بارت طويل تعويض لان اتأخرت عليكم بناتي ♥️
اريد اشوف تفاعلكم حتى منا وهيج كل يوم ينزل بارت
....................
دااكنس الكاع وجان احس وجع بصدري قوي وعندي صداع براسي يريد ينفجر ..
...كلت هاي لان مانايمه وجنت بالسياره راسي مصدع خلاروح اسوي چاي واشرب ..
...سالي ..خلصت تنضيف البيت وشربت الچاي ورحت لغرفتي اخذت متيم من رسل وبالگوه اجه وياي كلش متعلق بيها حتى مرات احس بالغيره منها شنو ابني يحب خالته أكثر مني
.. بس شسوي ..صدك هيه أكثر وحده متفرغه لمتيم لان اني ومامه التهينه بحياتنه والدراسه ..
...المهم اخذت متيم بدلت ملابسه وانطيته المميه مالته .. ونام .. بيومها مامه وصت عشه من بره دلفري .
. كالت لتسون عشه .. خلصنه العشه من وقت وكعدنه نسولف بالصاله اني ومامه ورسل...جانت ساعه 8 ونص بليل ..
جان يندك الباب مال بيتنا ..طلعت مامه تفتح الباب جان اشوف خالوا عادل طب للبيت وسلم علينه .. وكعد يسولف ويانه وكال ..
...عادل .. شلونج يابه سالي شخبارج صحتج شلونها ..
...سالي ..الحمدلله بخير خالو انته شلونك ..
...عادل ..بخير وصحه الحمدلله ..
..باوع على رسل ورجع باوع على مامه وكال ..
...عادل ..كفاح ..اني اليوم جايج بطلب ..اني اعرف الوقت مو مناسب هسه ..واعرف المفروض مااجي بهاي الطريقه بس اني اريد اخذ الموافقه منج وبعدين اسوي الصح ..
...كفاح ..مافهمت شنو طلبك ابو حاتم وضح اكثر .
...عادل ..اني اجيت اطلب ايد رسل لحاتم .. وحاتم ابن اخوج وانتي تعرفي كلش زين تربى من هوه وطفل وياج بنفس البيت ورسل هم بنتج وانتي ربيتيها وهيه بنت صديقي المقرب عزيز الله يرحمه واني اعرفها واعرف اخلاقها شنو وماالگه احسن منها لابني حاتم ..شگلتي ؟؟
...ضحكت بذهول مامه وكالت. .
...كفاح ..هههه والله فاجأتني بطلبك اني الي اعرفه حاتم ....
...قاطعها خالو وكال ..
...عادل ..حاتم ..كبر وصار عمره عمر زواج .. واي شي من الماضي ممنوع ينذكر بعد
وهوه هسه رايد رسل وإذا صارت الموافقه منا لنهاية هذه الاسبوع اسوي الخطوبه والمهر مالهم واي طلب تطلبي انفذه الها تدلل رسل ..
...كفاح ..بس هسه رسل تدرس سادس علمي وانته تعرف السادس صعب يرادله تفريغ ..يعني مو وقته الزواج هسه ..
...عادل ..اعرف تدرس وحاتم موافق على دراستها ويخليها تكمل دراسه وكلشي تتمنى تحققه واحنه هسه نسوي بس خطوبه وعقد ووره متخلص سادس نسوي العرس شگلتي ؟
...باوعت مامه على رسل وعليه ورجعت باوعت على خالو عادل وكالت ..
...كفاح ..زين انطيني مهله افكر غير اشوف البنيه شتگول انته تدري ..رسل امانه برگبتي ولازم ائمن مستقبلها حتى اريح ضميري ..
...عادل ..مو هاي رسل كدامج كاعده اسأليها وشوفي شتكول عليمن تفكرين واي شي تطلبه اني جاهز ..
...باوعت مامه على رسل وكالتلها..
...كفاح ..ها مامه رسل شنو رأيج شتگولين ..؟
...سالي ..اني كلت رسل رح توافق وتطير من الفرحه بس صدمني الرد مالها وطيير عقلي من راسي من گالت ..
...رسل ..احم...خالو. ..انته تعرف اني شكد احبك واحترمك وجيتك هاي على عيني وراسي واني ميهون عليه اردك وتطلع من البيت مكسور الخاطر ..
بس اني والله ممفكره بالزواج هسه ودادرس سادس والسادس صعب حيل واني عندي طموح اريد ادرس وأكمل ..
وإذا اتزوجت هسه معناهه مراح احقق طموحي ورح اقصر بالدراسه لهذه السبب ..اني مموافقه ماريد اتزوج اعذرني خالو ..
...ابتسم خالو وكال ..
...عادل ..كلامج حلو ويفرحني ولو ابوج عايش جان افتخر بيج لان عندج طموح .
.بس اني كلتلج.. حاتم ماعنده اعتراض تكملين دراسه بالعكس هوه يساعدج ويوكف وياج لحد متخلصين دراستج .
...ابتسمت رسل وعينها بالكاع وگامت وگفت وكالت ..
...رسل ...ههههه ..ليش هوه وينه حاتم ..؟!! مو المفروض يجي وياك لو هوه صدك رايدني ؟
.. شوف عمو ..اني وحده عزيزه وغاليه وكرامتي فوگ كلشي الي يخطبني لازم هوه يجي ويتعنه اليه واني احط شروطي الي اريدها وإذا وافق عليهن بذاك الوقت يله افكر لو اوافق لو ارفض .
.وحاتم حتى ماكلف نفسه يجي ويطلبني بنفسه اذآ حاتم ميستاهلني ..
اعذرني من هاي الكلمه ..بس اني مااكدر اوافق على واحد ميتنازل حتى يجي يخطبني بنفسه ...
