بقالي كتير منزلتش من البيت من وقت ما رجعت من السفر , مش عارفه احدد السبب بالظبط , زهق من كتر ما بنزل ولا انشغال اللى حواليا , أغلب اصحابي اتجوزوا واشتغلوا فمبقاش فى وقت نقعد ونتكلم ونخرج زى الاول الا قليل , مثلا بليل بيخطفوا ساعة كده نطمن ع بعض , انا مش زعلانه لان انا ليا مشغولياتي زيهم والله يعين كل حد , سمعت من جيرانا ان فى مكتبة عامة فتحت فى اخر الشارع , قولت ما انزل واجرب واروح ,انا متعودة اشتري كتب وأقراها فى البيت لكن دى اول مرة أجرب اقرا فى مكتبة , نزلت بدري وروحت المكتبة وكنت لوحدي , احساس غريب انك تجرب حاجة لوحدك بعد ما كنتم مجموعة , دخلت المكتبة وطلبت النسكافية واخدت كتاب وقعدت , المكان كان هادئ جداا ومريح للاعصاب , وجودي وسط الكتب بتغير الحالة النفسية , الورق بيكون بمثابة اوراق الشجر مبهجه المنظر وبترد الروح , كنت عامله حسابي هقعد ساعه بالكتير لقيت نفسي قعدت 4 ساعات ,,قومت ورجعت البيت وانا مبسوطة وقولت خلاص دا هيبقي مكاني المفضل لا كافية ولا غيره هى المكتبة ,,
فى يوم روحت وقاعده بقرأ فى كتاب سمعت صوت بينده ع أسمي :
_ رغد ..
بصيت ولقيتها بنوته ملامحه قريبه لحد اعرفه :
_ ايوه ..؟
_ انتى مش فاكراني ولا ايه ؟
_ لا بصراحه بس حاسه ان انا اعرفك ..
_ اخص عليكي ,,انا دعاء كافيتريا كليه آداب سندويشات البطاطس والبانيه ...
افتكرتها : يااااه ,, دعاء ,, شكلك اتغير خالص
_ يهده الجواز والعيال
بعد سلامات واحضان قعدت معايا :
_ ايه يابنتي فينك كده ..
_ والله مشغوله مع احمد
_ جوزك ..؟
_ جوزي ايه احمد ابني ,,هو فى واحده بعد ما تتجوز وتخلف تنشغل بجوزها دى بتكبر دماغها منه علشان المرارة ..
ضحكنا : اخبارك ايه ..؟
_ الحمد الله , انتى اخبارك ايه وفينك فى الدنيا كده ؟
_ موجوده فى البيت ,
_ ايه متجوزتيش ولا ايه ..؟
_ لا لسه ..
_ والله يا بختك , انتي فى نعمه يا بنتي اوعي تغلطي غلطتنا ..
_ غلطتكم ,, وانتى سمعتي كلامنا لما قولنا متستعجليش ع الجواز بعد التخرج ولا حبيتي تخوضي التجربه ..
_ ماهو انا خضتها واخدت غطس غرقت مقبتش من وقتها ..
_ فقر من يومك ..؟
_ رجعتوا امتي من دبي صحيح , انا اخر مره جيت لماما شقتكم كانت مقفوله ..؟
_ من اسبوعين كده ,
_ طيب ها ناوية ع ايه ؟
_ على ايه ..؟
_ يعني حياتك خططتي ليها هتشتغلي ولا هتتجوزي ولا هتفضلي بقيت حياتك تقري ..
ضحكت : ومالها القراية دى امتع حاجة فى الدنيا ..
_ امتع حاجه ولا علشان هو كان السبب ؟
للحظه كلماتها رنت فى قلبي قبل ما ترن فى ودني , ابتسمت :
_ اوعي تكوني لغاية دلواقتي مستنياه ..؟!
_ لا انا مش مستنية حد ..
_ اها افتكرت ,, (موابيلها رن ) انا لازم امشي دلواقتي هشوفك تاني ونكمل رغي ..
_ اكيد ..
مشيت "دعاء" لكن كلمتها ممشتش معاها , مش هقول فكرتني لكن هقول ااكددتلي اللى حساه ,, "دعاء" رجعتني ل 6 سنين قبل ما أسافر مع اهلي دبي بسبب شغل بابا , كنت فى اخر سنه جامعه كليه اداب , مع اصحابي قاعدين فى الكافتيريا بناكل , قرب مننا مجموعه شباب ومعاهم دعوات وكان معاهم " سعيد " قرب مننا :
_ مساء الخير ..
