( أبو رعب )
... القسم الثاني
بقلم نورس
.........................
كاعدة ع الجرباية وموبايلي بيدي
ريناد كاعدة كبال المراية تخلي مكياج ، من شفتها وشافتني تتمكيج
تحجي وياي ..
بس اني بالي مو يمها
فاتت عمتي للغرفة بيدها التليفون وتحجي : زين عيني هسه اخليها تخابرك .. الله وياك
سدته وباوعت عليه كالت
سهير: هذا قسور مخابر عليج .. شو يكول كليلها خلي تفتح خط شبيكم متعاركين ؟
ريناد: يمة هو هذا سؤال ؟ يا يوم سمعتيهم متصافين اصلا
سهير: شبيج ولج شصاير
زفرت نفس بضوجة ورديت
لبوة: ماكو شي
اشرت لريناد وهاي الثانية ضحكت .. دارت الها وكال
ريناد: زعلانة عليه لان مصيح عليها
سهير: وليش يصيح عليها ؟ هو هذا هم طكة ونص حجاية والثانية يكب .. ميخالف عمة لا تضوجين هو هذا طبعة قابل جديدة عليه
ريناد: هسه انتي دسمعي ليش زعلانة الاخت .. مخابرتة البارحة تكلة لتسوي سيارة زفة جيب وحدة من الهمرات وخلي نزف بيها
سهير: شو بلة باعيلي ولج صدك هل حجي
لبوة: اي .. اول شي ضحك عليه عبالة اشاقة وياه ومن لحيت عليه زمخ عليه زعلت وبعد ما حاجيتة
باوعتلي بطرف عينها وكالت
سهير: زين منه وحصلتيلج بس زمخة اني منه اجيب بيج الكاع سحل على عرامتج وطلعاتج العوجة
لبوة: يعني عمة شكو بيها نسوي فد شي دفرنت غير عن الاعراس التقليدية!
سهير: عيني ام الدفرنت استقري شوية راح تسودنين الرجال .. منين يجيبلج همر يمة ؟
لبوة: مو جابهم بالمشية ترس بيهم الشارع .. هسه عز عليه وحدة
سهير: اي مو هي مسجلة باسمة شو دكومي خابري وشوفي شيريد .. نوب زعلانة وهي ام الراهي والافندي يراضي بيها بلاية كَلب
لبوة: والله ولا اخابرة وشيريد يسوي خلي يسوي
سهير: دضلي طبج حريشي اذا رجع وخابر اوصلة كلامج وبعد هو يتصرف وياج
عافتنة وطلعت دارتلي .. كالت
ريناد: لج عابتلج من البارحة وانتي سادة التليفون دشوفي شيريد شلعتي كَلبة
لبوة: خلي احسن
ريناد: بختج هو بالعمارة لو هنا جان بنفس الساعة لكيتي لازملج الباب .. بس يلا اول وتالي السبت انتي يمة
حجتها وغمزتلي بعيون ماكرة ..
غميتها ودرت وجهي واسمعها طكتها ضحكة
بعد يومين للحنة ..
اتفقنه نسويهة يوم خميس ونكعد الجمعة نرتاح بين ما يرتب امورة ويرجع لبغداد ، السبت نسوي العرس
لان هو راح يسويلة حنة بالعمارة كرايبنة وجماعتة كلها هناك ..
بيوم الحنة ..
جانت ببيت عمتي خطية هي التركض بيه وما قصرت ابد ،
جبنة ملالي حيتلنة الحنة واحنه اصلا طاكة كَلوبنة صار هواي ما صايرة عدنه مناسبة
... " لعبنة لعب " بيومها
والبنات كلهن تأجير وبدلات قصيرة وتعديل بالصالون
.. صدك لو كالوا ( المعرسين اثنين والمجانين ألفين )
جبت بدلتين الاولى برنسس والثانية قصيرة تضامنا وي البنات ، ركصت وضحكت هواي جان يوم من العمر ..
بليل بعد ما طفينة الدي جي والنسوان كفت وكلمن راح لبيته بقينة بس احنه الكرايب مجموعين
واكفة بالغرفة وعمتي تفتحلي بالبدلة ، والبنات مطشرات كلمن ملتهية بشغلة ..
