- حبيبي
- ربنا يستر
- نعم ..؟!
- عيوني ..
- هسألك سؤال وترد عليا ممكن ؟
- ومن امتي مبردش ع اسألتك يعني ؟
-، انا إللى هسأل تقوم ترد عليا بسؤال ؟!
- عيوني ..
- بصراحة كده ومن غير تحوير ترد ..
- حاضر ..
- حاضر ايه وانت مش باصصلي وعينك ع مدحت شلبي ، هو مدحت شلبي اهم مني عندك ؟
- لا طبعا يا حبيببتي بس انا ودني معاكي لكن عيني معاه
- لا طبعا .. انا عاوزه عينك وودنك ومناخيرك نفسها كل دول يكونوا معايا وانا بتكلم ..انا لما اتجوزتك اخدت العرض كومبو شامل كله مش ودان بس ..
- ايه كل دا ( طفي التليفزيون ) بلاها مدحت شلبي وبلاها التليفزيون .. انا معاكي اهو عيون وودان وحواجب ورموش والساقع فى التلاجه ..
- ساقع ايه ؟
- مش بتقولي عرض كومبو ..
- طيب كتر الكاتشب بقي ..
- سبايسي كمان ..
- ركز معايا بقي ورد عليا ؟
- ها ..
- انا نكدية ..
-....
- متجاوب ع السؤال؟
- فين السؤال..هو انتى قولتي سؤال ؟
- ايوه بقولك انا نكدية ..؟
- هو دا سؤال .. دا تأكيد معلومة ..
- نعم ..؟!
- اقصد انا مستني تكملي الجملة .. حطي هل فى الاول كده اى دلالة ع انه سؤال يا حبيببتي ..
- طيب نعدل السؤال ..هل انا نكدية ..؟!
- ....
- نعم حضرتك .. السكوت دا ايه ؟
- ليه بتقولي كده مش فاهم ايه اسبابك ؟
- النهاردة بتكلم مع ماما راحت قالتلي انتى نكدية والله يكون فى عونك جوزك ..
- ربنا يخليها حماتي ..
- نعم .. يعني انا نكدية فعلا ..؟!
- هل سمعتي مني ان انا قولتلك انك نكدية ؟
- لا ..
- هل لما اتفقنا اننا نخرج اول امبارح وكنت جاهز وانتى علشان البلوزه ضيقه شويا وقعدتي تعيطي علشان تخنتي شويا وكدرتي العيال وحرمتيهم من الخروجه .. هل انا قولت عليكي انتى نكدية ..؟
- لا ..
- هل لما بتبعتيلي انهارده وانا راجع من الشغل اجيبلك بقدونس وطلعت كزبره ، وقلبتي وشك واتعصبتي رغم انك كلمتي مامتك قالتلك عادي ينفع تحطي كزبره لكن انتى قفشتي وحمرتي بطاطس وبتنجان واكلنا واحنا ساكتين .. هل قولتلك انتى نكدية ..
- لا
- طيب لما روحنا يومين السخنه مع اخويا ونزلنا البحر والعيال قعدوا يتحايلوا عليكي تنزلي معاهم وانتى مرضتيش وقلبتي وشك فى الوقت إللى كلنا فيه مبسوطين وصممتي نرجع ورجعنا فعلا هل قولتلك انتي نكدية ..
- لا ..
- هل لما عملتلك مفاجاءه عيد ميلادك عند مامتك ومعايير وشك إللى كانت عباره عن غضب ربنا لان انا نسيت وجيبت التورته شوكولاته بدل كريمه رغم اني قولتلك ان الولاد هما إللى حبوا يفاجئوكي لكن قلبتي وشك لأنك مبتحبيش أعياد الميلاد .. قولتلك انتي نكدية ..
- لا
- هل دلواقتي فى بدايه كلامنا وقفشك قولتلك انك نكدية
- لا ..
- طيب ..بتقوليني كلام ليه ..؟
- ماهو انت مردتش على سؤالي هل انا نكدية ؟
- لان النكد صفه بتتعاش يا حبيببتي مبتتوصفش
- يعني انا مش نكدية ؟!
- موافقه اجيب البلايستيشن البيت
- لا طبعا
- اهو ..
- رد عليا بصراحه انا مش نكدية ؟
- لا طبعا .. ينقطع لسان ولوز إللى يقول كده
- طيب كويس ابقي قول لماما بقي انك أسعد إنسان فى الدنيا ومفيش نكد ..
- انا مش هقول لمامتك حاجه ..
- نعم ..
- انا هخليها تيجي تقعد معانا يومين وتشوف بعنيها إللى احنا كل يوم بنشوفه ..
- هنا وسعاده ..
- طبعا يا حبيببتي .. ممكن بقي ارجع لمدحت شلبي انا كده سايب الراجل كتير محبوس فى التليفزيون وميصحش
- اوكيه ..
- ممكن كوبايه شاي و ..
- نعم .. انت مهتصدق ولا ايه انا طالع عيني من الصبح فى البيت والعيال قوم اعمل لنفسك دا بدل ما تقولي اعملك حاجه وتريحني ..ماهو انا الخدامه إللى جيبتها البيت .. اقول ايه بقي يارب .. استني انت رايح فين
- هاخد مدحت شلبي المطبخ نشرب انا وهو كوبايتين شاي ع السريع علشان مفيش حاجه تتقال ، الله يمسيكي بالخير يا حماتي ..!
إعتبروها اسكريبت 🤭
دا اتنين اصحابي انا ركبت الحوار بس 🤍😂
