بارت قصير اعرف بس ميخالف احسن من ماكو لان تعبت ولازم انام اعذروني باجر اعوضكم والله والأحداث بدت
تحمى أكثر رح تصير هواي مفاجآت بلايام الجايه ترقبوا الصدمه ..
..
لاتنسون تعليقاتكم وتصويت حته اكتب اكثر
....................
رسل ..رحنه لبيت خالو عادل نبات يمهم حتى ثاني يوم نطلع لبيت أهل العروس ......
...رسل ..وصلنه شفنه تماره اخت حاتم موجوده هيه وجهالها عدها ولد ثنين الجبير عمره 8 سنوات والزغير 4 سنوات ..
اني من زمان ماشايفتها صارلي اكثر من سنه تقريبا ..
...رسل ..طبينه سلمنه عليهم كلهم رحبوا بينه وخاله هاجر سلمت عليه وتماره شافتني وصارت تبوس بيه وتحجي وكالت ..
..تماره ..هله بيج رسوله ولج شصايره متغيره وكبرانه شنو هاي منين تجيبين هالجمال كله تخبلين ..
...رسل ..اني ضحكت وشكرتها عالمجامله مالتها جان تحجي سالي وكالت ..
...سالي ..عيني صلي عالنبي لتحسدين اختي عيني هههه
...تماره ..ههههه اذاتمرضت وره الحفله كولوا تماره حسدتها هههههه
...كفاح ..ديله كافي سوالف تعالن اكعدن عاد ..
...تماره ..عمه فدوه لتصيرين متشدده ويانه هاي اليومين خلينه نفرح تره عدنه حفله حبابه ..
...كفاح ..خير أن شاء الله بدت سوالف تماره الماتخلص ..
...رسل... جنه نضحك ونسولف وصوت الضحك واصل لسابع جار بهاي الأثناء طب حاتم جاي من الحلاق مزين اول ماطب سلم على مامه وعلى سالي وعينه ماشالها من سالي ابد
وسلم عليه بس ماباوعلي ابد ..حسيت دكات گلبي دگه فوگ دگه من شفته كدامي حاولت ابعد نضري عنه لأن خفت لاتفضحني نضراتي كدام اهله وينتبهون عليه
.. كعد ويانه وصار يسولف ويضحك ويه مامه وسالي اجه بسام اخوه كعد يمي وصار يتشاقه ويحجي وكال ..
...بسام ..ها دكتوره شلونج شخبار الدراسه اكلتي شكم كتاب ليهسه ؟
...رسل ...هههه وليش اكل كتب شكالولك عليه .. وبعدين اني ماريد اصير دكتوره لتكول دكتوره ..
...بسام ..لعد شتصيرين ..؟
...رسل ..اريد اصير محاميه مثل بابه الله يرحمه .
...رسل ..دااحجي ويه بسام وجان يسمعني خالو عادل وحجى وياي بصوت عالي والكل سمعه وكال ..
...عادل... ابوج الله يرحمه لو موجود جان هسه يفتخر بيج وتقر عينه بشوفتج أن شاء الله اشوفج احسن محاميه واني افتخر بيج بمكان ابوج..
...رسل ..من حجه هيج وياي عبالك جنت اريد حجه حتى ابجي بجيت ونزلت دموعي كدام الكل همه عبالهم بجيت لان ذكر بابه كدامي بس اني جانت محصوره دموعي بالكوه ونزلت لان شفت حاتم كدامي .
..كمت امسح بدموعي وضحكت وكلتله ..
..رسل ..خالو مو وكت بجي رح تخرب الكحله مالتي تره والله اشتريتها غاليه ..هههههه
...تماره ..شوف بابه تخاف عالكحله هسه هاي شتحجي وياهه بله هههه
...عادل ..هههههه يله كومن بنات حضرن الغده تره جوعانين .
...كامت تماره وراحت وراهه سالي واني اباوع على حاتم من كامت سالي عينه عليها لحد ماطلعت من الصاله .
. ماشال عينه منها ابد .. كلش ضجت منه بوقتها كلت والله الا اسوي شي يبرد گلبي اليوم
كمت اريد اشيل الدولكه مال ألمي شلتها ومشيت جان اوصل يم حاتم عوجت ايدي ووكع ألمي كله على ملابس حاتم سويت نفسي مصدومه واني بالگوه لازمه نفسي مااضحك ..وكلتله..