باوعت لكف ايدي ، وابتسمت لصبغة الحنة وكتلها
لبوة: تدرين عمة .. لو جانت امي موجودة هم ما جان وكفتلي مثل ما انتي وكفتيلي بهل يوم
سهير: لعد انتي غلاتج شوية عندي ؟ بناتي اربعة وانتي خامستهن
درت عليها حضنتها وبست راسها ..
حنيتها عليه غير الكل ، جانت طول اليوم تباوعلي وعيونها مدمعة
فاتت ريناد للغرفة وكالت
ريناد: ها عيني هاي شنو هاي .. صايرة محاضن واشواق وحنين واني ما ادري
سهير: بطلي تكمز وكومي امسحي المكياج وبدلي لشوكت ناوية تبقين بيه
ريناد: بعد اريد اخذ صور
سهير: ولج ما شبعتي
ريناد: لا ..
سهير: وجعاا .. فات المغرب وراح وانتي حتى صلاة ما مصلية .. تعاي افتحي تسريحة لبوة اروح اشوف عمتج ضلت لوحدها
اجت وبدت تفتح بشعري وشكددد طلعت ماشات رغم اني كتلها لام الصالون لتخلين هواي حتى ما يتعبني بعدين من افتحة ..
سبحت وطلعت المنشفة على راسي ..
كعدت ع الجرباية وافرك برجلي ، احسهم تشنجوا من الكعب
اجتني حور ..
حور: ها تأذيج ؟
لبوة: اي واللة اشو ورمت .. اذا هيج حتى بالعرس ما البس كعب
راحت واجت جايبتلي عصارة مال تشنجات من عمتي وكعدت تخلي وتدلك بيهم براحة ايدها ، يلا شوي خف الوجع
اجت نوب عمتي لابسة إحرام الصلاة كالت
سهير: ها شلون صارت رجلج
جنت متمددة وايدي جوة راسي ..
فزيت عدلت كعدتي كتلها
لبوة: لا شوي احسن
وكعدت تحجي ويانة ، باثناء حديثنة فاتت ريناد للغرفة صاحت
ريناد: يمممممة
سهير: وغمة كوون لهل صوت .. شبيج
ريناد: يمة خطبوني
سهير: يا صلوات .. يا هي الما رايدة روحها ورايدتج تصيرين جنتهة
ريناد: والله ما ادري اجتني هاي ام سعد وياها مرة وكعدت تستجوبني كتلها شبيج خالة شاربة نفط
ريتان: ياااا نفسها المرة الاجتني عبالها ريناد كتلها لا اني اختها
سهير: هي هاي العايزة نوب بعد التعب والشكة انطي بناتي لسعد ابو العرك
لبوة: ليش هو مو متزوج ؟
سهير: لا وين ذولاك اخوتة تزوجوا عين الله عليهم شلون شباب واحدهم ما يرفع عينة من يمشي بالشارع الا هل عايب مدري المن طالع
لبوة: شعجب شو اهله ناس فقرة ومحافظين
سهير: والله ما ادري يعمة هي هاي الدنيا من البيت الواحد تلكين الزين وتلكين الشين .. هل امه تدورلة بنية تريد تزوجة عبالها يعقل متدري ابو طبع ميغير طبعة
هي تحجي وانتبهت لريناد واكفة منتجية ع الباب وصافنة بغير عالم ..
ضحكت حور وكالت
حور: عمة هاي على عين لبوة اليوم بناتج كلها انخطبت
سهير: اندري شو انتن بس وحدة تتزوج تكومن وحدة تجر الثانية .. صرت ام زكي ياهي الجاية وكالت هاي البت ما تنطوها ؟
ضلينة سوالف لاخر الليل ..
اليوم الثاني .. جمعة
دنيا العصر حايرة بالملابس وواحضر بالجنطة
واجتي عمتي كالت
سهير: هذا قسور هنا
هي حجت هيج واني خرطت العافية ..
