا تطلكين لعد ، تبقين هنا ممنوع عليج الشغل
.. هو كال هيج لو تهسترت
نظر : هههههه ، تشاقه؟
ليث : لا ، عرفتي منين تلزميني واني اكسرج مو بس الزمج
نظر : والله ولا عاش اليكسرني وكدامك شووف مو نظر التنجبررر
سبببق وكلتها وارررجع اكولك ، ايي والله انتَ اصلاً مجنت بعيني ولا معتبرتك ولا اعرفك حتى من خطبتني مطلعت الكم ولا لأهلك لأن ماأهتم وماوافقت الا لمن صبرية هددتني بشرفي وأعتقد عرفت السالفة ساعتها وافقت ، بس تره هم بقيت ماهتميت منووو انتَ حتى انجببررر عليك ومنووو اليجبرني صبرررية !
ماعبرتك إلى ان عرفت الحقيقة ووكفتلنا .. ماردت اسوي شي
غيرر ارد وكفتك الك بقييت اسايرك إلى ان ضمنتك خووش لهنا
.. ووافقت واني افكر شلون انتقم بتفاهة مثل مگلت
واخذت كلشي اريده .. الحب والاحترام وشغلي بجيبي ومسلم
ابني صار من لحظة الكلي مامي لا تفكر تبعده عني فاااهم
حصلت على كل هذا واني استغلك هيج تماما .. هسة منو العاش
اليريد يكسرني؟ لو الكسرني
كدامك لا انتَ ولا صبرية
ابتسم بهدوء : عاشت ايدج ، سيناريو ولا اروع .. كمل بهمس
.. بالوقت العبالج بيه انتِ مانكسرتي والله وراح تصير گومتج
صعبة بهداااي وحدة وحدة اطلعهن منج
نظر : شتطلللع؟
ليث بأبتسامة .. كرص حنجي : برأيج هسة اثرتي بيه
بحجيج؟ هاا .. خمني شعوري
سكتت اباوعله مستغربة شديسوي هذا مو المفروض
يعصب ويطردني ويكلي انتِ حُرررة ومالي دخل بيج ولا بشغلج
ولا ايي شيي شنوو هذا ؟
تقدم خطوتين باس خدي ورجع شعري لورا ورتبه
والله عقلي راح .. تعداني وصل للباب واني اباوع
نظر : دقيقة دقيقة ليث ، شنو هسة ؟
ليث ؛ شنو ؟
نظر : يعني ، هسة انتَ حجييييك شنوو تصرفاتك شنو
قابل بكلامي يعني ماراح تطردني حتى ارجع الشغلي
.. سحب نفس بصوت وعاف المقبض مال الباب
باوعلي وأشر بعيونه
ليث : كعددي
.. كعدنا سوا
ليث : سؤال واحد وبس ؟
نظر : أسأل ..
ليث : حجيتي حتى تصير هاي ردة فعلي انُ اطردج
موو لو ..
سكت ماكمل واني هم سكتت حطيت ايدي على خدودي
وتأفأفت خطوتي نعرفت مايفيد شي
نزلت ايدي وحضنت رجليه الصدري وباوعتله
نظر : ليث الا شغلي وانتم .. لا تخيرني هيج
شي ماأگدر من وعيت اني ماأگدر اكعد خاصة التصميم
ليث اختنك إذا اعوفه
ليث : نظر ، درست تصرفاتج وعرفتج وعرفت نيتج من الاول
وحتى لقائج وي رسل واتفاق وي معتصم عرفت ردت تحجين
كلشي بنفسج بس ، وييين حايررة تعيشين الدور
بابا أفكارج هاي توديج بداهيه قبل لا توديهم .. رسل من سجلت
الصوت شمدريج مجانت راح تنطي الغيري لو منطيته العصابة من جماعة ابوها لو و لووو
نظر : يعني هي تكذب على صلح وياهم ؟
ليث : ماأعرف والله ليش اشيل ذنبها ، بس لقائنا وياج وانُ
تنطيج اهلها اني كلتلها ونطيت بيج
.. للأسف مخاب ظني وخسرتي ثقتي ، ماأتحكم بيج من صدك
انتِ حُرة سواء ردتي تبقين او تطلكين او تبطلين تشتغلين
المهم بالموضوع مسلم وبس
كتفت اديه بزعل : واحنا؟
باوعلي بذبول : شبينا
نظر : اني أسألك
ليث : شنو المابينا ، شو الحمدلله شيخطر البالج جربنا
نظر : ليث لا تحجي هيج
ليث : شحجي لعد ؟
نظر : والله ابجي ترره ، نبرة صوتك هيج تأذيني
ليث : شبيها ؟
نظر : مليانة خيبة
ليث : اذتج ، لو انبت ضميرج
.. نظر : اوووف
... كمت رجعت شعري لورا بهضم ونزلت دمعتي
يالله شگد حقييير حتى وهو يحبب بكل تصرفاته حقييير
حسيت بخطوته وراي نداريت نضربت بيه رفعت راسي
صارت عيوني بعيونه .. مسح عيوني
ليث : هسة شكو تبجين؟
نظر : تعرررف انتَ اكبر حقير
ليث : اها ، مبين تردين اسكتج
.. مسحت عيوني : لا تسكتني ولا بطيخ ، دتحقر بيه
شعور اكل روحي اكل
.. باسني غمضت عيوني
:
:
:
فتحت عيوني عيوني للواقع بست ايده
نظر : شكراً لوجودك بحياتي
ابتسم بوجهي وكمل شغل وصلت رسالة
شاهينة.💬. مو معرفة شخصية
نظر.💬 . ها !
