..لاتنسون تعليق بين الفقرات حبايبي قراءه ممتعه ♥️
....
...............
.....سالي ...دزيت رساله لحاتم .. ورجعت للبيت كلش مقهوره وضايجه بسبب منقذ أحسه خانگني خنگ وين مااروح الگاه يمي .
. اووف منك منقذ موكافي السويته بيه غير تحس عاد وتعوفني بحالي يربي شسوي دخيلك ساعدني ..
.....سالي ..طبيت للبيت لگيت مامه نايمه بغرفتها ومتيم نايم يمها اول ماطبيت كعدت على صوت فتحة الباب باوعت عليه وكالت ..
...كفاح ..ها شوكت اجيتي موگلتي أتأخر ؟
...سالي... عبالي انطي محاضرتين انطيت بس وحده واجيت رئيس القسم كال ماكو شاغر حتى اني اسده .. ورجعت ..
...كفاح ..الله كريم أن شاء الله يطلع التعيين مالتج وتخلصين من محاضرات المجانيه ..
....سالي ...اني ماضايجه من المحاضرات ضايجه من منقذ وسوالفه ..
مامه فدوه احجي وياه انتي گوليله لايمشي ورايه وين مااروح الگاه ..
...كفاح ..ليش شصار وين لحگج؟
....سالي ...لكيته كاعد ويه الطلاب ويسمع المحاضره مالتي وانصدمت من شفته حته توترت كدام الطلبه وحيل انحرجت منه .
.ادري شنو مراهق وهيج يسوي غير عمره رح يطخ الاربعين موعيب ..؟
....كفاح ..عود اني اخابره واحجي وياه يله روحي بدلي ملابسج حته نتغده تره ماصبيت غده انتضرج .
....سالي ..اوكي ثواني واجيج ..
.....سالي ..طبيت للغرفه حته أبدل ملابسي وجان اسمع صوت رساله عالموبايل ..
فتحتها شفتها من منقذ ..
...منقد .. حياتي باجر اجي اخذكم انتي ومتيم نطلع نتغده بره مشتاقلج ومحتاج اسولف وياج حضري نفسج تمام.؟
.....
...سالي ..من قريت الرساله مالته .. اتصلت بي واول مافتح خط حجيت وياه بعصبيه وكلتله ..
...سالي ..انته صدك ماعندك احساس يعني قبل شويه حجيت وياك وكلتلك يارجال عووفني تفتهم كلامي لو دااحجي انكليزي شوكت تمل وتعوفني منقذ الله يخليك كافي تره تعبت من هاي العيشه عوووفني بحاالي لخااطر الله ..
.وسديت الخط بدون مااسمع الرد مالته ..
...مشيت للكنتور اريد اطلع ملابسي أبدل وجان اسمع صوت رساله اخذت الموبايل شفتها من منقذ يكول ..
....منقذ ..عفيه عليج اني واحد ماعندي احساس ولأن ماعندي احساس مستحيل اعوفج وتره حتلو تحجين انكليزي اني افهمج.
لتنسين اني احجي انكليزي وتركي وايراني فإختاري اللغه الي تعجبج واحجي بيها لان اني احجي 3 لغات ..
وانتي ماعندج احساس مواني ..
افتهمي يابشر اني احببج احببج لوتدرين شسويت لخاطرج جان عرفتي أنه محد حبج بگدي .
.. حضري نفسج انتي ومتيم باجر اجيكم حياتي ..
......
...سالي ..طفيت الموبايل وشمرته عالجربايه وكعدت حطيت ايدي على وجهي وكمت ابجي واحجي ويه نفسي ...
...سالي ...يربي ليش هيج ديصير بيه لوبس اعرف والله مليت من حياتي شوكت اخلص منك حاسه نفسي مسجونه ومااكدر اتحرر منك ..
....داابجي وجان اسمع صوت مامه تصيح ..
....كفاح ..ساالي ساالي وينج تعاي اجتي رؤى تريدج ..
...سالي .. من سمعت رؤى اجتي كمت بسرعه بدلت ملابسي وطلعت .
. طبيت للصاله شفتها كاعده سلمت عليها وكعدت تسولف وياي ..
....رؤى ..طبعا اني اجيت اشوفج كلت خاف زعلانه من ضرار لتزعلين حبابه موتعرفين ضرار شكد عصبي ميقصد يزعلج هوه ..
...سالي ..انتي مالج علاقه بلي صار ذاك اليوم مازعلانه منج لتخافين
.. بس ضرار بعد مااحجي وياه لو يموت وبعد لتكولين تعاي لبيتي بيتج بعد مااطبله ..
