....سالي .. واگفه عالمرايه حته اعدل الشال مالتي وارتب نفسي وأيدي ترجف احس نفسي متوتره حيل بحيث لفيت الشال اربع مرات ورجعت فتحته ..
دااعدل الشال واسمع مامه تصيح عليه صوتها واصل لغرفتي ..
....كفاح .. ولج وينج سالي فضيها رح نتأخر ديله عاد نمتي خوما نمتي ..
....سالي ..رتبت الشال ورشيت عطر وأخذت جنطتي والأوراق مالتي والبحث مال رسالتي ونزلت اركض ودكات كلبي تتسارع ..
...خلصت الدرج ولكيت مامه واكفه يم الدرج وشايله بحضنها متيم وبيده المميه مالته ووجه الطفولي يجبر الواحد يبقه صافن عليه .
. بسرعه اخذته من أيدها وكمت ابوس بي وهوه يناغي بحضني ...
...سالي ...حبيب مامه ميتو الحلو يمه اروحلك فدوه اني يبعد اهلي كلهم ...
...كفاح ..ولج فضيها هسه وقتج عوفي الطفل وامشي رح نتأخر ..
....سالي ... مامه من تحجين وياي هيج اتوتر بالزايد شبيج اني داالهي نفسي ويه متيم حته اوخر التوتر ..
...كفاح .. ميروح التوتر إلا تخلص المناقشه مال رسالتج شنو تضحكين على نفسج ..يله امشي رح نتأخر ..
...سالي ..حطيت متيم يم رسل وطلعنه اني ومامه .. وصلت للباب مال شارع وجان اشوف سيارة حاتم باوعت على مامه مستغربه وكلتلها..
....سالي ..حاتم شيسوي هنا مامه ؟
...كفاح ..غير حته يوصلنه للكليه مالتج شنو شيسوي ؟
...سالي ..اهووو وشصخم بي جايني موتدرين بيه اضوج منه مااطيقه ...
....كفاح ..عوفي هاي السوالف وامشي رح نتأخر
....سالي ..الله يصبرني شراح يخلص الطريق واني صاعده ويه حاتم المغثه ..
...كفاح ..ولج اشش اسكتي ليسمعج عيب ..
... سالي ..خليسمع شسويله ..
...سالي ..صعدت بالسياره بالكوشن الخلفي سلمت على حاتم من وره خشمي ودرت وجهي عالشباك اباوع للشارع ..
وهوه خلص الطريق يباوع عليه بالمرايه الاماميه بس اني مغلسه .. وره شويه رن موبايلي باوعت شفته اتصال من رؤى فتحت خط ..
...سالي ..الوو هلو روشه شلونج
...رؤى ...هلو بيج حبي ها وينج شو تاخرتي ؟
....سالي ...بالطريق نص ساعه ونوصل انتي وين ؟
... رؤى ...اني هم بالطريق بس دقايق واوصل قبلج رح انتضرج بره حته نطب سويه للقاعه ماشي ؟
...سالي ..تمام حبي متفقين يله باي
....باي
.....
...سالي ...وصلت للجامعه نزلنه اني ومامه ونزل ويانه حاتم داامشي تقرب مني راد يحجي وياي اتجاهلته ومشيت بسرعه وصلت للمدخل مال القاعه شفت رؤى واكفه تنتضرني رحت يمها سلمت عليها وهيه حضنتني وكالت ..
....رؤى ..ها شلون المعنويات بشري؟
...سالي ..يمعوده يامعنويات حاسه گلبي رح يوكف متوتره كلش وخايفه لا رسالتي متلاقي استحسان من اللجنه شلون شسوي شوفي ايدي ترجف ..
....رؤى...لا يمعوده لتخافين كولي يالله والله هسه تشوفين هسه تنقبل بتقدير ممتاز وكولي كالت رؤى .
..من كالت هيج رؤى ضحكت وكلتلها ..
....سالي ...هههههههه عزه ..ممتاز مره وحده يمعوده حتلو جيد حتلو متوسط راضيه بس كون انقبل ماريد الممتاز والله ..
.... رؤى ...ههههه داارفع معنوياتج شبيج ..يله روحي حضري نفسج رح يجون اللجنه ..
....سالي ..داامشي ورجعت باوعت على رؤى ومامه وكلتلهم ..
