تعليق وتصويت وتعليق بين الفقرات اريد تفاعل قوي حتى انزل بارت جديد ..اليوم نزلت بارت طويل كلش تعويض الكم لان البارحه مانزلت .. اذا شفت تفاعل قوي استمر بالكتابه أكثر بس اريد تشجيعكم ..
...
تُقَيَّضُ لي مِن حَيثُ لا أَعلَمُ النَوى وَيَسري إِلَيَّ الشَوقُ مِن حَيثُ أَعلَمُ وَإِنّي
لَموقوفُ الضُلوعِ عَلى هَوى مُبَتَّلَةٍ تَنأى ضِراراً وَتَصرِمُ خلَت، ورأتْني مُغرَمًا فتَجنَّبَت وشتَّانَ في حُبٍّ خَلِيٌّ ومُغرَمُ!
...
#البحتري✍️
سالي ..بقيت ساكته ماجاوبته وصلنه للبيت ونزلت من السياره وطبينه للبيت .
. وجان اسمع صوت صياح وعركه بلبيت وزلم بالصاله .. ركضنه اني ومنقذ نشوف شكو وجان أنصدم من الشفته ..
...سالي ..شفت بابه وعمو مهند جايين ويصيحون وخاله زحل لابسه عبايتها وواكفه تحجي وياهم وغمار كاعد عالتخم وحاط ايده الثنين على اذانه ساد أذنه بيهن من الصوت العالي ..
..كام يصيح بابه بصوت عالي وكال.
..ياسين ..اليوم مااطلع منا إلا اخذ بنتي وياي شنو لعب هيه خوما لعب شلون تتزوج بدون موافقتي والله إلا اسويها كعدة عشاير شنو ماكو زلم توكف وتحجي وياي جيبولي بنتي لا احرك البيت على راسكم ..
....سالي ..اول ماطبينه منقذ راح يركض على غمار سحبه من ايده وطلعه كعد بالمطبخ وانطاه موبايل وهتفون حط الهتفون بإذنه وكاله اسمع نشيد او اي شي .. حتى ميخلي يسمع العركه والصياح.
خلص من غمار وراح يركض للصاله وكام يصيح بصوت بحيث سكت بابه وعمو مهند من حجه وكال ..
....منقذ ..اوكف عيني اوكف .. منو هذه اليسوي كعدة عشاير تره انته محگوگ اليه مواني
..انته متعدي على بيتي وعلى حرمة بيتي ودايس البيت ومابي زلم بي ولد مريض ونسوان واحنه ناس ساده وجدنا رسول الله يعني انته متعدي على بيت السيد اني اسويها كعده
انطيك عطوه تحضر عمامك وخلي الكبار هاي اذا عندكم كبار هيه التحكم بيني وبينك .. ويلا من غير مطرود تفضل بيتي يتعذرك ..
....باوع عليه بابه وكام يصيح وكال ..
....ياسين ..ولج تكسرين عيني كدام العشيره ياس*** شلون تتزوجين بدون موافقتي اليوم ادفنج وانتي عدله امشي كدامي بسرعه اطلعي ....
...اجه بابه يمشي بسرعه باتجاهي وراد يسحب ايدي ... منقذ وكف كدامي ودفعه بيده الثنين حيل وگاله ...
....منقذ ..وخرررر ايدك اذا تمدها عليها اكسرها والكعبه الشريفه ..
...كام يحجي بعصبيه منقذ وهوه يأشر بيده عليه وكال ..
...منقذ ..هاي الي تكول عليها كسرت عينك كدام العشيره ..تزوجت اخويه المريض واختارت تعيش ويه شخص عليل وبي أكثر من مرض وتصير ممرضه اله ..
وجان المقابل أنه اني اسويلك عمليه لگلبك يعني تزوجت حتى تنقذ حياتك بنتك ضحت بحياتها لخاطر انته تعيش .. وهسه جاي تصيح عليها وتتهمها بشرفها؟؟
....منقذ ...والكعبه الشريفه اذا رجال طالع من ضهر رجال يمد ايده على سالي إلا ادفنه بمكانه
.. سالي صارت زوجة اخويه بالحلال وبالشرع روح بلغ عشيرتك وخلي الزلم تحجي وياي مو انته جاي هداد عالنسوان .. يلااا بره يلاا
....سالي ..اني بقيت بس ابجي واشهك ماكدرت احجي ولا كلمه الموقف صدمني ماتوقعت بابه يصير ضدي واني كلشي سويته لخاطره عبالي رح يجي يواسيني مو يتهمني هيج اتهام ..
....طلعوا بابه وعمو مهند وعيونهم عليه وتجدح نار .. اني كعدت عالقنفه وحطيت ايدي على وجهي وكمت ابجي واشهك ماكدرت احجي..
بهيج موقف شحجي وشكول مااعرف ... وابويه فشلني كدام الناس الغربه .
. بهاي الأثناء ..كامت تحجي خاله زحل بعصبية وكالت ..
...زحل ..شفت ؟ شگلت اني موگلت هاي البنيه وراهه مشاكل ؟ متسمع كلامي اوووف منك منقذ اووف رح تصير عشاير من وراك ووره عنادك ...ولك يمه خلي اخوك يطلگها ورجعها لاهلها مابيه حيل يصير عليك شي لو على اخوك .. اسمع كلام امك لاتشلع كلبي ..
...منقذ ..يمه الله يخليج عوفي هذه الحجي ميجيب نتيجه وياي ..سالي زوجة غمار محد اله شي يمنه تره وابوها هوه المعتدي مو احنه هوه تعده على بيتي يعني بالعشاير وبالقانون هوه غلطان مواني .