...رؤى ..اهم شي مزعلانه مني البيت وضرار فدوه الج ههههههه
...سالي ...ههههه دگومي نتغده اني جوعانه تعاي اكلي وياي ..
...رؤى ...اي آكل ليش لا شمسويه خاله كفاح اليوم غده ..
...........
... سالي ..تغدينه اني ورؤى ومامه ورسل ..خلصنه الغده وبقينه نسولف اني والبنات طبعا رسل ضايجه واني اعرف ليش ضايجه تتگلب مثل السمچه المتزوهره لان موبايلها عندي ومتكدر تحجي ويه حاتم ...
وره شويه عافتنه وراحت لغرفتها واني اخذت متيم انومه بغرفتي ورؤى اجتي وياي للغرفه
.. كعدنه نسولف ونتذكر الماضي وكالت رؤى ..
...رؤى ..اكولج مادام اني يمج احجيلي شويه عن قصتكم نكمل وين وصلنه اليوم اني يمج ابقه بليل اروح يعني عدنه وقت هواي ..
....سالي ..عادي نحجي جايبه المسجل وياج ؟
...رؤى ..لا نسيته بس عادي احجي واني احفظ الكلام مالج لتخافين ماانسى ...
.....سالي ..تمام وين وصلنه احنه ..
...رؤى .. من ابوج اعترف بحبه لخاله كفاح كدام غدير ..
...سالي .. اي .. بابه من حجه هيج خاله غدير راحت زعلانه لبيت اهلها وكبرت المشكله وره فتره رجعها بس من رجعت .
.. صارت انسانه ثانيه گامت تعامل بابه معامله مو حلوه واني صارت حيل قاسيه وياي وبيوم من الايام...
بابه حجالي يكول ..
...ياسين .. راحت غدير زعلانه لبيت اهلها حاولت ارجعها اصالحها وماقبلت .
.. بقت ايام .. وبهاي الايام .. اني وكفاح هواي التقينه .. رحنه اني وياهه للمدرسه حتى نشوف المعلمه شتريد .. طبينه وسلمنه عالمعلمه .. وكالت ..
المعلمه....طبعا اني ردت احجي وياكم بخصوص سالي .
. ماشاء الله بنتكم حيل ذكيه واني عندي اقتراح عليكم . ليش متسجلوها بمدرسة المتميزين ..
لان مستواها الدراسي مومال مدرسه حكوميه وهيج حيل ذكيه ..
....ياسين ..لا ست عوفيها وهيه ماطول شاطره بعد المن نغيير مدرستها .. وعليمن هالمصاريف..
...كفاح ...ياسين اذا عالمصاريف اني اتكفل بمصاريف دراستها بس خلتسجل بمدرسة المتميزين ..
...ياسين ..لا كلت يعني لا وبعدين اني مااقبل تصرفين على بنتي ماطول عايش اني اصرف عليها ..
......
...ياسين ..طلعنه من المدرسه وجنت كلش ضايج انحطيت بموقف ابد موحلو
..لان اني حالتي الماديه دون المتوسط وكفاح اهلها أصحاب أملاك وحالتهم زينه حسيت كفاح احسن مني واني عاجز ماكدرت اساعد بنتي
.. المهم انسد الموضوع وسالي بقت تدرس بمدرسه حكوميه .
. رجعت للبيت بقيت احاول اصالح غدير حتى ترجع .. وره كم يوم رجعت غدير بس رجعت انسانه ثانيه ..
صارت تعاملني معامله موزينه وسالي هم واشوفها بعيوني بس مااكدر اسوي شي .
. لان اني من خطبتها جان شرطها اسجل البيت باسمها وهسه بيتي باسمها وخاف اقسى عليها وتطلب الطلاق ووين نروح اني وسالي
.. اعرف نفسي غلطت بس بعد الندم ميفيد ..
.......
...سالي .. مرت الايام واني كبرت وصار عمري 16 سنه ويوم عن يوم خاله غدير تصير صعبه وياي جانت حيل قاسيه عليه وفرقت بيني وبين بابه متقبل اكعد واحجي وياه وكلما اسوي شي غلط تگول لبابه عليه لحد ماصار قاسي وياي كلش .
. واهلها كل يوم يجون يمنه لو كل يومين همه يصيرون بيت عم ابويه يعني اخوها يصير ابن عم ابويه وأبد مو مريح
بس يباوع عليه بنضرات موزينه واني جنت البس تراك بلبيت ومن يجون البس ثوب عريض وطويل وبيوم من الايام ..
جنت انضف المطبخ ويه خاله غدير .. وجان تكول ..
....غدير ..روحي بدلي ملابسج لان اهلي رح يجون ..
...سالي ..اي خليجون ملابسي شكو اغيرهن واني رح اطب لغرفتي من يجون ..