....سالي ...شلونه شكلي زين مرتبه مو ؟
...رؤى...تخبلين گمر لتخافين كلنا وياج متاكده رح تنجحين والله
....كفاح ..الله يوفقج مامه روحي متاكده رح تنقبل رسالتج بنجاح ..
....سالي ...عفتهم ورحت امشي باتجاه المقعد مالتي كعدت ورتبت اوراقي وحطيت البحث مالتي عالميز كدامي وبقيت انتضر اللجنه وره شويه كاموا يطبون كلهم لحد مااكتمل العدد والحضور ..
وبلشت المناقشه مال رسالتي .. واستمرت المناقشه لساعه ونص .
. بعد المشاوره بين أعضاء اللجنه كام وكف رئيس اللجنه حتى يعلن النتيجه واني گلبي يدك سريع وخايفه رغم جان عندي احساس انقبلت رسالتي بس هذه مايمنع شعور التوتر والترقب .
. بقت عيوني تفتر بين اللجنه وبين امي الي كاعده بعد مسافه عني والابتسامه متفارك وجهها وعيونها بيها لمعة فرح وفخر بيه ..
....قطع صفنتي رئيس اللجنه وحجى كدام الحضور وهوه يقرب المايكروفون من وجهه وكال ...
....اجتمعت اللجنه لمناقشة رسالة الماجستير للطالبه سالي ياسين حامد ...
بعلم النفس .. والوسواس القهري وطرق علاجه وكيفية التعامل مع حاملي هذا المرض ...قرار اللجنه ..
...قبول الرساله بعد إجراء التعديلات الطفيفه عليها وبتقدير جيد جداً عالي ..
....سالي ...من علن النتيجه امي كامت تهلهل وأصوات التصفيق ملى القاعه واني احس دموعي تريد تنزل من الفرح تمالكت نفسي وعدلت وگفتي ورحت امشي بخطوات ثابته باتجاه اللجنه سلمت عليهم وباركولي بنجاحي وأخذت صور وياهم ونزلت من المنصه .
....رحت باتجاه امي وحضنتها وكامت تبجي وتباركلي وهيه فرحانه ورؤى حضنتني والكل اجه يباركلي بنجاحي ..
واني ماالحك ارد عليهم جان يوم كلش حلو ومن اجمل ايام حياتي ..
...دااحجي ويه رؤى وجان اشوف حاتم اتقرب مني وكال ..
....حاتم ...الف مبروك سالي تستاهلين كل خير ..
....سالي ..الله يبارك بيك اشكرك حاتم ..
....رؤى ..شفتي موكتلج رح تنجحين كلت لو ماكلت ؟
....سالي ...هههههه اي كلتي بس اسكتي ..
...رؤى ..وبهاي المناسبه الحلوه ماالله هداج تقبلين اكتب قصة حياتج رواية حبابه شبيج فرحيني وكولي اي ..
....سالي ..اهووو رؤى هم رجعنه لنفس الموضوع مو وقته هسه تره عوفي ..
....رؤى ..والله مااعوفج الا توافقين شبيج سالي حبابه ..
...سالي ...بقت تلح عليه رؤى واني ملتهيه اسلم على صديقاتي وزملائي وهمه يباركولي وجان اسمع رؤى تحجي وياي وهيه تجر بالستره مالتي وكالت ..
.....رؤى ... سالي .سالي ...سالي باوعي ..
...سالي ..انداريت عليها بعصبيه وكلت .
...سالي ...رؤى كافي تلحين عليه دااكولج مااكتب قصتي ماريد شنو گوه هيه ..
....رؤى ..ولج مو عالروايه باوعي منو واكف هناك يم باب القاعه شوفي ..
..... سالي ..درت وجهي باتجاه باب القاعه وجان اشوفه واكف وعيونه عليه والابتسامه مرسومه على وجهه وصار يتقرب مني ويمشي باتجاهي .. همست لرؤى بصوت ناصي وكلت ..
... سالي ...هذه شجابه هنا شلون عرف اليوم المناقشه مال رسالتي ..
....رؤى ..شنو شلون عرف نسيتي ضرار لو اذكرج اكيد عرف من ضرار
وبعدين انتي شكو ضايجه موزين اجاج بهيج يوم حلو وبعدين هوه زوجج وإذا اجه متفرحين بحضور زوجج وياج بهذه اليوم ..
