تعليق وتصويت وتعليق بين الفقرات تقديرا لجهودي وحتى انزل بارت جديد باسرع وقت ممكن ..قرائه ممتعه ♥️
...
....
......
...سالي .. رجعت للغرفه طبيت شفت غمار غافي والكتاب بيده ومفتوح على بطنه تقربت منه اخذت الكتاب على كيف سديته وحطيته يم راسه وأخذت اللحاف غطيته بي طفيت ضوى الغرفه وطلعت للغرفه الثانيه مددت عالقنفه وافكر بحالي وشراح يصير بيه ..
واحجي ويه نفسي ...
.....سالي .. هسه اني شورطني ووافقت على هذه الاتفاق .. زين شسوي وعملية بابه منو يسويها
.. بس ذوله الناس مااعرفهم والله يعلم شراح يسوون وياي ..وهذه مدري شلون يتصرف شايل خشمه وماعاجبه العجب يتوصخ من الهوى ..
. والدكتور يستحرم من اضافيره كلما يشوفني يكول البسي الحجاب عدل .. عبالك مدري شكو
.. اووووف .. لو يرجع الوكت ليوره جان ماوافقت جان هسه ملتهيه بدراستي مو صايره ممرضه لولد بي عقد نفسيه ...
...سالي ..جريت حسره قويه وكمت كعدت .. رحت للغرفه مال غمار فتحت الكنتور على كيف طلعت المراجع مالتي ورجعت للغرفه الثانيه وكعدت ادرس عليهن حضرتهن هنه والاقلام وكعدت بالكاع ادرس
..بقيت تقريباً أكثر من نص ساعه ادرس .. جان اسمع الباب يندك .. كمت اريد افتحه وتذكرت منقذ رجعت حطيت حجاب على راسي وفتحت الباب
. لكيت منقذ واكف بلباب باوع عليه وكال ..
... منقذ ..عادي احجي وياج بخصوص غمار شويه ؟
....سالي ..اي عادي هوه نايم هسه
...منقذ ..زين تعاي بالصاله نحجي خاف يكعد ..
...سالي ..تمام هسه اجي بس الم اوراقي والكتب واجي ..
... سالي ..طبيت لميت الأوراق وحطيتهن عالتخم عدلت حجابي زين غطيت شعري كله وطلعت رحت للصاله شفت منقذ كاعد وبيده ورقه صافن عليها .. باوع عليه وكال ..
...منقذ ..تعاي سالي اكعدي ..
...سالي ..كعدت بالقنفه الكدامه باوع عليه وكال ..
....منقذ .. شوفي .. كلشي صار بسرعه والمفروض احجي وياج هذه الحجي كله قبل العقد مالكم بس مثل ماشفتي كله صار عالسريع وهسه رح افهمج كلشي يخص غمار ..
...سالي ..اي دكتور اسمعك ..
...ابتسم وكال ..
...منقذ .. كولي منقذ احنه بلبيت مو بالمستشفى هنا اسمي منقذ وبس..
...سالي ...اوكي ..
...منقذ ..شوفي سالي . غمار اخويه عنده وساوس يخاف من الوصخ ويضوج من المكان اذا يشوفه هوسه وممرتب .
يعني غرفته لازم دائما مرتبه ومابيهه اي شي مطشر بالكاع مثلا كتب او ملابس او اي شي دائما احرصي تكون الغرفه مرتبه ونضيفه
.. لان اذا شافها بيها وصخ لو هوسه رح يصير عصبي واحنه منريده يتعصب لان موزين على صحته .
.غمار بي صرع وإذا صار عصبي لو انقهر لو شاف كدامه عركه أو هوسه بلبيت تصير عنده نوبات الصرع واحنه منريد ترجعله ..
هوه هسه دياخذ علاج للصرع يعني مهدئات وعلاج لگلبه هم .. غمار عنده ضعف بعضلة القلب يعني ميصير يركض ميصير يصعد درج ميصير يشيل شي ثگيل ميصير يبذل اي مجهود يعني وضعه حيل حساس لازم تكونين حذره وياه بكل تصرفاتج ..