...من حجت هيج صاحت عليه بنتره وعصبيه وكالت ..
...غدير ..امشي بدلي ملابسج كلت شنو بكيفج تبقين بغرفتج خوش احترام والله امشي لج يلااا ..
....سالي ...خفت منها ورحت بدلت ملابسي ولبست ثوب على شكل فستان .
. ومشطت شعري وره شويه طبت للغرفه خاله غدير وكالت ...
...غدير ..تعاي احطلج شويه كحله ومورد مال خد ..
...سالي... ليش شكو اليوم ماريد أحط مكياج عوفيني ..
...جرتني من ايدي حيل وكعدتني عالكرسي وكالت ...
....غدير ..من اگول حجايه تتنفذ بدون نقاش زين لولا ..
...حطتلي مورد خد وكحله وهاي جانت اول مره احط بيها مكياج .. وره شويه اجوي اهلها وكالت
....غدير ..رح احضر الصينيه مال عصير. من اصيحج تجيبيها وتجين توزعين العصير وتسلمين على اهلي زين لولا ؟
...سالي ..ليش شكو اليوم غير افتهم شكو ..؟!!
...غدير ..سوي الي كلتلج عليه وبعدين تعرفين ..
....سالي ..وره دقايق صاحتني اخذت العصير وطبيت عليهم شفت امها واختها وأخوها مهند الي يباوع عليه اكلني بعيونه اكل .
. داامشي حتى انطيهم العصير وجان اسمع امها كالت ..
...صلاوات عروستنا تخبل چنها گمر ضاوي ..
...من كالت هيج وكعت الصينيه من ايدي من الخوف وكلتلها ...
...سالي ...شنووو؟!! ياعروس منو هاي ..قصدج اني ؟؟
....غدير ..ياحيوانه عميه متشوفين وگعتي الصينيه امشي لمي الكزاز وولي منا بسرعه ..
....سالي ..كمت اصرخ وابجي كدامهم كلهم من الصدمه ..
....سالي ...مارريدد اتززووج لو تموتيين مااتزوج انووب منوو؟ اخوج هذه الشايب .
..تردين اتزوج اخوج الي عمره فوك الاربعين سنه واني عمري 16سنه لو تموتيين مااتزوجه ومعلييج بحياااتي اني عندي ام واب همه يقررون حياتي موانتي افتهمتي لولا ..
.....وعفتهم وطلعت من الصاله ابجي واشهك وماادري شلون اجتني الجرأة وحجيت هيج وياهه واني جنت كلش خوافه واخاف منها ..
طبيت لغرفتي وقفلت الباب بالمفتاح وبقيت ابجي ومتغطيه بفراشي خفت منها كلت هسه تطب عليه تسويلي شي لو بابه يضربني .
. بس ماصار شي من هذه كله .. صار البيت هدوء وماسمعت صوت أحد بعدها ...
صار الليل طلعت من الغرفه اتلفت يمنه يسره وخايفه .. سمعت صوتهم بالصاله كاعدين هيه وبابه ووضعهم طبيعي يسولفون ولا عبالك صاير شي
.. طبيت عليهم بقيت اباوع منتضره ردة فعل منهم .. وجان بابه يصيحني وكال ..
...ياسين ..تعاي سالي هنا ..
...سالي ..طبيت كعدت يمه واني احس رجلي وحده تطك بالثانيه من الخوف .. باوع عليه بابه وكال ..
....ياسين .. بابه انتي ليش متردين تتزوجين مهند ؟
....سالي ..بابه اني اصلا ماريد اتزوج لا مهند ولا غيره اني بعدني زغيره واريد ادرس وأكمل دراستي ويني وين الزواج ..
...ياسين...بابه البنيه مصيرها لبيت زوجها حتلو درستي شراح نستفاد من شهادتج باجر عگبه تتزوجين وزوجج يصرف عليج
..موهاي اني كدامج مهندس كهرباء وكاعد بالبيت تعيين ماكو واني رجال ..
تردين انتي البنيه تسوين شهاده عليمن بلله ؟
.....سالي ...بابه الزواج شي والدراسه شي ..اني حلمي ادرس مو حلمي اتزوج وحتلو بيوم من الايام اتزوج خوما اتزوج مهند غير اتزوج شخص نفس عمري تره اني أصيح لمهند عمو
.. بابه صدك تحجي تريد اتزوج واحد ازغر منك ب4 سنوات .. يعني بكد ابويه ..
.خزرتني بعيونها وگالت..
...غدير ..تروحيله فدوه وين تلكين مثل اخويه انوب فوكاها ماراضيه ..
....ياسين ..بابه سالي .. اني انطيت كلمه للناس وهمه بيت عمي ومهند ابن عمي تردين تزغريني كدامهم ؟.