....سالي .. لتكولين زوجج هذه اكثر انسان آذاني ووجوده هنا يقهرني ميفرحني ..
....سالي ..دااحجي ويه رؤى وجان يوصل ووكف كدامي ومد ايده للسلام وكال ...
....منقذ ..الف مبروك بنجاحج اني فخور جدا بيج وجنت متاكد رح تنجحين ورسالتج تنقبل ..
....سالي ...الله يبارك بيك بس ماكان اله داعي تتعب نفسك وتجي لهنا ..
....منقذ ...شلون ماله داعي غير زوجتي ولازم افرح وياج بهذه اليوم ؟
.خزرته بعيوني وكلتله.
...سالي ..منقذ مو وقته هذه الحجي شنو زوجتك خاف مصدك نفسك صدك زوجي وماادري ..
....منقذ ..حتلو جان بس عالورق المهم انتي على ذمتي هسه ..
....سالي ..منقذ الله يخليك سد الموضوع وانته كلش زين تعرف اني اريد الطلاق من زمان ..
....منقذ ..هسه مو وقته نحجي بهذه الموضوع واحنه كدام الطلاب والاساتذه افرحي واستقبلي التبريكات بنجاحج والنه كعده ثانيه نحجي بيها ..
. يله اني اترخص في امان الله ...
...سالي .. كمل الجمله مالته وعافني وطلع من القاعه قبل ميسمع الرد مالتي
.. كملت المناقشه مال رسالتي واستقبلت التبريكات والتهاني ورجعنه للبيت ... اني ومامه وحته رؤى رجعت وياي بسيارة حاتم ..
....وصلنه للبيت اني شفت متيم يلعب بحضن رسل اخذته منها وكمت ابوس بي والعبه واخذته وياي وطبيت لغرفتي بدلت ملابسي وكمت العب متيم لحد مانعس ونومته
وطلعت من الغرفه رحت للصاله لگيت حاتم بعده يمنه وماراح تجاهلت وجوده وكمت اسولف ويه رؤى وصارت تحجيلي عن حياتها ويه ضرار
وشلون يعاملها خلصنه سوالف لحد العصر وراحت رؤى لبيتها واني طبيت لغرفتي ..
اريد انام تعبانه وجان اسمع صوت الموبايل يدك باوعت شفته اتصال من منقذ فتحت خط ..
....سالي ..الووو نعم
...منقذ ... شلونج سالي ؟
...سالي ...اعتقد شفتني اليوم بالجامعه وعرفت شلوني ميحتاج اكولك ..
...منقذ ...لشوكت رح تبقين تتعاملين وياي بجفاف هيج ؟
....سالي ..لحد ماتطلگني وتطلع من حياتي ..
.... منقذ ... وإذا ماطلگت؟
....سالي ...مو بكيفك تطلگني وإلا اني اسويها قضية خلع احسنلك انته طلك ليش اخلعك وموحلوه بحقك وانته دكتور والك اسمك ومركزك ..
....منقذ .. تدرين شنو رح تكون العواقب اذا تسويها خلع لهذه السبب ماعندج الجرأه تسويها ..
...سالي ..لا اذا عالجرأه موجوده بس اني مخليه احترام للعشره ولأن انته عم ابني ماريد اكبر المشكله ..
....منقذ ..عفيه عليج اني عم ابنج يعني اكدر اخذ متيم منج بأي وقت لهذه السبب انسيلي سالفة الطلاق ..
....سالي ...تره متيم ابني والحضانه اليه حتلو انته عمه مالك حق تاخذه مني ..
....منقذ .. لا الي الحق اسوي كلشي ليغرج سكوتي تره ساكت لان احبج بس مومعناهه مااكدر اسوي شي .. يله مع السلامه حياتي ديربالج على نفسج ..
.......
..سالي ..سديت الخط منه واني مغتاضه منه حيل يربي شوكت اخلص منك والله تعبت ومليت .
. اخخخ وينك غمار تعال شوف شصار بيه لو انته يمي جان ماصارلي اي شي من المشاكل الشفتها بحياتي ..