.ف سدي الموضوع وكافي لان اني تعبان ومانايم وبليل عندي خفاره رح أتغده وانام حتى ارجع للمستشفى بليل ..
....باوع عليه منقذ وكال ..
...منقذ ..كومي سالي عليمن تبجين يمعوده .. هسه كم يوم ويبرد ابوج من العصبيه واني بنفسي اروح احجي وياه وافهمه كلشي لتخافين .. كومي يابه ..كومي لغرفتج ..
...سالي ..كمت اريد اروح لغرفتي وتذكرت غمار بالمطبخ رحت للمطبخ شفته بيده الموبايل وحاط هتفون بأذنه احجي وياه ميرد عليه تقربت منه وحطيت ايدي على چتفه من وره هوه فز ووكف من حس بيه وخر الهتفون بسرعه وكال...
....غمار ..شبيج ؟ شصار ؟
...سالي ...شبيه ماكو شي اجيت اشوفك محتاج شي مني ؟
...غمار ..لعد ليش تبجين ؟..
...سالي ..ماابجي ماكو شي ليضل بالك ..عوفك مني ..انته اكلت شي تغديت ؟
...غمار ..لا بعدني ..
....سالي ..يله هسه بس اغير ملابسي واجي اصبلك غده حتى تأخذ علاجك ..
...سالي ..عفته ورحت للغرفه طبيت نزعت ملابسي والشال وابجي بدون صوت بس دموعي تشرح حالي
.. لبست ثوب مال بيت ولميت شعري ولبست شال ردت اطلع وصلت للباب وجان اتذكر ماعزلت الغرفه رجعت لميت ملابسي وعزلت الهوسه وضميت الكتب الي اشتريتهن بكنتوري ..
وكمت اريد اطلع .. جان يطب غمار للغرفه وعينه عليه .. تقرب مني وكال ..
...غمار ..شكو شصار قبل شويه ابوج ليش جان يصيح ؟
.عيني بالكاع وكلتله.
...سالي ..ماكو شي ليضل بالك هوه هسه عصبي كم يوم ويهدأ ..
...غمار ..شلون ماكو شي وهوه اجه يصيح ويتوعد وانتي هسه تبجين .
..شنو هوه مموافق على زواجج مني ؟ لعد انتي موكلتيلي اهلج وافقوا؟
...ابتسمت وكلتله ..
...سالي ..والله ماكو شي كلتلك ليضل بالك ..اني جوعانه رح اصب غده حتى تاكل وياي منا وهيج مااخليك تتغده وحدك خوش ؟
...حجيت وياه وعفته وطلعت من الغرفه بسرعه اريد انهزم من اسألته .. رحت للمطبخ شفت رفيف تصب غده وسلمت عليها ..
...سالي ..هلو رفيف شلونج ..
...رفيف ..هله بيج شخبارج
....سالي ..الحمدلله ..اريد أصب غده لغمار ..
...رفيف .. اي صبيله وتعاي حتى نتغده لان اني صبيت ..
...سالي ..لا اني آكل ويه غمار انتوا اكلوا بالعافيه ..
...رفيف ..ليش غير تكعدين ويانه؟
...سالي ..لعد وغمار يتغده وحده شلون ؟
....رفيف ..عادي متعود هوه من زمان ياكل وحده .. ميحب احد يأكل وياه ..
....ابتسمت وكلتلها ..
...سالي ..اي مثل ماتعود يأكل وحده منا وهيج يتعود آكل وياه .
...رفيف .. براحتج ..بس تره يتعب الأعصاب مراح تاكلين براحتج من وره الوساوس مالته ..
....سالي ..لا عادي اني اريد أكل وياه ..
....صبيت الغده واخذته بالصينيه ورحت للغرفه. طبيت شفت غمار كاعد عالقنفه وبيده الموبايل شافني وطفه الموبايل وحطه يمه عالقنفه .. تقربت منه حطيت الصينيه عالطبله وكلتله .
....سالي ..محتاج شي بعد اجيبلك ؟
...غمار ..لا سلامتج . اكعدي .
...سالي ..كعدت يمه اباوع عليه .. مد ايده اخذ كلينس مبلل وأخذ الخاشوكه وصار يمسح بيها بلكلينس .. ابتسمت وكلتله ..
...سالي ..انطيني الخاشوكه من رخصتك .
...باوع عليه وكال
...غمار ..ليش ..؟
...سالي ..اريد اغسلها هيه وخاشوگتي واجيبها حتى نأكل ..
...غمار ..لا اني اغسلها عوفيها ..كام وكف وبيده الخاشوگه راد يروح مديت ايدي وكلتله ..
....سالي ..عادي تغسل مالتي الخاشوگه وياك ؟
...مد ايده وأخذها مني بدون ميحجي شي وراح ..
...بقيت كاعده انتضره لما يجي وره كم دقيقه اجه وانطاني الخاشوكه وكعدنه ناكل . وكمت احجي وياه ..
...سالي ..غمار ؟
...غمار ..نعم
...سالي ..اريد أسألك سؤال بس خاف تضوج مني ..
...غمار ..اذا سؤال يضوجني ليش تسالين لعد ؟
...سالي ..عندي فضول اتعرف عليك .
...غمار ...ليش ؟
...سالي ..هيج موگلتلك فضول . يعني اني رح اعيش وياك ابيت واحد وغرفه وحده حاسه نفسي عايشه ويه واحد غريب كلشي مااعرف عنه ..عرفني عليك حتى نسولف ونتشاقه وتصير بيناتنه أمور مشتركه ..
...غمار .. شتردين تعرفين ؟
...سالي ..مااعرف براحتك انته شنو تكدر تحجيلي عن نفسك احجي .