وهاي الورقه بيها مواعيد واوقات جرعات العلاج مالته احفضي المواعيد وتنطي الادويه بوقتها بالضبط وخاصتآ علاج الصرع ممنوع يتأخر عن موعده ولا دقيقه لان يأثر عليه نفسياً .. تمام ؟
...سالي ...زين هوه ليش هيج ؟ يعني قصدي هوه من انولد للدنيا هيج حياته لو شنو ممكن اعرف ؟
...منقذ ..غمار انولد للدنيا وهوه گلبه ضعيف يعني بي عيب خلقي عضلة القلب عنده ضعيفه ابويه الله يرحمه أخذه لهواي أطباء بس قبل جانوا يكولون مااله علاج هيه تروح منه بمرور الوقت ..
بس ماراحت غمار من جان بالمدرسه جان ميكدر يلعب طوبه ولا يركض ولا يبذل اي مجهود لان اقل مجهود يگوم يلهث ويصير عنده صعوبه بالتنفس ويصير عنده خفقان كلش قوي ...
...سالي ..وهاي بسبب گلبه هوه هيج عنده حب النضافه وصار بي صرع لو شنو ؟
...منقذ ..لا لا .. الصرع عدنه وراثه جان عمي الله يرحمه بي صرع ومن أجه للدنيا غمار عمره 4 سنوات واكتشفنه بي صرع
... وسالفة النضافه من صار مراهق گام يهتم بالنضافه ويحب يرتب غراضه ويصفطهن يعني من جان طفل ماجانت عنده هاي السالفه ..
...سالي .. خطيه حياته كلش صعبه ..
...منقذ ..لتكولين خطيه كدامه أو تنضريله بنضرات شفقه لان يتحسس ..
تعاملي وياه طبيعي كأنما شخص عادي حاله من حالج ..
...سالي ..اي طبعا .. بس هوه طبعه صعب يعني ميقبل الزم اي شي بالغرفه حتى اليده مال باب ميقبل الزمها شلون رح اتعامل وياه ؟
...ابتسم وكال ..
...منقذ ..بعدج اول يوم وياه وهيج تعبتي ..لازم تتعودين على اطباعه وتصرفاته وتتأقلمين وياهه ..
...سالي ..بس دكتور اني طالبة ماجستير يعني عندي دراسه شلون اكدر اخصص وقت اله ولدراستي ؟
...منقذ ...رتبي وقتج مثلاً ادرسي من ينام غمار مااعرف شلون انتي وشطارتج يعني ..
...سالي ..تمام ماشي ..
ضحك وكال..
...منقذ ..ههههه كولي إن شاء الله مو تمام احنه اسلام منين جايبه هاي التمام .
...سالي ..مااعرف اشوف البنات يگولنها بالكليه ..
...منقذ ..مو كلشي تشوفي بالشارع تاخذينه قدوه الج .. اكو ثقافات خارجيه دتدخل للعراق غايتها تنسينه ثقافتنه وديننا الإسلامي ..
...كام وكف كال ..
...منقذ ..يووو يرادلج هواي تعلوم انتي بيج شغلات كومه غلط .. الله كريم أن شاء الله تتعلمين كلشي
.. المهم هسه هاي الورقه احفضيها واهتمي بغمار ودراستج روحي نامي خاف تعبانه وإذا تحتاجين شي اطلبي من رفيف لو امي ..
....سالي .. اخذت الورقه من منقذ ورحت للغرفه .. فتحت الباب وطبيت شفت غمار كاعد عالقنفه الي عليها كتبي ولازم الكتب ويسفط بيهن واحد فوك الثاني والأوراق هم يرتبهن وحده وحده صفنت عليه شلون اله خلگ يصفط الاوراق ورقه ورقه
.. اني لو بمكانه صبري يخلص مااتحمل هيج شي ..
...تقربت منه وكلتله ..
...سالي ..شدتسوي؟ هاي كتبي مال دراسه .
...عينه عالكتب وكال .
...غمار ..تدرسين ماجستير بعلم النفس ؟
...سالي ..اي
...غمار ..ليش اجيتي لهنا ؟
...سالي ..من سألني بقيت متردده مااعرف شجاوبه .. قبل مااحجي رفع راسه وباوعلي وكال..
..غمار...شلون عرفتي منقذ وليش وافقتي عليه ..