...سالي ..حجت هيج رسل وعافتنه وطلعت من الصاله ..بس اني جنت كلش فرحانه وفخوره بيها بحيث هيه تحجي واني اريد اگوم ابوسها من الفرحه .. وره شويه حجت مامه وكالت .
..كفاح ..سمعت الجواب مال رسل ابو حاتم ..اعتقد بعد ماعندي شي اضيفه فوگ كلامها .
...هز براسه موافق وكال ..
...عادل ..سمعته ..هاي البنيه صح زغيره بالعمر بس عقلها يتوزن بالذهب.. وكلامها كله صح .
...عادل ..يله اني اترخص لازم اروح ..
...كفاح ..وين ابقه يمنه خويه ليش مستعجل ..
..عادل ..لا هم يالله اروح أن شاء الله اجيكم هاي اليومين ..
...كفاح ..هلا بيك بأي وقت سلملي على هاجر والولد ..
...عادل ..الله يسلمج في امان الله ..
.......
..سالي ..اني جنت آكل بروحي بس اريد خالو عادل يطلع حتى اروح لرسل اشوفها .
.ومن طلع رحت اركض لغرفة رسل فتحت الباب وطبيت بدون ماادگها واني اضحك واريد اصفگلها على كلامها وجان اشوفها ..
...نايمه عالجربايه وتبجي وتشهگ تقربت منها وكلتلها ..
...سالي ..ياعمري شبيج ليش تبجين ..تدرين الي سويتي كلش حلو واني فخوره بيج والله ليش تبجين ..؟!
...رفعت راسها وباعتلي وكالت ..
...رسل ..حاتم مارايدني هذه خالو عادل من وحده جاي يخطبني... هيج اني وحده رخيصه حتى ماكلف نفسه يجي ويطلبني بنفسه..؟
...تقربت منها وأخذت راسها وحضنتها وكلتلها...
...سالي ...لا حياتي لتكولين هيج شنو رخيصه ؟ انتي اضفرج يسوه حاتم وعشيرته حاتم شنو وتبجين على موده ؟ اصلا هوه امه داعيتله بليلة القدر اذا صرتي زوجته ومن نصيبه والله ..
...وخرت من حضني وكالت ..
...رسل ..سالي دااكولج حاتم ميريدني مجبور عليه ذاك اليوم من جنت يمهم بعمليتج صارت عركه بلبيت وبسبب هاي العركه خالو عادل اجه اليوم ..
...سالي ..شنو شصار ولج احجي شكو ؟
...مسحت دموعها وكالت ..
..رسل ..من جنت يمهم وحاتم راح للمستشفى حته يشوفج وره كم ساعه رجع للبيت سأله خالو عادل ليش رجعت كال ..
...حاتم ..ميحتاجوني غمار اجه للمستشفى هوه يمهم ...حجه ويانه وطب لغرفته ..
...رسل ..خلصنه الغده وناموا الضهر ..اني رحت اريد انوم متيم الغرفه الي اني بيها تصير قريبه من غرفة حاتم يعني اذا يصيحون اسمعهم ..وره شويه سمعت صياحهم ..
...سالي ..شسمعتي .؟
..رسل ..سمعت خالو عادل يصيح على حاتم ويغلط عليه وكال..
...عادل ..انته شوكت تكبر وتعقل لخاطر ربك شوكت ..شكم مره گلت انساهه عاد البنيه اتزوجت وصار عندها طفل ورجال دكااافي مو شلعت گلبي شنو ماكو نسوان خلصت النسوان بس سالي بالدنيا ..
...حاتم .. يابه شنو بكيفي مااكدر انساهه اني احبها من جانت طفله وزواج مااتزوج مو گوه هيه مااتزوج ..
...عادل ..تتزوج وغصبا ماعليك كافي عاد تره طلعتها من ماعونها فد مره ..
...حاتم ..مااتزوج ومااروح وياك روح انته أخطب وحدك خلاشوف منو هاي الي توافق بيه اذا رحت وحدك ..
...عادل ..خلاشوف لو اني لو انته الا ازوجك ورجلك فوك راسك ..
...................
...سالي ..هاا يعني خالو عادل جاي يخطبج بدون موافقة حاتم ..؟!
...مسحت دموعها وكالت.
...رسل ..ايي.. لعد شنو حاتم مييت عليه حتى يخطبني ؟
...سالي ..من سمعت الحجي مالها بقيت ساكته مااعرف شگوللها .. ابتسمت بوجهها وكلتلها..
...سالي ..خيولي معليج بي ومنا وهيج لتنطي مجال ابد خلي يعرف أنه انتي ممحتاجته ولا ميته عليه ..خلي يعرف أنه هوه الخسران مو انتي .
...ابتسمت بحزن وعينها بالكاع وكالت ..
...رسل ..هه ايي كلامج كله صح .. رح التهي بدراستي احسن ..
...سالي ..جريت حسره قويه وعفتها وطلعت من الغرفه رحت لغرفتي وصرت ابجي انقهرت عليها احس الي دتعيشه صار بسببي اني
..يمكن لو ما حاتم يحبني جان حس بوجود رسل وفكر بيها ...
...سالي ..صافنه وافكر برسل ..جان اسمع موبايلي يرن باوعت شفت رقم غمار ..مسحت دموعي وفتحت خط وحطيت الموبايل على أذني وحجيت ..
...سالي ..الووو هلو غمار ..
...جان اسمعه يكول ..
...غمار ..وخر الموبايل من خدك الحلو حبيبي لان هذه اتصال فديو مو صوت ...
...سالي ...وخرت الموبايل وطلعت وجهي ...هوه جان مبتسم اول ماشافني گمز من مكانه بخوف وكال ..
...غمار ..شبيج سالي ليش تبجين شصار حياتي ..؟!