شاهينة. 💬 . ااي
نظر .. دزيتلها تفاصيل والاشياء التخص الفستان وتفقت
وياها شوكت تاخذه مني
باوعت الليث : مو من قسمة ماريا انُ تلبس اول تصاميمي
ابتسم و لزم ايدي : يلا نطلع ، معليج من ماريا
نظر : وين ؟
ليث : تجين لو لاا ؟
نظر : اكييد ، بس وين
ليث : اوووف ، مكان صارر هوااااي تردين ترحيله
نظر .. رفعت حاجبي : شهالمكان؟!
نظر : مايخطر البالي
ليث : بس تحكمي بردة فعلا لأن مو وحدنا
نظر : هوو وين ؟
ليث : اهوو ، امشي بابا
.. صعدت السيارة ويا مشينا وقت طويل ولوحة
"بغداد السلام تودعكم"
صارت كبالي بس وين رايحين معرفت ..
جان مشغل دعاء كبل غفيت صحيت على صوته
نظر : ها
ليث : يلا .. باوعت للمكان كراج معناها صف السيارة
.. نزلت ويا وطلعت من الكراج
المكان عبارة عن زلم لابسة دشاديش ونسوان كلها بعبي
صغار كبار اني وكم وحدة هيج سافرات ننعد ع ايد
.. ميزت انُ احنا جايين نزور احد اهل البيت
نظر : النجفففف!
ضحك : صوتج
... متحمسة اشوف مرقد الامام وكبر بابا حيييل
واسلم واشم ريحة الحضرة تملي روحي بالطمأنينة واحتار شريد ادعي
حيييل مشتهية هيج شيي
.. شوية وتقدم واحد من بعيد ماميزته من تقرب
لابس اسود كله وبيه شوية تراب ، جلال !
اجه الليث تحاضنوا وليث ربت على ظهره
ليث : عظم الله اجرك
جلال : الحمدلله .. البقاء لله
ليث : شلونك؟
جلال : حييل أعزه جنت ومنصبه بالشغل مو بالسهولة
نتجاوزه .. مسح وجها .. شلونج نظر ؟
نظر : الحمدلله ، البقية بحياتك
جلال : البقاء لله
.. رغم مافهمت شكو ومنو بس مبين واحد ميت
ليث : شوف خل نروح للمرقد ارتاح وراها البغداد نرجع
جلال : سيارات الزفة هناك راح يرحون للدفن
ليث : تم كلشي
جلال : بس الدفن ماأگدر ماأحضر وبنفس الوقت ماأگدر احضر
.. ليث : الله يصبرك ، نزور ونرجع بمكانه نلتقي
جلال : اوك .. رن فونه رفعه .. جايي .. من رخصتكم
.. راح وليث ورا تنهد
نظر : شبيه ؟
ليث : استشهد صديقه
نظر : الله يرحمه
ليث : امين امين
.. ابتسم : يلا نزور
نظر : اكيد
.. اخذ ازار صلاة لبسته ورحت للتفتيش رجعتني امسح
المكياج ورزلتني وانتِ جايه الامام وين الاحترام ومن هالحجي
هو صح كلامها بس اني مجنت ادري اصلاً
.. ابتسمت بوجها وسكتت رحت للحمامات مسحت وتوضيت
طلعت نهائياً التقيت بليث بعد مااتصل عليه
رحت للمكان الكال عليه
ليث : اوووف ، ضمي روحج بأي قرآن اية
.. ابتسمت وسلمنا الغراض للامانات
ليث : من تطلعين يم البرادات اوكفي
نظر : تمام
وافترقنا واحنا نفوت للصحن تجنن تجننن الريحة والهوا
والمنظر والعالم زلم ونسوان تروش والطفل اليسجد وي الشايب
الرافع ايده يدعي ومرا توزع مراد وبنية تطلب نذر كلشي حلوو
هنا .. ابتسم وامشي وگعت عيني على اثنين ولد واحد
حاط اديه على بطنه والثانية سابلها ويصلون .. انتبهت هم
لابسين اسود تذكرت جلال ..