_ مساء الخير ..
_ مش هاخد من وقتكم كتير لكن دى دعوات لندوة عن القراءه واهميتها فى حياتنا وهيكون فى ضيوف من كتاب مميزين هيتكلموا وهيحكوا عن تجربتهم وافكارهم ,, هتكون الندوة لطيفه كلنا اعمارنا قريبه لبعض ,, اتمني تنوروني ,,
مسكت داليا صاحبتي الدعوة وضحكت بسخرية: وهو انت يا سعيد متخيل هضيع وقتي اللى ضايع اساسا هضيع منه ساعتين ولا 3 ساعات علشان القراية , انا بقرا ملازمه الامتحان بالعافيه يابني ,,
بنبره ثقه وتحفيز : صدقيني دى مختلفه , الملازم والمذاكره مش قراية القراءه حاجه تانيه خالص لما تحضروا هتعرفوا الفرق كويس ومش هتندموا ..
_ انش اء الله ..
بصلي : هستناكوا ,,
مشي سعيد والبنات كانوا بيتريقوا عليه وع فكرة ندوه عن القراءه واهميتها ورموا الدعوات بتاعتهم فى باسكت الزباله , ماهو اهتمامتهم ميكب اة ملابس او قصص عن العلاقات مش من هوي القراءه ,, انا مسكت دعوتي وحطيتها فى الشنطه ومكشينال روحنا حضرنا المحاضره وبعدها رجعت ع البيت ,, اتغديت ودخلت اوضتي اجهز لبس بكره اللى هنزل به وغيرت الشنطه وفضيتها ع السرير ولمحت الدعوه ,, انا بحب القرايه لكن مش لدرجة احضر ندوات عنها على راي اصحابي هيقولوا ايه يعني ,,القراءه غذاء الروح والعقل معروفه مش هيضيفوا حاجه ,,اكيد كتاب صغيرين عاوزين يتشهروا فبيعملوا ندوات فى الجامعات وكده ,, حطيت الدعوة فى الدرج وقفلته ,, تاني يوم نزلت الجامعه عادي مع اصحابي وشوفت "سعيد" واصحابه بيوزعوا وبيقنعوا اللى بيقابلوهم بالندوه ,,
عدي يومين ويوم الخميس نزلت متاخر وعقبال ما وصلت كانت المحاضره بدأت ,, قعدت فى الكافتيريا استني اصحابي وبطلع احاسب وقع من الشنطه الدعوه ,, كانت فى الدرج ايه وصلها للشنطه ,,افتكرت ان امبارح حطيتها وسط حاجات ومااخدتش بالي ,, كان اليوم موعد الندوه فاضل عليها 10 دقائق والمحاضرة لسه عليها ساعه ونص ,, هقعد لوحدي قولت اروح الندوة لغايه ما المحاضرة تخلص ,, روحت دخلت قاعه اللى فيها الندوة كانت كبيره لكن العدد كان متوسط ,, بدأت الندوة والاعداد بتقل مش بتزيد وصلت لعدد 30 شخص قاعد ,, ابتدا "سعيد " يتكلم ويتناقش مع الكتاب والحضور والموضوع كان زى قاعده اصحاب مفيش تعقيد , والغريب كنت مستمتعه جداا وانا بسمع عن تجربه كل كاتب ومعاناته واحلامه والاكتر الحضور شاركوا احلامهم وطموحاتهم ,, ممكن تتسمع انها مستحيلة لكن الجميع اجمع انها ممكنه لكن صبر واراده وكفاح هو دا المطلوب ,, خلصت الندوة واستمتعت بيها ,, وانا خارجه قرب مني سعيد :
_ ايه رايك فى الندوة ..؟
_ جميلة وممتعه جدا ,,
_ مش ممله يعني ..
_ لا خالص ,, اعتقد ان الكلام عن الاحلام والطموح مش ملل بالعكس لما بنتكلم عن حاجه دى بتكون اول خطوة لتحقيقيها انها خرجت للنور حتي لو عن طريق الكلام ..