...رسل ...يااا عزه ماادري عثرت ووكع عليك ألمي ..
...باوع عليه بخزره وهوه يمسح المي عن ملابسه وكال ..
...حاتم ..اييي عثرتي بالهوى ووكع عليه ألمي .. صدگتج ..
...ضحك خالو عادل وكال ..
...عادل ..يله خير ألمي خير ماصار شي كوم بدل ملابسك هههههههههه
...رسل ..عفته وطلعت من الصاله واني خربانه ضحك عليه ..طبيت للمطبخ شفت البنات يحضرن الغده ويسولفن بقيت واكفه يمهن واني الضحكه تارسه وجهي منظر حاتم ميروح من بالي شلون وكع ألمي عليه ..
...رسل ...وره شويه صبينه الغده ورحت أرتب السفره واشيل المواعين اسفطهن بالسفره طبيت للصاله شفت بس حاتم كاعد بالصاله وبيده الموبايل ويتصفح بي اول ماطبيت جان مدنگ عالموبايل رفع عينه عليه وتك حاجبه مرفوع ورجع باوع للموبايل ..
...اني هم كعدت بالكاع أرتب السفره خلصت وطلعت بدون مااحجي شي خلصنه اجوي كلهم عالغده ..ومامه سألت خالو عادل وكالت ..
...كفاح ..عادل منين البنيه الي رح تخطبها لحاتم .؟
...عادل ..والله مااعرفها علمي علمج هوه اجاني وكال اعرف واحد صديقي بغير محافضه بيتهم واريد أخطب اخته دزيت ناس سألوا على أهل البنيه يكولون خوش ناس ومابيهم شي سمعتهم زينه بالمنطقه وهسه نروح ونشوف ربج يسهلها أن شاء الله ..
..كفاح ..الله يقدم البي الخير حاتم يستاهل الله يسعده يارب ويتمم على خير ..
...هاجر ..حبيبتي اشكرج أن شاء الله اواصلج بلافراح خيه..
...تماره .. أن شاء الله يوم زواج رسل ونفرح بيها ..
...كفاح ..لا بعد وكت رسل خليها ملتهيه وراهه سادس ادعيلها تخلص سادس على خير ..
باوع عليه بسام وكال بستهزاء..
...بسام .. أن شاء الله تخلص من السادس وتاخذ البروڤ يعني أعلى من الدكتوره ..
...رسل ..من حجه هيج بسام كاموا يضحكون كلهم اني ضحكت وكلتله ..
...رسل ..لا اني مااكدر اخذ البروڤ لان انته اولى بيهه مني اني كافي عليه بكلوريوس متواضعه اني ماادور مناصب وشهادات عليا هذني خليهن الك استاذ بسام ..
...من حجيت وياه هيج الكل صاروا يضحكون بصوت عالي وخالو عادل غص بالاكل وشرب مي مامه جانت كاعده بصفي ضربتني على راسي بايدها وكالت ..
...كفاح ..لسانج وتالي ويه لسانج شوكت تعقلين عاد .؟
...هاجر ..عوفيها والله بردت گلبي لو ابقه افكر اسبوع ميخطر براسي هيج رد على بسام والله ..
...باوع على بسام حاتم وكال ..
...حاتم ..هيج احسنلك وحده طولها شبر ونص تقصفك هاي القصفه ..؟
...رسل..من حجى هيج حاتم خرزته بعيوني بس ماكدرت اجاوبه بقيت ساكته وهوه يباوعلي وابتسم لان يدري بيه مااكدر ارد عليه كدام اهله ..
...رسل ..اني وحاتم علاقتنه قويه لان جان قبل يخابرني ونحجي ونسولف سنتين علاقه صداقه اني وياه لذلك علاقتي بي قويه
وعندي وياه ميانه بس اهله ميدرون بينه اني وياه جنه بعلاقه بس سالي تدري لهذه السبب هوه يحجي عليه كدام اهله ويضحك عليه لان مااكدر ارد عليه كدامهم ..
...رسل ..خلصنه الغده لميت السفره ويه البنات ورحت حضرت الچاي وديته الهم بالصاله همه بقوا يسولفون واني رحت للمطبخ شفت خاله هاجر تعزل بالمطبخ لان تماره ابنها يبجي وراحت تنومه وسالي اتصل عليها غمار وراحت تحجي وياه ..طبيت شفت خاله هاجر تعزل بالمطبخ كلتلها..