...غمار ..اعرف بشنو تفكرين .
...سالي ..بشنو ؟
...غمار ..تردين تعرفين اني ليش هيج ؟ وشلون صرت هيج .
من كال هيج توترت حسيته يقره افكاري.
...سالي ..لا مااقصد اني بس..
...دااحجي وجان يقاطعني وعينه عليه وكال ..
...غمار ..اني ماجنت هيج . بس همه خلوني اصير ..
...سالي ..همه منو ؟ وشلون جنت انته ؟!
...غمار ..من جنت زغير جنت اتمنى العب ويه الجهال . وكلما العب شويه احس نفسي تعبان ومااكدر اتنفس
..واهلي امي وابويه كلما يشوفوني اركض يصيحون عليه ويمنعوني من الركض .
. لحد ماصرت انطوائي كمت مااحجي ويه احد ولا اختلط بالناس والجهال .. بعدين گامت تصير عندي نوبات الصرع ..
اذا اشوف هوسه لو انقهر لو مشاكل وصياح تصير عندي نوبات الصرع .. كاموا اهلي من يجون خطار يخلوني وحدي بالغرفه من اكوللهم ليش يكولون نخاف عليك من الهوسه والصياح تصير بيك نوبات الصرع .
. وإذا يشوفوني اساعدهم بلبيت لو اشيل غرض لو امشي بسرعه لو اصعد الدرج هم يمنعوني من اي شي
..اكوللهم ليش يكولون ..نخاف عليك گلبك تعبان وموزين عليك الإرهاق ..
بسبب مرضي كمت انطوي على نفسي اكعد بغرفتي دائما ووحدي صرت احس بالملل جنت اريد اسوي اي شي حتى التهي بي واتسلى
.. كمت اطلع ملابسي من الكنتور كلهن وارجع اصفطهن من جديد . واطلع الكتب وارجع اصفطهن من جديد . والزم وصله ومنضفات وامسح بالغرفه والأخشاب ..
وانضف الحمام ومن اخلص اطب اسبح وابقه بلحمام ساعه وأكثر ..جنت اكول المن طالع ابقه انضف بالغرفه ..محد اكو يسأل عليه .. حتلو ابقه شهر وحدي محد يتفقدني
..لحد ماصارت بيه عقده سالفة التنضيف .. جانت تسليه وصارت عقده كمت احس اي شي الزمه بيدي وصخ صار عندي هوس بالتنضيف اضوج من اي شي وصخ ..
.واهلي شافوني هيج تعودوا عليه وعرفوا طبعي بس محد كدر يتحملني ويتحمل تصرفاتي ...
....سالي ..ومن تخلص تنضيف وتعزيل شتسوي ..؟
...غمار ..اكعد ادرس بحيث ادرس الموضوع واحفضه قبل مينطي النه المدرس يعني اسبق المدرس بالماده ..
...سالي .. وبالعطله من يخلص الدوام شتسوي ؟
...غمار ..اقره كتب اخلص اغلب وقتي بالقرائه . احس الكتاب هوه صديقي ..بحيث اكدر انطي اسراري وأخذ منه اسراره واني مأمن من ناحيته مراح يفضحني لو ينطي سري لأحد ..
....سالي... تدري هاي النقطه مشتركه بيني وبينك .
...غمار ..يانقطه ؟
...سالي ..اني هم اقره كتب هواي . وماعندي صديقات ابد .
...غمار ..هاي نقطتين مو نقطه وحده ..
...سالي ..ههههههه هسه انته رح توكفلي عالحجايه ..
...غمار ..اي طبعا ميصير تگولين شي غلط ..
.باوعت عليه وكلتله .
..سالي ..بس احنه بشر والبشر يغلطون عادي احنه مو معصومين ..
...غمار ..بس الله انطانه عقل وبهذه العقل نكدر نمييز الغلط من الصح... اذا عقلج سليم ويشتغل بطريقه صحيحه .
.ليش تختارين تكونين على خطأ .. وتعوفين الصح .. انتي مخيره ولستي مسيره ..
.ضحكت وكلتله.
...سالي ..ياابووويه منك الله يساعدني عليك .. انته دقداقي حيل .. شلون رح اعيش وياك ..
....ابتسم بوجهي وكال ...
...غمار ..يله يله انسحبي من الرهان حتى اني افوز .. موكلتلج مراح تتحملين طبعي ..
...حطيت ايدي على خصري وقربت راسي عليه بحركه عفويه وكلتله..
...سالي ..لابله خاف اخسر وتزعل ..بابه اني سالي ..بعدك متعرفني ..اني دائما الفوز يكون حليفي .. واني رح افوز بالرهان وهسه تشوف ..
....ضحكنه سويه اني وياه . وجان يضحك وعينه عليه وكال.
....غمار ..رضيت الفضول مالتج لو بعد عندج أسأله ؟
...سالي ..سؤال اخير ..
...غمار ..جواب اخير ..
...سالي ..ليش دتحجيلي عنك واني البارحه أجيت شلون تأمن بيه وانته متعرفني ..
...غمار ..لان الي حجيته مو اسرار اغلب الي يعرفوني يعرفون هاي الأمور عني ..
...سالي ..بس اني مو من الي يعرفوك ..
...غمار ..صح ..بس بما أنه رح تعيشين وياي ..لازم تعرفين أنه الشخص الي عايشه وياه مريض حتى تعرفين شلون تتعاملين وياه .
...سالي ..اذا قصدك على گلبك لان ضعيف .. فهذه شي بيد رب العالمين يعني منكدر نعترض على حكم الله وانته رجال مؤمن وتصلي واكيد تعرف بهذه الشي...