...مسحت دموعي وكلتله ..
...سالي ..ماكو شي ليضل بالك والله مابيه شي .
...غمار ..شلون مابيج شي لعد ليش تبجين احجي شصاير الله عليج بيكم شي انتي ومتيم ؟
...سالي ..هنا ماتحملت وزادت دموعي وصرت ابجي وكلتله..
..سالي ..مابيه شي والله بس ....اليوم ..
...غمار ..شنو شصار اليوم احجي ولج شلعتي گلبي ..
...سالي ..اليوم صارت شغله ويانه بالبيت وانقهرت منها والله ماكو شي مهم لتخاف ..
...غمار ..شصار احجي عاد اجر الكلمه منج جر احجييي ؟
...سالي ..اليوم اجه خالو عادل وخطب رسل لابنه حاتم .. ورسل رفضت حاتم وهيه تحبه بس هوه ميحبها لدرجة مااجه يخطبها ويه ابوه خالو اجه وحده
...لهذه السبب انقهرت على رسل خطيه شفتها تبجي وكمت ابجي عليها ..
...عوج وجهه وخزرني بعيونه وكال بعصبيه ..
...غمار ..ايي يعني متدرين ليش حاتم مااجه خطب رسل مو ؟
...سالي ..لان ميحبها يكول يعتبرها اخته الزغيره ..
ابتسم نص ابتسامه وكال..
...غمار ..أو يجوز لان يحب اختها مثلا ؟
...سالي ..اهوو غمار هم رجعنه لنفس الموضوع ورح نتعارك رح اسد الاتصال يله روح باي .
...سالي ..ردت اسد الخط جان يحجي بعصبيه وكال ..
...غمار ..لتسدين الخط شويه احترمي مو دااحجي وياج ولج شلون تسدي ..؟
...سالي ..غمار ..انته صاير شكاك وكله تشك بيه على شي اني مالي ذنب بي واني مابيه حيل مشاكل لتفتح موضوع حاتم الله يخليك ..
...غمار ..هاا يعني مو حقي من اشك ؟ واحد يحب مرتي من جانت طفله ولحد الان ممتزوج ورافض يتزوج معناهه بعده يحبها ليهسه وترديني مااشك مو ؟
...سالي ..اي اذا هوه يحبني اني شنو ذنبي شنو گايلتله يحبني ؟ لا مومن حقك تشك بيه لان اني ممسويه شي غلط ..
...فرك وجهه بعصبيه ورجع باوع عليه وكال ..
...غمار ..يالكاظم لو الزمه هذه ابن خالج الا آكله بسنوني اكل ..
. ولج شلون بيه وين اضمج متگليلي وين ..اخليج ابيت اهلي اخويه يحبج اخليج ابيت اهلج ابن خالج يحبج وين اروح بيج ؟
ياناس رح اتخبل احس گلبي يريد يوكف اسافر بيج للمريخ شلون ؟
...سالي ..من سمعت الحجي مالته ابتسمت بداخلي اول مره اشوف غمار هالگد يغار عليه حسيت دكات گلبي تتسارع من الفرحه ضميت ضحكتي بالگوه وحجيت وياه بنبرة صوت جديه وكلتله..
...سالي ..واني شعليه بيهم مو مهم منو يحبني المهم اني احب منو ؟
...ضييق عينه وابتسم وكال.
...غمار ..اييي خاتون وانتي منو تحبين بله ؟
...ابتسمت وكلتله ..
...سالي ..مااگول هذه شي ميخصك ..
...خزرني بعيونه وكال ..
...غمار ..وللجج شنو ميخصني ؟ كلشي يخصج وتفكرين بي معناهه مالتي ويخصني لان انتي مالتي افتهمتي لولا ..؟
...سالي ..رفعت حواجبي الثنين وسويت حركه تدل على الرفض وكلتله..
...سالي ...هئ .
...دار وجهه صفح وكال.
...غمار ...لا إله إلا الله شلون توازيني هسه اصعد سيارتي واروحلها للبيت.
...سالي ...هههههه ...عززه مخبل اكعد راحه دنيا ليل الساعه رح تصير ب12 بليل ..
...ضحك وباوع عليه وكال ..
...غمار ...ههههه لو أسويها صدك واجي شتكولين ؟
...سالي ..لا غمار عفيه اكعد واسكت شيگولون علينه هسه بنصاص الليالي جاي لبيتنه ..؟
...رفع ايده الثنين كدام وجهه وفاتح چفوف ايده وكال ..
...غمار ..ادري بايگلي بوگه ؟ ناهب سالب ؟
لو طافر عليكم من السطح غير زوجتي وجاي اشوفج شبيج تخافين من خيالج بابه انتي مرتي ولج مررتتييي ..
...سالي ...ايي اعرف مرتك بس حتلو خوما تجي ساعه 12 بليل عيب اذا مامه شافتنه شتگول علينه .. ؟
...صار يتوسل ويسويلي حركة البوسه بشفايفه وكال ..
...غمار ...شبيج حبابه فدوه خلاجي بس اشوفج من الباب واروح حبابه ..
...سالي ..غمار ..تره چنه نتشاقه شنو سويتها صدك شبيك ؟
...غمار ..ولج مشتاقتلج ياضالمة النفس حسي بيه يحس بيكي ربناا ..شطالب منج بس اشوفج من الباب واروح ...
...سالي ..وشنو الفرق عود تعال باجر الصبح ليش إلا هسه ..؟
...غمار ..ماادري طخت براسي اشوفج هسه شيصبرني للصبح ..
...سالي ..لا غمار ..حباب عيب شگول لمامه اذا شافتك جاي بنص الليل عيب استحي ..