...رسل ..شدتسوين خاله روحي اكعدي اني أعزل المطبخ روحي ..
...هاجر ..لا مامه شيرادله هنه بس المواعين اخلصهن واجي ..
..لزمت أيدها وكلتلها ..
...رسل ..لا والله متسوين شي روحي اكعدي اني انضف الله عليج ..
...ابتسمت وكالت ..
...هاجر ..بارك الله بيج يمه شلون بنيه نادره ومعدله ..
...رسل ..راحت خاله هاجر واني بقيت أعزل المطبخ واغسل المواعين واگفه عالسنك اغسل المواعين جان اشوف ايد انمدت بصفي عالحنفيه
...جنت شايله ماعون بيدي من الخرعه گمزت ووكع وانكسر مني ..باوعت شفته حاتم واكف يمي ابتسم وكال ..
...حاتم...اريد اغسل شويه وخري ..
...رسل ..هيه هيج تطب للمطبخ سوي صوت تنحنح شبيك ..
...باوعلي صفح وكال ..
...حاتم ..خفتي ؟ ياعيني فقيره وتخافين خطيه ..
...رسل ..مو خفت بس گزمتني جنت صافنه ..وشنو هيج تحجي شكالولك عليه مو فقيره مثلا ؟
...حاتم ..الفقيره متسوي الحركات مالتج سوالف المخابيل بطليها ومره ثانيه اذا تعيدين الحركه مال قبل شويه متلومين الا نفسج ..
...رسل ..ياحركه شتقصد ؟
...حاتم ..من وكعتي ألمي عليه تره موعبالج عبرت عليه ادري بيج متقصده تسوين هيج ..
...ضحكت بطريقة مستفزه وكلتله .
...رسل ..ههههه هااا قصدك قبل شويه من عثرت وماادري ووكع عليك ألمي ..اي غير عثرت ماادري .
...بقه يغسل بيده وألمي مفتوح وكال ..
...حاتم ..لا تره حركاتج متعبر عليه لتسوين نفسج فقيره والله اذا احطج براسي ابجيج دم بس ساكتلج اكول خطيه زغيره باجر تكبر وتتعلم احترمي تره وصلت حدها وياج رسل ..
... من حجى وياي هيج انقهرت عيني بالكاع وكلتله ..
..رسل ..اسفه بعد متنعاد اني مو قصدي اضوجك ..بس تره اني جبيره مو زغيره لتگول عني زغيره كلما تشوفني تكول زغيره ..باوعت عليه وكلتله ..
...رسل ..لوبس اعرف شوكت اكبر بعيونك وتشوفني جبيره طول عمرك تشوفني زغيره وكلشي مااعرف ويرادلي تعلوم تره اني كبرت والله ..
...سد الحنفيه وكال ..
..حاتم ...الكبر مو بالعمر الكبر بالعقل وانتي عقلج عقل طفله اعقلي بابه كافي خبالات ..
...رسل ..حجه وياي وعافني وطلع ..بقيت اغسل المواعين ودموعي تصب بدون وعي وافكر بكلامه .
.خلصت تنضيف المطبخ وطبيت للغرفه الي حطينه بيهه غراضنه نمت عالجربايه وغطيت وجهي وكمت ابجي وكاتمه صوتي حته محد يسمعني ..
...تعبت من البجي وغفيت نمت ...فزيت من النوم مدري شكد نمت مديت ايدي اخذت الموبايل اريد اشوف الساعه بيش جان اشوف الساعه ب8 ونص بليل ..حييييل شكد نايمه عزه ..
...رسل ..گمت من الفراش بسرعه لميت شعري بسرعه شلون ماجان وحطيت الشال على راسي وطلعت .
.ادور عليهم شو البيت هدوء ليش محد كعدني طبيت للصاله شفت خالو عادل وبسام كاعدين بالصاله طلعت رحت للمطبخ شفت مامه والبنات وخاله هاجر كلهن بالمطبخ يحضرن العشه كعدت عالكرسي يمهن وكلتلهن ..
..رسل ..ليش خليتوني انام ليهسه هسه شينومني بليل ..