وإذا على نوبات الصرع ..نكدر نتفاداها يعني اي شي يعصبك أو يزعلك نبتعد عنه .
. أما اذا قصدك على الهوس مال تنضيف العندك ..فهذه مو هوس ..انته دتسوي هيج من الفراغ الي موجود بحياتك ..
مجرد ماتلگه شي يسد هذه الفراغ رح تنسى موضوع النضافه ..
...باوع عليه وكال .
...غمار ..وانتي رح تسدين هذه الفراغ ؟
ابتسمت وكلتله.
...سالي ..اذا وجودي بحياتك يساعدك حتى تعيش بشكل طبيعي ..عادي سد الفراغ العندك بيه ..
...نزل عينه بالكاع وكال ..
...غمار ..وشنو ذنبج تعيشين ويه هيج واحد ..
...ضحكت وكلتله ..
...سالي ..اذا القاضي راضي انته ليش ضايج ..ههههههه ..
....بقه يباوع عليه ويبتسم .
...كمت اخذت الصينيه مال الغده واريد اطلع باوعت عليه وكلتله ..
...سالي ..تشرب چاي لولا .
...غمار ..لا مشكوره .
...سالي ..رح اودي الصينيه واجي اذا تحتاج شي صيحني .
...سالي .... طلعت للمطبخ حتى أعزل المواعين ..دااعزل بيهن وجان .. تطب خاله زحل شافتني بالمطبخ وكالت . .
....زحل ..ليش يمه مااجيتي تتغدين ويانه تستنكفين حضرة جنابج ؟
...سالي ..لا العفو خاله ..بس اكلت ويه غمار لان ميصير ياكل وحده خاف يضوج ..
...زحل ..وانتي البارحه اجيتي وشايله هم غمار خاف يضوج خطيه ..
...تقربت مني وتحجي وياي بتحذير وكالت ..
...زحل ..اسمعي ولج ..انتي يالفگعه .. تره كلها كم يوم ويطلگج وترجعين منين مااجيتي خوش
.. موعبالج تبقين هنا ..اني اخاف على ولدي ومامستعده بسبب مشاكلج انتي واهلج يصير عليهم شي افتهمتي لولا .
....حجت وياي وعافتني وراحت .
...اني كمت انضف المواعين ودمعتي نزلت انهضمت من كلامها اليسمعها يكول اني أجيت هنا بإرادتي ..تره اجيت مجبوره لوما عملية ابويه جان هسه اني يم اهلي ..
...خلصت المواعين ورجعت للغرفه .. طبيت واني ابجي .. شفت غمار ماكو كعدت عالقنفه وحطيت ايدي على وجهي وكمت ابجي بحرگه..
بهاي الأثناء رن موبايلي باوعت شفته اتصال من مامه ..
...مسحت دموعي وفتحت خط ..
...سالي ..الوو هلو مامه شلونج حبيبتي .
...كفاح ..هلو سالي مامه شلونج شلون صحتج .
....سالي ..بخير الحمدلله شخباركم انتوا
...كفاح ..والله بالي يمج مامه الليل كله مانمت وافكر بيج والله . شلونج خوما احد يسمعج حجي منا منا ..
....سالي ..لا مابيه شي لتفكرين بيه ونامي حياتي كلشي ماكو ..
...كفاح ..شلونه ابنهم وياج سمعت اخوه يكول ياخذ مهدئات خوما يسويلج شي ديربالج مامه .
...سالي ..مامه ابنهم اله اسم ..غمار ..ومابي شي بالعكس انسان مثقف وحباب بس اهله مسوينه وحش .. من تتعرفين عليه رح تحبي ..
...كفاح ..شو صايره تدافعين عنه ولج شبسرعه البارحه رحتي يمه .
...سالي ..موقصة ادافع عنه مامه بس مو من المعقول انسان مثله وبثقافته وذكائه وشهادته ووسامته ودينه واخلاقه .
..تمسحون كل هاي الصفات الحلوه البي ..وتذكرون بس صفه وحده موزينه وهيه المرض مالته ..
هذه ضلم ومو من الإنصاف هيج واحد ينوصف بوصف هوه مايستحقه ..
....كفاح ..ولج سالي .. احجي الصدك خوما صار شي بينج وبينه شو ممرتاحه لكلامج ؟
...سالي ..لا مامه ماصار شي لتخافين يعني اذا احجي كلمة الحق يكون صار شي ؟
....كفاح ..والله ماادري شگولج يله المهم انتي مرتاحه وياه الباقي مومهم .
...سالي ..الحمدلله ..اكولج مامه بابه تره اجه وصار يصيح ويغلط وتفشلت كدامهم كلهم اتهمني بشرفي وكال كسرتي عيني .. فهميني شصار من رحت اني ..؟
...كفاح ..اتصل بيه وراد يحجي وياج وگال مهند نهى عليج اني كلتله سالي تزوجت وهوه تخبل اجه للبيت يصيح ويغلط وعمج عزيز طرده وگاله روح لبيت عيالها وتفاهم وياهم بنتك شريفه وماسوت الغلط بس انته واحد ماعندك حظ وبخت وصار يحجي ويغلط وطلع من البيت بعد مدري شسوه .. جنت متوقعه يجيكم طبعا ..
...سالي ..زين هوه منين اندل بيت الدكتور شلون اجه .
...كفاح ..راح سال علدكتور بالمستشفى يمكن لان راد العنوان مني وكلتله ماانطي وكال اني اعرف منين اجيبه المستشفى موجوده وطلع .
....سالي ..اوووف تعبت مامه عود ردت اسوي شي زين شو كلها صارت ضدي وطلعت اني الموزينه .. ياربي شسوي ..