_ دا كلامي اللى قولته ..
ابتسمت : ايوه , بصراحه الكلام اللى بقتنع به بيعلم فى الذاكرة عندي ,,
_ بتقري لمين يا "رغد" ؟
_ بصراحة مليش فى جو القراية دا , لكن لو العمل اتعمل فيلم او مسلسل بتفرج عليه ..
ضحكك : طريقه سهله وسلسله ..
_ بصراحة ايوه ..
_ بس القراءه احساس تاني ..؟
_ مجربتوش بس هحاول ,,
_ انا ممكن اجيبلك كتب خفيفه كده تقريها كبداية ولو عجبتك ممكن اجبلك غيرها ..
_ لا مش لدرجه يعني ..
_ يبقي بتجامليني صح ف انك هتحاولي ..؟
_ لا ابدا ..
_ انا حاسس انك حد تاني غير اللى بشوفه فى الجامعه كل يوم ..
_ نعم ..
_ انا مبسوط جدا انى شوفتك ( شخص نده عليه ) اشوفك تاني
_ ان شاء الله ..
مشي مع اصحابه ورجعت قابلت اصحابي وحكتلهم عن الندوه واستغربوا كلامي:
_ ايه يا بنتي اللى يسمع منك يقول بنت نجيب محفوظ ولا حاجه ؟
_ بتتريقوا ماشي ,, سيبكوا مني ها هتعملوا ايه دلواقتي ..
رجعت البيت وفتحت الفيسبوك وكان "سعيد" عندي وسط الاصدقاء وكان منزل بوست " انهاردة كان يوم مميز " ,, حب سعيد للقراءه والكتب رغم انه فى كليه تجاره لكن دايما هو واصحابه موجود عندنا فى اداب ,, كان عاوز يدخل اداب لكن والده مرضاش على اساس انه يتخرج ويشتغل فى بنك افضل من انه يشتغل مدرس ,, "سعيد" من اول يوم فى الجامعه وانا شفته مع اصحابنا لدرجه ان بعد سنتين عرفت انه فى تجاره مش أداب زينا ,,
مر يومين وانا ووسط اصحابي قاعدين فى حديقه فى الكليه قرب "سعيد " :
_ مساء الفل ع اكبر مجموعه مكبره دماغها من الدنيا
ضحكنا: مساء الخير ع ابو الثقافه الجامعية ..
وبدون مقدمات قعد وبالاخص قعد جنبي , تصدقوا ان "رغد" طلعت احسن منكم كلكم ,, جت الندوة وقعدت للاخر ,
_ ماهو انت متعرفش لولا انها جت متاخره مكنتش هتحضر اسكت
اتحرجت لكن فجاءه اتكلم "سعيد":
_ القدر ,, من نصيبي اليوم دا ان القدر ميخلهاش تحضر المحاضره معاكم وتحضر الندوة ,,
_ مجتش مخصوص ع فكره ..
_ لا جت مخصوص , ماهى ممكن كان تعمل اى حاجه تانيه لكن حضرت الندوة
استغربت من دفاعه عني وانا ساكته والبنات استغربوا :
_ هى دفعالك ولا ايه يا سعيد ولا اخدت حاجه منك .
_ ايه عرفكم انها أخدت ..
_ اخدت ايه ..؟
ضحكك وبصلي لثواني : متتخضيش كده بهزر ,, ( خرج من شنطته كتابين ) امسكي الكتب دى دا روايه ل باولو كويلو ادب مترجم وكتاب تنميه بشريه ,, اقريهم هيعجبوكي وهستني رايك ..
_ لكن انا ..
قرب مني : انا واثق لالا انا متاكد انهم هيعجبوكي ..
انا هقوم دلواقتي يلا سلام ,,ولا عزمتوني ع شاي ولا قهوه ولا سندوتش ..
مشي "سعيد" وانا ماسكه الكتابين واصحابي بصين ليا مستغربين :
_ اول مرة سعيد يعمل كده , دا معروف عنه مبيفرطش فى كتاب لان دا بالنسباله كنز ومحدش هيحترم ولا يقدر الكنز دا غيره ,,
_ ماهو قالي هيجبلي كتاب اقراه لما حضرت الندوة ..