...سالي ..اني لگيتج نايمه كلت خليها تكعد وحدها عبالي تعبانه ..
...رسل ..عاشت ايدج هسه ابقه سهرانه للصبح ..
...تماره ..احد كالج نامي العصر والله حلوه هاي ..هههههه
...رسل ..بقيت كاعده يمهن وره شويه اجه ابن تماره الزغير وكال ..
...يريد يروح يجيب البايسكل مالته من فوك بالغرفه الفوك ويخاف يصعد تماره جانت تثرم زلاطه باوعت عليه وكالت ..
...تماره ..فدوه رسوله اصعدي وياه بس جيبي البايسكل وتعاي حبابه.
...رسل ..اي يله تعال حبيبي .
...صعدت ويه ابن تماره فوگ هوه يصعد واني اصعد وراه دنصعد عالدرج جان ينزل حاتم يركض والفرحه بعيونه ونزل جوه اريد اعرف شبي ماباوع عليه ابد بسرعه صعدت ويه ابن تماره وكلتله..
...رسل ..يله علاوي بسرعه وين البايسكل مالتك حته ننزل ..
...راح يدور عالبايسكل واني تفكيري كله يم حاتم بس اريد انزل ..صاحني علاوي وكال ..
...خاله نلعب هنا تعاي دفعيني بالبايسكل حبابه..
...رسل ..لا حبيبي ننزل جوه نلعب تعال ..
..صار يبجي وميقبل الا يلعب فوك لعبت وياه وره شويه سمعت صوت صياح صوت خالو عادل وحاتم يصيحون بس ماافتهم شي منهم
بسرعه شلت علاوي بيدي ونزلت اريد اعرف شكو جوه
...رسل..نزلت ردت اطب للصاله جان اشوف سالي طلعت من الصاله وجرتني من ايدي وكالت ..
...سالي ..تعاي احجي وياج رسل ..
..رسل ..شكو ليش يصيحون شبيهم ؟
...أخذتني وطبينه للمطبخ وكالت ..
...سالي ..حاتم لغه الخطوبه مالته اتصل بالعالم وكاللهم صارت عدنه فاتحه وانلغت الخطوبه.. لهذه السبب خالو عادل يصيح وصار عصبي ..
...رسل ..من كالت هيج كمت اگمز واضحك وحضنتها واصفگ بيدي واضحك ردت ابجي من الفرحه وكلتلها ..
...رسل ..الله عليج سالي ..احلفي لغه الخطوبه كولي والله صدك لو تتشاقين ..
...سالي ..اي والله شبيج نصي صوتج لحد يسمعج شيكولون عليج هسه ..
...كمت اگمز واطفر من الفرحه واصفگ بيدي وكلساع احضنها وابوسها وكلتلها...
...رسل ...الله اليوم اسعد يوم بحياتي معقوله صدك لغه الخطوبه لو اني دااحلم اكرصيني حبابه كرصيني ..
...وره شويه شفت سالي تخزرني بعيونها وكالت ..
...سالي ..رسل كافي اشش ولج كافي ..
...رسل ..وكفت جان اباوع ورايه شفت خالو عادل واگف وشاف وسمع كل الحجي مالتي .
.عزززه شكد استحيت بوقتها منه بقيت منزله راسي من الخجل مارفعت عيني ابد وياريت الكاع تنشگ وتبلعني من الفشله ...
...جنت كلش فرحانه ومن فرحتي نسيت اسأل عن السبب الي خله حاتم يلغي الخطوبه طبيت كعدت بالصاله يمهم وجان أنصدم من كالت خاله هاجر ..
...هاجر ..حاتم صارله سنين يتمنى يسافر ويشتغل بأمريكا بس ماتوقعت رح يجي شغل هسه بهذه الوقت ..
...رسل ..سمعت الحجي مالها وانصدمت ..
...شنو يعني ؟ حاتم رفض الزواج حتى يسافر للخارج ..؟
لا اكيد يتشاقون ماصارلي دقيقه من فرحت فدوه لتخربون فرحتي ياربي دخيلك ..
.....................
يتبع ♥️
#زهراء_الطائي
..
...
تعليق وتصويت وتعليق بين الفقرات حبايبي 🌺
...
اكتبولي توقعاتكم هنا شنو تتوقعون يصير بلايام الجايه ويه حاتم ورسل