...كفاح ..يمعوده عوفي البسي الوضعيه ..انتي متزوجه بالحلال وابوج ميكدر يسوي شي وبالغه السن القانوني مو مراهقه يعني محد يوكف ويه ابوج .. وعشيرته الي يزامط بيهم خلي ينگعهم ويشرب ميهم ..
....سالي ...والله مااعرف شگولج الله يستر ..يله مامه سلميلي على عمو عزيز ورسل وكولي لرسل بليل اخابرها .. لازم اروح عندي دراسه بعدني ليهسه مادرست شي .
...كفاح ..يله مامه الله وياج ديربالج على نفسج واي شي تحتاحين خابريني الله عليج ..
...سالي ..صار ..يله باي ..
.......
سالي.....سديت الخط من مامه وحطيت راسي عالتكيه مال ضهر القنفه وجان اسمع صوت غمار ..وهوه يحجي فزيت عدلت كعدتي شفته واكف يم الباب مال غرفته وكال ..
...غمار ..عجبتني طريقتج بالدفاع عني.. بس ممجبوره تدافعين عني تره ..
...سالي ..مادافعت عنك حجيت كلمة حق . يعني اي واحد بمكاني جان سوه مثلي ..
...تقرب واجه كعد كدامي عالكرسي وعينه بالكاع وكال ..
...غمار .. لا مو اي واحد بمكانج يسوي مثلج .. اهلي ماسووا هيج وياي ابد وهمه اهلي ... وانتي غريبه ومتعرفيني وسويتي أكثر منهم ..
.... باوعت عليه وكلتله ..
...سالي .. تشوفني غريبه ؟
...غمار .. مااحب المجاملات خلينه نكون واقعيين.تره اني كلشي مااعرف عنج ..
...سالي ...صح كلامك. شتريد تعرف عني أسأل واني اجاوبك.
....غمار .. ليش وافقتي تتزوجيني ؟
...سالي ...مو سألتني البارحه وكلتلك اخوك خطبني الك واني وافقت ..
...غمار ..ليش وافقتي وانتي طالبة ماجستير وعندج شهاده وحلوه وتكدرين تتزوجين شخص احسن مني .. ؟
....سالي .. وليش انته شبيك ؟ شناقصك حتى مااوافق عليك ليش تشوف نفسك أقل من غيرك انته هم مو شويه ..
...فرك وجهه وضحك ورجع باوع عليه وكال ..
....غمار ...ههههههه مو گلنالج مااحب المجامله مصره تحجين بهاي الطريقه ..
...سالي ..شوف غمار ..اني مدااجاملك اذا انته تشوف نفسك شي قليل فأكو غيرك هواي يتمنون يكونون بمكانك .. خلي ثقتك بنفسك عاليه شويه ميصير هيج تره ..
....غمار .. منو هذه اليتمنى يعيش بمكاني بله ؟
...ضحكت بنفاذ صبر وكلتله .
...سالي ..هههههه ياصبر ايوب ..شبيك غمار ..ليش هيج تسوي تره انته بيك هواي صفات حلوه خليك واثق من نفسك .
...غمار .. جيبيلي واحد يشوف بيه شي حلو قنعيني بكلامج مو بس حجي مسفط ..
....سالي ...تريد اقنعك بكلامي ؟
...هز راسه بالموافقه ..
...سالي ..گوم بدل ملابسك خلي نطلع ..
...غمار ..وين نطلع ؟
...سالي ..بس گوم حباب بدل ملابسك حتى نروح لمكان اشوفك شكم واحد يتمنى يعيش بمكانك .
...غمار ..رح اطلع ولو اني صارلي هواي مطالع لمكان غير الكليه مالتي .. بس رح اسمع كلامج هالمره تعرفين ليش ؟
...سالي ...ليش
...غمار ..اذا طلعت وياج وماقنعتيني بوجهة نضرج .. ارجع للبيت اشبعج جلاليق والكاظم ..
....سالي ...ههههههههه ميخالف موافقه اذا ماقنعتك عود شبعني جلاليق .. يله امشي نبدل ملابسنه ونطلع ونشوف لو اني لو انته ..
.........
...سالي .. راح يبدل ملابسه واني طبيت اخذت ملابسي وطبيت للحمام أبدل ولبست شال وفستان وردي وحطيت مكياج بسيط كحله ومورد مال خد وحمره ورديه فاتح وطلعت للغرفه
شفته لابس .. بنطرون جينز لونه كحلي وقميص هم جينز لونه ثلجي وواكف كدام المرايه يمشط شعره ..
مديت ايدي اريد اخذ العطر مالتي وجان يمد ايده بسرعه وأخذه قبلي وحطه بعيد عني .. وبقه عينه عالمرايه يمشط وكال ..
...غمار ..عوفي العطر لاتحطين منه هذه ..
...سالي ..ليش لعد شلون اطلع بدون مااحط عطر ؟!!
...غمار ..عود من نطلع اشتري عطر هاديء عوفي هذه لتحطين منه
...سالي ..تره العطر نسائي يعني هاديء .
....غمار ..ميخالف غيري اشتري غير ماركه .
...سالي ...اي ليش غير افتهم اني احبه هذه .
حط الفرچه مال شعر عالميز وباوع عليه وكال.
...غمار... واني مااكدر امشي وياج والناس تشتم بعطرج .. اذا تحطين منه مااطلع وياج طلعي وحدج .
...سالي ..اوكي ماشي عوفه مااحط اليوم منه ..
...غمار... لا اليوم ولا غير يوم .. هسه نطلع وتشترين ماركه ثانيه عوفي هاي الماركه .
