.تعليق وتصويت وتعليق بين الفقرات حبايبي حته اتشجع واكتب اكثر 🌺🌺قرائه ممتعه ♥️
.....
.....
من انت ومن أنا
لماذا الدهر فرق بيننا
.....
يا حبذا متى اللقاء وهل
للحزن والأسى منتهى ..
.....
ايها المجنون المتييم
حالي ليست باحسن منك
فأنا شارفت على الجنون
إن لم تخرجني من ضلامي
فلن ارى النور مدى الحياة ..
......
بقلمي ✍️
#زهراء_الطائي
....
...سالي ..كمت من الفراش بدلت ملابسي ومشطت شعري وأخذت الجنطه مال مدرسه ونزلت رح احجيلكم قصتي وشصار وياي بذاك الوقت .. وشلون جنت عايشه ويه مرت ابويه ....
....سالي .. طبيت للمطبخ لكيت خاله غدير تسوي ريوك باوعت عليه وكالت ..
...غدير ..فضيها عاد سنه يله تكعدين خاتون ابوج ينتضرج حته يوديج للمدرسه ..
....سالي ..شعجب هوه يوديني اليوم ؟
....غدير ..مااعرف هوه كال خلتحضر نفسها حته اخذها يله خلصي وروحيله ..
....سالي ..خلصت ريوك وأخذت جنطة المدرسه وطلعت لگيت بابه ينتضرني بره شافني طلعت لزمني من ايدي ورحنه مشي للمدرسه ..
....باوعت عليه وسألته ..
....سالي .. بابه شعجب اليوم انته تاخذني للمدرسه ؟!!
ابتسم وكال ..
...ياسين ..ليش متردين اني اوديج ؟
...سالي ..لا عادي بس لان اول مره تأخذني انته كل يوم اروح وحدي ..
...ياسين ... اليوم حبيت اخذج واشوف المعلمات واسالهن عنج ..يله امشي بسرعه رح نتأخر عالاصطفاف ..
...سالي ...وصلنه للمدرسه اني رحت للاصطفاف وبابه طب لغرفة المديره ..
....ياسين ...طبيت لغرفة المديره وعرفتها على نفسي ..
...ياسين ..سلام عليكم ست اني ياسين حامد والد الطالبه سالي ياسين موجوده عدكم بصف الرابع ابتدائي ..
....المديره ..اهلا وسهلا بيك ابو سالي تفضل استريح .
....ياسين ...بصراحه وبدون مقدمات اني اجيت أسأل عن مستواها بالدراسه وسلوكها بالمدرسه ..
...المديره ...معقوله جاي تسال عن سالي؟ ..سالي من اشطر الطالبات عدنه وهسه رح ادز على المعلمات واحجي وياهن بنفسك ..
....وره شويه اجني معلمات العربي والرياضيات وتعرفت عليهن وسالتهن نفس السؤال عن سالي وثنينهن اثنن على اخلاقها وذكائها وسلوكها .. ومعلمة الرياضيات كالت ..
....بصراحه ابو سالي لو ماانته جاي جان اني دزيت عليك .. اريد احجي وياك بموضوع يخص سالي ..
...ياسين .. اي ست تفضلي خوما بيها شي بنتي . ؟؟
...لا لا لتخاف كلشي مابيها بس هيه ماشاء الله كلش ذكيه وشاطره يعني انطيها مسائل مال متوسطه رياضيات تحلهن بكل ذكاء بس حبيت اسال عنها بلبيت شلون تدرس ومنو يدرسها .. ؟
....ياسين ..والله هيه تدرس وحدها بس هيه طالعه ذكيه وشاطره على امها .. امها كلش شاطره جانت بالدراسه وهيه مثلها ..
....ها ..ماشاء الله لعد لازم التقي بوالدتها واحجي وياكم بموضوع يخصها بدون زحمه تكدرون باجر تجوني انته ووالدة سالي حته نحجي ..
...ياسين ..بصراحه احنه منفصلين اني وام سالي .. بس اذا الموضوع ضروري عادي نحجي بي ..
...ياريت ابو سالي بأي وقت تشرفوني انته والمدام حته نحجي يله من رخصتك عندي درس ..
.......
ياسين .. طلعت من المدرسه واني جدامي تخط حسره وندم مثل ميگولون
... صارلي اكثر من ست سنوات ماشايف كفاح ولا حاجي وياهه ولو هيه ماطلعت من كلبي وعقلي بس ماملتقي بيها ابد شلون هسه اكوللها تعاي نروح للمدرسه اني وياج ...