_ اهاااا ,, الله يعينك مش هيسيبك خلاص وقعتي فريسه علشان يضمك لمجموعته وتنتشروا وتكتروا وحلمه يتحقق ان الكل يكون بيقرأ ,,
ضحكنا وقمنا رجعت البيت ودخلت الاوضه بعد الغدا . فتحت الفيسبوك لاقيت رساله من "سعيد" : قريتى الكتب
افتكرت وقولتله : هبدء فيهم انهارده بس سيبني براحتي ..
_ اوكيه
قفلت معاه وقبل ما انام مسكت الكتاب وفتحته , انا بحب القراءه لكن مش لدرجه امسك كتاب ساعتين , اقصي وقت نص ساعه وكده كتير ,, لكن لفت انتباهي ان الروايى شدتني احداثها وكان الجمعه والسبت اجازه ,, ووصلت ل النهاية وقبل اخر 5 صفحات كانت موجوده ورقه مطوية ,, اترددت افتحها قولت يمكن تخصه مفتحتهاش وكملت الرواية واستمتعت جدا بيها ,, وفتحت الكتاب وقرأت فيه وقبل اخر 5 صفحات كان فى ورقه مطوية استغربت ,, فضولي وصلني افتحهم لكن مكنش فيهم كلام كتير كان بس كل ورقه فيها حرف ( ك _ ن ) ,, قولت كان بيلعب ونسيهم ولا ايه ,, !
تاني يوم فى الكلية كانوا معايا شوفت "سعيد" داخل مع صاحبه الكافتيريا ولمح انى ببص عليه استاذنه وقرب :
_ صباح الفل
_ صباح الخير ( خرجت الكتب ) اتفضل كتبك سليمه مفيهاش خدش ولا قطعه ولا بقعه , زى ما اخدتها بالظبط ..
ضحكك: ليه كل دا ؟
_ لا انا سمعت تحذيرات وبعدين انا لما حد بيدي حاجه بتكون امانه وبحب احافظ عليها لغايه ما ترجعله ..
_ وانا مش عاوز ارجعها ..
_ مش عاوز الكتب ..؟!
ضحكك : قوليلي ايه رايك فى الكتب عجبوكي ..
_ جداا يا "سعيد" , محستش ب اى ملل , وممتعه انك تقرا كتاب ماسكه احساس مختلف عن الموبيل او التاب بصراحه ,,
( خرج كتابيت تانين ) : اتفضلي دول هيعجبوكي وهاخدهم منك اخر الاسبوع ..
_ فى اقتراح احلي ,, رشحلي اسماء كتب وانا هروح المكتبه واشتريهم ع الاقل لو حصلهم حاجه انا صاحبتهم ,,
_ فداكي ,,
_ نعم ..
_ بصي ,, اعتبري نفسك فى كورس للقراءه هتاخدي مني كتب كميه معينه تقريها وهنتكلم ونحكي مع بعض عنهم ولما تخلصي الكميه دى هديكي شهادة خبره وتشتري كتبك براحتك ايه رايك ..؟
_ امممممم ,, اتفقنا
_ مش هتعزميني ع حاجه ولا ايه ..؟
_ لا ابدا بتشرب قهوه صح ,,
_ خليكي انا عازمك المرادي ..
مشي وندهت : سعيد انا النسكافيه ,,
قاطعني : من غير سكر عارف ...