...سالي ..من كال هيج بابه نزلت دمعتي بعيني وكلتله ..بصوت مخنوك ..
...سالي ...بس بابه اني ماريد اتزوج والله ماريد بعد وكت ..
....ياسين ...اول وتالي تتزوجين بابه عوفي العناد ولتخليني استعمل وياج غير اسلوب سوالف كفاح بطليها .. خوش ..
....سالي .. مرت الايام واني مصره على موقفي همه يكولون اتزوجي واني اكول ماريد زواج .. لحد ما يوم من الايام ..
تعبت منهم كمت ابجي واصيح عليهم وكلت ..
....سالي ..ماريد اتزوج مهند عوفوني بحالي وإذا تجبروني اموت نفسي والله كاافي عاد ..
....حجيت هيج ومااحس إلا اجاني راشدي على وجهي من بابه وكعني بالكاع ضربني وصار يصيح بعصبية وكال ..
....ياسين ..بنت الک***** بعدج بكد الخاشوگه وترفعين صوتج عليه انعل والديج افتهمتي لولا .
. وزواج تتزوجين ورجلج فوك راسج ورح تبقين محبوسه بلغرفه منا لحد مايعقد عليج مهند وخلاشوف اني لو انتي ..
....سالي ..كمت ابجي وهمه طلعوا وقفلوا الباب عليه .. بقيت على هذه الحال يومين غدير تحطلي الاكل وتروح وبس من اريد اطب للمغاسل يفتحولي الباب .
. حسيت نفسي سجينه ابيت ابويه .. تعبت منهم كلش
.. وقررت بيومها بعد مااسكت وشيصير خليصير . كلت لازم اتصل بأمي واخليها تجي تأخذني مستحيل اتزوج مهند ..
....سويت نفسي اريد اروح للحمام ... فتحت الباب غدير وراحت للمطبخ ..
شفت امير اخويه يلعب بالممر الي يفصل بين الصاله وبين المطبخ اشرتله بيدي وكتله ..تعال .
.اجاني يركض شاورته وكلتله ...
....سالي ..انطيك الف وتجيبلي موبايل بابه بس لتگول لاحد هوه عندي خوش ؟
....امير ..اي خوش مااكول ..هسه اجيبه واجيج ركض .
...سالي ...امير انطاني موبايل بابه اخذته وطبيت لغرفتي واجتي غدير قفلت الباب عليه وراحت .
واني استغليت الفرصه بسرعه حطيت رقم مامه واتصلت بيها . وكلتلها ..
...سالي ..الووو هلو مامه شلونج ..فدوه تعاي اخذيني منا يردون يزوجوني غصب واني ماريد اتزوج تعاي بسرعه فدوه ..
....سالي ..حجيت وياهه وكالت رح تجي عليه ..
...كعدت انتضر الهدوء الي يسبق العاصفه .. وره ساعه جان اسمع صوت صياح وحجي وهوسه بس ماافتهم شنو يكولون .
. وشويه وجان تنفتح باب غرفتي . باوعت لگيتها مامه اول ماشفتها ركضت عليها وحضنتها ..
حاوطتني بايدها وكالت ..
....كفاح ..يمه بنتي شصاير بيج .
لتخافين مامه محد يغصبج عالزواج ابد ..يله رح تجين وياي . من كالت هيج بابه صاح بصوت عالي وكال ..
...ياسين ..وين تاخذيها شنو بكيفج ممنوع سالي تطلع منا ويله أخذي زوجج واطلعي منا يله ..
...تقربت مامه من بابه وكالتله بتحذير ..
...كفاح ..ياسين بنتي متتزوج بعدها قاصره وطفله .
واني اليوم مااطلع منا إلا اخذها وياي .. لاتنسى زوجي يشتغل محامي يعني ارفع عليك قضيه واكول يريد يزوج طفله قاصره لرجل جبير بالعمر وتتحاسب قانونياً ..
اتقي شري وخليني اخذ بنتي واروح بهدوء احسن ..
...حجت هيج مامه وجرتني من ايدي واخذتني وياهه وطلعنه من البيت ..
....ووصلت لبيت امي .. لحياة جديده ووضع جديد .. بعد ماعشت ويه مرت ابويه هسه رح اعيش ويه زوج امي ...
........
....يتبع ♥️
#زهراء_الطائي
.....
البارت قصير اعرف .. لذلك رح اعوضكم رح انزل بارت ثاني بعد نص ساعه بس اريد تفاعلكم الروايه بدت أحداثها تحمه وبلشت تصير اقوى واحلى رح تعرفون هواي مفاجآت بلايام القادمه ..
....
تصويت + تعليق ..