...بنفس الساعه أجرت سياره ورحت للمستشفى الي تداوم بيها كفاح وصلت وسألت عليها كالوا صايره مسؤولة ردهة القلب ..
رحت للردهه مال القلب وشفتها كاعده على مكتب ولابسه نضاره وتكتب ويمها ممرضين يحجون وياهه بقيت واكف بعد مسافه عنها ردت يروحون يله اتقرب واحجي وياهه
.. وره شويه تقربت منها وكلت السلام عليكم ..
...كفاح .. جنت اشتغل واوقع الطبلات مال المرضى وجان اسمع صوت ..
مو غريب عليه هذه الصوت رفعت عيني وجان اشوف ياسين واكف كدامي بلحضتها حسيت الناس كلها الي بالردهه تسمع صوت دگات گلبي موبس اني من الفرحه ..
.نزعت نضارتي وباوعت عليه عيني بعينه وشكد سولفنه وحچينه ..
بس ماطلع صوت كلامنه چان بالنضرات والعيون .
. حيييل ياسين متغيير وطالع شيب براسك بعدك زغير عالشيب ياحبيبي شبسرعه هيج شيبت .
.. قطع صفنتي وحجه بصوت نبره رجوليه وكال ..
...ياسين ..احم احم ..شلونج ام سالي ..
...كفاح .. اهلا وسهلا بيك شلونك ياسين ..ااق ..اقصد ابو سالي .. شخبارك ؟
....ياسين ..الحمدلله بخير اذا انتوا بخير .
.. اني اعتذر اجيت بدون موعد بس اكو موضوع يخص سالي واجيت احجي وياج بي وماكدرت اروح للبيت لان سالي كالت انتي اليوم تباتين بالمستشفى خفاره ..
...كفاح ..لا عادي وين ماكان هنا او بالبيت هلا بيك .. تفضل اكعد استريح .
.
...ياسين ..اشكرج ..
...كفاح ..العفو ..شنو صاير شي مهم ؟
...ياسين ..اني جنت بالمدرسه مال سالي ومعلمة الرياضيات كالت تريد تحجي ويانه بموضوع يخصها ..
يعني ويه امها وابوها واني كلتلها احجي وياي كالت اريد التقي بوالدتها .
. فإذا عندج مجال باجر نروح للمدرسه حته نشوفها شتريد ؟
....كفاح .. باجر جمعه أن شاء الله الأحد نروح اذا عندك مجال .
...ياسين ..نسيت ثاري باجر جمعه يله خليها الأحد واني اسف خاف اخذت من وقتج يله اترخص .
.راد يگوم يروح بدون مااحس كلتله بصوت يرجف ..
..كفاح ...ياسين ؟؟
...أندار عليه بلهفه وكال..
...ياسين ..نعم گولي ..
...ارتبكت وماعرفت شنو احجي واصلا ليش حطيت نفسي بهيج موقف وكلتله ..
....كفاح ..مرتاح بحياتك ؟
....ابتسم ابتسامه كلها تعب وعينه بالكاع وكال ..
...ياسين ..الحمدلله عايش .. انتي شلونج ..؟
...كفاح ...زينه الحمدلله اني ...
...ياسين ..مبروك حققتي حلمج وصارت عندج شهاده ودرستي ..
...كفاح .. بعدني داادرس تره ماخلصت ..
...ياسين ..شنو بعدج غير كملتي كليه لولا ؟
...كفاح ..اي كملت بكلوريوس تمريض وهسه داادرس ماجستير السنه الثانيه رح اكمل ..
....ياسين ..ها ..بيهه الخير أن شاء الله يعني السنه الجايه تكومين تدرسين بالجامعة استاذه جامعيه ؟
....كفاح .. أن شاء الله وراهه اقدم عالدكتوراه ..
....ضحك وكال ..
...ياسين ..هههههه اكول ليش لابسه نضاره ..
ارحمي نفسج الدراسه مو كلشي بالحياة والشهاده مناخذها ويانه للگبر تره ..
...كفاح .. اي صح مناخذها ويانه للگبر بس الشهاده سند وقوه النه ..
....ياسين ..قوه للرجال مو للمره المره مالها غير بيت زوجها وجهالها ..
..هزيت راسي بأسف وكلتله..
...كفاح ...هههههه بعدك نفس تفكيرك ماتغيرت... عبالي السنين الراحت رح تغيرك ..