أستغربت عرف منين وبعدين قولت عادي يعني مش سر حرب ,,
رجعت البيت وفتحت الواتس اتكلمت مع "سعيد":
_ انت بتحب القراية اوى كده ..؟
_ القراية دى حياة ونفس انا واللى زى بيبقي الكتاب جهاز الاكسجين الخاص بينا ,, بتكون سفينه نوح اللى بتنقذنا من الطوفان والغرق ,, بتكون الطيارة اللى بتطير بينا وتلف العالم واحنا مكنا ,,
_ ايه الفلسفه دى كل دا من حبك فى القرايه ؟
__ بصي يا "رغد" , القراءه دى وسيله بتساعدنا نعيش الحياة ,, بمعني نفهم معاني وتفسر لينا معادلات بتقابلنا ,, سواء عن حكايه اشخاص تانين فى شكل رواية او حياه الكاتب فى شكل سيره او من خلال خبرة الكاتب فى كتاب ,,, مع كل صفحه بنعيش حياه وزمن ومكان تاني ,, القراءه طوق للانسان علشان يقدر يكمل حياته فاهم ,, ممكن من تجربه قريتها فى رواية تعلمك ازاى تتصرفي لو حصل واتعرضتي انتي او غيرك بنفس التجربه بتكون عندك خلفيه ,, بتساعدك نفسك فى تفتيح عقليتك وتحديد احلامك وطموحاتك ,, بتغير من شخصيتك لشخصيه متفهمه عاقله بتفكر قبل ما تتكلم ,, القراءه بتساعد كتير فى تغيير شخصية الانسان من انسان حاسس انه ملوش لازمه ولا قيمة الى انسان حاسس انه اعظم انسان فى العالم ,,
_ هى بقي القراءه غيرتك .؟
_ جداا ,, كنت انسان عصبي متسرع , مفيش هدف ولا حلم بحلمه , عايش بس بروتين حياة ممل مفيش شغف ولا حلم اسعي لتحقيقه , القراءه ساعدتني اكون متزن نفسيا وعقليا,, رغم رتابه الحياه بهرب لعالم وزمن تاني فى كتاب ,, عرفت ازاى افكر واحدد احلامي ,,اتغيرت شخصيتي للاحسن بسمع اكتر ما بتكلم ,, امتي اتعزل عن الناس وامتي اقرب ,,
ضحكت : لا فعلا انت بتسمع اكتر ما بتتكلم ..
ضحكك: لا معاكي بتكلم اكتر بصراحه ومعرفش ازاى ,معاني بحب اسمع صوتك اوى ..
_ اغنيلك ..
_ تغني ازاى وانتي بنفسك اغنيه ..
سكت ومعرفش اقول ايه : بس بجد الكتابين تحفه
_ بجد ...
اتكلمنا عن الكتابين واتناقشنا فيهم وراينا ووجهه نظر الكاتب والتشابه بين الافكار فى الكتاب وبين الواقع ,, قعدنا نتكلم للفجر وبعدها قفلت معاه صليت الفجر ومسكت الكتاب الجديد اقرا فيه تاني يوم كان اجازه ,, ولاحظت قبل اخر 5 صفحات ورقه مطوية بحرف ,, كل مره بنسي اسأله عليها ,, فتره اتكلمت مع سعيد يوميا عن الكتب واتناقشنا فيها وراينا وحضرنا ندوات مع بعض ومكتبات والموضوع فعلا فرق فى حياتي ,, القراءه نفسها غيرت تفكيري ونظرتي لحاجات كتير,, يمكن لما سمعت كلام " سعيد " فى الاول حسيت انه بيبالغ لكن لما تعمقت اكتر فى القراءه حسيت فعلا بالتغيير ,, حسيت بالفرق بين القراءه للمتعه والقراءه لاستفادة ,, حسيت ان "سعيد" وجوده فى حياتي كان عامل مهم اكتشف "رغد" جديده ,,"رغد" حقيقيه ليها احلام وطموح ,, قبل كده كنت بفكر زى اغلب البنات اخلص الجامعه واتخطب واتجوز ,, لكن دلواقتي تفكيري اتغير ان الجواز والاطفال خطوه مهمه مش سهل اقررها لا بسن ولا بكلام اللى حواليا ,, اقررها لما احس ان انا جاهزه واللى هرتبط به يكون مناسب ليا ,, واشتغل واعيش حياتي واحقق احلامي ومهما وقعت ارجع اقف تاني والسقوط اللى بدون رجوع هو الموت ,, انا ببني حياه مش روتين ودا اللى عرفتوا من القراءه ,,
سنه كامله "سعيد" باخد منه الكتب واقراهم وكان نفس الورقه موجوده بحرف مختلف ,, الكتاب رقم 68 كان اخر كتاب :
_ الكتاب دا اخر كتاب هتاخديه مني ؟
_ الكورس خلص ولا ايه ..
_ يعني ممكن تقولي كده اللى عاوز اوصله وصلته ورايك فى اخر كتاب دا هيأكدلي وصلك اللى عاوزه ولا لا ..
_ تمام ..