يجوز ذول هم عساكر من الدفنة شكلهم هيج يوحي
بس مدري بعد ابتسمت على منظر وكملت مشي إلى ان وصلت الباب
ركعت وبست الباب ومشي واني ابوس بالمكان
إلى ان وصلت الشباك رغم كلشي قاومت الدفع والصياح
والهوسة وعيوني بس عليه متركزة
اريد الزم شباك هذا العظيم الربي العالمين بقدرته
لأجله رجع الشمس ، لعيونه نزل اية قرآنية
لمجيئه نشك جدار الكعبة االي بموته مانطق غير
"فزتُ ورب الكعبة "
اب سيدا شباب اهل الجنة وساقي عطاشى كربلاء
زوج البتول وصهر الرسول
بنته جبل الصبر وحفيداته الشرف والخدر
زوج ام البنين المضحية ، من ظهره طلعوا اربع كواكب
انطوا ضواهم وروحهم لأجل اخوهم
انسان عظيم ولد منه نسل عظيم
.. ولزمته ابتسمت ونزلت دمعتي كوه تمسكت
بيه عن لا يدفعوني بسته وملحكت اطلب واختنكت من الدفع
ظلت بس ايدي بالشباك كلشي ماشوف من بعيد واني ادعي
واندب داحي باب خيبر إلى ان وكع حتى الحجاب من راسي
وخرت مختنگه
وفرحانة اول مرة ازوره ووحدي
شعوور أعمق من انُ احجي بييه .. واني كاعدة بالگاع
عدلت شعري وحجابي .. واجه بالي
"ياعلي ليث يبقى وياي بكل خطوة ، مسلم ابني لا تحرمني منه"
طلعت مني بلا وعي ضليت صافنة على نفسي
حسيت بأحد يندسني .. بنية شابة
نظر : تفضلي
: من رخصتج كلبي اريد اصلي
نظر : العفو .. كمت من المكان اخذت تربة
ورحت الغير مكان اصلي واقرا .. هووااااي مر وقت
من دون ماحس دكت ساعة الحضرة
.. سلمت ع أمام وكذلك طلعت واني ابوس بيه
تذكرت ليث وضحكت عزززا نسيته
طلعت يم البرادات شربت ماي وهو ماكو ..
دقيقة اثنين ، خمسة ، عشرة، ربع ساعة
..نظر : عزززا بس لا عافني
ليث : لا بشرفج
نداريت عليه مبتسمة : اووه خفت ، وين جنت
ليث : بالحضرة غير ، صار شگد طلعتي
نظر : والله هواي وكلت هسة هو ينتظر وطلعت نوب اني
النتظرت
ليث : عادي اني أطول دائماً بالزيارة ، صدك زيارة مقبولة
نظر : قبل اعمالك
ليث : لا تگولين زرنا وندعينالك
ضحكت : مگلت ، بس ليش ؟
ليث : اكثر جذبة شائعة
نظر : لا مو كذب الواحد من يدعي يدعي للكل
اضافة انُ اني جد دعيتلك
.. ابتسم : يلا نروح
نظر : وين ؟
ليث : للمقبرة
نظر : دقيقة ، اذب الازار
ليث : احترام للمكان ابقي بيه
نظر : اوك ، راح نطلع سيارة لو مشي
ليث : ولا وحدة
نظر : لعدد ؟
.. ليث : ستوتة
نظر : شنوو ؟!
ليث : ايي والله
نظر : ليش؟
ليث : اكو منحدرات بالمكان تكدرين تصعديها؟
نظر : ماأدري
ليث : ومو مال نجرب هسة الوضع مايسمح
..