رجلية اصطكوا كتلها
لبوة: شجابة
سهير: ياا شنو شجابة غير جاي يشوفج .. كاعد هسه وي عمج خليتلج صينية ع الكاونتر جيبيها وتعاي للاستقبال
لبوة: يبوو نوب عمو جهاد هم كاعد والله استحي
سهير: هسه يروح هو جان طالع بس لان اجه قسور
.. شوفي ليش جاي واحجي وياه مو هم تكلبيها عركة خطية اليشوفة ولا يكول باجر عرسة معلعلته
طلعت عمتي واني ضليت اكل بروحي .. اجاني صوتها
ريناد: شنو بعدج زعلانة عليه ؟
لبوة: ممخابرتة من يومها
ريناد: عمة بعينج ليش ولج .. والله زين منه ومتحملج لهسه اني منه طالك بالثلاث
لبوة: يمعودة اصلا البارحة جنت ملتهية وهو اكيد هم مفارغ حتى يتصل .. بس لكيتة داز مسجات شفتهن وما رديت
ريناد: يا يا ياا دكليها اليوم الا يطلعلج كَلب
باوعت لملابسي مرتبات ما بيهن شي ..
خليت عطر ومشيت للمطبخ اخذت الصينية جان بيها كيك وعصير وفتت للاستقبال سلمت
لكيت بس عمتي كاعدة وياه
.. خليت الصينية كبالة صارت عيني بعينة ، نظرتة نظرة عتب مال واحد شايل الهموم الدنيا كلها على راسة
كعدت كبالة وضلوا يسولفون هو وعمتي .. شفت وجودي مالة داعي اجيت اكوم صاح بية
قسور: اكعددي وين
رجعت لمكاني بسرعة بدون اي صوت ..
وجهلي الكلام
.. مو اخابرج صار جم يوم ليش متشيلين التليفون وتردين ؟
باوعتلة ودرت وجهي عنه للجهة الثانية .. هو افتهم عليه كال
.. هاااا يعني بعدج زعلانة خاتون
لبوة: اي !..
قسور: هاج شوفيها متغلط نفسها ابدد .. حتى لو هي الغلطانة هم تدير وجهة وتزعل وتعال اكعد راضي
سهير: ميخالف بعد عمتك زعل حبايب .. تتعاركون منا وتتصالحون بنفس الساعة .. ان شاء الله لا يضل زعل ولا شي باجر وراكم عرس وكدامكم زواج ومسؤولية عوفوا عنكم العرك والزعل وعيشوا حياتكم
قسور: الف رحمة على والديج .. دكليلها هل حجي بلكي تقنع ام راس اليابس .. شلعت كَلبي بهل اسبوع لا بية اعوف الوادم واجيها لهنا كوة عليه البارحة جرعت الحنة ما عولت يصبح الصبح واجيكم اشوف تاليها وين تصفة وياها
سهير: معليك بيها لا زعلانة ولا شي بس تريد تدلل عليك
باوعتلها
لبوة: عمة انتي وياي عليه
سهير: هو حك لو باطل ؟ مسويتلج زعلة شكبرها وعلى شنو .. ترة اني هم ما ارضة على ابن اخوي شلعتي كَلبة يروكض وراج
باوعتله مسبل عيونة بتعب .. مبين ما نايم زين
انقهرت عليه ، كتلة
لبوة: يلا عادي مصار شي .. بس كوليلة بعد ليصيح عليه
سهير: اني شعلية هذا هو كبالج واحجي وياه منج اله .. اني رايحة اكمل شغلي الباجر ورانة هوسة من الصبح
عافتنة وكامت طلعت ..
قسور: تعاي
لبوة: وين ؟
اشرلي بصفة وكال
قسور: هنا يمي
رفعت اكتافي ورديت : ما
قسور: ها اكوملج ؟ تعاي كتلج
رديت بعناد
لبوة: مااا
كمزت من مكاني من شفتة كام وكف وقبل لا اشرد سبقني وسحبني عليه قيدني بين اديه ..
عين ع الباب وعين عليه واحجي بتوسل : عفية قسور والله عيب لو شافتنة عمتي شتكول بلة هذول ميستحون
قسور: انه رجال بايع المستحة وياج
يحجي ومركز بعيوني ولا اهتز من مكانة ، دنك راسة خله جبهته على جبهتي وانفاسة تلفح بوجهي
هدئت شوية ، وغمضت عيوني ..