انا كنت بجمع الحروف واتجمعت الجمله دي من 68 حرف
"كنت قبل ما اعرفك حاسس بحاجه ناقصه مني , لكن لما شوفتك حسيت اني لقيت الحاجه اللي كملتني "
اتفاجئت من الجمله لكن فرحت ,, حسيت فعلا انا كمان كان ناقصه حاجه مني ولقيتها ,, وجودي معاه بحس انى كامله ومش عاوزه حاجه من الدنيا ,,طريقته كانت غريبه ,,سنه كامله مقالش ولا لمح ب اى حاجه لكن افعاله وتصرفاته كلها كانت بتقول وانا مش واخده بالي ,, قررت ارد عليه بنفس طريقته لكن اختصارتها بورقه مكتوب فيها جملته لكن غيرت حروفها من مذكر ل مؤنث :
" كنت قبل ما اعرفك حاسه بحاجه ناقصه مني , لكن لما شوفتك حسيت اني لقيت الحاجه اللى كملتني <3 "
تاني يوم كان اخر يوم امتحانات عندى وخرجت لقيت "سعيد" زى كل امتحان مستنيني :
_ انت مش عندك امتحان بكره ؟
_ ايوه وفيها ايه ؟
_ اقعد ذاكر ولا راجع حتي ..
_ متقلقيش كله تحت السيطره ,, طمنيي عليكي ..
_ تمام ,,كان ختامها مسك .. ( خرجت الكتاب ) اتفضل ..
_ ايه رايك ..
_ جميل جداا
لاحظت توتره : ايه رايك بالكورس ,,
_ ختامها مسك ,,
_ نعم ..
_ انا عموما قولت رأي فى الكورس مكتوب فى ورقه موجوده قبل اخر 5 صفحات مطوية عندك ,,
ملامحه اتغيرت توتر وقلق ومسك الكتاب وطلع الورقه وقرا الجمله وبصلي :
_ رغد ..
_ ايوه ..
_ بحبك ..
مكنتش عارفه انا فين ولا حاسه ب ايه , مكنتش متوقعه يقولها ,مكنتش متوقعه احساسي يكون كده , اتخطفت فجاءه ومكنتش عارفه ارد عليه ,, موبيلي رن :
_ بابا .. بابا ..
ضحكك "سعيد": ردي علي حمايا المستقبلي ..
اتوترت الموبيل وقع مني : طيب انا هسيبك دلواقتي ل اصحابك لانهم جايين وهكلمك بليل ..
فتحت الخط ومكنتش عارفه ارد وعيني مش راضيه تبعد عنه لغايه ما اختفي ,, رجعت البيت مبسوطه وفرحانه جداا ,, بليل اتكلم سعيد :
_ اعتبر السكوت علامه الرضا يعني ..
_ مش اوي ..
_ بصي انا مش هقولك قوليها دلواقتي اطمني ..
_ ودا من ايه ..؟
_ هسمعها منك لما اخطبك رسمي وتبقي حلال ..
_ تخطبني ..
_ وهو انتى عاوزه فتره تعارف ولا ايه اكتر من كده ,, دا احنا عارفين عن بعض اكتر ما اهلينا عارفينه عننا ,, ناخد بقي الخطوه الجديده ونطلب من الله التساهيل ..
_ بتتكلم بجد يا سعيد..
_ لا بهزر طبعا هو انا حيلتي حاجه انا لسه هخلص امتحان بكره ,,
_ لا بجد ..
_ صدقتي ,, بهزر ,, "رغد" احنا مش صغيريين ومش هقولك السن لا احنا عقلنا اكبر من كده ,, انا لما شوفتك ولاحظت طريقتك وكلامك عرفتك انك حد عاقل جداا ,, وحسيت ان القراءه ممكن تساعدك علشان كده كنت برخم وبتنح عليكي انتى واصحابك انك تحضروا ندوه ,,
_ بتجر رجلي يعني ..
_ ايوه ,, كنت عاوز اتقربلك ومش عارف اعملها ازاى ,, لا ليا فى التسيبل ولا كلام الرومانسيه ,, وقولت لو حاجه مشتركه بينا هتسهل كتير ,, والحمد الله لقيت استجابة منك غير طبيعيه وغير متوقعه ,,فى حبك للقراءه بصراحة ..
_ يمكن علشان مكنش فى حد بيساعدني اقرا وانت شجعتني ..
_ ناخد بقي الخطوه الجايه انا اتعودت ع وجودك فى حياتي يا "رغد"
_ وانا جداا يا سعيد ..