...وبيومها قررت اكتب قصتي واسويها روايه .. لان ردت ارجع اعيش حياتي ويه غمار وأقره روايتنا وتبقى ذكرى حته متيم من يكبر يقره قصة امه وابوه ويشوف حياتهم شلون كانت ..
اتصلت برؤى واتفقت وياهه احجيلها قصتي وتكتبها بشكل يومي وتصير رواية وطلبت منها تجي للبيت حته نتفق على الاسم مال روايه
.. ثاني يوم اجتي رؤى وكمنه نتناقش بلاسم وقررنا نسميها .. رهان مقبوضه ..
وكالت رؤى كل يوم تجيني للبيت وتخصص وقت اليه حته احجيلها قصتي .. وبلشنه نحجي وكالت ..
...رؤى ..جبت مسجل زغير بي كاسيتات فارغه رح اسجل كلامج كصوت وراهه اروح اكتبه بطريقتي بالبيت لان مااكدر اكتب وانتي تحجين ماالحك تمام ؟
...سالي ..تمام .. شوكت نبلش ..؟
...رؤى ..براحتج تحجيلي هسه شويه عندي مجال نص ساعه واروح لبيتي ..
...سالي ..اوكي .. احجي شويه ومن تروحين اتوقف ..
...رؤى ..تمام يله رح افتح تسجيل احجي منين رح تبلشين سرد ..
...سالي ... رح ابلش من حياة امي وابويه وشلون كانت ضروفهم واستمر بالسرد تمام ..
...رؤى ..براحتج المهم بلشي اني بعدين اكتبها بطريقتي يله احجي اسمعج ..
.......
سالي... رجعت بالذاكره للماضي ...
...سالي ... امي وابويه تزوجوا على حب جانت مامه جيران بيت جدي وكل يوم تطلع تروح للمدرسه وابويه يبقه يمشي وراهه لحد مايتاكد وصلت للمدرسه
وبقه هذه حالهم سنه كامله حبهم بس نضرات لا بابه حجه ويه امي ولا امي تواصلت وياه إلى أن نجحت مامه من السادس اعدادي وجانت ناويه تدرس طب وتصير دكتوره
ابويه من خطبها اتفق وياهه تكمل دراسه وره الزواج وتزوجوا وحبلت بيه والتهت بيه وبتربيتي لمدة سنه وراهه رادت ترجع تقدم عالكليه حته تكمل دراسه
بس ابويه رفض وهذه الشي صدم امي لان هوه اتفق وياهه تدرس حته بعد الزواج وحاولت هواي تخلي يوافق تكمل دراسه لكن بابه بقه مصر على قراره وكلما تكوله ارجع اكمل دراسه هوه يعاند
وتكبر مشاكلهم يوم عن يوم وتحول الحب مالهم إلى نزاع عائلي كل يوم يصبحون ويمسون على عركه لكن مامه بقت مصره تريد تكمل دراستها وتحقق طموحها إلى أن بيوم من الايام كالت لابويه ..
....كفاح ..ياسين اني اريد اكمل دراستي وهذه جان شرطي قبل الزواج وانته وافقت عليه ليش هسه ترفض بس فهمني ليش ؟
...ياسين ..عوفي الدراسه والتهي ابيتج وبنتج انتي عندج طفله محتاجه رعايه والطب مجال صعب يرادله تفرغ رح تلتهين بدراستج وتهملين بنتج مو ؟
....كفاح ..والله مااهمل احد فدوه اروحلك لا تصير ضدي صير سند اليه وخليني اكمل دراسه هذه حلمي واتمنى احققه فدوه لعيونك ..
..صرخ بصوت عالي وكال..
..ياسين ..دااكوللج انسي الدراسه وممنوع ينفتح هذه الموضوع كدامي كافي عاد تره لحيتي هواي كفاح كافي تعبت منج ومن عيشتي وياج صارت حياتنه كلها عباره عن مشاكل كافي ..
...كفاح ...من شفت ياسين هيج مصر على قراره اني هم اصريت اكثر وكلت لازم ادرس واحقق حلمي لو مهما كان الثمن كمت وكفت وكتله ...
...كفاح ..ياسين ..اني رح اكمل دراسه لو مهما تسوي الاسبوع الجاي ينفتح التقديم عالجامعات واني رح اقدم وكافي عاد بعد مااتحمل هيج عيشه تره ..
....حجيت كلامي وياه ومشيت وجان اسمعه يصيح وكال ..