رفعت ايدي خليتها على صدرة
تحسست نبضة .. دكات كَلبة مخربطة
فتحت عيوني باوعتلة .. كتلة بهدوء
لبوة: شبيك
قسور: اريدنج يمي .. اضل كل عمري شابكج واشتم بعطرج واتيهن بيج
عضيت شفتي بخجل ،
.. رفعت كف ايدي لزمت وجهة وامرر عليه بأبهامي
خله ايده فوك ايدي وميل راسة وهو مغمض عيونة
فتح وعينة ارتكزت على شفايفي دنك يريد يبوسني خليت ايدي بسرعة .. ما وخر طبع بوسة هادئة على كف ايدي ورجع رفعها محاوطة ركبتة ، وحضني
.. لميني بحضينج يلبوة
حجاها وزاد من احتضاني واحس بانفاسة وهمساتة قريب من اذني ..
لبوة: ألمك واصيرلك كولشي .. بس مو لازم تنتظر منا لباجر
اول ما حجيتها رفع راسة عاكد حاجبة متضايق ..
ابتسمت على شكلة
قسور: انه اكول لو نلغي سالفة الزفة واخذج هسه ونروح لبيتنة
لبوة: اتحمل يا حبيبي اتحمممل معرفتك هيج خلي عندك شوي بيشنز ..
قسور: حاط الله وياج كون صارلي سنة سامطة جد جدي ما ضل صبرر .. مال الزمج هسه واعرس عليج هنا
حجاها وأشر ع القنفة بعيونة .. متت بدمي وهو ولا عبالك يا جبل ميهزك ريح ، بلعت ريكي وكتلة
لبوة: لتسوي شي حباب
قسور: واذا سويت شيصير يعني
حجاها وجرني من خصري قربني عليه اكثر .. باوعت وراه وصحت
لبوة: هاا عمة
كمز بسرعة ابتعد عني ويباوع بوراه .. وكفت يم الباب وابتسمت بانتصار واضحك على شكلة وهو يسب ويلعن وياشرلي بيدة عود بسيطة
قسور: سهلة يبنية تاليتج ترة هنا
ويأشر على صدرة ،
رحت لعمتي كتلها قسور راح يروح
وراحت عليه وشفته وهو يطلع للطارمة
ريناد: ها راح المعزب
درتلها وهزيت راسي بابتسامة
.. تخصرت وكالت
.. باع الابتسامة عيني بااوع خما تصرف وياج تصرف غير اخلاقي كليلي حتى اشوف شغلي .. هذا بيت مال ناس تتقي الله مو حبجيات وسوالف مكسرة
لبوة: ذكرتيني بمقولة حنان الطويل
.. " البيت ده طاهر وهيفضل طول عمره طاهر "
ريناد: خوش والله عمي صاير مؤدب ذاك الزلمة
لبوة: تعلمي الأدب منه اصلا .. الكافر يدخلة للاسلام من الادب والاخلاق الشايلها
اليوم الثاني ..
كعدنة من الصبح
النعاس بعيوني وعمتي تصيح عليه حتى اتريك واني احس بطني موتتني من المغص ومالي شهية اكل ولا شي ..
رحت سبحت وتحظرنة ورحنة للصالون وياي حور وريتاج .. عمتي بقت بالبيت خطية مخبوصة هي والبنات
جان قبلي عرايس بدت بيهم واحنه كاعدين ، جابتلي ريتاج اكل ما قبلت انطتني بس كيكة اكلت شوية وعصير ..
انشتلنة لبين ما مكيجت ولبست البدلة وسوتلي التسريحة صارت بال2 ونص يلا كملت ..
اجه مصطفى ياخذنه ..
خلن الكبوس على راسي وطلعت صعدت بالسيارة وهذن وكفن يتعاركن منو تصعد بالصدر ..
ريتاج: اني استحي انتي اصعدي
حور: لعد اني شبيه ما اعرف استحي .. انتي الجبيرة لازم تكعدين ليكدام
لبوة: ولجن يلا متت حررر
خلت ريتاج وصعدت يمي وخلت حور مصطكة ..
جانت لابسة فستان محجبات ومكيجت بالصالون طالعة تخبل ،
واباوع لمصطفى واكف يم باب السايق راح ياكلها بعيونة
اخر شي استسلمت وكعدت ليكدام صحت عليه : يلا عيني سايقنة مو راح نموع من الحر
مصطفى: البنكلادش مال خلفج اني
لبوة: كلابك اصلا الك الشرف اصعد بسيارتك
مصطفى: راح اشمرج من الجامة وابو ذر الغفاري
مشة بينة للسيارة ويحاول يداري نظراتة لحور .. ساعة يشغل اغاني يحاول يلهي نفسة
اخر شي كام يباوعلي من المراية وعاقج وجهة
لبوة: شبيك هيج تباوع
مصطفى: شبيج لبوة صدك جذب ما شايفة مكياج ؟
اخترعت وجريت المراية واباوع لوجهي
لبوة: ليش شبيه ؟ مو حلو ؟؟
مصطفى: طالعة جنج الجوكر
لبوة: عليك الله !...