هزيت راسي مشينا مسافة طويلة وباوعنا البعض
ليث : الأمانات
نظر : نسينا الاغراض ! .. ضربت كصتي
.. وهو استغفر
ليث : شيرجعنا
نظر : رجليه
ليث : استغفرالله والشكر ، دخيلك علي
.. ضحكت حتى وهو عصبي "استغفرالله والشكر"
باوعنا البعض بلوم لأن اثنينا نسينا راح هو للامانات
واني كعدت ، يعني شهالثول من اخذنا الاحذية غير نتذكرهن!
.. اجه كبالي نطاني اغراضي وهو يباوع للمكان واخذنا
مشي من جديد إلى ان وكف ستوتة
.. باوعت الشكلها شلون تمشي وتهز خررب
صعد ومد ايده الي
ليث : يلا
نظر : شلون؟
ليث : رفعي رجلج وصعدي شلون يعني
.. باوعتله بزعل وصعدت ابتسم وحرك وبدا الهز الزين
اني وبمكاني وكالساعة واكع شي مني ليث كعد بالارضية مالتها ماهم
انُ هي وسخة ومرتاح
نظر : لعد حط الاغراض بحضنك
ليث : شعليه ، كل الالي فون وبجيبي والسويج بالحزام
والمحفظة هاي
تأفأفت وادركت الفرق بينا شگد مرتاح واني شگد مستصعبة
اووي طز وإذا توسخت .. حطيت الاغراض بصفه
واني اتحرك ردت اوكع لزمت جتفه
وهو ميت ضحك والولد هم .. كعدت بصفه كوه
ليث : اهم شي الراحة ، بعدين انتِ راح تذبين الازار
اني نلصت لوص حتى دهن الله يسلمه ذاب
الولد : والله جان اكو كارتون بس صار عجاجه وطار
ليث : مو مشكلة حبيب
.. وكفت مرا عجوز وبنية شابة وولد هم صعدوا ويانا
مو ستوتة ظيييم شالت الما تشيله السيارة
.. هو حرك والثگل ممتوازن كالساعة تهتز الجهة لزمت ايد ليث
من الساعد
نظر : حباب مانسوي حادث
عض شفته وهو ميت ضحك : يقين مسوت سوايتج
والله ، لاا عادي
نظر : وين العادي منحدر وتوازن ماكو وهي بس حديد
لازمه 3 تايرات
البنية اردفت : ابد مامبين انُ انتِ مو منا
الحجية : اول مرة تزور
.. هزيت راسي وهي مستفهمة
ليث جاوبها : ايي حجية اول مرة وشرفي يجوز اخر مرة
مااتورط بعد
.. باوعتله واني رافعه حاجب
همس ومسح وجها : هم رفعت السيف
.. واخيراً وصلنا المقابر .. باوعت بالبداية
جهال تمشي وتركض عبالك العاب مو مقابر!
.. يبوو التراب
نظر : هسة وين احنا بالضبط
ليث : نروح القبر ابوج
نظر : ونرجع نصعد ستوتة حتى نروح المقبرة عمو وابو وام مسلم !
ليث ابتسم الكلامي : إذا تردين مانزورهم
نظر : طبعاً لا مايجوز ، اكيد نزورهم حتى لو تُك تُك مو ستوتة
ليث : مايحتاج تك تك قريب مسافة طريق
.. دخلنا الشبه غرفة مربع صغير مكان باب مخلوع
فتت قبر واحد بيه بس .. وكعت عيني للاسم
المرحوم
"زيد طه غازي " وتاريخ الوفاة .. ابتسمت وباوعت الليث
يهمس ويسلم
ليث : راح اجيب ماي وياس اوك؟ ، هنا قريب باوعي
اشر للمكان هزيت راسي وطلع
.. رحت قريب القبر مبتسمة باوعت للكلمات العليه
اسماء الله الحُسنى ، ايات قرانية
.. مديت ايدي تلمستهن كلهن تراب نفخت وفات ليث
بيده دبة وردية مليانة ماي واللخ ياس وورد وعلك
.. مدها الي
نظر : شنو ؟
ليث : انتِ تغسلينه وسلمي عليه ، لا تضلين ساكته
الميت يشعر ، تخيلي ابوج اول مرة يحس بيج شنو شعوره
او انتِ شعورج شنو لأول مرة تحجين ويا
..