...ياسين ..لعد اختاري .. لو دراستج لو بنتج وانتي بكيفج ؟
....كفاح ..شنو يعني مافهمت ؟!
...ياسين ..يعني اذا رجعتي للدراسه كلمن يروح من طريق واني اخذ سالي منج واطلكج وروحي كملي دراسه ..
....كفاح ..من كال هيج تقربت منه وكتله بصوت كله رجاء وتوسل ...
....كفاح ..ليش هيج ياسين تريد تلوي ذراعي ببنتي حرام عليك والله اني ماطالبه منك غير بس ادرس اني احبك وماريد اطلك منك ولا اريد اعوف بنتي شبيك وياي فهمني ؟
....ياسين ..اني كلت الي عندي لو الدراسه لو بنتج غير هذه الحجي ماعندي ..
.كفاح ...حجه وياي وعافني وطلع واني بقيت حايره ودموعي على خدي مااعرف شسوي مااكدر اعوف بنتي ولا اكدر اعوفه اني احبه بس هم احب دراستي .
. اخخخ ياسين ليش هيج تسوي بيه ليش ...
.....كفاح .. بقه ياسين زعلان مني وميحجي وياي لمدة أسبوع واني قررت اروح اقدم عالكليه وكلت مااكوله اله اشوف ياكليه رح انقبل بلكي من يشوف الشغله صارت صدك يفرح ويغير رأيه .
قدمت عالكليه وانقبلت كلية تمريض وجنت كلش فرحانه اجيت للبيت حته اكول لياسين وانصدمت من الرد مالته طبيت للبيت لكيته كاعد عالقنفه وبيده جكاره يدخن بيها اول ماطبيت باوع عليه بنضره كلها غضب وكال ..
...ياسين ..وين جنتي خاتون ؟
...كفاح ..شلونك حبيبي ..
...صرخ بوجهي وكال ..
...ياسين ..دااحجي وياااج وين جنتي جاووبي ..
....كفاح ..جنت بالكليه انقبلت كلية تمريض واجيت ابشرك اني موكتلك رح اقدم عالكليه ؟
...ياسين ..واني وافقت ؟
...كفاح ..شنو ؟
...صرخ بوجهي وكال ...
....ياسين ..واننيي واافقتت عالقدييمم لوولااا؟
نزلت راسي بحزن وكلتله.
...كفاح ...لا ماوافقت
....ياسين ...لعد شلون تروحين تقدمين وتدرين بيه مموافق شلووون تكسرين كلمتي يامتربايه يابنت الأصول ؟.
...باوعت عليه وكتله ..
...كفاح ..الي سويته ماله علاقه بالتربيه اني حلمي ادرس وانته وعدتني وره الزواج اكمل دراسه ليش تغيرت عليه فجأه وكمت ترفض دراستي ..
....ياسين ..معناهه اختاريتي ؟
...كفاح ...شنو شختار؟
.... ياسين ...اختاريتي دراستج وعفتي بنتج مو ؟
...كفاح ..لا طبعا مااعوف بنتي ولا اعوفك اني اريدكم كلكم بس هذه ميمنع أنه اكمل دراسه .
.باوع عليه وعيونه حمره من الغضب وكال ..
..ياسين ..لمي ملابسج واتصلي باخوج يجي ياخذج ..ماطولج قررتي تكملين دراسه بعد كلمن بطريق اني وياج وبنتج انسيها .
. اني ميشرفني ابقي وحده متسمع كلامي على ذمتي .
...كفاح ...كمت ابجي واتوسل بي ونزلت جوه رجله بس اريده يعوف سالفة الطلاق مااكدر اعوف بنتي ولا اعوفه اني احبه
كام هوه اتصل باخويه ولم ملابسي وخلاني اعوف البيت وبذاك اليوم ماشفت سالي ابد جانت طفله عمرها 3 سنوات توسلت بي يبقيها اليه وهوه رفض
رجعت لبيت اهلي واني الحزن والحسره تارسه گلبي وروحي حسيت نفسي خسرت كلشي بقيت بحالة انهيار عصبي وبس اصرخ وابجي اريد بنتي انحرمت من بنتي الوحيده بحيث من البجي والعياط صوتي اختفى
صرت شبه خرسه كمت احجي بالاشارات اخويه عادل بقه حاير بيه من دكتور لدكتور وماكو فائده
.. لحد مابيوم من الايام أندكت الباب وجان ياسين دازلي ورقة طلاگي بيومها صدك حسيت نفسي خسرت كلشي
زوجي الي حبيته وبنتي الوحيده كمت اصرخ وابجي والطم صارت بيه حاله هستيريا واخويه احتار شلون يسكتني وماكدر لحد ما فقدت الوعي وكمت اخذ حبوب منوم يله اكدر انام ..