اجيت ابجي وهو يضحك عليه ..
.. لتقهرني شبيك يعني صدك مو حلو ؟
مصطفى: لا حلوة حلووة
حجاها ويغمز للبنات
لبوة: عابتلك اي والله
خلص الطريق يشاقي ويضحك ..
طلعني شوي من جو التوتر بين ما وصلنة لبيت عمتي
وكف السيارة اجن البنات ينزلن صاح بيهن
مصطفى: اووكفن خلي افوت السيارة للكراج
ريتاج: غير كبال الباب ؟
مصطفى: هاي اوامر عليا .. ماكو اعتراض
نزل فتح باب الكراج ودخل السيارة للبيت يلا نزلنة .. وساعدني البنات
طلعتلة عمتي اول ما شافتني طكتها هلهولة ووكفت تحاجي
واني فتت للاستقبال جانت متروسة نسوان ، واشتغلت الهلاهل .. كعدت وكل شوي وحدة جاية طاشة جكليت على ساعة تجي وحدة بعيني واروح للرجال عورة
مشتغلة اغاني والبنات يركصن ..
الوجع اللي بطني موتني ، وارتبكت حيل واحس روحي ما مرتاحة بالكعدة
شفت حور واكفة على جهة اشرتلهة تجي ..
شاورتها وفتحت عيونها وهي تكول
حور: احلفي ؟؟
لبوة: ما ادري يمكن .. كولي لعمتي خلي تسويلي مجال اروح للغرفة كولش تضايقت
راحت شوي واجت وي عمتي كومتني للغرفة ..
طلعت من الحمام لبست البدلة .. ووكفت ريناد تعدلي بشعري
ريتاج: اليوم ذاك الزلمة يشيط
ريناد: هههههههههه والله تصير عيونة بكصتة بس تكليلة
سهير: كافي لجن لتضحكن .. قابل طارت الدنيا مو الا اليوم هي وياه بعد يتصافون
الزفة تصير بال4 العصر ..
اجه قبلها عمو جهاد للبيت وصاحتلي عمتي وكومتني للصالة فارغة بس عمو واكف
باركلي وباس راسي واني دنكت بست ايدة وكال
جهاد: ان شاءالله بالرفاه والبنين بنيتي واعذرينة عمو على اي تقصير
لبوة: لا عمو لتكول هيج والله وكفتكم انت وعمة ما انسالكم ياها كل عمري .. ما بدر منكم اي قصور اني الممنونتك عديتني وحدة من بناتك وهم يمكن لو بنتك متسويلها مثلي
جهاد: تستاهلين بنيتي .. والله تعودنة على صوتج بالبيت جن منطي وحدة من بناتي ، مهناية بوية
طلع ظرف من جيبة وخلاه بيدي وكال : هذا مني ومن عمامج انتي تصرفي بيه
منطاني مجال احجي ، خلة وطلع
.. اجاني صوت عمتي
سهير: ذكرني بيوم زفة ريتاج .. بنص العرس غوركت عيونة وطلع ضايج من البيت
لبوة: يعني انتوا الا تبجوني
سهير: لا والله فرحانين لفرحتكم .. هاي من معزتج عدنه
كالت الزفة على جية رجعتني كعدت ولبست البركع وشدتلياه من جهة الصدر لان دلعتها فضيحة ..
تقريب ربع ساعة وسمعنة صوت سيارات من برة ..
وفاتوا للبيت انترس هلاهل وجيهان اول الناس طبت تهوس .. عود من اهل العريس
طب هو مبتسم ويضحك ، هنا من صدك حسيت بالفرحة اللي بعيونة .. لا اراديا ضحكت لضحكته
دار وجهة شافني دنكت راسي ..