...سالي ..اريد ارد عليه رجع سألني ...
....غمار ..شكد رح تبقين هنا ؟
...سالي ..تعبت من سرعته بطرح الأسئلة وحجيت وياه بنتره وعصبيه وكلتله ..
..سالي ..اوكف لحظه شبيك انطي صبر ارد عليك سؤال بضهر سؤال شنو اني بامتحان ؟
باوع عليه وكال.
...غمار ..مو اني سريع بطرح الأسئلة انتي بطيئه بالفهم .
...سالي ..لابله هاي منو كال اني بطيئه بالفهم ..بس انته متنتضر ارد عليك بسرعه تسأل سؤال ثاني ..
...غمار ..يله سكتت جاوبي ..
...سالي ..كعدت عالقنفه الكدامه وكلتله ..
...سالي ..اني اسمي سالي .. خريجة بكلوريوس آداب قسم علم النفس .. وحالياً طالبة ماجستير سنه اولى بعدني
..واجيت هنا لان الدكتور منقذ خطبني شافني بالمستشفى وخطبني الك واهلي وافقوا ..
...غمار ..وانتي ؟
...سالي ..اني شنو ؟
....غمار ..هم وافقتي؟
...سالي ..لعد شلون اجيت لهنا اذا مموافقه؟
...غمار..لعد ليش بجيتي ذاك اليوم من اجيت لبيتكم من سألج منقذ موافقه لولا كلتي موافقه بكيفكم ونزلت دمعتج؟
...سالي .. وانته شلون شفتني ابجي ؟
...غمار ..شنو شلون شفتج غير جنتي كاعده كدامي ..
...سالي ..بس انته مارفعت راسك ولا باوعت عليه ابد ..
...غمار ..شمدريج ماباوعت ؟ تردين اكولج شنو جنتي لابسه وشنو حاطه مكياج بيومها ؟
...سالي ..من كال هيج عبالي يجذب عليه چتفت ايدي وكلتله .
...سالي ..ايي بله گول شنو جنت لابسه بيومها ..؟
...غمار ..جنتي لابسه فستان لونه كريمي ..ووياه شال كريمي غامق ومصبغه اضافرج لون بصلي وثاني اصبع البنصر مصبغته ابيض
.. وحاطه عطر كوكو شانيل الوردي ..
وحاطه بس كحله ببطن عينج ماحاطه مكياج بيومها وجانت عندج حبايه طالعه يم خشمج وجنتي متوتره وتبجين بيومها ..
....سالي ..من كال هيج بقيت صافنه عليه وفاتحه حلگي.. حتى اسم العطر مالتي يعرفه هذه شلون عرف .. باوعت عليه وكلتله .
...سالي .. شلون عرفت اسم العطر مالتي ولونه؟
....رفع حاجبه وكال ..
...غمار...يعني انتي ماضجتي من الحبايه الي شفتها يم خشمج استغربتي من لون العطر واسمه ؟
غير من العطر اعرف اسمه موجنتي حاطه منه واشتميته من طبيتي علينه ...يرادلها ذكاء ؟
...سالي ..لا بس استغربت هواي مركز على شغلات بسيطه انته ليش هيج دقيق بكلشي ؟!!
...كام وكف وحط ايده بجيوب البجامه وكال .
...غمار... كمليها ليش جملتج ناقصه؟
...سالي ..شلون يعني ناقصه شكمل؟
...غمار ..كولي ليش دقيق بكلشي وعندك وسواس.
...سالي ..لا اني ماكلت هيج كلت دقيق ماكلت عندك وسواس..
...غمار ..بس اني عندي وسواس ماكو داعي تحسين بالذنب .. والناس كلها تعرف ..
...سالي ..اني معليه بلي تعرفه الناس اني عليه بللي اني اشوفه .
...اندار عليه وعقج حواجبه وكال ..
...غمار ..وانتي شنو تشوفين؟
...كمت وكفت كدامه وكلتله ..
...سالي ..اني اشوف رجال شاب بأول عمره وذكي ووسيم وعنده صحه وعافيه وديدرس وبعد كم سنه يتخرج ويصير احسن مهندس معماري
.. ضحكت وكلتله.