....ياسين ...وانتي بعدج ممتزوجه ليهسه عبالي من نتفارك رح تنسين ياسين وتعيشين حياتج ..
....من گال هيج ارتبكت وماعرفت شحجي وكلتله ..
....كفاح ...لا نسيت بس اني ماريد زواج شنو قابل نهاية العالم متفرغه لدراستي وبس ..
.كام وكف وكال..
...ياسين .. لا متردين زواج لان بعدج مسجونه بياسين ومراح تنسي طول العمر ..
...كفاح ..اني مو مسجونه بأحد اصلا اجوني خطابه واني اخذت مهله حته افكر وارجعلهم خبر بس اني ملتهيه بدراستي .. وبس ..
....ضحك ضحكه خفيفه كأنه كاشف كذبتي وكال ..
...ياسين ..ههههه يله اترخص اني اخذت من وقتج دكتوره اعتذر مع السلامه ...
....وعافني وطلع واني آكل بروحي شلون كتله اجوني خطابه هسه شسوي يربي ..
....ياسين ... طلعت من يم كفاح .. سويت نفسي كدامها ممهتم واني ادري بيها تجذب مااجوها خطابه بس مدري ليش ضجت حسيت وجع بگلبي صار لان هيه اول وتالي تتزوج خوما تبقه طول العمر هيج وحدها .
. زين اني ليش ضايج اني هم متزوج وعايش حياتي وهيه هم من حقها تتزوج وتعيش حياتها
...اخخخ ياكفاح خربتي كلشي جان حلو بيناتنه بدراستج هاي الي مالها معنى ...
....وصلت للبيت واني احس نفسي كبرت فوك عمري عشر سنوات .. طبيت لگيت غدير محضره الغده وسالي جايه من المدرسه ..
. كعدت اتغده وتفكيري كله يم كفاح صافن وافكر بيها ... شلون متغيره عن قبل أحسها صايره قويه ومينخاف عليها ...
...غدير ...ياسين ..ياسين ...وين صافن ..
...ياسين ..ها وياي تحجين ؟.
....غدير ..لعد ويامن ..شبيك صافن اليوم ..
....ياسين ..ماكو شي هيج داآكل ليضل بالج ..
...غدير .. رحت للمدرسه ويه سالي شسويت ماسويت اليوم ؟؟
...ياسين ..رحت وطلبوا يلتقون بيه اني وامها وأخذت موعد نروحلهم الأحد ..
....غدير ..شنو يعني حجيت ويه كفاح ؟
...ياسين ..رحتلها للمستشفى وانطيتها خبر .. وكالت الأحد نروح ..
...غدير .. ها خوش لعد .. يله الحمدلله اني شبعت اروح انوم امير واجي ..
...ياسين ..تعاي مااكلتي شي وين رايحه..
....غدير ..ماريد شبعت أكلوا انتوا انوم امير واجي ..
....ياسين ...من عافت الاكل وراحت غدير عرفت بيها زعلت لان رحت لكفاح .
. اني هم عفت الاكل ورحت وراهه كلت أوضح الها موقفي ..
...طبيت للغرفه لگيتها تنوم امير ابني وعيونها بيها دموع باچيه .. كعدت يمها وجريت حسره قويه ...وكلت ...
....ياسين ..ههففف .. شبيج يامره ليش البجي انوب ..؟
عيونها بالكاع وكالت..
...غدير ...اريد أسألك سؤال بس تجاوبني بصراحه بداعت جهالك ..
...ياسين ..بدون حلفان اسألي واني رح اجاوبج ..
...غدير ..بعدك تحب كفاح مو ؟
...بقيت ساكت وفركت لحيتي بيدي وباوعت عليها وكلت ..
...ياسين ..اني من قبل مااتزوجج گتلج اني اتزوجتها على حب وانتي بنت عمي موغريبه وحضرتي عرسنه من تزوجنه اني وكفاح يعني هاي التفاصيل كلها تعرفيها وعشتيها ويانه المن بعد هالسؤال ..
...غدير ..اعرف بس جان عندي امل تكوم تحبني وره الزواج وتنساهه معبالي ليهسه عايشه بگلبك ..
...ياسين ..منو كالج ماناسيها .. لو ماناسيها جان مافاركتها أكثر من ست سنوات تره من طلگتها جان القرار قراري اني اختاريت الطلاك موهيه ...
...غدير ..مو هنا المشكله ..انته ندمان لان طلگتها واني ادري بيك بعدك تحبها ياسين لتضحك عليه ماكو احد يعرف الرجال بگد زوجته واني ادري بيك واعرف بشنو تفكر ..