...سالي ...ههههه اوكي ميخالف . حجيت وياه وهزيت ايدي وكلتله.
....سالي ..والله مااعرف شلون تفكر .. خلاشوف تاليها وياك ..
.صار يعدل بالردان مال قميصه وكال .
..غمار ..تاليها تتخبلين وتصيرين مثلي حالج من حالي.
باوعت عليه بنضره جديه وكلتله..بنتره ..
...سالي ..غمار ..كافي عاد تره انته مو مخبل حتى اتخبل وياك .. انته عاقل وعقلك يوزن بلد ..
...غمار ..خوش يله امشي نطلع خلاشوف وين رح تاخذيني اليوم امشي وراج اريد اعرف وين تردين توصلين ..
...سالي ..يله امشي نروح .. داامشي وجان اوكف وكلتله ..
...سالي ..غمار ..سؤال ؟
... غمار ..سالي جواب ..
...سالي ..شنو يعني فگعه ؟
...ضحك وكال ..
...غمار ..هههههه منين جبتي هاي الكلمه ؟
...سالي ..دكول شنو يعني ليش ضحكت هيه غلطه لو شنو ؟
...غمار ..فگعه مصطلح باللغه الدارجه وباللغه العربيه اسمه (الافقع) والافقع تطلق على الشخص الشديد البياض ..
يعني انتي لان بشرتج بيضه اگولج انتي فقعه .. وباللغه الدارجه فگعه ..
...سالي ..هااا فهمت .
...غمار ..ليش تسالين منين سمعتي هاي الكلمه ؟
...سالي ..خاله زحل تصيحلي الفگعه ..
رفع راسه ليفوك وخرب من الضحك وكال..
...غمار ... ههههههههههه يابويه .. عاشت ايدج علويه . هم زين طلقت عليج لقب منا وهيج اصيحلج الفگعه .
...سالي ...لا غمار ممنوع والله تره ازعل عليك .استحي كدام اهلك يصيحولي فگعه شنو هاي .
....مد ايده كدامي وكال ..
...غمار ..ديله امشي كدامي يالخجوله خلاشوف وين نروح اليوم ..
...مشيت كدامه وهوه صار يمشي قريب عليه باوعت عليه وكلتله ..
...سالي ..شراح نكوللهم وين طالعين ..
...غمار ..وشعليهم بينه غير انتي طالعه ويه رجال شنو اني موبعينج ؟
...سالي ..لا العفو موهيج بس قصدي خاله زحل خاف تحجي شي .
...غمار ..امشي وانتي ساكته رجاءا ..
...سالي ..طلعنه وصلنه للباب الخارجي وجان غمار يصيح بصوت عالي وكال ..
...غمار ..يمه احنه طالعين اني وسالي ليضل بالج اذا نتأخر .
...سالي ..وصلت يم باب الكراج وشفت غمار.. طلع بصمه مال سياره من جيبه .. استغربت ماعبالي عنده سياره .. سألته ..
...سالي ..شنو هاي تعرف تسوق عندك سياره ؟
....باوعلي صفح وكال ..
...غمار ..تره مسويتني فد مره شنو اني طفل وهيج تحجين وياي اي طبعا اعرف اسوق وعندي سياره ..
...سالي ..لا والقران الكريم موهيج قصدي بس اني عبالي يعني بعدك ممشتري سياره بس دكتور منقذ عنده ..
...غمار ..اوكفي هنا لا تطلعين هسه خلي اديور السياره واجي ..
...سالي ..بقيت واكفه بالكراج . وهوه طلع وره دقايق اجه وكال ..
...غمار ..يله تعاي .
...سالي ..طلعت شفت سياره سوناتا بيضه .. صعدت يمه وهوه يسوق
..بقينه نمشي بالسياره ربع ساعة وهوه ساكت ماحجه شي .. اني عبالي زعل مني حجيت وياه وكلتله..
...سالي ..غمار ..خوما زعلت مني تره مااقصد والله بس اني لان اعرف بيك تحب تبقه بلبيت اكثر من الطلعه ماتوقعت عندك سياره ..
عينه عالطريق وكال .
...غمار ..ماصار شي حتى ازعل عادي ..هسه وين رايحين احنه ماكلتيلي ؟
...سالي ..اذا اكولك المكان الي اريد اخذك اله تروح اكيد ؟
...غمار ..لو مااريد اروح جان مابدلت ملابسي وطلعت وياج .. گولي وين ؟؟
باوعت عليه بتردد وكلتله.
...سالي .. انطيك عنوان لدار لذوي الاحتياجات الخاصة نروح نشوفه ..
...بقه مستمر ويسوق وجاوبني بكل برود وگال ..
...غمار ..ليش بالذات هاي الفئه من الناس تردين نروحلها .. عود قصدج تردين تقارنين بين مرضي وبين امراضهم ؟
...انداريت عليه وكلتله ..
...سالي ..غمار ..ليش كل كلمه والثانيه وتذكر مرضك ليش متتصرف وتعيش بشكل طبيعي حالك حال اي رجال عادي ..تره والله مرضك بالنسبه لهواي ناس مرض عادي ..
...باوع عليه وكال ..
...غمار ..ماجاوبتي على سؤالي ..
...جريت حسره قويه وكلتله..
....سالي ..اووووف .. اريد نروح لسببين اول سبب حتى تشوف الناس الي عدهم امراض اكبر من مرضك شلون عايشين وتحس بالنعمه العندك
وثاني سبب اني متعوده كل فتره ازورهم وأسلم عليهم وهمه يعرفوني حتى المديره مال الدار تعرفني يعني هاي مو اول مره اروحلهم ..
...غمار ..اوكي نروح ونشوف شيصير .