سالي...ولو التعيين صعب بالعراق بس للي عنده واسطه بس ميخالف اسمك مهندس هههههههه .
...ابتسم بوجهي وكال ..
...غمار ..هذني كلهن تشوفيهن بيه ؟!
...سالي ..مواني اشوفهن هنه موجودات بيك هاي مواصفات غمار ..ماجايبه شي من عندي .
...باوع للكاع وكال ..
...غمار ..عالعموم ..اني اعرف بيج مجبوره على هذه الزواج .
. اكيد جنتي راسمه زوج المستقبل بغير صوره وتزوجتي واحد مثلي ..
ليضل بالج الزواج عالورق وبس وإذا تردين تعرفين السبب اسألي دكتور منقذ الي خطبج اليه هوه يفهمج ..
...حجه وياي وعافني وطب لغرفته وطبگ الباب وراه .
. اني بقيت ساكته ماعرفت شحاجي ..كمت افكر وحايره شلون ارجع لهذه الولد ثقته بنفسه واقوي شخصيته .
. عنده ضعف شخصيه وقلة ثقه بالنفس جدآ عاليه .. وقررت بيومها اطلع للسوك واروح اشتري كتب عن مريض الوسواس القهري وكتب تنميه بشريه وكتب مخصصه لتعزيز الثقه بالنفس
.. وكلت لازم اخلي غمار يتغير واخلي يطلع من هاي القوقعه الي دافن نفسه بيها ...
......سالي .. نمت وكعدت الصبح جنت موقته المنبه حتى اكعد انطي علاج لغمار لان اوقات محدده ياخذ بيها العلاج ..
كعدت لبست حجاب وطلعت للمطبخ احضر الريوك حتى يتريك يله ياخذ علاج ..
سويت ريوك بس مااعرف شلون يحب البيض هوه سويت نوعين بيض سلگ وبالدهن كلت اي وحده ياكلها بكيفه ..
. حضرت الريوك اريد اطلع جان اشوف منقذ طب للمطبخ شافني وابتسم وكال .
...منقذ ..صباح الخير شو كاعده من وكت ..؟
...سالي ..صباح الخير دكتور ..كعدت حتى انطي علاج لغمار وريوك وأحضر نفسي حتى اطلع للدوام ..
...تقرب يمي شاف الريوك وشال الماعون مال بيض سلگ وكال .
...منقذ ..غمار ميحب البيض سلگ يحبه عيون بالدهن اني رح آكل السلگ وارجعي سويله عيون .
...سالي ..تمام ..ءء اقصد أن شاء الله ..
.ابتسم وكال..
..منقذ ..عفيه شاطره حفضتي الدرس ..
يله خلصي طلبات غمار وحضري نفسج حتى اوصلج للكليه وياي لان اني رح اطلع للمستشفى .
...سالي .. لا شكراً دكتور اني اروح ماريد اتعبك .
...كعد يتريك وكال ..
...منقذ .. أولا لتكولين دكتور كولي منقذ
... ثانياً ماكو تعب ولا شي اني طالع واخذج بطريقي ..
...سالي ..اوكي بس انطي العلاج لغمار وابدل ملابسي واجي ..
... مشيت وصلت للباب وجان يصيح عليه..
...منقذ ..ساالي .
..وكفت بمكاني وكلتله ..
...سالي ..نعم .
...بقه منطيني ضهره وياكل وكال ..
...منقذ ..البسي شي مستور والبسي حجاب كامل عوفي التوربان موحلو .
... سالي ..اوكي أن شاء الله .
...سالي ..رحت للغرفه شفت غمار بالحمام والباب مفتوح جان يغسل اباوع عليه ..
...فتح الحنفيه وصار يحط صابون سائل ويغسل ايده حيل ويحكها حك باضافيره بحيث حسيت الجلد رح ينشلع من كثر مايفرك ايده .
خلص من صابون سائل رش معقم وديتول على ايده ورجع غسلها واخذ مي بيده وصار يذبه عالحنفيه ويرش ديتول عليها ويغسل الحنفيه خلص وسدها اخذ المنشفه قربها من خشمه وصار يشتم بيها انوب ينشف ايده خلص ورجع علگها
انوب رجع باوع للحنفيه مال مغسله فتحها ورجع سدها وبقه كلساع يوصل للباب وقبل ميطلع يرجع يلزم الحنفيه ويفتحها ويرجع يسدها .