صفنت بكلامه ردت افتحها قوية اخذها هو فتح الدبة وابتسمت وعيوني
نملت دموع .. بهدوء اخذته
ورشيت ماي واني اردف
نظر : سلام بابا .. استغربت مسمعي هالكلمة .. بابا تعرف كلمة غريبة
اول مرة اكولها يمكن لان مااعرف من صغيرة كلتها لو لاا
.. شلونك ردت أسأل بس انتَ يم الله اكيد احلى لون وانتَ تحت رحمته ، تعرف شنو اني اول مرة اشوف كبرك
.. بعبرة .. وللاسف شفت كبرك ومشفتك الك بالواقع غير
بالصور .. بابا كلمة حيل حلوة مگدرت اكولها الك مااعرف عنك شي
صراحة نهائياً غير اسمك وحب ماما الك ، وطمع عمو بيك
تدري شنو ؟
.. ماما تگول انتَ من تحب حييل تحب ومن تنزعج تنزعج
وتشبهني بيك من ناحية الطبع يمكن ابتسم مرات لأن اعرف كم
شي عنك بس .. مسحت على اسمه .. بس بالاخير اني مشفتها منك شبهوني بيك ، المهم يجوز تدري ويجوز لا لأن شايفني قبل لا تموت اني وصغيرة باوع مثلاً عدنا صورة سوا
انتَ وحاضني وتبوس خدي والدب مالتي بين ادينا
اكولك شتغير .. هذا الدب ماأعرف وينه وايدك ملازمتها وايدي
مو بنفس نعومة وبرائة الطفولة هوواي حرام ارتكبت
بس الحلو انُ لزمت قلم اني صرت مصممة ازياء وازياء
حيل حلوة والفضل يرجع الليث ، تسأل منو موو ؟
هو يعرفك قبلي .. وهسة هو جابني ليث الانسان اللبست
حلقته بأيدي ولزمت ايده بعد ايدك وايد منتظر
يكول ايدي حلوة بس ماأعرف ليش يتنمر ع انُ اصابعي طوال وضعاف
رغم هنَ من علامات الجمال .. السبب انُ شراينها بارزة
والسبب كثرة لزمي للقلم هسة نجي الخدي
.. خدي بيه شامة تعرف قبل مجانت بيه داأحچي خاف عندك
فضول عن ملامحي وبشرتي نفس الصفاء لأن اهتم بيها بس داخلي
لا مو صافي هواي نيتي سودا واذيت هواي ناس
وستغيلتهم وخيبت ظنهم ، وقهرت هواااي نااس .. تعرف شنو من حسنة سويت بحياتي ؟
وافقت على ليث وربيت مسلم .. داحس ليث يربينا
سوا ، هسة هو يمكن عباله لان هو هنا داأحچي بيه بس
جد رفعت راسي الليث ، مكتف ايده ومبتسم
ليث: لا ، ماكو هيج شي .. تره اصلاً بنتك بس لسان وبوش
يمكن كلتلك مرة من اجيت وي منتظر .. ولدك كلهم هوسة
بس يرفعون الراس هنيالك على هالخلفة .. عندك منتظر واحد لزگه
بس خوش ولد ، وبنتك الصغيرة بالله استفزاز راكعتني عمو عمو
وهاي مكيفة لان يكبرون بيه بشرفي واني ٣٠ مابيه كل عمر ٨ او ٢٩
بالزايد ، بس الأكثر استفزاز ولزكة نظر
.. ردت اطلكها وماقبلت تغلط وتضرب عادي من احنا بالغلط
نطخ صاحت "حقوق المرأة ، اني معنفة "
.. ضحكت ومسحت عيوني
نظر : مو هيج بابا
ليث : كملي كملي ..