اجه باس راسي وكعد بصفي
النسوان تدبج بالنص وهو خلص الكعدة منزل راسة ويهز برجلة .. ادري بيه يضوج من هيج اجواء
تقرب همس باذني
قسور: شطالعة ولج بوية لعابة .. بهداي اعلى كَلبي تراه منكوب بكربج
لزم ايدي يفرك بيها ..
قسور: شو ترجفين ؟
لبوة: شوي متوترة
قسور: لتخافين امي وابوية انتي انه يمج
فاتوا عمامي وبابا وعمو جهاد ما خلوا احد غريب يفوت .. خلة الكبوس على راسي ووكفنة سلمني بابا اله ووصاه عليه باركلنه وطلعنة
ايدي بايدة ومقيدني بين كفوفة ليكول راح اشرد ..
السيارة هم جان مدخلها جوة ، ساعدني حتى اصعد وطلع السيارة برة بالباب
الشارع متروس ناس وما اسمع بس صوت الرمي ..
نزل هو صاحوله ، رفعت البركع شوي من راسي وباوعت
شفت مصطفى وعمو أسر يهوسون بالنص .. شكد حلو منظرهم بحيث اباوع وابتسم لا ارادي
اجوا عليه مصطفى ويوسف ، اشرلي انزل الجامة
فتحتها ودنك كال
مصطفى: مجفنة من فوك ليجوة شني عروس لو جثة
لبوة: غير ابن عمك ونوب ما عاجبة يصيح جيبولها عباية
مصطفى: يابة عراقي هذا ابو القيرة
لبوة: ايييه ابو دم الحار
يوسف: يابة على كل حال شايفة كل الخير عروستنة .. سويتيها وكسرتي علينه وتزوجتي اول وحدة
مصطفى: اي والله يا حيف بسس .. هاي الزقجة تتزوج كبلي؟ ولكم اطمم اروحي .. ولكم زووووجوني
يوسف: صوتك نعلعلة والديك .. نزوجك نزووجك بس اسكت
مصطفى: خااب اكلة لبوة تزوجت كبلنة اهمداك وامداية .. وهاي عود انت الخاطب اول شي
لبوة: اي وهسه شتريد
مصطفى: زفوووني ماريد العشة
يحجي ويهز بخصرة ..
خربت ضحك على حركتة
يوسف: خرب غيرتك كافي فضحتنة ..
انطاني جنطة صغيرة وكال .. هاي من عمتي وصتني انطيج ياها
فتحتها لكيت بيها قرآن صغير ومراية ..
اجه قسور شافهم كلهم
قسور: ها بوية خير ؟ شو هنا متكومين
مصطفى: غير اخوة العروس .. اجينة نبارك
قسور: كملت ؟
مصطفى: اي
قسور: يلا شوفني عرض اجتافك
مصطفى: عود جنت محضرلكم واجب .. دروحوا حتى ما اوجبكم اروح انطيهن لمجدي احسن اكسب اجر انتوا ما وراكم شي
جرة يوسف وراحوا وهم يضحكون ..
صعد بالسيارة ودارلي
قسور: وانتي جن اخذج الواهس ؟
ضليت اباوعلة ممفتهمة .. تقرب نزل الكبوس
لبوة: اهوو قسور والله اختنك هيج
قسور: ميخالف تحملي بس بين ما نوصل لبيتنة وهناك حتى الملابس انزعيها وفنة اليفك حلكة
بكَلبي كتلة .. طبعا متحجي غير تكيفلها ودكلها طبل
مشت السيارات ..
وصوت الاغاني والهورنات بكل مكان ،
ما خلاني اشوف توسلت بيه اطلع نص وجهي وهو ينزل بالبركع ميقبل
خلص الطريق لازم ايدي ويعدل بالبدلة خاف طالع شي
تليفوناته ما سكتن ثانية وحدة احنه وراكم احنه بصفكم احنه كدامكم انتوا وين وصلتوا امشوا على كيف حتى نلحك بيكم وراسي انفخ يسد واحد يشيل الثاني
وهو هلكد ميمشي سريع اجيت الزك بالجامة الامامية ..