.. بحيث اني من يمي اختنگت من تصرفاته حيل ..لعد هوه شلون متحمل ..
....سالي .. حطيت الريوك عالطبله وصحتله ..
... سالي ..يله غمار. تعال تريك رح يبرد الچاي ..
طلع من الحمام وهوه يمشي وماد ايده كدامه يباوع على اصابيعه واحد واحد خاف مو نضيفات ..
...سالي ..صباح الخير
...غمار.. صباح النور ..شوكت كعدتي عبالي نايمه
...سالي ..لا متعوده اكعد من وكت بسبب الدوام .
...غمار .. عندج دوام اليوم ؟
...سالي ..اي .. هسه ابدل ملابسي واطلع بس خلص ريوك .
...شال الكوب مال چاي بيده قربه على وجهه ويباوع عليه من كل صفحه ويحجي ..
...غمار ..روحي للدوام معليج بيه اني متعود .
....سالي .. على شنو متعود ؟
...غمار ..متعود اتريك وحدي كل يوم ..
...سالي ..ليش تتريك وحدك ليش مو ويه اهلك .
...غمار ..ماريد.. احب اكعد وحدي .
...سالي ..شنو السبب يعني ..
...غمار... بدون سبب معيين ..
....سالي ..حسيته ضاج من اسألتي ردت اغير الموضوع ضحكت وكلتله ..
...سالي ...ههههه خوش لعد منا وهيج اني اتريك وياك ممنوع تتريك وحدك .
شرب شويه من الچاي وكال..
...غمار ...رح تتعبين هواي وتملين من حياتي مو تكولين ماكال ..
...سالي .. مديت ايدي كدامه وكلتله ..
...سالي ..تتراهن ؟
...باوع على ايدي ورجع باوع عليه وكال.
...غمار ..على شنو اتراهن ؟
...سالي ..ماامل ورح اخليك تتغير ونصير اصدقاء .
...مد ايده على علبة كلينس مبلل جانت عالطبله اخذ كلينسه وحطها على ايدي الي جانت ممدوده كدامه ولزم ايدي من فوك الكلينسه بأطراف أصابعه وكال ..
...غمار ..اتراهن وياج خلال اسبوعين او شهر رح تملين واكعد الصبح والكاج عايفه البيت كله .
....ضحكت وكلتله ..
....سالي ... هههههههههه وإذا بقيت اني وخليتك انته تعوف البيت كله شتسوي ؟
....ابتسم وهوه يباوع عليه وكال ..
...غمار ..امنيتي اطلع من هذه البيت اذا حققتي هاي الامنيه رح انطيج شي ممنطي لأي أحد قبلج ولا بعدج ..
...ميلت راسي وسألته بستغراب ..
....سالي ..شنو هذه الشي ؟!
...غمار ..هذه سر مااكوله لأحد .
...سالي ...لعد شلون رح تنطي اليه ..
...غمار..كلت اذاا اذاا خليتيني اطلع من هذه البيت انطي الج ..شنو صدكتي نفسج تره دنسولف ماصار شي ليهسه ..
....سالي ... اووكي ننتضر ونشوف منو رح يفوز بالرهان ..
...باوع عليه وهز راسه بالموافقه ..
...سالي ..يله اني رح اجيب العلاج مالتك واجي حتى اروح للدوام رح أتأخر .
...سالي ..طلعت العلاج من الثلاجه وشفت مكتوب على كل نوع بيهن تعليمات ..
...انطيته العلاج حسب التعليمات المرفقه .. خلصت العلاج وكلتله .
...سالي ..ابقه هنا رح اطب للغرفه أبدل ملابسي حتى اروح للدوام.
...غمار ..بس مو الگه الكنتور هوسه تره اشيلج بليله ضلمه والكاظم ..
....سالي ...ههههههه لا لتخاف رح اصفط الملابس من اخلص .
...سالي ..طبيت بدلت ملابسي لبست نفنوف مستور وحطيت كحله ومورد مال خد وبس ماحطيت مكياج ..
لبست الشال لبسه صحيحه بحيث غطيت شعري كله ورگبتي هم وحطيت عطر.