...غمار ..هسه هيه وينها امج غير نامت هوه اني اجي دقايق اشوفج واروح شمدريها بيه ..
...سالي ..اهوو غمار ..كافي عيب يله روح اني نعست رح انام باي ...
...غمار ...هههههه يله باي فگعه ..
...سالي ..سديت الخط من غمار واني خربانه ضحك عليه مخبل والله موصاحي ...ههههههه ..
...وره شويه كعد متيم يبجي سويتله المميه وبدلت حفاضته ورجعت نومته حسيت نفسي نعسانه كلش غفيت ماادري بنفسي .
...وره مده من الوقت فزيت جان اسمع موبايلي يرن باوعت شفت رقم غمار بالگوه فاتحه عيني استغربت فتحت خط وكلتله ..
...سالي ..الووو ها غمار .
...غمار ..كومي فتحي الباب ..
...سالي ..ياباب شنو ؟
...غمار ..ولج گومي اني بره واگف ..
...سالي ..فزيت من فراشي برعب وكلتله..
...سالي ..عززه وين بره غمار كل عقلك هسه تجي غير حجينه وكلت باجر تجي .؟
...غمار ..تجين تفتحين الباب لو ادك الجرس واكعد البيت كله ؟
...سالي ...لا لا عزه اوكف لحظه رح اجي لتسوي صوت لتگعد مامه حباب ..
...سالي ..سديت الخط منه وطلعت امشي على أطراف اصابعي واتلفت يمنه يسره البيت اضلم الضوايات طافيه وبالكوه اشوف طريقي ميته رعب خاف تگعد مامه شگوللها عزه شكد عيب ...
...مشيت وصلت للباب اريد افتحه جان انتبه لنفسي ..
...سالي ...عزززه هاي اني شلابسه..؟ لابسه دشداشه قصيره مال بيت خفيفه خلارجع ابدلها واجي ..
...صفنت كلت هذه مخبل خاف أتأخر عليه ويدك الجرس ويفضحنه بس افتحله الباب اگوله هسه اجيك واروح ابدلها...
...سالي ..فتحت الباب قبل مااحجي كلمه دفع الباب وطب وسده وراه اندار عليه وحضنني حيل ودفن راسه بشعري ..وكال.
...غمار ..افييشششش يعافيتي ..
...سالي ...حاولت ابعده عني بس اريد احجي وياه وهوه محاوطني بيده الثنين همست بأذنه وكلتله..
...سالي ..غمار ..فدوه كافي يله روح لتكعد مامه وتشوفنه عيب روح ..
...بدون ميحجي ولا كلمه وخر راسه من شعري ودنگ وشالني وصار يمشي بيه باتجاه غرفتي واني ادفع بي بيدي واحجي وياه بهمس وكلتله..
...سالي ...غماااررر لا غمااررر نزلني وروح لحد يشوووفنه يمعود عيييب..
...بقه يباوع كدامه ويمشي وكال..
...غمار ...اييي ابقي صيحي بعد حتى تكعد امج وننفضح صيحي ..
...سالي ..لعد نزلني ..
...دفع الباب بيده وطب لغرفتي وهوه شايلني نزلني للكاع وطبگ الباب وقفله بالمفتاح ..باوعت عليه وكلتله بعصبيه ..
...سالي...غماررر...هاي شبيك اليوم داكولك روح اني. ما....
...قطع كلامي ببوسه وهوه حابسني بين ايده والحايط وحجى بهمس ..
...غمار ...موكافي عناد .. مو هم يالله ترجعيلي لو شنو فلمج انتي ؟
...سالي ..بقيت صافنه عليه مصدومه منه ماعرفت شجاوبه ..
...ضحك وكال ..
...غمار ... هههه شبيج مو احجي وياج ؟ ليش انصدمتي شنو اول مره ابوسج ؟
..سالي .. حجيت وياه بصوت مرتبك وعيني بالكاع وكلتله...
...سالي ..يله غمار روح حباب مو شفتني انته كلت من الباب اشوفج واروح يله اطلع ..
...مشه باتجاه السرير وكعد وارتچى على ايده ليوره وكال ..
...غمار... عاجبني ابات يمج اليوم شوفي الساعه صارت ب1 ونص ينطيج گلبج اطلع بنص الليل هسه ؟
...تقربت يمه وكلتله بصوت ناصي ..
...سالي ..غماارر لتصير لوتي امشي اطلع خاف تكعد مامه هسه شگوللها اذا شافتك يمي عفيه اطلع كوم ..
...غمار ..ليش شنو اني غريب وإذا شافتني شكم مره اعيد عليج الكلمه واكولج انتي زوجتي صخامي لطامي لو طرشه متسمعين انتي؟؟
...سالي .. اعرف زوجتك بس ميصير تجي للبيت ومامه متدري بيك عيب لازم يكون كلشي بعلمهه ..
...كام وكف وكال ..
...غمار ..اوكي رح اخلي كلشي بعلمها واروح اكعدها واكوللها اني يم بنتج بالغرفه ..
...مشى خطوات باتجاه الباب ركضت بسرعه وجريته من قميصه واني لازمه ايده بيدي الثانيه وكلتله بصوت خايف ..
...سالي ..لا لا فدوه غمااارر شبيك صدك تحجي اوكف .
...اندار عليه ولزم ايدي وصار يبوس ايدي من ضهرها ومن بطنها ولزم اصابيعي يبوس بيهن اصبع وره اصبع وباوع عليه وكال ..
...غمار ..شايفه هاي امج الي انتي خايفه منها ؟ اموووت على ربها لان جابتج للدنيا وصرتي اليه ..
...سالي ..من گال هيج متت ضحك وكمت اضحك بصوت عالي وهوه هم ضحك وبسرعه حط ايده على حلگي وكال ..