ويتأفأف وضايج من القاط كل ساع وكال : هسه غير نوصل القاط خنكني
اخر شي باوعلي عاكد حاجبة وكال
.. ليش الفتحة مال بدلتج جبيرة صدرج طالع انه شكتلج ؟ مو كلت لا تأجرين هيج موديل
درت وجهي ما رديت وبحلكي علج دا اعلج كلي
.. جيبي العلج
مدري شبيه اعصابة صارت براسة ، يريدلة حجة حتى بس يتعارك .. قبل لا نوصل دارلي وكال
.. ما اوصيج عود من نوصل وكولي نعسانة .. الليلة ماكو نوم
وصلنة للبيت وكف السيارة ونزلني والسيارات بدت تجي ورانة ، ذبحوا جوة رجلي ذبيحة ودخلت لبيتي
الله وحدة اليعلم بفرحتي بذيج الساعة .. دخلني جوة وما عافني ابد عيونة تتشرب تفاصيلي بحب ولهفة
محد اجت من النسوان ، البيت فارغ بس احنه بيه وهو طلع يشوف الناس ..
اللي ما ضلوا الا جماعتة عرفتهم من شواربهم وقلة قليلة من الكرايب
جنت باسعد لحظات حياتي وعيوني تتنقل على كل تفصيلة بالبيت .. شلت البدلة وصعدت الدرج فتت لغرفتي
ابتسمت من شميت ريحة عطرة تارسة الغرفة واباوع لنزلة العرس اللي منورة الغرفة ، بلونها الاوف وايت
نزعت البدلة بعد معاناة وفتحت تسريحتي ومسحت المكياج ودخلت سبحت ، .. طلعت لابسة تراك مال بيت
وانشف بشعري لكيتة كبالي
فتح عيونة على وسعهن من شافني ..
ونظراتة تتنقل بيني وبين سيت العرس اللي معلك باستغراب
رفع حاجبة وكال
قسور: عود عبالج اعوفج بهاي حركاتج ؟
مشة للباب قفلة ودارلي .. والله لطلع حركة كَلبي ونكد ايام الخطوبة كلها بيج
بلعت ريكي بخوف ومتمتت
لبوة: ق ققسورر....
قاطعني
قسور: احترك قسور وعشيرة قسور وشيبات قسورر
حجاها وتقرب عليه سحبني اله ووهجم على شفايفي
.. وخر مني بعد لحظات التقط انفاسي ومذبل جفونة
قرب وجهة ويتحسس بشرتي بأرنبة انفة ويطبع بوسات خفيفة على خدي ..
رجع دنك يريد يبوسني خليت ايدي منعته واحجي وياه
لبوة: قسور بس خلي احاجيك
قسور: راح اسب حتى اسمي .. شبيج
بتردد تقربت وهمست باذنة ..
رفع راسة حسيتة انصدم ، كال
.. صدك لو تشاقين ؟
سكتت ما رديت ودنكت راسي افرك بايدي ..
باوعتله شفته ضاج ومسح على وجهة بحيرة
لبوة: ضجت مو ؟
جرني شبكني وكال
قسور: هي صح دكة ناقصة .. بس نصبر جم يوم جا شبيدنة
باوعلي وحاوط وجهي بكفوف ايدة وكال
.. اهم شي الليلة انتي تنامين بحضني هاي تسوة عندي الدنيا وما بيها
ومر هل يوم واني بحضنة وكعد يسولفلي وساعة يتغزل وساعة يغنيلي لو يشعر ..
واني هايمة بيه وبكل لمسة منه ..
و3 ايام ناس تروح وناس تجي ، البيت ما فرغ من الخطار وخاصة جماعتة بيهم اجوا محافظات
والهدايا متكومة واحير وين اخليهن .. حتى اجهزة جايبين كلنة نبيعهن ونتصرف بفلوسهن احسن ما يضلن مكومات
لحد ما خفت شوي رجل الخطار وبدة هو يطلع للشغل ويرجع لليل يشبكني وينام ..