....ياسين ..اكولج تره صارت بليه ملح شنو اني لو اريد كفاح ليش اطلگها من البدايه اصلا تره ممجبور ..
...غدير ...انته متعرف نفسك شلون اجيت من يمها ماشفت نفسك شلون صافن احجي وصارحني وكول بعدك تحبها ليش تضم عليه خلينه نحجي عالمكشوف ..
...ياسين .. ماكو شي من الاوهام البراسج وكافي سدي الموضوع تره بديت اضوج كافي عاد ..
. صرخت بأعلى صوتها وهيه تضرب على وجهها وكالت ..
...غدير ...ادري بيك تحبها احجي بصررراحه كوول احبهاا ليش تضم عليه قابل اني طفله وكلشي واضح من وجهك تره يااسين احجيي ..
....انداريت عليها بعصبية ومدري شلون حجيتها بدون ماادري وصرخت ..
...ياسين... اييي احببهااا ومانسيتهااا ارتاحيتي كافي عاد كافي حياتي وياج كلها مشاكل وجحيمم صارت كاافي تره مللييت ..
.................
نرجع للحاضر ..
.........
...رؤى ...عززه وابوج هيج حجاهه بكل صراحه كدام غدير خطيه شصار بيها ..؟!!
...سالي ...ماصار شي انتقمت من امي وابويه بيه اني .. لتخافين اخذت حقها مربع ..
...رؤى..اي كملي شصار بعدين ..
....سالي ..لا حبابه اريد اروح للبيت قبل ميجي ضرار ماريد اشوفه عود غير مره اجيج ونسولف .
....رؤى ..ابقي شويه شبيج مستعجله ميجي هسه والله راح لبيت زوجج يتأخر ..
من كالت زوجج حجيت بنتره وعصبيه وكلت .
...سالي ..لتگولين زوجج منقذ مو زوجيي ديربالج اسمعها منج خووش .
...رؤى ..يمعوده نسيت شبيج ضجتي والله مااقصد .
....سالي ..يله رح اروح اني ..
...رؤى ..لحظه سالي اريد احجي وياج ..
...سالي ..شنو گولي .
...رؤى ..يعني انتي لشوكت تبقين هيج اريد افتهم ..؟
...سالي ..يعني شنو هيج شبيه اني ..
...رؤى ..يعني تحبين غمار ومتزوجه منقذ ومتخلين منقذ يتقربلج وعايشه ابيت امج وعايفه بيت زوجج اقصد بيت منقذ يعني لا انتي للسما ولا انتي للكاع ..
...سالي ... مااريد اتزوج منقذ اني وداطلب منه الطلاق وهوه ميقبل يطلق واني مااكدر ارفع قضية طلاق اخاف اسوي خلع ويأخذ مني متيم خلي هيج بلكي يمل مني ويطلك من وحده شسويله ..
...رؤى .. يمعوده ديربالج منه لا تطخ براسه ويطلبج لبيت الطاعه وتكبر المشكله ..
...سالي ..يابيت طاعه وين عايشه انتي احنه بيازمن هسه حته يطلبني بيت الطاعه ..
...رؤى ..يمعوده همه عشيرتهم ساده شبيج وطبعهم صعب مينحملون ابد ..
...سالي ..والله من تگولين ساده وأتذكر البطاله مال ضرار ومنقذ والاتفاقيات الي جان يسويها بغمار اكره شكو سيد بالدنيا حشى الرسول والائمه ...
....رؤى ..شو ماجبتي طاري غمار تره هوه هم سيد عيني موبس منقذ وضرار ..
... سالي...اووف ياغمار .. غمار من صدك سيد .. سيد على گلبي وكل حياتي
ميشبه اخوه وابن عمه عبالك من غير عشيره مومنهم
.. شيرجع ايامي وياه مستعده ادفع نص عمري وارجع اعيش ويه غمار ..
.....رؤى .. شتسوين حضج هذه ممقسوم تبقين وياه ..
...دنحجي اني ورؤى وجان اسمع صوت الباب انفتح .. وره شويه طب علينه ضرار اول ماشافني كال ..
... ضرار ..يااهلاا بمرت ابن عمي ياهلا بسالي شلونج عاش من شافج عيني الچلب العضج كتلناه .. شو لا تجين لا تسألين شدعوه يابه ..
...سالي ..هلا بيك ضرار شخبارك الحمدلله بخير اني ..