...غمار ..اششش وللجج ثوول نصي صوتج رح تجينه امج تعلگنه بالسگف ههههههه ..
...حطيت ايدي الثنين على رگبته وحجيت وياه ..
...سالي ..عود احنه شبينه اني اخاف من امك وانته تخاف من امي ههههه ؟
...قرب وجهه وصار يحك خشمه بخشمي وكال..
...غمار... لان كل شخص عنده نقطة ضعف يخاف من الناس وخصوصاً الي يعرفون نقطة ضعفه شنو
..وامج وامي يعرفن انتي نقطة ضعفي واني نقطة ضعفج لهذه السبب نخاف منهن ..
...ميلت راسي وحجيت وياه بدلع وكلتله ..
..سالي ..امم غمار شكد تحبني ؟
...لزم ايدي وسحبني عالجربايه وكال ..
...غمار ..تعاي اگولج شكد احبج ..
...سالي ..غماارر شدتسوي ؟
...غمار ..مااسوي شي بس احجيلج قصة الأمير الزاحف .
...سالي ...هههههههه خرب أنه ليهسه تتذكرهه ؟
...غمار ..ليش هيه تننسي ؟
..سالي ..كعدت يمه عالجربايه وفتحلي ايده الثنين قربت راسي عليه وحط راسي على صدره وصار يبوس براسي وكام يغنيلي اغنية محمد عبد الجبار شمسين وكال ..
...غمار ... عيوون الناس تحسد كل حبيبين ..
يردوني ابتعد عنك واعوفك ..
وإذا انته جرح مااريدك تطيب
اروف بصفك ولا مااروفك
من احضنك احضن الدنيا بأديا
حبيبي وغاليه عيونك عليه ..
بسرعه الوقت صاير يخلص وياك
هوانه انته وإذا رحت اختنگنا
وإذا طلعت شمس فوت انته للبيت
لان شمسين معناهه احترگنه ..
...........
...سالي ..بذيج الليله نمنه اني وغمار عبالك انمسحت السنتين الي سافر بيهن من ذاكرتنه نسينه كل الحزن الي مرينه بي ونسينه كل الم الفراگ .. عبالك اليوم اتزوجنه مو قبل سنوات ..
...سالي ..فتحت عيني الصبح على صوت مامه وهيه تدك الباب مال غرفه وتصيح ..
...كفاح ..ساالي ..ولج شعندج قافله الباب اكعدي مو عندج دوام صارت ساعه 10 ونص ..
...سالي ..باوعت على نفسي نايمه وحاضنه غمار وهوه غافي وفاتح حلگه بسابع نومه كمزت من مكاني.ولطمت على وجهي ..
...سالي..عززه ..نسيت ياالله .. نزلت من الجربايه ركض اخذت الثوب مالتي بالگاع لبسته وكمت اكعد بغمار واهز بجسمه بخوف ..
...سالي ..غماارر ..كوم عزه ..كووم ..
...فتح تك عين وباوعلي وكال بصوت نعسان ..
..غمار ..هاا يمعوده شبيج هوه هيج تكعديني ..؟
... سالي ..كووم بسرعه مامه صارلها ساعه تدك الباب ساعه 10 ونص واحنه نايمين انته شلون هيج تبقه موكلتلي اطلع الفجر قبل متكعد امج جذبت عليه كوووم بسرعه كووم ..
...صار يفرك بعينه وتثاووب وكعد وكال ..
...غمار ..ماادري غفيت عبالي اكعد قبل متكعد امج يله عادي شنو يعني وإذا عرفت ؟
...سالي ..كمت اركض وادور على ملابسه مشمورات بالكاع شلتهن وانطيتهن اله وكلتله..
...سالي ..بسرعه بدل ملابسك رح اطلع اشوف مامه وين اذا تطب للمطبخ حتى تطلع من الباب الثاني ماريدهه تشوفك يله .
حجى بكل برود وهوه يدگم القميص مالته وكال ..
...غمار ..شدعواج عيني وإذا شافتني شنو بايگلي بوگه ..
...تقربت منه وكلتله بعصبيه ..
...سالي ..الطم ؟ اشگ هدومي هسه اني ميته من الخوف وانته تحجي بكل برود شبيك غمار متحس بيه ؟
...ابتسم ابتسامه ماكره وغمزلي وكال ..
...غمار ..اييي رحمه لاهلج شگي هدومج خلاشوف ..
...خزرته بعيوني وكلتله ..
...سالي ..غماااررر كاافي رح ابجي والقرآن اني ميته خوف هسه شگول لمامه وانته وين تحجي ؟
...باوعت على متيم كعد وكام يصيح ..
...متيم ..ابااا ابااا ..
...اندار عليه غمار وگال. .
...غمار ..يبعد ابوك واهله يمه فدوه لهالصباح الحلو تعال بابه يعمر ابوك وايامه ..
...شاله بيده وصار يبوس بي ويحضن ..اني عفته وطلعت من الغرفه واني اعدل بشعري بيدي عبالي صرت ذكيه ورح اخلص من المشكله .
.طلعت وجان اشوف مامه ورسل واگفات اباب المطبخ ..جمدت بمكاني من الخوف ...جان مامه تأشرلي بيدهه حركه يعني تعاي ..
...سالي ..تشاهدت على روحي ورحت للمطبخ كلت هايهيه رح تلزمني تموتني كتل .
..طبيت للمطبخ اباوع على رسل عاضه شفتها وحابسه الضحكه وواكفه على صفحه هاي شبيهه تضحك شكو ؟
..باوعت على مامه شفتها كاعده عالكرسي ومچتفه أيدها الثنين وعينها بالكاع وكالت ..
...كفاح ..رح اروح للصاله صيحي غمار وتعاي وياه عندي حجي وياج ..