وضلينة على هل حال اسبوع ،
لحد ما بيوم جنت ستوني طالعة من الحمام لابسة دشداشة قصيرة للنوم وكاعدة كبال المراية
لمحتة واكف بالباب منتجي وايدي بجيب البجامة ولابس فانيلة سودة ، تنهد وكال
قسور: ما خلص الحصار ؟
توترت وسويت نفسي ملتهية اختار عطر .. ميدري صار يومين من غسلت
ما حسيت عليه الا وهو واكف بوراي وكومني لمستواه .. ايديه حاوطت خصري
.. وتالي نشوف دربنة لو شلون
لبوة: لا حبيبي ميصير مو هسه
قسور: ليش ؟
لبوة: يكلك لازم ورة 3 ايام من العذر الشرعي يلا تصير علاقة بين الزوجين
قسور: منو هذا الكال ؟ خلي اروح اشك حلكة
لبوة: دكاترة يكولون مو اني
خله راسة بركبتي ويحجي بتعب
قسور: ولج بوية موتيني .. منين ما اجيبج ما تجين وانه ما رايد اجبرج على شي .. ارحمي بحالي ولجج اسبوع تفترين كبالي كوة لازم روحي عنج
اباوعلة .. صدك تعبان يرجع تالي الليل يلكاني نايمة ولهسه مشايف مني شي ..
وكفت على رجلة وحاوطت ركبتة ، طبعت بوسة بطرف شفايفة
جانت هل حركة بمثابة الزر الاخضر الة .. سحبني اله اكثر ويتعمق ببوساتة ،
شالني من ع الكاع ومشة بيه للجرباية......
... ومن هل ليلة بدت حياتي الفعلية كزوجة
......
دخلت للبيت ، تلكتني امي من الباب
عفتها ومشيت للصالة متجاهلها
كعدت ع التخم ورجعت راسي ليورة ومغمض عيوني
اجاني صوتها
أميرة: شبيك يمة .. راسك يوجعك ؟ شو وجهك مصفر
يوسف: راااسي راح يطك .. جيبيلي حبوب وجع راس اي شي عندج خلي اسكن عليه بلكي انطمرلي ساعة
أميرة: اسم الله عليك ليش هيج تحجي .. هسه اشوفلك حبوب
راحت للمطبخ واني مدنك افرك براسي
.. رجع ليث للبيت يحجي وياي كلمة اردها وعشرة لا
ليث: شبيك شو وضعك ما يعجب
يوسف: تعبان
ليث: انت هم انطي لنفسك مجال شوية .. تصبح شكالت العيادة وشحجوا المراجعين خليلك فد معاون لو تدخل واحد شراكة وياك وتتناوبون عليها
اجت امي كالت
أميرة: ديلا عيني ما دام اجيتوا راح اصب غدة بين ما تبدلون
يوسف: اكلوا انتوا بالعافية اني صاعد انام
أميرة: الغدة كامل بس اصبة .. تغدة واصعد نام
يوسف: مالي نفس والله راسي صاير طابوكة ما اعول اخلي ع المخدة
عفتهم وصعدت لغرفتي .. طبيت سبحت وطلعت راسي مبلل شغلت التبريد وجريت التليفون ، شفت وتين دازة مسج ( اذا ترجع خابرني )
مالي خلكها كضيت وقفلت الجهاز .. ونمت
ما كعدت للمغرب على صوت القرآن يقرة وصوتة عالي
.. وامي شغلت الاضوية وفاتت تكعدني
أميرة: دكوم يا يمة متصلح نومة المغرب
خليت ايدي على اذني وصحت
يوسف: طفي هذا الخ** لا اكوم اكسرة
ضلت صافنة
أميرة: يا ولك شجاك ؟ اتعوذ من الشيطان وكوم حرام تحجي هيج قرآن هذا
يوسف: رحمة لله عوووفيني بحالي .. موتوووني طلعتوا روحي
كمت اصيح واركع بالباب وامي تخبلت من شافتني ..
اجه ليث جرها وطلعها ركعت الباب حيل طفيت الضوة
وظلمت الغرفة .. صرت كبال المراية واسمع صوت نفس بالغرفة
......
نزلنة من السيارة ركضنة للبيت
.. الباب جان مفتوح
صارت بوجهنة تبجي وتستنجد بينه : فدوووة اروحلك خووية وليدي راح يروح من ايدي
تحجي وتأشرلنة فوك صعدنه الطابق الثاني وصرنة كبال الغرفة .. ندك الباب نصيح ماكو رد
لحد ما اشرت لعمي حتى نكسر الباب
دفعتة اكثر من مرة لحد ما طك القفل وانفتح!..
دخلنة بسرعة وتجمدت بمكاني بمنظر الحبل اللي متعلك بالبنكة..........................................
❄️❄️❄️❄️❄️❄️❄️
توقعاتكم?؟