...سالي... مشينه بالسياره تقريبا أكثر من نص ساعه لحد ماوصلنه للدار .. وصلنه وطبينه وسلمت على مديرة الدار وهيه بدورها رحبت بينه عرفتها على غمار وكلتلها ..
...سالي ..اعرفج ست كفايه .. هذه غمار زوجي ...غمار ..ست كفايه صاحبة ومديرة الدار ..
...كفايه ..اهلا وسهلا بيج وبزوجج والف مبروك حياتي سالي شوكت تزوجتي ..
.حجيت وياهه ولزمت ايد غمار .
..سالي ..الله يبارك بيج ست قبل فتره تزوجنه ..
...كفايه ..تفضلوا استريحوا شنو تشربون ..
...غمار ..لا مشكوره مااشرب شي ..
...سالي ..اشكرج ست احنه عدنه موعد مهم ومنكدر نتاخر بس اجينه نشوف الدار ونسلم عليكم ..
...كفايه .. لا لازم تشربون شي هسه اجيكم ثواني ..
...سالي ..أخذي راحتج ست ..
....سالي ..طلعت ست كفايه من المكتب ..وجان اشوف غمار حجه وياي بعصبيه وكال ..
...غمار .. انتي شلون تلزمين ايدي هسه شلون اغسل والمعقم والكلينس نسيتهن بالسياره خرب مصنمج ..شسوي هسه ..
...سالي ..شبيك تره ايدي نضيفه وإذا لزمت ايدك .
...غمار ..ثاني مره ممنوع تلزمين ايدي افتهمتي لولا..؟
...سالي ..اوكي اسفه بس لتضوج اعصابك ..
... سالي ..دنحجي اني وغمار ..جان تطب ست كفايه وشايله صينيه بيها عصير وقدمته النه .. واسمع غمار يحجي بهمس وكال ..
...غمار..انوب هاي الثانيه جابتلي العصير مدري منين ... شورطني وطلعت من البيت ...اني اعلمج سالي نوصل للبيت لولا اصبريلي ..
....سالي ..اني اسمعه وبالكوه لازمه نفسي مااضحك منضره جان يموت ضحك .
.خلصنه نقاش بخصوص الدار والي ساكنين بالدار احنه وست كفايه ووعدناهه نساهم بتبرعات للدار وحتى غمار .. وعدها يساهم وياي .
. وطلبت منها التقي بالناس الي عايشين بالدار ..طبيت عليهم وخطيه كلش فرحوا .. بينه بس وضعهم يكسر الخاطر ..
. كلهم عدهم مشاكل وأمراض الي عنده رجل وحده والي عنده شلل والي ايده معوقه واكو بيهم ماعدهم رجل أصلا ..
بقينه اني وغمار نسولف وياهم وغمار .. رغم جان بالگوه متحمل المكان لان يخاف من الوصخ والتلوث بس جان يضحك وياهم ويسولف حتى اني عفتهم وبقيت اباوع عليه شلون يضحك وجانت اول مره اشوف ضحكة غمار .. بيومها ..
...سالي ..خلصنه وسلمنه عالناس وطلعنه ...وصلت للسياره واشوف غمار .. راح يركض فتح السياره وطلع كلينس ومعقم وصار يمسح ايده ووجهه بيهن ومسح الايد مال سياره ..وصعد ..
... صعدت يمه واني صافنه عليه مد ايده عالبصمه وباوع عليه وكال ..
...غمار ..شبيج صافنه .
...سالي ..عود ليش هيج تمسح ايدك وإذا لزموك تره همه بشر مثلك مو تحس نفسك دتبالغ شويه ..؟
...غمار .. اعرف بشر بس اني بيه مرض مااكدر اذا احد لزمني احس نفسي توصخت ..
...سالي ..وإذا تتوصخ شنو يعني ؟ تره الوصخ ميسوي شي عادي انتضر من توصل للبيت وغسل ايدك ..
...غمار .. والله هذه اني وهاي طبعي لتسويلي نفسج مصدومه ومتدرين بيه ..
موانتي طلبيتي نطلع وهاي طلعنه ... وشفت الناس الي وضعهم اسوء من وضعي اذا خلص الدرس مالتج خلي نرجع للبيت ..
...سالي ..اني مااحجي بس عالناس تره حتى اني دتعاملني مثلهم قبل شويه لزمت ايدك وكمت تحجي وضجت ..وشكو بيها وإذا لزمت ايدك انوب حتى مني اني تتوصخ؟؟
...ضحك ضحكه استهزاء وكال ..
...غمار ...هه ليكون مشاعرج انجرحت لان كلتلج ايدج وصخه ..؟
خاف صدكتي نفسج مرتي وماادري تره انتي مهمتج تنطيني علاجي باوقات محدده لا زوجتي ولا هم يحزنون ..
...سالي ..من حجه وياي بهاي الطريقه كلش انهضمت منه ..اني اعرف زواجي منه قائم على اتفاق بس ماعبالي رح يجرحني هيج ..
...درت وجهي باتجاه الشباك مال سياره وكلتله ..
...سالي ..اي اعرف هذه شغلي ومهمتي ..ماكو داعي تگول تره ..يله خلنروح للبيت اني تعبانه واريد انام ..
...سالي ..بقينه ساكتين طول الطريق ...وصلنه للبيت وطبينه وجان اسمع منقذ يصيح وعصبي وامه تسكت بي وهوه يزيد بالصياح وكال ..
...منقذ .. شلووون تطلع هيه وياه بعدها متعرف تتصرف وياه بله صارت عنده نوبة صرع بالشارع شلون تتصرف ..
.انتي شلون تخليها هيج تسوي ...مو كايللكم عينكم على غمار .. گايل لو مگايل اني..