...سالي ..من گالت غمار ..كمت ابلع بريگي وكلتلها ..
...سالي ..ها ..غمار شنو وين اصيحه هوه اجه يعني ؟
...خزرتني بعيونها وكامت وكفت وكالت ..
...كفاح ...ساالي اني مو طفله كدامج حته تجذبين عليه كتلج صيحي الافندي مالج وتعالوا للصاله بسرعه ...
...وعافتني وراحت ..
...سالي ..باوعت على رسل أول ماطلعت مامه وهيه وكعت بالكاع من الضحك .. ركضت عليها وكلتلها..
...سالي ..شبيج تخبلتي شكو تضحكين .؟
...باوعت عليه وكالت..
...رسل ..من تنوون مره ثانيه تسوون شي بالسر فهمي غمار من يبوسج ليسوي طبع برگبتج لان تنفضحون ياذكيه ..
...سالي ..بسرعه حطيت ايدي على رگبتي وركضت للمرايه اباوع ..
...سالي ..عزه العزاك غمار اني أعلمك اليوم هاي شمسوي ..؟
...سالي ..رحت لغرفتي لكيت غمار حاط متيم بحضنه ويلعبه ويبوس بي باوع عليه ورجع باوع لمتيم وكال ..
...غمار ..ها الطريق امان اطلع لو بعده الخطر سائد في المنطقه ..؟
...سالي ..تقربت منه وكلتله بعصبيه ..
...سالي ..غمار ..هاي شمسوي بيه وشلون تخليني اطلع من الغرفه واني ركبتي كلها آثار غير تگلي ؟
...باوع عليه وكال..
.. غمار ..والله عبالي تدرين شعرفني ..
گزيت على سنوني وكلتله .
...سالي...ياأخي شنو هالبرود العندك رح اتخبل من وراك ..
...غمار ... وليش اخاف ممسوي شي غلط مدري عليمن انتي خايفه والله يالله ..
..سالي ..گوم عيني يارامبو مامه تدري بيك موجود اول ماشافتني كالت صيحي غمار وتعاي وياه للصاله تريدنه .
...شال متيم بحضنه وباسه من خده وكال ..
..غمار ..احم احم ياالله ..يله تعاي عمري نشوف عمتي الحلوه شتريد مني ..
...سالي ..بقيت صافنه عليه إلا شويه املخ بشعري من وره البرود مالته اني دمي فاير وهوه ولا مهتم ولا يمه ..
مشيت وياه ورحنه للصاله شفت مامه كاعده باوعت علينه وكالت ..
...كفاح ..تعالوا اكعدوا عيني ..
...أبتسم غمار وكاللها .
..غمار .. صباح الخير عمه شلونج .؟
...ماجاوبته بقت تخزر بي بعيونها ..
وكالت ..
...كفاح ..شوف غمار . صح هذه البيت مابي رجال واحنه بس نسوان ..وصح سالي زوجتك وحلالك ..بس هذه مينطيك الحق تطب للبيت بنص الليل وتبات ابيتي بدون علمي
..تريد زوجتك هاي كدامك اسحبها من أيدها وأخذها لبيتك وروح ..مو مبقيها يمي وتطب للبيت مثل الحراميه .
.منقذ جان عاقد عليها أكثر من 5 اشهر ولا مره طب للبيت بدون علمي ولا مره طلع وياهه بدون علمي ابد ليش لان رجال يعرف الأصول .
.عيب تطب للبيوت بالختله وبنص الليل مفهوم ؟
...سالي .. اني اسمع مامه وعيني على غمار ..يباوع عليها والابتسامه مرسومه على وجهه بس اني اعرف بي انجرح من كلامها .
وجنت كلش خايفه عليه ليصير عصبي وتصير بي نوبة صرع ..
...ابتسم غمار وباوع عليه ورجع باوع لمامه وكال ..
...غمار ..حقج عمه بكل كلمه تگوليها صح واني اعتذر منج وإذا تردين ابوس راسج هم اني غلطت من طبيت للبيت بدون علمج وحقج على راسي .
...ابتسم بوجه مامه وگاللها..
...غمار ..بس اني مااتقارن بأحد ولا حتى بمنقذ ومااسمحلج تگولين جان عاقد عليها ..
.عقد منقذ من سالي باطل ..لان سالي زوجتي ..اني اعرف بيج متحبيني مو من هسه من زمان اول يوم اتزوجت سالي بي انتي تضوجين مني
..ومااعرف شنو السبب بس احب اگولج .. تره بعدج متعرفيني يجي يوم واثبتلج اني شكد احبج وأحب بنتج واعتبرج مثل امي ..
...گام وگف وباوع عليه وكال ..
...غمار ..حبيبتي ..رح اروح احضر البيت مالنه وأكمل الأثاث مالته والاسبوع الجاي اجي اخذج ونعيش بي ...
..اندار على مامه وكال ..
...غمار ..ومنا لما يجهز بيتي مااوصل لهذه البيت ولا التقي بسالي حتى احافظ على حرمة البيت وامشي بالأصول ...
...غمار ..في امان الله ..
...سالي ..طلع غمار ..واني حجيت ويه مامه بهمس وكلتلها ..
...سالي ..شبييج مامه شلون هيج تحجين وياه وإذا بات يمي غير مرته اني ...
...عفتها وطلعت اركض وره غمار ديمشي بالطرمه قبل ميوصل للباب لزمت ايده وكلتله..
...سالي ...غمار ..اوكف حبيبي ..
...باوع عليه وابتسم وكال .
...غمار ..طبي جوه حياتي لابسه ثوب قصير خاف احد يشوفج من الجيران ..
...نزلت دموعي وبجيت وكلتله..