_ يبقي نبل الشربات بسرعه بقي ,, انا يوم الجمعه هاجي اقعد مع باباكي واطلبك منه ..
_ براحه يا سعيد ايه القفش دا ..
_ خير البر عاجله هستي ايه ,, وبعدين بصراحه انا داخل جيش عاوز تكون معايا دبلتك قبل ما اروح ,,
_ ماشي ..
يوم الجمعه كان يوم مختلف عندي يمكن مخلتش حد يعمل حاجه انا عملت كل حاجه من تنضيف ل اكل ل حلويات ل عصائر ولو كنت اطول اجيب نجمه من السما كنت عملتها ,, وصل "سعيد" وانا فى الاوضه وكنت متوتره من الفرحه ,, خرجت قدمت العصير وبابا طلب مني ادخل الاوضه تاني ,, معرفش ليه لكن سمعت الكلام ,, ودار حديث بين بابا وسعيد :
_ "رغد" قالتلي انك فى سنها ؟
_ ايوه يا عمي ..
_ يعني دى اخر سنه دراسه ..
_ ايوه ..
_ وهتدخل جيش ؟
_ ايوه ..
_ بتشتغل ..؟
_ شغل بسيط كده لكن لما اخلص جيش هقدم وهشوف شغل دايم اكيد ..
_ وشقتك فين ..
_ احنا عندنا شقتين ,, شقه كبيره والدي ووالدتي واخواتي قاعدين فيها وشقه تانيه اوضتين وصاله كانت بتاعه جدي هوضبها ونتجوز فيها ..
_ اهاا .. مساحتها اد ايه الشقه دى ..؟
_ يعني فى حدود 55 متر
ضحك : 55 متر ,, انت عارف الشقه دى مساحتها اد ايه 220 متر يا سعيد
_ ان شاء الله فى المستقبل اكيد هننقل يعني ..
_ ودا يتحدد بناء ع الشغل اللى لسه مشتغلتهوش ..
_ يعني ..
_ سعيد .. انت زى ابني وعاجبني فيك حماسك وانك شاري بنتي ,, لكن المشاعر مش كل حاجه ,, الحياه محتاجه ماديات علشان تكمل وتقدر تعيش ,, انت لسه متخرجتش ولسه جيش وهتدور ع شغل ,, وبنتي انا مش هبهدلها ..
_ ياعمي انا ..
_ انت انسان كويس لكن مش جاهز ,, وانا دوري ك اب بحب بنته اكتر من اى حاجه فى الدنيا ,,لما تاخد خطوه الجواز وحياه تانيه اساعدها تاخد قرار صح ,, مشاعركم مسيطره عليكم دلواقتي ,, مع تعقيد الحياه ومتطلباتها نظرتكم هتختلف ومش بعيد تندموا ع اللحظه دى اللى انت موجود فيها ,,
_ يعني افهم انى بترفض ,,
_ للاسف ,,
استأذن سعيد ولاحظت مفيش حد ندهلي واختي الصغيره دخلت وملامحها زعلانه :
_ سعيد برا ..
_ مشي ..
_ مشي ..
خرجت وعرفت ان سعيد مشي واللى حصل ومقدرتش ارد ع بابا , حسيت انه لا فاهم ولا حاسس بيا ,, دخلت اوضتي بكلم سعيد ووسط خوفي قالي جمله " انا مش هسيبك وهحاول تاني متقلقيش " ,, حاول سعيد كذا مره مع بابا وكان بيصمم ع الرفض ,, اتحدد ميعاد سفر بابا واحنا معاه دبي واتحدد ميعاد دخول سعيد الجيش ,,
فى المطار وصلت ومستنياه والمرادي كان غير كل مره ,, حسيت انه بيودعني :
_ اتاخرت ليه .. بص علشان منساش اول ما هوصل هبعتلك رقمي هناك و..
_ رغد ..
_ ايوه..
_ دى اخر مره اشوفك واكلمك فيها ..
مكنتش مستوعبه: بتقول ايه ..؟
_ انا وعدت والدك اني هقطع علاقتي بيكي ,,
_ سعيد..
_ لو لينا نصيب فى اللقا هنتقابل تاني يا "رغد" ,, انا وعدت والدك ولازم احافظ ع وعدي ..