. فارگت بنتي لمدة سنه بقيت احلم بيها ليل ونهار ومخلصتها بجي وحزن حته الدراسه نسيتها لحد مااخويه عادل راح لياسين وكام يتوسل بي
واتفق وياه يدزلي سالي يوم واحد بلاسبوع اشوفها وترجع يمه وبصعوبه يله وافق ياسين
.. وصرت اشوف سالي بنتي مره وحده بلاسبوع شويه تعدلت حالتي النفسية ورجعت للدراسه ...
........نرجع للحاضر ...
.....رؤى ...زين وبعدين شصار من كامت تدرس خاله كفاح وابوج شصار بيه وراهه من فاركها ...؟
....سالي ... خلي نكمل باجر حبابه تعبت من الحجي ههههه
...رؤى ..تمام براحتج اني اروح لعد اتأخرت كلش ..
...سالي .. شلونج ويه ضرار ؟
...جرت حسره رؤى وكالت ..
...رؤى ...شلوني ضرار ميتغيير نفسه هوه هوه يوميه جايني سكران ويوميه اشوفه يخابر وحده شكل عادي تعودت عليه وعلى سوالفه ..
...سالي ...ولشوكت رح تبقين متحمله كل هذه الضيم ..
....رؤى ..ماادري كلما احجي وياه تصير مشاكل بيني وبينه وانتي تدرين بيه مااكدر بدونه احبه شلون شسوي ؟
...سالي ..يمعوده ياحب وين اكو حب بهالوقت هذه ..
...رؤى ..لعد انتي مو حبيتي غمار شو تحجين عبالك ماعشتي الحب بحياتج ؟
....سالي... اوووف غمار متشوفينه عافني لان ماعندي حظ هوه وين اكو مثل غمار بالدنيا كلها ..
....رؤى ...اكو اخوه الي كاتل نفسه عليج بس انتي احساس ماعندج هههههه
....سالي ...اهووو رؤى سدي الموضوع حقج تدافعين عن منقذ غير يصير ابن عم ضرار زوجج اسكتي فدوه لعينج مالي خلگ تره ..
....رؤى ...هههههه يله رح اروح اتاخرت عود باجر اجيج ونكمل سوالف تمام يله باي
....سالي .. باي
.... سالي ..راحت رؤى واني طبيت لغرفتي صاحتني مامه ورسل عالعشه ومااكلت وياهم جنت ضايجه حيل ..
طبيت لغرفتي وطلعت الصور وكمت اگلب بيهم ..
...اجتي بيدي صورة غمار باوعت عليه وضليت ابجي .. واحجي وياه بقهر ...
....سالي ...اخخ ياحبيبي ياريتك يمي اليوم وتشوف شلون نجحت ووصلت لحلمي الي جنت احجيلك عنه
.. غمار لو تدري شكد محتاجتك يمي اخخخ كله بسببي الي صارلك والله مااسامح نفسي طول العمر كلشي صارلك بسببي وكارهه حياتي كلها
الدنيا صارت سوده بعيوني من يوم العفتني اخخخ لو يرجع الزمن ليوره مااعوفك ولا اخليك تعيش الاحساس الي عشته وياي
.. ياريتك يمي حته اكولك سامحني حبيبي ياريت لو يمي واكعد احجي وياك واشوف ضحكتك الحلوه ياحبيبي ..
..................
يتبع ♥️
#زهراء_الطائي
.
تصويت + تعليق ..
....
.....
مواعيد النشر بين يوم ويوم بنات حته متكولون ليش تتاخرين . يعني مو باجر عگبه ينزل البارت القادم ♥️
...
احبكم ..
وإذا شفت تفاعل قوي وتعليقات احتمال اسوي النشر كل يوم بعد انتو وشطارتكم 🌺