...سالي ..تره متقصد مامه لتزعل منها حباب هيه تحبك بس لان انصدمت من شافتك يمي ..
...تقرب مني وباس الدمعه الي نزلت على خدي ورجع مسح خدي وكال ..
...غمار ..لا مازعلان منها والله وكلامها صح اني غلطت المفروض انطيها علم يله اجي اشوف عافيتي ..
...ابتسمت وكلتله ..
...سالي ..عافيتك منو ؟
...غمار ..انتي اكو غيرج يعني ؟
...سالي ..هههه لا طبعا ماكو غيري .
..غمار ..هههه ديله طبي جوه اني رح اروح ..
...سالي ..غمار حبيبي من تروح للبيت صوره ودزلي صوره حته اشوفه حباب ...
...غمار ..صار بعيوني اتصل بيج فديو وشوفي كله صوت وصوره ..يله باي .
...سالي ..باي حياتي ..
...طبيت جوه واني ادندن بلاغنيه الي غناهه غمار اليه بليل ..
...سالي ..عيوون الناس تحسد كل حبيبين...هوانه انته وإذا رحت اختنگنا...وإذا طلعت شمس فوت انته للبيت..لان شمسين معناهه احترگنه..
...سالي...داامشي واغني جان اسمع مامه تصيحني وكالت ..
...كفاح ..عيني صباح الهلالي تعاي شويه خلاحجي وياج ..
...سالي ..طبيت للصاله وكعدت يمها وكلتلها .
..سالي ..ها مامه ..
..كفاح ..اني ماريدج تزعلين مني اني حجيت هيج لمصلحتكم ثنينكم .. لو اوافق على جيات غمار لهنا
..مراح ياخذج يمه ورح يبقه كل يوم يبات هنا ويخلص وكت يمج ويعوفج ويروح للفندق ..
بس اني من رفضت جيته لهنا رح يحس بالمسؤولية ويروح يحضر البيت مالتج وياخذج لبيتج معززه مكرمه..
غمار صح يحبج ...بس هوه شخص عاطفي زياده عن اللزوم يتصرف بگلبه اكثر من عقله لهذه السبب يرادله شخص يذكره بالمسؤليه الي صارت على عاتقه الي هيه زوجته وابنه ..افتهمتي لولا ؟
....سالي ..افتهمت مامه اني مازعلانه منج وحتى غمار مازعلان هوه هم يكول حقها امج واني غلطت من طبيت للبيت بدون علمها يعني معترف بغلطه ..
..باوعت عليه صفح وكالت ..
..كفاح ..اممم وانتي شدعواج نام يمج ليله وحده نسيتي كلشي سواه بيج والضحكه شاگه حلكج وتغنين وين هاي الي قبل كم يوم جانت تكول ماريده واريد اتطلگ منه واكرهه ..؟
...ضحكت وكلتلها ..
..سالي ...ههههه مامه شوكت كلت اكرهه جنت اكول زعلانه منه اني مااكره غمار احبه ومااعوفه بس جنت زعلانه وتراضينه البارحه وراح الزعل .
...كفاح ..هههههه اي واضح من رگبتج الزعل راح يله كومي صيحي اختج كوليلها تخلص بسرعه رح تتأخر عالمدرسه.
...سالي ..يله رح اصيحها ..
...رحت اشوف رسل خلصت تبديل ملابس ...طبيت للغرفه وجان اشوفها تريد تطلع وكالت. .
...رسل ..اي خلصت رح اطلع ادري شتردين تگولين يله باي رايحه. .
..سالي ..باي ..
.............
...رسل ..طلعت للمدرسه اليوم دوامي مسائي المدرسه مو كلش بعيده على بيتنا اروحلها مشي نتواعد اني وصديقتي فاطمه ونطلع ..
.بقينه نمشي بالشارع ونحجي على التحضير مالتنه وعدنه امتحان اليوم ..
..رسل ..رحت للمدرسه وخلصت الحصص وخلص الدوام طلعت بره انتضر فاطمه تطلع حتى نرجع سويه للبيت
..بقيت واگفه اباب المدرسه وعيني بالكاع صافنه جان اسمع صوت ولد قريب مني گمزت من مكاني خايفه جان اشوف حاتم واكف قريب مني وكال ..
...حاتم ..ليش واگفه هيج بالشارع والطلاب رايحين جايين تعاي يله اوصلج ..
حجى وياي ومشى كدامي بقيت واكفه بمكاني وكلتله بصوت حاد ..
...رسل ..لا شكرا ميحتاج رح ارجع اني وصديقتي البيت قريب .
..وكف بمكانه وباوع عليه وكال ..
...حاتم ..ميخالف حتلو قريب البيت تعاي اوصلج وإذا تردين خلي صديقتج هم تجي اوصلها .
...خزرته بعيوني وحجيت وياه واني اقطع بالكلمات وكلتله ..
...رسل ..كلتلك...مااارريد ..اجي ..وياااك.. شنو متفتهم انته ..؟
...باوع عليه بنضره جديه وكال .
... حاتم ..إلا اكولج اريد احجي وياج شبيج تعاي شنو رح آكلج خوما آكلج بس احجي وياج واوصلج للبيت ..
...درت وجهي عنه وكلتله ..
...رسل ..ماريد احجي وياك ولا اريد اسمعك ..
...تقرب مني وحجى بصوت ناصي وكال ..
...حاتم ..اذا متجين وياي هسه رح أصيح كدام الطلاب واكول هاي البنيه خطيبتي ومتقبل تجي وياي ..
...انداريت عليه وحجيت بعصبيه وكلتله ..
...رسل ..لووو تمووت هسه كدامي مااصير خطيبتك لو تبقه بس انته رجال بالدنيا مااوافق عليك افتهمت لولا ..
...ضحك وكال ..
