يومي مكنش لطيف من أوله، صحيت بدري عندي مشوار اخلص ورق مهم فى مصلحة حكومية ، النور قطع يعني لا مروحة ولا تكييف، وانا ماشية وقعت الطرحة فى الارض ودوست ٧ليها من غير ما اخد بالي ، سلسلتي اتقطعت، الباور بانك مش شغال وموبيلي يادوب ١٥% ، طلبت أوبر وفضلت مستنية وانا ماسكة ورقه بهوي بيها والساعة بطيئة وصلت العربية ونزلت
- على فين حضرتك
= الل موجود عندك فى اللوكيشن لو سمحت
- تمام
- ممكن التكييف
- مش شغال
-، شكرا ..
ركبت العربية والهوي كان سخن ، اقفل الشباك أتخنق، انا مبحبش الصيف ومبحبش انزل الصبح ومبحبش الشمس، ومبحبش سواق أوبر كمان..
وصلنا للمكان ويلا بقي انجز واروح..
كان المكان زحمة اووي، اخدت نفس ودخلت
- لو سمحت عاوزة اعمل الورق دا ..
= عند استاذ عصمت
- وفين استاذ عصمت ؟
- جاى استنيه
روحت اقعد أستناه، المكان زحمة ومرونة واحده شغاله، المكان كله ثاني أكسيد الكربون ، خرجت برا كان حر، يارب هو انا بتعاقب ولا ايه.. استاذ عصمت جه بقي الورق ناقص دمغه فى الدور الرابع والاسانسير عطلان، طلعت ع السلم ، خلصت ورقي وخلصت مشواري ووقفت استني ميكروباص وقفت ساعه لغاية ما ظهر ، رجعت البيت اخدت دش واترميت ع السرير وقررت هقطع علاقتي بالناس لمده شهر مش عاوزة اشوف بنادمين وهنام علشان انسي اليوم ..
لسه هناك يلا علشان الغدا جاهز ، مش جعانة لا بصراحة جعانة فقومت اكل وكلهم قاعدين يتكلموا بيضحكوا وانا ذكرياتي مع اليوم عماله تطاردني.. خلصت اكل وصلت اوضتي بسرعة بهرب منهم ومن كلامهم ، حاولت انام مقدرتش صداع لزمني من الصبح، وقمت اعمل قهوة، فارت مني مرتين روحت قولت ماله الشاي وعملت شاي ..
رجعت اوضتي انام موبيلي رن، كان هو :
- مش المفروض انك نايم دلواقتي
= هنام قولت اكلمك الاول ايه الاخبار
- لا يوم مش لطيف عاوزة انساه مش عارفه ..
= احكيلي كده ؟
حكتله ع اليوم والل عشته لقيته ضحك :
- بتضحك ع احزاني شكرا..
= دا انتى فرفوره اوي
- انزل فى الشتا عادي لكن الصيف لا يا جماعة
= حاضر هبقي ابلغهم اى مصلحة حكومية يبعتولك فى الشتا بس ..
- اتريق اتريق ..
= لا مش رايق للخناق يلا نامي ونتكلم تاني لما اصحي قبل ما اروح الشغل
- تمام ..
قفلت معاه علشان انام معرفتش ..
بعتله مش عارفه انام وعاوزة اليوم يخلص مش عارفه
شاف الرسالة ومردش
قولت اكيد نايم ولما يصحي هيرد عليا
ساعة وموبيلي رن كان هو ..
- انت صحيت
- انا تحت البيت يلا انزلي
- بتعمل ايه ؟
- البيبسي هنا حلو .انزلي يلا عاوزك فى حاجة
مكنتش مصدقة، نزلت وكان مستنيني وروحنا ع الكورنيش قعدنا واشترالي سندوتشات كبدة وبيبسي وترمس وايس كريم وختامناها ب اتنين شاي بنعناع واحنا بنتكلم او معني اصح انا بتكلم وهو بيسمع :
- ها مرضية كدة ولا نطلب حاجة كمان
= لا كده تمام .. مش هتروح شغلك
- لسه ساعتين،
- ومنمتش ليه ؟
- لو سيبتك كده ونمت هحلم بكوابيس ف فى الحالتين مش هعرف انام ..
- يا رخم ..
= ها روقتي كده
- اقولك الصراحة
- ها ..
- يوم بدء لما كلمتني بصراحة
- والل قبله كان ايه ؟
- كان كابوس صباحي ولما شوفتك إتنسي خلاص ولا اكنه حصل ..
- يلا اى خدمة
- متتغرش كده ..
- بس مش ملاحظة حاجة ؟
- ايه..؟!
- القمر مش فى السما رغم انهارده يوم ١٥
- لا ازاي ..
ببص ع السما بدور لاقيته قالي :
- لأن القمر قاعد جنبي ومعايا ..
رغم أنها كلاشية اوي لكن حبيتها منه ، اتكسفت وضحكت اشترالي ذره وكان عمو صاحب عربية الذره بيسمع الست واكلت الذره وانا ساندة رأسي ع كتفه وبندندن مع بعض مع الست وهي بتقول " الليل وسماه ونجومه وقمره قمره وسهره وانت وانا يا حبيبي انا يا حياتي انا ، كلنا كلنا فى الحب سوا " 🤍
اعتبره إسكريبت 🤍