. وأخذت جنطتي وموبايلي وطلعت
شفت غمار كاعد عالقنفه ويلعب بالموبايل مالته .. عينه عالموبايل وكال ..
...غمار ..نفس العطر حاطه منه .؟
...سالي .. ياعطر ؟
....غمار ..العطر مالتج شسمه ؟
...ضحكت وكلتله ..
....سالي ..ههههه مااعرف شسمه انته كول شسمه جان عطري
...باوع عليه وكال .
...غمار ..لو تغيرينه احسن .
...سالي ..ليش شبي ؟
...غمار ..ريحته قويه يوصل لسابع جار .. الي يشتمه بالشارع ينسطر وحرام أحد غريب يشتم عطرج ..
...سالي ..مااعرف اني من زمان احط منه وماخطر ابالي هذه الحجي ..
...كام وكف وراح يمشي باتجاه الغرفه وكال..
....غمار ..براحتج اني عليه انصحج وانتي بكيفج ..
... طب للغرفه وطبگ الباب وراه. بقيت صافنه على كلامه . اخذت الصينيه وطلعت .
لكيت ام منقذ ورفيف كاعدات يتريكن . ابتسمت وكلتلهن ..
...سالي ..صباح الخير
...رفيف ..صباح النور هلو سالي .
...زحل ...شعندج لابسه وين طالعه من الصبح ..
...سالي ..خاله اني سويت ريوك لغمار وانطيته علاجه وهسه رح اروح للدوام .
...زحل ..انوب فوكاهه لازم ننتضرج من تجين من الدوام شنو نشتغل عندج احنه .
....سالي ... لا العفو موهيج .. بس اني طالبه وادرس ودكتور منقذ يدري وحتى غمار يدري ومحد اعترض بيهم على دراستي .
باوعت على امها...رفيف وكالت.
رفيف ....مامه شعلينه بالبنيه هيه شغلها تشوف طلبات غمار وتشرف على علاجه معلينه بحياتها ودراستها ..
....بهاي الأثناء نزل منقذ من فوك وكال .
...منقذ ..يله سالي خلصتي نروح ؟
...اريد اجاوبه جان تحجي امه وكالت .
...زحل ..خير وين ماخذها .
...منقذ ..يمه اوصلها للكليه ومناك اروح للمستشفى .
...زحل ..شنو ماعدها خط يوديها انوب رح تشتغل خط للخاتون تودي وتجيب ..
...منقذ .. يمه عود احطلها خط بس اشوف واحد ثقه من معارفي وأحطلها خط هسه تدبر حالها لما اشوف الخط .. يله سالي امشي رح نتأخر .
....سالي ..طلعنه اني ومنقذ صعدت يمه بالصدر .. شغل السياره ومشه .
. اول ماساق السياره فتح الراديو على دعاء الصباح .. وطول الطريق يردد .. ياالله يارب عليك ياالله ..
....بقينه ساكتين لما خلص الدعاء طفى الراديو وكال .
...منقذ ..سالي ..ماريدج تزعلين من العلويه خاف تسمعج كلمه منا منا اتحمليها ميخالف لاتنسين اني جبتج للبيت بدون مااكوللهم يعني تحس نفسها انحطت أمام الأمر الواقع .. لذلك رافضه الزواج هذه ..
....سالي ..لا دكتور ولايهمك هيه مثل امي ماازعل منها .
...باوع عليه وكال ..
...منقذ ..وتالي؟ مو گلنه منقذ بدون دكتور .؟
...سالي ..اسفه بس استحي اكول منقذ انته اكبر مني وعيب ..
...منقذ ..على شنو عيب عادي لاعيب ولا شي منقذ وبس .
...سالي ..تمام ..اقصد أن شاء الله .
....سالي ..وصلني منقذ للكليه وكال هوه يرجع ياخذني بالرجعه .. كملت دوام ومحاضرات اتصلت بي وكال رح يجي ياخذني .
. انتضرته اباب الكليه وشفت سيارته طبگت كدام الكليه سلمت عليه وصعدت حرك السياره ومشى.. جر حسره وكال ..