...حاتم ..هههههه استغفر الله ربي ..ميخالف لتوافقين عليه بس امشي وياي احجي وياج اخر مره اوعدج بعد مااحجي ابد ..
...رسل ..صار عندي فضول اعرف شيريد مني ليش مصرر يحجي وياي هيج ..رحت وياه وصعدت بالسياره .
.وحرك السياره ومشى يسوق بالسياره وعينه عالطريق ويحجي وياي وكال ..
...حاتم ..ابويه گال رفضتي الزواج من خطبج اليه صح ؟
...بقيت اباوع للشارع وجاوبته ..
...رسل ..لا مارفضت الزواج رفضتك الك انته ..
...حاتم ..ها يعني اذا يخطبج شخص غيري توافقين ؟
...رسل ...اي طبعا لعد شناقصني ومااوافق ..بس لازم يكون شاريني ويحبني ويجي هوه يخطبني بنفسه ...مو مجبور عليه ويدز ابوه يخطبله ...
...ضحك وكال ..
...حاتم...ههههههه والله كبرتي وگمتي تبسمرين بالحجي ..
...رسل ..اي والله شنسوي خوما نبقه جهال الإنسان يكبر وعقله ينضج ويصير يمييز الصح من الغلط ..
...وگف السياره وباوع عليه وكال ..
...حاتم ..واني ياهوه منهم الصح لو الغلط ..؟
...انداريت عليه وكلتله ..
...رسل ..حاتم شتريد مني ؟ مو كلت تريد تحجي وياي ؟ يله احجي وخلص اريد ارجع للبيت رح أتأخر ..
...حاتم ..اريدج تعرفين شي مهم ..
...رسل ..وهوه .؟
...حاتم ..تره اني مااكرهج والله بس اني مااكدر اتزوج وحده احب اختها ...لان رح اضلمج وياي وانتي متستاهلين ..اريدج تعيشين احسن من هيج عيشه ...
...من سمعت الحجي مالته ماتحملت وصرت ابجي نزلت دموعي وكلتله ..
...رسل ..ولهذه السبب خليت خالو عادل يجي وحده يخطبني ؟ ماجنت اعرف اني هالگد رخيصه عندك شنو حضرتك تستنكف تجي تخطبني لو اني مو گد المقام ..
...راد يحجي صرخت بوجهه وكلتله..
...رسل ..خليني اكمل كلامي اسمعنييي ..
...رسل ..باوع عليه واسمعني زين ..اني وحده اسواك واسوه عشيرتك كلها ولو تفتر الدنيا كلها متلگه وحده توصل لاضفري
واني ميشرفني اوافق بواحد حته ماكلف نفسه يجي ويطلبني بنفسه من اهلي ويدز ابوه تعرف ليش.؟
لان انته جبان وتخاف من المواجهه .. والدليل سالي سنتين فارگت غمار وماكدرت تخليها تحبك لان انته ماعندك الشجاعه الي تخليك تفرض شخصيتك كدام المراه الي تحبها واني بصراحه مااكدر ارتبط بإنسان شخصيته ضعيفه ..حتلو جنت احبه ..
...جر حسره قويه وكال ..
...حاتم ..خلصتي ؟ طلعتي البگلبج كله ؟
...نزلت دمعتي وكمت اشهگ وابجي وكلتله .
...رسل ..لاا ..البگلبي مو حجي حتى اطلعه ..البگلبي انته ..
...انداريت عليه وصرت احجي وياه بحرگه وقهر ودموعي تصب وكلتله ..
...رسل ..شلون اطلعك من گلبي اتمنى انساك واعيش حياتي ...ساعدني الله يخليك من صدك اريد انساك اتمنى اكرهك حتى ماافكر بيك بس مااكدر شلوون..
...باوع عليه وكال ..
...حاتم ..وإذا اگولج الشهر الجاي اتزوج اخت صديقي تكرهيني ؟
...رسل ..سمعت الكلمه مثل الضربه اجتي على راسي ..بقيت ساكته وبس صوت انفاسي مسموع ودموعي تصب مثل الشلال ..وماحجيت وياه بس جمله وحده ..
...رسل ..وصلني للبيت اتأخرت على مامه ..
...صار يسوق بالسياره ويحجي وكال .
...حاتم ...يمكن كلامج صح اني ماعندي الشجاعه أواجه ودائما اتهرب
...لذلك ..رح اتزوج بغير محافظه لان البنيه أهلها مومن بغداد ورح أاجر بيت هناك واعيش يعني مااجي هواي لبغداد
..اني مو احجي هيج حته اقهرج لو تبجين اني احجي هيج لان اريدج تسمعين مني احسن متسمعين من غيري وتنصدمين ..
...حاتم ..رسل انتي بنيه كل رجال يحلم بيها والله واني اتمنى من كل گلبي اشوفج اسعد انسانه ماريدج تنقهرين الله شاهد ماعندي نيه اضررج لو ازعلج بس كلتلج اني وياج مو مناسبين لبعض
اولا فرق العمر هواي بيني وبينج ..ثانيا ..اني بعدني احب سالي وصعبه اتزوج اختها أحسها مو راهمه
..ثالثا انتي بعدج طالبه باجر عگبه تصيرين بالكليه وتتعرفين على إنسان مناسب الج وتحبي وتنسيني صدكي ..
...رسل ..سمعت الحجي مالته وهزيت راسي موافقه على كلامه وفتحت الباب مال سياره ونزلت عفته وطبيت للبيت ...
........................
يتبع ♥️
#زهراء_الطائي
....
تصويت وتعليق وتعليق بين الفقرات حبايبي اريدكم تتفاعلون احرگوا البارت بالتعليقات ♥️
هاي الاغنيه الي غناهه غمار لسالي 👇