...سالي... اول ماطبيت كلهم عينهم عليه صارت ..منقذ وامه واخته
...وغمار ..واكف يمي ويباوع عليهم وسمع كل الكلام مال منقذ ...
...بسرعه وبدون مقدمات شفت منقذ اجه باتجاهي ورافع ابصعه يحذرني وكال ..
...منقذ ..شوفي سالي ممنوع منعاً باتاً مره ثانيه تطلعين ويه غمار وحدج .
..غمار مريض وانتي بعدج متعرفين تتعاملين وياه مفهوم ..
حطيت عيني بعيونه وكلتله..
...سالي... أولا ميصير ترفع صوتك عليه اني ماسويت شي غلط غمار زوجي وطلعت وياه
. ثانياً غمار مو مريض ..انتوا مرضتوا بهاي تصرفاتكم ..خليتوا يعيش المرض وينسجن بداخله .
..حتلو جان مريض المفروض نوفرله أجواء حلوه نخلي ينسى المرض . مو نحبسه بالغرفه وندفنه وهوه عايش
..يادكتور منقذ ..قابل اني اعلمك موهذه شغلك وانتوا الأطباء شعاركم المعروف نصف العلاج يكون نفسي والنصف الآخر جسدي ...
صار يصيح بصوت عالي وكال..
....منقذ ..شنو انتي البارحه اجيتي صرتي تعلميني شلون اتعامل ويه اخويه المريض .. شو مدري شلون تحجين ؟
...سالي ..رجاءا دكتور ..اسمه غمار وبس لتسمي غمار المريض .غمااار غمااار ارجوك ..
...بهاي الأثناء .. وجان اسمع رفيف تصيح وكالت ..
...رفيف ..غمااار غمااار شبيك ؟!
...سالي ..باوعنه على غمار ..جان اشوفه بالكاع امدد وجسمه كله ينتفض بقيت صافنه اول مره بحياتي اشوف نوبة صرع كدامي .
.منقذ من شافه بسرعه ركض عليه وفتح حلگه وحط اصابعه بحلگه وگام يصيح علينه ..
...منقذ ..جيبولي وصله او اي شي بسرعه وجيبو العلاج مالته بسرعه تحركوا...
...ركضت رفيف انطته الشال مالها كووره وحطه بحلك غمار بين اسنانه وره كم دقيقه هدأ غمار ووكف جسمه عن الحركه .
..منقذ من شافه سكت جر نفس قوي وكعد بالكاع يم راسه .. وصار يحجي وياه ..
...منقذ ..غمار ..حبيبي ..شلونك شنو تحس جاوبني ..
...حجى غمار بصوت تعبان وكال ..
...غمار .. مابيه شي لتخاف ..اريد اروح لغرفتي ..
...گام منقذ ولزم غمار من ايده وسنده على چتفه وأخذه للغرفه نومه بفراشه وانطاه علاج اني واكفه ودموعي تصب حسيت الي صار بي بسببي
. أندار عليه منقذ وعيونه تجدح نار وكال..
...منقذ .. تعاي بره شويه من رخصتج ..
....سالي..طلعنه وسدينه الباب على غمار .. ورحت للصاله .. لگيت منقذ واكف وحاط ايده على خصره اول ماطبيت اندار عليه وحجى بعصبيه وكال ..
....منقذ ..شفتي شصار؟ هذه غمار الي احنه مسوينه مريض بتصرفاتنه ...
تخيلي لو صايره بي نوبة الصرع وانتوا بالشارع شنو جنتي رح تتصرفين ها؟؟
...صارت بي بعد ماطبيتوا للبيت بدقايق يعني لو متاخرين دقايق بره جان صارت بره مو بلبيت .
. هذه كله صار بسببج انتي مهمله وانتي مسؤؤله عن غمار احملج المسؤليه كاملتآ ..
...حجيت وياه ودموعي تصب وكلتله ..
....سالي ..تره چنه بره وجان يضحك ويسولف مابي شي صارت نوبة الصرع هسه لان شافكم تصيحون بيناتكم ...
...منقذ ..يعني بعدج مصره احنه السبب ؟ بابه افتهمي غمار مررييض مريض اتقبلي الحقيقه عاد ..
.نزلت عيني بالكاع وكلتله .
..سالي ..اوكي مريض واني السبب واعتذر أن شاء الله متتكرر بعد ..هسه اكدر اروح ..
...منقذ ..انتبهي على علاجه اني هسه انطيته العلاج وعنده بليل جرعه ثانيه عود انطيها اله بالوقت المحدد لان اني اليوم رح ابات بالمستشفى عندي خفاره مااجي ..اعتمد عليج مو تنسين ..
...سالي ..صار ...رح اوقت المنبه على موعد العلاج ماانسه ..يله من رخصتك ..
..سالي ..رجعت للغرفه واني بالي يم غمار ..طبيت فتحت الباب على كيف شفته بفراشه تقربت منه وكلتله بصوت ناصي ..
...سالي ..غمار ؟ تسمعني ؟
...مارد عليه غافي .. عفته وطلعت نمت عالقنفه بره حتى مابدلت ملابسي من الموقف الصار كلش خفت كلت اذا صارله شي بسببي أكره نفسي .
. بقيت افكر وصافنه لحد ماغفيت من التعب ..
....وره مده من الوقت فزيت من النوم مرعوبه كمت اركض واباوع للساعه ..
...سالي ..عزه عزه راحت عليه النومه خرب حظي سالي ..شكد غبيه شيخلصني من منقذ اليوم ..
........................
يتبع ♥️
#زهراء_الطائي
تصويت + تعليق