....منقذ ..سالي .. بعد من تخلصين دوام وتنتضريني لاتوكفين اباب الكليه بلشارع والرايح والجاي يباوع عليج
..اوكفي بلكليه جوه ومن اوصل اني اخابرج وتطلعين ميصير هيج واكفه بالشارع والطلاب كلهم عينهم عليج ..
....سالي ..وشنو يعني تره همه ذوله الطلاب نفسهم اني اداوم وياهم يعني شايفيني ..
....منقذ ..حتلو ميخالف لتوكفين بلشارع زحمه بنيه واكفه بلشارع ..
....سالي ..اوكي .
...سكتت وكلتله ..
...سالي ..دكتور.. اكو مكتبه مال كتب مخصصه لكتب علم النفس أو التمنيه هنا اريد اروح اخذ كم كتاب ..
...منقذ ..محتاجه مراجع للدراسه مالتج يعني ؟..
.ماردت اكوله اريدهن لغمار كلتله.
...سالي ..اي محتاجه كم كتاب عادي اروح للمكتبه ؟
....منقذ ..اي هسه اوديج اعرف مكتبه كلش جبيره وبيها هواي كتب مهمه نروحلها واخذي اي كتاب تردينه ..
...سالي .. وصلنه للمكتبه ردت انزل صاحني وكال ..
...منقذ ..دقيقه سالي ..
... سالي ..نعم .
...مد ايده لجيب الستره مالته طلع المحفضه وطلع منها فلوس وكال ..
...منقذ ..اني رح ابقه بلسياره أخذي هاي الفلوس اشتري الكتب المحتاجتها وتعاي انتضرج هنا .
...سالي ...لا شكرا دكتور عندي فلوس والله مامه انطتني مصرف قبل متروح .
....منقذ ..اول شي لتكولين دكتور صار الف مره انبهج .
ثاني شي أخذي الفلوس وبعد ممنوع تأخذين مصرف من اهلج . مصرفج تاخذي من غمار منا وهيج رح احط يم غمار مبلغ تصرفين منه خاف تستحين تاخذين مني أخذي منه عادي ..
...مديت ايدي اخذت الفلوس وتشكرت منه ونزلت .
طبيت للمكتبه اختاريت 2 كتب مهمه لعلاج غمار وطلعت .
لگيت منقذ كاعد بالسياره وحاط راسه عالكرسي ومغمض عينه . تقربت دكيت الجامه فز وفتح عينه باوعلي داس دكمه وفتح باب السياره وصعدت .
...مد ايده للبصمه مال سياره شغل السياره وكال ..
....منقذ ...اشتريتي الكتب المحتاجتها؟
....سالي ..اشتريت الموجود بس ثنين وردت اخذ كتاب معيين مالگيته بالمكتبه يكول صاحب المكتبه يومين ويجيب منه عود ارجعله هاي اليومين واخذه ..
...باوع عالكتب وكال ..
...منقذ ..عادي اشوف الكتب الجايبتهن ؟
...سالي ..اي عادي .. حطيت الكتب كدامه قره اسمهن والعنوان وضحك ورجع يباوع للطريق وكال ..
...منقذ ..هههههههه تردين تتعلمين شلون تغيرين من تصرفات غمار مو ؟
...من كال هيج ارتبكت وماعرفت شحجي عزه شلون عرف بيه اريدهن لغمار . باوعت عليه وكلتله ..
....سالي ..لا غمار شعليه اني اريد اقراهن احتاجهن بالدراسه مالتي ..
...باوعلي صفح وكال ..
...منقذ ..بس اختصاصج موبهذه المجال الي تحجي عنه الكتب ..
...سالي ..اعرف ميخالف مابيها شي اذا اقره انواع من الكتب موشرط إلا باختصاصي ..
....منقذ ...امممم اوكي اقريهن ولو ممقتنع بكلامج بس ميخالف اقري هم معلومات تفيدج .
....سالي ..بقيت ساكته ماجاوبته وصلنه للبيت ونزلت من السياره وطبينه للبيت
.. وجان اسمع صوت صياح وعركه بلبيت وزلم بالصاله .. ركضنه اني ومنقذ نشوف شكو وجان أنصدم من الشفته ..
......................
يتبع ♥️
#زهراء_الطائي
تصويت+تعليق