.. ابتعد البرا الغرفة
درت وجهي للكبر وباوعتله وصرت احجي بصوت ناصي
نظر : احس اني ظالمة ليث ، وهواااي مشاعر افضفضها
الصورك هسة ماأگدر بس خلص من هاليوم راح احجي وي صورك
اكيد تعرف ، احب اكلك اميي حييل تحبك لدرجة للان لابسة
حلقتك يجوز تدري يجوز لا ، منتظر نفس طولك بالصور
بس صراحة هو شوية احلى اني عيوني وعيون اخواني كلنا
عليك ملونة قطر نفس الملامح بس العدسة تختلف ، قطر حيل مخيفة
شخصية صعبة تسوي الي براسها حييل خايفة عليها من انُ تضيع
نفسها بس بنفس الوقت افكر انُ عندها وعي جبير كذلك
.. المهم عرفتك على محيطي والقريبين مني
ولازم ماأنسى معتصم وفرح اصدقاء طفولتي وفرح جنتك
خطيبة منتظر تعرف جان حلو لو انتَ خطبتها بس الله قدر وفعل
.. باي احبك رغم ماعرفك
.. اخذت الياس والورد حطيتهن وطلعت يم ليث
باوعلي وقدم فونه
نظر : شنو ؟
ليث : مايصير تطلعين هيج لازم تقرين هذهِ الأدعية
وتسلمين انطيني الماي الزايد
.. انطيته الماي
واخذت الفون اقرا إلى ان كملت بست الكبر وطلعت واني
اباوع لورا
.. عدل راسي ليث
ليث : مايصير تتلفتين
.. باوعت للكبور ذاب عليها ماي ابتسمت عليه
واني اقرا اسامي الكبور وقرا الكل واحد الفاتحة
.. مشينا مسافة دقايق واخذ ماي هواي وورد كذلك وياس
تعثرت بالكبور لزم ايدي
ليث : ديربالج
.. نفس الشي كذلك غرفة بس هاي اكبر وكبور اكثر
وبصفها غرف مو كبور هيج
اردف ليث بالسلام وهو يهمس واني ويا اردد
الاسمعه منه .. باسهن كبر كبر سويت نفس حركته
الكبور جانت نظيفة فمجرد مارش عليهن ماي
وقريت الأسماء
"جده وبيبيته" ابوه "اخوه" مرت اخوه" "وعمته "
توقعت راح يروح يم كبر ابو بس راح المرت اخو واشرلي
ليث : سديم ، مخلفت بكلامي وهذهِ نظر كلامج كله تحقق
ومسلم يكللها ماما ، كلتلج قبل بس هسة تختلف لأن هي وياي
.. كمل همس بس اني سمعته ليش يهمس .. هذه سري ..
انتقل الكبر اخو : غيييث حبيبي كسرة ظهري
تعرف الحياة حيل صعبة بدونك ، خاصة من ابنك يصيحلي
بمكانك "احس نفسي حقير واناني " كلشي الك تعبك ابنك المشيخة
لأن غمضت عينك صار الي ، تعرف شنو الأصعب ، انُ ماأگدر ارفض
من مسلم يكول
"ببا امو" .. نزلت دمعته .. ماأگدر اكوله اني مو ابوك واكسره
اكثررر غيث ليش هيچ ها ؟.. كلشييي ديصعب عليه
من جهة شغلي ومن جهة انتَ ومسؤولياتك العفتهن .. اعذرني
صار أشهر ماجيت التهيت بكلشي من شغل العرس السجن السفر
تدري شنو صار بهذه الفترة ، نسجن هيثم بتهمة قتلك
تدري شلون نار وجت بيه يتهمون اخوي بقتل اخوي ؟!
ماتحملت منظره وهو مصدوم من الاتهام الاجا .. تطاولت على القاضي
ونسجنت بمكانه وهو وياي ذبوا ، تدري شنو الاصعب
تصنفنا اربع ارهاب واحنا اهل الحك ، هاي السالفة محد
يدري بيها بس ابوي كلنا مطلوبين للقضاء
وكلشي ديصعب حيييل ثارك ، والحمل العفته ، امي ونظراتها
ماقصدي ألومك بس هو هيج ، يقين ترره كامت تضفر شعرها وحدها
اوك مو جديد عليك هالخبر بس امهدلك ، اجوا طلبوها مني
هم مو اول خطابة موو ؟ يعني مو جديد ، بس اليخوف اني شبه
قتنعت لأن خااايف حيل انُ افقدها وهي يمي ماريد اجرب الكسرة
مرة ثانية واشوفها تكبر اكثر او تنجرف عن طريق تربيتنا
وترتكب خطأ واني مااسيطر واذيها ساعتها الموت اهونلي .. ومن جهة
اخاف اظلمها فسكتت مگلت الأحد ، اريد تساعدني
اكللها وخاف تلتهي عن الدراسة وتشغل بالها لو ترفض وتستغرب
لأن اول مرة اكللها عبالها ثكلت عليه وتحز بخاطرها
تدري شنو اليأذي ، تطلب من التحبهم يتحملوك ويتقبلوك ماريد
يقين تجرب هالشعور كافي اني مجربة
.. مودع بالله ياحيلي
باس الكبر ورجع الكبر ابو
ليث : هالمرة ماعندي حجي وياك ، بس هذهِ جنتك نظر
تستغرب موو كأنُ سامع شي قريب من هالاسم ؟
.. بس جنت متوه اسمها نظر مو ندر ، امي توصلك سلام
باس الكبر وكعد بالنص يقرأ دعاء طلعت فوني وقريت
قرآن من كمل سلمنا وطلعنا
ليث : نزور طلال فد مرة
نظر : اوك ..