مقدرتش اتكلم قالي الجملتين ومشي ووقفت مكاني مش عارفه اعمل ايه فجاءه بقيت لوحدى ,, حسيت ب ايد بابا مسكت ايدي وايد التانيه بيمسحلي دموعي وقال كلمه : هتنسي يا "رغد " هتنسي ..
سافرنا وفعلا "سعيد" قطع علاقته بيا بكل وسائل التواصل فيسبوك وواتس وكله عاملي بلوك ,, 6 سنين مروا مقدرتش لا احب ولا ارتبط بغيره ولا كنت مستنياه ,, لان ببساطه مكنتش نسياه ,, مع كل كتاب كنت بقرأ فيه كنت بحس بوجوده معايا ,, قفلت الكتااب وابتسمت وقمت رجعته مكانه ورجعت البيت ,,, يوميا كنت بنزل المكتبه اقعد فيها شويا اقرا وبعدين ارجع البيت ,, فى يوم وانا قاعده بقرأ كتاب حسيت بكرسي جنبي اتسحب وحد قعد مهتمتش وركزت فى الكتاب اللى معايا ,, ساعتين قاعده باصه للكتاب لا ببص يمين ولا شمال ,, لاحظت اللى قعد جنبي متحركش ,, واتكلم :
_ زى ماانتي متغيرتيش لما بتمسكي كتاب بيعجبك مبتسبهوش لحظه ..
الصوت دا انا سمعته قبل كده ,, بصيت : "سعيد "
_ ازيك يا "رغد" ..
رجعت بصيت حواليا واتاكدت انه موجود : انت سعيد بجد ..
_ هنهزر ولا ايه .. ايوه انا اهو اضربيني طيب ..
سكت بحاول استوعب : وحشتيني ..
_ سعيد ..
_ دوختيني عليكي يا شيخه ,, بقالي سنتين كل اجازه انزل مصر واسال واعرف انكم مرجعتوش لسه او رجعتوا وسافرتوا تاني ,, ولو انا قايل لحد اول ما توصلوا يعرفني اخدت اجازه وجيت وعرفت انك مبتروحيش اى مكان الا هنا ..
_ سعيد..
_ اه والله سعيد ..
مقدرتش اتحكم فى دموعي : سعيد انت هنا بجد ..
_ ومن امتي انا سيبتك يا "رغد" ,, فى تفاصيل كتير بس اللى عاوزك تعرفيه انا فعلا وعدت والدك اقطع علاقتي بيكي واثبتله انى استحقك لكن طلب مني مقولش باقي كلامنا علشان لو مفيش نصيب بينا يبقي دا نصيبنا ,, انا عمري لا نسيتك لحظه وطول الوقت عاوز اكلمك لكن انا وعدت والدك ,,
_ انا منستكش يا سعيد ولا لحظه ,,دايما انت معايا ,, مكنتش متأكده اننا هنتقابل تاني لكن دايما كنت حاسه اننا منفصلناش ..
_ احنا منفصلناش يا "رغد" ولا عمرنا هننفصل عن بعض ,, اللى ربطنا ببعض ارواحنا ولو بعاد روحك معايا وروحي معاكي ,,
_ سعيد ..
_ المرادي بجد ومن غير كلام كتير هنتجوز ,, ابوكي كان معترض ع 55 متر جيبتله فيلا دورين فى التجمع 300 متر لسه هتتوضب بس اكبر من شقتكم اللى ذلني بيها ..
_ منين دى ..؟
_ انا بشتغل فى شركه عقارات فى ايطاليا وليها فرع هنا ف اخدت الفيلا بسعر كويس منهم هنا وفى تفاصيل كتير مش وقته ,, يلا علشان هنشتري الخواتم ..
_ بتقول ايه ..؟
_ يلا علشان نشتري الخواتم مش هيعدي انهارده من غير ما نكون مخطوبين كفايه كده ..
ومن غير ما احس وحاسه ان انا بحلم اشترينا الخواتم وسط عيلتي وعيلته وانا ببص ع دبلته فى ايدي وبصيتله :
_ سعيد ..
_ ايوه ..
_ بحبك ..
"الوداع لا يقع إلا لمن يعشق بعينيه أما ذاك الذي يحب بروحه وقلبه فلا ثمة انفصال أبداً ."
إعتبروها إسكريبت وقولوا رأيكم 💙