...ضرار ..اي مبين عليج الخير واضح اصلا .. وزوجج حال الضيم حاله عايفته ..
..من كال زوجج ضجت منه حيل وخزرته بعيوني وكتله بصوت عالي ..
..سالي ..ديربالك اسمعك مره ثانيه تكول زوجج اني محد زوجي بس غمار افتهمت لولا ..
....ضرار ..اعصابج يعيني اعصابج ليطگلج عرج .
. شدعوه تره همه اخوان الي موجود عد غمار موجود عد منقذ ..
...سالي .. أما انته صدك واحد متستحي وشايل الخجل من قاموسك شلون تحجي وياي بهاي الطريقه شنو شايفني مثل صاحباتك الي تگضي وياهن وقت اني صوجي اجيت لبيتك ...اروح احسن ...
..........
...سالي ..طلعت من بيت ضرار واني دموعي تارسه عيوني وخدي واشهك مثل الطفله كلش انقهرت وجنت محتاجه غمار
من صدك حسيت نفسي صرت مطمع الهم والكل يطمع بيه أجرت سياره ورجعت للبيت وخلصت الطريق كله بجي ودموع ..
. داانزل من السياره وجان اشوف سيارة منقذ اباب بيتنه مركونه .
. نزلت وطبيت للبيت جان كاعد وحاط بحضنه متيم يلعب وياه من شافني طبيت وعيوني حمره حط متيم بالكاع وفز من مكانه واجه عليه وعيونه كلها خوف وكال ..
...منقذ ..شبيج منو وياج ليش تبجين ..؟
صرخت بعصبيه وكتله ..
...سالي ..مابيه شي عوووفني بحاالي لخااطر الله وحس على دمك يااخي مااريدك گوه يعني ماريدك طلگني شنو ماعندك كرامه شكد لزگه عووفووني بحااالي ..
....حجيت كل البكلبي وعفته ورحت اركض لغرفتي اريد اطب اسد الباب وجان اشوفه طب ورايه بسرعه صرخت وكلتله .
...سالي ...منقذ ..اطلع بره اطلع شلون تطب لغرفتي ..
...منقذ ..اريد اعرف شبيج ضل بالي شكو شصاير فهميني ليش تبجين ...؟
....سالي ..كتلك اطلع بره ماريد ابقه وياك بغرفه وحده اطلللععع
....منقذ ..شبيج تخبلتي وإذا بقيت يمج غير مرتي ولج احجي شصاير وياج ..
....سالي ..لااا مو مرتك وياريتني ماوافقت على هذه الزواج المصخم عوووفني واطلع من الغرفه تره اصرخ والم عليك الدنيا هسه اطلللععع ماااامه ويننج ررسسسلل وينكم تعاالوا اطلع بره اطلللع ..
....منقد... اوكي ماشي طالع لتصرخين خبال حته خبال ..شلون جان غمار متحملج صدك شاخطه
.. طالع واني اعرف شتصرف وياج منا وهيج بسيطه ...
..... سالي .. طلع منقذ وقفلت الباب بالمفتاح وراه وخلصتها بجي
.. صدك قهرني من گال شلون جان غمار متحملج
.. اووف ياغمار اووف رح ابقه عايشه بندم وحسره طول عمري بسبب الضلم الصار الك من ورايه ..
طلعت صور غمار من الكنتور وصفطتهن بالكاع وكمت اباوع عليهن وابجي لحد الليل .
..ابجي واحجي ويه الصور واتخيله كاعد يمي واسمع صوت ضحكاته ترن بأذني ..
بنص خيالي وصفنتي ودك موبايلي فتحته شفت رساله مجهوله مكتوب ..
.....
...ليش طلعتي من بيت رؤى تبجين عيونج ذبلانه وشكلج متغيير ماجنتي هيج قبل لتبجين موگتلج الغمازه يلوگلها الضحك ميلوگلها البجي ..
.....
...سالي ..قريت الرساله وحسيت گلبي رح يوكف هاي الجمله جان غمار يگولها اليه هذه منو الي يدزلي رسائل .
..وشلون عرف اني طلعت من بيت رؤى اني ماكلت لأحد رايحه لبيت رؤى ...
....بسرعه رجعت اتصلت بنفس الرقم الي دزلي رساله وجان يطلع مغلق ...
...الف سؤال اجه براسي اريد اعرف هاي الرسائل منين تجيني وشيردون مني ...
..................
...يتبع ♥️
#زهراء_الطائي
....
تصويت +تعليق ..
.....