.. طب الوحدة من الغرف بيها اربع كبور جان جلال كاعد بالنص
وبديه الأسود يلمع مبلل عبالك من جهة ايده لفت نظري
.. سلمنا على القبور .. رفع راسه النا
ورجع يقرا بالقران راح ليث يم قبر طلال
.. فتحت الدعاء بفوني وصرت اقرا
باس القرآن جلال واردف
جلال : زيارة مقبولة
ليث : قبل اعمالك
.. شافوني مگدرت اركز هم لاحظوا وسكتوا بقيت بالدعاء قدر
الامكان كملته وباوعت عليهم مستغربة
نظر : شبيكم؟
ابتسم جلال وجها اصفر : عبالي تتعاركين مو تقرين من وجهج
نظر : ماركز بسهولة
ليث : انتَ غاسل الكبور
جلال : ايي صارن على دربي اول
ليث : شبيها ايدك كوه تحركها
جلال : طلقة اجت بيها بالتشيع
ليث : شوكت هذا الحجي ؟! ، شفتك الصبح مجان بيها شي
جلال : جنت لافها ولابس قمصلة مامبين هسة نزفت
ليث : كوم نروح للمستشفى صدك تحججييي؟!
جلال : لا يمعود ، هسة هنا هوسة نروح البغداد فد مرة
وهلال هناك يشوفها
ليث : تريد ادفنك بصفهممم ، ابوك لابو هلال
جلال باوع الكبر ابو : يثوبلك عادي
.. باوعتلهم بحذر وليث من عته الدم زاد
نظر : اووكفف ليث
جلال : مدري خايف عليه مدري يريد يموتني
.. كلمته صعبه حيل تبين المه ووجعه
طلعنا ليث سريع اخذ ستوتة نزعت الازار وصعدت
ليث : للمستشفى
الولد : ماأگدر ، اخذك الطوارئ الحضرة
ليث : ديلاا اهم شييي شي يعالج هذا السكط ايده
راح تروووح !.. شنوو من عقل انتَ نابته بيها الطلقة
تذكرت اباوع افلام يشدوها على مود النزف
نظر : ليث شدها اله
ليث : ماتشوفين بشنو اشدها
.. باوعت لعيونه جلال سلهم بصعوبة مايكدرر يحچي
طفر ليث حطه بحضنه متنبأ وكعته
.. هو شافه هيج لو تخبل صار يصيح على ابو الستوتة
ليث : اسرررع لككك
.. خطر بالي الازار لزمت من الخياط وشكيته
نظر : شووف راح نشد ايده هسةة اووك ، بس لا تخااف
ماعليييه شي ، ليث حبيبي أهدأ
يهز راسه واني كلبي ذاب المنظرهم كوه لازمه دموعي
لزمت ايده شكيت البدي بصعوبة خاف يتأذى اكثر وياريت
مشاكته كلبي وكععع من المنظر الطلقة نابتة حافرةةة المكان حفر
من جهة زنده وكلها مليااانة دم .. درت وجهي واني مغمضة عيوني
قووويت كلبي وباوعت للمكان شلت اللفاف الجان مخليه
واخذت الازار شديته اكثر من شدة وضبيته قوي وليث يرجف
أكدر اشهد ساعتها انُ هي اصعب لحظة عشتها واني اشوف
انسان مابين الحياة والموت والسبب طلقة تشييع
من فاتحة صاحبه الاستشهد بطلقة العدو ! .
____________________
"ما عادت هذه الأماكن اوطانْ انها مقابر."
رأيكم يهمني؟
شحيصير بجلال ؟
نمر ؟ ، ليث ؟ .. نظر؟ ، شاهينة ؟ ، يقين ؟
.. كتبوا بالكومنت وصوتوا 💛
حب جبير الكم
حسابي الانستا 🫀